हिमालयन जनरल इन्स्योरेन्सको बोनस सेयर सूचीकृत
काठमाडौं । हिमालयन जनरल इन्स्योरेन्स कम्पनीको बोनस सेयर नेपाल स्टक एक्स्चेञ्ज (नेप्से)मा सूचीकृत भएको छ । कम्पनीको ४ प्रतिशत अर्थात ४ लाख १० हजार ८ सय ८० कित्ता बोनस सेयर नेप्सेमा सूचीकृत भएको हो । कम्पनीकाे आज(कार्तिक १६ गते) मात्रै साे मात्राकाे सेयर नेप्सेमा सूचीकृत भएकाे हाे । यससँगै उक्त सेयर लगानीकर्ताको डिम्याट खातामा हस्तान्तरण हुने छ । र, दोश्रो बजारमा किनबेच गर्न सकिने छ । आइतबारको बजारमा कम्पनीको सेयर मूल्यमा गिरावट आएको छ । यो समाचार तयार पर्दासम्म कम्पनीको सेयर मूल्य १.१७ अर्थात ६ रुपैयाँले घटेर प्रतिकित्ता ५०६ रुपैयाँमा किनबेच भइरहेको छ । पछिल्लो दिन कम्पनीको सेयर प्रतिकित्ता ५१२ रुपैयाँमा कारोबार भएको थियो ।
जनरल इन्स्योरेन्सका महाप्रबन्धक तमोटको कार्यकाल थपियो
काठमाडौं । जनरल इन्स्योरेन्स कम्पनीका महाप्रबन्धक एसके तमोटको कार्यकाल थपिएको छ । महाप्रबन्धक तमोटको कार्यकाल आगामी तीन महिना अर्थात माघ १८ गतेसम्मको लागि थप भएको हो । कार्तिक १४ गते बसेको कम्पनी सञ्चालक समितिको बैठकले उनको कार्यकाल थप गर्ने निर्णय गरेका हुन् । महाप्रबन्धक तमोटको कार्याकाल यहि कार्तिक १८ गतेसम्म रहेको थियो । सञ्चालक समितिको निर्णयसँगै उनले आगामी माघ १८ गतेसम्म यस कम्पनीमा आफ्नो जिम्मेवार सम्हाल्ने छन् ।
कोरोना बीमा गर्नुभएको छ ? यसरी थाहा पाउँनुस्, तपाईंले २५ हजार पाउने हो कि एक लाख
काठमाडौ । कोरोना बीमा गर्नेले २५ हजार रुपैयाँ पाउने हो कि, ७५ हजार रुपैयाँ पाउने हो कि वा एक लाख नै पाउने हो भन्ने दुविधा उत्पन्न भएको छ । कोरोना बीमाको दाबी भुक्तानीमा समस्या र पटक पटक नीतिगत परिवर्तन गरेपछि अन्योल बढेको हो । कोरोना बीमाको सुरुमा १ लाख रुपैयाँ र ५० हजार रुपैयाँ बिमांक रकम तोएिको थियो । सो रकम दाबी भुक्तानी लिनको लागि पीसीआर विधिबाट कोरोना संक्रमण पुष्टी भएको कागजात पेश गरे हुन्थ्यो । तर भदौ २८ गतेदेखि कोरोना बीमाको बिमांक रकम १ लाख रुपैयाँ मात्रै बनाएको तथा होम आइसोलेसनमा बसेका संक्रमितले २५ हजार र अस्पताल भर्ना भएका संक्रमितले ७५ हजार रुपैयाँ मात्रै दाबी पाउने व्यवस्था गरिएपछि दुविधा उत्पन्न भएको हो । बिमक संघका महासचिव तथा सगरमाथा इन्स्योरेन्स कम्पनीका प्रमुख कार्यकारी अधिकृत चंकी क्षेत्रीका अनुसार बीमा कोरोना बीमा दाबी भुक्तानीमा केही परिवर्तन भएकोले परिवर्तित व्यवस्था अनुसार दाबी भुक्तानी हुन्छ । ‘बीमा कम्पनीहरुको कारणले दाबी भुक्तानीमा समस्या आएको होइन, पहिला पीसीआर रिपोर्ट नेगेटिभ देखाएकै आधारमा दाबी भुक्तानी गर्ने व्यवस्था थियो, अहिले पीसीआर रिपोर्ट र अस्पतालको बिल दुवै हेरेर नगद र बाँकी सुविधा दिने व्यवस्था भएको छ, भुक्तानी व्यवस्थामा आएको केही परिवर्तनले बिमितलाई केही अस्पष्ट भए जस्तो लागेको होला, तर प्रक्रिया बुझ्ने खालकै छ,’ सगरमाथा इन्स्यारेसन्स कम्पनीका प्रमुख कार्यकारी अधिकृत समेत रहेका संघका महासचिव क्षेत्रीले भने । सानिमा जनरल इन्स्योरेन्स कम्पनीका प्रमुख कार्यकारी अधिकृत सुधुम्न उपाध्याय कोरोना बीमा पोलिसीमा उल्लेख भए अनुसार नै दाबी भुक्तानी पाउने बताउँछन् । भदौ २८ अघि जारी गरिएको कोरोना बीमा पोलिसीमा पीसीआर रिपोर्ट पोजेटिभ देखिने वित्तिकै बिमांक रकम बराबर (एक लाख वा ५० हजार रुपैयाँ) दाबी भुक्तानी पाइने हो । ‘दाबी भुक्तानी कति हुन्छ, कसरी हुन्छ भनेर अल्मलिनु पर्दैन, कोरोना बीमा पोलिसीमा जे लेखिएको छ, सोही अनुसार दाबी भुक्तानी पाइन्छ, कसैको कुनै बेला कुनै कारणले भुक्तानीमा ढिला भएको होला तर, भुक्तानी नपाइने भन्ने भएन, अर्थात भदौ २८ अघि बीमा गराएका व्यक्तिले १ लाख र ५० हजार रुपैयाँ नगदै पाउँछन्, त्यसपछि बीमा गराएका व्यक्तिले पछिल्लो बीमा पोलिसीमा उल्लेख भएअनुसार २५ हजार र ७५ हजार रुपैयाँ पाउँछन्,’ प्रमुख कार्यकारी अधिकृत उपाध्यायले भने ।
