प्रभु र महालक्ष्मी लाइफ इन्स्योरेन्सको सम्पूर्ण सेवा तीन दिन बन्द
काठमाडौं । प्रभु लाइफ इन्स्योरेन्स र महालक्ष्मी लाइफ इन्स्योरेन्सको सम्पूर्ण सेवा तीन दिन बन्द हुने भएको छ । मर्जर प्रकृयामा रहेका यी दुई इन्स्योरेन्सको सेवा असार २९ गते शुक्रबारदेखि असार ३१ गतेसम्म बन्द हुने भएको हो । यी दुई कम्पनीले शुक्रबारदेखि प्रभु महालक्ष्मी लाइफ इन्स्योरेन्सको नामबाट एकीकृत कारोबार शुरु गर्दै छन् । सो प्रयोजनको लागि दुबै कम्पनीको सम्पूर्ण हरहिसाव र तथ्यांकलाई एकल इन्स्योरेन्स सफ्टवेयरमा समायोजन तथा साल तमामी गर्नको लागि कम्पनीको सम्पूर्ण बीमा सेवा, कारोबार तथा अन्य सेवा तीन दिन सेवा बन्द हुन लागेको हो ।
प्राधिकरणको एकै निर्णयले एक दर्जन पाइलटको व्यवसाय र करिअर धरापमा
काठमाडौं । नेपाल नागरिक उडड्यन प्राधिकरण (क्यान)ले बुधबार लगानीकर्ताकोरुपमा हेलिकप्टर कम्पनीमा संलग्न रहेर हेलिकप्टर उडाउँदै आएका चालकलाई व्यवसायिक उडानमा रोक लगाउने निर्णय गरेको छ । मंगलबार चालकसहित ६ जनाको ज्यान जाने गरी सोलुखुम्बुमा भएको मनाङ एयरको हेलिकप्टर दुर्घटनापछि प्राधिकरणले साहु पाइलटलाई हेलिकप्टर उडाउन नदिने निर्णय लिएको हो । क्यानको निर्णयको प्रत्यक्ष प्रभाव कम्तिमा आठ वटा हेलिकप्टर कम्पनीलाई परेको छ । नागरिक उडड्यन प्राधिकरणबाट प्राप्त तथ्यांकअनुसार १२ मध्ये ८ वटा कम्पनीमा हेलिकप्टर चालक नै लगानीकर्ता छन् । प्राधिकरणका सहप्रवक्ता ज्ञानेन्द्र भुल मालिक नै पाइटल हुँदा व्यवसायिक रुचीका कारण प्रतिकुल अवस्थामा समेत उडानको जोखिम उठाउने भएकाले दुर्घटना बढेको दावी गर्छन् । प्राधिकरणले लिएको एउटै निर्णयबाट ११ जना हेलिकप्टर चालक र व्यवसाय धरापमा परेको छ । कुन कम्पनीमा कसको शेयर ? सञ्चालनमा रहेका हेलिकप्टर कम्पनीमध्ये अल्टिच्युट एयर, एयर डाइनेस्टी, समिट हेलिकप्टर, मनाङ एयर, सिम्रिक एयर, माउण्टेन हेलिकप्टर, प्रभु हेलिकप्टर र कैलाश हेलिप्टरमा चालक नै शेयर होल्डर छन् । अल्टिच्युट एयरमा क्याप्टेन विवेक खड्काको लगानी छ । एयर डाइनेस्टी क्याप्टेन अनिल रावलको लगानी रहेको कम्पनी हो । समिट हेलिकप्टर्समा क्याप्टेन के पुनको लगानी छ । प्राधिकरण स्रोतकाअनुसार, मनाङ एयरमा क्याप्टेन पीके सेढाई लगानीकर्ता हुन् । सिम्रिक एयरमा भने तीन जना हेलिकप्टर चालकको लगानी छ । क्याप्टने एसजे गुरूङ, क्याप्टने एस.पौडेल, र क्याप्टेन एचआर थापाले लगानी गरेर सिम्रिक एयर स्थापना गरेका हुन् । माउण्टेन हेलिकप्टरमा क्याप्टेन एस बस्नेतको लगानी छ भने प्रभु हेलिकप्टरमा क्याप्टेन आर डङ्गोल र एचबी दाहाल लगानीकर्ताको रूपमा छन् । कैलाश हेलिप्टरको अध्यक्ष नै क्याप्टेन ए. सेढाई हुन् । सञ्चालकको असन्तुष्टि तर, वायुसेवा सञ्चालकले भने प्राधिकरणको निर्णयको विरोध गरेका छन् । प्राधिकरणले मनोमानीरुपमा निर्णय गरेर व्यवसायलाई नै धरासायी बनाउन खोजेको आरोप सञ्चालकहरुको छ । नेपाल वायुसेवा सञ्चालक संघका प्रवक्ता योगराज कँडेल संसारमा कुनै देशमा नभएको नियम प्राधिकरणले लगाएको भन्दै विरोध गरे । ‘प्राधिकरणले एकदमै गलत निर्णय गरेको छ । उद्योग नै बन्द गर्नु भन्न खोजेको देखिन्छ । प्राधिकरणको धेरै कमजोरी छ, तर त्यसको अपजस हामीलाई लगाउन खोजिएको छ’, कँडेलले भने । प्राधिकरणले शेयर होल्डर चालकलाई हेलिकप्टर उडान नदिए उनीहरुले आफन्तको नाममा शेयर सार्न सक्ने कँडेलको तर्क छ । प्राधिकरणले लिएको विकल्पले समस्याको समाधान नहुने उनी बताउँछन् ।
एनबीएको बैठकमा ब्याजदरको लफडा, बल्लतल्ल मिलाए सीईओ न्यौपाने र शाहको झगडा
काठमाडाैं । नेपाल बैंकर्स संघ (एनबीए)को बिहीबारको बैठकमा दुई बैंकरको ठूलै चर्काचर्की परेको छ । बैंकको ब्याजदर खुल्ला गर्ने विषयमा छलफल गर्न बोलाइएको बैठकमा एनआईसी एशिया बैंकका सीईओ रोशन न्यौपाने र लक्ष्मी बैंकका सीईओ अजय विक्रम शाहबीच चर्काचर्की परेको बैठकमा सहभागी एक सिईओले जानकारी दिए । वाणिज्य बैंकका प्रमुख कार्यकारी अधिकृत (सीईओ)हरुको छाता संगठनको बैठकमा ब्याजदर खुल्ला गर्नेबारे छलफल हुँदै गर्दा न्यौपाने र शाहको कचिङ्गल परेको थियो । बैंकरहरुले बैंकको ब्याजदरमा कार्टेलिङ गरेको भन्दै सार्वजनिक आलोचना भइरहेको थियो । केही दिनअघि सोही विषयमा अर्थमन्त्री डा. प्रकाशशरण महतले सार्वजनिक मञ्चबाटै आलोचना गरेपछि बैंकरहरुलाई ब्याजदर निर्धारणको नीति पुनर्विचार गर्न दबाब परेको थियो । यसअघि बैंकर संघले ब्याजदर निर्धारण गर्ने र सोहीअनुसार बैंकले कार्यान्वयन गर्ने नीति थियो । बिहीबार एनबीएको बैठकमा अबदेखि बैंक आफैले स्वतन्त्ररुपमा ब्याजदर निर्धारण गर्न पाउने बारेमा छलफल चलिरहेको थियो । तर, बैठकमा एनआईसी एशिया बैंकका सीईओ रोशन न्यौपाने भने ब्याजदर खुल्ला गर्न नहुने पक्षमा प्रस्तुत भए । बैंकहरुबीच सहमति बनाएरै ब्याजदर तोक्नुपर्ने पक्षमा उनी प्रस्तुत भएपनि धेरैजसो बैंकरले उनको कुरालाई महत्व दिएनन् । आफ्नो कुरालाई अरू बैंकका सिईओले महत्व नदिएपछि ब्याजदर खुल्ला गर्ने भए आफूले निक्षेपको ब्याजदर बढाइदिने चेतावनी न्यौपानेले बैठकमा दिएका थिए । पहिलो पटक न्यौपानेले यस्तो चेतावनी दिँदा अन्य बैंकरले खासै प्रतिक्रिया दिएनन् । तर, उनले पटक पटक निक्षेपमा ब्याजदर बढाउने भन्दै धम्की दिन थालेपछि लक्ष्मी बैंकका सीईओ अजय विक्रम शाहले प्रतिवाद गरेको बैठकमा सहभागी अर्का एक सीईओले जानकारी दिए । ‘बहुमत बैंकका सीईओहरूले ब्याजदर खुला छाड्नु पर्छ भन्ने प्रस्तावमा सहमत जनाएका थिए । कतिपयले पहिल्यैदेखि ब्याजदर निर्धारण खुल्ला हुनुपर्ने माग पनि गरेका थिए । छलफलकै क्रममा एनआईसी एशिया बैंकका सीईओ रोशन न्यौपानेले ब्याजदरमा समझदारी नगरे निक्षेपको ब्याजदर ह्वात्तै बढाउने चेतावनी पटक–पटक दोहोर्याउनुभयो’, ती सीईओले बैठकको अवस्था जानकारी गराउने भने, ‘उहाँ (न्यौपाने)ले निक्षेपको ब्याजदर बढाउने भनेपछि अरू बैंकरलाई पनि दबाब परेको थियो । बैठकमा उनको कुरा काट्न नसक्ने अवस्था बन्दै गएपछि लक्ष्मी बैंकका सीईओले प्रतिवाद गर्नुभयो ।’ शाहले न्यौपानेलाई रोक्दै भनेका थिए, ‘बैंकरको फोरममा तपाईंले धम्की दिन मिल्दैन । ब्याजदर खुल्ला गर्ने निर्णय भएपछि तपाईंलाई जे मन लाग्छ त्यहीँ गर्नुहोस् ।’ शाहको प्रतिवाद पछि बैंठकको वातावरण झन तनावग्रस्त बन्दै गएको थियो । शाह र न्यौपाने चर्को स्वरमा भनाभनमा उत्रिए । उनीहरुको विवाद झनै बढ्ने देखिएपछि बैठकमा सहभागी धेरैजसो बैंकरले शाहलाई साथ दिएको एक सीईओले जानकारी दिए । अरू बैंकर पनि शाहकै पक्षमा बोल्न थालेपछि न्यौपाने चुप लागेको ती सीईओले जानकारी दिए । ब्याजदर खुला छोड्दा भविष्यमा असर पर्न सक्ने न्यौपानेको तर्क रहेको ती बैंकरले जानकारी दिए । तर, धेरैजसो बैकर ब्याजदर निर्धारण खुल्ला गर्ने पक्षमा सहमत भएपछि साउनबाट लागू हुने गरी बैंकहरुले आफु खुसी ब्याजदर निर्धारण गर्ने निर्णय भएको ती बैंकरले जानकारी दिए । ब्याजदर निर्धारण खुल्ला गर्दा बजारले मागेअनुसारका ब्याज घट्ने नभई झन बढ्नै जाने अवस्था रहेको ती बैकरको भनाई छ । ‘भोलिका दिनमा अस्वस्थ प्रतिस्पर्धाले ब्याजदर झनै बढ्न सक्छ । त्यस्तो अवस्थामा कसैले जिम्मेवारी नलिने अवस्था आउन सक्छ । ब्याजदर खुला छोड्दा घट्ने होइन बढ्ने सम्भावना छ’, ती बैंकरले भने ।
सिटी एक्सप्रेस मनी ट्रान्सफरको १७ औं बर्षमा प्रवेश, ब्राण्ड एम्बासडरमा कलाकार जितु नेपाल नियुक्त
काठमाडौं । सटी एक्सप्रेस मनी ट्रान्सफर १६ बसन्त पार गरेर १७ औं बर्षमा प्रबेश गरेको छ । बार्षिकोत्सवको अवसरमा सिटी एक्सप्रेस मनी ट्रान्स्फरले ब्राण्ड एम्बासडरमा चर्चित हास्य कलाकार जितु नेपाललाई नियुक्त गरेको छ । जीतु नेपालले सिटी एक्सप्रेस मनी ट्रान्सफरको ब्राण्ड तथा यसको मूल्य एवं मान्यतालाई सशक्त प्रतिनिधित्व गर्ने छन् । कम्पनीका प्रबन्ध निर्देशक चन्द्र टण्डन र हास्य कलाकार जितु नेपालले हिजो राजधानी काठमाडौंमा आयोजित एक विशेष कार्यक्रमकावीच सम्झौता पत्रमा हस्ताक्षर गरेका छन् । सिटी एक्सप्रेस मनी ट्रान्सफरले १७ औं बार्षिकोत्सवकै उपलक्ष्यमा बिहान आयोजित कार्यक्रममा मुख्य अभिप्राय ‘रक्तदान गर्नुहोस् , जिवन दान पाउनुहोस्’ भन्ने मूल नाराका साथमा आफ्नो संस्थागत सामाजिक उत्तरदायित्व अन्तर्गत खुला रक्तदान कार्यक्रमको आयोजना पनि गरेको थियो । सिटी एक्सप्रेसको कमलादी स्थित आफ्नै मुख्य कार्यलयमा उल्लेख्य सहभागिताका साथमा रक्तदान गरिएको थियो ।
विदेश जान लागेका १५६ जनालाई विमानस्थलबाट फर्काइयो
काठमाडौं । कागजातहरु शङ्कास्पद देखिएको भन्दै कुवेतलगायत मुलुक जान लागेका १५६ जनालाई विमानस्थलबाट फर्काइएको छ । त्रिभुवन विमानस्थल अध्यागमन कार्यालयका अनुसार कागजात दुरुस्त नभएपछि शङ्का लागेर यही असार २५ गते ३७, असार २७ गते १०१ र आज १८ जना गरी १५६ जनालाई फर्काइएको हो । उक्त कार्यालयका वरिष्ठ अध्यागमन अधिकृत झङ्कनाथ ढकालले उनीहरुको भिसा परीक्षण गर्दा कतिपयको ‘वेटिङ फर एप्रुभ’ भनेको भेटिएको, कतिपयको व्यक्तिगत श्रम स्वीकृतिमा जान लागेको देखिएको तर राजदुताबासबाट श्रम स्वीकृतिको बोधार्थ प्राप्त नभएको तथा एउटा देशमा जाने भनेर कागजात पेश गरिएको तर उसको भिसा अर्कै देशको रहेको पाइएकोलगायतका समस्याहरु देखिएको बताए । उनले भने, ’यी कागजातहरु सही हुन पनि सक्छन् र गलत हुन पनि सक्छन्, तर कागजात शङ्कास्पद देखिएकाले रोकिएका छन्, यस विषयमा वैदेशिक रोजगार विभाग, परराष्ट्र मन्त्रालयसँग समन्वय गरेरमात्रै के रहेछ निर्क्यौल हुनेछ ।’ त्यसअघि जोर्डन जान लागेका १५ जनालाई पनि यसैगरी फिर्ता गराइएको थियो । उनीहरुको विषयमा पनि निर्णय भइसकेको छैन । रासस
संसदको दुवै सदनबाट पारित भयो बजेट
काठमाडौं । आर्थिक वर्ष २०८०/८१ को राजस्व र व्ययको वार्षिक अनुमान (बजेट) संघीय संसद्का दुवै सदनबाट पारित भएको छ । राष्ट्रियसभाको आजको बैठकले प्रतिनिधिसभाबाट सन्देशसहित प्राप्त विनियोजन विधेयक बहुमतले पारित गरेको हो । विनियोजन विधेयक निर्णयार्थ प्रस्तुत हुनुअघि अर्थमन्त्री डा. प्रकाशशरण महतले सांसदहरुले उठाएको प्रश्नको जवाफ दिएका थिए । संसदको प्रमुख प्रतिपक्ष र सत्तापक्षकै कपितय सांसदले समेत बजेट परिमार्जनको माग गरेका थिए । अन्ततः सरकारले ल्याएको बजेट जस्ताको तस्तै दुवै सदनबाट पारित भएको हो । बजेट पारित भएसँगै आगामी साउन १ गतेदेखि बजेट कार्यान्वयनको बाटो खुलेको छ । प्रतिनिधिसभाबाट असार १३ गते आगामी आवको बजेट पारित भएको थियो । सरकारले गत जेठ १५ गते संघीय संसद्का दुवै सदनको संयुक्त बैठकमा आगामी आर्थिक वर्षको बजेट प्रस्तुत गरेको थियो ।
विद्यार्थीले बोर्डिङ्ग छोडेर रोज्छन् यी सामुदायिक विद्यालय
तस्बिर : कालिका मानवज्ञान विद्यालयमार्फत् काठमाडौं । शिक्षा विज्ञान तथा प्रविधि मन्त्रालयको तथ्यांकअनुसार गत शैक्षिक सत्रमा एउटै सामुदायिक विद्यालयमा ३ हजार दुई सय ६३ देखि ७ हजार छ सय ११ जनासम्म विद्यार्थीले भर्ना भएर अध्ययन गरेका थिए । ठूलो संख्याका सामुदायिक विद्यालयमा विद्यार्थी संख्या घटिरहेको अवस्थामा केही विद्यालयमा भने क्षमता भन्दा बढी विद्यार्थी भर्ना हुने अवस्था रहेको तथ्यांकले देखाएको छ । किन आकर्षण छ ? कालिका मानवज्ञान माध्यमिक विद्यालय, बुटवलमा गत शैक्षिक सत्रमा नेपाल भरीकै सामुदायिक विद्यालयहरुमध्ये सबैभन्दा धेरै ७६११ जना विद्यार्थीले अध्ययन गरे । शिशु कक्षादेखि कक्षा १२ सम्म पढाइ हुने सो विद्यालयमा कक्षा ११ र १२ मा धेरै विद्यार्थीको आकर्षण भएको देखिन्छ । चालु शैक्षिक सत्रमा सो विद्यालयमा कक्षा १ देखि १० सम्म सात सय जना विद्यार्थीले अध्ययन गरिरहेका छन् भने भर्खरै सम्पन्न कक्षा ११ र १२ को परीक्षामा क्रमशः एक हजार ६४५ र एक हजार ५३९ जना विद्यार्थीले अध्ययन गरेका थिए । धेरै सामुदायिक विद्यालयमा विद्यार्थीको आकर्षण घटिरहेको बेलामा कालिका मानवज्ञानमा विद्यार्थी संख्या बढ्नुमा अव्वल उत्प्रेरित शिक्षक र विद्यार्थी केन्द्रित सिकाइ मुख्य रहेको प्रधानाध्यापक दिनेश थापा बताउँछन् । उनका अनुसार विद्यालयले परिवेश अनुसारको सिकाइ, विद्यार्थी केन्द्रित सिकाइ, अभिभावकको सुझावलाई पालना, साझा योजना, दण्डरहित शिक्षा, अब्बल नतिजा, विद्यार्थीमा अनुशासन र सर्वसुलभ शिक्षाको कारणले विद्यालयमा विद्यार्थीको आकर्षण बढेको हो । ‘विद्यालयमा विद्यार्थीको मुख्य आकर्षण भनेको शिक्षक नै हो, अब्बल शिक्षक र उत्प्ररित शिक्षकका कारणले नै विद्यार्थीलाई राम्रो शिक्षा दिन सकिन्छ’, उनले भने, एउटै प्रअले विद्यालयमा राम्रो शिक्षा दिन सक्दैन तर, प्रअ र व्यवस्थापनले शिक्षकलाई उत्प्रेरणा जगाउने काम गर्न सक्छन् ।’ विश्वनिकेतन माध्यमिक विद्यालय, त्रिपुरेश्वर काठमाडौंमा गत शैक्षिक सत्रमा चार हजार एकसय ७८ जना विद्यार्थीले अध्ययन गरेका थिए । जसमध्ये कक्षा ११ मा एक हजार दुई सय र कक्षा १२ मा एक हजार एकसय जना विद्यार्थीले अध्ययन गरेका थिए । काठमाडौंमा शिक्षा क्षेत्रमा सरकारी तथा सामुदायिक विद्यालयको भन्दा निजी विद्यालयको बर्चस्व रहेको छ । आफ्नो विद्यालयमा विद्यार्थीको आकर्षण राम्रो हुनुमा केही विशिष्ट विशेषता रहेको प्रधानाध्यापक हेरम्बराज कँडेल बताउँछन् । ‘हामीले सामुहिक रुपमा काम गर्छौं, यहाँ पढाउने शिक्षक तथा कर्मचारीमध्ये ९० प्रतिशतले आफ्ना छोराछोरीलाई यहीँ पढाउनुहुन्छ, पढाइमा नवीनतम् विधिको प्रयोग गर्छौं, जीवनउपयोगी सिप पढाउँछौं, अभिभावकलाई नै विद्यार्थीको उत्तरपुस्तिका दिन्छौं’, उनले भने । उनले शिक्षक कर्मचारीहरुलाई आफ्ना छोराछोरीलाई आफ्नै विद्यालयमा पढाउँदा अन्य अभिभावकहरुमा विश्वास समेत पैदा हुने प्रधानाध्यापक कँडेलले बताए । उनका अनुसार कक्षा ११र१२ मा आगामी शैक्षिक सत्रमा थप विद्यार्थी थपिने सम्भावना रहेको छ । सुकुना माध्यमिक विद्यालय मोरङमा चालु शैक्षिक सत्रको कक्षा दशसम्म दुई हजार सात सय विद्यार्थीले अध्ययन गर्छन् । वैशाखमा भएको परीक्षामा छ सय ५० जना विद्यार्थीले कक्षा १२ को परीक्षा दिएका थिए । त्यस्तै अब कक्षा ११ मा आठ सय भन्दा धेरै विद्यार्थी भर्ना हुने अनुमान रहेको विद्यालयका प्रधानाध्यापक नारायणप्रसाद गौतमले बताए । विशेषगरी पछिल्लो समयमा विद्यालय तहमा व्यवस्था गरिएको अंग्रेजी भाषा शिक्षा, भौतिक संरचनामा सुधार र प्रविधिमैत्री अध्यापनले गर्दा विद्यार्थीको संख्यामा वृद्धि भएको प्रअ गौतमले बताए । कक्षा ११ मा विज्ञान, सिभिल इन्जिनियरिङ, व्यवस्थापन, कानून, होटल व्यवस्थापन, कम्प्युटर विज्ञान, व्यवसाय अध्ययन र शिक्षा विषयमा पढाइ हुने गर्छ । नर्स अध्ययन गर्ने बाहेकका विद्यार्थी बाहिर जाने अवस्था नरहेको प्रअ गौतम बताउँछन् । त्यस्तै, भक्तपुरको बागेश्वरी माध्यमिक विद्यालयमा अहिले कक्षा १० सम्म दुई हजार चारसय विद्यार्थीहरुले भर्ना भएर अध्ययन गरिरहेका छन् भने कक्षा ११ मा अध्ययन गर्नको लागि ११ सय भन्दा धेरै विद्यार्थीहरुले आवदेन गरेका छन् । विद्यालयको क्षमता आठ सय मात्रै भएकाले शनिबार प्रवेश परीक्षा गराएर विद्यार्थी भर्ना गर्ने कायक्रम रहेको प्रधानाध्यापक कृष्णप्रसाद धन्छाले बताए । उनका अनुसार विद्यालयले पढाइको गुणस्तरमा सुधार गरेका कारण नै पढ्न आउने विद्यार्थीको संख्या बढेको हो । पछिल्लो समयमा विद्यार्थीको रोजाइ बनेको अंग्रेजी भाषामा विद्यालयले पढ्ने व्यवस्था मिलाएको छ । प्रअ धन्छाका अनुसार अतिरिक्त क्रियाकलाप र विद्यार्थी केन्द्रित अध्यापन विधिलाई विद्यालयले प्राथमिकता दिएको छ । जसको लागि शिक्षकहरुलाई स्थानीय तह र विद्यालयले तालिम पनि दिने गरेका छन् । संख्यात्मक रुपमा धेरै विद्यार्थीको आकर्षण रहेका अन्य नमूना विद्यालयहरुमा पनि मुख्यतः ती विद्यालयहरुले अपनाएको व्यवस्थापनमा आधुनिकता, पारदर्शिता र गुणस्तरीयता नै भएको पाइन्छ । जसले गर्दा निजी विद्यालयहरुसँग प्रतिस्पर्धा गरेर पनि सामुदायिक विद्यालयहरु अव्वल हुन पुगेका छन् ।
सीएनआई र रास्वपाबीच छलफल : निजी क्षेत्रलाई नीतिले संरक्षण गर्नुपर्छ
काठमाडौं । नेपाल उद्योग परिसंघका नवनिर्वाचित पदाधिकारी र राष्ट्रिय स्वतन्त्र पार्टीका सभापति रवि लामिछानेबीच अर्थतन्त्रका विषयमा छलफल भएको छ । अध्यक्ष राजेशकुमार अग्रवाल नेतृत्वको परिसंघ पदाधिकारीहरुले बिहीबार सभापति लामिछानेसँग छलफल गरेका हुन् । अध्यक्ष अग्रवालले सबै राजनीतिक दलहरुले अर्थतन्त्रलाई मुख्य प्राथमकितामा राख्नुपर्ने बताए । अर्थतन्त्र अप्ठ्यारो स्थितीमा रहेकाले बजारलाई चलायमान गराउने नीतिको आवश्यकता औल्याए । उनले सबै दलहरुले आर्थिक विषयलाई प्राथमिकतामा राख्दै प्रभावकारी बजेट कार्यान्वयन गराउनुपर्नेमा जोड दिए । बजेटको प्रभावकारी कार्यान्वयनका रचनात्मक सहयोग गर्ने उद्देश्यले निजी क्षेत्रको तर्फबाट परिसंघले सुरु गरेको बजेट वाचका विषयमा जानकारी गराए । अध्यक्ष अग्रवालले भारतले १० वर्षमा १० हजार मेगावाट विद्युत खरिद गर्ने समझदारी गरिसकेकाले जलविद्युत आयोजनाको पीपीए खुला गरिनुपर्ने, सार्वजनिक निजी साँझेदारी ९पीपीपी० मोडलमा पूर्वाधार विकास गरिनुपर्ने, सूचना प्रविधि, सीप विकासलगायतका क्षेत्रलाई प्राथमिकतामा राख्न आग्रह गरे । भूतप्रभावि हुने गरी कर लगाउँदा स्वदेशी एवं विदेशी लगानीकर्ताबीच नराम्रो सन्देश जानेतर्फ सचेत बन्नुपर्ने बताए । उनले उद्योगी व्यवसायीहरुलाई उधारो उठाउन सहजिकरण गर्न उधारो उठाउने ऐन, साथै अग्रिम जमानत कानूनको आवश्यकताका विषयमा जानकारी गराए । सो अवसरमा सभापति लामिछानेले अर्थतन्त्रलाई बलियो बनाउन निजी क्षेत्र बलियो बन्नुपर्ने बताए । उनले निजी क्षेत्रलाई देशको नीतिले संरक्षण गर्नुपर्नेमा जोड दिनुहुँदै योजना बनाउनेदेखि कार्यान्वयन तहसम्म निजी क्षेत्रको संस्थागत प्रतिनिधित्व हुनुपर्ने बताए । उनले सरकार, राजनीतिक दलहरुले गर्नुपर्ने काम परिसंघले सुरु गरेको भन्दै बजेट कार्यान्वयन मार्गचित्र ‘बजेट वाच’ का लागि धन्यवाद दिए । सो अवसरमा उपाध्यक्षहरु विरेन्द्रराज पाण्डे, अमित मोर, परिसंघ गभर्निङ काउन्सिल सदस्य शशिकान्त अग्रवाल, पदाधिकारीमा स्थायी आमन्त्रित सदस्य छायाँ शर्मा, परिसंघ युवा उद्यमी मञ्चकी अध्यक्ष प्राची अग्रवाल, परिसंघका महानिर्देशक दिपकराज जोशीलगायत थिए ।
