एसपीजी अटोमोबाइल्सले भित्र्यायो जेको जे–सिक्स टी, नेपाली माटो सुहाउँदो शक्तिशाली इलेक्ट्रिक एसयूभी
काठमाडौं । नेपाली अटो बजारमा विद्युतीय सवारीसाधन (ईभी) को लहर मात्र चलेको छैन, यसले एउटा नयाँ उचाइ पनि लिइरहेको छ । अहिले ग्राहकले रुचाएको उत्कृष्ट ब्राण्ड हो, ओमोडा एण्ड जेको । यसले छोटो समयमै धेरै ग्राहकको मन जित्न सफल भएको छ । विशेषगरी ओमोडा ई-५, जेको जे-फाइभ सिक्सलगायतले उपभोक्ताहरूको मन जितिरहेको छ । बजारमा यसको माग उच्च देखिएपछि शारडा ग्रुपअन्तर्गतको एसपीजी अटोमोबाइल्सले बजारमा एक पछि अर्को गर्दै नयाँ भेरियन्ट थप्दै गएको छ । सोमबार एसपीजी अटोमोबाइल्सले चेरीको प्रिमियम ब्राण्ड जेको जे-सिक्स टी आधिकारिक रूपमा लन्च गरेको छ । ओमोडा ई-५ र जेकोको सफलतापछि भित्रिएको यो नयाँ संस्करण आधुनिक र साहसी जीवनशैली चाहनेहरूका लागि एउटा बलियो विकल्प हो । कम्पनीले नेपालमा विद्युतीय गाडीको प्रयोग ७५ प्रतिशतसम्म पुगेको अनुमान गर्दै बदलिँदो परिवेश र नेपाली सडकका चुनौतीहरूलाई मध्यनजर उक्त नयाँ गाडी बजारमा लिएको जनाएको छ। जेको जे सिक्सलाई पहिलो नजरमा हेर्दा यसको बलियो र स्पोर्टी बनावटले जो-कोहीलाई पनि आकर्षित गर्न सक्छ । यसमा जडान गरिएको डिजिटल स्मार्ट लाइटले १०९ मिटर टाढासम्मको बाटोलाई छर्लङ्ग देखाउँछ । गाडीको पछाडिको भागमा राखिएको २३.५ लिटरको युटिलिटी बक्सले यसलाई थप उपयोगी बनाएको छ । विशेषगरी २५ देखि ६० वर्ष उमेर समूहका जो नयाँ प्रविधि र साहसिक यात्रा रुचाउँछन्, उनीहरूका लागि यो गाडी एउटा उत्कृष्ट रोजाइ हो । नेपाली सडकका खाल्डाखुल्डी र कच्ची बाटोहरू धेरै गाडीका लागि चुनौती बन्ने गर्छन् । तर, जेको जे सिक्स यसैको लागि तयार पारिएको हो । २२५ एमएमको ग्राउन्ड क्लियरेन्स भएको यो गाडीले सडकका अवरोधहरूलाई सजिलै पार गर्नसक्ने कम्पनीको दावी छ । १३५ किलोवाटको शक्तिशाली मोटर र ३१ डिग्रीको डिपार्चर एङ्गलले गर्दा यसलाई कठिन उकालो र अफ-रोडमा गुडाउन निकै सहज हुन्छ । यसमा १५.६ इन्चको विशाल नियन्त्रण स्क्रिन र १.२ वर्गमिटरको सनरुफले यात्रालाई थप रोमाञ्चक बनाउँछ । चालक र यात्रुहरूका लागि विद्युतीय माध्यमबाट मिलाउन मिल्ने सिटहरू छन् । जसमा भेन्टिलेसन र मेमोरी सुविधाहरूले लामो यात्रामा पनि आरामदायी वातावरण सिर्जना गर्छ । आफ्नो इच्छाअनुसार गाडी चलाउन यसमा इको, कम्फर्ट, स्पोर्ट्स र कस्टम गरी ४ वटा मोडहरू उपलब्ध छन् । सुरक्षा यस गाडीको सबैभन्दा बलियो पक्ष हो । यसमा रहेको अत्याधुनिक सुरक्षा प्रणालीले ब्लाइन्ड स्पट डिटेक्सन र आपतकालीन अवस्थामा आफै ब्रेक लगाउने जस्ता सुविधामार्फत दुर्घटनाको जोखिम कम गर्छ । यसमा ५४० डिग्रीको क्यामेरा छ, जसले गाडी बाहिर मात्र होइन, गाडीको मुनिको भाग समेत स्क्रिनमा देखाउँछ । विद्युतीय गाडीमा सबैभन्दा ठूलो चिन्ता ब्याट्रीकै हुन्छ । जेको जे सिक्समा विश्वविख्यात (सीएटीएल) ब्याट्री प्रयोग गरिएको छ । एक पटकको फुल चार्जमा ४३१ किलोमिटर सम्म यात्रा गर्न सकिने यो गाडीलाई हतारको समयमा १० मिनेट मात्र चार्ज गर्दा पनि १०० किलोमिटर गुड्नसक्ने कम्पनीकाे दावी छ । सुरक्षाको हिसाबले पनि यो गाडी निकै भरपर्दो छ । यसले फाइभ स्टार सेफ्टी रेटिङ पाएको छ । विश्वविख्यात चेरी अटोमोबाइल्सको प्रविधि र ज्यागुआर ल्याण्ड रोभरसँगको सहकार्यमा निर्माण भएकोले यसको गुणस्तरमा कुनै सम्झौता नगरिएको कम्पनीको दावी छ । कम्पनीका प्रबन्ध निर्देशक गौरव शारडाले २०२४ मा बजारमा आएको जेको जे सिक्सको सफलतापछि त्यसैको नयाँ भेरियन्ट नेपाली बजारमा ल्याएको जानकारी दिए । शाराडाले यो भेरिन्टलाई एक प्रिमियम लाइफस्टाइल उत्पादनको रूपमा चिनाए । गौरव शारडा । उनका अनुसार यसको बजार मूल्य ६८ लाख ९९ हजार रुपैयाँ तोकिएको भए तापनि सुरुवाती अफरअन्तर्गत ग्राहकहरूले यसलाई ६६ लाख ९९ हजार रुपैयाँमै खरिद गर्न सकिनेछ । जेको जे सिक्स टीका हाल देशभर रहेका १८ वटा डिलर नेटवर्कमार्फत खरिद गर्न सकिने शारडाको भनाइ छ । यस्तै, ग्राहकहरूको यात्रालाई झन्झटमुक्त बनाउन कम्पनीले देशभरका मुख्य राजमार्गहरूमा ३५ वटा आफ्नै चार्जिङ स्टेशनहरू सञ्चालनमा ल्याइसकेको उनले जानकारी दिए । यसैगरी, कम्पनीका भाइस प्रेसिडेन्ट रूपेश शर्मा भट्टका अनुसार नेपाली भौगोलिक अवस्थालाई मध्यनजर गर्दै यसमा केही महत्त्वपूर्ण प्राविधिक सुधारहरू गरिएको छ । पहिले १८ इन्च रहेको टायरको साइजलाई बढाएर १९ इन्च पुर्याइएकाले सडकमा उत्कृष्ट प्रदर्शन गर्ने उनको भनाइ छ । भट्टका अनुसार दुई वर्षको अवधिमा ओमोडा र जेकोका करिब २ हजारभन्दा बढी युनिट बिक्री भइसकेका छन् । नेपाली उपभोक्ताको मन जित्दै नेपालको विद्युतीय सवारी बजारमा एउटा बलियो प्रतिस्पर्धीका रूपमा स्थापित भइसकेको कम्पनीको भनाइ छ । रूपेश शर्मा भट्ट । यसको आकर्षक डिजाइन, आधुनिक फिचर्स, बढ्दो चार्जिङ पूर्वाधार र रणनीतिक बजार प्रवर्द्धनले यसलाई नेपाली ईभी बजारमा अझै सशक्त बनाउने निश्चित छ । यो ब्राण्डलाई चीनको चेरी ब्राण्डले उत्पादन गर्ने गरेको छ । कम्पनीले ओमोडाबाहेक चेरी ब्राण्डकै आइकार भी टु थ्री र प्रिमियम तथा लग्जरी ईभी ब्राण्ड जीकरजस्ता अन्य विद्युतीय सवारी साधनहरू पनि नेपाली बजारमा बिक्री गरिरहेको छ । विद्युतीय सवारीसाधनको प्रयोगलाई सहज बनाउन कम्पनीले चार्जिङ पूर्वाधारमा पनि लगानी गरिरहेको छ । हाल नेपालभरि ३५ भन्दा बढी स्थानमा ओमोडाका डिसी फास्ट चार्जरहरू सक्रिय छन् । यस आर्थिक वर्षभित्र शारडा ग्रुपको गोल्छा अर्गनाइजेसनसँगको सहकार्यमा १०० भन्दा बढी स्थानमा चार्जर स्थापना गर्ने योजना रहेको कम्पनीले जनाएको छ ।
नाडा टोलीको मुख्यमन्त्री बानियाँसँग भेट, अटोमोबाइल क्षेत्र सुधारमा सहकार्यको पहल
काठमाडौं । नवनिर्वाचित नाडाका अध्यक्ष सुरेन्द्रकुमार उप्रेतीको नेतृत्वसहित टिमले आज बागमती प्रदेशका मुख्यमन्त्री इन्द्रबहादुर बानियाँसँग भेटघाट भएको छ । भेटका क्रममा अटोमोबाइल क्षेत्रसँग सम्बन्धित विभिन्न विषयमा विस्तृत छलफल भएको नाडाले जनाएको छ । मुख्यमन्त्री बानियाँले नाडाको नयाँ केन्द्रीय कार्यसमिति गठन भएकोमा बधाई तथा शुभकामना व्यक्त गर्दै सफल कार्यकालको कामना गरे । उनले करिब ५० वर्षदेखि सक्रिय नाडाले राजतन्त्र, प्रजातन्त्र र गणतन्त्र तीनै शासन व्यवस्थासँग काम गरेको अनुभव उल्लेख गर्दै संस्थाको प्रशंसा गरे । उनले देशका करिब ५० प्रतिशत सवारी साधन बागमती प्रदेशमै दर्ता हुने भएकाले राजधानी क्षेत्रमा ट्राफिक जाम, पार्किङ अभाव लगायतका समस्या रहेको बताउँदै यसको समाधानका लागि प्रदेश सरकार र नाडाबीच सहकार्य आवश्यक रहेको धारणा राखे । यस्तै, आवश्यक प्राविधिक जनशक्ति उत्पादन, रोजगारी सिर्जना तथा सवारी चालक अनुमतिपत्र ९लाइसेन्स० सम्बन्धी ट्रायल सेन्टर सञ्चालनका विषयमा पनि सहकार्य गर्न सकिने उनले बताए । नाडाका अध्यक्ष उप्रेतीले देशभर ७ प्रदेशमा फैलिएको नाडामा २८ सय ८३ सदस्य कम्पनी रहेको जानकारी दिँदै नेपालको अटोमोबाइल क्षेत्रमा १ खर्ब रुपैयाँभन्दा बढी लगानी रहेको उल्लेख गरे । साथै, वार्षिक रूपमा करिब ५ हजार जनशक्ति आवश्यक पर्ने जानकारी पनि उनले जानकारी दिए । प्रदेश सरकारसँग सहकार्यका सम्भावित क्षेत्रहरूबारे मोडालिटी तयार गरी पेश गरिने पनि उनले बताए । कार्यक्रममा नाडाका निवर्तमान अध्यक्ष करण चौधरीले देशमा भइरहेको प्रतिभा पलायन रोक्न अटोमोबाइल क्षेत्रले महत्वपूर्ण भूमिका खेलिरहेको उल्लेख गर्दै सीपमूलक तालिम कार्यक्रममार्फत जनशक्ति उत्पादनमा नाडा सक्रिय रहेको बताए । यसैगरी, नाडाका विशिष्ट सल्लाहकार राजनबाबु श्रेष्ठले अटोमोबाइल प्रविधि तीव्र रूपमा परिवर्तन भइरहेकाले सोहीअनुसार दक्ष प्राविधिक जनशक्ति उत्पादन गर्नु चुनौतीपूर्ण रहेको बताए । यसका लागि परिमार्जित पाठ्यक्रम तयार गरिँदै रहेको र तालिमका लागि स्रोतसाधन तथा दक्ष प्रशिक्षकको अभाव रहेको पनि उनले औंल्याए । उक्त कार्यक्रममा नाडाका पदाधिकारी तथा केन्द्रीय कार्यसमिति सदस्यहरूको समेत उपस्थिति रहेको थियो ।
अब व्यवसायीहरू कुनै पनि पार्टीको सदस्य बन्न नपाउने व्यवस्था गर्छु : अञ्जन श्रेष्ठ
काठमाडौं । नेपाल उद्योग वाणिज्य महासंघका वरिष्ठ उपाध्यक्ष अञ्जन श्रेष्ठले अब व्यवसायीहरू कुनै पनि पार्टीको सदस्य बन्न नपाउने व्यवस्था गर्ने बताएका छन् । महासंघको नेतृत्व सहमतिका आधारमा अगाडि बढाउन आफू तयार रहेको बताएका छन् । उनले सहमतिको पहल सबै पक्षबाट हुनुपर्नेमा जोड दिएका छन् । उम्मेदवारी घोषणासभामा बोल्दै श्रेष्ठले वरिष्ठ उपाध्यक्ष बन्दा नै आफूले सक्षम र सशक्त टिम बनाउने घोषणा गरेको स्मरण गराए । उनले नेतृत्वले अनुभवी र सक्षम टिम नपाए काम प्रभावकारी रूपमा अघि बढ्न नसक्ने भएकाले टिम घोषणा गर्नुपरेको बताए । उनले आफ्नो टिममा सक्षम र काम गर्न सक्ने साथीहरू रहेको दाबी गरे । सहमतिका लागि आफूहरूले प्रयास गरेको तर अपेक्षित पहल हुन नसकेको उल्लेख गर्दै उनले सहमति भएमा आफू त्यसका लागि अझै पनि तयार रहेको स्पष्ट पारे । श्रेष्ठले सहमति हुन नसके पनि स्वस्थ र प्रतिस्पर्धात्मक चुनावमार्फत प्रक्रिया टुंगिनुपर्ने बताए । मतदान सम्पन्न भएपछि भने निजी क्षेत्र पुनः एक ठाउँमा उभिनुपर्ने उनको भनाइ थियो । उनले नयाँ सरकारसँग सहकार्य गर्दै निजी क्षेत्रका मुद्दा अघि बढाउन सबैले हातेमालो गर्नुपर्नेमा जोड दिए । साथै निजी क्षेत्र आफैले पनि आत्मसमीक्षा गर्नुपर्ने आवश्यकता औंल्याउँदै ‘छातीमा हात राखेर मनन गर्नुपर्छ, हाम्रो पनि केही गल्ती छ कि भन्ने सोच्नुपर्छ भन्ने धारणा राखे । सबैबाट सहयोगको अपेक्षा व्यक्त गर्दै श्रेष्ठले आफू महासंघमा प्रभावकारी रूपमा काम गर्न सक्षम रहेको बताए । उनले महासंघभित्र सुन्ने संयन्त्र बनाउने, पूर्वअध्यक्षहरू सम्मिलित थिंकट्यांक गठन गर्ने र महासंघलाई अध्ययन तथा अनुसन्धानमा सक्रिय बनाउने प्रतिबद्धता जनाए । उनले सार्वजनिक सरोकारका विधेयक संसदमा पेस गराउनका लागि पनि पहल गर्ने बताए । उनले व्यवसायी पार्टीका सदस्य भएकै कारण हामी आफै कमजोर भएको बताए । उनले अब व्यवसायी पार्टीको सदस्य हुन नपाउने व्यवस्था गर्ने बताए ।
महासंघलाई बलियो बनाउन अञ्जन श्रेष्ठको टिमलाई जिताउन आवश्यक छ : शेखर गोल्छा
काठमाडौं । नेपाल उद्योग वाणिज्य महासंघका पूर्वअध्यक्ष शेखर गोल्छाले महासंघको आगामी नेतृत्वका लागि भावी अध्यक्ष अञ्जन श्रेष्ठलाई साथ दिन आवश्यक रहेको बताएका छन् । महासंघको आगामी नेतृत्वको उम्मेदवारी घोषणासभामा बोल्दै गोल्छाले आजको उपस्थितिले नै भविष्यको संकेत दिएको बताए । उनले ‘मर्निङ सोज द डे’ भन्ने उखान उल्लेख गर्दै आजको दिनले धेरै कुरा देखाएको टिप्पणी गरे। उनले आगामी अध्यक्ष अञ्जन श्रेष्ठलाई सफल नेतृत्वका रूपमा स्थापित गर्न उनको चाहना अनुसारको बलियो टिम आवश्यक पर्ने बताए । गोल्छाले श्रेष्ठको व्यावसायिक पृष्ठभूमि विविध रहेको र उनी त्यसमा सफल समेत भएको उल्लेख गरे। उनले महासंघको नेतृत्व अझ प्रभावकारी बनाउन अनुभवी, सक्षम र समन्वयकारी टोलीको आवश्यकता रहेको धारणा पनि राखे।
कार्यकर्ता र समर्थकसँग एमाले उपमहासचिव योगेश भट्टराईले मागे प्रत्यक्ष सुझाव
काठमाडौं । नेकपा एमालेका उपमहासचिव योगेश भट्टराईले प्रतिनिधिसभा निर्वाचन २०८२ को निराशाजनक परिणामपछि पार्टीभित्र व्यापक समीक्षा र रूपान्तरणको बहस सुरु गरेका छन् । फागुन २१ गते सम्पन्न प्रतिनिधि सभा सदस्य निर्वाचन २०८२ को अन्तिम परिणाम सार्वजनिक भएसँगै एमालेले अपेक्षाकृत कमजोर प्रदर्शन गरेपछि भट्टराईले देश तथा प्रवासमा रहेका कार्यकर्ता, बुद्धिजीवी र समर्थकहरूसँग प्रत्यक्ष सुझाव मागेका हुन् । उनले सार्वजनिक अपिल जारी गर्दै एमाले जस्तो लोकप्रिय र सुदृढ संगठन भएको पार्टी किन कमजोर अवस्थामा पुग्यो भन्ने विषयमा वस्तुनिष्ठ समीक्षा आवश्यक रहेको बताएका छन् । समीक्षा आग्रहभन्दा माथि उठेर हुनुपर्ने उनको भनाइ छ । भट्टराईले पार्टीको एकता, रूपान्तरण, पुनर्गठन र पुनर्जागरणका लागि नयाँ संकल्प आवश्यक रहेको औंल्याएका छन् । उनले समीक्षामार्फत जिम्मेवारी किटान र जवाफदेहिताको प्रश्न समाधान गर्नुपर्नेमा जोड दिएका छन् । उनले सुझावका लागि तीन प्रमुख विषय पनि अघि सारेका छन् । उनले निर्वाचनमा कमजोर परिणाम आउनुका आन्तरिक र बाह्य कारणहरूसमेत माग गरेका छन् । एमालेका सबल, कमजोर पक्ष र भविष्यको सम्भावनाबारे समेत उपमहासचिव भट्टराईले सुझाव माग गरेका हुन् ।
पूर्वस्वीकृति बिना पाठ्यपुस्तक परिवर्तन नगर्न धनगढी उपमहानगरको निर्देशन
काठमाडौं । धनगढी उपमहानगरपालिकाले कुनै पनि विद्यालयलाई पूर्वस्वीकृति बिना पाठ्यपुस्तक परिवर्तन नगर्न निर्देशन जारी गरेको छ । उपमहानगरले एक सूचना जारी गरेर सो निर्देशन जारी गरेको हो । विद्यालयहरूले प्रत्येक शैक्षिक सत्रमा पाठ्यपुस्तक परिवर्तन गर्दा अभिभावकमा अतिरिक्त आर्थिक बोझ पर्ने गुनासो बढ्दै गएको उल्लेख गर्दै अबदेखि आफ्नो पूर्व अनुमति बिना कुनै पनि विद्यालयले पाठ्यपुस्तक परिवर्तन गर्न नपाउने स्पष्ट पारेको हो । सूचनाअनुसार यदि कुनै विद्यालयले पाठ्यपुस्तक परिवर्तन गरेको पाइएमा प्रचलित कानुन बमोजिम कारबाही गरिने चेतावनी समेत दिइएको छ । साथै उपमहानगरले पाठ्यपुस्तक परिवर्तन भइसकेको अवस्थामा सम्बन्धित विद्यालयले समयमै कार्यालयलाई जानकारी गराउन र अभिभावकलाई पनि यस विषयमा सजग रहन आग्रह गरेको छ ।
रविको मुद्दा हेर्दाहेर्दैमा
काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेसहितलाई जोडिएको सम्पत्ति शुद्धीकरण र संगठित अपराधसम्बन्धी मुद्दा संशोधन तथा फिर्ता लिन गरिएको निर्णयविरुद्ध परेको रिट निवेदनमा सर्वोच्च अदालत मा सुनुवाइ जारी रहेको छ । सोमबार न्यायाधीशद्वय विनोद शर्मा र अब्दुल अजीज मुसलमानको संयुक्त इजलासमा बहस सुरु भए पनि समय अभावका कारण सुनुवाइ टुंगोमा पुग्न सकेन । अदालतले मुद्दालाई ‘हेर्दाहेर्दै’मा राखेको अदालतका प्रवक्ता तथा सह–रजिस्ट्रार अर्जुनप्रसाद कोइरालाले जानकारी दिए । यसअघि लगातार चार दिनसम्म सुनुवाइ भएपछि चैत ५ गते न्यायाधीशहरू शारंगा सुवेदी र सुनिलकुमार पोखरेल को इजलासले माघ २ गते गरिएको कसुर संशोधनसम्बन्धी निर्णयको फाइल झिकाउन आदेश दिएको थियो । उक्त आदेश मुख्यत रवि लामिछानेबाहेक अन्य प्रतिवादीहरूको हकमा गरिएको संशोधन निर्णयसँग सम्बन्धित थियो । रवि लामिछानेसम्बन्धी निर्णय भने सविता भण्डारी ले पुस ३० गते गरेकी थिइन् । त्यसपछि माघ २ गते ‘त्रुटि सच्याइएको’ भन्दै सबै प्रतिवादीहरूविरुद्धको सम्पत्ति शुद्धीकरण तथा संगठित अपराधसम्बन्धी अभियोग संशोधन गर्ने निर्णय अघि बढाइएको थियो । यस प्रक्रियामा फरार प्रतिवादी जिबी राई लगायतलाई समेत समेटिएको देखिन्छ । जिल्ला सरकारी वकिल कार्यालय रूपन्देहीको लिखित जवाफमा उक्त संशोधनसम्बन्धी विवरण उल्लेख भए पनि महान्यायाधिवक्ताको आधिकारिक जवाफमा सो विषय स्पष्ट नदेखिएको भन्दै अदालतले सम्बन्धित टिप्पणी आदेश र प्रमाणहरू झिकाउन निर्देशन दिएको हो । उक्त निर्णयविरुद्ध सर्वोच्च अदालतमा तीन वटा छुट्टाछुट्टै रिट निवेदन दर्ता भएका छन् । ती रिटहरूको सन्दर्भ देखाउँदै सरकारी वकिलले दिएको संशोधन निवेदनमा कास्की जिल्ला अदालत र रूपन्देही जिल्ला अदालत ले समेत अन्तिम निर्णय नगर्न आदेश दिएका छन् । निवेदक युवराज सफल ले महान्यायाधिवक्ताको निर्णय कानुनविपरीत रहेको दाबी गर्दै त्यसको कार्यान्वयन रोक्न माग गरेका छन् । अब यस मुद्दामा सर्वोच्च अदालतको अन्तिम निर्णयलाई चासोपूर्वक हेरिएको छ ।
नयाँ मन्त्रीहरूको पर्खाइमा सिंहदरबार
मधु शाही र सिर्जना राई काठमाडौं । मन्त्रालयका गेटदेखि भित्रैसम्म ‘इनडोर प्लान्ट’ का गमला सजाएर हरियाली पारिएको छ । मन्त्रालयका परिसरहरू पनि फूल रोपेर चिटिक्क देखिन्छन् । कतिपय कर्मचारीहरू मन्त्रीका कार्यकक्ष सजाउन खटिएका छन् । नयाँ मन्त्रीको स्वागतमा सजिएका छन्, मन्त्रालयहरू । यसै त वसन्त ऋतुमा सिंहदरबारका बगैँचामा फूलहरू ढकमक्क छन् । त्यसैमा अहिलेको सजावटले ‘सुनमा सुगन्ध’ थपिदिए जस्तै भएको छ । यसो हेर्दा लाग्छ, सिंहदरबारमा फुलेका फुलहरू पनि नयाँ सरकारको स्वागतार्थ लामबद्ध छन् । निर्वाचनको अन्तिम परिणाम आइसकेको छ र सांसदहरूको शपथ चैत १२ गतेका लागि तोकिएको छ । त्यसलगत्तै सरकार गठन गर्न राष्ट्रिय स्वतन्त्र पार्टी (रास्वपा) गृहकार्यमै छ । त्यसैले केही दिनमै बन्ने सरकारको स्वागतका लागि सिंहदबारभित्र तयारी भइरहेको हो । गत भदौ २३ र २४ गते जेनजी आन्दोलनका क्रममा आगलागीमा परेको शिक्षा, विज्ञान तथा प्रविधि मन्त्रालयको मुहार पनि यसै मेसोमा फेरिँदै छ, सिँगारिँदै छ । मन्त्रालयका सूचना अधिकारी मधुप्रसाद घिमिरेका अनुसार जेनजी आन्दोलनका बेला टेलिफोनका जलेका टेलिफोनका तारहरू व्यवस्थित हुँदैछन् । उनले भने, 'मन्त्रालय चिरिच्याट्ट बन्दै छ । नयाँ मन्त्रीको स्वागतमा तयार हुँदै छ ।' युवा खेलकुद मन्त्रालयमा पनि नयाँ मन्त्रीको स्वागतका तयार गरिँदै छ । यसैगरी, सञ्चार तथा सूचना प्रविधि मन्त्रालय पनि नयाँमन्त्रीसँगै नीतिगत कार्य सम्पादनको पर्खाइमा छ । मन्त्रालयका सहसचिव एवं प्रवक्ता उदयबहादुर रानामगरले कार्यकारी अर्थात मन्त्री नहुँदा नियमित सामान्य कामसमेत प्रभावित भइरहेको अवस्थामा नयाँ मन्त्रीको स्वागत गर्न मन्त्रालयका कर्मचारी उत्साहित रहेको बताए । उनले विगतमा जस्तै भौतिक संरचनाको हिसाबले मन्त्रीकक्ष पूर्ण व्यवस्थित नै रहेको सुनाए । 'मन्त्री हुँदा पब्लिक चहलपहल हुने गर्यो । अहिले सुनसान जस्तै छ,' उनले भने, 'मन्त्रीको प्रतीक्षामा कार्यालयदेखि कर्मचारी रहेका छौँ ।' त्यस्तै, ऊर्जा, जलस्रोत तथा सिँचाइ मन्त्रालय पनि जलेको अघिल्लो भाग पेन्टिङ गरेर चिरिच्याट्ट पारिएको छ । मन्त्रालयका एक कर्मचारीले भने, 'अब नयाँ सरकार आएसँगै चहलपहल बढ्ला, अहिले त सुनसानै छ ।' मन्त्रालयका सूचना अधिकारी राजु महर्जनले नयाँ मन्त्रीको आगमनसँगै मन्त्रालयमा सेवाग्राहीले चाप बढ्ने हुनाले आवश्यक सबै तयारी सकिएको बताए । जेनजी आन्दोलनका क्रममा मन्त्रालयको क्षतिग्रस्त भवनको पुनः निर्माण सम्पन्न भइसेको छ । नियमित प्रशासनिक कामबाहेक नीतिगत मन्त्रिस्तर निर्णयका लागि मन्त्रालय प्रतिक्षारत रहेको उनको भनाइ छ । जेनजी आन्दोलनले पूर्ण रूपमा क्षति भएको मन्त्रालयमध्ये, बेला रामशाह पथमा रहेको स्वास्थ्य तथा जनसङ्ख्या मन्त्रालय थियो । भवनको क्षति भएसँगै कार्यालय व्यवस्थित बनाउने सङ्घर्षमै रहेको छ । मन्त्रालयको आधा कार्य कार्यालय अहिले सिंहदबारस्थित अस्थायी टहरामा सीमित छ । यद्यपि आगामी सरकार गठनले ल्याउने स्वास्थ्यमन्त्रीको स्वागत गर्न मन्त्रालय प्रशासन चुस्त छ । मन्त्रालयका प्रवक्ता डा प्रकाश बुढाथोकीका अनुसार भवन जलेपछि स्वास्थ्य मन्त्रालयको आफ्नो स्थायी संरचना छैन । उनका अनुसार हालका स्वास्थ्यमन्त्री डा सुधा गौतमले आइतबारदेखि अत्यावश्यक कामबाहेक मन्त्रालयमा नियमित उपस्थित नहुने गरी धन्यवाद दिएर जाएकी छन् । आगामी बजेटको तयारीमा लागेको मन्त्रालयले बेलैमा नयाँ मन्त्रीको स्वागत गर्न पाए प्रभावकारी हुने आशा रहेको मन्त्रालयका प्रवक्ता बुढाथोकीको धारणा छ । 'टहरामा मन्त्रालय चलाउनु परेको अवस्था छ,' उनले भने, 'हाम्रो यति मात्र आशा छ कि बजेटको तयारी गर्दै गर्दा स्वास्थ्यमन्त्री छिटो नियुक्ति भएको खण्डमा पछि पनि सजिलो हुन्थ्यो ।' सङ्घीय मामिला तथा समान्य प्रशासन मन्त्रालयका सहसचिव एवं प्रवक्ता नीता पोखरेल अर्यालले नयाँ मन्त्रीको स्वागतका लागि खास तयारी आवश्यक नभएको बताए । उनले भवन संरचना पूर्ण तयार रहेकाले पनि तयारी आवश्यक नभएको बताए । नियमित प्राशासनिक काम सञ्चालन भइरहेको र नीतिगत कामहरू सम्पादन गर्न मन्त्रीको पर्खाइमा रहेको उनले सुनाए । रासस
