ब्राजिलमा दैनिक कोरोनाबाट मृत्यु हुनेको संख्या १२ सय नाघ्यो
काठमाडौैं । ब्राजिलमा एकै दिन फेरि १ हजार २ सयभन्दा बढी कोरोना संक्रमणबाट मृत्यु हुनेको संख्या पुगेको छ । विश्वमा सबैभन्दा कोरोना संक्रमण हुने दास्रो स्थानमा रहेको ब्राजिलमा पछिल्लो २४ घण्टा यता १ हजार २ सय ३२ जनाको मृत्यु भएको छ भने २७ हजार २ सय ६३ जना नयाँ कोरोना संक्रमित भेटिएका छन् । उच्च कोरोना संक्रमण भएको अमेरिका पछि दोस्रो स्थानमा रहेको ब्राजिलमा ५ लाख ५६ हजार ६ सयभन्दा बढी मानिसमा संक्रमण पुष्टि भएको छ । त्यस्तै ३१ हजार २ सय ७८ जनाको मृत्यु भइसकेको छ । ब्राजिलको सबैभन्दा ठूला आदिवासी समुदायमध्ये एक यानोमामीका धेरै सदस्यको मृत्यु पछि खानीमा काम गर्नेहरूलाई हटाउने माग गरिएको छ । यानोमामी समुदायका मानिसहरू बाहिरी व्यक्तिहरूलाई उनीहरूको बसोबासको क्षेत्रबाट टाढा रहन चाहेकाे कुरा विदेशी संचारमाध्यममा आएका छन् । पान अमेरिकी स्वास्थ्य संगठनले सरकारले भाइरस रोक्नको लागि अझै पर्याप्त कदम चालेको छैन भन्छ । पीएचओले सरकारलाई यो भाइरस रोकथाम गर्न नदिएका प्रतिबन्धहरूलाई शिथिल नगर्न चेतावनी दिएको छ । पीएएचओले भनेका छन कि यो ब्राजिलियालीहरुलाई हुने खतराको बारेमा चिन्तित छ । संगठनले आदिवासी समुदायहरूको अझ राम्रो अनुगमन हुनुपर्ने भनेको छ ।
इजरायली प्रधानमन्त्री कार्यालयकाे कर्मचारीमा कोरोना
काठमाडौं । इजरायलका प्रधानमन्त्री बेन्जामिन नेतन्याहुको कार्यालयमा कार्यरत कर्मचारीलाई कोरोना संक्रमण पुष्टि भएको छ । इजरायलका प्रधानमन्त्रीको कार्यालयले यो जानकारी दिएको हो । ७० वर्षीय प्रधानमन्त्री नेतन्याहु ती संक्रमित कर्मचारीको सम्पर्कमा थिए कि थिएनन् भन्ने जानकारी भने दिइएको छैन । प्रधानमन्त्री कार्यालयबाट जारी विज्ञप्तिमा यसबारे अनुसन्धान जारी रहेको उल्लेख छ । त्यसपछि संक्रमित व्यक्तिको सम्पर्कमा आएकाहरुलाई आवश्यक दिशानिर्देशन गर्ने विज्ञप्तिमा उल्लेख छ । यसभन्दा अगाडी पनि प्रधानमन्त्री नेतन्याहुले दुई पटक कोरोना संक्रमणको खतरा सामना गरिसकेका छन् । गत मार्च महिनामा उनका सल्लाहकारमा संक्रमण पुष्टि भएको थियो । त्यसपछि अप्रिल महिनामा तत्कालीन स्वास्थ्यमन्त्रीमा कोरोना परीक्षण गरिएको थियो, यद्यपि उनको रिपोर्ट नेगेटिभ आएको थियो । जोन्स हप्किन्स विश्वविद्यालयका अनुसार इजरायलमा हालसम्म १७ हजार १ सय ६९ जनामा कोरोना संक्रमण पुष्टि भएको छ भने २ सय ८५ जनाको मृत्यु भएको छ ।
हिंसात्मक प्रदर्शन अन्त्यका लागि सेना र प्रहरी परिचालन : ट्रम्प
काठमाडाैं । अमेरिकी राष्ट्रपति डोनल्ड ट्रम्पले अमेरिकाभर विभिन्न सहरहरूमा दङ्गा र लुटपाट भइरहेका बेला त्यसको अन्त्यका लागि हजारौं सेना र प्रहरीलाई परिचालन गर्ने बताएका छन् । प्रहरी हिरासतका क्रममा एक अफ्रिकी अमेरिकी निहत्था व्यक्ति जोर्ज फ्लोइडको हत्यालाई लिएर देशभर प्रदर्शनहरू भइरहेका बेला उनले यस्तो बताएका हुन् । टेलिभिजनमार्फत् सम्बोधन गर्दै उनले भने, ‘दङ्गाबाट हाम्रो अति विपन्न समुदायका शान्तिप्रेमी नागरिकहरू सबैभन्दा पीडित भएका छन् र राष्ट्रपतिका हैसियतले म उनीहरूलाई सुरक्षित राख्नका लागि सक्दो गर्छु ।’ साे सम्बोधन गरेपछि ट्रम्प ह्वाइट हाउसबाट नजिकै रहेको एउटा गिर्जाघरसम्म सुरक्षाकर्मीसाथ पैदल गएका थिए । उक्त गिर्जाघरमा प्रदर्शनका क्रममा क्षति पुगेको थियो । ह्वाइट हाउसबाहिर प्रदर्शन गर्ने प्रदर्शनकारीलाई प्रहरीले तितरवितर पारेको थियो । गभर्नरलाई ट्रम्पको आह्वान ट्रम्पले देशभर प्रहरीको बर्बरताविरुद्ध भएका हिंसात्मक प्रदर्शनहरूमा हाबी हुन राज्यका गभर्नरहरूलाई आह्वान गरेका छन् । भिडिओ सम्मेलनमा ट्रम्पले दशकौंमा भएको एकदमै खराब अशान्त अवस्थाका माझ गभर्नरहरूले चालेका कदम निकै कमजोर देखिएको बताएका हुन् । यसैबीच, न्यूयोर्कका गभर्नर एन्ड्र्यू कोमोले हिंसा हुन नदिन भन्दै न्यूयोर्कमा राति ११ बजेबाट कर्फ्यू लाग्ने घोषणा गरेका छन् । फ्लोइडको हत्याका कारण अमेरिकामा मात्रै नभइ केही युरोपेली देशहरूमा पनि विरोध प्रदर्शन भइरहेका छन् । स्पेनको बार्सिलोनाबाहेक ब्रिटेन र बर्लिनस्थित अमेरिकी दूतावासबाहिर पनि मानिसहरूले प्रहरीको दमनलाई लिएर विरोध प्रदर्शन गरिरहेका छन् । न्यूयोर्कका पूर्व परीक्षक डाक्टर माइकल बाडेनले पत्रकार सम्मेलनमा भने, ‘मेरो विचारमा हत्याको कारण घाँटीमा दबाइएकाले भएको हो । त्यसले अक्सिजनलाई दिमागमा जान रोक्छ र ढाडमा दबाउँदा सास फेर्न गाह्रो हुन्छ ।’ एक साताअघि देखापरेको भिडिओमा एकजना श्वेत प्रहरीले जोर्ज फ्लोइडले सास फेर्न गाह्रो भयो भनेर अनुरोध गर्दा पनि गर्दनमा निरन्तर रुपमा घुँडाले थिचिरहेको देखिन्छ । उक्त घटनाले देशभर अशान्त अवस्था बनाएको छ । अमेरिकाका विभिन्न सहरमा छैठौं दिन पनि प्रदर्शनहरू भइरहेका छन् र दशकौंमा यो स्तरमा अशान्ति नदेखिएको बताइएको छ । चिकित्सक बाडेनले फ्लोइडको मृत्यु हुनेगरी अन्य कुनै खालको स्वास्थ्य समस्या नरहेको पनि बताए । फ्लोइडको परिवारका वकिलले मानिसलाई नियन्त्रणमा लिने तरिकामा सुधार गरेको भए फ्लोइडको जीवन बचाउन सकिने भन्दै त्यसका लागि मिनियापलिसको प्रहरी कार्यालयलाई आरोप लगाएका छन् । (बीबीसी)
