बैंकिङमा एआईको प्रयोग बढाउन ग्लोबल आइएमईको ह्याकाथन सुरु
काठमाडौं । ग्लोबल आइएमई बैंकले आर्टिफिसियल इन्टेलिजेन्स (एआई) र मेसिन लर्निङ (एमएल) सम्बन्धी नवप्रवर्तनलाई प्रोत्साहन गर्ने उद्देश्यले ‘ग्लोबल आइएमई एआई–एमएल ह्याकाथन २०२६’ सुरु गरेको छ । शुक्रबार आयोजित विशेष समारोहमा बैंकका प्रमुख कार्यकारी अधिकृत (सीईओ) सुरेन्द्रराज रेग्मीले प्रतियोगिताको उद्घाटन गरेका हुन् । बैंकिङ क्षेत्रमा अत्याधुनिक प्रविधिको प्रयोगलाई प्रोत्साहन गर्ने उद्देश्यले गत वर्ष पहिलोपटक ह्याकाथन आयोजना गरेको बैंकले यस वर्ष दोस्रो संस्करण सञ्चालन गरेको जनाएको छ । प्रतियोगितामा प्रविधिमा रुचि राख्ने विद्यार्थी, स्टार्टअप, डेभलपर, इन्जिनियर, डेटा वैज्ञानिक तथा अनुसन्धानकर्ताहरूबाट खुला आवेदन माग गरिएको थियो । तीमध्ये छनोट भएका १४ टोली आवासीय प्रतियोगितामा सहभागी छन् । बैंकका अनुसार प्रतियोगिता दुई चरणमा सञ्चालन हुनेछ। पहिलो चरणमा सहभागीहरूले लगातार ३६ घण्टासम्म कोडिङ गर्नेछन् भने दोस्रो चरणमा अनसाइट ह्याकाथन आयोजना हुनेछ । सहभागी टोलीका लागि आवासीय व्यवस्थासमेत गरिएको छ । प्रतियोगिताका क्रममा टोलीहरूले बैंकले निर्धारण गरेका विभिन्न विषयमा आधारित नवीन अवधारणा र समाधान प्रस्तुत गर्नेछन् । ती समाधानले बैंकिङ सेवालाई थप सुरक्षित, सरल, प्रभावकारी र प्रविधिमैत्री बनाउन सहयोग पुग्ने अपेक्षा बैंकको छ । उद्घाटन कार्यक्रममा सीईओ रेग्मीले ह्याकाथनले डिजिटल बैंकिङका भावी सेवा विकासका सम्भावना पहिचान गर्न र यस क्षेत्रमा देखिने चुनौतीहरूको समाधान खोज्न महत्वपूर्ण भूमिका खेल्ने विश्वास व्यक्त गरे । उनले प्रतियोगिताबाट उत्कृष्ट प्रदर्शन गर्ने टोलीलाई नगद पुरस्कार प्रदान गरिनुका साथै बैंकसँग व्यावसायिक सहकार्य गर्ने अवसरसमेत उपलब्ध गराइने जानकारी दिए ।
स्ट्यान्डर्ड चार्टर्डसँग सानिमा बैंकको सहकार्य, एपीआईमार्फत अन्तर्राष्ट्रिय भुक्तानी
काठमाडौं । सानिमा बैंकले स्ट्यान्डर्ड चार्टर्ड बैंक भारतसँगको सहकार्यमा एपीआईमा आधारित सीमापार भुक्तानी सेवा सुरु गरेको छ । भारतीय रुपैयाँमा हुने बाह्य भुक्तानी कारोबारलाई छिटो, सुरक्षित र स्वचालित बनाउन दुवै बैंकले अत्याधुनिक एपीआई प्रणाली सञ्चालनमा ल्याएका हुन् । बैंकका अनुसार यस साझेदारीसँगै सानिमा बैंक स्ट्यान्डर्ड चार्टर्ड बैंक भारतसँग सीमापार भुक्तानीका लागि एपीआई कनेक्टिभिटी स्थापना गर्ने नेपालको पहिलो बैंक बनेको छ । नयाँ प्रणाली लागू भएपछि परम्परागत म्यानुअल तथा ब्याचमा आधारित भुक्तानी प्रक्रियाको स्थान पूर्ण रूपमा स्वचालित तथा रियल टाइम भुक्तानी प्रणालीले लिने बैंकले जनाएको छ । यसबाट अन्तरदेशीय भुक्तानी अझ छिटो, सहज र प्रभावकारी हुने विश्वास गरिएको छ । यसैबीच, दुवै बैंकबीच एपीआईमार्फत अमेरिकी डलरमा समेत भुक्तानी सेवा सञ्चालन गर्ने समझदारी भएको छ । यसले सीमापार बैंकिङ सहकार्यलाई थप विस्तार गर्ने र अन्तर्राष्ट्रिय कारोबारलाई अझ प्रभावकारी बनाउने अपेक्षा गरिएको छ । सानिमा बैंकका प्रमुख वित्तीय अधिकृत (सीएफओ) निरज ढकालले यो पहलले सीमापार बैंकिङ सेवामा नवीन, सरल, छिटो र भरपर्दो सेवा प्रदान गर्ने बैंकको प्रतिबद्धतालाई थप मजबुत बनाएको बताए । उनका अनुसार यसबाट नेपाल–भारतबीचको वित्तीय कारोबार थप सुरक्षित, सहज र तीव्र हुने तथा ग्राहकको अनुभवमा उल्लेखनीय सुधार आउनेछ । स्ट्यान्डर्ड चार्टर्ड बैंक नेपालका हेड अफ फाइनान्सियल इन्स्टिच्युसन्स राजकमल बस्नेतले यो साझेदारीले स्ट्यान्डर्ड चार्टर्डको सीमापार बैंकिङ अनुभव र सानिमा बैंकको प्रविधिमैत्री एपीआई समाधानलाई एकीकृत गरेको बताए । उनका अनुसार यसबाट अन्तर्राष्ट्रिय कारोबारको समय र लागत घट्ने, पारदर्शिता बढ्ने तथा दक्षता, सुरक्षा र नियामकीय अनुपालन अझ सुदृढ हुनेछ ।
राष्ट्रिय बीमा कम्पनीमा रोजगारीको अवसर, विभिन्न पदमा १७ कर्मचारी माग
काठमाडौं । सरकारी स्वामित्वको निर्जीवन बीमा कम्पनी राष्ट्रिय बीमा कम्पनीले विभिन्न पदमा कर्मचारी माग गर्दै दरखास्त आह्वान गरेको छ । कम्पनीले विभिन्न पदमा १७ कर्मचारी माग गरेको हो । कम्पनीले प्रशासन, सह व्यवस्थापक १ जना, प्रशासन चार्टड एकाउन्टेन्ट १ जना, प्रशासन नायव व्यवस्थापक १ जना, प्रशासन कानून अधिकृत १ जना, प्रशासन, सहायक व्यवस्थापक ३ जना माग गरेको छ । त्यस्तै प्रशासन, सहायक ‘क’ पदमा १ जना, स्वास्थ्य सहायक १ जना, सूचना प्रविधि सहायक १ जना, प्रशासन, सहायक ‘ख’ ६ जना र कृषि प्राविधिक पदमा १ जना माग गरेको छ । विभिन्न पदका लागि सम्बन्धित विषयमा स्नातकोत्तर, स्नातक, प्रवीणता प्रमाणपत्र तह (१०+२) वा एसएलसी÷एसईई उत्तीर्ण गरेका नागरिकहरूले आवेदन दिन सक्नेछन् । उमेरको हकमा अधिकृत स्तरका लागि २१ वर्ष पूरा भई ३५ वर्ष ननाघेको र सहायक स्तरका लागि १८ वर्ष पूरा भई ३५ वर्ष ननाघेको हुनुपर्नेछ । महिला तथा अपाङ्गता भएका उम्मेदवारहरूको हकमा माथिल्लो उमेरको हद ४० वर्ष सम्म तोकिएको छ । सम्बन्धित पदहरुमा योग्यता पुगेका नेपाली इच्छुक नागरिकले साउन ७ गतेसम्म र दोब्बर दस्तुर तिरी साउन १४ गतेसम्म अनलाइन माध्यमबाट आवेदन दिनु पर्ने कम्पनीले जनाएको छ । परीक्षा दस्तुर र छनोट प्रक्रिया परीक्षा दस्तुर तह ६ देखि ९ का लागि १ हजार २ सय रुपैयाँ र तह ४ तथा ५ का लागि ८०० रुपैयाँ तोकिएको छ ।
