नाडा निर्वाचन विवाद अदालतमा, नवनिर्वाचित कार्यसमितिको पदस्थापन रोकियो
काठमाडौं । नेपाल अटोमोबाइल्स एसोसिएसन (नाडा) को हालै सम्पन्न ४९औं साधारण सभा तथा निर्वाचन विवाद उच्च अदालतमा पुगेको छ । निर्वाचन प्रक्रिया धाँधली भएको र विधानविपरीत अध्यक्षको चुनाव गराइएको भन्दै परेको मुद्दामा पाटन उच्च अदालतले पुस २५ गतेका लागि निर्वाचन रोक्न अन्तरिम आदेश दिएको हो । असन्तुष्ट पक्षका सुनिल रिजालका अनुसार नाडाको परम्परा र विधानको मर्मअनुसार वरिष्ठ उपाध्यक्ष स्वतः अध्यक्ष हुनुपर्नेमा सो प्रावधानलाई मिचेर सिधै अध्यक्ष पदमा सर्वसम्मत चयन गरिएको थियो । ‘सुरुमा हाम्रो मुख्य मुद्दा वरिष्ठ उपाध्यक्षलाई अध्यक्ष बनाइएन भन्ने थियो । त्यसपछि कानुन विपरीत साधारण सभा र निर्वाचन गरियो । सोही मुद्दाअन्तर्गत अदालतले यो फैसला गरेको हो,’ उनले भने । वरिष्ठ उपाध्यक्षको पदका लागि हुनुपर्ने चुनावलाई अध्यक्ष पदको चुनावमा परिणत गर्नु स्वतः गैरकानुनी रहेको असन्तुष्ट पक्षको दाबी छ । निर्वाचन प्रक्रियामा गम्भीर धाँधली भएको र सर्वसम्मतको नाममा सिन्डिकेट खडा गरिएको आरोप समेत लगाइएको छ । उम्मेदवारी दर्ताका क्रममा ढोका बन्द गरेर अन्य प्रतिस्पर्धीलाई प्रवेश नदिइएको, र उम्मेदवार बन्न चाहने कार्यसमितिका सदस्यलाई प्रवेश रोकिएको समेत असन्तुष्ट पक्षको आरोप छ । ‘उम्मेदवारी दिने दिन ढोका थुनेर अरूलाई छिर्नै दिइएन । एउटा ढोका त हामी आफैले ठेलेर छिर्यौं, तर अर्को ढोकाबाट छिर्न दिइएन,’ एक सदस्यले भने । उम्मेदवारी दर्ताका क्रममा राष्ट्रिय परिचयपत्रलाई मान्यता नदिइ अनिवार्य रूपमा नागरिकता मागिएको र कतिपय व्यवसायीसँग उनीहरूको व्यवसायको आधिकारिक परिचयपत्र मागेर उम्मेदवार बन्नबाट वञ्चित गराइएको पनि निवेदक पक्षको आरोप हो । असन्तुष्ट पक्षका अनुसार अदालतले सम्पूर्ण कागजात अध्ययन गरेपछि मात्रै अन्तिम निर्णय दिनेछ । ‘अदालतको आदेश निर्वाचनको परिणाम मात्र रोक्नु भन्ने हो, अन्तिम फैसला होइन । साधारण सभा र निर्वाचन प्रक्रियामा त्रुटि छ कि छैन भनेर अदालतले सबै कागजपत्र मागेको छ । यदि प्रक्रियामा गल्ती भेटिएमा त्यसपछि मात्रै अदालतले थप निर्णय गर्नेछ,’ उनले भने । विवादित साधारण सभा र त्यसपछि गराइएको निर्वाचन दुवै विषयलाई समेटेर एउटै रिट निवेदन दायर गरिएको थियो । अदालतले सोही निवेदनमाथि सुनुवाइ गर्दै दुवै विषयसँग सम्बन्धित कागजात मागेको हो । ‘हाम्रो रिट एउटै हो, जसमा साधारण सभादेखि निर्वाचनसम्मका सबै विषय समेटिएका छन्,’ ती सदस्यले भने । निवेदक पक्षले मतदाता नामावलीमा नक्कली सदस्य र प्रबन्धकहरू खडा गरी मतदान गरिएको दाबी समेत गरेको छ । ‘यदि नामावलीमा भएका व्यक्तिहरूलाई बोलाएर छानबिन गर्ने हो भने ९० प्रतिशत नक्कली मतदाता भेटिन्छन् । त्यसपछि उनीहरू जालसाजीको मुद्दामा फस्नेछन्,’ ती सदस्यले भने । यद्यपि निर्वाचित पक्षले गल्ती स्वीकार गरी सहमतिका लागि प्रस्ताव गरेमा सहकार्य गर्न सकिने सम्भावना पनि रहेको असन्तुष्ट पक्षले बताएका छन् । अदालतले निर्वाचित पक्षलाई गत ४७औं वार्षिक साधारण सभा र निर्वाचनसम्बन्धी सम्पूर्ण कागजात, मतदाता नामावली, निर्वाचन कार्यतालिका, निर्णयपुस्तिका लगायतका प्रमाणहरू पेश गर्न आदेश दिएको छ । निर्वाचित पक्षले अबको एक/दुई दिनभित्र कागजात बुझाउने तयारी गरिरहेको छ । हाल पदस्थापन रोकिएको र अदालतले कागजात अध्ययन गर्ने प्रक्रियामा रहेकाले नाडाको नयाँ नेतृत्वको भविष्य अदालती प्रक्रिया र दुई पक्षबीचको सम्भावित सहमतिमा निर्भर देखिएको छ । नाडाको ४७औं साधारण सभामा वरिष्ठ उपाध्यक्षलाई स्वतः अध्यक्ष बनाउने सहमति भएको थियो । तर तत्कालीन समयमा सीडीओ कार्यालयले कार्यान्वयन नगरेपछि असन्तुष्ट पक्षले अदालत पुगेको थियो ।
कांग्रेस दास र लाशहरूको पार्टी होइन : गगन थापा
काठमाडौं । नेपाली कांग्रेसका महामन्त्री गगनकुमार थापाले नेपाली कांग्ररेस कुनै दास र लाशको पार्टी नभएको बताएका छन् । थापाले नेपाली कांग्रेसमा अब कुनै तानाशाही नचल्ने दाबीसमेत गरे । उनले भने, ‘अब नेपाली कांग्रेसमा कोही ठूलो–सानो हुँदैन । मञ्चमा बस्ने र भुइँमा बस्ने बीचमा फरक व्यवहार हुँदैन ।’ थापाले नव युवापुस्ता व्यक्तिगत रूपमा आफूहरूसँग नरिसाएको बताए । ‘नव युवापुस्ता हाम्रो कार्यशैलीसँग रिसाएको हो,’ थापाले दाबी गर्दै भने । भाद्र २३ र २४ पछि कांग्रेस सुधारिनुपर्छ भन्नेहरू आज भृकुटीमण्डपमा आएको र सुधारिन नचाहनेहरू बाहिर रहेको मत उनको छ । अर्को प्रसंगमा थापाले पार्टीभित्र नेपोबेवी हावी भएको बताए । अब नेपाली कांग्रेस त्यो चरणबाट मुक्त हुनुपर्ने उनको भनाइ छ ।
नेपाली कांग्रेसको विशेष महाधिवेशन : बन्दसत्र भोलि बिहान ८ बजे
काठमाडौं । नेपाली कांग्रेसको विशेष महाधिवेशन अन्तर्गतको बन्दसत्र सोमबार (भोलि) बिहान ८ बजेबाट सुरु हुने भएको छ । विशेष महाधिवेशन पक्षधर नेता मनोजमणि आचार्यले बन्दसत्र भोलि बिहान ८ बजेबाट प्रारम्भ हुने जानकारी दिए । उनले बन्दसत्रमा सहभागी प्रतिनिधिहरूलाई समयमै उपस्थित हुन अनुरोधसमेत गरेका छन् । महाधिवेशनस्थलमै हुने बन्दसत्रमा पार्टीको समसामयिक राजनीतिक अवस्था, संगठनात्मक संरचना तथा भावी कार्यदिशाबारे छलफल हुने जनाइएको छ । विशेष महाधिवेशनलाई लिएर पार्टीभित्र मतभेद र बहस जारी रहेका बेला सुरु हुन लागेको बन्दसत्रलाई महत्त्वपूर्ण मानिएको छ । बन्दसत्रका निर्णयहरूले पार्टीको आगामी रणनीति र आन्तरिक राजनीतिमा निर्णायक प्रभाव पार्ने नेताहरूको अपेक्षा छ ।
हामी कांग्रेस पनि बदल्छौं, देश पनि बदल्छौं : विश्वप्रकाश शर्मा
काठमाडौं । नेपाली कांग्रेसका महामन्त्री विश्वप्रकाश शर्माले यो देशको बिग्रिएको मौसमलाई सफा गर्नुपर्ने बेला आएको दाबी गरेका छन् । आइतबार (आज) विशेष महाधिवेशनलाई सम्बोधन गर्दै उनले अब देशको आकाश धुम्मिन नदिने बताए । ‘विशेष महाधिवेशन कांग्रेसलाई बलियो बनाउने होइन, प्रधान मुद्दा देशलाई बलियो बनाउने हो,’ उनले भने । शर्माले अब कांग्रेस जलेका भवन जोड्ने र बिग्रिएका मन जोड्ने काममा लाग्ने प्रणसमेत गरे । उनले नेतृत्वको एउटा मिसन हुनुपर्ने बताएका छन् । उनका अनुसार उचाइ प्राप्त गरेपछि सम्मानजनक बर्हिगमन पनि गर्नुपर्छ । शर्माले अबको कांग्रेसको मूलमन्त्र सद्भाव, सुशासन र समुन्नति भएको बताए । उनले काठमाडौंबाट जिल्ला फर्किँदा आफ्नो गाउँ र ठाउँमा सद्भाव बोकेर जान कार्यकर्तालाई आग्रहसमेत गरे । शर्माले सभापति शेरबहादुर देउवालाई आफूले सम्मानजनक बहिर्गमन गर्न आग्रह गरेको भएपनि उनले नसुनेकोमा दुखेसोसमेत पोखे । शर्माले देउवाले आफ्नो सुझाव मानेको भए यस्तो अवस्था नआउने पनि दावी गरे ।
पहिले निद्राबाट उठ्नूहोस्, जागृत बन्नूहोस् : महेश आचार्य
काठमाडौं । नेपाली कांग्रेसका नेता महेश आचार्यले नेपाली कांग्रेसका नेताहरूलाई उठ्न र जागृत हुन आग्रह गरेका छन् । कांग्रेसको काँधमा अहिले ठूलो जिम्मेवारी आएको दाबी पनि आचार्यको छ । सुतेको कांग्रेसले देश बनाउन नसकेको अवस्थामा अब नवीन कांग्रेस बनाउन सबै जाग्नुपर्ने उनको आग्रह रहेको छ । ‘अब कांग्रेस न हिजोको जस्तो हुनेछ न त आजको जस्तो हुनेछ । अब नेपाली कांग्रेस नदीजस्तो सलल बग्ने हुनुपर्छ,’ आचार्यले भने । पूर्वअर्थमन्त्रीसमेत रहेका आचार्यले सूचना प्रविधिको माध्यमबाट देशमै रोजगारी सिर्जना गर्नुपर्नेमा जोड दिए ।
सहकारी क्षेत्रको नियमन ठूलो चुनौती बनेको गुनासो, मन्त्रीले भने : सहकारी अभियान सुदृढ बनाउनु साझा दायित्व हो
काठमाडौं । राष्ट्रिय सहकारी महासंघको ३३ औं वार्षिक साधारण सभा सफलतापूर्वक सम्पन्न भएको छ । साधारण सभाको उद्घाटन गर्दै भौतिक पूर्वाधार तथा यातायात, वन तथा वातावरण मन्त्री माधवप्रसाद चौलागाईंले सहकारी अभियान देशको अर्थतन्त्रको बलियो खम्बा भएको उल्लेख गर्दै यस क्षेत्रमा देखिएका चुनौती समाधान गर्दै अभियानलाई प्रभावकारी बनाउनु सरकार मात्र नभई सम्पूर्ण सरोकारवालाको साझा दायित्व भएको बताए । उनले सहकारीलाई पारदर्शी, उत्तरदायी र विश्वासयोग्य बनाउँदै आर्थिक समृद्धिमा यसको भूमिकालाई अझ सुदृढ गर्नुपर्ने आवश्यकता औँल्याए । साधारण सभामा सहकारी विभागका रजिस्ट्रार सुशील ढकालले सहकारी अभियानसँग हातेमालो गर्दै देखिएका समस्या समाधान गर्न पहल गर्ने प्रतिबद्धता व्यक्त गरे । उनले सहकारी क्षेत्रको नियमन अहिले सबैभन्दा ठूलो चुनौती बनेको बताउँदै नियमन प्रणालीमा एकरूपता र स्पष्टता ल्याउन जरुरी रहेकोमा जोड दिए । सहकारीप्रति जनविश्वास कायम राख्न प्रभावकारी अनुगमन र नीतिगत सुधार अपरिहार्य रहेको उनको भनाइ थियो । उद्घाटन कार्यक्रममा महासंघका सल्लाहकार केशव बडाल, दीपकप्रकाश बाँस्कोटा खगराज अधिकारी, देवन्द्रराज कडेल, लिलामणि पौडेल, गणेश शाह र उषा झाले सहकारी अभियानलाई सशक्त रूपमा अगाडि बढाउन महासंघले खेल्नुपर्ने नेतृत्वदायी भूमिकाबारे धारणा राखे । उनीहरूले वर्तमान अवस्थामा सहकारी क्षेत्रमाथि बढ्दै गएको दबाब, विश्वासको संकट तथा नीतिगत अस्पष्टताका बीच महासंघको सशक्त नेतृत्व अपरिहार्य रहेको औँल्याए । कार्यक्रममा महासंघका कार्यवाहक अध्यक्ष रमेश पोखरेलले महासंघको प्रगति प्रतिवेदन प्रस्तुत गरे । उपाध्यक्ष खेम पाठकले स्वागत मन्तव्य राखे भने उपाध्यक्ष डीबी बस्नेतले महासंघको विनियम संशोधन प्रस्ताव पेश गरे । उपाध्यक्ष इन्दिरा पन्तले महासंघको भावी कार्यक्रम तथा बजेट प्रस्तुत गरिन् । महासंघका महाप्रबन्धकले आर्थिक प्रतिवेदन प्रस्तुत गरेका थिए । साधारण सभाले सहकारी क्षेत्रको सुदृढीकरण, नीतिगत सुधार, पारदर्शिता र विश्वास पुनःस्थापनाका लागि महासंघले अझ प्रभावकारी भूमिका खेल्नुपर्ने निष्कर्ष निकालेको छ । सभाले सहकारी अभियानलाई थप मजबुत बनाउँदै राष्ट्रिय अर्थतन्त्रमा यसको योगदान विस्तार गर्ने प्रतिबद्धता समेत व्यक्त गरेको छ ।
कांग्रेस बलियो बनाउने अभियान सुरु भयो : प्रदीप पौडेल
काठमाडौं । नेपाली कांग्रेसका केन्द्रीय सदस्य प्रदीप पौडेलले कांग्रेस बलियो बनाउने अभियान सुरु भएको बताएका छन् । विशेष महाधिवेशनले कांग्रेसलाई अझ बलियो बनाउन लाग्नुपर्नेमा उनले जोड दिए । उनका अनुसार विगतमा सबै आन्दोलन कांग्रेसले गरेको थियो तर भदौ २३ र २४ गते कांग्रेसलाई युवाहरूले सचेत बनाए । उक्त आन्दोलनले कांग्रेसलाई सच्याउन चुनौती दिएको पौडेलको दाबी छ । सोही आन्दोलनको म्यान्डेटअनुसार विशेष महाधिवेशनले नेतृत्व लिन पर्नेमा पौडेलको जोड छ ।
राजनीतिक दल, उम्मेदवार र मतदाताका लागि सुरक्षाको भरपर्दो वातावरण छ : आयोग
काठमाडौं । निर्वाचन आयोगले आशन्न प्रतिनिधिसभा सदस्य निर्वाचनका लागि राजनीतिक दल, उम्मेदवार र मतदताका लागि सुरक्षाको भरपर्दो वातावरण हुने बताएका छन् । निर्वाचनमा सुरक्षाकै कारण राजनीतिक दल र उम्मेदवारले जनतासँग मात माग्न र मतदताले मतदान गर्न असुविधा हुने स्थिति नआउने आयोगका प्रवक्ता नारायणप्रसाद भट्टराईले बताएका हुन् । उनले एकीकृत सुरक्षा योजनाअनुसारका चारैसुरक्षा निकायले समन्वयात्मक काम गरिरहेको र नेपाल सरकारले पनि आवश्यक स्रोत साधन उपलब्ध गराइरहेको स्पष्ट गरे । 'राजनीतिक दल, उम्मेदवार वा पक्षधरहरुले जनता र मतदातासमम्म आफ्ना विचार वा प्रचार लैजान निर्भयतापूर्वक विश्वस्त भएर लाग्नसक्ने स्थिति छ । सुरक्षाकै कारण मतदातासमक्ष उहाँहरु जान नसक्ने अवस्था छैन', उनले भने, 'यसका लागि सुरक्षा निकायले चनाखो भएर काम गरिरहेका छन् । सरकारले स्रोत, साधन उपलब्ध गराएकै छ ।'
