शिक्षण अस्पतालका चिकित्सकसहित ३८ जना क्वारेन्टाइनमा
काठमाडाैं । त्रिवि शिक्षण अस्पतालमा उपचारमा संलग्न चिकित्सक, नर्स लगागत ३८ जनालाई क्वारेन्टाइनमा राखिएको छ । अस्पतालमा उपचाररत ६ वर्षीया बालिकालाई कोरोना भाइरस संक्रमण पुष्टि भएपछि उपचारमा संलग्न ३८ जनालाई क्वारेन्टाइनमा राखिएको हाे । न्यूरो वार्डमा रहेका ५ जना बिरामीलाई नै गणेशमानसिंह भवनमा बनाइएको आइसोलेसन वार्डमा सारिएको छ । साथै उपचारमा संलग्न चिकित्सक, नर्स, काठमाडौं ल्याउने आफन्तलाई पनि क्वारेन्टाइनमा राखिएको छ । उनीहरु सबैको थ्रोट स्वाब संकलन गर्ने तयारी भइरहेको अस्पतालले जानकारी दिएकाे छ ।
डब्लूएचओ भन्छः कोरोना सधैंभरि रहन पनि सक्छ
काठमाडाैं । विश्व स्वास्थ्य संगठन (डब्लूएचओ) ले कोरोना सधैं भरि रहन सक्ने पनि बताएकाे छ । बिहीबार संगठनका आपतकालिन निर्देशक डा. माइक रायनले कोरोना भाइरस सधैंका लागि कहिल्यै नजान सक्ने बताएका हुन् । उनले खोप पत्ता लागे पनि संक्रमणलाई पूर्णरुपमा नियन्त्रणमा लिन ठूलो बल आवश्यक पर्ने बताएका हुन् । अहिलेसम्म करिब ३ लाख मानिसले ज्यान गुमाइसकेको कोरोना भाइरसको संक्रमण ४३ लाख भन्दा बढी मानिसमा भइसकेको छ । संगठनले कोरोना भाइरसका कारण कैयौं मानिसको मानसिक अवस्थामासमेत असर परिरहेको बताएको छ । मानसिक स्वास्थ्यका क्षेत्रमा कम लगानी रहेका देशमा लकडाउनले समस्या उत्पन्न गराएको संगठनले उल्लेख गरेको हो । त्यसकारण संगठनले धेरै जसो देशहरुलाई मानसिक स्वास्थ्यका क्षेत्रमासमेत काम गर्न सुझाव दिएको छ । जेनेभामा भएको भर्चुअल सम्मेलनमा डा। रायनले ‘यो भाइरस हाम्रो समुदायको दोस्रो माहामारीका रुपमा रहन सक्ने र यो कहिलै नहट्न सक्छ’ भनेका छन् । उनले भनेका छन्, ‘एचआईभी गएको छैन्, यो भाइरस पनि यस्तै रहन सक्छ ।’ उनले जसरी दादुरा खोप बने पनि पूर्ण रुपमा हटेको छैन, त्यसैगरी खोप बने बनेपछि पनि कोरोना पनि त्यसरी नै रहिरहने बताएका छन् । विश्व स्वास्थ्य संगठनका महानिर्देशक टेड्रस एडनम घेबरायसले भाइरसको नियन्त्रणका लागि प्रत्येकले आफ्नो क्षेत्रबाट कडाइका रुपमा सुरक्षाका उपायहरु अपनाउन आवश्यक रहेको बताएका छन् ।
स्वास्थ्य मन्त्रालयकाे नै गलत सुचना, संक्रमितको संख्या २ सय ४५ मात्रै
काठमाडाैं । स्वास्थ्य तथा जनसंख्या मन्त्रालयले गलत सच्चाएको छ । योभन्दा अगाडि २ सय ५० जना कोरोना संक्रमित भएको भन्दै विज्ञप्ती जारी गरेको थियो । तर, पुनः त्यो नभएको जानकारी दिएको छ। स्वास्थ्य मन्त्रालयले पछिल्लो पटक थप पाँच जनामा कोरोना पुष्टि भएको भन्ने विवरण प्राविधिक कारणले दोहोरिएकोले सच्याएको छ । यस अघि सर्लाही, धनुषा र महोत्तरीका गरी थप पाँच जनामा कोरोना पुष्टि भएको विज्ञप्ति जारी गरेको थियो । अहिलेसम्म सङ्क्रमित सङ्ख्या २४५ मात्र कायम रहेको छ ।
