रत्नराज्य माध्यमिक विद्यालयमा कक्षा ११ मा भर्ना भइन् सांसद शान्ता चौधरी
काठमाडौं। सांसद शान्ता चौधरी काठमाडौंको रत्नराज्य विद्यालयमा कक्षा ११ मा भर्ना भएकी छिन्। चौधरी मानविकी संकायमा समाजशास्त्रको विद्यार्थीको रुपमा भर्ना भएकी हुन्। यसै बर्ष एसईई परिक्षामा चौधरीले २.६५ जिपिए ल्याएर पास भएकी हुन्। उनले यस वर्ष दाङको महेन्द्र मावि तुलसीपुरबाट एसईई दिएकी थिइन्। चौधरीले सामुदायिक विद्यालयहरु प्रति मानिसहरुलाई मानिसको विश्वास गर्नको लागि आफु रत्नराज्यमा भर्ना भएको बताईन्।
किंङ्गस् कलेजसँगको साझेदारीमा यूरोपेली डेमोला ग्लोबल नेपालमा प्रवेश
काठमाडौं। विश्वस्तरमा प्रख्यात डेमोला ग्लोबल किंङ्गस् कलेजसँगको साझेदारीमा नेपालमा प्रवेश गरेको छ । निजी कम्पनी एवं सरकारी, अर्ध–सरकारी तथा गैर–सरकारी संस्थाहरुका लागि समस्याको पहिचानका साथसाथै नवप्रबर्तन (इनोभेसन) मा आधारित समाधानको खोजी गर्नका लागि विश्वस्तरमा प्रख्यात डेमोला ग्लोबल किंङ्गस् कलेजसँगको साझेदारीमा नेपालमा प्रवेश गरेको हो। काठमाडौंमा बुधबार आयोजित एक समारोहबिच उक्त सम्झौताको घोषणा भएको छ। हालसम्म विश्वको १६ वटा राष्ट्रहरुमा सञ्जाल निर्माण गरिसकेको डेमोलाले विभिन्न निजी कम्पनी एवं सरकारी, अर्ध–सरकारी तथा गैर–सरकारी संस्थाहरुले भोगिरहेको वा भविष्यमा भोग्न सक्ने समस्याहरुको पहिचान तथा उपायको खोजी गर्दछ । डेमोला ग्लोबलका अनुसार निजी कम्पनी एवं सरकारी, अर्ध–सरकारी तथा गैर–सरकारी संस्थाहरुको समस्यामा उक्त संस्थाको कर्मचारी तथा विद्यार्थीहरु मिलेर आठ हप्तासम्म काम गर्दछन् जसको पहिलो चरणमा कम्पनी वा संस्थाहरुको समस्याहरुको पहिचान हुन्छ भने दोश्रो चरणमा सो समस्याको सम्भाब्य नविन र श्रृजनात्मक समाधानका विकल्पहरुको खोजी गरिन्छ । किंङ्गस् कलेजको जानकारी अनुसार कार्यसंचालन सुरुवात घोषणाकै दिन डेमोला नेपाल र पाँचवटा नेपाली संस्थाहरुबिच सहकार्य सहमतीमा हस्ताक्षर भएको छ । यसरी सम्झौता गर्ने संस्थाहरु अन्नपूर्ण मिडिया नेटवर्क, यङ्ग इनोभेसन, काठमाडांै महानगरपालीकाको शहरी योजना आयोग, कथा नेपाल र नेक्स्ट भेन्चर्स कर्प हुन् । “यस प्रयासले हाल विद्यमान नेपाली शैक्षिक संस्था तथा समाज एवं सरोकारवाला संस्थाहरुबिचको दूरी कम गर्न मद्धत गर्ने विश्वास लिएका छांै,” कलेजका प्राचार्य नरोत्तम अर्याल भन्छन् । “यूरोपका विभिन्न देशहरु तथा जापान र चीनमा समेत सफलता हासिल गरिसकेको डेमोलामार्फत नेपालमा पनि निजी कम्पनी तथा सार्वजनीक क्षेत्रको समस्या समाधान गरी उनीहरुको भविष्यको सम्भावनाको ढोका खोल्नका लागि विद्यार्थी र औधोगीक क्षेत्रबिच संयुक्त प्रयास र ज्ञानको आदानप्रदानको संस्कृती निर्माण हुनेमा हामी विश्वस्त छौं।” अर्याल थप्छन् । डेमोलाका अनुसार विद्यार्थी र सम्बन्धित कम्पनी वा संस्थाको कर्मचारी बाहेक यस परियोजनामा डेमोला ग्लोबलका विज्ञहरु तथा विश्वविद्यालयका प्राध्यापकहरुले सहजकर्ताको भूमिका निर्वाह गर्नेछन् । डेमोला नेपालको कार्यसंचालन सुरुवात घोषणा कार्यक्रमलाई सम्बोधन गर्दै नेपालस्थित फिनीस दूतावासकी काउन्सलर, काटी भोसले विशेषत औधोगीक क्षेत्रले भोगिरहेका आधुनीक समयको समस्या समाधानको लागि शिक्षामा आधारित अनुसन्धानमाथि जोड दिइन् । “विश्वमा हाल देखिइरहेका परिबर्तनहरुले औधोगिक क्षेत्रलाई मात्र नभएर समाजिक वातावरणलाई समेत प्रभावित गराइरहेका छन्, जसको समाधानको लागि हामीलाई नयाँ ढंगको सोचको खाँचो रहेको छ जसको लागि विश्वविद्यालय र औधोगीक क्षेत्रको साझदारी अपरीहार्य रहेको छ ।” “किंङ्गस् कलेजसँगको साझेदारीमा डेमोला ग्लोबललाई नेपालमा भित्राउन पाउँदा हामी धेरै हर्षित छांै । यस साझेदारीसँगै हामीले हाम्रो विश्वब्यापी सञ्जाललाई थप बलियो बनाउँदै नेपाली समाज, कम्पनी तथा संस्थाहरुको लागि ज्ञान, अनुभव तथा समस्या समाधानको संयुक्त पहलको विधिलाई नेपालमा चिनाउन पाउने छांै,” डेमोला ग्लोबलको उपाध्यक्ष पेका सिल्भन भन्छन् । “यस परियोजनाअन्तर्गत कम्पनी वा संस्थका कर्मचारीसँग मिलेर समस्या समाधान गर्ने क्रममा विद्यार्थीहरुले औपचारीक अध्ययन सक्नुअघि नै आफ्नो क्षमता प्रमाणित गर्नेछन् । जसको कारण ती कम्पनी वा संस्थाहरुले विद्यार्थीहरुमाथि विश्वास गर्न थाल्नेछन््,” परियोजना संयोजक स्वेच्छा राजभण्डारी भन्छिन् । उनका अनुसार यति मात्र नभएर नेपाली विद्यार्थीहरुले डेमोला ग्लोबल संचालन भएका अन्य राष्ट्रमा गएर पनि काम गर्न पाउनेछन् भने अन्य राष्ट्रका विद्यार्थीहरुले पनि नेपालमा आएर योगदान पु¥याउन सक्नेछन् । यस परियोजनाबाट लाभ लिनका लागि कम्पनी वा संस्थाहरुले वर्षको चार पटक आवेदन दिन सक्नेछन् भने डेमोला नेपालले एक पटकमा जम्मा पाँचवटा कम्पनी वा संस्थाहरुलाई मात्र समावेश गर्नेछ ।
अब काठमाडौँ महानगरभित्रका ९१ विद्यालयमा एकै रङ, महानगरले छुट्यायाे दश करोड
काठमाडौं । काठमाडौँ महानगरपालिकाले नगरभित्रका सामुदायिक विद्यालयको रङ एकै प्रकारको गर्ने तयारी गरेको छ । महानगरपालिकाका प्रमुख विद्यासुन्दर शाक्यले आफ्नो क्षेत्रभित्र रहेका सामुदायिक विद्यालयका भवनमा एकरुपता ल्याउन एकै किसिमको रङ प्रयोग गर्ने जानकारी गराएका छन् । महानगरपालिकाभित्र पदस्थापन भएका माध्यमिक विद्यालय तहका स्थायी शिक्षकको शपथ ग्रहण कार्यक्रममा उनले नगरभित्रका विद्यालयको आफ्नै पहिचान बनाउन एकै किसिमको रङ प्रयोग गर्ने बताएका हुन् । “काठमाडौँ महानगरपालिका क्षेत्रभित्रका विद्यालयको शैक्षिक गुणस्तर मात्र होइन भौतिक संरचनामा पनि सकेसम्म एकरुपता ल्याउने प्रयासमा लागेका छौँ”, उनले भने, “त्यसका लागि महानगरपालिका क्षेत्रभित्र रहेका सबै विद्यालय भवनमा एकै खालको रङरोगन गर्ने तयारी थालेका छौँ ।” महानगरमा ९१ वटा सामुदायिक विद्यालय रहेका छन् । उनले त्यसको सम्पूर्ण खर्च महानगरपालिकाले ब्यहोर्नका लागि करिब रु १० करोड रकम विनियोजन गरिएकोसमेत जानकारी दिए । उनका अनुसार विद्यालयको रङरोगन गर्ने, खेल मैदान निर्माण गर्ने, वृक्षारोपण गर्ने, शौचालय र खानेपानीको व्यवस्था गर्नेलगायतका शीर्षकका लागि रु १० करोड रकम छुट्याइएको छ । प्रमुख शाक्यले सामुदायिक विद्यालयको गुणस्तर सुधार गरेर विद्यार्थीलाई सामुदायिकतिर आकर्षित गर्न सके निजीमा पढ्न जानेको सङ्ख्या स्वतः घटेर जाने बताएका छन् । उनले अहिलेको पुस्ता सूचना, प्रविधि, योजना र नयाँनयाँ ज्ञानमा निपुण भएको भन्दै पुरानाको अनुभवसँग सहकार्य गरेर अघि बढ्ने हो भने सामुदायिक विद्यालयको गुणस्तर स्वतः वृद्धि भएर जाने बताउँछन् । महानगरका निमित्त नगर शिक्षा अधिकारी तारापति खरेलले शिक्षकलाई शिक्षाको गुणस्तर सुधारमा ध्यान दिनुपर्ने बताए । शिक्षा विभागका अधिकृत मोती भट्टराईले पदस्थापन भएका शिक्षकलाई महानगरभित्रको समग्र शैक्षिक गुणस्तरलाई उकास्न र उच्चतम नतिजा प्राप्त गर्ने कुरामा भूमिका खेल्ने उल्लेख गरे । पदस्थापना भएर ३१ माध्यमिक तहका शिक्षक महानगरमा आएका छन् । रासस
