दाउन्ने सडक जेठ दोस्रो साता पूर्ण रुपमा सञ्चालनमा आउने, ८० प्रतिशत काम सकियो
काठमाडौं । पूर्व-पश्चिम राजमार्गको मुटु मानिने दाउन्ने-नारायणगढ-बुटवल सडकखण्डको ८० प्रतिशत काम सम्पन्न भएको छ । नारायणगढ बुटवल सडकखण्डका अनुसार अब दाउन्ने खण्डमा मात्र ३.२ किलोमिटर सडकको रि-पेभमेन्ट (कालोपत्रे गर्ने तयारी) काम बाँकी छ । आयोजनाका अनुसार ९ वटा ठूला पुल र १९ वटा साना पुलहरूको निर्माण कार्य पूर्ण रूपमा सम्पन्न भइसकेको छ । जेठ महिनाको दोस्रो हप्तासम्ममा यो काम पनि सम्पन्न हुने र त्यसपछि दाउन्नेको यात्रा पूर्ण रूपमा सहज र सुरक्षित हुने आयोजनाको भनाइ छ । कुल ८.३ अर्ब रुपैयाँको लगानीमा सञ्चालित यो गौरवको आयोजनामा हालसम्म करिब ६ अर्ब रुपैयाँ (७६ प्रतिशत) खर्च भइसकेको छ । सडकको कालोपत्रेसँगै ट्राफिक सेफ्टी र रोड मार्किङका कामहरूलाई पनि समानान्तर रूपमा अगाडि बढाइएको छ । सडकखण्डमा यतिबेला यात्रीहरूले सास्ती खेपिरहेका छन् । विगत तीन दिनदेखिको वर्षाका कारण सडक हिलो र चिप्लो हुँदा यातायात सञ्चालनमा केही कठिनाइ देखिएको छ । गत शुक्रबार देखिको झरीले दाउन्ने बजार क्षेत्रको सडकलाई हिलो र चिप्लो बनाएपछि सवारी साधनहरू ढिलो गुड्न बाध्य भएको नारायणगढ बुटवल सडक आयोजनाले जनाएको छ । विशेष गरी मालवाहक ट्रकहरूलाई उकालो काट्न कठिन भएपछि अहिले उक्त क्षेत्रमा वान-वे (एकतर्फी) ट्राफिक सञ्चालन गरिएको निर्माण आयोजनाका सूचना अधिकारी विकास खनालले बताए । साना सवारी साधनहरूलाई प्राथमिकताका साथ पास गराइए पनि ठूला गाडीहरूलाई ट्राफिकको अवस्था हेरेर मात्र पालैपालो छोड्ने गरिएको उनको भनाइ छ । खनालका अनुसार हिलो पन्छाउने र ड्राई ग्राभेल हाल्ने काम तीव्र पारिएको छ । ‘मौसमले साथ दिएमा आज साँझसम्म सडकलाई थप सहज बनाउने हाम्रो लक्ष्य छ,’ खनालले भने । यस्तै, हिउँदे वर्षा रोकिए पनि सडकमा जमेको हिलो तथा दाउन्ने पहाडबाट लेदो माटो बग्ने क्रम नरोकिँदा सवारीसाधन सञ्चालनमा कठिनाइ भइरहेको जिल्ला प्रहरी कार्यालय, नवलपरासी (बर्दघाट सुस्तापूर्व) का प्रहरी उपरीक्षक युवराज खड्काले बताए । दाउन्नेको घिउखोला र विश्वकर्मा मन्दिर आसपास क्षेत्रमा सडक हिलो र चिप्लो हुँदा सवारीसाधन उकालो चढ्न नसकेर बीच बाटोमै फसिरहेको प्रहरी उपरीक्षक खड्काको भनाइ छ । ‘पानी रोकिए पनि सडक सुधार हुनसकेको छैन, हिलो र लेदोका कारण सवारीसाधन सञ्चालनमा समस्या भइरहेको छ,’ उनले भने, ‘पूर्वबाट पश्चिम जाने सवारीसाधन उकालोमा चिप्लिएकाले सञ्चालन हुन सकेका छैनन् भने पश्चिमबाट पूर्वतर्फ जाने सवारी भने केही मात्रामा सञ्चालन भइरहेका छन् ।’ वर्षातको समयमा साना गाडी र अत्यावश्यक सवारीलाई समस्या नहोस् भन्नका लागि निर्माण कम्पनी र ट्राफिक प्रहरीको टोलीले समन्वय गरिरहेका छन् । निर्माण कार्य सम्पन्न हुन अब केही हप्ता मात्र बाँकी रहेकाले यात्रीहरूलाई धैर्य गर्न र ट्राफिक नियमको पालना गर्न आयोजनाले अनुरोध गरेको छ ।
४ प्रतिशत लाभांश बाँड्ने चन्द्रागिरीको घोषणा
काठमाडौं । चन्द्रागिरी इन्भेष्टमेन्ट ग्रूपले सेयरधनीहरूलाई ४ प्रतिशत नगद लाभांश वितरण गर्ने प्रस्ताव गरेको छ । कम्पनीको सञ्चालक समितिको चैत ४ गते बसेको बैठकले चुक्ता पुँजीको ४ प्रतिशत लाभांश दिने निर्णय गरेको हो । कम्पनीले प्राथमिक सेयर (आईपीओ) जारी गर्ने निर्णयसमेत गरेको छ । लाभांश तथा आईपीओसम्बन्धी प्रस्ताव पारित गर्न कम्पनीले चैत २८ गते साँझ ५ बजे ललितपुरस्थित दाउरा थकालीमा वार्षिक साधारण सभा बोलाएको छ । सभाले आईपीओ निष्कासनका लागि सञ्चालक समितिलाई आवश्यक अधिकार प्रदान गर्ने प्रस्ताव पारित गर्नेछ । साथै, आर्थिक वर्ष २०८१/८२ को वार्षिक प्रतिवेदन अनुमोदन गर्ने, लेखापरीक्षक सरु एण्ड एशोसियट्स, चार्टर्ड एकाउन्टेन्ट्सको नियुक्ति अनुमोदन गर्ने तथा लेखापरीक्षकको प्रतिवेदन पारित गर्ने कार्यसूची पनि रहेको छ । यसैगरी, चालु आर्थिक वर्ष २०८२/८३ का लागि लेखापरीक्षक नियुक्ति गर्ने र सञ्चालक समितिको निर्वाचन गर्ने प्रस्ताव पनि सभामा प्रस्तुत गरिनेछ ।
कलुवापुर बजारमा निःशुल्क खानेपानी धारा जडान
कञ्चनपुर । शुक्लाफाँटा नगरपालिका–११ स्थित कलुवापुर बजारमा दुई धारा जडान गरी सर्वसाधारणलाई निःशुल्क पानी उपलब्ध गराउने व्यवस्था मिलाइएको छ । शुक्लाफाँटा उद्योग वाणिज्य सङ्घले अमरपुर–कलुवापुर खानेपानी तथा सरसफाइ उपभोक्ता समितिसँगको सहकार्यमा धारा जडान गरी सर्वसाधारणको सहजताका लागि बजार क्षेत्रमा निःशुल्क खानेपानी धारा जडान गरेको हो । बजारमा दैनिक रूपमा आउने व्यवसायी, सेवाग्राही तथा यात्रुहरूको आवश्यकतालाई ध्यानमा राख्दै खानेपानीको व्यवस्था गरिएको सङ्घका अध्यक्ष राजेश धामीले बताए । अध्यक्ष धामीले बजार क्षेत्रमा खानेपानीको अभावका कारण सर्वसाधारणले पानी किनेर खानुपर्ने अवस्थालाई ध्यानमा राख्दै निःशुल्क धारा जडान गरिएको बताए । खानेपानीका धारा सञ्चालनमा आएपछि कलुवापुर बजार क्षेत्रमा पानी किनेर खानुपर्ने बाध्यता हटेको स्थानीयवासीले बताएका छन् । बजारमा दैनिक रूपमा आउने सर्वसाधारण, सवारी चालक, यात्रु तथा व्यापारीलाई यसबाट प्रत्यक्ष लाभ पुगेको छ । गर्मीको समयमा अझ बढी आवश्यक पर्ने खानेपानी अब सहज रूपमा उपलब्ध भएपछि सर्वसाधारण खुसी भएका छन् । शुक्लाफाँटा उद्योग वाणिज्य सङ्घले यसअघि पनि बजार क्षेत्रमा सरसफाइ, जनचेतनामूलक कार्यक्रम तथा सामाजिक कार्यहरू सञ्चालन गर्दै आएको छ । रासस
ताप्लेजुङको डाँडाकाँडा सेताम्मे, पर्यटकको सङ्ख्या बढ्यो
फुङ्लिङ । दुईदिन वर्षाभएपछि मौसम सफा हुँदा जिल्लाको डाँडाकाँडा चाँदीझैँ सेताम्मे देखिन थालेका छन् । मैवाखोला गाउँपालिकाको तीजुरे–मिल्के–जलजले क्षेत्र बिहानैदेखि हिउँले ढाकिएको देखिएको छ । विश्वको तेस्रो अग्लो हिमाल कञ्चनजङ्घासहित कुम्भकर्ण, पाथीभरा र मानाभरा क्षेत्र पनि चाँदीझैँ सेताम्मे बनेका छन् । मौसम खुलेसँगै हिउँ खेल्न जाने आन्तरिक पर्यटकको सङ्ख्या पनि बढेको छ । ताप्लेजुङका उच्च हिमाली क्षेत्रमा शुक्रबार साँझदेखि बाक्लो हिमपात भएको हो । वर्षासँगै सुरु भएको हिमपातले जिल्लाका विभिन्न हिमाली भेग सेताम्मे बनेका छन् । फक्ताङ्लुङ गाउँपालिका–६ लेलेपस्थित घुन्सा, फले तथा वडा नं ७ को ओलाङ्चुङगोला क्षेत्रमा उल्लेख्य हिमपात भएको छ । त्यस्तै, मिक्वाखोला गाउँपालिका–५ पापुङको तोक्पेगोला, मैवाखोला र आठराई त्रिवेणी गाउँपालिकाका माथिल्ला भेग, मिल्के–जलजले क्षेत्र तथा सिदिङ्वा गाउँपालिकाको तिम्बुङ पोखरी क्षेत्रमा पनि बाक्लो हिमपात भएको स्थानीयले बताएका छन् । प्रसिद्ध तीर्थस्थल पाथीभरा क्षेत्रमा पनि हिमपात भएको छ । पाथीभरा क्षेत्र विकास समितिका कर्मचारी राजेन्द्र महतका अनुसार पाथीभरा धामदेखि फेदी बजार हुँदै गुराँसे डाँडासम्म हिउँ जमेको छ । हिमपातसँगै जिल्लाका हिमाली बस्तीमा चिसो पनि अत्यधिक बढेको छ । विशेषगरी ओलाङ्चुङगोला, याङ्मा, फले र घुन्साजस्ता बस्तीमा चिसो बढेको स्थानीय फुटी शेर्पाले जानकारी दिए ।
सभापति थापाको राजीनामाबारे कांग्रेसले आज निर्णय गर्ने
काठमाडौं । नेपाली कांग्रेसको केन्द्रीय कार्यसमिति बैठकले सभापति गगन कुमार थापाको राजीनामाबारे आइतबार (आज) औपचारिक निर्णय गर्ने भएको छ । पार्टी मुख्यालय सानेपामा जारी बैठकले आज राजीनामा स्वीकृत गर्ने वा नगर्ने बारे औपचारिक निर्णय गर्ने भएको हो । गत शुक्रबारबाट सुरु भएको बैठकमा उपसभापति विश्वप्रकाश शर्माले प्रस्तुत गरेको प्रतिनिधिसभा निर्वाचनको प्रारम्भिक समीक्षा र गगनको राजीनामाबारे सदस्यहरूले धारणा राख्ने क्रम जारी छ । सभापति थापाले पार्टीले प्रतिनिधिसभा निर्वाचनमा बेहोर्नु परेको क्षतिको नैतिक जिम्मेवारी लिँदै पदबाट राजीनामा दिएका थिए ।
२७ वर्षीय चिकित्सक, घरघरमा चिकित्सा सेवा
काठमाडौं । उपचारका लागि बारम्बार धाइरहनु पर्ने अवस्थाका बिरामीलाई अस्पतालको सेवा घरमै पुर्याउने सोचबाट स्थापना भएको ‘जीवन रक्षा होम केयर’ झापामा लोकप्रिय बनेको छ । पूर्णटुङ्ग बिर्तासिटी हस्पिटलको सघन उपचारकक्षमा कार्यरत २७ वर्षीय डा. चेवनराज कार्कीले डेढ वर्षअघि बिर्तामोडमा आफ्ना केही साथीसँग मिलेर सरकारी निकायमा संस्था दर्ता गरी होम केयर सेवा सुरु गरेका थिए । हाल झापाभर उपलब्ध यो सेवा कोशी प्रदेशका विभिन्न जिल्लामा विस्तारका क्रममा रहेको जनाइएको छ । अस्पताल जान नसक्ने र अस्पतालबाट डिस्चार्ज भएका बिरामीका लागि ‘जीवन रक्षा होम केयर’ले ‘पेन म्यानेजमेन्ट’देखि शल्यक्रियापछिको ड्रेसिङ, फिजियोथेरापी र स्लाइन चढाउनेसम्मका उपचार सेवा घरमै उपलब्ध गराउँदै आएको संस्थाका संस्थापक एवं कार्यकारी प्रमुख डा चेवनराज कार्कीले बताए । घरै बसेर स्वास्थ्यलाभ गरिरहेका क्यान्सरका बिरामीका लागि होम केयरले प्रदान गर्ने उपचार सेवा वरदान सावित हुने गरेको छ । जुनसुकै समयमा खबर आउनासाथ होम केयरको चिकित्सा टोली आवश्यक उपकरण र औषधिसहित बिरामीको घरमै पुग्ने गरेको उनले बताए । होम केयरको चिकित्सा टोलीमा अनुभवी चिकित्सकसहित १५ जनाभन्दा बढी नर्स, हेल्थ असिस्टेन्ट र कर्मचारी प्रत्यक्ष रूपमा जोडिएका छन् । जिल्लाको विभिन्न सहरका स्थानीय अनुभवी नर्स र हेल्थ असिस्टेन्टहरू होम केयरको नेटवर्कमा जोडिएको हँुदा जुनसुकै बेला र अवस्थामा जहाँ पनि उपचार पुर्याउन सहज भएको उनले जानकारी दिए । टोलीले एम्बुलेन्स, अल्ट्रासाउन्ड, इसिजी, ड्रेसिङलगायतका सेवा घरमै उपकरण पुर्याएर दिने गरेको छ भने रगत, पिसाब, दिसालगायत जाँच ‘सेम्पल’ लिएर प्रयोगशालामा जाँच गरी घरमै रिपोर्ट उपलब्ध गराउँदै आएको छ । ‘यो एकप्रकारको घरमै अस्पताल पुर्याउने प्रयास हो’, डा कार्की भन्छन्, ‘शल्यक्रियापछि लामो समय अस्पताल बसेर घर फर्किएका बिरामीलाई सानो विषयमा पनि पटकपटक अस्पताल धाइरहनुपर्ने झन्झट नहोस् भनेर हामीले घरमै अस्पतालको सेवा पुर्याएका हौं ।’ रोजगरीका क्रममा छोराछोरी टाढा रहेको परिवारका वृद्धावस्थाका बुबाआमा बिरामी पर्दा एम्बुलेन्स खोजेर अस्पताल पुर्याउने र कुरुवा बस्ने आफन्त तत्काल पाउन पनि कठिनाइ पर्न सक्छ । यस्तो अवस्थामा होम केयरको सेवा झनै प्रभावकारी हुने गोमेन्द्र महाविद्यालयका अध्यापक आशीष शर्मा बताउँछन् । ‘विदेशतिर होम केयर सेवा प्रचलित नै हुन्छ, तर हाम्रो ठाउँमा नयाँ हो’, उनी भन्छन्, ‘हाम्रो परिवारले पनि जीवन रक्षा होम केयरको सेवा लिएको छ । डा कार्कीको टिमको सेवाभाव प्रशंसनीय लाग्यो ।’ होम केयरको चिकित्सा टोलीले भेन्टिलेटरसहितको एम्बुलेन्समा जटिल बिरामीलाई काठमाडौं, विराटनगर, धरान र सिलीगुढीका सुविधासम्पन्न अस्पतालमा सुरक्षित पुर्याउने सेवासमेत प्रदान गर्दै आएको छ भने जिल्लाकै कुनै पनि अस्पतालमा भर्ना भएका बिरामीको हेरचाह गरिदिने कुरुवा सेवा दिँदै आएको छ । होम केयर सेवालाई व्यापार गर्ने थलो नबनाउने र सामाजिक सेवाको माध्यम बनाउने संस्थापक डा. कार्कीको भनाइ छ । घरमै सेवा पुर्याएबापत होम केयरले लिने सेवा शुल्क महँगो छैन । सामान्य ड्रेसिङका लागि रु ३०० देखि ३५० र डाक्टर भिजिटको न्यूनतम शुल्क लिएर होम केयरले अहोरात्र जुनसुकै देहाती बस्तीमा स्वास्थ्य सेवालाई सर्वसुलभ पुर्याइरहेको छ । वृद्धाश्रमहरूमा ‘बेसलाइन रेट’मा स्वास्थ्य सेवा पुर्याउने लक्ष्य राखेर विर्तामोडका विभिन्न वृद्धाश्रमहरूमा होम केयरले प्रस्ताव पठाएको जनाएको छ । बिर्तामोडबाट सुरु भएको ‘जीवन रक्षा होम केयर’को सेवालाई विराटनगरमा पुर्याइसकेको र धरानमा चाँडै पुर्याउने लक्ष्य रहेको डा कार्कीले सुनाए । होम केयर सेवा दिने कोशी प्रदेशकै पहिलो संस्था ‘जीवन रक्षा होम केयर’ले विभिन्न स्थानमा निःशुल्क स्वास्थ्य शिविर सञ्चालन गरेर सेवा पुर्याइरहेको छ । स्वास्थ्यसम्बन्धी जनचेतना जगाउने विभिन्न कार्यक्रमसमेत यसले गर्दै आएको छ । पूर्वाञ्चल युनिभिर्सिटीमा एमबीए अध्ययनरत डा. कार्की व्यवस्थापकीय रूपमा पनि स्वास्थ्य क्षेत्रलाई नयाँ प्रविधिमार्फत सुधार्ने प्रयास गरिरहेको बताउँछन् । मोबाइल एपमार्फत ‘टेलिमेडिसिन’ सेवा दिने र कारागार तथा सुधारगृहमा पुगेर स्वास्थ्य सेवा प्रदान गर्ने संस्थाको उद्देश्य रहेको उनले बताए । ‘जीवन रक्षा होम केयर’को स्थापना गरेर स्वास्थ्य क्षेत्रमा उत्कृष्ट र नयाँ सेवा प्रदान गरेको कारण डा कार्कीले हालै वर्ष उत्कृष्ट व्यक्तिका रूपमा ‘पौरखी जेनजी सम्मान’ प्राप्त गरेका छन् । उनी भन्छन्, ‘अहिलेसम्मका काममा सबैको हौसला प्राप्त भइरहेको छ । भविष्यमा हामी अझ धेरै राम्रा योजनाका साथ समाजको सेवा आउनेछौं ।’ रासस
कोशी एक्सिलेन्स अवार्डबाट प्रभु महालक्ष्मी लाइफका सीईओ सन्तोष प्रसाई सम्मानित
काठमाडौं । प्रभु महालक्ष्मी लाइफ इन्स्योरेन्स लिमिटेडका प्रमुख कार्यकारी अधिकृत सन्तोष प्रसाई ‘कोशी एक्सिलेन्स अवार्ड २०८२’ अन्तर्गत इन्स्योरेन्स विधामा सम्मानित भएका छन् । बीमा क्षेत्रको नियमनकारी निकाय तत्कालीन बीमा समिति (हाल नेपाल बीमा प्राधिकरण) देखि प्रभु महालक्ष्मी लाइफ इन्स्योरेन्सको नेतृत्वसम्म आइपुग्दासम्म उनले पुर्याएको योगदानको कदरस्वरूप उक्त सम्मान प्रदान गरिएको हो । प्रसाईको नेतृत्वमा नेपाली बीमा बजारमा प्रभु महालक्ष्मी लाइफ इन्स्योरेन्सले दरिलो उपस्थिति कायम गर्न सफल भएको बताइएको छ । शनिबार आयोजित विशेष समारोहमा कोशी प्रदेशका मुख्यमन्त्री हिक्मत कार्कीले दोस्रो कोशी एक्सिलेन्स अवार्ड २०८२ अन्तर्गत उनलाई इन्स्योरेन्स विधाको पुरस्कार प्रदान गरेका हुन् । कोशी प्रदेशमा जन्मिएर देश तथा विदेशमा विभिन्न पेशा–व्यवसायमार्फत उत्कृष्ट उपलब्धि हासिल गर्दै प्रदेशको प्रतिष्ठा बढाउने व्यक्तित्वहरूलाई हरेक वर्ष विभिन्न विधामा ‘कोशी एक्सिलेन्स अवार्ड’ प्रदान गर्दै आइएको आयोजकले जनाएको छ ।
नेपाललाई वेवास्ता गर्दै भारत र चीनले लिपुलेक मार्ग हुँदै व्यापार गर्दै
काठमाडौं । भारतले लिपुलेक हुँदै भारत–चीन व्यापार गर्ने भएको छ । भारतीय सञ्चार माध्यमका अनुसार नेपालको विरोधका बीच पनि भारत र चीनले व्यापार मार्ग खुलाउने सहमति गरेका हुन् । भारतले यो व्यापार मार्ग जुन १ देखि सुरु गर्ने घोषणा गरेको हो । यो मार्ग पाँच वर्षदेखि बन्द थियो । व्यापार बन्द हुँदा धेरै व्यापारीले ठूलो क्षति बेहोर्नु परेको गुनासो गर्दै आइरहेका थिए । भारतको विदेश मन्त्रालयले ‘नो अब्जेक्सन सर्टिफिकेट’ (एनओसी) जारी गरेपछि यो व्यापार पुनः सुरु हुन लागेको हो । लिपुलेक पास नेपालको पश्चिमी सीमा लिम्पियाधुराबाट ५६ किलोमिटरभित्रको भूमि हो । यसअघि नेपाली भूमि लिपुलेक हुँदै जाने व्यापार मार्गका विषयमा आफूलाई नसोधी भारत र चीनले सम्झौता गर्दा नेपालले विरोध गरेको थियो । नेपालले लिपुलेक लिम्पियाधुरासहितको नक्सा पनि पारित गरेर सार्वजनिक गरेको थियो । त्यो नक्सालाई भारतले स्वीकार गरिसकेको छैन ।
