माउन्ट एभरेस्ट डिस्टिलरीद्वारा ‘रेड नेचर’ र ‘ब्लु नेचर’ प्रिमियम स्पिरिट बजारमा
काठमाडौं । नेपाली नयाँ वर्ष २०८३ को अवसर पारेर माउन्ट एभरेस्ट डिस्टिलरी लिमिटेडले प्रिमियम स्पिरिट सेग्मेन्टमा दुई नयाँ उत्पादन सार्वजनिक गर्ने घोषणा गरेको छ । कम्पनीले ‘रेड नेचर’ र ‘ब्लु नेचर’ नामका 40 UP प्रिमियम स्पिरिटहरू बजारमा ल्याउने भएको हो । कम्पनीका अनुसार यी उत्पादनहरू आगामी वैशाख ५ गतेदेखि देशभरका बजारमा उपलब्ध हुनेछन् । आधुनिक उपभोक्ताको स्वाद र प्राथमिकतालाई ध्यानमा राखेर उच्च गुणस्तरमा आधारित उत्पादन तयार गरिएको कम्पनीले जनाएको छ । ७५० एमएल क्षमताको बोतलको अधिकतम खुद्रा मूल्य रु. १,२४० तोकिएको छ । उत्पादन प्रक्रियामा अन्तर्राष्ट्रिय मापदण्ड अपनाइएको र उपभोक्तालाई गुणस्तरीय अनुभव दिने लक्ष्य राखिएको कम्पनीको दाबी छ । नयाँ वर्षको सन्देशसँगै कम्पनीले न्यू इयर सेम सरकल अवधारणालाई अघि सार्दै जिम्मेवार उपभोगको सन्देश पनि प्रवाह गरेको जनाएको छ । कम्पनीका प्रतिनिधिले उपभोक्तालाई गुणस्तरीय विकल्प उपलब्ध गराउनुका साथै जिम्मेवार उपभोग संस्कृतिलाई प्रवर्द्धन गर्ने उद्देश्य रहेको बताएका छन् । माउन्ट एभरेस्ट डिस्टिलरीले आगामी दिनहरूमा पनि बजारको माग अनुसार थप नवीन तथा प्रिमियम उत्पादनहरू ल्याउने योजना रहेको जनाएको छ ।
‘बालेन सरकार गठनपछि महँगी बढ्यो, विद्यार्थी संगठनमाथि प्रतिबन्ध लगाउनु आपत्तिजनक छ’
काठमाडौं । नेपाली कम्युनिष्ट पार्टी (नेकपा)ले नयाँ सरकार गठन लगत्तै महँगी र कालो बजारी बढेको बताएको छ । नेकपाले आइतबार विज्ञप्ति जारी गदै नयाँ सरकार बनेलगत्तै महँगी र कालोबजारी बढेको बताएको हो । नेकपाले विज्ञप्तिमा संविधानको मर्म र भावनाविपरीत विद्यार्थी संगठनहरूमाथि प्रतिबन्ध लगाउने प्रयास अत्यन्तै आपत्तिजनक भएको पनि उल्लेख गरेको छ । सरकारले सुकुम्वासी परिवारहरूलाई बसोबास र जीविकोपार्जनको उचित विकल्प उपलब्ध नगराई जबरजस्ती उठिबास लगाउने तथा झुप्रा भत्काउने कार्यप्रति नेपाली कम्युनिष्ट पार्टीको गम्भीर ध्यानाकर्षण भएको विज्ञप्तिमा उल्लेख गरेको छ । यस्तो छ विज्ञप्ति हालै सरकारले सुकुम्वासी परिवारहरूलाई बसोबास र जीविकोपार्जनको उचित विकल्प उपलब्ध नगराई जबरजस्ती उठिबास लगाउने तथा झुप्रा भत्काउने कार्यप्रति नेपाली कम्युनिष्ट पार्टीको गम्भीर ध्यानाकर्षण भएको छ । यस प्रकारको अमानवीय कदमले पीडित परिवारलाई बिचल्ली पार्नुका साथै सीमान्तकृत समुदायको राज्यप्रतिको जनविश्वास कमजोर बनाउने खतरा बढ्ने हाम्रो ठहर छ । सुकुम्वासी व्यवस्थापनका सन्दर्भमा समुचित पुनर्वासको व्यवस्था नगरी यस्ता कार्य नगर्न सरकारसमक्ष आग्रह गर्दछौं । यसैगरी नयाँ सरकार गठन लगत्तै महङ्गी र कालो बजारी बढेकोमा तत्काल नियन्त्रण गर्न हाम्रो पार्टी आग्रह गर्दछ । साथै संविधानको मर्म र भावनाविपरीत विद्यार्थी संगठनहरूमाथि प्रतिबन्ध लगाउने प्रयास अत्यन्तै आपत्तिजनक छ । पञ्चायती कालखण्डमा समेत संगठित हुने अधिकार उपभोग गर्दै आएका विद्यार्थीहरूमाथि बलिदानीपूर्ण संघर्षबाट प्राप्त संघीय लोकतान्त्रिक गणतन्त्रमा यस्तो प्रतिबन्ध लगाइनु स्वीकार्य हुन सक्दैन । संगठित हुन पाउने संवैधानिक अधिकार तथा नेपालले अनुमोदन गरेका अन्तर्राष्ट्रिय सन्धि–सम्झौताविपरीत ट्रेड युनियनहरूमाथि प्रतिबन्ध लगाउने प्रयासप्रति पनि हाम्रो पार्टी चिन्ता व्यक्त गर्दछ । सरकारलाई यो विषयलाई हलुकारूपमा नलिन र पुनर्विचार गर्न आग्रह गर्दछौं । ताजा जनादेशबाट बनेको वर्तमान सरकारप्रति जनताले सुशासन, सामाजिक न्याय तथा समृद्धिको ठूलो अपेक्षा गरेका छन्। सरकारले अघि सारेका वाचा तथा प्रतिबद्धतापत्रका सकारात्मक विषयहरूलाई हाम्रो पार्टी सकारात्मक रूपमा स्वागत गर्दछ । तथापि, शासन सञ्चालन प्रक्रिया तथा संसदीय अभ्यासका क्रममा देखिएको पूर्वाग्रही, मनोगत तथा एकपक्षीय दृष्टिकोण चिन्ताजनक छन् । नेपाली कम्युनिष्ट पार्टी सरकारलाई अझ लोकतान्त्रिक बन्न, सुकुम्वासी, किसान, मजदूर तथा उपेक्षित, उत्पीडित समुदायप्रति सहिष्णु र जिम्मेवार बन्न, सामाजिक न्याय र सुशासनको विषयमा अनावश्यक स्टनबाजी नगर्न तथा लोकतान्त्रिक अधिकारहरूलाई थप संस्थागत गर्ने दिशामा अघि बढ्न आग्रह गर्दछ । हामी लोकतन्त्रको सर्भिसिङका पक्षमा छौं । तर लोकतन्त्रको सुदृढीकरण, अधिकारहरू खोसेर वा जनताको घरबास उजाडेर सम्भव हुँदैन, बरु सीमान्तीकृत समुदायका अधिकारहरूलाई सुदृढ गर्दै यी समुदायका पक्षमा सामाजिक न्याय र समृद्धि हासिल गर्नु नै सही मार्ग हो भन्ने हाम्रो ठहर छ ।
अस्ट्रियामा शिशु आहारमा विष भेटियो, उत्पादन फिर्ता
भिएना । अस्ट्रियामा शिशुका लागि बनाइएको खानेकुरामा मुसाको विष भेटिएपछि व्यापक सतर्कता अपनाइएको छ र सम्बन्धित उत्पादनहरू बजारबाट फिर्ता बोलाइएको छ । प्रहरीले शनिबार सार्वजनिक गरेको जानकारीअनुसार प्रारम्भिक परीक्षणमै जारमा खतरनाक पदार्थ पुष्टि भएपछि यसलाई गम्भीर सुरक्षा चुनौतीका रूपमा लिइएको छ । अस्ट्रियाली प्रहरीका अनुसार जफत गरिएका नमूनाहरूको परीक्षण गर्दा मुसाको विष पुष्टि भएको हो । यो घटनालाई लक्षित छेडछाडको आशङ्कासँग जोडेर अनुसन्धान भइरहेको छ । जर्मनीमा मुख्यालय रहेको एचआइपिपी ब्रान्डले यसअघि नै आफ्नो ‘आलुसहित गाजर’ प्युरीमा सम्भावित छेडछाड भएको भन्दै अस्ट्रियाको एसपिएआर सुपरमार्केटबाट बिक्री भएका उत्पादनहरू फिर्ता बोलाउने निर्णय गरेको थियो । यो अनुसन्धान जर्मनीमा सुरु गरिएको व्यापक कारबाहीको एक हिस्सा हो, जसअन्तर्गत अस्ट्रिया, चेक गणतन्त्र र स्लोभाकियामा पनि उक्त उत्पादनका जारहरू जफत गरिएको छ । अस्ट्रियाको पूर्वी बर्गेनल्यान्ड प्रान्तस्थित प्रहरीले यो जानकारी सार्वजनिक गर्दै परीक्षणबाट खतरनाक विषादीको पुष्टि भएको जनाएको छ । अस्ट्रियाको खाद्य सुरक्षा निकायले यो घटनालाई सम्भावित फिरौती योजनासँग जोडेर हेरेको छ, जसले शिशु आहार जस्तो संवेदनशील क्षेत्रमा आपराधिक गतिविधिको सङ्केत दिएको छ । अधिकारीहरूले उपभोक्ताहरूलाई उक्त उत्पादन प्रयोग नगर्न र तत्काल खरिद गरिएको स्थानमा फिर्ता गर्न आग्रह गरेका छन् । उक्त जारलाई तल्लो भागमा रातो घेरासहितको सेतो लेबलबाट सजिलै पहिचान गर्न सकिने बताइएको छ । यस घटनाले युरोपमा शिशु खाद्य सुरक्षाबारे बढ्दो चिन्तालाई थप गहिरो बनाएको छ । पछिल्ला महिनाहरूमा पनि विभिन्न बहुराष्ट्रिय कम्पनीहरूले शिशु आहारमा प्रदूषणको आशङ्का गर्दै उत्पादनहरू फिर्ता बोलाउने घटनाहरू भएका छन् । विशेषगरी डिसेम्बरदेखि नेस्टले, डेनोन र ल्याक्टालिसजस्ता कम्पनीहरूले ६० भन्दा बढी देशहरूमा सम्भावित रूपमा टोक्सिन सेरुलाइडबाट दूषित शिशु फार्मुला बजारबाट हटाएका थिए । फ्रान्सेली अधिकारीहरूका अनुसार सेरुलाइडबाट प्रभावित पाउडर दूध सेवन गरेका केही शिशुहरूमा गम्भीर स्वास्थ्य समस्या देखिएको थियो, जसमा बान्ता, वाकवाकी र झाडापखाला जस्ता लक्षण देखिएका थिए र केही घटनामा मृत्यु समेत भएको रिपोर्ट गरिएको थियो । यद्यपि, फ्रान्सेली अभियोजकहरूले जनवरीमा भएको एक शिशुको मृत्यु उक्त दूषित फार्मुलासँग प्रत्यक्ष रूपमा सम्बन्धित नभएको बताएका छन् । नयाँ घटनाले शिशु खाद्य उत्पादनको आपूर्ति शृङ्खलामा सुरक्षा मापदण्ड अझ कडा बनाउनुपर्ने आवश्यकता पुनः उजागर गरेको छ, किनकि यस्ता उत्पादनहरू प्रत्यक्ष रूपमा अत्यन्त संवेदनशील समूह शिशुहरूसँग सम्बन्धित हुन्छन् । रासस
रास्वपाको जिल्ला अधिवेशन वैशाख १५ देखि सुरु हुने
काठमाडौं । राष्ट्रिय स्वतन्त्र पार्टी (रास्वपा)ले वैशाख १५ देखि जिल्ला अधिवेशन सुरु गर्ने भएको छ। आइतबार पार्टी केन्द्रीय कार्यालय, वनस्थलीमा बसेको केन्द्रीय सचिवालय बैठकले यस्तो निर्णय गरेको हो । यस्तै, पार्टीका विभिन्न विभागहरू, केन्द्रीय आयोग, सल्लाहकार परिषद् र संघीय नेतृत्व मञ्चमा मनोनयन गर्ने विषयमा पनि सचिवालयले निर्णय लिने जनाइएको छ ।
महामन्त्री पौडेलको स्पष्टोक्ति– पुरानो सदस्यता खारेज हुँदैन, झनै व्यवस्थित बनाउन खोजिएको हो
काठमाडौं । नेपाली कांग्रेसका महामन्त्री प्रदीप पौडेलले क्रियाशील सदस्यताको डिजिटल अद्यावधिक अभियानलाई सफल पार्न बागमती प्रदेशका नेता कार्यकर्ताहरूलाई आग्रह गरेका छन् । पार्टी केन्द्रीय कार्यालय सानेपामा आयोजित जिल्ला सभापति, जिल्लाबाट प्रतिनिधित्व गर्ने केन्द्रीय सदस्य, पार्टीले जरा अभियानका लागि खटाएका केन्द्रित प्रतिनिधि लगायतको प्रशिक्षण कार्यक्रममा सम्बोधन गर्दै उनले सदस्यतालाई सहज र प्रविधिमैत्री बनाउन डिजिटल अद्यावधिक गर्न लागिएको बताए । एक पटक डिजिटल रेकर्ड भए पछि नवीकरणमा सहजता पुग्ने भन्दै उनले एकपटक आ-आफ्नो स्थानबाट मेहनत गरिदिन नेताहरूलाई आग्रह गरे । सदस्यता डिजिटल अद्यावधिक गर्न लागिए पनि पुरानो खारेज नहुने भन्दै उनले यसमा अलमलमा नपर्न आग्रह गरे। ‘पुरानो क्रियाशील खारेज होइन, अद्यावधिक गर्न लागिएको हो,’ उनले भने, ‘यसमा कोही अलमलमा नपरौं ।’ महामन्त्री पौडेलले निर्वाचन प्रचारको शैली फेरिएर डिजिटल हुन थालेको भन्दै पार्टी सर्कुलर गर्न, आम सदस्यको राय लिन तथा पार्टीका गतिविधिबारे जानकारी दिन अब डिजिटल प्रविधिको उपयोग गरिने बताए । महामन्त्री पौडेलले पार्टीको सदस्य सँग पार्टी विचार लिन, जिम्मेवार बनाउन र सदस्यको क्षमताको रोष्टर तयार पार्न पनि डिजिटल अद्यावधिक आवश्यक रहेको बताए । महामन्त्री पौडेलले सदस्यताका लागि वडामा नै जानुपर्ने व्यवस्था गरिएको भन्दै सदस्यलाई आफ्नै टोलमा फर्काउन र चिनारी बढाउन वडामा नै जानु पर्ने व्यवस्था गरिएको बताए । ‘हरेक क्रियाशील सदस्यलाई प्रणालीमा जोड्न र अपनत्वको भाव विकास गर्न वडामै जान प्रोत्साहित गरिएको हो,’ उनले भने, ‘यसले विवरणमा पारदर्शितासमेत कायम गर्न सकिनेछ । कुनै विशेष कारण जान वडा जान नसक्नेका हकमा के गर्ने भन्ने विषय छलफलमार्फत टुंग्याइने उनले बताए । कांग्रेसले जिल्ला सभापति मार्फत सबै वडामा सदस्यताको फारम पठाउनेछ । वडा सभापति मार्फत अन्य क्रियाशील अद्यावधिक हुने तथा नवीकरण गरिसकेका सदस्यहरूको वडा सभापतिले सदर गरेर इन्ट्री गरेपछि वैध मानिने व्यवस्था मिलाइएको छ । सदस्यता नवीकरण नभएकाले नयाँ फर्म भर्न सकिने भए पनि अद्यावधिक नभएमा आगामी महाधिवेशनसम्बन्धी प्रक्रियामा भाग लिन पाइने छैन ।
यस्ता छन् रास्वपा केन्द्रीय समिति बैठकका प्रस्ताव
काठमाडौं । राष्ट्रिय स्वतन्त्र पार्टी केन्द्रीय समितिको भोलि सोमबार हुने बैठकका लागि विस्तृत कार्यसूची प्रस्ताव गरिएको छ । संगठनात्मक समीक्षा, पदाधिकारी मनोनयनदेखि नीति तथा विधि सुधारसम्मका विषयहरू समेटेर ९ बुँदे एजेन्डा तयार गरिएको प्रवक्ता मनिष झाले जारी प्रेस नोटमा बताइएको छ । प्रस्तावित कार्यसूचीअनुसार बैठकको प्रारम्भमा पार्टी गतिविधिबारे समग्र रूपमा ब्रिफिङ गरिनेछ । त्यसपछि २० जना केन्द्रीय सदस्यले दुई–दुई मिनेटका दरले आफ्नो रिपोर्टिङ प्रस्तुत गर्ने कार्यक्रम रहेको छ । बैठकमा केन्द्रीय समिति पदाधिकारी मनोनयनसम्बन्धी विषयलाई पनि प्रमुख एजेन्डाका रूपमा समावेश गरिएको छ । त्यस्तै आगामी महाधिवेशनसँग सम्बन्धित कार्यविधिको मस्यौदा पनि छलफलमा ल्याइनेछ । पार्टीको विधान संशोधनसम्बन्धी विषयलाई समेत बैठकको प्राथमिक एजेन्डामा राखिएको झाले जारी गरेको प्रेस नोटमा बताइएको छ । यससँगै स्थानीय तह निर्वाचनका लागि उम्मेदवार, क्लब गठन तथा आवेदन आह्वानसम्बन्धी प्रस्तावमाथि पनि छलफल हुने जनाइएको छ । त्यस्तै प्रवासमा रहेका नेपालीलाई विदेशबाटै मतदानको अधिकार दिने विषयमा नीतिगत छलफल गर्ने तयारी गरिएको छ, जसलाई पार्टीको दीर्घकालीन राजनीतिक सुधारसँग जोडेर हेरिएको छ । बैठकमा सचिवालयका निर्णयहरूको अनुमोदन पनि गरिने जनाइएको छ । विविध शीर्षकअन्तर्गत विभिन्न आयोग तथा निकायबाट प्राप्त पत्राचारमाथि छलफल, विषयगत विभागहरूको योजना तयारी तथा नीति निर्माणसम्बन्धी निर्देशन, र संसदीय दलको विधान संशोधनसम्बन्धी विषयहरू पनि समेटिएका छन् ।
कजारिया रमेश टायल्सको सञ्जाल विस्तार, ललितपुरमा नयाँ शोरुम
काठमाडौं । कजारिया रमेश टायल्स लिमिटेडले ललितपुरको इमाडोलस्थित रातामकै चोकमा नयाँ शोरुम सञ्चालनमा ल्याएको छ । छाया हार्डवेयर एण्ड कन्स्ट्रक्सनद्वारा सञ्चालित उक्त शोरुम वैशाख ४ गते शुक्रबार उद्घाटन गरिएको हो । उद्घाटन समारोहमा मिस नेपाल कोस्मो २०२५ दीपशिखा नेपाल तथा कम्पनीका कन्ट्री म्यानेजर अभ्यास तिवारीको उपस्थिति रहेको थियो । तिवारीले रिबन काट्दै शोरुम उद्घाटन गरे । यससँगै ललितपुर तथा आसपासका ग्राहकहरूका लागि विश्वस्तरीय टायल समाधानहरू नजिकबाट उपलब्ध हुने कम्पनीले जनाएको छ । सो अवसरमा कन्ट्री म्यानेजर तिवारीले छाया हार्डवेयरसँगको सहकार्यमार्फत ललितपुरमा उपस्थिति विस्तार गर्न पाउँदा खुसी लागेको बताए । उनका अनुसार नयाँ शोरुमलाई केवल बिक्री केन्द्र मात्र नभई ग्राहकहरूले प्रेरणा, नवप्रवर्तन र आधुनिक टायल समाधान अनुभव गर्न सक्ने केन्द्रका रूपमा विकास गरिएको छ । शोरुममा सिरेमिक तथा भिट्रिफाइड टायल्सका विविध डिजाइन, आकर्षक फिनिस तथा उच्च गुणस्तरयुक्त उत्पादनहरू प्रदर्शनमा राखिएको छ, जुन आधुनिक वास्तुकला र आन्तरिक सजावटका आवश्यकताअनुसार तयार गरिएको कम्पनीको दाबी छ । कम्पनीले नेपालमै स्थापना गरेको टायल उत्पादन उद्योगमार्फत अन्तर्राष्ट्रिय स्तरको गुणस्तर कायम गर्दै ३,००० भन्दा बढी डिजाइन विकल्प उपलब्ध गराउँदै आएको जनाएको छ । साथै, देशभर १०० भन्दा बढी शोरुममार्फत आफ्नो सञ्जाल विस्तार गरिसकेको छ । कजारियाका उत्पादनहरूमा विभिन्न आकारका ग्लेज्ड भिट्रिफाइड टायल, हेभी ड्युटी टायल तथा सेरामिक वाल टायल समावेश छन्, जसलाई पानी तथा दाग प्रतिरोधी, दीगो र आधुनिक डिजाइनयुक्त रूपमा विकास गरिएको छ ।
बुटवलकै सबैभन्दा ठूलो 'न्यू इयर्स इभ सेलिब्रेशन' सम्पन्न
काठमाडौं । हायात प्लेस बुटवलले नेपाली नयाँ वर्ष २०८३ को अवसरमा ‘बुटवलकै सबैभन्दा ठूलो न्यू इयर्स इभ सेलिब्रेशन’ आयोजना गरेको छ । चैत ३० गते (अप्रिल १३) खुला आकाशमुनि होटलको स्विमिङ पुल परिसरमा आयोजित कार्यक्रमले बुटवललाई सांगीतिक तथा मनोरञ्जनात्मक गन्तव्यका रूपमा नयाँ उचाइमा पुर्याएको दाबी गरिएको छ । ‘एक रात, एक मञ्च, दुई आइकन’ (वन नाइट, वन स्टेज, टु आइकन) नारासहित आयोजित कार्यक्रममा २५० भन्दा बढी पाहुनाहरूको उत्साहजनक सहभागिता रहेको थियो । खुला आकाशमुनिको आकर्षक पुलसाइड सेटअप र रङ्गीचङ्गी बत्तीहरूको सजावटले २०८२ लाई बिदाइ गर्दै २०८३ को स्वागतका लागि विशेष माहोल सिर्जना गरेको थियो । कार्यक्रमको सुरुवात ऊर्जावान नृत्य प्रस्तुतिबाट भएको थियो । त्यसपछि प्रख्यात इन्स्ट्रुमेन्टल ब्यान्ड ‘कुटुम्ब’ले आफ्ना मौलिक धुनमार्फत दर्शकहरूलाई मन्त्रमुग्ध बनायो । माहोल अझै तात्दै जाँदा पप गायक नवीन के भट्टराईले स्टेज सम्हाल्दै आफ्ना चर्चित गीतहरू प्रस्तुत गरे, जसमा सहभागीहरू नाचेका र रमाएका थिए । सांगीतिक प्रस्तुतिसँगै पाहुनाहरूले अनलिमिटेड लाइभ फुड काउन्टर, विविध परिकार तथा प्रिमियम पेय पदार्थको पनि भरपुर आनन्द लिएका थिए । कार्यक्रमको सफलताबारे हायात प्लेस बुटवलका जनरल म्यानेजर तुषार नगरले २५० भन्दा बढी पाहुनाको सहभागिताले आफूहरू उत्साहित भएको बताए । उनले कुटुम्ब र नवीन के भट्टराईजस्ता कलाकारलाई एउटै मञ्चमा प्रस्तुत गर्न पाउँदा गर्व लागेको उल्लेख गरे । कार्यक्रमको मुख्य आकर्षण मध्यरातको ‘काउन्टडाउन’ थियो । घडीले १२ बज्नासाथ हुटिङ र तालीसहित नयाँ वर्ष २०८३ को स्वागत गरिएको थियो । हायात प्लेस बुटवलले पश्चिम नेपालको हस्पिटालिटी र लाइफस्टाइल क्षेत्रमा नयाँ आयाम थप्दै आएको छ । यसपटकको न्यू इयर्स इभ कार्यक्रमको सफलताले विश्वस्तरीय अनुभव प्रदान गर्ने होटलको प्रतिबद्धतालाई अझ मजबुत बनाएको जनाइएको छ ।
