मेटलाइफ नेपाल र बीमा गोजिमा एपबीच साझेदारी, मोबाइलबाटै बीमा खरिद गर्ने सुविधा
काठमाडौं । मेटलाइफ नेपालले आफ्नो डिजिटल पहुँच विस्तार गर्दै ग्राहकहरूको लागि मोबाइल एपबाटै सजिलै खरिद गर्न सकिने विशेष बीमा सुरक्षा प्याकेजहरू सार्वजनिक गरेको छ । यस उद्देश्यका लागि मेटलाइफले डिजिटल प्लेटफर्म बीमा गोजिमा मार्फत पहिचान पाएको नियोअस्योर इन्स्योरेन्स एजेन्ट प्रालि सँग साझेदारी गरेको हो । यस साझेदारीमार्फत बीमा गोजिमाका सदस्यहरूलाई विशेष रूपमा तयार गरिएको सिंपल ग्रुप अफिनिटी प्याकेज उपलब्ध हुनेछ । ग्राहकहरूले केही आधारभूत केवाइसी विवरण भरिसकेपछि आफ्नो फोनबाटै आवश्यक बीमा सुरक्षा छान्न र खरिद गर्न सक्नेछन् । यसले बीमा प्रक्रियालाई छिटो, सजिलो र पहुँचयोग्य बनाएको छ । प्याकेजमा समावेश मुख्य सुरक्षा सुविधाहरूमा टर्म लाइफ इन्स्योरेन्स समावेश छ, जसले जीवन बीमा सुरक्षा प्रदान गर्दछ । साथै, एक्सिडेन्टल डेथ एण्ड पर्मानेन्ट टोटल डिसएबिलिटी पनि उपलब्ध छ, जसले दुर्घटनाका कारण मृत्युलाई कभर गर्दै स्थायी अपाङ्गतामा आर्थिक सुरक्षा प्रदान गर्छ । प्याकेजमा क्रिटिकल इलनेस कभर पनि समावेश गरिएको छ, जसले योजनामा समावेश गम्भीर रोग पुष्टि भएमा आर्थिक सहायता उपलब्ध गराउँछ । त्यसैगरी, एक्सिडेन्टल मेडिकल रिइम्बर्समेन्ट सुविधा मार्फत दुर्घटनाका कारण भएको उपचार खर्चलाई पनि कभर गरिन्छ । ग्राहकहरूले स्ट्यान्डअलोन टर्म लाइफ योजना वा आवश्यकताअनुसार टर्म लाइफ एक्सिडेन्टल डेथ एण्ड पर्मानेन्ट टोटल डिसएबिलिटी, टर्म लाइफ क्रिटिकल इलनेस, वा टर्म लाइफ एक्सिडेन्टल डेथ एण्ड पर्मानेन्ट टोटल डिसएबिलिटी क्रिटिकल इलनेस एक्सिडेन्टल मेडिकल रिइम्बर्समेन्ट जस्ता मिश्रित प्याकेजहरू चयन गर्न सक्नेछन् । मेटलाइफ नेपालका प्रमुख वितरण अधिकृत अरुण बहादुर बस्नेतले भने, 'हामी नेपाली ग्राहकलाई सरल र भरपर्दो बीमा सुरक्षा प्रदान गर्ने यात्रामा छौं । बीमा गोजिमासँगको यो सहकार्य डिजिटल बीमा पहुँचलाई नयाँ स्तरमा लैजाने महत्वपूर्ण कदम हो । यसले ग्राहकलाई छिटो, सजिलो र पारदर्शी तरिकाले भविष्य सुरक्षित गर्न मद्दत गर्नेछ ।' साथै नियोअस्योरका महाप्रबन्धक युगेन गौतमले भने, 'मेटलाइफ नेपालसँगको हाम्रो साझेदारीले प्रविधि र विश्वसनीय सुरक्षाको शक्तिशाली संयोजन प्रस्तुत गर्दछ । यस सहकार्यले जीवन बीमालाई पहिलेभन्दा अझ पहुँचयोग्य बनाउँदै ग्राहकलाई सूचित निर्णय गर्न र आफ्नो परिवारको भविष्य सुरक्षित गर्न सक्षम बनाउँछ ।' साझेदारीले डिजिटल–फस्ट ग्राहकहरूलाई आधुनिक र सहज बीमा अनुभव प्रदान गर्दै नेपालको डिजिटल बीमा इकोसिस्टमलाई मजबुत बनाउने अपेक्षा राखेको छ ।
४ महिनामा निर्जीवन बीमकको व्यापार १५ अर्ब ८४ करोड, शिखर र सलिकोबीच टक्कर
काठमाडौं । निर्जीवन बीमा कम्पनीहरूले चालु आर्थिक वर्ष २०८२/८३ को पहिलो ४ महिना (कात्तिक) सम्म १५ अर्ब ८४ करोड रुपैयाँ बराबरको व्यवसाय आर्जन गर्न सफल भएका छन् । नेपाल बीमा प्राधिकरणले सोमबार (आज) सार्वजनिक गरेको तथ्यांकअनुसार सञ्चालनमा रहेका १४ निर्जीवन बीमा कम्पनीहरूले ९ लाख ३ हजार ९८५ वटा बीमालेख जारी गरेर १५ अर्ब ८४ करोड ८२ लाख रुपैयाँ कुल बीमाशुल्क आर्जन गरेका हुन् । बीमा कम्पनीहरूले चालु आवको पहिलो चार महिनामा संकलन गरेको कुल बीमा शुल्क गत आवको यही अवधिको तुलनामा १२.४२ प्रतिशतले बढेको छ । गत आवको यही अवधिमा कम्पनीहरूले ८ लाख ९७ हजार २३५ वटा बीमालेख जारी गरेर १४ अर्ब ९ करोड ७२ लाख रुपैयाँ कुल बीमाशुल्क आर्जन गरेको थियो । चार महिनाको अवधिमा कुल व्यवसाय आर्जनमा सगरमाथा लुम्बिनी इन्स्योरेन्स (सलिको) र शिखर इन्स्योरेन्सबीच कडा टक्कर देखिएको छ । यो अवधिमा सर्वाधिक व्यापार गर्नेमा सगरमाथा लुम्बिनी इन्स्योरेन्स (सलिको) रहेको छ । सलिकाले चार महिनामा १ अर्ब ७८ करोड ३६ लाख रुपैयाँ कुल बीमाशुल्क आर्जन गरेको छ । अघिल्लो वर्षको यही अवधिमा कम्पनीले १ अर्ब ७७ करोड ६७ लाख रुपैयाँ कुल बीमाशुल्क आर्जन गरेको थियो । अघिल्लो वर्षको तुलनामा समीक्षा वर्षमा कम्पनीको व्यापार ०.३८ प्रतिशतले बढेको छ । दोस्रो धेरै व्यवसाय भित्र्याउने कम्पनी शिखर इन्स्योरेन्स रहेको छ । शिखरले यो अवधिसम्ममा १ अर्ब ७३ करोड ८६ लाख रुपैयाँ कुल बीमाशुल्क आर्जन गरेको छ । अघिल्लो वर्ष यही अवधिसम्म कम्पनीले १ अर्ब ४१ करोड ३ लाख रुपैयाँ कुल बीमाशुल्क आर्जन गरेको थियो । अघिल्लो आवको तुलनामा कम्पनीको व्यवसाय २३.२८ प्रतिशतले बढेको छ । तेस्रो धेरै व्यापार भित्र्याउनेमा हिमालयन एभरेष्ट इन्स्योरेन्स रहेको छ । उक्त कम्पनीले चालु आवको चार महिनामा १ अर्ब ६० करोड ५८ लाख रुपैयाँ कुल बीमाशुल्क आर्जन गरेको छ । जुन अघिल्लो आवको तुलनामा ३९.६६ प्रतिशतले बढेको छ । अघिल्लो आवमा कम्पनीले १ अर्ब १४ करोड ९८ लाख रुपैयाँ कुल बीमाशुल्क आर्जन गरेको थियो । त्यस्तै, चार महिनामा शिखर इन्स्योरेन्सले १ अर्ब ५४ करोड ७७ लाख रुपैयाँ, आईजीआई प्रुडेन्सियल इन्स्योरेन्सले १ अर्ब २७ करोड ३६ लाख रुपैयाँ, एनएलजी इन्स्योरेन्सले १ अर्ब २६ करोड २२ लाख रुपैयाँ र नेको इन्स्योरेन्सले १ अर्ब १४ करोड ८२ लाख रुपैयाँ, युनाइटेड अजोड इन्स्योरेन्सले १ अर्ब ७ करोड ३७ रुपैयाँ, सानिमा जीआईसी इन्स्योरेन्सले १ अर्ब २ करोड ३ लाख रुपैयाँ र ओरिएन्टल इन्स्योरेन्सले ९२ करोड ४० लाख रुपैयाँ कुल बीमा शुल्क आर्जन गरेको छ । समीक्षा अवधिमा हिमालयन सिद्धार्थ प्रिमियर इन्स्योरेन्सको ५.८२ प्रतिशत, आईजीआई प्रुडेन्सियल इन्स्योरेन्सको १२.२२ प्रतिशत र एनएलजी इन्स्योरेन्सको ३४.०१ प्रतिशत, नेको इन्स्योरेन्सको ०.३९ प्रतिशत, युनाइटेड अजोडको २७.८० प्रतिशत र सानिमा जीआईसीको ३०.९३ प्रतिशतले व्यवसाय बढेको छ । चालु आवमा ओरियन्टलको भने ०.५० प्रतिशतले व्यापार घटेको छ । चार महिनामा नेपाल इन्स्योरेन्सले ८६ करोड ६२ लाख रुपैयाँ, प्रभु इन्स्योरेन्सले ६५ करोड ७१ लाख रुपैयाँ, नेशनल इन्स्योरेन्सले ५० करोड ९५ लाख रुपैयाँ र राष्ट्रिय बीमा कम्पनीले ४३ करोड ७० लाख रुपैयाँ व्यवसाय आर्जन गरेका छन् । गत आवको तुलनामा नेपाल इन्स्योरेन्सको १०.०९ प्रतिशत, प्रभु इन्स्योरेन्सको ४.७१ प्रतिशत र नेशनल इन्स्योरेन्सको ३.९० प्रतिशत व्यवसाय बढेको छ । राष्ट्रिय बीमा कम्पनीको भने व्यापार २८.९३ प्रतिशतले घटेको छ ।
जीवन बीमकको नयाँ व्यवसाय २९ प्रतिशतले बढ्यो : अग्रस्थानमा नेपाल लाइफ, अन्यको अवस्था कस्तो ?
काठमाडौं । चालु आर्थिक वर्ष २०८२/८३ को चार महिना (साउन–कार्त्तिक) सम्ममा जीवन बीमा कम्पनीहरूको प्रथम बीमा शुल्क उल्लेखनीय वृद्धि भएको छ । बीमा प्राधिकरणले सार्वजनिक गरेको तथ्यांकअनुसार कार्त्तिक मसान्तसम्ममा जीवन बीमा कम्पनीहरूले १२ अर्ब ७२ करोड ३९ लाख रुपैयाँ प्रथम बीमा शुल्क आर्जन गरेका छन् । जुन गत आवको यही अवधिको तुलनामा २९.९१ प्रतिशतले वृद्धि हो । बीमा कम्पनीहरूले गत आवको यही अवधिमा ९ अर्ब ७९ करोड ४६ लाख रुपैयाँ आर्जन गरेको थिए । कार्त्तिकसम्ममा नयाँ व्यवसाय आर्जनमा नेपाल लाइफ अगाडि देखिएको छ । उक्त अवधिमा नेपाल लाइफले तीन अर्ब ६७ करोड ५३ लाख रुपैयाँ प्रथम बीमा शुल्क आर्जन गर्न सफल भएको छ । चालु आवको चार महिनामा नेपाल लाइफले आर्जन गरेको प्रथम शुल्क गत आवको सोही अवधिको तुलनामा ४४.४५ प्रतिशतले बढी हो । गत आवको सो अवधिमा कम्पनीले २ अर्ब ५४ करोड ४३ लाख रुपैयाँ प्रथम बीमा शुल्क आर्जन गरेको थियो। दोस्रोमा नेशनल लाइफले एक अर्ब ८८ करोड ६६ लाख रुपैयाँ प्रथम बीमा शुल्क आर्जन गरेको छ । गत आवको सोही अवधिमा कम्पनीले १ लाख ४७ हजार ३५ लाख रुपैयाँ प्रथम बीमा शुल्क आर्जन गरेको थियो । गत आवको तुलनामा चालु आवको चार महिनामा नेशनल लाइफको प्रथम बीमा शुल्क २८.०५ प्रतिशतले बढेको छ । तेस्रोमा एलआईसी नेपालले ९३ करोड रुपैयाँ प्रथम बीमा शुल्क आम्दानी गर्न सफल भएको छ, जुन गत आवको तुलनामा २५.६२ प्रतिशतले वृद्धि भएको हो । गत आवको सोही अवधिमा कम्पनीले ७४ करोड २० लाख रुपैयाँ आर्जन गरेको थियो । त्यस्तै, सूर्यज्योति लाइफले ८३ करोड ९ लाख रुपैयाँ प्रथम बीमा शुल्क संकलन गरेको छ । गत आवको यही अवधिमा कम्पनीले ७१ करोड ६२ लाख रुपैयाँ आर्जन गरेको थियो । गत आवको तुलनामा चालु आवमा कम्पनीको नयाँ व्यवसाय १६.०२ प्रतिशतले बढेको छ । चार महिनाको अवधिमा सिटिजन लाइफले ७४ करोड ३५ लाख रुपैयाँ, हिमालयन लाइफले, हिमालयन लाइफले ६८ करोड, एशियन लाइफले ६२ करोड, आएमई लाइफ ५८ करोड रुपैयाँ, सानिमा रिलायन्स लाइफले ५४ करोड रुपैयाँ, रियायबल नेपालले ५३ करोड, प्रभु महालक्ष्मी लाइफले ४२ करोड रुपैयाँ प्रथम बीमा शुल्क आर्जन गरेका छन् । गत आवको तुलनामा सिटिजन्सको ४३.५७, एशियनको ३५.२५, आईएमईको ८४.२५, सानिमाको २१.४ प्रतिशत, रिलायबलको ३७.९४ र प्रभु महालक्ष्मीको २४.४७ प्रतिशतले प्रथम बीमाशुल्क बढेको छ । त्यसैगरी, चार महिनामा सरकारी बीमा कम्पनी राष्ट्रिय जीवन बीमाको प्रथम बीमा शुल्क ४९ करोड ४१ लाख रुपैयाँ, मेट लाइफको ४७ करोड ४० लाख रुपैयाँ र सन् नेपालको २८ करोड ८४ लाख रुपैयाँ प्रथम बीमा शुल्क आर्जन गरेका छन् ।
