मेटलाइफ नेपालको नयाँ हेड अफिस पुल्चोकमा उद्घाटन
काठमाडौं । मेटलाइफ नेपालले ललितपुरको पुल्चोकस्थित सिग्नेचर प्लेटिनम टावरमा नयाँ प्रधान कार्यालय (हेड अफिस) उद्घाटन गरेको छ । नेपाली परिवारलाई वित्तीय सुरक्षा र संरक्षण प्रदान गर्दै आएको २४ वर्षको यात्रामा कम्पनीले यसलाई महत्वपूर्ण उपलब्धिका रूपमा लिएको छ । कम्पनीका अनुसार नयाँ हेड अफिसले मेटलाइफ नेपालको आधुनिक, चुस्त तथा भविष्यतर्फ उन्मुख संस्थाको रूपमा भएको विकासलाई प्रतिबिम्बित गर्दछ । आधुनिक पूर्वाधार, एकीकृत प्रविधि प्रणाली तथा सहकार्यलाई प्रोत्साहन गर्ने कार्यस्थल संरचनासहित तयार गरिएको कार्यालयले कार्य सञ्चालनलाई थप प्रभावकारी बनाउने तथा ग्राहकलाई छिटो, सहज र उत्कृष्ट सेवा अनुभव प्रदान गर्ने लक्ष्य राखेको छ । यो विस्तार केवल भौतिक पूर्वाधार वृद्धि मात्र नभई ग्राहकसँगको सम्बन्धमा विश्वास, पारदर्शिता र द्रुत सेवाप्रतिको संस्थागत प्रतिबद्धताको अभिव्यक्ति भएको कम्पनीले जनाएको छ। मेटलाइफ नेपालले नयाँ कार्यालयको वास्तविक मूल्य सेवाको गुणस्तरमार्फत स्थापित हुने विश्वास व्यक्त गर्दै नवप्रवर्तन, पारदर्शिता र ग्राहक–केन्द्रित सेवामार्फत देशभर वित्तीय आत्मविश्वास सुदृढ बनाउने लक्ष्य लिएको छ। उद्घाटन समारोहमा नियामक निकाय, क्षेत्रीय नेतृत्व, साझेदार तथा कर्मचारीहरूको सहभागिता रहेको थियो । कार्यक्रममा संयुक्त राज्य अमेरिकाको दूतावासका चार्जे द’अफेयर्स स्कट अर्बोम, नेपाल बीमा प्राधिकरणका कार्यकारी निर्देशक सुशील देव सुवेदी तथा मेटलाइफका एशिया क्षेत्रीय अध्यक्ष लिन्डन ओलिभर र वरिष्ठ उपाध्यक्ष एलेना बुटारोभालगायत विशिष्ट अतिथिहरू सहभागी भएका थिए । कार्यक्रममा बोल्दै एशिया क्षेत्रीय अध्यक्ष लिन्डन ओलिभरले नयाँ प्रधान कार्यालयले नेपालप्रतिको मेटलाइफको दीर्घकालीन प्रतिबद्धता झल्काउने उल्लेख गर्दै आधुनिक क्षमतासहित ग्राहक अनुभवलाई अझ सुदृढ बनाउने दिशामा यो महत्वपूर्ण कदम भएको बताए । उद्घाटन समारोहमा नेपाल बीमा प्राधिकरण, संयुक्त राज्य अमेरिकी दूतावास, एमच्याम नेपाल, साझेदार बैंक, लघुवित्त संस्था, मेटलाइफ व्यवस्थापन टोली तथा एजेन्सी प्रतिनिधिहरूको उल्लेख्य उपस्थिति रहेको थियो ।
बिदामा पनि यी बीमा कम्पनीहरू खुला रहने
काठमाडौं । सरकारले फागुन २१ गते हुने प्रतिनिधि सभा सदस्यको निर्वाचनको लागि तीन दिनको सार्वजनिक बिदा दिएको छ । केही बीमा कम्पनीहरूले भने सार्वजनिक बिदाको दिनमा पनि सेवा उपलब्ध गराउने भन्दै सूचना प्रकाशित गरेका छन् । ४ निर्जीवन बीमा कम्पनीहरूले आफ्ना निश्चित काउन्टर निश्चित समयको लागि खुला राखेर तथा सम्बन्धित कर्मचारीलाई तोकेर बीमितलाई सुबिधा दिन लागेको सूचनामा उल्लेख गरेको छ । सार्वजनिक बिदामा युनाइटेड अजोड इन्स्योरेन्स, हिमालयन एभरेष्ट इन्स्योरेन्स, आईजिआई प्रुडेन्सियल इन्स्योरेन्स र सानिमा जिआईसी इन्स्योरेन्सले सेवा उपलब्ध गराउने भएका हुन् । युनाइटेड अजोड इन्स्योरेन्सले बिदाको दिनमा पनि बीमा सेवासँग सम्बन्धित कुनै पनि अत्यावश्यक कार्यका लागि सम्पर्क गर्न सम्पर्क व्यक्ति तोकेको छ । कम्पनीले केन्द्रीय कार्यालयको लागि टोपेन्द्र कटेल (जोखिमांकन), डोरिन्द्र राज दाहाल (मार्केटिङ) र सञ्जय श.ज.ब राणा (दाबी) तोकेको हो । त्यस्तै, कम्पनीले प्रदेश कार्यालयअन्तर्गत कोसी प्रदेशमा केदार ब. खत्री, मधेश प्रदेशमा धिरज कुमार शर्मा, बागमती प्रदेशमा अकुर रिमाल, गण्डकी प्रदेशमा गोपाल प्रसाद पौडेल, लुम्बिनी प्रदेशमा भगवती रेग्मी, कर्णाली प्रदेशमा रवि ढकाल र सुदुरपश्चिमको लागि राकेश मान कर्माचार्यलाई तोकेको छ । हिमालयन एभरेष्ट इन्स्योरेन्सले नीमा दाहाल, अनिल श्रेष्ठ, अंकिता बज्राचार्य, कमान सिंह, मनिष थापा र कमान सिंहलाई सम्पर्कको लागि तोकेको छ । आइजिआई प्रुडुन्सियलले बीमालेखसम्बन्धी सेवा लिनुपरेमा प्रतिभा मिश्र, पूर्ण भक्त महर्जन, सुलोचना पन्त र एलिजा स्थापित, बीमा दाबी सम्बन्धमा घमान सिंह तामाङ, सुवास खनाल र औषधीउपचार सम्बन्धी बीमा दाबी सम्बन्धी सेवा लिनुपरेमा प्रल्हाद बस्नेतलाई तोकेको छ । सानिमा जिआइसीले बीमालेख सम्बन्धमा उद्धव रिजाल, सुविना मानन्धार, दाबी सम्बन्धमा निरज पौडेल र विजय पोखरेललाई तोकेको छ ।
प्रभु इन्स्योरेन्सको ९.१५ प्रतिशत लाभांश घोषणा
काठमाडौं । प्रभु इन्स्योरेन्स लिमिटेडले गत आर्थिक वर्ष २०८१/८२ का लागि लाभांश घोषणा गरेको छ । कम्पनीको सञ्चालक समितिको फागुन १७ गते बसेको बैठकले उक्त आर्थिक वर्षका लागि हाल कायम चुक्ता पुँजी १ अर्ब ७० करोड ९ लाख ५५ हजार ९१९ रुपैयाँको कुल ९.१५७९ प्रतिशत लाभांश वितरण गर्ने निर्णय गरेको हो । घोषित लाभांशमध्ये ८.७ प्रतिशतले हुन आउने १४ करोड ७९ लाख ८३ हजार १६५ रुपैयाँबराबरको बोनस सेयर तथा कर प्रयोजनार्थ ०.४६७९ प्रतिशतले हुन आउने ७७ लाख ८८ हजार ५८८ रुपैयाँबराबरको नगद लाभांश रहेको कम्पनीले जनाएको छ । प्रस्तावित लाभांश नेपाल बीमा प्राधिकरणबाट स्वीकृति प्राप्त भई कम्पनीको आगामी वार्षिक साधारणसभाबाट अनुमोदन भएपछि सेयरधनीहरूलाई वितरण गरिनेछ ।
