विष्णुप्रसाद पौडेलको रिटमाथिको सुनुवाइ असार १६ गते
काठमाडौं । नेकपा (एमाले) का उपाध्यक्ष एवं पूर्वअर्थमन्त्री विष्णुप्रसाद पौडेलका तर्फबाट सर्वोच्च अदालतमा दायर गरिएको बन्दीप्रत्यक्षीकरणको रिटमाथिको सुनुवाइ यही असार १६ गते हुने भएको छ । पौडेलकी श्रीमती दोमाया पौडेलले उनलाई गैरकानुनी रुपमा थुनामा राखिएको उल्लेख गर्दै यही असार १० गते अदालतमा रिट निवेदन दिएकी थिइन् । उक्त रिटका सम्बन्धमा न्यायाधीश श्रीकान्त पौडेलको इजलासले असार १५ गते महान्यायाधिवक्ताको कार्यालयसँग लिखित जवाफ माग गर्ने र असार १६ गते सुनुवाइ गर्ने आदेश दिएको हो । उपाध्यक्ष पौडेललाई सम्पत्ति शुद्धीकरणसम्बन्धी कसुरमा यही असार ८ गते सुर्खेतबाट पक्राउ गरी यही असार ९ गते विशेष अदालत काठमाडौंमा उपस्थित गराइएको थियो । विशेष अदालतले अनुसन्धानका लागि सात दिन हिरासतमा राख्न अनुमति दिएको छ । नेता पौडेलविरुद्ध सम्पत्ति शुद्धीकरण अनुसन्धान विभागले अनुसन्धान गरिरहेको छ ।
निर्जीवन बीमामा मोटरको हिस्सा ३०.२६ प्रतिशत
काठमाडौं । चालु आर्थिक वर्ष २०८२/८३ को जेठ मसान्तसम्ममा निर्जीवन बीमा कम्पनीहरूले ४५ अर्ब रुपैयाँ बराबरको व्यवसाय आर्जन गरेका छन् । नेपाल बीमा प्राधिकरणले सार्वजनिक गरेको तथ्यांकअनुसार हाल सञ्चालनमा रहेका कम्पनीहरूले ३१ लाख ६ हजार ६२२ बीमालेख जारी गरेर ४५ अर्ब ५८ करोड ३४ लाख रुपैयाँ कुल बीमाशुल्क संकलन गरेका हुन् । बीमा कम्पनीहरूले संकलन गरेको कुल व्यवसायमा मोटर बीमाको हिस्सा सबैभन्दा धेरै रहेको छ । समीक्षा अवधिमा बीमा कम्पनीहरूले मोटर बीमामार्फत १३ अर्ब ७८ करोड ६८ लाख रुपैयाँको कुल बीमाशुल्क संकलन गरेका छन् । जुन कुल निर्जीवन बीमा व्यवसायमा मोटर बीमाको हिस्सा ३०.२६ प्रतिशत हो । कम्पनीहरूले दोस्रो धेरै व्यापार सम्पत्ति बीमाबाट गरेका छन् । तथ्यांकअनुसार कुल निर्जीवन बीमा व्यवसायमा सम्पत्ति बीमाको हिस्सा २३.६३ प्रतिशत रहेको छ । जेठसम्ममा कम्पनीहरूले सम्पत्ति बीमामार्फत १० अर्ब ७७ करोड १४ लाख रुपैयाँ कुल बीमाशुल्क संकलन गरेका छन् । त्यस्तै, समीक्षा अवधिमा कम्पनीहरूले इन्जिनियरिङ र ठेक्कातर्फ ८ अर्ब ६३ करोड १७ लाख रुपैयाँ बीमा शुल्क संकलन गरेका छन् । जुन कुल निर्जीवन बीमा व्यवसायमा १८.७३ प्रतिशत हो । यसैगरी, कुल निर्जीवन बीमा व्यवसायमा विविधको हिस्सा १० प्रतिशत रहेको छ । विविधतर्फ कम्पनीहरूले ४ अर्ब ५५ करोड ८१ लाख रुपैयाँ कुल बीमा शुल्क संकलन गरेका छन् । जेठ मसान्तसम्ममा बीमा कम्पनीहरूले सामुन्द्रिकतर्फ २ अर्ब ८० करोड ४० लाख रुपैयाँ, हवाईतर्फ २ अर्ब २८ करोड ४८ लाख रुपैयाँ, कृषि तथा बालीतर्फ १ अर्ब ५३ करोड ७३ लाख रुपैयाँ र लघुतर्फ १ अर्ब २० करोड ८९ लाख रुपैयाँ कुल बीमाशुल्क आर्जन गरेका छन् । निर्जीवन बीमाको कुल व्यवसायमा सामुद्रिकको ६.१५ प्रतिशत, हवाईको ५.०१ प्रतिशत, कृषि तथा बालीको ३.३७ प्रतिशत र लघुको २.६५ प्रतिशत हिस्सा रहेको छ ।
यस्तो थियो खामेनेईको 'सुरक्षा बंकर’
काठमाडौं । इरानका पूर्व सर्वोच्च नेता अली खामेनेईको तेहरानस्थित निवास नजिकै एउटा ठूलो भूमिगत संरचना (अन्डरग्राउन्ड स्ट्रक्चर) बनाइएको थियो । मध्य तेहरानमा बनेको यस भूमिगत बंकर कम्प्लेक्समा एउटा ब्लास्ट –रेसिस्टेन्ट (बम विष्फोट प्रतिरोधी) कोठा र भाग्नका लागि धेरै सुरुङहरू समावेश थिए । अमेरिका र इजरायलले फेब्रुअरी २८ मा गरेको हवाई आक्रमणमा अली खामेनेई तेहरानस्थित आफ्नै घरमा मारिएका थिए । त्यस समयमा उनी कुनै पनि सुरुङभित्र नरहेको कुरा बाहिर आएको थियो। इजरायली वेबसाइट ‘जेरुसेलम पोस्ट’ ले ‘इरान इन्टरनेसनल’लाई उद्धृत गर्दै अली खामेनेईको सुरक्षाका लागि कस्तो प्रकारको आर्किटेक्चरल प्लानमा काम गरिएको थियो भन्ने कुरा बताएको छ । रिपोर्टका अनुसार हबिब इब्राहिमी नामको यो कम्प्लेक्स अली खामेनेईको सरकारी निवासको ठ्याक्कै नजिक बनाइएको थियो । इस्लामिक रिभोल्युसनरी गार्ड कप्र्स (आईआरजीसी) ले अली खामेनेईको स्वीकृतिमा सन् २००९ मा यो साइट निर्माण गराएको थियो । ‘खातम अल–अम्बिया कन्स्ट्रक्सन हेडक्वार्टर’ले यसका लागि कोष (फन्ड) जुटाएको थियो । यस संरचनाको प्रवेशद्वारबाट कारहरू भित्र जान सक्थे र जमिनमुनि ३० मिटरको गहिराइसम्म पुग्थे । यस कम्पाउन्डमा २७ मिटर लामो एउटा सुरुङ रहेको दाबी गरिएको छ, जुन कुनै आपतकालीन अवस्थामा यहाँबाट भागेर टाढा जाने उद्देश्यले बनाइएको थियो । यो सुरुङ धेरै फरक–फरक बाटोसँग जोडिएको थियो । यसमा अर्को दोस्रो सुरुङ पनि थियो, जुन मध्य तेहरानको ‘एंगेलाब स्क्वायर’ नजिकैको एउटा पार्किङ ग्यारेजसम्म पुग्थ्यो । इरानसँग युद्ध सुरु भएपछि मार्चमा इजरायली सेनाले आफ्नो गुप्तचर एकाइ (इन्टेलिजेन्स युनिट) ८२०० र ९९०० को सूचनाका आधारमा यसको पहिचान गर्न यो भूमिगत बंकरलाई निशाना बनाएको थियो । इजरायलले ५० वटा विमानबाट बमबारी गर्दै तेहरानको यस भूमिगत ठेगानामा आक्रमण गरेको थियो । ‘इरान इन्टरनेसनल’ ले अगाडि बताएअनुसार धेरै तस्बिरहरूमा सर्वोच्च नेताको कार्यालयसँग जोडिएका वरिष्ठ अधिकारीहरूका लागि पाँच तले भूमिगत कार्यालय कम्प्लेक्स (अन्डरग्राउन्ड अफिस कम्प्लेक्स) पनि देखाइएको थियो । परियोजनासँग जोडिएका स्रोतहरूले यो साइट एउटा स्पोर्ट्स सेन्टर (खेलकुद केन्द्र) मुनि लुकाइएको बताएका छन् । यसरी यसलाई विश्वको नजरबाट टाढा राखिएको थियो । तेहरानस्थित यस सुविधामा कथित रूपमा तीन तले पार्किङ ग्यारेज, एउटा टारगेट रेन्ज (निशानाबाजी क्षेत्र) र जमिनको सतहभन्दा ३० र ३५ मिटर मुनि दुईवटा शेल्टर (आश्रयस्थल) सामेल थिए । एउटा शेल्टरमा खामेनेईलाई मिसाइलहरूबाट जोगाउन एउटा ब्लास्ट–रेसिस्टेन्ट (विष्फोट प्रतिरोधी) कोठा पनि थियो । आक्रमणको समयमा अली खामेनेई यस कोठामा भएको भए उनको ज्यान बच्न सक्थ्यो । (अन्तर्राष्ट्रिय सञ्चारमाध्यमहरूको सहयोगमा तयार पारिएको सामग्री )
बसाइँसराइले रित्तिँदै गाउँ, किसानलाई अनुदानमा कृषि औजार
गुल्मी । पहिले गाउँका प्रत्येक घरघरमा खेतबारी जोत्नका लागि गोरु पाल्ने चलन थियो । खेतीपाती गर्नका लागि गोरु नै किसानको मुख्य सहारा थिए । आजभोली ति दिन विस्तारै सम्झनामा सीमित हुँदै गएको छ । गाउँका युवा रोजगारीका लागि सहर र विदेशतिर पसेका छन् । गाउँमा काम गर्ने मानिस अभाव छ । जसका कारण किसानले गोरु पाल्न विस्तारै छोडिसकेका छन् । यस्तै समयको गतिसँगै बदलिँदो ग्रामीण परिवशेको यथार्थ समस्यालाई मध्यनजर गर्दै मुसिकोट नगरपालिकाले किसानलाई यान्त्रिकीकरण मार्फत किसानलाई कृषि उत्पादनतर्फ उन्मुख गराउने प्रयास थालेको छ । नगरपालिकाले आर्थिक वर्ष २०८२/८३ को वार्षिक स्वीकृत कार्यक्रम अन्तर्गत ९० जना कृषकलाई ७५ प्रतिशत अनुदानमा कुटानी–पिसानी मिल र हाते ट्रयाक्टर वितरण गरेको छ । कृषिमा बढ्दो श्रम अभावको न्यूनीकरण, उत्पादन लागत घटाउने र समयको बचत गर्दै खेतीलाई थप व्यावसायिक बनाउने उद्देश्यले किसानहरुलाई उक्त प्रविधि हस्तानत्रण गरिएको नगरप्रमुख जीवलाल खरेल जीवनले बताए । उनले बसाइँसराइका कारण गाउँमा खेती गर्ने जनशक्ति घट्दै गएको, गोरु पाल्ने चलन पनि कम हुँदै गएकाले परम्परागत खेती प्रणालीलाई आधुनिक प्रविधिसँग जोड्नु अहिलेको आवश्यकता बनेको बताए । मुसिकोट‐२ का किसान बुद्धीराम खरेलले भने, 'गाउँमा अहिले गोरु पाल्न सम्भव छैन, खेत जोत्नका लागि मान्छे खोज्दा भेटिँदैनन्, यस्तो अवस्थामा आफूले थोरै लगानी गरेर अनुदानमा हाते ट्याक्टर पाउँदा निकै खुसी लागेको छ ।' हाते ट्याक्टर र कुटानी–पिसानी मिलले किसानको श्रम, समय र लागत कम हुने तथा बाँझो जमिनको उपयोग बढाउन मद्दत पुग्नेछ । पचहत्तर प्रतिशत अनुदानमा मेसिनरी औजार प्राप्त गरेपछि कृषकहरू पनि उत्साहित देखिएका छन् । अर्का कृषक कृष्णकुमारी कार्कीले कुटानी–पिसानी मिलले आफूलाई घरमै अन्न पिस्न सजिलो हुने भएको भन्दै यसले समय र ढुवानी खर्चमा समेत बचत हुने बताए । नगरपालिकाकी कृषि प्राविधिक अस्मिता आचार्यले कृषकले औजारको सही प्रयोग र नियमित मर्मतसम्भारमा ध्यान पुर्याउन सकेका यसबाट लामो समयसम्म फाइदा लिन सकिने बताइन् । गाउँ रित्तिँदै गएको वर्तमान अवस्थामा मुसिकोट नगरपालिकाले गाउँमा बाँकी रहेका किसानलाई आधुनिक प्रविधिमार्फत कृषि पेसालाई टिकाइराख्न यस्ता प्रकारका आधुनिक यान्त्रिकीकरण वितरणबाट थप मद्दत पुग्ने अपेक्षा गरिएको जनाएको छ । रासस
रास्वपाको महामन्त्री दौड रोमाञ्चक : विपिन आचार्यको पक्षमा नेताहरूको लहर
काठमाडौं । राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशनअन्तर्गत महामन्त्री पदको चुनाव अन्तिम घडीमा थप रोचक बनेको छ । एकपछि अर्को उम्मेदवारले उम्मेदवारी फिर्ता लिँदै विपिन आचार्यलाई समर्थन जनाएपछि महामन्त्रीको प्रतिस्पर्धाले नयाँ मोड लिएको हो । महामन्त्रीका आकांक्षी प्रमोद न्यौपाने र गणेश पराजुलीले आफ्नो उम्मेदवारी फिर्ता लिएर आचार्यलाई समर्थन गर्ने घोषणा गरेका छन् । यसअघि नै निवर्तमान महामन्त्री कवीन्द्र बुर्लाकोटी, नेता शिशिर खनाल र जगदीश खरेलले पनि आचार्यको पक्षमा खुलेर उभिएका थिए । यस्तै, उम्मेदवार राजुनाथ पाण्डेले पनि अन्तिम समयमा आफ्नो उम्मेदवारी फिर्ता लिएसँगै महामन्त्रीको चुनावी समीकरण फेरिएको छ । लगातारको समर्थन र उम्मेदवारी फिर्तासँगै विपिन आचार्य महामन्त्री दौडका बलिया दाबेदारका रूपमा उभिएका छन् । अब महामन्त्री पदका लागि मनिष झा, विपिन आचार्य, गणेश कार्की, सागर ढकाल र रञ्जु दर्शनाबीच प्रत्यक्ष प्रतिस्पर्धा हुने भएको छ ।
ओमान नजिकै आक्रमण हुँदा इरान युद्धविराम संकटमा
काठमाडौं । एक जहाजमाथि आक्रमण भएको रिपोर्ट आएपछि संयुक्त राष्ट्र संघको अन्तर्राष्ट्रिय सामुद्रिक संगठन (आईएमओ) ले बिहीबार स्ट्रेट अफ हर्मुजमार्फत जहाजहरूलाई एस्कर्ट (सुरक्षा पहरा) गर्ने आफ्नो कार्य स्थगित गरेको छ । यस घटनाले इरान युद्ध अन्त्य गर्ने प्रारम्भिक सम्झौता टिक्छ कि टिक्दैन भन्ने चिन्तालाई पुनः ब्युँताइदिएको छ । उक्त मालवाहक जहाजले ओमाननजिकै आफूमाथि एक क्षेप्यास्त्र प्रहार भएको बताएको बेलायती नौसेना निकाय (यूकेएटीओ) ले जनाएको छ । तेहरान (इरान) ले जहाजहरूलाई आफूले अनुमति नदिएका मार्गहरू प्रयोग नगर्न चेतावनी दिएको केही घण्टापछि नै यो आक्रमण भएको हो । दुई अमेरिकी अधिकारीहरूले रोयटर्सलाई बताएअनुसार इरानले उक्त जहाजमाथि गोलीबारी गरेको हो । अर्कोतर्फ इरानले स्ट्रेट (जलडमरूमध्ये) बाट यात्रा गर्ने जहाजहरूको अनुरोध व्यवस्थापन गर्न स्थापना गरेको ‘इरान पर्सियन गल्फ स्ट्रेट अथोरिटी’ ले आफ्ना निर्धारित मार्गबाहिर रहेका जहाजहरूको सुरक्षित यात्राको ग्यारेन्टी नहुने बताएको छ । इरानी अधिकारीले भनेका छन्, ‘अनधिकृत मार्गहरूबाट यात्रा गर्दा उत्पन्न हुने परिणामहरूको जिम्मेवार स्वयं मालिक, सञ्चालक र जहाजका कमाण्डर हुनेछन् ।’ चारवटा स्रोतहरूले उक्त जहाज सिंगापुरको झण्डा अंकित ‘एभर लभली’ भएको पहिचान गरेका छन् । एक सुरक्षा स्रोतका अनुसार यसलाई सम्भवतः ड्रोनद्वारा निशाना बनाइएको थियो । यस विषयमा अमेरिकी सरकारबाट तत्काल कुनै प्रतिक्रिया आएको छैन । अमेरिकी राष्ट्रपति डोनाल्ड ट्रम्पले यसै महिनाको सुरुमा चेतावनी दिँदै भनेका थिए कि यदि इरानले युद्ध अन्त्य गर्ने र स्ट्रेट पुनः खोल्ने उद्देश्यले गरिएको सम्झौताको पालना गरेन भने अमेरिकाले सम्भवतः उक्त देशमाथि पुनः बमबारी सुरु गर्नेछ । महिनाौंदेखि अलपत्र परेका जहाज र नाविकहरू गत फेब्रुअरीको अन्त्यमा युद्ध सुरु भएदेखि स्ट्रेटमा महिनाौंदेखि अलपत्र परेका सयौं जहाज र हजारौं नाविकहरूलाई बाहिर निकाल्न आईएमओ ले सहयोग गरिरहेको थियो । आईएमओका महासचिव आर्सेनियो डोमिन्गुएजले एक विज्ञप्तिमा भनेका छन्, ‘हाम्रो खाली गर्ने (उद्धार) सूचीमा रहेका जहाजहरू र यस क्षेत्रका सबैका लागि आवश्यक सुरक्षा ग्यारेन्टीहरू कायमै छन् कि छैनन् भन्ने कुरा पुनः पुष्टि गर्नका लागि यसको कार्यान्वयनलाई अस्थायी रूपमा रोक्ने निर्णय गरिएको हो ।’ आईएमओले शंकास्पद आक्रमणमा परेको उक्त जहाज आफ्नो उद्धार कार्यक्रमको हिस्सा नरहेको स्पष्ट पारेको छ । अन्तर्राष्ट्रिय सामुद्रिक संगठनका अनुसार मंगलबारदेखि एउटा नयाँ ऐच्छिक व्यवस्था सुरु गरिएको छ । यसअन्तर्गत जहाज र तिनका चालक दलका सदस्यहरू अमेरिकी निगरानीमा खाडीबाट बाहिर निस्कन सक्छन् । यसका लागि उनीहरूले इरान वा ओमानको जलक्षेत्र पर्ने दुईवटा मार्गहरूमध्ये कुनै एक रोज्न पाउनेछन् । तेल बजार र जलमार्गमाथिको नियन्त्रण आक्रमणको रिपोर्टपछि बेन्चमार्क कच्चा तेलको मूल्यमा २ प्रतिशतले वृद्धि भएको छ । विश्लेषकहरूका अनुसार यसले खाडी क्षेत्रको तेल प्रवाह सामान्य अवस्थामा फर्कन कति समय लाग्न सक्छ भन्ने चिन्तालाई फेरि बढाएको छ। ओमानको यो घटनाले स्ट्रेट अफ हम्र्युजमाथि इरानको भावी नियन्त्रणको दायरा कस्तो रहनेछ भन्नेतर्फ पुनः ध्यान केन्द्रित गर्ने सम्भावना छ । यो द्वन्द्व हुनुअघि विश्वको दैनिक तेल र तरल प्राकृतिक ग्यास (एलएनजी) आपूर्तिको पाँचौं हिस्सा यही जलमार्गबाट हुने गर्थ्यो । यस घटनाअघि, अन्तरिम सम्झौताबारे खाडी देशहरूलाई आश्वस्त पार्न त्यहाँको भ्रमणमा रहेका अमेरिकी विदेशमन्त्री मार्को रुबियोले पत्रकारहरूसँग कुरा गर्दै यदि इरानले स्ट्रेटमा जहाजहरूलाई धम्की दिएमा वा रोकेमा ‘त्यसपछि हामीलाई समस्या हुनेछ’ भनेका थिए । यद्यपि, इरानले स्ट्रेटमा आफ्नो नियन्त्रण कायम राख्ने संकेत दिएको छ । इरानको रिभोल्युशनरी गार्ड्सले बिहीबार भनेको छ कि स्ट्रेटबाट सुरक्षित आवतजावत इरानले तोकेको मार्गबाट मात्र सम्भव हुनेछ र पालना नगर्ने जहाजहरूविरुद्ध कारबाही गरिनेछ । बेलायती सामुद्रिक सुरक्षा कम्पनी एम्ब्रेका अनुसार रिभोल्युसनरी गार्ड्सले बिहीबार पानामाको झण्डा भएका दुईवटा जहाजलाई आफ्नो मार्ग परिवर्तन गर्न पनि आदेश दिएको थियो । व्यापारिक मार्ग र घरेलु राजनीति यसअघि अमेरिकी ऊर्जामन्त्री क्रिस राइटले स्ट्रेटमार्फत हुने ढुवानी अमेरिका र इजरायलले फेब्रुअरी २८ मा इरानमाथि आक्रमण गर्नुअघिको स्तरमा पुग्न लागेको र पछिल्लो २४ घण्टामा कम्तीमा २ करोड ब्यारेल तेल उक्त जलमार्गबाट बाहिरिएको बताएका थिए। अन्य ढुवानी तथ्याङ्कले पनि स्ट्रेट अफ हर्मुज हुँदै हुने कच्चा तेलको ढुवानी यस हप्ता फेब्रुअरीमा युद्ध सुरु भएपछिकै उच्च विन्दुमा पुगेको देखाएको छ । यसैबीच दक्षिण कोरियाको महासागर मन्त्रालयले थप आठवटा दक्षिण कोरियाली जहाजहरू स्ट्रेटबाट बाहिरिएको जनाएको छ । द्वन्द्वको क्रममा इरानले यो महत्त्वपूर्ण मार्गमा प्रभावकारी नियन्त्रण कायम गरेको थियो, जसले तेलको प्रवाहलाई अवरुद्ध पार्दै विश्वव्यापी ऊर्जा बजार र व्यापक अर्थतन्त्रलाई झकझकाएको थियो । यो युद्धले आगामी नोभेम्बरमा हुने मध्यावधि निर्वाचन (जसले अमेरिकी कंग्रेसको नियन्त्रण कसको हातमा जानेछ भन्ने निर्धारण गर्नेछ) अघि ट्रम्पलाई ठूलो दबाब दिइरहेको छ । रोयटर्स/इप्सोस को मतसर्वेक्षण अनुसार चारजना अमेरिकीमध्ये केवल एकजनाले मात्र यो युद्ध यसको लागत अनुरूप सही थियो भन्ने विश्वास गर्छन् । युद्धविराम सम्झौताको ढाँचाका केही बुँदाहरूलाई लिएर विरोधाभासपूर्ण विवरणहरू बाहिर आएका छन्, जसले गर्दा ट्रम्पको स्वदेश र विदेशमा आलोचना भइरहेको छ । इरानका लागि वित्तीय प्रोत्साहन, आणविक निरीक्षण, स्ट्रेट अफ हर्मुजको नियन्त्रण र लेबनानमा इजरायलको समानान्तर युद्धका विषयमा मतभेदहरू कायमै छन् । इरानका मुख्य वार्ताकार मोहम्मद बाकर कालिबाफले बिहीबार भनेका छन् कि इरानले आफ्नो फुकुवा भएको सम्पत्ति अमेरिकी कृषि उत्पादनहरू किन्न खर्च गर्नेछ भन्ने अमेरिकी दाबी झुटो हो । यस सम्झौताले इरानको आणविक कार्यक्रम लगायतका थप जटिल मुद्दाहरू सुल्झाउनका लागि ६० दिनको वार्ताको समय तय गरेको छ।
कामना सेवा विकास बैंकद्वारा बैजनाथ माविका विपन्न विद्यार्थीलाई शैक्षिक सामग्री सहयोग
काठमाडौं । कामना सेवा विकास बैंकले कञ्चनपुरको बेदकोट नगरपालिका–८ स्थित श्री बैजनाथ माध्यमिक विद्यालयका विपन्न विद्यार्थीलाई स्टेशनरी तथा शैक्षिक सामग्री वितरण गरेको छ । बैंकको महेन्द्रनगर शाखामार्फत आयोजित कार्यक्रममा शाखा प्रमुख कृष्णसिंह भाटले वडा नं. ८ का अध्यक्ष महेशदत्त जोशीको उपस्थितिमा गरिबीको रेखामुनि रहेका विद्यार्थीलाई आवश्यक शैक्षिक सामग्री हस्तान्तरण गरेका हुन् । कार्यक्रममा वडा अध्यक्ष जोशीले सामुदायिक विद्यालयमा अध्ययन गर्ने अधिकांश विद्यार्थी आर्थिक रूपमा कमजोर परिवारबाट आउने भएकाले बैंकले उपलब्ध गराएको सहयोगले उनीहरूको पठनपाठनमा सकारात्मक प्रभाव पर्ने विश्वास व्यक्त गरे । शाखा प्रमुख भाटले शैक्षिक सामग्री वितरणमार्फत शिक्षाको पहुँच विस्तार र समुन्नत समाज निर्माणमा बैंकले आफ्नो सामाजिक दायित्व निर्वाह गर्न पाएकोमा खुसी व्यक्त गरे । कार्यक्रममा बैंकका कर्मचारी, वडा अध्यक्ष, विद्यालयका प्रधानाध्यापक, शिक्षक तथा विद्यार्थीको सहभागिता रहेको थियो । बैंकले आगामी दिनमा पनि सरोकारवाला निकायसँगको समन्वय र सहकार्यमा यस्ता सामाजिक तथा वित्तीय साक्षरतामूलक कार्यक्रमलाई निरन्तरता दिने जनाएको छ ।
दर्ता गर्ने भन्दै प्रहरीबाट छुटेका १५ कन्सल्टेन्सीका सञ्चालक पक्राउ
काठमाडौं । काठमाडौं उपत्यकामा दर्ता नगरी सञ्चालनमा रहेका कन्सल्टेन्सीका १८ जना सञ्चालक तथा प्रतिनिधि पक्राउ परेका छन् । काठमाडौं,ललितपुर र भक्तपुरका विभिन्न स्थानमा दर्ता नगरी सञ्चालनमा रहेका १५ वटा कन्सल्टेन्सीका १८ जना सञ्चालक तथा प्रतिनिधि पक्राउ परेका हुन् । गुरुबा स्टडी ग्लिडर, लिक्सिको एजुकेशन, पास्कल एजुकेशन, एपीटोमी एजुकेशन, मेगाटेक एजुकेशन, स्किल पोइन्ट एजुकेशन, भाइब्रेन्ट एजुकेशन, ड्रिम एजुकेशन, युनिभर्सल गेटवे, भिक्टोरी एजुकेशन, २४ हावर्स एजुकेशन, ग्रिनर एजुकेशन, ग्लोबल इम्प्याकट, युरेसी एजुकेशन र ब्लुम अबोर्डका सञ्चालक तथा प्रतिनिधि पक्राउ परेका हुन् । अनुगमनका क्रममा कानुनी प्रक्रिया पूरा नगरी सञ्चालनमा रहेका कन्सल्टेन्सीहरूबाट १८ जनालाई नियन्त्रणमा लिई आवश्यक कारबाहीका लागि सम्बन्धित प्रहरी परिसरमा पठाइएको हो । पक्राउ परेका मध्ये १४ जनालाई जिल्ला प्रहरी परिसर काठमाडौं, २ जनालाई जिल्ला प्रहरी परिसर भक्तपुर र २ जनालाई जिल्ला प्रहरी परिसर ललितपुर पठाइएको छ । काठमाडौं उपत्यका अपराध अनुसन्धान कार्यालयका अनुसार कन्सल्टेन्सीले यसअघि दर्ता प्रक्रिया रहेको भनी शिक्षा मन्त्रालयको रोहबरमा छुट पाएका थिए। शिक्षा मन्त्रालयमा पुनः दर्ता नभएकाले पक्राउ पुर्जी गरी नियन्त्रणमा लिएको कार्यालयका प्रमुख सन्तोष खड्काले जानकारी दिए ।
