भूकम्प पीडितलाई प्राधिकरणको एक करोड रुपैयाँ सहयोग
काठमाडौं । नेपाल नागरिक उड्ययन प्राधिकरण (क्यान)ले भूकम्पपीडितलाई १ करोड रुपैयाँ राहत सहयोग गर्ने निर्णय गरेको छ । जाजरकोट तथा पश्चिम रुकुमका भूकम्पपीडितलाई सहयोग स्वरुप प्राधिकरणको तर्फबाट प्रधानमन्त्री दैवी प्रकोप उद्धार कोषमा रु एक करोड जम्मा गर्ने आज निर्णय गरेको नेपाल नागरिक उड्ययन प्राधिकरण (क्यान)का प्रवक्ता तथा उपमहानिर्देशक जगन्नाथ निरौलाले राससलाई जानकारी दिए । भूकम्पपीडितलाई सहयोग स्वरुप १ करोड सहयोग गर्ने र नेपालगञ्ज, सुर्खेत, रुकुम सल्ले तथा चौरजहारी विमानस्थलबाट राहतका लागि प्रयोग हुने विमानको शुल्कमा सतप्रतिशत छुट दिने निर्णय पनि प्राधिकरणले गरेको छ ।
सिद्धार्थ बैंकको लाभांश पाउन आजसम्म सेयरधनी बन्नु पर्ने
काठमाडौं । सिद्धार्थ बैंकको लाभांश सुरक्षित गर्ने आज अन्तिम दिन रहेको छ । बैंकले लाभांश वितरण तथा साधारणसभा प्रयोजनार्थ कात्तिक २१ गते एक दिनका लागि सेयर दाखिला खारेज (बुक क्लोज) गर्ने निर्णय गरेको छ । त्यसैले आज कात्तिक २० गतेसम्म नेपाल स्टक एक्सचेञ्ज (नेप्से)मा कारोबार भई कायम सेयरधनीहरुले मात्रै लाभांश प्राप्त तथा साधारणसभामा सहभागी हुन पाउने छन् । बैंकले गत आर्थिक वर्ष २०७९/८०को नाफाबाट हाल कायम चुक्ता पूँजीको ४.२१ प्रतिशत नगद लाभांश वितरण गर्ने प्रस्ताव गरेको छ । बैंकले लाभांश वितरण प्रस्ताव पारित गर्न मङ्सिर ५ गते काठमाडौंको बालुवाटार स्थित आम्रपाली ब्यान्क्वेटमा बिहान १० बजे २२औँ वार्षिक साधारणसभा आह्वान गरेको छ ।
भिजन लुम्बिनीको आईपीओमा आवेदन दिने आज अन्तिम दिन
काठमाडौं । भिजन लुम्बिनी उर्जा कम्पनीको आईपीओमा आवेदन दिने आज अन्तिम दिन रहेको छ । कात्तिक १६ गतेदेखि बिक्री खुला गरेको कम्पनीको आईपीओमा सर्वसाधारण लगानीकर्ताहरुले आज कात्तिक २० गतेसम्म अवोदन दिन सक्ने छन् । कम्पनीले जारी पूँजी १ अर्ब ९१ करोड २५ लाख रुपैयाँको १० प्रतिशत अर्थात् १९ लाख १२ हजार ५ सय कित्ता सेयर आयोजना प्रभावित क्षेत्रका स्थानीयलाई बिक्री गरेको थियो । साथै, सर्वसाधारणलाई छुट्याइएको सेयरमध्ये १० प्रतिशत अर्थात् १ लाख ९१ हजार २५० कित्ता विदेशमा रोजगार गरीरहेका नेपालीहरुलाई बिक्री गरेको थियो । दोस्रो चरणमा कम्पनीले स्थानीय वासिन्दाले आवेदन नदिएको ४ लाख ८७ हजार ९१० कित्ता सहित २० लाख ७५ हजार २८५ कित्ता सेयर बिक्री खुला गरेको हो । साथै, ९५ हजार ६२५ कित्ता सामूहिक लगानी कोष र ३८ हजार २५० कित्ता कर्मचारीलाई छुट्याइएको छ । कम्पनीको आईपीओमा लगानीकर्ताहरुले न्यूनतम १० कित्तादेखि अधिकतम ३ लाख ८० हजार कित्तासम्म आवेदन दिन सक्नेछन् । कम्पनीको आईपीओ निष्काशन तथा बिक्री प्रबन्धकमा मुक्तिनाथ क्यापिटल रहेको छ । कम्पनीको आईपीओमा लगानीकर्ताहरुले सिआस्बा सदस्य बैंक तथा वित्तीय संस्थाहरु र सिडिएस एण्ड क्लियरिङ्गले निर्माण गरेको मेरो सेयर मार्फत् आवेदन दिन सक्ने छन् ।
एक कम्पनीले घोषणा गर्याे १४.७० प्रतिशत लाभांश
काठमाडौं । बैंकिङ्ग फाईनान्स एण्ड इन्स्योरेन्स इन्ष्टिच्यूट अफ नेपाल लिमिटेड (बिफिन)ले पाँचौं वार्षिक साधारणसभा डाकेको छ । कम्पनीको सञ्चालक समितिको कात्तिक १६ गते बसेको बैठकले मंसिर २२ गते बिफिनको कार्यालय नयाँ बानेश्वर काठमाडौंमा अपरान्ह ३ बजे साधारणसभा बोलाएको हो । कम्पनीको सभाले हाल कायम चुक्ता पूँजी ४ करोड ९५ लाख रुपैयाँको १४.७० प्रतिशतले हुन आउने ७२ लाख ७६ हजार ५ सय रुपैयाँ नगद लाभांश (कर प्रयोजनसमेत) वितरण गर्ने प्रस्ताव पारित गर्नेछ । कम्पनीको सभाले आर्थिक वर्ष २०७९/८० को सञ्चालक समितिको वार्षिक प्रतिवेदन र लेखापरीक्षको प्रतिवेदन पारित गर्नेछ । यस्तै, आर्थिक वर्ष २०८०/८१ को लागि लेखापरीक्षकको नियुक्ति र पारिश्रमीक निर्धारण गर्नेछ । त्यस्तै, कम्पनीको सञ्चालक समितिमा संस्थापक समूह बाट ५ जना सञ्चालकहरुको मनोनयन तथा निर्वाचन गर्नेछ ।
सिद्धार्थ प्रिमियर इन्स्योरेन्सले ५ ठाउँमा घरजग्गा किन्दै
काठमाडौं । सिद्धार्थ प्रिमियर इन्स्योरेन्स कम्पनीले घरजग्गा तथा जग्गा खरिद गर्ने भएको छ । कम्पनीले कार्यालय प्रयोजनका लागि विभिन्न ७ स्थानमा घर तथा जग्गा खरिद गर्ने भएको हो । कम्पनीले विराटनगर महानगरपालिका, वीरगंज महानगरपालिका, बुटवल उपमहानगरपालिका, सिद्धार्थ नगरपालिका र नेपालगन्ज उपमहानगरपालि क्षेत्रभित्र घरजग्गा खरिद गर्ने जनाएको छ । कम्पनीका अनुसार डेढ कठ्ठा वा ५ हजार ४६७.५ वर्गफुटदेखि ३ कठ्ठा वा १० हजार ९३५ वर्गफुटसम्म भएको क्षेत्रफल भएको हुनु पर्नेछ । नेपाल बीमा प्राधिकरणबाट जारी निर्देशिका तथा शैद्धान्तिक स्वीकृतिको अधिनमा रही सो क्षेत्रमा घरजग्गा खरिद गर्न लागेको कम्पनीले बताएको छ । इच्छुक घरजग्गाधनीले २१ दिनभित्र बोलपत्र पेश गर्नु पर्ने कम्पनीले जनाएको छ ।
१० प्रतिशत ब्याजदर भएको कुमारी बैंकको ऋणपत्र बाँडफाँट
काठमाडौं । कुमारी बैंकको ऋणपत्र बाँडफाँट गरिएको छ । बैंकको ५ अर्ब रुपैयाँको ऋणपत्र कात्तिक १९ गते आइतबार बाँडफाँट गरिएको बिक्री प्रबन्धक नबिल इन्भेष्टमेन्ट बैंकिङ्गले जानकारी दिएको छ । बैंकले कात्तिक २ गतेदेखि कात्तिक १३ गतेसम्म १० वर्ष अवधिको ‘१० प्रतिशत केबिएल डिबेन्चर २०९०’ ऋणपत्र बिक्री गरेको थियो । बैंकले प्रतिकित्ता १ हजार अंकित मूल्य दरका ५ अर्ब रुपैयाँको ५० लाख कित्ता ऋणपत्र बिक्री गरेको थियो । जसमध्ये ६० प्रतिशत अर्थात् ३० लाख कित्ता व्यक्तिगत र बाँकी ४० प्रतिशत अर्थात् २० लाख कित्ता सर्वसाधारणलाई बिक्री गरेको थियो । बिक्री प्रबन्धक नबिल इन्भेष्टमेन्ट बैंकिङ्ग तथा सिडिएस एण्ड क्लियरिङ्गले सञ्चालन गरेको आईपीओ रिजल्टमार्फत् नतिजा हेर्न सकिने छ ।
हिमालयन रिको आईपीओ निष्काशन मिति सारियो, अब ४ मंसिरदेखि बिक्री गर्ने
काठमाडौं । हिमालयन रि इन्स्योरेन्सले मंसिर ४ गतेदेखि आईपीओ निष्काशन तथा बिक्री खुला गर्ने भएको छ । कम्पनीले श्रम स्वीकृति प्राप्त गरी विदेशमा रोजगार गरिरहेका नेपालीहरुका लागि आईपीओ बिक्री गर्ने भएको हो । यसअघि कम्पनीले कात्तिक २१ गतेदेखि आईपीओ निष्काशन गर्ने तयारी गरेको थियो । तर, निष्काशन अवधिमा तिहारको लामो सार्वजनिक बिदा परेका कारण लगानीकर्ताहरुको सहजीकरण लागि आवेदन दिने समय सारेको कम्पनीले बताएको छ । कम्पनीले हाल कायम जारी पूँजी १० अर्ब रुपैयाँको ३० प्रतिशत अर्थात् ३ अर्ब रुपैयाँको ३ करोड कित्ता सेयर बिक्री गर्नेछ । जसमध्ये पहिलो चरणमा कम्पनीले वैदेशिक रोजगारीमा रहेका नेपालीहरुलाई ३० लाख कित्ता, कर्मचारीलाई ६ लाख कित्ता र सामूहिक लगानी कोषलाई १५ लाख कित्ता सेयर बिक्री गर्नेछ । कम्पनीले अंकित मूल्य १ सय रुपैयाँमा १०६ रुपैयाँ प्रिमियम थप गरी प्रतिकित्ता २०६ रुपैयाँमा सेयर बिक्री गर्न लागेको हो । कम्पनीको आईपीओमा लगानीकर्ताहरुले न्यूनतम १० कित्तादेखि अधिकतम ३ लाख कित्तासम्म आवेदन दिन सक्ने छन् । आवेदन निष्काशन मिति परिवर्तन भएपछि वैदेशिक रोजगारीमा रहेका नेपालीहरुले अब मंसिर १८ गतेसम्म आवेदन दिन सक्नेछन् । आईपीओमा सिआस्बा सदस्य बैंक तथा वित्तीय संस्था र मेरो सेयरमार्फत् आवेदन दिन सकिनेछ । कम्पनीको आईपीओ निष्काशन तथा बिक्री प्रबन्धकमा एनएमबि क्यापिटल लिमिटेड रहेको छ । इक्रा नेपालले कम्पनीलाई इक्राएनपी इस्यूअर रेटिङ्ग ए प्रदान गरेको छ । यसले कम्पनीको वित्तीय दायित्व बहन गर्ने क्षमता पर्याप्त रुपमा सुरक्षित रहेको संकेत गर्दछ ।
तीन वटा नियामकलाई लेखा समितिको प्रश्नै प्रश्न : प्रिमियममा आईपीओ निकाल्दा असर त गर्दैन ?
काठमाडौं । सार्वजनिक लेखा समितिले आईपीओ निष्काशन प्रक्रियामा प्रश्न उठेपछि नेपाल धितोपत्र बोर्ड (सेबोन), नेपाल बीमा प्राधिकरण र कम्पनी रजिष्ट्रारको कार्यालयलाई स्पष्टिकरण सोधेको छ । प्रिमियम मूल्यमा आईपीओ निष्काशन प्रक्रियाका विषयमा उजुरी परेपछि समितिले सेबोन, प्राधिकरण, कम्पनी रजिष्ट्रारको कार्यालयलाई ७ दिनभित्र स्पष्टिकरण पेश गर्न निर्देशन दिएको सभापति ऋषिकेश पोखरेलले जानकारी दिए । ‘कम्पनीको आईपीओ निष्काशन प्रक्रियाका बारेमा उजुरी परेको छ, सार्वजनिक रुपमा प्रश्न समेत उठेका छन्, त्यसैले सेबोन र बीमा प्राधिकरणलाई केही प्रश्नसहित ७ दिनभित्र स्पष्टिकरण गर्न भनेका हौं,’ विकासन्युजसँग भने । उनका अनुसार आईपीओ निष्काशन प्रक्रियाले पार्ने प्रभाव, सर्वसाधारणलाई पर्ने असर, मुलुकको राजस्वमा पर्ने असर, मूल्याङ्कनका विधि के हुन्, कानुन आकर्षित हुन्छन् की हुँदैन भन्ने विषयमा समितिले लिखित जवाफ माग गरेको हो । पछिल्लो समय विभिन्न कम्पनीहरुले धमाधम प्रिमियम मूल्यमा आईपीओ निष्काशन गर्न थालेपछि समितिले पत्राचार मात्रै गरेको समितिका सचिव एकराम गिरीले जानकारी दिए । उनका अनुसार समितिमा प्राप्त उजुरीका आधारमा आईपीओ निष्काशन प्रक्रियामा भएका गतिविधि र कागजात उपलब्ध गराउन निर्देशन दिइएको हो । ‘सार्वजनिक महत्वका विषयमा समितिमा उजुरी पर्छन्, प्रिमियम मूल्यमा आईपीओ बिक्री गरेको विषयमा उजुरी प्राप्त भएको थियो, त्यसमा के कसो भएको हो भनेर सेबोन, बीमा प्राधिकरण र कम्पनी रजिष्ट्रारको कार्यालयलाई पत्राचार गरेको हो,’ उनले भने । तर, आईपीओ निष्काशन प्रक्रिया रोक्न निर्देशन नदिएको सचिव गिरी बताउँछन् । प्राप्त भएका कागजातका आधारमा समितिले थप अध्ययन गरेर निर्णय गर्ने उनको भनाइ छ । ‘तीनै संस्थाले पठाएको प्रमाणका आधारमा समितिले अध्ययन गर्छ, प्रिमियम मूल्यमा आईपीओ निष्काशन प्रक्रिया कानुनसम्मत् छ की छैन हेर्छ, सबै ठिक छ भने प्रक्रिया अघि बढ्छ, यदि कानुनसम्मत् छैन भने किन नभएको भनेर समितिले थप निर्णय लिन्छ,’ उनले भने ।
