नेपालमा गुड्ने चर्चित १० कार, जसको मूल्य १ करोडदेखि ५ करोड पर्छ
काठमाडाैं । आजको समयमा विश्व प्रख्यात विभिन्न कार ब्राण्डहरुले आफ्ना उत्पादनहरुलाई नेपालमा बिक्री वितरण गर्दै आइरहेका छन् । यहाँका सडकमा कम मूल्यका कारहरुको संख्या मात्र बढेको छैन कि, धेरै मूल्य पर्ने लक्जरियस कारहरु पनि छ्याप्छ्याप्ती देखिन थालेका छन् । आज हामी नेपालमा हाल उपलब्ध भइरहेका एक करोड रुपैयाँ मूल्य देखि लिएर ५ करोड रुपैयाँ मूल्य सम्मका चर्चित कारहरुको बारेमा चर्चा गर्न गइरहेका छौं । भक्सवागन टिगुवान टिगुवानमा १९६८ सीसीको इञ्जिन समावेश गरिएको छ जसले १४१ बीएचपीको पावर र ३४० एनएमको टर्क प्रोड्युस गर्दछ । त्यसैगरी ७–स्पिड अटोमेटिक ट्रान्समिशन दिइएको यस सीयूभीले १७.०६ केएमपीएलको माइलेज प्रदान गर्दछ । टिगुवानमा ७१ लिटर फ्युल ट्याङ्क क्यापासिटी रहेको छ भने यस कारको लम्वाई ४४८६ मिलिमिटर, उचाई १६७२ मिलिमिटर र ग्राउण्ड क्लियरेन्स चाहिँ १४९ मिलिमिटर रहेको छ ।जर्मन अटोमेकर कम्पनी भक्सवागनको नेपालका लागि आधिकारिक बिक्रेता पूजा इन्टर्नेशनल प्रा.लि. रहेको छ भने कम्पनीले नेपाली बजारमा यस कारको सुरुवाती मूल्य एक करोड ११ लाख रुपैयाँ तोकेको छ । जिप कम्पास ट्रेलहक जिप कम्पास ट्रेलहकमा १९५६ सीसीको इञ्जिन समावेश गरिएको छ जसले १७० एचपीको पावर र ३५० एनएमको टर्क प्रोड्युस गर्दछ । त्यसैगरी ९–स्पिड अटोमेटिक ट्रान्समिशन दिइएको यस एसयूभीले १६.३ केएमपीएलको माइलेज प्रदान गर्दछ । कम्पास ट्रेलहकमा ६० लिटर फ्युल ट्याङ्क क्यापासिटी रहेको छ भने यस कारको लम्बाई ४३९८ मिलिमिटर, उचाई १६५७ मिलिमिटर र ग्राउण्ड क्लियरेन्स चाहिँ २०५ मिलिमिटर रहेको छ ।अमेरिकन अटोमेकर कम्पनी जीपको नेपालका लागि आधिकारिक बिक्रेता लाईफ अटोमोवाइल प्रा.लि. रहेको छ भने कम्पनीले नेपालमा यस कारलाई सुरुवाती मूल्य एक करोड २४ लाख ९० हजार रुपैयाँ तोकेर बिक्री वितरण गर्दै आइरहेको छ । निशान एक्स–ट्रेल निशान एक्स–ट्रेलमा १९९७ सीसीको इञ्जिन समावेश गरिएको छ जसले १०६ पीएसको पावर र २०० एनएमको टर्क प्रोड्युस गर्दछ । यस सीयूभीमा ६० लिटर फ्युल ट्याङ्क क्यापासिटी रहेको छ भने यस कारको लम्बाई ४६४० मिलिमिटर, उचाई १७१० मिलिमिटर र ग्राउण्ड क्लियरेन्स चाहिँ २१० मिलिमिटरको रहेको छ ।नेपालका लागि निशानको आधिकारीक बिक्रेता पायनियर मोटोकर्प प्रा.लि. रहेको छ भने कम्पनीले नेपाली बजारमा यस कारको मूल्य एक करोड २४ लाख ९९ हजार तोकेको छ । प्युजो ३००८ प्युजो ३००८ मा १५९८ सीसीको इञ्जिन समावेश गरिएको छ जसले १६५ बीएचपीको पावर र २४० एनएमको टर्क प्रोड्युस गर्दछ । त्यसैगरी ६–स्पिड अटोमेटिक ट्रान्समिशन दिइएको यस एसयूभीको फ्युल ट्याङ्क क्यापासिटी ५३ लिटर रहेको छ । प्युजो ३००८ को लम्वाई ४४४७ मिलिमिटर, उचाई १६२४ मिलिमिटर र ग्राउण्ड क्लियरेन्स चाहिँ २१९ मिलिमिटर रहेको छ । फ्रेन्च अटोमेकर कम्पनी प्युजो को नेपालका लागि आधिकारीक बिक्रेता सांग्रिला मोटर्स प्रा.लि. रहेको छ भने कम्पनीले नेपाली बजारमा यस एसयूभीको मूल्य एक करोड २९ लाख रुपैयाँ तोकेको छ । होण्डा सिआर–भि होण्डा सिआर–भि मा १९९७ सीसीको इञ्जिन समावेश गरिएको छ जसले १५५ पीएसको पावर र १९० एनएमको टर्क प्रोड्युस गर्दछ । त्यसैगरी ६–स्पिड अटोमेटिक ट्रान्समिशन दिइएको यस एसयूभी को फ्युल ट्याङ्क क्यापासिटी ५८ लिटर रहेको छ । यस कारको लम्वाई ४५४५ मिलिमिटर, उचाई १६८५ मिलिमिटर र ग्राउण्ड क्लियरेन्स चाहिँ १७० मिलिमिटर रहेको छ । होण्डाको नेपालका लागि आधिकारीक बिक्रेता स्याकार ट्रेडिङ्ग कम्पनी प्रा.लि. रहेको छ भने कम्पनीले नेपाली बजारमा यस एसयूभीलाई एक करोड ३३ लाख रुपैयाँ मूल्यमा बिक्री वितरण गर्दै आइरहेको छ । इसुजु एमयु–एक्स एमयु–एक्स मा २९९९ सीसीको इञ्जिन समावेश गरिएको छ जसले १७४ बीएचपीको पावर र ३८० एनएमको टर्क प्रोड्युस गर्दछ । त्यसैगरी ५–स्पिड अटोमेटिक ट्रान्समिशन दिइएको यस एसयूभि ले १३.८० केएमपीएलको माइलेज प्रदान गर्दछ । एमयु–एक्स मा ६५ लिटर फ्युल ट्याङ्क क्यापासिटी रहेको छ भने यसको लम्वाई ४८२५ मिलिमिटर, उचाई १८४० मिलिमिटर र ग्राउण्ड क्लियरेन्स चाहिँ २२० मिलिमिटर रहेको छ । इसुजुको नेपालका लागि आधिकारीक बिक्रेता कन्टिनेन्टल ट्रेडिङ्ग इन्टरप्राइजेज प्रा.लि. रहेको छ भने कम्पनीले नेपाली बजारमा यस कारलाई एक करोड ४४ लाख ९० हजार रुपैयाँ मूल्यमा बिक्री वितरण गर्दै आइरहेको छ । हुण्डाई स्यान्टा फी हुण्डाई स्यान्टा फी मा २१९९ सीसीको इञ्जिन समावेश गरिएको छ जसले २०० बीएचपीको पावर र ४४१ एनएमको टर्क प्रोड्युस गर्दछ । त्यसैगरी ७ सिटर यस एसयूभीले १३.०१ केएमपीएलको माइलेज प्रदान गर्दछ । स्यान्टा फी मा ६४ लिटर फ्युल ट्याङ्कक क्यापासिटी रहेको छ भने यस कारको लम्वाई ४७७० मिलिमिटर, उचाई १६८० मिलिमिटर र ग्राउण्ड क्लियरेन्स चाहिँ १८५ मिलिमिटर रहेको छ । हुण्डाईको नेपालका लागि आधिकारीक विक्रेता लक्ष्मी इन्टरकन्टिनेन्टल प्रा.लि. रहेको छ भने कम्पनीले नेपाली बजारमा यस कारको मूल्य एक करोड ४५ लाख ९५ हजार रुपैयाँ तोकेको छ । फोर्ड इन्डेभर फोर्ड इन्डेभर मा ३१९८ सीसीको इञ्जिन समावेश गरिएको छ जसले १९७ बीएचपीको पावर र ४७० एनएमको टर्क प्रोड्युस गर्दछ । त्यसैगरी ७ सिटर यस एसयूभीले १४.२ केएमपीएलको माइलेज प्रदान गर्दछ । इन्डेभरमा ८० लिटर फ्युल ट्याङ्क क्यापासिटी रहेको छ भने यस कारको लम्वाई ४९०३ मिलिमिटर, उचाई १८३७ मिलिमिटर र ग्राउण्ड क्लियरेन्स चाहिँ २२५ मिलिमिटर रहेको छ ।फोर्डको नेपालका लागि आधिकारीक बिक्रेता गो अटोमोवाइल्स प्रा.लि. रहेको छ भने कम्पनीले नेपाली बजारमा यस कारलाई एक करोड ७५ लाख रुपैयाँ मूल्यमा बिक्री वितरण गर्दै आइरहेको छ । टोयोटा ल्याण्ड क्रुजर प्राडो ल्याण्ड क्रुजर प्राडो मा २९८२ सीसीको इञ्जिन समावेश गरिएको छ जसले १७१ बीएचपीको पावर र ४१० एनएमको टर्क प्रोड्युस गर्दछ । त्यसैगरी यस एसयूभीले ११.१३ केएमपीएलको माइलेज प्रदान गर्दछ । यस कारमा ८७ लिटर फ्युल ट्याङ्क क्यापासिटी रहेको छ भने यसको लम्वाई ४८४० मिलिमिटर, उचाई १८८० मिलिमिटर र ग्राउण्ड क्लियरेन्स चाहिँ २२५ मिलिमिटर रहेको छ । जापनिज अटोमेकर कम्पनी टोयोटा को नेपालका लागि आधिकारीक बिक्रेता युनाइटेड ट्रेडर्स सिण्डिकेट प्रा.लि. रहेको छ भने कम्पनीले नेपाली बजारमा यस कारलाई दुई करोड ५७ लाख रुपैयाँ मूल्यमा बिक्री वितरण गर्दै आइरहेको छ । टोयोटा ल्याण्ड क्रुजर टोयोटा ल्याण्ड क्रुजरमा ४४६१ सीसीको इञ्जिन समावेश गरिएको छ जसले २६१ बीएचपीको पावर र ६५० एनएमको टर्क प्रोड्युस गर्दछ । त्यसैगरी यस एसयूभीले ११ केएमपीएलको माइलेज प्रदान गर्दछ । यस कारमा ९३ लिटर फ्युल ट्याङ्क क्यापासिटी रहेको छ भने यसको लम्वाई ४९५० मिलिमिटर, उचाई १९१० मिलिमिटर र ग्राउण्ड क्लियरेन्स चाहिँ २२५ मिलिमिटर रहेको छ ।टोयोटाको नेपालका लागि आधिकारीक बिक्रेता युनाइटेड ट्रेडर्स सिण्डिकेट प्रा.लि. ले नेपाली बजारमा यस कारको मूल्य चार करोड ९२ लाख रुपैयाँ तोकेको छ ।
साढे तीन करोड लागतमा डिप ट्युबवेल जडान
हेटौंडा । भूमिगत जलस्रोत तथा सिँचाइ विकास डिभिजन कार्यालय पर्साले रु तीन करोड ५० लाखको लागतमा यस वर्ष १७ वटा डिप ट्युबवेल जडान गरी विभिन्न स्थानमा सिँचाइ सुविधा पुर्याएको छ । प्रदेश नं २ सरकारको निःसर्त अनुदान कार्यक्रमअन्तर्गत बारा र पर्सा जिल्लाको ग्रामीण क्षेत्रमा उक्त डिप ट्युबवेल निर्माण गरिएको कार्यालयको प्राविधिक शाखाले जनाएको हो । कार्यालयका अनुसार बाराका ११ र पर्साका छ स्थानमा डिप ट्युबवेल जडान गरिएको हो । उपभोक्ता समितिमार्फत गरिएको उक्त कार्यबाट ४२५ बिगाहा जमिन सिञ्चित भइरहेको बताइएको छ । ती डिप ट्युबवेल पर्साको वीरगञ्ज उपमहानगरपालिका–२, पोखरिया, बगही, निचुटा र धोवनीमा तथा बाराको फेटागाउँ, विश्रामपुर, पचरौता, गञ्जभवानीपुर, स्वर्ण गाउँपालिका, तेलकुवाँ र प्रष्टोकामा निर्माण गरिएको हो । एउटा डिप ट्युबवेलमा करिब रु २० लाख खर्च लाग्ने गरेको कार्यालयले जनाएको छ । रासस
एडिबीको सहुलियत ऋणमा छनाेट भए तीन अर्बका योजना
कञ्चनपुर । एशियाली विकास बैंक (एडिबी) को सहुलियत ऋण सहयोगमा भीमदत्त नगरपालिमा रु तीन अर्बका विकास निर्माणका योजना छनोट गरिएका छन् । नगरपालिकामा पूर्वाधार निर्माण र संस्थागत सृदृढीकरणका लागि क्षेत्रीय शहरी विकास आयोजनाअन्तर्गत विकास निर्माणका योजना कार्यान्वयनमा ल्याइन लागेको हो । नगरपालिकामा आयोजनाअन्तर्गत ढल विकास, शहरी सडक निर्माण र फोहर व्यवस्थापन प्रणाली सुधारका लागि एकीकृत फोहरमैला व्यवस्थापन केन्द्र निर्माणका योजना छनोट गरिएका छन् । आयोजनाअन्तर्गत भीमदत्तमा सञ्चालन हुने योजनामा तीन अर्ब रकम खर्च हुनेछ । शहरी सडक निर्माणअन्तर्गत ३६ दशमलव छ किलोमिटर नालीसहित पक्की सडक निर्माण हुने योजना छ । नगरपालिकामा शहरी सडकको ३६ दशमलव छ किलोमिटरमध्ये पहिलो चरणमा १३ दशमलव ८५ किलोमिटर सडक निर्माणका लागि ठेक्का आह्वान गरिएको छ । नगरपालिकाको मुख्य बजार क्षेत्रका सबै गल्लीका सडक निर्माणका लागि गत महिना रु एक अर्ब ७६ करोडको ठेक्का आह्वान गरिएको थियो । सर्वदलीय सर्वपक्षीय बैठकमा आयोजनाअन्तर्गत छनोट गरिएका सबै योजना सफल बनाउन सबै दलहरु एक भएर जाने निर्णयसमेत गरिएको नगरप्रमुख सुरेन्द्र विष्टले बताएका छन् । नगरपालिकासहित सुदूरपश्चिम प्रदेशका धनगढी उपमहानगरपालिका, गोदावरी नगरपालिका र शुक्लाफाँटा नगरपालिकामा क्षेत्रीय शहरी विकास आयोजना सञ्चालनमा रहेको छ । आयोजना लागू भएका चार नगरपालिकाको कूल लागत २१ करोड ४० लाख अमेरिकी डलर रहेको छ । सरकारले आयोजनामा लगानी गर्न एडिबीको साधारण पूँजीगत स्रोतबाट शर्तहरु बमोजिम विभिन्न मुद्रामा १५ करोड अमेरिकी डलर बराबरको सहुलियत ऋण लिएको छ । यस ऋणको अवधि आठ वर्षको ग्रेस अवधिसहित ३२ वर्षको हुनेछ । यसैगरी ऋणको वार्षिक ब्याजदर ग्रेस अवधिभर एक प्रतिशत र त्यसपछि एक दशमलव पाँच प्रतिशत रहनेछ । रासस
एनसीसी बैंकका ग्राहकलाई नेपाल मेडिसिटि अस्पतालमा विशेष छुट
काठमाडौं । नेपाल क्रेडिट एण्ड कमर्स(एनसीसी) बैंकका कर्मचारी तथा ग्राहकहरूले नेपाल मेडिसिटि अस्पतालका सेवाहरूमा विशेष छुट पाउने भएका छन् ।उक्त बैंक र नेपाल मेडिसिटि अस्पतालबीच बैंकका कर्मचारी तथा ग्राहकहररूलाई उपचार शुल्कमा सहुलियत दिने विषयमा सम्झौता भएको हो । सम्झौतापत्रमा नेपाल क्रेडिट एण्ड कमर्स बैंकका प्रमुख कार्यकारी अधिकृत रमेश राज अर्याल र नेपाल मेडिसिटि अस्पतालका महाप्रबन्धक विजय रिमालले हस्ताक्षर गरेका हुन् । सम्झौताअनुसार बैंकका ग्राहकहररूले उक्त छुट बैैकको डेबिट अथवा क्रेडिट कार्ड प्रयोग गरी बिल भुक्तानी गर्दा पाउन सक्नेछन् ।
१५ औं राष्ट्रिय कफी दिवस पहिलाे पटक उपत्यका बाहिर
काठमाडौं । आज १५ औं राष्ट्रिय कफी दिवस पहिलाे पटक उपत्यका बाहिर गुल्मीमा मनाइँदै छ । प्रत्येक वर्ष राष्ट्रिय चिया तथा कफी विकास बोर्डको आयोजना हुने सो कार्यक्रम यस वर्ष उपत्यका बाहिर नेपालका लागि कफीको उद्गम स्थलको रुपमा चिनिने गुल्मीको आँपचौरमा हुँदै छ । कफी उत्पादक किसान, स्टेट, प्रशोधक, विक्रेता, कफी उपभोक्ता र कफीलाई माया गर्ने सबै नेपालीहरूको महत्वपुर्ण चाडको रूपमा रहेको राष्ट्रिय कफी दिवस संचालन भएको हो । वि.सं.१९९५ सालमा हिरा गिरीले बर्माबाट ल्याएको कफीको वीउ गुल्मीको आँपचौरमा रोपण गरे पछि नेपालमा कफी खेती सुरूवात भएको मानिन्छ । “आर्थिक समृद्धिका लागि किसानको हात, गुणस्तरीय कफी रोपणमा हामी सबैको साथ ” भन्ने नाराको साथ यो कार्यक्रम हुने बोर्डले जनाएको छ । मात्रात्मक रूपमा थोरै उत्पादन भए पनि नेपाली कफीले गुणस्तरका सन्दर्भमा नेपाललाई चिनाउन थालिसकेको छ । स्पेसियालिटी कफीको रूपमा नाम कमाइसकेको नेपाली कफीको माग स्वदेश तथा विदेशमा उच्च रहेको छ । एक दसक अघि कुलिन वर्गको मात्र पेय पदार्थको रूपमा लिइने कफी आज हरेक भान्साको सोभा बनिसकेको छ । विशेषगरी शहरी क्षेत्रमा बढ्दो कफी संस्कृतिले गर्दा कफीको आन्तरिक बजारमा पनि व्यापक वृद्धी भएको देखिन्छ । तर माग अनुसार आपुर्ती नहुँदा विगत केही वर्ष कफीको आयात बढेको तथ्याङ्कले देखाउँछ । गतवर्षमा नेपालभर ५ सय ३० मे.टन ग्रीन वीन उत्पादन भएको थियो । सोही वर्ष ९ करोड ९६ लाख बराबरको ८४ मे.टन कफी निर्यात भएको भन्सार विभागको तथ्याङ्कले देखाउँछ जुन अघिल्लो आर्थिक वर्षकै जति परिमाण हो। तर कफी आयातको आँकडा भने लगभग ८ गुनाले बढेको देखिन्छ ।आ.व. २०७४।७५मा जम्मा १६३ मे.टन कफी आयात हुँदा आर्थिक वर्ष मा एक हजार दुई सय ६२ मे.टन कफी आयात भएको विभागको तथ्याङ्कले देखाउँछ । पछिल्लो वर्ष कफी आयातमा ९ करोड ८० लाख रूपैयाँ विदेशिएको छ । बोर्डले आधारित रहेर गरेको अध्ययनले नेपालभर करिब ११ लाख ९८ हजार ५ सय ३६ हेक्टर क्षेत्रफलमा कफी खेती गर्न सकिने र त्यस मध्य ६१ हजार २ सय २८ हेक्टर क्षेत्रफल कफी खेतीका लागि अति उत्तम रहेको देखिएको छ । कफी उत्पादन बढाउनका लागि सम्भावित केही जिल्ला तथा स्थानिय तहसँग बोर्डले योजनाबद्ध समन्वयात्मक कार्यक्रमहरू सञ्चालन गरिरहेको छ, जुन आगामी दिनमा अझ बढाएर लगिने छ । यसका अलावा व्यवसायिक कफी खेतीमा लगानी आकर्षण गर्न बोर्डले गएको बैशाख २ र ३ गते नेपाल कफी व्यवसाय प्रवर्द्धन सम्मेलन २०७६ आयोजना गरेको थियो। नेपाल सरकार प्रधानमन्त्री कृषि आधुनिकिकरण परियोजनाले पनि गुल्मी, अर्घाखाँची, प्युठान, पाल्पा र स्याङ्जा जिल्लाहरूलाई कफी सुपर जोनको रूपमा विकास गरी कफीमा व्यवसायिकता बढाउने प्रयास गरिरहेकाले आगामी दिनहरूमा कफीको उत्पादनमा बढाउने तिव्र सम्भावना रहेकाे बाेर्डले जनाएकाे छ ।
एडिबीको रु.४७ करोड लगानीमा दिक्तेल–हलेसी सडक कालोपत्र सम्पन्न
खोटाङ । मध्यपहाडी लोकमार्गमा पर्ने खोटाङको दिक्तेल–हलेसी सडक कालोपत्र सम्पन्न भएको छ । एशियाली विकास बैंक (एडिबी)को आर्थिक सहयोगमा जिल्लाको प्रमुख व्यापारिक केन्द्र दिक्तेलबजारस्थित रत्नपार्कदेखि त्रिधार्मिकस्थल हलेसीसम्मको ३६ किलोमिटर सडक कालोपत्र सम्पन्न भएको हो । एडिबीको रु ४६ करोड ८९ लाख ९२ हजारको लगानीमा साढे छ मिटर फराकिलो पारिएको सो दिक्तेल–हलेसी सडकमा साढे पाँच मिटर चौडाइ कालोपत्र गरिएको आयोजना प्रमुख विजयकुमार थापाले बताएका छन् । थापाका अनुसार तीन भागमा विभाजन गरेर कालोपत्र गरिएको हो । तीन वर्षभित्र सम्पन्न गर्ने गरी विसं २०७१ जेठ १६ गते ठेकेदार कम्पनीसँग सम्झौता भए पनि दुई वर्ष ढिलो गरेर पाँच वर्षमा मात्रै कालोपत्र सम्पन्न भएको छ । विसं २०७२ वैशाखमा गएको भूकम्प तथा भारतीय नाकाबन्दीलगायतका कारण तोकिएको मितिमा काम सम्पन्न गर्न नसकिएको ठेकेदार कम्पनीले जनाएको छ । राजधानी काठमाडौँलगायत तराईका विभिन्न जिल्ला आवतजावत गर्न तथा दैनिक उपभोग्यवस्तु ढुवानीका लागि प्रयोग गरिने दिक्तेल–हलेसी सडक कालोपत्र सम्पन्न भएपछि जिल्लावासीसमेत हर्षित भएका छन् । विसं २०६४ बाट कच्ची अवस्थामा सञ्चालन हुँदै आएको सो दिक्तेल–हलेसी सडक हिउँदभर सञ्चालन हुने र वर्षा लाग्नासाथ करिब छ महिना बन्द हुने गरेको थियो । हिउँदमा धुलो र बर्खायाममा हिलोका कारण कष्टप्रद यात्रा गर्ने पैदलयात्रीलाई समेत सडक कालोपत्र भएपछि यात्रा गर्न सहज भएको छ । कच्ची अवस्थामा सञ्चालन भएको लामो समयपछि दिक्तेल–हलेसी सडक कालोपत्र भएसँगै जिल्लामा दैनिक उपभोग्यवस्तुको मूल्यसमेत केही मात्रामा घटेको उपभोक्ताहरूले बताएका छन् । छिमेकी जिल्ला भोजपुर हुँदै किमाथाङ्का जोड्ने सो सडक समयमा सम्पन्न गर्न तत्कालीन प्रधानमन्त्री पुष्पकमल दाहाल ‘प्रचण्ड’ले समेत अनुगमनका क्रममा ठेकेदार कम्पनीका प्रतिनिधिलाई भेला गरेर चाँडो सम्पन्न गर्न निर्देशन दिएका थिए । यद्यपि, जिल्लाको प्रमुख मार्गमा दिक्तेल–हलेसी सडक कालोपत्रको काम भने गुणस्तरीय नभएको सर्वत्र गुनासो छ । कालोपत्र गर्नुअघि सडकमा बिच्छ्याइएको रोडा÷ढुङ्गा कमसल प्रयोग गरिएका कारण गुणस्तरहीन भएको प्रत्यक्षदर्शीले आरोप लगाएका छन् । प्रहरी प्रशासनकै आँखा अगाडि दिक्तेल–हलेसी सडक कालोपत्र गुणस्तरहीन बनेकोप्रति अहिलेसम्म कसैले ध्यान नदिएको स्थानीयवासीले बताएका छन् । ठेकेदार कम्पनीले भने मापदण्डअनुसारको निर्माण सामग्री प्रयोग गरेको दाबी गरेका छन् । कालोपत्र गर्नुअघि सडकको बीचबाट दायाँबायाँ साढे सात÷साढे सात मिटर जग्गाको मुआब्जा जग्गा धनीलाई वितरण गरिएको थियो । आयोजना प्रमुख थापाका अनुसार सडक आसपासमा रहेका १०८ घरपरिवारलाई मुआब्जा दिएर हटाउनुका साथै ९०७ जग्गाधनीलाई मुआब्जा दिइएको हो । रासस
नेपाल बैंकले २ अर्ब ५० करोडको डिबेञ्चर जारी गर्ने, बिक्री प्रबन्धकमा नबिल इन्भेष्टमेन्ट नियुक्त
काठमाडौं । नेपाल बैंक लिमिटेडको ऋणपत्र (डिबेञ्चर) निष्काशन तथा बिक्री प्रबन्धकको काम नविल इन्भेष्टमेन्ट बैकिङ लिमिटेडले गर्ने भएको छ । बैंकले प्रतिकित्ता १००० अंकित २५ लाख कित्ता डिबेन्चर निष्काशन गर्न लागेको हो । नेपाल बैंकले १० प्रतिशत व्याज दरमा एनबिएलडिबेन्चर २०८३ निष्काशन गर्न लागेको छ । बैंकले निष्काशन गर्न लागेको २ अर्ब ५० करोड बराबरका डिबेन्चर सात वर्ष लामो अवधिको रहेको छ । कूल २५ लाख कित्ता डिबेन्चर मध्ये १५ लाख कित्ता डिबेन्चर व्यक्तिगत तवरबाट र १० लाख कित्ता कित्ताडिबेन्चर सर्वसाधारणमा निष्काशन गरिने बैंकका प्रमुख कार्यकारी अधिकृत कृष्णबहादुर अधिकारीले बताए । नेपाल बैंकका प्रमुख कार्यकारी अधिकृत कृष्ण बहादुर अधिकारी र नबिल इन्भेष्टमेन्ट बैंकिंगका प्रमुख कार्यकारी अधिकृत सबिर बादे श्रेष्ठका बीच डिबेन्चर निष्काशन तथा बिक्री प्रबन्धकको काम गर्ने बारे समझदारी पत्रमा हस्ताक्षर भएको छ ।
मुस्ताङको जोमसोम–कोरला सडक तीन दिन बन्द हुने
ठिनी । राष्ट्रिय गौरवको कालिगण्डकी करिडोर सडक आयोजनाअन्तर्गत मुस्ताङको जोमसोम–कोरला सडक तीन दिन बन्द गरिने भएको छ । जोमसोम–कोरला निर्माणाधीन सडकको तेस्रो प्याकेजमा पर्ने समरको भिरदेखि झोखोलासम्मको सडक फराकिलो बनाउन मङ्सिर ५ देखि ७ गतेसम्म सवारी आवतजावत बन्द गर्न लागिएको हो । प्रमुख जिल्ला अधिकारी वेदप्रसाद अर्यालको अध्यक्षतामा बसेको बैठकले सवारी आवतजावत रोकेर विस्फोटक पदार्थको प्रयोग गरेर सडक विस्तार गर्ने निर्णय गरेको बेनी–जोमसोम–कोरला सडक आयोजनाले जनाएको छ । निर्माणमा बाधा पुग्ने र दुर्घटनाको जोखिम भएकाले सवारी बन्द गरेर सडक विस्तार गर्न लागिएको आयोजना प्रमुख मुकुन्द अधिकारीले बताएका छन् । उनका अनुसार गत असारदेखि समरको भिरमा ब्लास्टिङ गरी पहाड फुटाएर सडक विस्तारको काम भइरहेको छ । चैले–भेना खण्डमा पर्ने समरको भिरलाई जोखिमयुक्त मानिएको छ । सो खण्डको १२ किलोमिटर सडक स्तरोन्नतिको काम कान्छाराम कोशी एण्ड न्यौपाने जेभीले पाएको छ । उपल्लो मुस्ताङ भ्रमणमा जाने आउने पर्यटक तथा स्थानीयवासीलाई समस्या नहोस् भनेर पूर्वसूचना जारी गरिएको हो । जोमसोम–कोरला ११० किलोमिटर सडकलाई सात खण्डमा विभाजन गरी काम शुरु भएको थियो । सडकको दुई पटक म्याद थप भइसकेको छ भने पछिल्लो समय थपिएको म्याद असारमा सकिँदै छ । एघार मिटर फराकिलो ग्राभेल सडकको चार खण्डको काम अन्तिम चरणमा छन् । छोसेरदेखि कोरला १६ किलोमिटर सडक गत वर्ष करिडोरलाई हस्तान्तरण भइसकेको थियो । चराङदेखि छोसेर खण्डको काम सुस्त भएकाले अपेक्षाअनुसार सडकको प्रगति नभएको करिडोरले जनाएको छ । लोघेकर दामोदरकुण्ड गाउँपालिकाका अध्यक्ष राजु विष्टले निर्माण व्यवसायीको ढिलासुस्तीले न्यून मात्र काम भएको बताए । उपल्लो मुस्ताङमा हिउँदयाममा हिमपात हुने, चिसो शीतलहर छाउने भएकाले पुसदेखि फागुनसम्म काम गर्न सकिँदैन । रासस
