अमेरिकाको सरकारी पाठ्यक्रममा सामाजिक अभियान्ता डा. परियार बारे पढाइ
काठमाडौं । अमेरिकाको मासाचुसेट्स राज्यको एक विद्यालयस्तरको पाठ्यक्रममा नेपाली सामाजिक अभियान्ता डा. विष्णुमाया परियारबारेको पाठ समावेश गरिएको छ । सो राज्यको कक्षा ७ को सरकारी पाठ्यक्रममा अमेरिका निवासी डा परियारबारेको पाठ समावेश गरिएको अमेरिका निवासी पत्रकार प्रदीप परियारले जानकारी दिए । विश्वको इतिहास र भूगोल विषयको १२ नम्बरको ‘च्याप्टर’मा डा. परियारका बारेमा तयार पारिएको वृत्तचित्र ‘अनटचेवल’ समेत समावेश गरिएको उनको भनाइ छ । उनले भने, ‘अमेरिकाको मासाचुसेट्स राज्यको डिपार्टमेन्ट अफ एजुकेशनबाट स्वीकृत पाठ्यक्रममा विश्वको इतिहास र भूगोल विषयमा नेपाली डा. विष्णुमाया परियारका बारेमा पाठ समावेश गरिएको छ, भिडियो र ‘स्लाइड शो’को माध्यमबाट पढाइने उक्त पाठमा डा. परियारका बारेमा र जातीय विभेदबारे जानकारी दिने आठवटा स्लाइडसमेत समावेश गरिएको छ ।’ सो पाठ मासाचुसेट्सका सबै सरकारी विद्यालयमा उपलब्ध रहेको र आगामी वर्षदेखि राज्यका धेरै विद्यालयमा लागू हुने डा. परियारले जानकारी दिइन् । पाठमा नेपालमा जातीय विभेद र असमानताबारे समेटिएको छ । रासस
द ब्रिटिस कलेजले इन्टर कलेज फुटसल टुर्नामेन्ट गर्ने
काठमाडाैं । द ब्रिटिस कलेजले तेस्रो ‘द ब्रिटिस कप २०२२ इन्टर कलेज फुटसल टुर्नामेन्ट’ गर्ने भएकाे छ । कम्पनीले आउने साउन १९ र २० गते बालुवाटारस्थिति ढुकु फुटसलमा उक्त टुर्नामेन्ट गर्ने भएको हाे । कलेजकाे पहिलो र दोस्रो द ब्रिटिस कप कमशः सन् २०१८ र २०१९ मा भएको थियो । तर, त्यसपछि लगातार दुई वर्ष कोरोना महामारीका कारण उक्त प्रतियोगिता हुन सकेको थिएन । टुर्नामेन्टमा ब्रिटिस कलेजसहित लिटल एन्जल्स, सफ्टोरिका, प्राइम, एपेक्स, आइआइएमएस, सिल्भर माउन्टेन, पिसिपीएस कलेज, एस इन्टरनेशनल, थेम्स कलेज, क्याम्पियन कलेज, कुसोम, द ब्रिटिस प्रोफेसनल कलेजले गरी १३ वटा कलेजले भाग लिँदैछन् । विजयी टिमले एक लाख रुपैयाँ, पहिलो रनर अपले ५० हजार रुपैयाँ, उत्कृष्ट खेलाडी र उत्कृष्ट गोलरक्षकले नगद १०-१० हजार रुपैयाँ पाउने कलेजले जानकारी दिएकाे छ । उक्त प्रतियोगिताको मुख्य प्रायोजक ब्रिटिस अमेरिकन एडकेयर रहेको छ। त्यस्तै अन्यमा एयरलाइन्स पार्टनरः टर्किस एयरलाइन्स, ट्राभल पार्टनर स्वा ट्राभल्स, होलिडे ट्राभल्स, सिनेमा पार्टनर, क्युएफएक्सः हस्पिटालिटी पार्टनर, मोजो बटिक होटल र मेडिकल पार्टनर भयोदा हस्पिटल प्रायोजक रहेका छन ।
एसईई ग्रेडवृद्धि परीक्षा भदौ ११ र १२ गते हुने
काठमाडौं । माध्यामिक शिक्षा परीक्षा (एसईई)को ग्रेडवृद्धि परीक्षा भदौ ११ र १२ गते हुने भएको छ । बोर्डले सूचना जारी गर्दै यस्तो जानकारी दिएको हो । दुई विषयसम्म अनुपस्थित रहेका विद्यार्थी र ‘सी’ वा ‘सी’ ग्रेडभन्दा कम प्राप्त गरेका विषयमध्ये परीक्षार्थीले चाहेको दुई विषयमा ग्रेडवृद्धि परीक्षा दिन पाउनेछन् । बोर्डका अनुसार ग्रेडवृद्धिका लागि परीक्षा दिन चाहने विद्यार्थीले भदौ पाँच गतेसम्म सम्बन्धित विद्यालयमा ५०० राजश्व तिरी आवेदन दिनुपर्ने छ । परीक्षा समय बिहान ८ देखि ११ बजेसम्म हुनेछ ।
