प्राध्यापकले अल्छी गर्दा प्रश्नपत्र हुबहु भयो : त्रिवि
काठमाडौं । त्रिभुवन विश्वविद्यालयको हुबहु प्रश्नपत्रमा प्राध्यापक नै दोषी रहेको पाइएको छ । शिक्षा तथा स्वास्थ्य समितिको आजको बैठकमा त्रिविका उपकुलपति धर्मकान्त बाँस्कोटाले प्रश्नपत्र बनाउने प्राध्यापकको लापरवाहीले प्रश्नपत्र हुबहु भएको बताए । ‘प्रश्नपत्र बनाउने जिम्मा पाएका प्राध्यापकले अल्छी गरेर पहिले बनाएको प्रश्नपत्र नै दिने र अर्काले बनाएको प्रश्नपत्र सार्नेजस्ता समस्या देखिए’, उनले भने, ‘प्राध्यापकको अल्छीका कारणले प्रश्नपत्र दोहरिएको हो ।’ उनले त्रिविको परीक्षामा प्रश्नपत्र हुबहु सम्बन्धमा सम्बन्धित प्राध्यापकलाई कारबाही गरिएको बताए । त्रिविले प्रश्नपत्र हुबहुका सम्बन्धमा प्राध्यापक घनश्याम भट्टराईको संयोजकत्वमा तीन सदस्यीय छानबिन समिति गठन गरेको थियो । सोही छानबिन समितिको सिफारिसमा तीन जना प्राध्यापकलाई कारबाही गरिएको उनले बताए । त्रिविमा मानविकी सङ्कायले गत जेठ १८ गते स्नातकोत्तर तह तेस्रो सेमेष्टरको अर्थशास्त्र विषयअन्तर्गत ‘पब्लिक इकोनोमिक्स’ र जेठ २३ गते स्नातकोत्तर तहको राजनीतिशास्त्रको पहिलो सेमेस्टरको ‘इन्टरनेशनल पोलिटिक्स’ विषयको प्रश्नपत्र अघिल्लो वर्षको प्रश्नपत्रसँग हुबहु मिलेको थियो । यस्तै व्यवस्थापन सङ्कायको स्नातक तह बिबीए छैटौँं सेमेष्टरको यही असार २२ गते र असार २५ गतेको प्रश्नपत्र पनि हुबहु पाइएको छ । यस्तै मोर्डन नेपाल कलेजको तीन महिनाअघि सोधिएको प्रश्नपत्र असार २२ गतेको परीक्षामा र शङ्करदेव क्याम्पसले लिएको प्रिबोर्ड परीक्षामा सोधिएको प्रश्नपत्र यही असार २५ गते बिबीएलाई सोधिएको थियो । ‘ती उपप्राध्यापकलाई प्रश्नपत्र बनाउन दिँदा उनले मोर्डन कलेजमा नै सोधिएको प्रश्नपत्र दिनुभयो’, उनले भने, ‘यसरी तीन महिनाअघि मोर्डन कलेजको आन्तरिक परीक्षामा सोधिएको प्रश्नपत्र त्रिविको परीक्षामा पनि सोधिएको पाइयो ।’ उनले समाजिक सञ्जालले गर्दा हुबहु प्रश्नपत्रबारे जानकारी प्राप्त भएको भन्दै अबदेखि हस्तलिखित प्रश्नपत्र माग्ने बताए । ‘प्राध्यापकले प्रश्नपत्र बनाउनुभन्दा अर्काको किताबबाट सार्ने गरेको पाइएको छ’, उनले भने, ‘अबदेखि हामी हस्तलिखित प्रश्नपत्र माग्ने छौँ ।’ त्रिविका उपकुलपति डा. बास्कोटाले प्रश्नपत्रका हुबहु सम्बन्धमा त्रिविले प्राडा भोजराज अर्यालको संयोजकत्वमा पाँच सदस्यीय उच्चस्तरीय समिति गठन गरेको बताए । समितिमा शिक्षा, विज्ञान तथा प्रविधिमन्त्री देवेन्द्र पौडेलले हुबहु प्रश्नपत्रमा संलग्नलाई कारबाही गरिने बताए । ‘हुबहु प्रश्नपत्र अल्छीपनाले होइन, गल्ती गरेका हुन्’, उनले भने, ‘हुबहु प्रश्नपत्र बनाउनेलाई कारबाही गर्नुपर्दछ ।’ समितिद्धारा कारबाही गर्न निर्देशन समिति सभापति जयपुरी घर्तीले हुबहु प्रश्नपत्र बनाउनेलाई कारबाही गर्न निर्देशन दिइन् । ‘प्रश्नपत्रका सम्बन्धमा कहाँ–कहाँ गल्ती भएको छ’, उनले भनिन्, ‘ती गल्ती गर्नेलाई कारबाही गर्नुपर्दछ ।’ समिति सदस्य योगेश भट्टराईले दोषीलाई कारबाही गर्नुपर्ने भन्दै त्रिवि कार्यालय तोडफोड गर्नेलाई पनि कारबाही गर्नुपर्ने बताए । समिति सदस्य गिरिराजमणि पोखरेलले त्रिविलाई पुनः संरचना गर्नुपर्ने बताए । सदस्य नवीना लामाले त्रिवि तहसनहस बन्न पुगेको भन्दै सबै मिलेर जोगाउन आवश्यक रहेको बताइन् । समिति सदस्य मनकुमारी जिसी, सरिता न्यौपाने, मानबहादुर विकलगायतले त्रिविमा पटक–पटक प्रश्नपत्रमा हुने कमजोरीलाई अन्त्य गर्नुपर्ने भन्दै प्रश्नपत्रको सेटबाट नभई प्रश्नपत्र बैंकबाट छान्नुपर्नेमा जोड दिए । रासस
संविधान तथा ऐन विपरित राष्ट्रिय परीक्षा बोर्डले करोडौं रकम उठाउने काम गर्यो
काठमाडौं । नेपालको संविधान तथा निःशुल्क शिक्षा सम्बन्धी ऐन, २०७५ विपरित राष्ट्रिय परीक्षा बोर्डले करोडौं रुपैयाँ शुल्क उठाउने काम गरेको छ । माध्यमिक तहको शैक्षिक कार्यक्रम अन्तर्गत राष्ट्रिय परीक्षा बोर्डले संविधान र ऐन विपरित रजिष्ट्रेसन, परीक्षा र प्रमाणपत्र लगायतका शिर्षकमा शुल्क उठाएको महालेखापरीक्षकको ५९औं प्रतिवेदनले औंल्याएको छ । नेपालको संविधानको धारा ३१ मा प्रत्येक नागरिकलाई आधारभूत तहसम्मको शिक्षा अनिवार्य र निःशुल्क तथा माध्यमिक तहसम्मको शिक्षा निःशुल्क हुने व्यवस्था रहेको छ । त्यस्तै निःशुल्क शिक्षा सम्बन्धी ऐन, २०७५ मा माध्यमिक तहको शिक्षालाई निःशुल्क गर्ने भनिएको छ । तर, राष्ट्रिय परिक्षा बोर्डले आर्थिक वर्ष ०७७/०७८ मा विद्यार्थीबाट गैरकानुनी ढंगले विभिन्न शिर्षकमा ३ करोड ९६ लाख रुपैयाँ शुल्क संकलन गरेको महालेखापरीक्षकको ५९औं प्रतिवेदनमा उल्लेख गरिएको छ । महालेखाले राष्ट्रिय परीक्षा बोर्डले ऐन विपरित शुल्क असुल गर्ने कार्यलाई बन्द गरी माध्यमिक तहमा निःशुल्क शिक्षाको व्यवस्था गर्न प्रतिवेदनमार्फत भनेको छ ।
सबैको लघुवित्तले गरिब तथा जेहेन्दार विद्यार्थीलाई दियो पाठ्य सामाग्री
काठमाडौं । सबैको लघुवित्त वित्तीय संस्था शाखा कार्यालय धार्के धादिङले गरिब तथा जेहेन्दार छात्र छात्रालाई पाठ्य सामाग्री वितरण गरेको छ । संस्थाले आफ्नो छैठौं वार्षिकोत्सवको अवसरमा असार २७ गते श्री बराह देबी प्रथामिक विद्यालयलाई उक्त सामागी वितरण गरेको हो । धादिङको धुनीबेशी ९ टायलघरमा रहेको उक्त विद्यालयका ३५ जना विद्यार्थीमध्ये ५ जना गरिब तथा जेहेन्दार छात्र छात्रालाई पाठ्य सामाग्री वितरण गरिएको हो । कार्यक्रममा शाखा कार्यालय धार्के धादिङको शाखा प्रमुखले विद्यार्थीहरुलाई अनिवार्य विद्यालय उपस्थिती हुन तथा विद्यार्थी उत्प्रेरणको उदेश्यले सो कार्यक्रम आयोजना गरेको बताए । त्यस्तै, निज विद्यालयको प्रद्यानाद्यापक हसना भण्डारीले संस्थालाई धन्यवाद दिदै आगामी वर्ष पनि यस्तै कार्यकम ल्याउन आग्रह गरेका छन् ।
