‘होन्डा अल न्यु सीआर-भी’ नेपाली बजारमा सार्वजनिक
काठमाडौं । नेपालका लागि होन्डा गाडीको आधिकारिक बिक्रेता स्याकार ट्रेडिङ कम्पनीले नेपाली बजारमा ‘होन्डा नयाँ सीआर–भी’ को बिक्री–वितरण औपचारिक रूपमा सुरु गरेको छ । कम्पनीले ग्राहकहरूको बढ्दो चाहना र मागलाई ध्यानमा राख्दै यो नयाँ मोडेल प्रस्तुत गरेको हो । कम्पनीका अनुसार यो गाडीमा अत्याधुनिक प्रविधि र विलासी सुविधाहरू रहेका छन् । यसमा १.५ लिटर क्षमताको पेट्रोल टर्बो इन्जिन जडान गरिएको छ । गाडीको भित्री संरचना (इन्टेरियर) र सुविधामा विशेष ध्यान दिइएको छ । वेलकम सिट, पूर्ण एलईडी बत्ती तथा पानोरामिक सनरुफ जस्ता सुविधाले यात्रालाई सन्तोषजनक बनाउँछन् । साथै, चालक र यात्रुको स्वास्थ्यलाई मध्यनजर गर्दै यसमा प्लाज्मा क्लस्टर वायु–शुद्धिकरण प्रविधि प्रयोग गरिएको छ। गाडीमा १० वटासम्मका सुरक्षा एयरब्याग व्यवस्था गरिएको छ । २१० एमएम ग्राउन्ड क्लिअरेन्स भएकाले नेपालको कच्ची तथा उकालो–ओरालो सडकमा पनि यो उत्कृष्ट रूपमा चल्न सक्छ । यसमा १०.२ इन्चको स्पर्श–स्क्रिन (टच डिस्प्ले), चालकको सम्झना सिट (ड्राइभर मेमोरी सिट) तथा १२ वटासम्मका बोस प्रिमियम स्पिकरहरू जडान गरिएको छ, जसले फरक अनुभव दिन्छ । सुरक्षाका लागि यसमा उन्नत चालक–सहयोग प्रणाली स्तर–२ जडान गरिएको छ, जसले यात्रा अझ सुरक्षित बनाउँछ। यो गाडी ७ सिट क्षमतामा उपलब्ध भएकाले ठूलो परिवारका लागि उपयुक्त विकल्प मानिन्छ । कम्पनीका अनुसार, उनीहरू नेपाली ग्राहकहरूलाई अत्याधुनिक प्रविधि र सुविधायुक्त गाडी उपलब्ध गराउन निरन्तर प्रतिबद्ध छन् । ‘होन्डा नयाँ सीआर–भी’ ले नेपालमा विलासी (लक्जरी) तथा उच्च प्रदर्शन (पर्फर्मेन्स) सेग्मेन्टमा नयाँ मानक स्थापित गर्ने विश्वास गरिएको छ । यो गाडी कालो, सेतो, नीलो र चाँदी (सिल्भर) गरी चार आकर्षक रङमा उपलब्ध हुनेछ । अनुभव लिन तथा परीक्षण यात्रा (टेस्ट राइड) गर्न इच्छुक ग्राहकहरूले ललितपुरको धोबिघाटस्थित होन्डा शोरुममा सम्पर्क गर्न सक्ने कम्पनीले जनाएको छ ।
बुधबारको तरकारी तथा फलफूलको मूल्य : उपभोक्ताले कति तिर्नुपर्ने ?
काठमाडौं । कालीमाटी फलफूल तथा तरकारी बजार विकास समितिले बुधबारका लागि कृषिउपजको न्यूनतम थोक मूल्य सार्वजनिक गरेको छ । निर्धारण गरिएको मूल्य अनुसार गोलभेंडा, आलु, प्याज, बन्दा, काउली, मूला, विभिन्न प्रकारका सागसब्जी तथा फलफूलको मूल्यमा उतारचढाव देखिएको छ । समितिले गोलभेँडा ठूलो (भारतीय) प्रतिकिलो रु ११०, गोलभेँडा सानो (लोकल) प्रतिकिलो रु १००, गोलभेँडा सानो (टनेल) प्रतिकिलो रु ११०, गोलभेँडा सानो (भारतीय) प्रतिकिलो रु ११०, गोलभेँडा सानो (तराई) प्रतिकिलो ११०, आलु रातो प्रतिकिलो ५०, आलु रातो (भारतीय) प्रतिकिलो रु ३१, आलु सेतो प्रतिकिलो ३९, प्याज सुकेको (भारतीय) प्रतिकिलो ३२ रहेको छ । यस्तै, गाँजर (लोकल) प्रतिकिलो १४०, गाँजर (तराई) प्रतिकिलो १२०, बन्दा (लोकल) प्रतिकिलो ७०, बन्दा (तराई) प्रतिकिलो ६० काउली स्थानीय प्रतिकिलो ५५, काउली (तराई) प्रतिकिलो ५०, सेतो मूला (लोकल) प्रतिकिलो २५, भन्टा लाम्चो प्रतिकिलो रु ६०, भन्टा डल्लो प्रतिकिलो ६५, तने बोडी प्रतिकिलो १६०, मकै बोडी प्रतिकिलो रु ६० कायम भएको छ । त्यसैगरी, मटरकोसा प्रतिकिलो रु १३०, घिउ सिमी (लोकल) प्रतिकिलो रु १६०, घिउ सिमी (हाइब्रिड) प्रतिकिलो रु १५०, घिउ सिमी (राजमा) प्रतिकिलो रु १९०, टाटे सिमी प्रतिकिलो रु १३०, तिते करेला प्रतिकिलो रु १३०, लौका प्रतिकिलो रु ५५, परवर (लोकल) प्रतिकिलो रु ९०, परवर (तराई) प्रतिकिलो रु १००, घिरौँला प्रतिकिलो रु ११०, फर्सी पाकेको प्रतिकिलो रु ३५, हरियो फर्सी (लाम्चो) प्रतिकिलो रु ७०, हरियो फर्सी (डल्लो) प्रतिकिलो रु ५५, सलगम प्रतिकिलो ११०, भिन्डी प्रतिकिलो ९०, सखरखण्ड प्रतिकिलो ६०, बरेला प्रतिकिलो रु ६५ र पिँडालु प्रतिकिलो रु ८०, स्कुस प्रतिकिलो रु २० कायम गरिएको छ । साथै, रायोसाग प्रतिकिलो रु ६०, पालुङ्गो साग प्रतिकेजी रु २००, चमसुर प्रतिकिलो रु १५०, तोरीको साग प्रतिकिलो रु ६०, मेथीको साग प्रतिकिलो रु २००, हरियो प्याज प्रतिकिलो रु ६०, बकुला प्रतिकिलो रु १५०, तरुल प्रतिकिलो रु ८०, च्याउ (कन्य) प्रतिकिलो रु २००, च्याउ (डल्ले) प्रतिकिलो रु ३५०, कुरिलो प्रतिकिलो रु १०००, ब्रोकाउली प्रतिकिलो रु १४०, चुकुन्दर प्रतिकिलो रु ७०, रातो बन्दा प्रतिकिलो रु १००, जिरीको साग प्रतिकिलो रु ५००, सेलरी प्रतिकिलो रु ३००, पार्सले प्रतिकिलो रु ६५०, सौफको साग प्रतिकिलो १५०, पुदिना प्रतिकिलो रु ५५०, गान्टेमुला प्रतिकिलो रु ८०, इमली प्रतिकिलो रु १७०, तामा प्रतिकिलो रु १२०, तोफु प्रतिकिलो रु १३० र गुन्द्रुक प्रतिकिलो ३०० तोकिएको छ । त्यस्तै, स्याउ (झोले) प्रतिकिलो रु २००, स्याउ (फुजी) प्रतिकिलो रु २८०, केरा (दर्जन) १३०, कागती प्रतिकिलो रु १००, अनार प्रतिकिलो रु ३५०, सुन्तला (नेपाली) प्रतिकिलो रु १००, तरबुजा हरियो प्रतिकिलो रु ७५, मौसम प्रतिकिलो रु ८०, जुनार प्रतिकिलो रु २५०, भुइँकटहर प्रतिगोटा रु १६०, काँक्रो (लोकल) प्रतिकिलो रु ५०, काँक्रो (हाइब्रिड) प्रतिकिलो ४०, निबुवा प्रतिकिलो रु ४०, नास्पाती (चाइनिज) प्रतिकिलो रु २००, मेवा (नेपाली) प्रतिकिलो रु ६०, मेवा (भारतीय) प्रतिकिलो रु ९०, अम्बा प्रतिकिलो ८० र लप्सी प्रतिकिलो ६५, स्ट्रबेरी भुइँऐसुलु प्रतिकिलो रु ४५०, किबी प्रतिकिलो रु २००, सरिफा प्रतिकिलो रु १८० र आभोकाडो प्रतिकिलो रु २५० तोकिएको छ ।
गैरकानुनी हड्ताल बन्द गरी काममा फर्कन त्रिवेणी स्पिनिङ मिल्सको श्रमिकलाई आह्वान
काठमाडौं । त्रिवेणी स्पिनिङ मिल्सले श्रमिकहरूलाई काममा फर्कन आह्वान गरेको छ । गैरकानुनी हड्ताल बन्द गरी तत्काल काममा फर्कन सम्पूर्ण श्रमिकहरूलाई मिल्सले आह्वान गरेको हो । औद्योगिक शान्ति खलबल्याउने ज्यान मार्ने उद्योगजस्ता गम्भीर फौजदारी कसुर गर्ने केही व्यक्तिहरूको स्वार्थको कारणले गैरकानुनी रूपमा उद्योग सञ्चालन नहुँदा नोक्सान अझ बढेको कम्पनीले जारी गरेको सूचनामा उल्लेख छ । साथै, त्यसको असर कम्पनीलाई मात्र नपरी श्रमिकहरूलाई पनि पर्ने र कम्पनीलाई रोजगारी कटौती गर्नुपर्ने बाध्यता हुने भएकाले त्यस्तो परिणाम आउन नदिन गैरकानुनी हड्ताल बन्द गरी तत्काल काममा फर्कन कम्पनीले अनुरोध गरेको छ । मुनाफा आर्जन गरेको बेलामा श्रमिकहरूलाई श्रम ऐनअनुसार दिनुपर्ने मात्र नभई ऐनले परिकल्पना नै नगरेका विभिन्न सुविधाहरू समेत दिएको कम्पनीले दाबी गरेको छ । निर्यात मूलक उद्योग भएकोले कोभिड-१९ को असर, विभिन्न समयका गैरकानुनी हड्तालको कारणले उत्पादन र आपूर्तिमा अनिश्चितता भएकोले कम्पनीका उत्पादनले बजार गुमाउनु आदि कारणले नोक्सानीमा रहेको कम्पनीले जनाएको छ । यस्तो परिस्थितिमा पनि श्रमिकहरूको हितलाई केन्द्रमा राखेर घाटा सहेर नै भए पनि श्रमिक कटौती नगरी रोजगारीलाई निरन्तरता दिई कानूनअनुसार पारिश्रमिक तथा सबै सुविधाहरू दिइरहेको कम्पनीको दाबी छ । कम्पनी नोक्सानीमा रहेको बेलामा ट्रेड युनियनले पूरा गर्न नसकिने मागहरू राखी उत्पन्न विवाद मध्यस्थ समक्ष विचाराधीन रहेको छ । विवाद मध्यस्थ समक्ष रहेको समयमा गत असोज २३ गतेदेखि अचानक गरेको हड्ताललाई श्रम विभागले गैरकानुनी गरिसकेको कम्पनीले जनाएको छ । साथै, गैरकानुनी रूपमा बन्द गरिएको उद्योग सञ्चालन गर्न कम्पनीमा क्रियाशील रहेका श्रमिकहरूका ३ वटा संगठनहरुले श्रम कार्यालयमा उद्योग सञ्चालन गरि पाऊँ भनी दिएको निवेदन कम्पनीमा प्राप्त भएको र कम्पनीले कानुनसम्मत रूपमा उद्योग सञ्चालन गर्न तयार रहेको जनाएको छ ।
विमानस्थलको जग्गा कृषि प्रयोजनका लागि ठेक्कामा दिइँदै, उखु र मकै लगाउन नपाइने
काठमाडौं । विमानस्थलको जग्गा कृषि प्रयोजनका लागि ठेक्कामा दिइने भएको छ । नेपाल नागरिक उड्डयन प्राधिकरण सिमरा नागरिक उड्डयन कार्यालय बाराले विमानस्थल क्षेत्रभित्र रहेको जग्गा कृषि प्रयोजनका लागि ठेक्कामा दिने भएको हो । सिमरा कार्यालयको क्षेत्रभित्र रहेको धावन मार्गको पश्चिमपट्टिको प्लट नम्बर १ को जग्गा ५ वर्षका लागि भाडामा दिने भएको हो । कार्यालयका अनुसार प्लट नं १ को ४ विघा ३ कट्ठा ३ धुरको खाली जग्गा कृषि प्रयोजनका लागि पुस १ गतेदेखि २०८७ मंसिर मसान्तसम्म ५ वर्षका लागि ठेक्का भाडामा दिने भएको हो । उक्त खाली जग्गा कृषि प्रयोजनका लागि ठेक्कामा लिन इच्छुक सङ्घ संस्था वा व्यक्तिले मंसिर २४ गतेभित्र बोलपत्र पेश गर्नुपर्नेछ । बोलपत्र फाराम शुल्क ३ हजार ३९० रुपैयाँ तोकिएको छ । उक्त प्लट न. १ को कवोल रकम न्यूनतम् वार्षिक १ लाख २५ हजार ५ सय रुपैयाँका दरले ५ वर्षमा कुल ६ लाख २७ हजार ५ सय रुपैयाँ हुन आउने कार्यालयले जनाएको छ । ठेकेदारले उक्त जग्गामा उखु, मकै जस्ता अग्ला अग्ला बोटबिरुवा हुने बाली तथा गाँजा जस्ता कानुनद्वारा निषेधित तथा जङ्गली जनावर तथा चराचुरुङ्गी आकर्षित गर्ने खालका बाली लगाउन पाइने छैन ।
सोलु हाइड्रोमा लगानी गर्न वैदेशिक रोजगारीमा रहेका नेपालीलाई आज अन्तिम दिन
काठमाडौं । सोलु हाइड्रोपावरको आईपीओमा आवेदन दिने आज अन्तिम दिन रहेको छ । मंसिर ७ गतेदेखि बिक्री खुला गरेको आईपीओमा वैदेशिक रोजगारीमा रहेका नेपालीहरूले आजसम्म आवेदन दिन सक्नेछन् । कम्पनीले जारी पुँजी १० अर्ब रुपैयाँको २० प्रतिशत अर्थात् २ अर्ब रुपैयाँको २ करोड कित्ता सेयर जारी गरेको हो । सर्वसाधारण लगानीकर्ताहरुका लागि छुट्याइएको सेयरको १० प्रतिशत अर्थात् १० करोड रुपैयाँको १० लाख कित्ता नेपाल सरकारको सम्बन्धित निकायबाट श्रम स्वीकृती प्राप्त गरी विदेशमा रोजगार गरिरहेका नेपालीहरूलाई बिक्रीमा राखेको हो । कम्पनीको आईपीओमा न्यूनतम् १० कित्तादेखि अधिकतामा १ लाख कित्ता सेयरसम्म आवेदन दिन सकिनेछ । कम्पनीको आईपीओ निष्काशन तथा बिक्री प्रबन्धक नबिल इन्भेस्टमेन्ट बैंकिङ्ग रहेको छ । वैदेशिक रोजगारीमा रहेका नेपालीले भने सिआस्बा सदस्य बैंक तथा वित्तीय संस्था र मेरो सेयर एपमार्फत आवेदन दिन सक्नेछन् ।
नारायणी डेभलपमेन्ट बैंकमा संस्थापक सेयरधनी नै लगानी गर्न अनिच्छुक
काठमाडौं । नारायणी डेभलपमेन्ट बैंकको हकप्रद सेयर संस्थापक सेयरधनी नै खरिद गर्न इच्छुक नरहेको देखिएको छ । बैंकले गत असोज २ गतेदेखि कात्तिक ७ गतेसम्म चुक्ता पुँजी २६ करोड २४ लाख ६७ हजार ६०० रुपैयाँको १ सय प्रतिशत अर्थात् १:१ अनुपातमा २६ लाख २४ हजार ६७६ कित्ता हकप्रद सेयर बिक्री गरेको थियो । तर, उक्त अवधिमा संस्थापक समूहतर्फको ६ लाख ३ हजार १६२ कित्ता र सर्वसाधारण समूहतर्फको १८ हजार ४४४ कित्ता गरी कुल ६ लाख २१ हजार ६०६ कित्ता सेयर बिक्री हुन सकेन । जसकारण संस्थापक समूहतर्फका सेयरधनी नै बैंकमा थप लगानी गर्न अनिच्छुक देखिएका हुन् । बैंकले अवितरित कुल ६ लाख २१ हजार ६०६ कित्ता सेयर सर्वसाधारण लगानीकर्ताका लागि बिक्री खुला गरेको छ । बैंकको उक्त सेयरको मूल्य प्रतिकित्ता १ सय रुपैयाँ तोकिएको छ । खरिद गर्न इच्छुक लगानीकर्ताले सो मूल्य वा सो भन्दा बढी मूल्य तोकि मंसिर २५ गतेभित्र आवेदन दिनुपर्नेछ । बैंकको सेयर बिक्री प्रबन्धकमा ग्लोबल आइएमई क्यापिटल रहेको छ । लगानीकर्ताले बिक्री प्रबन्धकका साथै ग्लोबल आइएमई बैंकको विराटनगर, आदर्श नगर वीरगन्ज, हेटौंडा, नारायणगढ, न्युरोड पोखरा, बुटवल मिलनचोक, सुर्खेत र धनगढी शाखाबाट आवेदन दिन सकिनेछ ।
२७ जना प्रहरी आफूखुसी बिदामा, ७ दिनभित्र हाजिर हुन हेडक्वार्टरको निर्देशन
काठमाडौं । नेपाल प्रहरीले आफूखुसी बिदामा बसेका प्रहरीहरूलाई हाजिर हुन निर्देशन दिएको छ । प्रहरी प्रधान कार्यालय नक्सालले एक सूचना जारी गर्दै गैरहाजिर भएका २७ प्रहरीलाई ७ दिनभित्र हाजिर हुन निर्देशन दिएको हो । प्रहरी सहायक निरीक्षक १ जना, प्रहरी हबल्दार २ जना, सहायक हबल्दार ३ जना, प्रहरी जवान २० जना र कार्यालय सहयोगी १ जना रहेको कार्यालयले जनाएको छ । प्रहरी प्रधान कार्यालयले उनीहरुको नाम, ठेगाना, गैरहाजिर भएको मिति लगायतको विवरणसहित सार्वजनिक सूचना गरी बाटोको म्याद बाहेक ७ दिनभित्र हाजिर हुन निर्देशन दिएको हो ।
आजसम्म सेयरधनी बने दुई कम्पनीको बम्पर लाभांश पाइने
काठमाडौं । एनआरएन इन्फ्रास्ट्रक्चर एण्ड डेभलपमेन्ट र शिवम् सिमेन्ट्सको लाभांश सुरक्षित गर्ने आज मंसिर १० गते अन्तिम दिन रहेको छ । साधारण सभा तथा लाभांश वितरण प्रयोजनार्थ दुइटै कम्पनीले मंसिर ११ गते बुकक्लोज गर्ने निर्णय गरेका छन् । त्यसैले आजसम्म नेपाल स्टक एक्सचेञ्जमा कारोबार भइ कायम सेयरधनीहरूले यी कम्पनीको साधारण सभामा सहभागिता जनाई लाभांश प्राप्त गर्न सक्नेछन् । एनआरएनले गत आर्थिक वर्ष २०८१/८२ को नाफाबाट हाल कायम चुक्ता पुँजी १ अर्ब २८ करोड ४३ लाख ७२ हजार रुपैयाँको ४० प्रतिशतका दरले ५१ करोड ३७ लाख ४८ हजार रुपैयाँ बोनस सेयर र कर प्रयोजनार्थ २.१० प्रतिशतका दरले २ करोड ७० लाख ३९ हजार रुपैयाँ नगद गरी ४२.१० प्रतिशत लाभांश प्रस्ताव गरेको छ । लाभांश पारित गर्न कम्पनीले पुस ४ गते आम्रपाली व्याङक्वेट, काठमाडौंमा बिहान ९ बजे १३औँ वार्षिक साधारण सभा बोलाएको छ । यस्तै, शिवम् सिमेन्टले गत आर्थिक वर्ष २०८१/८२ को नाफाबाट हाल कायम चुक्ता पुँजी ५ अर्ब ४५ करोड ६८ लाख ८ हजार रुपैयाँको २.५ प्रतिशतका दरले १३ करोड ६४ लाख २० हजार रुपैयाँ बोनस सेयर र कर प्रयोजनार्थ सहित १० प्रतिशतका दरले ५४ करोड ५६ लाख ८० हजार रुपैयाँ नगद गरी कुल १२.५० प्रतिशत लाभांश प्रस्ताव गरेको छ । लाभांश पारित गर्न कम्पनीले मंसिर २५ गते, राष्ट्रिय सभा गृह काठमाडौंमा बिहान साढे १० बजे १०औँ वार्षिक साधारण सभा बोलाएको छ ।
