कर्मचारी, विद्यार्थी र पत्रकारले राजनीति गर्ने होइन, काम गर्ने हो : सञ्चारमन्त्री तिमिल्सिना
काठमाडौं । सञ्चार तथा सूचना प्रविधिमन्त्री डा. विक्रम तिमिल्सिनाले जनतालाई केन्द्रमा राखेर काम गर्नुको विकल्प नरहेको बताएका छन् । जिल्ला प्रशासन कार्यालय, नुवाकोटमा कर्मचारीसँग भएको छलफलमा उनले राजनीतिक परिवर्तनको उद्देश्य बुझेर जिम्मेवार ढंगले काम गर्न आग्रह गरे । मन्त्री तिमिल्सिनाले भने, ‘राजनीतिक परिवर्तन किन भयो र नयाँ सरकार किन बन्यो भन्ने सबैले बुझ्न जरुरी छ । इमानदार भएर जवाफ खोजे मात्रै अब कसरी अघि बढ्ने भन्ने स्पष्ट हुन्छ ।’ समस्या देखाउन सजिलो भए पनि आत्ममूल्यांकन आवश्यक रहेको उनको भनाइ थियो । ‘अरूलाई मात्रै औंला ठड्याउने होइन, अब आफैतिर पनि औंला ठड्याउनुपर्छ । आफुलाई तोकिएको जिम्मेवारी पूरा गरिएको छ कि छैन भनेर आत्ममूल्यांकन गर्नुपर्छ,’ उनले भने, ‘हरेक नागरिक जिम्मेवार हुनुपर्छ, कसैलाई गैरजिम्मेवार हुने छुट छैन ।’ सेवा प्रवाहमा प्रविधिको प्रयोग बढाउनुपर्नेमा जोड दिँदै मन्त्री तिमिल्सिनाले कर्मचारीको कार्यसम्पादनको मूल्यांकन हुने स्पष्ट पारे । उनले संसद्को मुख्य काम कानुन निर्माण भएको उल्लेख गर्दै दशकौं पुराना कानुनका कारण काममा समस्या आएको बताए । नयाँ कानुन निर्माण र पुराना कानुन परिमार्जन गर्दै प्रशासनलाई प्रविधिमैत्री बनाइँदै लगिएको उनले जानकारी दिए । मन्त्री तिमिल्सिनाले सरकारी कार्यालयले जनतालाई सेवा दिनकै लागि रहेको अनुभूति दिलाउन निर्देशन दिए । ढुंगा, गिटी र बालुवासम्बन्धी समस्या कानुनी रूपमा छिट्टै समाधान गरिने र जुनकुनै काम गर्ने बेला समस्या देखिएमा आवश्यक सहजीकरणका लागि आफू सधैं तयार रहने उनले उल्लेख गरे । ‘पाँच वर्ष यसरी काम गर्नुहोस् कि कर्मचारीलाई आफ्नो कामप्रति गर्व होस्,’ उनले भने । जनताको सेवामा कुनै राजनीतिक हस्तक्षेप नहुने स्पष्ट पार्दै उहाँले व्यक्तिगत लाभ वा स्वार्थका लागि काम नगर्न सचेत गराउनुभयो । मन्त्री तिमिल्सिनाले अहिलेको सरकार काम केन्द्रित र नतिजामुखी भएको बताउँदै सबै क्षेत्रलाई जिम्मेवार बन्न आग्रह गरे । ‘अब कर्मचारी, विद्यार्थी र पत्रकारले राजनीति गर्ने होइन, आफ्नो भूमिकामा केन्द्रित हुनुपर्छ,’ उनले भने । जनताको मतादेशबाट विचलित नहुने उल्लेख गर्दै उनले नुवाकोटलाई नमूना जिल्ला बनाउन समन्वय आवश्यक रहेको बताए । नेपालले खोजेको नयाँ मार्गमा अघि बढ्न सबैलाई आग्रह गर्दै उनले विभिन्न पूर्वाधार आयोजनाको अवस्थाबारे जानकारी पनि लिए । मन्त्री तिमिल्सिनाले बजेट कार्यान्वयनलाई प्राथमिकतामा राख्नुपर्ने, नियमित रूपमा प्रगति विवरण सार्वजनिक गर्नुपर्ने र ‘शून्य फाइल अभियान सफल बनाउन निर्देशन दिए । कार्यक्रममा प्रतिनिधिसभा सदस्य निर्वाचन नुवाकोट क्षेत्र नम्बर २ नाट निर्वाचित अच्युतम लामिछानेले सम्बन्धित कार्यालय प्रमुख नै कामप्रति जिम्मेवार हुनुपर्ने बताए । उनले नुवाकोटलाई शून्य बेरुजु जिल्ला बनाउने, सबैलाई समान अवसर सुनिश्चित गर्ने र कुनै पनि विभेद हुन नदिनुपर्नेमा जोड दिए । छलफलमा सार्वजनिक सेवामा सुधार, शान्ति–सुरक्षा सुदृढीकरण, पूर्वाधार निर्माण लगायत विषयमा छलफल भएको थियो । कार्यक्रममा प्रमुख जिल्ला अधिकारी शम्भुप्रसाद रेग्मी, सुरक्षा निकायका प्रमुख, विभिन्न कार्यालयका प्रमुख तथा सरोकारवालाको उपस्थिति रहेको थियो । छलफलमा इन्धन अभावका कारण निर्माण सामग्री आपूर्ति प्रभावित भएको, सडक कालोपत्रेमा समस्या, बजेट तथा जनशक्ति अभाव र सार्वजनिक खरिद प्रक्रियाका जटिलता लगायतका चुनौतीहरूबारे पनि जानकारी गराइएको थियो । साथै, अस्पतालमा जनशक्ति र उपकरण अभाव, ढुंगा–गिटी–बालुवा मापदण्ड कार्यान्वयनमा समस्या रहेको विषय पनि उठाइएको थियो ।
सरकारलाई कांग्रेसको प्रश्न– ‘के गरिबको भान्सामै कर लगाउने हो ?’
काठमाडौं । नेपालको सीमावर्ती क्षेत्रमा १०० रुपैयाँभन्दा बढी मूल्यका घरायसी तथा व्यक्तिगत प्रयोगका वस्तुमा अनिवार्य भन्सार शुल्क लगाउने सरकारको पछिल्लो कदमप्रति नेपाली कांग्रेसले गम्भीर आपत्ति जनाएको छ । कांग्रेसले यसलाई ‘जनविरोधी, अव्यवहारिक र असंवेदनशील’ कदमको संज्ञा दिँदै तत्काल निर्णय सच्याउन माग गरेको छ । वर्तमान आर्थिक संकटका बीच जनतामाथि थप बोझ थपिएको भन्दै कांग्रेसले विज्ञप्तिमार्फत सरकारको ध्यानाकर्षण गराएको हो । खुला सीमाका कारण सीमावर्ती क्षेत्रका नागरिकहरूले दैनिक उपभोग्य वस्तुहरू भारतबाट सस्तोमा ल्याएर जीवन निर्वाह गर्दै आएको यथार्थलाई सरकारले कुल्चिएको कांग्रेसको ठहर छ । विशेषगरी मधेश प्रदेशका लाखौं सर्वसाधारण, ज्यालादारी मजदुर, साना किसान र निम्न आय भएका परिवारहरू यस निर्णयबाट प्रत्यक्ष मारमा परेका छन् । ‘डिजेलको मूल्य प्रतिलिटर २३७ रुपैयाँ जस्तो उच्चस्तरमा पुगेको बेला २००/३०० रुपैयाँको सानो खरिदमा पनि अतिरिक्त शुल्क लगाउनु भनेको गरिबीलाई संस्थागत गर्ने नीतिगत कदम हो,’ विज्ञप्तिमा भनिएको छ । राज्यले राजस्व वृद्धिको नाममा गरिबको भान्सामै कर लगाउन मिल्छ ? भन्दै कांग्रेसले सरकारको यस विभेदकारी नीतिमाथि केही गम्भीर प्रश्नहरू समेत उठाएको छ । १०० रुपैयाँमा भन्सार लिने निर्णय तत्काल फिर्ता लिनु पर्ने वा व्यक्तिगत प्रयोगका लागि व्यवहारिक सीमा निर्धारण गर्नुपर्ने कांग्रेसको माग रहेको छ । त्यस्तै, खाद्यान्न, तेल, साबुन र लत्ताकपडा जस्ता वस्तुको भन्सार दर घटाउनु पर्ने वा अस्थायी छुट दिनुपर्ने कांग्रेसले उल्लेख गरेको छ । मधेश प्रदेशका लागि कृषि, सिँचाइ र साना उद्योगमा लक्षित राहत र सब्सिडी लागू गर्नुपर्ने, इन्धन आयातमा लाग्ने विभिन्न करहरू घटाई मूल्य नियन्त्रण गर्न र गरिबमुखी ‘क्रस-सब्सिडी’ नीति अवलम्बन गर्नुपर्ने, इन्धनको मूल्य निर्धारण प्रणालीलाई पारदर्शी बनाउनुपर्ने पनि कांग्रेसको माग छ ।
रास्वपाको प्रवास विभाग प्रमुख बने दीपक
काठमाडौं । राष्ट्रिय स्वतन्त्र पार्टी (रास्वपा) को प्रवास विभाग प्रमुखमा दीपक बोहरा नियुक्त भएका छन् । आइतबार बसेको पार्टीको सचिवालय बैठकले बोहरालाई प्रवास विभाग प्रमुखमा नियुक्त गर्ने निर्णय गरेको हो । यसअघि उक्त विभागको प्रमुखको जिम्मेवारी डिपी अर्यालले सम्हाल्दै आएका थिए । अर्याल सभामुख बनेपछि बोहरालाई सो जिम्मेवारी दिइएको हो ।
निजी क्षेत्रलाई हेर्ने दृष्टिकोण परिवर्तन गर्नुपर्छ : अध्यक्ष ढकाल
दोधारा चाँदनी । नेपाल उद्योग वाणिज्य महासङ्घका अध्यक्ष चन्द्रप्रसाद ढकालले निजी क्षेत्रलाई हेर्ने दृष्टिकोणमा सबैले परिवर्तन ल्याउनुपर्ने बताएका छन् । आइतबार कञ्चनपुर उद्योग वाणिज्य सङ्घको ३४औँ वार्षिक साधारणसभाको उद्घाटन समारोहमा बोल्दै उनले निजी क्षेत्र नाफा कमाउनका लागि मात्रै हो भनेर हेर्ने दृष्टिकोण परिवर्तन गर्नुपर्नेमा जोड दिए । 'कुल गार्हस्थ उत्पादन (जिडिपी)मा ८० प्रतिशतभन्दा बढी योगदान गर्ने र हरेक पूर्वाधार निर्माणमा योगदान गर्ने निजी क्षेत्र हो', ढकालले भने, 'सबैभन्दा बढी रोजगारी सिर्जना पनि निजी क्षेत्रले गरिरहेका छन् ।' उनले सुदूरपश्चिममा पर्यटनको अथाह सम्भावना रहेकाले पर्यटन प्रवर्द्धन गर्ने र रोजगारी सिर्जना गर्ने उद्देश्यले यस क्षेत्रमा आफूले लगानी गरेको बताए । 'सुदूरपश्चिममा जहाँ हेर्यो त्यहीँ सम्भावना छ, त्यसकारण यहाँको सबैभन्दा ठूलो पर्यटन पूर्वाधार अगाडि बढाएका छौँ', अध्यक्ष ढकालले भने, 'यसले सुदूरपश्चिमको मात्रै नभई मुलुकमै पर्यटन प्रवर्द्धनमा टेवा पुगाउने छ ।' उनले इमान्दारिताका साथ काम गरे प्रतिफल आउने विश्वास व्यक्त गरे । सुदूरपश्चिमबाट छिमेकी मुलुक भारतका ठूला औद्योगिक क्षेत्र नजिक रहेकाले त्यसको फाइदा पनि सुदूरपश्चिमलाई रहेको उनले बताए । 'यहाँको बडिमालिका, रामारोशन जस्ता धार्मिक पर्यटकीय गन्तव्य छन्,' ढकालले भने, 'अब पर्यटकीय पूर्वाधारमा पनि लगानी हुनुपर्छ ।' उनले निजी क्षेत्रको समस्या समाधानका लागि सरकारसँग निरन्तर पहल गरिरहेको बताए ।
खजुरा बन्दै फुटबलको केन्द्र, गाउँमै हजारौँ दर्शक
राँझा । पछिल्लो समय नेपालगञ्ज रङ्गशालामा दर्शक हराउँदै गएका बेला बाँकको खजुरा क्षेत्रमा भने फुटबल खेलप्रति स्थानीयको आकर्षण बढ्दै गएको छ । खजुरा क्षेत्रमा आयोजना हुने सानादेखि ठूला सबै फुटबल प्रतियोगितामा स्थानीय दर्शकको उल्लेख्य सहभागिता देखिन्छ । यहाँका गाउँमा हुने फुटबल प्रतियोगिता हेर्न टाढाटाढाबाट स्थानीय खेल मैदानसम्म पुग्ने गरेका छन् । अखिल नेपाल फुटबल सङ्घका केन्द्रीय सदस्य भोजराज शाहीले यहाँ हुने फुटबलमा खेलाडी र दर्शकको सहभागिताले खेलप्रति आकर्षण बढ्दै गएको देखाउने बताए । 'नेपालगञ्ज रङ्गशालामा हुने फुटबल प्रतियोगितामा दर्शक सङ्ख्या न्यून हुँदा खजुरा क्षेत्रमा भने यो सङ्ख्या बढ्दै गएको छ', उनले भो, 'खजुरा क्षेत्र फुटबल खेलाडी उत्पादनको उर्वर क्षेत्र हो, यहाँ फुटबलप्रति स्थानीयको छुट्टै खालको लगाव छ ।' खजुरा गाउँपालिकामा नियमितजसो ठूलासाना धनराशिका फुटबल प्रतियोगिता आयोजना भइरहने जनाउँदै शाहीले यसले खेलाडी र फुटबलप्रेमीलाई उत्साहित बनाएको धारणा राखे । खजुरा गाउँपालिका-४, डीगाउँमा करिब रु ६० लाखको खर्चमा एन्टी एरिना प्रथम खजुरा गोल्डकप सञ्चालन भइरहेको छ । प्रतियोगिताको विजेतालाई रु सात लाख र द्वितीयलाई रु चार लाख नगद पुरस्कार प्रदान गरिने आयोजक न्यू डाँफे स्पोटर्स क्लबका अध्यक्ष बालाराम खत्रीले जानकारी दिए । 'पहिलो पटक गाउँमा गोल्डकप आयोजना गर्दैछौँ, सबैको साथ र सहयोग प्राप्त भएको छ', उनले भने, 'करिब ५० हजार दर्शकले प्रतियोगितामा खेल अवलोकन गर्ने हाम्रो अनुमान छ ।' एन्टी एरिना प्रथम खजुरा गोल्डकपमा यस क्षेत्रका साथै नेपालगञ्ज र कोहलपुरबाट समेत दर्शक सहभागी हुने गरेका खत्रीले बताए । खजुरा गाउँपालिकाका अध्यक्ष डम्बर विकले गाउँमा हुने यस्ता प्रतियोगिताले नयाँ खेलाडी उत्पादन गर्नुका साथै फुटबल खेलको विकास हुने बताउँदै गोल्डकपलाई आगामी वर्षदेखि पालिकाको वार्षिक बजेटमा राखेर निरन्तरता दिने जानकारी दिए । रासस
घण्टीको नयाँ अभियान : सांसदविहीन क्षेत्रमा समानुपातिकको ‘कमान्ड’
काठमाडौं । राष्ट्रिय स्वतन्त्र पार्टी (रास्वपा)ले प्रत्यक्ष निर्वाचित सांसद नरहेको निर्वाचन क्षेत्रमा समानुपातिक तर्फबाट निर्वाचित सांसदहरूलाई जिम्मेवारी तोक्ने निर्णय गरेको छ । आइतबार पार्टी केन्द्रीय कार्यालय, वनस्थलीमा बसेको केन्द्रीय सचिवालय बैठकले यस्तो निर्णय गरेको हो । जिल्ला र निर्वाचन क्षेत्र सहितको सूची भोलिको केन्द्रीय समितिको बैठकबाट पारित गर्ने योजना रहेको प्रवक्ता मनिष झाले जानकारी दिए । त्यस्तै, प्रवास विभागको प्रमुखमा केन्द्रीय सचिवालय सदस्य तथा सांसद दीपक बोहरा नियुक्त भएका छन् । यसअघि विभागको प्रमुखको जिम्मेवारीमा डीपी अर्याल रहेका थिए । उनी सभामुखमा निर्वाचित भएपछि यो पद खाली रहेको थियो । त्यसैगरी, रास्वपाले वैशाख १५ देखि जिल्ला अधिवेशन सुरु गर्ने भएको छ ।
इन्धनको मूल्यवृद्धिले चितवनमा १२५ ठेक्काको काम रोकिने अवस्थामा
चितवन । पूर्वाधार विकास कार्यालय चितवनद्वारा सञ्चालित १२५ वटा ठेक्काका काम रोकिने अवस्थामा पुगेका छन् । इन्धनसहित आवश्यक वस्तुमा बढ्दो महँगीका कारण ती ठेक्कामा काम हुन नसक्ने अवस्थामा पुगेको हो । कार्यालयका प्रमुख वीरेन्द्रकुमार चौधरीका अनुसार यस कार्यालयमा २६७ वटा आयोजना रहेकामा अहिले ठेक्का सम्झौता भई २१७ वटा सञ्चालन भइरहेका छन् । तीमध्ये १२५ वटा आयोजनाको काम रोकिने अवस्थामा आएका उनले बताए । यसरी ठेक्का सम्झौता गर्ने समयमा भन्दा अहिले इन्धनको मूल्यमा भएको वृद्धि र अलकत्रा (विटुमिन) को समस्याका कारण पूर्वाधार विकासका काम रोकिने अवस्थामा पुगेका उनको भनाइ छ । प्रमुख चौधरीले भने, 'निर्माण व्यवसायीहरूले ‘निर्माण होलिडे’ (तत्कालका लागि रोक्न मिल्ने प्रकृतिका आयोजनालाई रोक्ने प्रक्रिया) को माग गर्दै कार्यालयमा पत्र बुझाएका छन् ।' इन्धनको मूल्य बढेपछि सबै क्षेत्रमा मूल्य वृद्धि हुँदा पूर्वाधार निर्माण प्रभावित बन्दै आएका उनको भनाइ छ । यस कार्यालयबाट ५० वटा आयोजना उपभोक्ता समितिबाट गर्नुपर्ने भए पनि ती आयोजनाको काम पनि हुन सकेको छैन । कार्यालयले अहिले १९ वटा पुल निर्माण गरिरहेको छ भने अन्य आयोजनाअन्तर्गत सडक निर्माण भइरहेका उनले बताए । कार्यालय प्रमुख चौधरीले भने, 'यस्तै अवस्था रहे यस कार्यालयबाट सुरु गरिएका आयोजनामध्ये ५० देखि ६० प्रतिशत काम सम्पन्न हुने अवस्था छैन ।' ६७ करोड रुपैयाँ बजेटबाट विकास निर्माण गर्दै आएको कार्यालयले सरकारको निर्णयअनुसार अघि बढ्ने निर्माण व्यावसायीलाई बताएको छ । निर्माण व्यवसायी सङ्घ चितवनका महासचिव पुष्कर अधिकारीले अहिलेको अवस्थामा निर्माण व्यवसायीले काम गर्न सक्ने अवस्था नभएको बताए । उनले यही अवस्थामा महँगी बढ्दै जाँदा काम गर्न नसकिने भएकाले निर्माण होलिडेका रूपमा सरकारले अघि बढाउन आवश्यक रहेको धारणा राखे । महँगीमा भएको वृद्धिका कारण बजेटमा समायोजन वा होलिडेका रूपमा राज्यले निर्माण व्यवसायीलाई सम्बोधन गर्नुपर्नेमा उनले जोड दिए । रासस
कांग्रेस संसदीय दलको नेता छान्न वैशाख ८ मा चुनाव
काठमाडौं । नेपाली कांग्रेसले संसदीय दलको नेता चयन गर्न वैशाख ८ गते (मंगलबार) निर्वाचन गर्ने निर्णय गरेको छ । कार्यालयले उपत्यका बाहिर रहेका सांसदहरूलाई वैशाख ७ गतेभित्र अनिवार्य रूपमा काठमाडौं आइपुग्न मोबाइल सन्देशमार्फत जानकारी गराएको एक सांसदले जानकारी दिए । काठमाडौं उपत्यकाभित्र रहेका सांसदहरूलाई निर्वाचनसम्म बाहिर नजान पनि अनुरोध गरिएको छ । सांसद प्रकाशसिंह बस्नेतका अनुसार हाम्रो मागअनुसार ८ गते बिहान दलको नेता चयनको निर्वाचन हुने कार्यक्रम रहेको छ ।
