पर्सामा थप २१ जना कोरोनामुक्त, राती नै अस्पतालबाट डिस्चार्ज
काठमाडौं । बुधबार विहान पर्सामा थप २१ जना कोरोना संक्रमितहरु उपचारपछि निको भइ घर फर्किएका छन् । नारायणी अस्पतालको शाखाको रुपमा स्थापित कोरोना उपचार गण्डक अस्पतालले राती नै २१ जनालाई डिस्चार्ज गरेको हो । डिस्चार्ज हुनेमा सबै वीरगन्ज महानगरपालिकाका रहेका छन् । लगातार २ पटककाे काेराेना परिक्षणमा नेगेटिभ देखिएपछि २१ जनालाई अस्पतालले डिस्चार्ज गरेकाे हाे । हाल अस्पतालमा ९ जना कोरोना संक्रमित आइसोलेसनमा रहेका छन् भने उक्त अस्पतालको आइसोलेसन वार्डबाट ७२ जना कोरोना संक्रमित कोरोनामुक्त भइ घर फर्किएको अस्पताल स्रोतले जनाएको छ ।
सेती अस्पतालको आइसोलेसनमा एक जनाको मृत्यु
काठमाडौं । सेती अस्पतालको आइसोलेसनमा भर्ना भएका एक जना मानिसको मृत्यु भएको छ । ५० वर्षिय उनी गौरीगंगा नगरपालिका वडा ७ का हुन् । मंगलबार भारतबाट आएका उनी वेलुका सेती अस्पतालमा भर्ना भएको थिए । स्वास्थ्यमा समस्या देखिएसँगै उनी अस्पतालमा भर्ना भएको उनको बुधबार विहान मृत्यु भएको अस्पताल स्रोतले जानकारी दिएको छ । कोरोना पीसीआर परीक्षणका लागि स्वाब संकलन गरेको अस्पतालले जनाएको छ ।
कोरोना संक्रमणः यस्तो छ अहिले विहानसम्मको ताजा अवस्था
काठमाडौं । नेपाली समयअनुसार आज विहान ६ बजे सम्ममा संसारभरीमा कोरोना भाइरस संक्रमितको संख्या ५६ लाख ७८ हजार ३ सय ९५ पुगेको छ । कोरोना भाइरसबाट अहिलेसम्म ३ लाख ५१ हजार ६ सय ६६ जनाको मृत्यु भइसकेको छ भने २४ लाख २६ हजार ५ सय १४ जना चाहिँ निको भएर घर फर्किसकेका छन् । कोरोनाबाट सबैभन्दा बढि शिकार अमेरिकाका जनता भएका छन् । जहाँ १ लाख ५ सय ७३ जनाको मृत्यु भइसकेको छ । त्यहाँको कूल संक्रमित संख्या भने १७ लाख २५ हजार ५ सय २४ रहेको छ । त्यसैगरी छिमेकी मुलुक भारतमा कूल संक्रमितको संख्या १ लाख ५० हजार ७ सय ९३ पुगेको छ भने अहिलेसम्म ४ हजार ३ सय ४९ जनाको मृत्यु भइसकेको छ । नेपालमा अहिलेसम्म ७ सय ७२ जना संक्रमित भएका छन् भने ४ जनाको मृत्यु भइसकेको छ । त्यसैगरी १५५ जना चाहिँ निको भएर घर फर्किसकेका छन् । (तथ्यांक साभार : वल्डोमिटर)
