जापानको बेरोजगार दर तीन वर्ष यताकै उच्च
टोकियो । जापानको बेरोजगार दर अक्टोबरमा तीन वर्ष यताकै उच्च विन्दुमा पुगेको यहाँको सरकारी तथ्याङ्कले देखाएको छ । वेरोजगार दर वृद्धि हुनुलाई कोरोना भाइरस सङ्क्रमणजन्य महामारीसँग जोडेर हेरिएको छ । महामारीका कारण व्यवसायिक गतिविधि नराम्रोसँग प्रभावित बनेको र यसको प्रभाव रोजगार क्षेत्रमा पनि परेको जापानको ठहर छ । जापानको आन्तरिक मामिला तथा सञ्चार मन्त्रालयका अनुसार जापानमा अक्टोबरमा ८० हजार व्यक्ति वेरोजगार बनेसँगै कूल वेरोजगार व्यक्तिको सङ्ख्या २१ लाख ४० हजार पुगेको छ । जापानमा सेप्टेम्बरको तुलनामा पुरुषतर्फको वेरोजगार ०.२ प्रतिशतले वृद्धि हुँदा यो सङ्ख्या ३.४ पुगेका तर महिलातर्फको वेरोजगार दर (२.७ प्रतिशत)मा कुनै परिवर्तन नदेखिएको पनि तथ्याङ्कले देखाएको छ । त्यसैगरी रोजगारी उपलब्धता दर सेप्टेम्बरमा १.०३ रहेकोमा अक्टोबरमा १.०४ मा पुगेको अर्थात् हरेक १०० व्यक्तिका लागि १०४ पद खाली रहेको र यो सन् २०१९ को अप्रिलपछि पहिलो पटक सुधार भएको बताइएको छ । कोरोनाकालमा पनि रोजगारी उपलब्धता दर बढ्नुलाई सकारात्मक सूचकका रूपमा हेरिएको छ । जापान सरकारले महामारीका कारण आर्थिक सङ्कटमा परेका कम्पनीलाई राहतस्वरूप करमा विभिन्न छुटको योजना अघि सारेको छ । अर्थशास्त्रीहरूका अनुसार जापानले श्रम बजारलाई जटिल सङ्कटबाट बचाएको छ । राहत कार्यक्रम आगामी फेब्रुअरीसम्मका लागि तय गरिएकोमा यसलाई बढाएर मार्चसम्म पुर्याइएको छ । रासस/सिन्ह्वा
अमेरिकी राष्ट्रपति ट्रम्पद्वारा ह्वाइट हाउस छाड्ने संकेत
वासिङ्टन । अमेरिकी राष्ट्रपति डोनाल्ड ट्रम्पले इलेक्टोरल कलेज (निर्वाचक प्रतिनिधि) हरुले आफ्ना प्रतिस्पर्धी जो बाइडेनले जितेको औपचारिक घोषणा गरेमा ह्वाइट हाउस छाड्ने बताएका छन् । निर्वाचनमा धाँधली भएको आरोप लगाउँदै आएका ट्रम्पले औपचारिक रुपमा अझै आफ्नो पराजय भने स्वीकार गरेका छैनन् । यद्यपी यसअघि उनले सत्ता हस्तान्तरणको प्रक्रिया सुरु गर्नेमा आफ्नो सहमति जनाएका थिए । ट्रम्पले चुनावको नतिजालाई अस्वीकार गर्ने अभूतपूर्व प्रयास गरेका थिए । चोरी मतपत्रको बारेमा भ्रम फैलाउँदै र अदालतमा शृंखलाबद्ध मुद्दा दायर गरेर कानुनी चुनौतीहरू दिएका थिए । तर अदालतले ट्रम्पले लगाएका आरोपहरुमा पर्याप्त प्रमाण नपुगेको जनाउँदै निवेदनहरु खारेज गरिदिएका थिए । हाल राष्ट्रपति ट्रम्पले दिएको पछिल्लो अभिव्यक्तिले उनी पराजय स्वीकार गर्न नजिक पुगेको देखिएको छ । बाइडेनले जितेको कुरा इलेक्टोरल कलेजले औपचारिक पुष्टि गरेमा आफू ह्वाइट हाउसबाट बाहिरिने ट्रम्पले बताएका छन् । इलेक्टोरल कलेजको बैठक आउँदो डिसेम्बर महिनाको १४ तारिखमा हुँदैछ । अमेरिकी राष्ट्रपतिमा विजयी हुने उम्मेदवारको औपचारिक छिनोफानो इलेक्टोरल मतले गर्दछ । हाल डेमोक्रेटिक पार्टीका प्रत्यासी जो बाइडेनले ३०६ र डोनाल्ड ट्रम्पले २३२ मत प्राप्त गरेका देखिएको छ । संविधान अनुसार कूल ५३८ इलेक्टोरल मत रहेको अमेरिकामा २७० मत ल्याउने व्यक्ति राष्ट्रपतिमा निर्वाचित हुन्छन् । नयाँ राष्ट्रपतिले आगामी सन् २०२१ को जनवरी २० मा सपथ ग्रहण गर्नेछन् । त्यसयता जो बाइडेन राष्ट्रपति-निर्वाचितका रुपमा रहने छन् । रासस/एएफपी
महामारीका कारण नागरिक विदेशमा अलपत्र परेको समाचार सत्य होइनः अष्ट्रेलिया
क्यानबेरा । कोभिड-१९ सङ्क्रमणको महामारीका कारण हजारौँ नागरिक विदेशमा अलपत्र परेको भन्ने खबर गलत भएको अष्ट्रेलियाको सरकारले दावी गरेको छ । छत्तीस हजारभन्दा बढी अष्ट्रेलियाली नागरिक कोभिड-१९ महामारीका कारण विदेशमा अलपत्र पर्दासमेत उनीहरूलाई सरकारले स्वदेश नल्याएको भन्ने समाचारहरूमा कुनै सत्यता नरहेको गृहमन्त्री पिटर डुटोनले बताएका छन् । अष्ट्रेलियाको विदेशमामिला तथा व्यापार मन्त्रालयले बिहीबार संसद ९सिनेट० मा भएको सुनुवाईमा महामारीका कारण घर फर्कन निवेदन दिएका विदेशमा रहेका अष्ट्रेलियाली नागरिकको सङ्ख्या २६ हजार ७०० बाट करिब १० हजार वृद्धि भई ३६ हजार ८७५ पुगेको तथ्याङ्क उपलब्ध गराएको थियो । विदेश मन्त्रालयका अनुसार स्वदेश फिर्ता हुन निवेदन दिएका नागरिकमध्ये आठ हजारभन्दा बढीको अवस्था विविध कारण जोखिममा रहेको उल्लेख गरिएको थियो । संघीय सरकारले नागरिकलाई स्वदेश फर्काउन असफल भएको भन्ने समाचारको खण्डन गर्दै शुक्रबार विदेशमन्त्रालयद्वारा सार्वजनिक उक्त तथ्याङ्कबारे जवाफ दिएका हो । सरकारले विदेशबाट आउन चाहने नागरिकलाई ल्याउने प्रक्रिया अन्तिम चरणमा रहेको तर उनीहरू अलपत्र नपरेको दावी गरेको हो । “पक्कै पनि विदेशबाट उडानहरू भर्न सहज अवस्था छैन । होटेल क्वारेन्टिनमा बस्नेगरी नागरिकलाई फिर्ता ल्याउन सहज छैन । तर अष्ट्रेलियाली जनता स्वदेश फर्किनका लागि विश्वका विभिन्न ठाउँमा लगाइएका प्रतिबन्धले समस्या भएको छ । सरकारले उनीहरूलाई फर्काउने प्रयास जारी राखेको छ ।” “हामीले यस वर्षको क्रिसमससम्म जति अष्ट्रेलियाली नागरिकलाई ल्याउन सकिन्छ त्यतिलाई ल्याउनका लागि दिनरात गृहकार्य गरिरहेका छौँ,” उनले भने। विदेशमा रहेका अष्ट्रेलियाली नागरिकले महामारीका समयमा आफूहरू स्वदेश फर्कन खोज्दा पनि सरकारले आफूहरूलाई ‘धोखा दिएको तथा अलपत्र पारेको महशुस गरेको’ भन्ने समाचारपछि संसदमा सरकारका तर्फबाट गृहमन्त्री डुटोनले जवाफ दिएका हुन् । अष्ट्रेलियाली नागरिक डेभ जेफियर्सले आफ्नो परिवार फेब्रुअरीमा आमालाई रेखदेख गर्न क्यानाडा गएको तर मार्चको अन्त्यका लागि लिइएको जहाजको टिकट रद्द भएपछि उतै अलपत्र परेको सामाजिक सञ्जालमार्फत् सार्वजनिक समाचारलाई स्थानीय सञ्चारमाध्यमसमेतले स्थान दिई सम्प्रेषण गरेपछि अष्ट्रेलियाली सिनेटमा यस समस्याबारे सरकारको धारणा मागिएको थियो । रासस/सिन्ह्वा
