दुर्व्यसनका विरुद्धमा (कविता )
लागेर कुलतमा भागेर आफैदेखि कहाँ पुग्छौं र ? युवा ! हुँदैन कुनै समस्या समाधान गरेर लागूपदार्थ सेवन भो नगर दोमन । क्षणिक लतमा फसेर, बसेर साथी भनिएका, बनिएकाहरुसँग जीवन बर्बाद नगर।। तनाव भुल्ने, बहानामा झुल्न हुँदैन नशामा सिर्जनाका अनेक आयाम छन् मन लगाऊ त्यसैमा र सजाऊ जिन्दगीको रङ्गमञ्च आउने छैन पुनः यो गुलाबी उमेर मात्र छुटाउने छ यसले असल मित्रता, आफन्त बाआमाका सुन्दर सपना तिम्रो आफ्नै लक्ष्य हराउने छ कुहिरोको काग बन्नेछौ त्यति बेला एक्लै हुनुको पश्चातापले तड्पिदै रुनुको अर्थ रहँदैन ।। कमजोर तन,मन लिएर कहाँ सकिन्छ ? दूर सफर गर्न जिन्दगीको । गाह्रो पर्नेछ दुनियाँको छिछिदुर्दुर सहन न अर्थ रहन्छ न कोही सहन्छ ? समय नदीजस्तै बहन्छ ।। भो, छाडिदेऊ कुलत नभाग समस्यासँग डराएर आऊ एक भएर लागौँ सिर्जनामा यो धर्ती सिँगार्नु तिम्रो पनि कर्तव्य होइन र ?।। क्राेध,ईर्ष्या र द्वेषले सक्छ आफैलाई नलगाऊ त्यता मन नफाल व्यर्थ धन जोगाएर पन, फुलाऊ जीवन ।। कहाँ छ हार ? कि जितिन्छ कि सिकिन्छ भो यसै खेर जान नदेऊ सार्थक पार्ने प्रण गर जिन्दगी।। कमजोर, खत्तम भन्नेहरुलाई गरेर देखाइदेऊ उद्यम अल्झेर वादविवादमा खेर नफाल समय यो सिर्जनाको याम हो ।। आवाज बुलन्द पारौं, बाचौं र बचाऊँ विरुद्धमा लागौं लागूपदार्थ दुर्व्यसनको ।। -गोपाल खनाल दाङसिङ,नुवाकोट
भेनेजुएला भूकम्प: मृतकको संख्या ५८९ पुग्यो, घाइते २९८०
काठमाडौं । भेनेजुएलाका अन्तरिम राष्ट्रपति डेल्सी रोड्रिगेजले बुधबारको भूकम्पबाट मृत्यु भएकाको संख्या ५८९ पुगेको र २ हजार ९८० जना घाइते भएको बताएकी छन् । रोड्रिगेजले भूकम्पबाट सबैभन्दा बढी पीडित क्षेत्रमध्ये एक ला गुएरालाई नियन्त्रणमा लिन सेनालाई आदेश पनि दिएका छन् । बीबीसीका अनुसार अस्पतालहरू घाइतेले भरिएका छन् । संयुक्त राष्ट्रसंघले घटनास्थलमा १ हजारभन्दा बढी अन्तर्राष्ट्रिय खोज तथा उद्धारकर्मी खटाइएको बताएको छ । संयुक्त राष्ट्रसंघका मानवीय प्रमुख टम फ्लेचरले बीबीसी रेडियो ४ को टुडे कार्यक्रममा भनेका छन्, ‘म भेनेजुएलाका मानिसहरूलाई मद्दत आउँदै छ भन्ने जानकारी गराउन चाहन्छु । ’ स्थानीय समयअनुसार बुधबार साँझ भेनेजुएलामा सुरुमा ७.२ म्याग्निच्युड र यसको केही सेकेन्डपछि अझ शक्तिशाली ७.५ म्याग्निच्युडको भूकम्प गएका थिए । भूकम्प गएलगत्तै अमेरिकी भूगर्भ सर्वेक्षण (यूएसजीएस) ले १० हजारभन्दा बढी मानिसको मृत्यु हुने सम्भावना ४४ प्रतिशत रहेको अनुमान गरेको थियो । स्थानीय सञ्चारमाध्यमका अनुसार मृतकको संख्या अझै बढ्ने सम्भावना छ ।
रास्वपाको नयाँ नेतृत्वले लियो शपथ, महाधिवेशनपछि पाटीले समात्यो नयाँ गति
काठमाडौं । राष्ट्रिय स्वतन्त्र पार्टी (रास्वपा)को प्रथम महाधिवेशनबाट निर्वाचित नयाँ पदाधिकारी तथा केन्द्रीय सदस्यहरूले पद तथा गोपनीयताको शपथ ग्रहण गरेका छन् । महाधिवेशनस्थलमै आयोजित विशेष समारोहमा नवनिर्वाचित नेतृत्वले शपथ लिएसँगै रास्वपाले औपचारिक रूपमा नयाँ नेतृत्वको जिम्मेवारी हस्तान्तरण गरेको हो । महाधिवेशनबाट सभापतिमा रवि लामिछाने सर्वसम्मत निर्वाचित भएका थिए भने खुला उपसभापतिमा डा. स्वर्णिम वाग्ले निर्विरोध निर्वाचित भएका हुन् । निर्वाचनमार्फत महिलातर्फ उपसभापतिमा सोविता गौतम, महामन्त्रीमा विपिनकुमार आचार्य तथा सहमहामन्त्रीमा खुलातर्फ हरि ढकाल र असिम शाह विजयी भएका छन् । महिलातर्फ सहमहामन्त्रीमा निशा डाँगी निर्वाचित भएकी छन् । महाधिवेशनअन्तर्गत पहिलो चरणमा केन्द्रीय सदस्यहरूको निर्वाचन सम्पन्न भएको थियो भने दोस्रो चरणमा पदाधिकारी चयनका लागि मतदान भएको थियो । शपथग्रहणसँगै रास्वपाको नयाँ नेतृत्वले आगामी संगठन विस्तार, पार्टी सुदृढीकरण र राजनीतिक जिम्मेवारीलाई प्रभावकारी रूपमा अघि बढाउने प्रतिबद्धता जनाएको छ । प्रथम महाधिवेशनमार्फत नयाँ नेतृत्व चयन र शपथग्रहण सम्पन्न भएपछि रास्वपाले आफ्नो संगठनात्मक यात्रामा नयाँ अध्याय सुरु गरेको छ ।
संघर्षबाटै रास्वपाको यात्रा सुरु भएको हो, अब परिपक्व भएर अघि बढ्छौं: रवि लामिछाने
काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले हरेक राजनीतिक दलको आफ्नै संघर्षको इतिहास हुने भन्दै रास्वपा पनि फरक पृष्ठभूमिबाट संघर्ष गर्दै यहाँसम्म आइपुगेको बताएका छन् । चितवनमा सम्पन्न प्रथम महाधिवेशनबाट निर्वाचित पदाधिकारीहरूको शपथग्रहण समारोहलाई सम्बोधन गर्दै लामिछानेले रास्वपाको राजनीतिक यात्रा परम्परागत दलभन्दा फरक रहेको उल्लेख गरे । ‘हरेक राजनीतिक दलका आ-आफ्नै संघर्षका कथा हुन्छन् । पछिल्लो समयको हाम्रो राजनीतिक संघर्ष अलिक फरक ढंगले अघि बढिरहेको छ । हामी फरक पृष्ठभूमिबाट राजनीतिमा आएका हौं,’ उनले भने । लामिछानेले नेपालको वर्तमान राजनीतिक उपलब्धि अघिल्ला पुस्ताका नेताहरूको संघर्षकै परिणाम भएको उल्लेख गर्दै उनीहरूको योगदानको सम्मान गर्नुपर्ने बताए । ‘देशमा भएका अनेक राजनीतिक द्वन्द्व र उतारचढाव पार गर्दै आजको अवस्था आएको हो । अग्रज राजनीतिज्ञहरू व्यवस्था परिवर्तनको अग्निकुण्डमा नहोमिएको भए हामी आजका उपलब्धिसम्म पुग्न सक्ने थिएनौं,’ उनले भने । रास्वपाले अब नयाँ जिम्मेवारीसहित परिपक्व र उत्तरदायी राजनीतिक शक्तिका रूपमा अघि बढ्ने प्रतिबद्धता पनि उनले व्यक्त गरे । ‘प्रथम ऐतिहासिक महाधिवेशनबाट राजनीतिक रूपमा वैधानिकता प्राप्त गरेको रास्वपा अब परिपक्व भएर अघि बढ्नेछ । हामी प्रतिबद्धताका साथ जनताको अपेक्षा पूरा गर्न अगाडि बढ्छौं,’ उनले भने । महाधिवेशनबाट नयाँ नेतृत्व चयन भएसँगै रास्वपाले आफ्नो संगठनात्मक संरचनालाई थप सुदृढ बनाउँदै आगामी राजनीतिक यात्रालाई नयाँ ढंगले अघि बढाउने संकेत दिएको छ ।
यी हुन् रास्वपाको पदाधिकारीमा निर्वाचित नेता
काठमाडौं । राष्ट्रिय स्वतन्त्र पार्टी(रास्वपा)को उपसभापतिमा साेविता गाैतम निर्वाचित भएकी छन् । उनले ताेसिमा कार्कीलाई पराजित गरेकी हुन्। गौतमले ७८९ मत प्राप्त गर्दै निर्वाचित भइन । कार्कीले ५७२ मत प्राप्त गरिन् । यस्तै, महामन्त्रीमा विपिन आचार्य निर्वाचित भएका छन् । उनी ६७३ मत प्राप्त गर्दै निर्वाचित भए । उनी यसअघि रास्वपाको सहमहामन्त्री थिए । यसैगरी, सहमहामन्त्रीमा नेताहरू हरि ढकाल, निशा डाँगी र असिम शाह निर्वाचित भएका छन् । शुक्रबार (आज) सम्पन्न निर्वाचनबाट उनीहरू सहमहामन्त्री पदमा निर्वाचित भएका हुन् । महिलातर्फ डाँगी, सहमहामन्त्री खुलातर्फ शाह र ढकाल निर्वाचित भएका छन् । शाहले ४७१ मत प्राप्त गरेका छन् भने ढकालले ४१० मत प्राप्त गरेका छन् । त्यस्तै, महिला सहमहामन्त्रीमा निशा डाँगी निर्वाचित भएकी छिन् । उनले ७ सय ३७ मत प्राप्त गरिन् ।
एआईमा सामसुङले ६ खर्ब ५० अर्ब डलर लगानी गर्ने
काठमाडौं । कृत्रिम बौद्धिकता (एआई) प्रविधिको तीव्र विस्तारसँगै दक्षिण कोरियाको सामसुङ इलेक्ट्रोनिक्सले देशकै इतिहासमा सबैभन्दा ठूलो लगानी योजना सार्वजनिक गर्ने तयारी गरेको छ । स्थानीय सञ्चारमाध्यमहरूका अनुसार सामसुङले आगामी हप्ता करिब १० हजार खर्ब वन (करिब ६ खर्ब ५० अर्ब अमेरिकी डलर) बराबरको दीर्घकालीन लगानी योजना घोषणा गर्ने तयारी गरेको छ । यो लगानी योजना राष्ट्रपति ली जे म्युङको राजधानी सियोल बाहिरका क्षेत्रहरूमा औद्योगिक विकास विस्तार गर्ने नीतिसँग पनि जोडिएको छ । राष्ट्रपति लीले सोमबार आयोजना गर्ने ‘नेसनल मेगा प्रोजेक्ट’ कार्यक्रममा सामसुङले आफ्नो नयाँ लगानी रणनीति सार्वजनिक गर्ने अपेक्षा गरिएको छ । प्रतिस्पर्धी चिप निर्माता एसके हाइनिक्सले पनि सोही कार्यक्रममा आफ्नो लगानी योजना घोषणा गर्ने सम्भावना रहेको छ । दुवै कम्पनी कृत्रिम बौद्धिकतामा प्रयोग हुने उन्नत मेमोरी चिप उत्पादनमा विश्वका अग्रणी कम्पनी मानिन्छन् । डाटा सेन्टर, च्याटबोट, इमेज जेनेरेटर तथा अन्य एआई प्रविधिको माग तीव्र रूपमा बढ्दै गएपछि सेमिकन्डक्टर उद्योगमा ठूलो लगानी आकर्षित भएको छ । एआईको विस्तारले सामसुङ र एसके हाइनिक्स दुवै कम्पनीको नाफा र सेयर मूल्यमा उल्लेखनीय वृद्धि गराएको छ । स्थानीय सञ्चारमाध्यमहरूका अनुसार सामसुङको प्रस्तावित प्याकेजअन्तर्गत दक्षिणपश्चिमी दक्षिण कोरियामा नयाँ सेमिकन्डक्टर कम्प्लेक्स निर्माणका लागि करिब तीन लाख अर्ब वन लगानी गरिनेछ । प्रविधि क्षेत्रमा तुलनात्मक रूपमा पछाडि परेका क्षेत्रहरूमा औद्योगिक विकास विस्तार गर्ने लक्ष्य राखिएको छ । माइल बिजनेस न्युजपेपरका अनुसार योङ्गिनमा छवटा चिप उत्पादन केन्द्र निर्माणका लागि करिब ६ सय खर्ब वन विनियोजन गरिनेछ भने डाटा सेन्टर र एआई पूर्वाधार विकासका लागि करिब तीन हजार ५०० खर्ब वन लगानी गर्ने योजना रहेको छ । प्रस्तावित १० वर्षे खर्च योजना दक्षिण कोरियाको कुनै पनि निजी कम्पनीले सार्वजनिक गरेको सबैभन्दा ठूलो लगानी प्रतिबद्धता बन्नेछ । समाचारअनुसार राष्ट्रपति लीले यसै साता सामसुङका अध्यक्ष ली जे–योङसँग भेट गरी सेमिकन्डक्टर उद्योगमा लगानी विस्तारबारे छलफल गरेका थिए । उनले गत साता एसके समूहका अध्यक्ष चे ताए–विनसँग पनि भेटवार्ता गरेका थिए । सामसुङ इलेक्ट्रोनिक्सले गत वर्ष ४३६ खर्ब वन सञ्चालन नाफा कमाएको थियो । यो अघिल्लो वर्षको तुलनामा ३३ प्रतिशतले वृद्धि भएको हो । कम्पनीको नाफा आगामी वर्षहरूमा अझ तीव्र रूपमा बढ्ने अनुमान गरिएको छ । विश्लेषकहरूका अनुसार यस वर्ष कम्पनीको सञ्चालन नाफा तीन हजार खर्ब वन नाघ्न सक्ने अनुमान गरिएको छ भने आगामी वर्ष यो बढेर पाँच हजार ५०० खर्ब वनसम्म पुग्न सक्छ । राष्ट्रपतिका नीतिसम्बन्धी प्रमुख सचिव किम योङ–बीमले योङ्गिनस्थित सेमिकन्डक्टर परियोजनासम्बन्धी छलफल अन्तिम चरणमा पुगेको बताए । उनका अनुसार योजना अन्तिम भएपछि सम्बन्धित कम्पनी र सरकारी मन्त्रालयहरूले संयुक्त रूपमा जनतालाई विस्तृत जानकारी दिनेछन् । एआई प्रविधिको विश्वव्यापी प्रतिस्पर्धा तीव्र बन्दै गइरहेका बेला दक्षिण कोरियाले सेमिकन्डक्टर र कृत्रिम बौद्धिकता क्षेत्रमा आफ्नो नेतृत्व कायम राख्न अभूतपूर्व लगानीको बाटो रोजेको छ । रासस
१ खर्ब २३ अर्बको पारिश्रमिक प्याकेज, मस्कपछि बढी कमाउने सीईओ शंख मित्र
काठमाडौं । ‘द वाल स्ट्रिट जर्नल’को हालैको एक प्रतिवेदनअनुसार भारतीय मूलका अमेरिकी नागरिक शंख मित्र विश्वभरमै दोस्रो सबैभन्दा बढी तलब पाउने सीईओका रूपमा देखा परेका छन् । ‘वेलटावर’ कम्पनीमा उनको ८२१ मिलियन डलर (१ खर्ब २३ अर्ब ३२ करोड ३७ लाख नेपाली रुपैयाँ) को पारिश्रमिक प्याकेज टेस्लाका सीईओ एलन मस्क पछिको दोस्रो ठूलो हो, जसको मुआब्जा प्याकेज १५८ बिलियन डलर (१ खर्ब ५८ अर्ब डलर) रहेको छ । यद्यपि मित्रको पारिश्रमिक प्याकेज विगत एक दशकमा कुनै पनि सार्वजनिक कम्पनीको सीईओका लागि सबैभन्दा ठूला प्याकेजहरूमध्ये एक हो । एस एन्ड पी ५०० सूचीमा रहेको वेलटावर कम्पनी एक रियल एस्टेट इन्भेष्टमेन्ट ट्रस्ट हो, जसले स्वास्थ्य सेवा पूर्वाधारमा लगानी गर्दछ । मित्र सन् २०१६ मा यस कम्पनीमा आबद्ध भएका थिए र सन् २०१८ मा कम्पनीको मुख्य लगानी अधिकारी (सीआईओ) बनेका थिए । उनले सन् २०२० मा सीईओ र उपाध्यक्षको जिम्मेवारी सम्हालेका हुन् । सन् २०२० अक्टोबरमा वेलटावरको सञ्चालक समितिले मित्रलाई सीईओ नियुक्त गर्दा प्रमुख स्वतन्त्र निर्देशक जेफ्री एच डोनह्युले भनेका थिए, ‘विगत पाँच वर्षमा शंखको लगानी र परिचालन कौशलताले कम्पनीलाई बलियो अवस्थामा पुर्याएको छ ।’ वेलटावरका सीएफओ टिम म्याकह्युले पनि सन् २०२५ मा कीर्तिमानी १६७ मिलियन डलर भुक्तानी पाएका थिए। मित्रको यो विशाल पारिश्रमिक प्याकेजको ठूलो हिस्सा सेयर पुरस्कारसँग जोडिएको छ । द वाल स्ट्रिट जर्नलको प्रतिवेदनमा भनिएको छ, ‘वेलटावरमा मित्रको पारिश्रमिकको ९९ प्रतिशत हिस्सा सेयर अनुदानबाट आएको हो, जसमा अक्टोबरमा प्रदान गरिएको ७८९ मिलियन डलर समावेश छ । वर्षको अन्त्यसम्ममा, उक्त पुरस्कार अन्तर्गत रहेका सेयरहरूको मूल्य १ बिलियन (१ अर्ब) डलरभन्दा बढी पुगेको कम्पनीले जनाएको छ ।’ उनले आफू कम्पनीमा रहिरहेसम्म सन् २०३१ मा ती सेयरहरूको करिब आधा हिस्सा प्राप्त गर्नेछन् । बाँकी आधा हिस्सा भने वेलटावरको बजार मूल्य ४५ प्रतिशतले बढ्ने र कम्पनीको सेयरले पाँच वर्षको अवधिमा विभिन्न स्टक इन्डेक्सहरूलाई उल्लेख्य अन्तरले पछि पार्ने कुरामा निर्भर गर्दछ । वेलटावरमा आबद्ध हुनुअघि मित्रले ‘मिलेनियम म्यानेजमेन्ट’मा रियल एस्टेट सेक्युरिटीजमा लगानी गर्ने पोर्टफोलियो म्यानेजरको रूपमा काम गरेका थिए । उनले व्यावसायिक रियल एस्टेट कम्पनी र पोर्टफोलियोहरूको ‘बटम–अप अन्डरराइटिङ’, धितोपत्र छनोट, मात्रात्मक पोर्टफोलियो र जोखिम व्यवस्थापनका लागि जिम्मेवार लगानी विज्ञहरूको टोलीको नेतृत्व गरेका थिए । उनले आफ्नो करियरको सुरुवात ‘प्राइसवाटरहाउसकूपर्स’ बाट गरेका थिए र ‘सिटाडेल इन्भेष्टमेन्ट ग्रुप’ तथा ‘फिडेलिटी इन्भेष्टमेन्ट्स’मा वरिष्ठ विश्लेषकको पदमा काम गरिसकेका छन् । भारतमा जन्मे–हुर्केका मित्रले जादवपुर विश्वविद्यालयबाट इन्स्ट्रुमेन्टेसन र इलेक्ट्रोनिक्स इन्जिनियरिङमा स्नातक तह पूरा गरेका थिए । त्यसपछि उनी अमेरिका सरेका हुन् । उनीसँग कोलम्बिया बिजनेस स्कूलबाट ‘एप्लाइड भ्यालु इन्भेष्टिटङ’मा एमबीए डिग्री रहेको छ ।
जननेत्र माविका विद्यार्थीलाई एनआईसी एशिया बैंकको शैक्षिक सामग्री
काठमाडौं । एनआईसी एशिया बैंकले पर्वतको मोदी गाउँपालिका–देउपुरस्थित श्री जननेत्र माध्यमिक विद्यालयलाई शैक्षिक तथा खेलकुद सामग्री प्रदान गरेको छ । विद्यार्थीहरूको पठनपाठन तथा खेलकुद गतिविधिलाई सहज बनाउँदै गुणस्तरीय शैक्षिक वातावरण सिर्जना गर्ने उद्देश्यले बैंकले उक्त सहयोग गरेको जनाएको छ । हाल १९१ भन्दा बढी विद्यार्थी अध्ययनरत विद्यालयमा आयोजित कार्यक्रममा बैंकका चिफ मार्केटिङ अफिसर दीपेन्द्र शर्मा र पोखरा सर्कल हेड श्वेता शेरचनले विद्यालय व्यवस्थापन समितिका अध्यक्ष रामचन्द्र शर्मा तथा प्रधानाध्यापक दीपक शर्मालाई संयुक्त रूपमा सामग्री हस्तान्तरण गरेका हुन् । बैंकले विद्यालयलाई झोला, कपी, पेन्सिल, पेनलगायत शैक्षिक सामग्रीका साथै फुटबल, भलिबल, भलिबल नेट, ब्याडमिन्टन, स्किपिङ, सटपुट बल र जेभलिन थ्रोलगायत खेलकुद सामग्री उपलब्ध गराएको छ । सामग्री हस्तान्तरण कार्यक्रममा विद्यालयका शिक्षक, विद्यार्थी तथा बैंकका कर्मचारीहरूको सहभागिता रहेको थियो । बैंकले उपलब्ध गराएको सहयोगले विद्यार्थीहरूको पठनपाठनसँगै खेलकुद गतिविधिलाई थप सहज बनाउने र विद्यालयमा गुणस्तरीय शैक्षिक वातावरण निर्माणमा टेवा पुग्ने विश्वास व्यक्त गरेको छ ।
