स्थानीय तहका जनप्रतिनिधिले घेरे अर्थ मन्त्रालय, २५ प्रतिशत अनुदान कटौतीको विरोध
काठमाडौं । स्थानीय तहका जनप्रतिनिधिले अर्थ मन्त्रालय घेराउ गरेका छन् । चालु आर्थिक वर्ष २०८०/८१ को अन्तिम किस्तामा पाउनुपर्ने वित्तीय समानीकरण अनुदान २५ प्रतिशत कटौती भएको भन्दै उनीहरूले अर्थ मन्त्रालय घेराउ गरेका हुन् । उनीहरूले २५ प्रतिशत अनुदान कटाैती निर्णय सच्याउन एक साताको समय दिएका छन् । गाउँपालिका राष्ट्रिय महासंघ र नगरपालिका संघले ७ दिनभित्र तोकिएको अनुदान पाउनुपर्ने माग सम्बोधन नभए ७५३ स्थानीय तह बन्द गरेर सिंहदरबार आउने चेतावनी दिएका छन् । राजस्व कम उठेको र स्रोतको दबाबका कारण वित्तीय समानीकरण अनुदान कटौती गरेको अर्थ मन्त्रालयकाे भनाइ छ ।
नेपालमा लगानी गर्न बेलायती लगानीकर्तालाई अध्यक्ष ढकालको आग्रह
काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा लगानी गर्न बेलायती लगानीकर्तालाई आग्रह गरेका छन् । नेपालका लागि बेलायती राजदूत महामहिम रोब फेनसँग शुक्रबार भएको भेटमा ढकालले नेपालमा वैदेशिक लगानीको सम्भावनाका बारेमा जानकारी दिए । उनले सरकारले नेपालमा लगानी आकर्षित गर्न आयोजना गरेको नेपाल लगानी सम्मेलनको पनि उल्लेख गरे । नेपाल र बेलायतबीच लामो समयदेखि द्विपक्षीय सम्बन्ध रहेको उल्लेख गर्दै ढकालले बेलायती राजदूतलाई दुई देशबीचको व्यापार र लगानीलाई थप प्रवद्र्धन गर्न आग्रह गरे । निजी क्षेत्रले कुल गार्हस्थ्य उत्पादनमा ८१ प्रतिशत र रोजगारीमा ८७ प्रतिशत योगदान पुर्याइरहेको अवस्थाबारे पनि उनले राजदूतलाई जानकारी गराए । नेपालमा वैदेशिक लगानी आएमा निजी क्षेत्रले थप योगदान दिन सक्ने ढकालले बताए । ढकालले मुलुकमा व्यवसाय गर्न सहज वातावरण भएको पनि बताए । नेपाल उद्योग वाणिज्य महासंघको सल्लाहमा सरकारले लगानी प्रक्रियालाई सहज बनाउन आठवटा लगानी ऐन परिमार्जन गरेको उनले राजदूत फेनलाई जानकारी दिए । ढकालले राजदूत फेनलाई नेपालमा लगानीका विभिन्न अवसरका बारेमा जानकारी गराए । उनले जलविद्युत क्षेत्र, सूचना प्रविधि, पूर्वाधार र पर्यटन क्षेत्रमा लगानीको प्रशस्त सम्भावना रहेको बताए । ‘नेपालको अधिकांश आर्थिक क्षेत्र पूर्ण रूपमा प्रयोग हुन सकेको छैन, त्यसैले लगानीकर्ताले छनोट गर्नुपर्ने धेरै क्षेत्रहरू छन्’, उनले भने । भेटवार्ताको क्रममा नेपाल उद्योग वाणिज्य महासंघका उपाध्यक्ष हेमराज ढकालले व्यापार विस्तारको बारेमा आफ्नो धारणा राखे । साथै संघका लगानी फोरमका सभापति मनोज पौडेलले नयाँ लगानीका अवसर बारे जानकारी गराएका थिए । भेटको क्रममा राजदूत फेनले द्विपक्षीय लगानी सम्झौताको खाका तयार पार्न पहल गरेकोमा नेपाल उद्योग वाणिज्य महासंघलाई धन्यवाद ज्ञापन गरे । उनले दोहोरो करमुक्ति सम्झौता बारे पनि चासो राखेका थिए । यसैबीच नेपाल उद्योग वाणिज्य महासंघका महानिर्देशक गोकर्णराज अवस्थीले बेलायत सरकारले ६५ विकासोन्मुख देशलाई विकासोन्मुख राष्ट्र व्यापार योजना सुविधा उपलब्ध गराएको चर्चा गरे । नेपालले यो सुविधा कसरी लिन सक्छ भन्ने जानकारीका लागि उनले राजदूत फेनलाई अनुरोध गरे । सन् २०२६ सम्ममा नेपाल विकासोन्मुख मुलुकमा स्तरोन्नति हुने भएकाले नेपालले निर्यातमा ड्युटी फ्री सुविधा गुमाउने, अवस्थीले बताए । त्यसैले विकासोन्मुख राष्ट्र व्यापार योजना नेपालका लागि महत्वपूर्ण हुने उनले बताए ।
मुक्तिनाथ विकास बैंकका ग्राहकलाई काठमाडौंको स्काइवाक टावरमा छुट
काठमाडौं । मुक्तिनाथ विकास बैंकका ग्राहकहरुलाई काठमाडौंको स्काइवाक टावरमा छुट हुने भएको छ । बैंकले ग्राहकहरुलाई थप सेवा दिन वन्डर्स नेपालसँग काठमाडौंको कमलादीमा रहेको ‘स्काइवाक टावर’ को टिकट खरिदमा छुट प्रदान गर्ने गरी व्यवसायिक सम्झौता गरेको छ । यस व्यवसायिक सम्झौता पश्चात मुक्तिनाथ विकास बैंकका ग्राहकहरुले स्काइवाक टावरको टिकट खरिद गर्दा १५ देखि २० प्रतिशतसम्म छुट प्राप्त गर्न सक्नेछन् । छुट सुविधा प्राप्त गर्नका लागि बैंकका ग्राहकहरुले मुक्तिनाथ विकास बैंकको डेबिट कार्ड वा मोबाइल तथा ईन्टरनेट बैंकिङद्धारा टिकट खरिद गर्न भुक्तानी गर्नु पर्ने बैंकले जनाएको छ ।
इसेवाबाट लाइफ इन्स्योरेन्स नवीकरण गर्दा दुबई घुम्न पाइने
काठमाडौं । इसेवामार्फत लाइफ इन्स्योरेन्स नवीकरण गर्दा दुबई घुम्न पाइने भएको छ । डिजिटल भुक्तानीलाई प्रोत्साहन गर्ने उद्देश्यसहित इसेवाले यस किसिमको अफर सार्वजनिक गरेको हो । भुक्तानी सेवा प्रदायक इसेवाले प्रयोककर्ताका लागि जीवन बीमाको प्रिमियम भुक्तानी गर्दा विभिन्न उपहार पाउने योजना ल्याएको हो । कम्पनीका अनुसार यस योजनाअन्तर्गत एक विजेताले बम्परमा दुबई ट्रिपका साथै अन्य थुप्रै उपहार जित्ने मौका पाउनेछन् । जेठ २० देखि आसार ३१ सम्म चल्ने यो अफरमा इसेवासँग आबद्ध रहेका १२ वटा बीमा कम्पनीमा जीवन बीमाको प्रिमियम भुक्तानी गर्ने प्रयोगकर्ताले हरेक हप्ता आकर्षक उपहार पाउने कम्पनीले जनाएकाे छ । हरेक हप्ता एक भाग्यशाली जोडीले सोल्टी होटल काठमाडौंमा १ दिन २ रातका लागि स्टेकेसन प्याकेज पाउनेछन् भने ५ भाग्यशाली विजेताले इसेवा केयर प्राप्त गर्नेछन र बम्परमा ६ दिन ५ रातको लागि दुबई घुम्न जाने अवसर पाउनेछन् । यसका साथै विभिन्न जीवन बीमा कम्पनीहरूको प्रिमियम तिर्दा १००० रूपैयाँसम्म क्यासब्याक तथा अन्य आकर्षक उपहार पाउन सक्नेछन् । इसेवाका प्रमुख व्यवसाय अधिकृत आशिष गौतमका अनुसार डिजिटल भुक्तानीलाई सरकारी तवरबाट नै प्रोत्साहन गर्ने नीति अघि बढिरहेको समयमा डिजिटल भुक्तानी सेवा प्रदायक कम्पनीको दायित्त्व स्वरूप प्रयोगकर्तामा यसको महत्त्व र आवश्यकताबारे चेतना अभिवृद्धि गर्ने उद्देश्यले पनि यो अभियान सञ्चालन गरिएको हो । उनले यस याेजनाअन्तर्गत प्रयोगकर्ताले इसेवामार्फत सजिलै आफ्नो जीवन बीमाको प्रिमियम भुक्तानी गर्दा विभिन्न उपहार पाउने व्यवस्था गरी डिजिटल भुक्तानीतर्फ थप उत्साह सिर्जना हुने पनि बताएका छन् ।
सहकारीको पैसाले अर्बपति, बुढाबुढी मिलेर ८ अर्ब झ्वाम
काठमाडौं । सहकारीका बचतकर्ताको बचत अपचलन गरेको आरोपमा चन्द्रबहादुर (सिबी) लामालाई प्रहरीले पक्राउ गरेको छ । नेपाल प्रहरीको काठमाडौं अपराध अनुसन्धान कार्यालयले सहकारीका बचतकर्ताको बचत अपचलन गरेको आरोपमा उनलाई पक्राउ गरेको हो । कान्तिपुर सेभिङ एण्ड क्रेडिट को–अपरेटिभविरुद्धमा ८५२ जना जाहेरवालाहरुले बचत गरेको रकमको माग दाबी १ अर्ब ५१ करोड ८५ लाख ५२ हजार २७ रुपैयाँ रहेको खुल्न आएको महाशाखाका प्रमख प्रहरी वरिष्ठ उपरीक्षक सानुराम भट्टराईले बताए । २०८० फागुन २० गतेदेखि नै काठमाडौं जिल्ला अदालतबाट अनुमति प्राप्त भइ फरार रहेका प्रतिवादी लामालाई पक्राउ गरेको भट्टराईले जानकारी दिए । लामा कान्तिपुर सेभिङ एण्ड क्रेडिट को-अपरेटिभ लि.को पूर्व अध्यक्ष हुन् । भट्टराईले लामाविरुद्ध ८५२ जना बचतकर्ताले उजुरी दिएको बताए । त्यस्तै, पशुपति सेभिङ एण्ड क्रेडिट को-अपरेटिभ विरुद्धमा समस्याग्रस्त सहकारी व्यवस्थापन समितिको कार्यालयमा ५४ जनाको निवेदन परेको पनि बताइएको छ । पशुपति सेभिङ एण्ड क्रेडिट को-अपरेटिभ लिको विरुद्धमा १२ करोड को हाराहारीमा बिगो मागदाबी गर्दै जाहेरी परेको भट्टराईले बताए । लामा अध्यक्ष रहेको पशुपती सहकारीको ठगी प्रकरणमा अहिले केन्द्रिय अनुसन्धान ब्युरोले अनुसन्धान पनि गरिरहेको छ । को हुन् लामा ? काभ्रेकाे साविक नारायणथान गाविस ८ का बासिन्दा लामा सुरुमा सरकारी जागिर गर्थे । उनले सो अवधिमा विद्यार्थी राजनीति पनि गरे । तर, राजनीतिमा सफलता पाउन सकेनन् । उनी २०५५ तिर सहकारीमा आवद्ध भए । सहकारीसँगै राजनीतिमा पनि सक्रिय भइराखे । २०६५ तिर उनले पशुपति सेभिङ एन्ड क्रेडिट को-अपरेटिभ लिमिटेडको स्थापना गरे । सुरुमा सो सहकारीको नेतृत्व उनकी पत्नी सन्ती लामाले गरिन् । पछि उनले कान्तिपुर सहकारी खोले । दुवै सहकारी बचत तथा ऋणको कारोबार गर्ने भएकोले उनलाई खासै ठूलो समस्या भएन । उनले सहकारीको बचतलाई घरजग्गामा लगाउन सुरु गरे । सुरुवाती दिनहरूरुमा राम्रै कमाइ भयो । सहकारी र घरजग्गाबाट आएको पैसालाई उनले अन्य व्यवसायमा प्रयोग गर्न थाले । सहकारीकाे बचत उनले अस्पताल, रेस्टुरेन्ट, रिसोर्ट र निजी क्याम्पसमा लगानी बढाए । पछि घरजग्गमा समस्या आएपछि उनले बचतकर्ताको पैसा पनि फिर्ता गर्न सकेनन् । परिणामस्वरुप अन्य व्यवसाय पनि समस्यामा परे । सहकारीकाे बचत फिर्ता नगरेपछि उनीविरूद्द उजुरी पर्याे । अन्ततः उनी पक्राउ भएका छन् । उनीमाथि कान्तिपुर सहकारीको ६ अर्ब र पशुपतिको २ अर्ब गरी ८ अर्ब रकम अपचलन गरेको आरोप लागेको छ । नेपाली कांग्रेसको महाधिवेशन प्रतिनिधिदेखि महासमिति सदस्य समेत भइसकेका लामाले राजनीतिक शक्तिमा रहेर जनताको पैसा अपचलन गरेका थिए । उनी नेपाली काँग्रेस काभ्रेका पूर्वकोषाध्यक्ष तथा काभ्रे निर्वाचन क्षेत्र नं. १(१) मा २०७४ सालको प्रदेश सभा निर्वाचनमा उम्मेदवार बनेका थिए । उनले आफ्नो सहकारीलाई नमुना बनाउने बताउँदै आएका थिए । तर, अन्ततः उनी आफू नै सहकारीको पैसा अपचलन गरेको आरोपमा हिरासत पुगेका छन् ।
लक्ष्मी सनराइज बैंकले गर्यो नेपालगञ्जमा सेवा विस्तार
काठमाडौं । लक्ष्मी सनराइज बैंकले नेपालगञ्जमा आफ्नो शाखा स्थानान्तरण गरी सेवा विस्तार गरेको छ । नेपालगञ्ज उपमहानगरपालिका नजिकै रहेका २ शाखाहरूमध्ये वडा नम्बर- २ कार्काँदो चोकको शाखा सोही वडाको न्यूरोडमा स्थानान्तरण गरिएकाे हाे । स्थानान्तरण गरिएका शाखाका साविकका ग्राहकहरूले सोही उपमहानगरपालिका- १८ स्थित पुष्पलाल चोकमा रहेको अर्को शाखामार्फत सेवा लिन सक्ने बैंकले जनाएको छ । स्थानान्तरण भएसँगै बैंकले आफ्नो सेवा विस्तार गर्दै ग्राहकमाझ बैंकिङ सेवाको पहुँच अझ सहज बनाउने विश्वास राखेको छ । स्थानान्तरण भएकf शाखाले ग्राहक तथा व्यवसायलाई सबै प्रकारका रिटेल बैंकिङ सेवा प्रदान गर्ने बैंकले जनाएकाे छ । साथै, बैंकले आफ्ना ग्राहकहरूलाई थप व्यवस्थित र सहज सेवा प्रदान गर्न भैरहवास्थित सिद्धार्थनगर नगरपालिका- ५ र ८ मा रहेका २ वटा शाखा गाभी सोही नगरपालिकाको वडा- ७ नारायणस्थान (साविक सनराइज बैंकको शाखा रहेको स्थानभन्दा ७०० मिटर उत्तरतर्फ) बाट संयुक्त कारोबार सुरु गरेको छ ।
दोहोरो अकंले बढ्यो सेयर बजार, १० उपसूचकमा हरियाली
काठमाडौं । सातको पहिलो काराेबार दिन सेयर बजार दोहोरो अंकले बढेको छ । आइतबार नेप्से परिसूचक १३.५१ अंकले बढेर २,०८३ अंकमा कायम भएकाे छ । आज ३२५ कम्पनीको ९६ लाख ९७ हजार २०६ कित्ता सेयर किनबेच हुँदा ४ अर्ब ३१ करोड १० लाख रुपैयाँको सेयर कारोबार भएको छ । यस दिन व्यापार समूह सबैभन्दा धेरै ६.५६ प्रतिशतले बढेको छ भने फाइनान्स समूह २. १७ प्रतिशतले बढेकाे छ । बैंकिङ १.११, विकास बैंक ०.२२, होटल तथा पर्यटन ०.४६, हाइड्रोपावर १.२६, जीवन बीमा ०.७७, माइक्रोफाइनान्स ०.५२, निर्जीवन बीमा ०.६७ तथा अन्य समूह सूचक ०.९६ प्रतिशत बढेको छ । उत्पादन समूह २.४ र लगानी ०.२३ प्रतिशत घटेको छ । आज सबैभन्दा धेरै नेपाल फाइनान्सको सेयर कारोबार भएको छ । कम्पनीको २२ करोड ६४ लाख रुपैयाँको सेयर कारोबार भएको हो । त्यस्तै पोखरा फाइनान्सको १८ करोड ७० लाख रुपैयाँको सेयर कारोबार भएको छ । यस दिन १७४ कम्पनीको सेयर मूल्य बढेको छ भने ६१ कम्पनीको सेयर मूल्य घटेको छ । आज सबैभन्दा धेरै मल्टिपर्पस फाइनान्स र मकर जितुमाया हाइड्रोपावरका लगानीकर्ताले १० प्रतिशतका दरले कमाएका छन् । त्यस्तै कालिञ्चोक दर्शका लगानीकर्ताले ८.८५ प्रतिशतका दरले कमाएका छन् भने अपर सोलुका लगानीकर्ताले ८.४८ प्रतिशतका दरले कमाएका छन् । आज सबैभन्दा धेरै नारायणी डेभलपमेन्ट बैंकका लगानीकर्ताले ९ प्रतिशतका दरले गुमाएका छन् ।
एक अर्ब ५१ करोड ठगी गरेको आरोपमा कान्तिपुर सेभिङका पूर्वअध्यक्ष लामा पक्राउ
काठमाडौं । काठमाडौं उपत्यका अपराध अनुसन्धान कार्यालयले कान्तिपुर सेभिङ एण्ड क्रेडिट को-अपरेटिभ लिमिटेडका पूर्वअध्यक्ष चन्द्रबहादुर तामाङ (सिबी लामा) लाई आइतबार पत्रकार सम्मेलन गरेर सार्वजनिक गरेको छ । कान्तिपुर र पशुपति सेभिङ एण्ड क्रेडिट को-अपरेटिभमा अध्यक्ष भएर एक अर्ब ५१ करोड रुपैयाँ अपचलन गरेको आरोप लागेका उनलाई प्रहरीले शुक्रबार चितवनको भरतपुरबाट पक्राउ गरेको थियो । आइतबार पत्रकार सम्मेलनका क्रममा महाशाखाका प्रमख प्रहरी वरिष्ठ उपरीक्षक सानुराम भट्टराईले उनीमाथि कान्तिपुर सेभिङ एण्ड क्रेडिट को-अपरेटिभ लिमिटेडको विरुद्धमा ८५२ जना जाहेरवालाहरूले बचत गरेको रकमको माग दाबीसहित उजुरी गरेकाे बताए । त्यस्तै पशुपति सेभिङ एण्ड क्रेडिट को-अपरेटिभ विरुद्धमा सरकारको समस्याग्रस्त सहकारी व्यवस्थापन समितिको कार्यालयमा ५४ जनाको निवेदन परेको र उक्त पशुपति सेभिङ एण्ड क्रेडिटको विरुद्धमा १२ करोडको हाराहारीमा बिगो माग दाबी गर्दै जाहेरी परेको जानकारी दिए । ४९ वर्षीय तामाङविरूद्ध गत फागुन २० गते काठमाडौं जिल्ला अदालतबाट पक्राउ पुर्जी जारी भएको थियो । ‘२०८० फागुन २० गतेदेखि नै काठमाडौं जिल्ला अदालतले अनुमति दिएपछि फरार रहेका प्रतिवादी सिबी लामा भन्ने चन्द्रबहादुर लामा तामाङ पक्राउ गरेका छौँ,’ उनले भने, ‘कान्तिपुर सेभिङ एण्ड क्रेडिट को–अपरेटिभको विरुद्धमा ८५२ जना जाहेरवालाहरूले बचत गरेको रकमको माग दाबी १ अर्ब ५१ करोड ८५ लाख ५२ हजार २७ रुपैयाँ १९ पैसा रहेको खुल्न आएको छ ।’ लामा अध्यक्ष रहेको पशुपति सहकारीको ठगी प्रकरणमा अहिले केन्द्रिय अनुसन्धान ब्युरोले अनुसन्धान गरिरहेको छ ।
