छ्याङ्दी हाइड्रोको कात्तिक १५ गते बुक क्लोज
काठमाडौं । छ्याङ्दी हाइड्रोपावर लिमिटेडको आगामी कात्तिक १५ गते बुक क्लोज हुने भएको छ । कम्पनीले वार्षिक साधारणसभामा जाने प्रयोजनको लागि उक्त एकदिन संस्थाको बुक क्लोज गर्न लागेको हो । यस कम्पनी आगामी कात्तिक २९ गते चौंथो र पाँचौँ वार्षिक साधारणसभामा जाँदै छ ।
२५ कम्पनीले ७ अर्ब ८६ करोडको आईपीओ निष्कासन गर्दै, कसको कति (सूचिसहित)
काठमाडौं । जलविद्युत र वित्तीय क्षेत्रका गरी २५ कम्पनीले साधारण सेयर (आईपीओ) निष्कासन गर्न लागेका छन् । २५ मध्ये १९ वटा जलविद्युत कम्पनी रहेका छन् । ७ अर्ब ८६ करोड ७६ लाख ५७ हजार रुपैयाँ बराबरको ७ करोड ८६ लाख ७६ हजार कित्ता आईपीओ निष्कासन गर्न लागेका हुन् । सबै कम्पनीले आईपीओ निष्कासन गर्न नेपाल धितोपत्र बोर्डमा निवेदन दिएका छन् । (सूची हेर्न यहाँ क्लिक गर्नुहोस) अपरतामाकोसी हाइड्रोपावर लिमिटेडले १ अर्ब ५८ करोड ८५ लाख रुपैयाँ बराबरको १ करोड ५८ लाख ८५ हजार कित्ता र रसुवागढी हाइड्रोपावर कम्पनी लिमिटेडले १ अर्ब ७१ करोड ५० लाख रुपैयाँ बराबरको १ करोड ७१ लाख ५० हजार रुपैयाँ बराबरको आईपीओ निष्कासन गर्न लागेका छन् । यस्तै मध्यभोटेकोसी जलविद्युत कम्पनी लिमिटेडले कर्मचारी संचय कोषका संचयकर्ता, संस्थापक लगानीकर्ता र आयोजनामा ऋण लगानी गर्ने संस्थाका कर्मचारीलाई गरी १ अर्ब ४४ करोड रुपैयाँ बराबरको १ करोड ४४ लाख कित्ता आईपीओ निष्कासन गर्न बोर्डमा निवेदन दिएको छ । कम्पनीले सिन्धुपाल्चोकमा १०२ मेगावाटको मध्यभोटेकोसी आयोजना निर्माण गरिरहेको छ । यस्तै युनिभर्सल पावर कम्पनी लिमिटेडले आयोजना प्रभावित स्थानीयबासिन्दा र सर्वसाधारणलाई गरी ९६ करोड ६१ लाख ६१ हजार रुपैयाँ बराबरको ९६ लाख ६१ हजार कित्ता आईपीओ निष्कासन हुदैछ ।सीईडीबी हाइड्रो फण्ड लिमिटेडले पनि सर्वसाधारणलाई २२ करोड ८९ लाख ३० हजार रुपैयाँ बराबरको आईपीओ निष्कासन गर्ने भएको छ । पछिल्लो समयमा आईपीओ निष्कासन गर्नेमा जलविद्युत कम्पनीको संख्या बढेको छ । न्युनतम १० प्रतिशत आईपीओ जारी गर्नुपर्ने कानूनी व्यवस्थाले गर्दा जलविद्युत कम्पनी सर्वसाधारणमा जान लागेका हुन् । आईपीओ निष्कासन माग गर्नेमा पाँचथर पावर कम्पनी, सयपत्री हाइड्रोपावर, घलेम्दी हाइड्रो, शुभश्री हाइड्रोपावर, जोशी हाइड्रोपावर, ग्रिन लाइफ हाइड्रोपावर, सीबीआइएल क्यापिटल, चौतारी लघुवित्त वित्तीय संस्था, हिमालय ऊर्जा विकास कम्पनी, मैलुङखोला जलविद्युत, युनिक हाइडेल, गज्र्याङ उपत्याका हाइड्रो र लाफिङ वुद्ध पावर कम्पनी रहेका छन् ।
किसान माइक्रोफाइनान्सले ५० प्रतिशत हकप्रद जारी गर्न पायो बोर्डको अनुमति
काठमाडौं । किसान माइक्रोफाइनान्स वित्तीय संस्था लिमिटेडले सेयरधनीको लागि ५० प्रतिशत हकप्रद निष्कासन गर्न नेपाल धितोपत्र बोर्डको अनुमति पाएको छ । बोर्डको अनुमति अनुसार संस्थाले अंकित मूल्य १०० रुपैयाँको दरले २ लाख ४० हजार २५० कित्ता सेयर निष्कासन गर्ने भएको छ । कम्पनीले हालै धितोपत्र बोर्डमा निवेदन दिए अनुसार २ करोड ४० लाख रुपैयाँ बराबरको हकप्रद निष्कासन गर्ने अनुमति पाएको हो । बोर्डको अनुमति पाए पश्चात संस्थाले सिभिल क्यापिटल मार्केट लिमिटेड मार्फत सो मात्राको हकप्रद निष्कासन गर्ने छ । हाल संस्थाको चुक्ता पुँजी ४ करोड ५० लाख रुपैयाँ रहेको छ । ५० प्रतिशत हकप्रद पश्चात कम्पनीको पुँजी ६ करोड रुपैयाँ नाघ्ने छ । पछिल्लो समय लघुवित्तको सेयर मूल्य प्रतिकित्ता १६८५ रुपैयाँ रहेको छ ।
