वैदेशिक रोजगारीमा ठगी बढ्दै
नेपालगञ्ज । बाँकेमा दाङमा वैदेशिक रोजगारसम्बन्धी ठगीका उजुरीहरू बढ्दै गएका छन् । सुरक्षित आप्रवासन (सामी) कार्यक्रमअन्तर्गत जिल्ला प्रशासन कार्यालय बाँकेमा सञ्चालित आप्रवासी स्रोत केन्द्रमा आर्थिक वर्ष २०७७/०७८ मा ८ उजुरी परेकामा आव २०८०/०८१ मा त्यो संख्या ४७ पुगेको सामी कार्यक्रम बाँकेका संयोजक कमलसिंह नेपालीले जानकारी दिए । यो कार्यक्रम यहाँका चार स्थानीय तहमा सञ्चालित छ । वैदेशिक रोजगारीमा जानेलाई एउटा काम भनेर अर्को काममा लगाउने, एउटा कम्पनी भनेर अर्को कम्पनीमा लैजाने र जानुपूर्व दिने भनिएको तलबभन्दा न्यून तलब दिने समस्या रहेको बताइएको छ । ‘सामी कार्यक्रम सञ्चालन भएपछि स्थानीयमा चेतना जागृत भएको अवस्था छ, त्यही भएर उजुरीको सङ्ख्या बढेको छ,’ संयोजक नेपाललीले भने । कतिपय ठगीका उजुरीमा जिल्ला प्रशासनले पीडित र पीडकलाई बोलाएर क्षतिपूर्ति दिलाएर मिलापत्र गराउने र नमिलेमा वैदेशिक रोजगार विभाग पठाउने गरेको उनले बताए । संयोजक नेपालीका अनुसार आप्रवासी स्रोत केन्द्रबाट एक वर्षमा १० हजार सात सय ३६ जना र कार्यक्रम सञ्चालन भएको चार वर्षमा २८ हजार ४ सय ६६ जनाले सूचना र परामर्श लिएका छन् । सोही कार्यक्रमका सामाजिक परिचालन अधिकृत घनश्याम वलीले यहाँका नेपालगञ्ज, कोहलपुर, खजुरा र बैजनाथमा सञ्चालित वित्तीय साक्षरता कक्षा प्रभावकारी भएको बताए । वैदेशिक रोजगार बोर्डकी सामी कार्यक्रम अधिकृत लक्ष्मी चौधरीले श्रम स्वीकृति लिई दक्ष भएरमात्रै वैदेशिक रोजगारीमा जानु उचित हुने सल्लाह दिए ।
भक्तपुरको ‘नलिञ्चोक हेलिपोर्ट’ सञ्चालनमा, एकैपटक ४ वटा उडान तथा अवतरण गर्न सकिने
काठमाडौं । त्रिभुवन अन्तर्राष्ट्रिय विमानस्थलको हवाई उडान चाप व्यवस्थापन गर्ने उद्देश्यले भक्तपुरको नलिञ्चोकमा निर्माण गरिएको हेलिप्याड व्यावसायिक रूपमा सञ्चालनमा आएको छ । सूर्यविनायक नगरपालिका-१० स्थित नलिञ्चोकमा ३३ रोपनी क्षेत्रफलमा हेलिप्याड निर्माण गरिएको हो । उक्त हेलिप्याडको संस्कृति, पर्यटन तथा नागरिक उड्डयनमन्त्री हितबहादुर तामाङले शनिबार उद्घाटन गर्दै त्रिभुवन अन्तर्राष्ट्रिय विमानस्थलको उडान चाप व्यवस्थापनमा हेलिप्याड उपयोगी हुने विश्वास व्यक्त गरे । ‘अन्तर्राष्ट्रिय विमानस्थल साँघुरो भइरहेको र जहाज तथा हेलिकप्टरको सख्या पनि बढिरहेको सन्दर्भमा यो हेलिप्याड सान्दर्भिक छ,’ उनले भने, ‘विमानस्थल पूर्वाधारको सेवा विस्तार भइरहेका छन् । नेपाल नागरिक उड्डयन प्राधिकरणले निर्माण गरेको यो हेलिप्याड विशेषगरी पूर्वी भेगका जिल्लाका लागि उपयुक्त हुनेछ । यसको बहुआयामिक महत्व पनि छ ।’ पर्यटनमन्त्री तामाङले मुलुकको हवाई उडानलाई सुरक्षित र भरपर्दो बनाउन मन्त्रालयले नीतिगत र संरचनागत सुधारका काम अगाडि बढाएको बताए । उनले भक्तपुरमा पहिलो पटक सुविधायुक्त हेलिप्याड व्यावसायिक रूपमा सञ्चालन आउनु नागरिक उडानका लागि निकै उपलब्धिमूलक भएको उल्लेख गरे । प्राधिकरणका महानिर्देशक प्रदीप अधिकारीले हेलिप्याड सञ्चालनमा आएसँगै त्रिभुवन अन्तर्राष्ट्रिय विमानस्थलको उडान चाप व्यवस्थापन गर्न सहयोग पुग्ने विश्वास व्यक्त गरे । उनले उडान चाप व्यवस्थापनसँगै हेलिकप्टर सेवा प्रदायक कम्पनीलाई सहज रूपमा सेवा प्रदान गर्न मद्दत पुग्नुको साथै स्थानीयले पनि यसबाट लाभ लिनसक्ने विश्वास व्यक्त गरे । महानिर्देशक अधिकारीले अहिले त्रिभुवन विमानस्थल विस्तारको क्रममा रहेकाले जनाउँदै हालको हेलिकप्टर पार्किङ क्षेत्रमा पनि विस्तारको काम भइरहेको बताए । मुलुकको नागरिक उड्डयन सेवालाई सुरक्षित, भरपर्दो र स्तरीय बनाउन पूर्वाधार विस्तारसहित विभिन्न काम अगाडि बढाइएको उनको भनाइ छ । हेलिप्याड सञ्चालनमा आएसँगै अन्तर्राष्ट्रिय विमानस्थलको उडान चाप व्यवस्थापनमा सहज हुने प्राधिकारणले जनाएको छ । प्राधिकरणका सिभिल इञ्जिनियर विनायक भट्टराईका अनुसार १७ वटा हेलिकप्टर पाकिङ गर्न मिल्ने क्षमता रहेको उक्त हेलिप्याडमा एकैपटक ४ वटा हेलिकप्टर अवतरण गर्न सकिन्छ । आज हेलिप्याड उद्घाटनको अवसरमा विभिन्न वायुसेवा कम्पनीका हेलिकप्टर अवतरण गराइएको थियो । पर्यटनमन्त्रीसहित क्यानका पदाधिकारी तथा हेलिकप्टर कम्पनीका पदाधिकारी अन्तर्राष्ट्रिय विमानस्थलबाट हेलिकप्टरमार्फत नलिञ्चोक आएका थिए । करिब ११ करोड रुपैयाँको लागतमा हेलिप्याड निर्माण सम्पन्न भएको उड्डयन प्राधिकरणले जनाएको छ । प्राधिकरणका अनुसार हाल मुलुकमा १२ हेलिकोप्टर सेवा प्रदायक कम्पनीका ४० हाराहारी हेलिकोप्टर छन् ।
समृद्धि फाइनान्स औरही शाखाले मनायो पहिलो वार्षिकोत्सव
काठमाडाैं । समृद्धि फाइनान्स कम्पनी लिमिटेडको शाखा कार्यालय औरहीले पहिलो वार्षिकोत्सव मनाएको छ । औरही नगरपालिकाका स्थानीय व्यापारीहरू, बचतकर्ता, बुद्विजीवी, समाजसेवीलगायतले फाइनान्सको उत्तरोत्तर प्रगतिको शुभकामना दिएका थिए । शाखाले आगामी दिनहरूमा स्थानीय आवश्यकता अनुसारको कर्जालाई प्राथमिकता दिई गुणस्तरीय कर्जा लगानीमा अगाडि बढ्ने र बैंकिङ सेवालाई थप सशक्त बनाउन स्थानीय जनचाहना बमोजिम कार्य गर्ने बताएको छ । समृद्धि फाइनान्सले हाल १३ वटा शाखामार्फत नगद कारोबार, आरटीजीएस, आइपीएस, कनेक्ट आइपीएस, रेमिटान्स, क्लियरिङ लगायतका बैंकिङ सेवा प्रदान गर्दै आएको छ भने मोबाइल बैंकिङ, डेबीट कार्ड, क्यूआर कोड आदि डिजिटल सुविधा निःशुल्क प्रदान गर्दै आइरहेको छ ।
तोलामा १९ सयले बढ्यो सुनको मूल्य
काठमाडौं । शुक्रबार सुनको मूल्य तोलामा १९ सय रुपैयाँ बढेको छ । नेपाल सुनचाँदी व्यवसायी महासंघले यस दिनका लागि सुनको मूल्य तोलामा १ लाख ४४ हजार ७ सय रुपैयाँ निर्धारण गरेको छ । बिहीबार सूनको मूल्य तोलाको दिन १ लाख ४२ हजार ८ सय रुपैयाँ थियो । त्यस्तै शुक्रबार चाँदीको मूल्य तोलामा २५ रुपैयाँ बढेको छ । अघिल्लो दिन तोलाको १ हजार ८ सय ४० रुपैयाँमा कारोबार भएको चाँदी आज १ हजार ८ सय ६५ रुपैयाँमा कारोबार भइरहेको छ ।
बुद्धिजीवीहरू परिवर्तनका पक्षमा खुलेर बोल्नुस्, डटेर लेख्नुस् : प्रधानमन्त्री
काठमाडौं । प्रधानमन्त्री पुष्पकमल दाहाल ‘प्रचण्ड’ले गलत सूचना प्रवाह गरेर सर्वसाधारण जनतालाई भ्रमित तुल्याउने र समाजमा नकारात्मक भाष्य सिर्जना गर्न खोज्नेले देश र जनतालाई माया नगर्ने बताएका छन् । नेपाल बुद्धिजीवी संगठनको छैटौँ राष्ट्रिय सम्मेलनको शुक्रबार यहाँ उद्घाटन गर्दै प्रधानमन्त्री दाहालले सिर्जनात्मक र सकारात्मक सोचसहित जनतामा आशा प्रवाह गरेरमात्र समाजलाई सही दिशातर्फ लैजान सकिने बताएको प्रधानमन्त्रीको सचिवालयले जनाएको छ । ‘सबै नेता उस्तै हुन्, यहाँ केही हुँदैन भन्ने भाष्य गलत हो, जसले नकारात्मक भाष्य बनाएका छन्, उनीहरूमा देश र जनताप्रति माया छैन रहँदैन,’ प्रधानमन्त्री दाहालले भने, ‘इतिहासमा योगदान गर्ने शक्तिहरूको पक्षमा सकारात्मक तवरले सन्देश प्रवाह हुनुपर्छ, गर्नुपर्छ, तपाईं बुद्धिजीवीहरू परिवर्तनका पक्षमा खुलेर बोल्नुस्, डटेर लेख्नुहोस्, कुनै अप्ठ्यारो मान्नुपर्दैन ।’ नेपालको राजनीतिक परिवर्तनमा बुद्धिजीवीको महत्वपूर्ण भूमिका रहेको उल्लेख गर्दै प्रधानमन्त्रीले संसारभर जनतालाई कतापट्टि डोर्याउने भन्ने सवालमा बुद्धिजीवी निर्णायक हुने भएकाले त्यसतर्फ लाग्नुपर्नेमा जोड दिए । उनले भने, ‘क्रान्ति, शान्ति प्रक्रिया र संविधान निर्माणमा बुद्धिजीवीको योगदान रहेको छ, हिजो विचार निर्माण र सङ्गठन निर्माणमा बुद्धिजीवीको सक्रियता थियो, आज पनि उत्तिकै छ ।’ क्रान्तिपछि भएका महत्वपूर्ण कामहरूलाई नजरअन्दाज गरेर परिवर्तनविरोधी भाष्य निर्माण गर्न खोजिएको भन्दै प्रधानमन्त्री दाहालले त्यस्ता गतिविधिको खुलेर विरोध गर्न र प्रतिवाद गर्नुपर्ने आवश्यकता औँल्याए । उनले बुद्धिजीवीहरूको जिम्मेवारी समाजमा सकारात्मक भाष्य निर्माण गरेर आशाको सन्देश प्रवाह गर्नुरहेको बताए । बुद्धिजीवीहरूले जनमतलाई समाजवादी दिशातिर डोर्याउन भूमिका खेल्नुपर्ने बताउँदै प्रधानमन्त्री दाहालले क्रान्तिका उपलब्धि जोगाउन र समाजवादको वैचारिक आधार तयार पार्न सबैले आ-आफ्ना क्षेत्रबाट भूमिका निर्वाह गर्नुपर्ने बताए । उनले बृहत्तर पार्टी एकताका निम्ति आफू लागिपरेको जानकारी दिँदै जतिसुकै अप्ठ्यारो परिस्थिति आए पनि समाजवादको आधार निर्माण गर्न आफू दृढ संकल्पित भएर लागेको स्पष्ट पारे ।
मेसिनबाटै यसरी गर्न सकिन्छ सिटिजन्स बैंकमा चेक डिपोजिट
काठमाडौं । तपाई सिटिजन्स बैंकको ग्राहक हुनुहुन्छ ? यदि हुनुहुन्छ भने चेक जम्मा गर्न काउन्टरमै पुगेर लाइन लाग्नुपर्ने झन्झटलाई बैंकले अन्त्य गरेको छ । अब एक/डेढ मिनेटमै चेक आफ्नो खातामा जम्मा गर्न सक्ने सुविधा बैंकले गरेको छ । एटीएम मेसिनमार्फत् ग्राहकहरूले चेकमा भएको रकम बैंक खातामा जम्मा गर्न सकिने बैंकले जनाएको छ । बैंकका ट्रान्जिक्सनल बैंकिङ हेड सुयेश कुमार पौडेलका अनुसार बुटवल, वीरगञ्ज, विराटनगर, कलङ्की, दरबारमार्ग, नयाँ बजारमा चेक डिपोजिट मेसिन सञ्चालनमा छन् । जुन शाखामा चेकको कारोबार बढी हुन्छ सो शाखामा चेक डिपोजिट मेसिन सञ्चालनमा छन् । ग्राहकलाई छिटो सेवा दिने उद्देश्यले चेक आफ्नो खातामा जम्मा गर्न सक्ने मेसिन सञ्चालनमा ल्याएको उनले बताए । ग्राहकलाई तत्काल सेवा दिने र बैंकमा हुने लाइन कम गर्न चेक डिपोजिट मेसिनले सहयोग पुर्याउने उनको भनाइ छ । अब बैंकको शाखा कार्यालयको काउन्टर बन्द भएको समयमा पनि चौविसै घण्टा चेक डिपोजिट गर्न सकिने बैंकले जनाएको छ । यो प्रविधि चेक डिपोजिट मात्रै नभएर सुरक्षाका हिसाबले पनि अत्यन्तै मजबुत रहेको बैंकको भनाइ छ । बैंकका अनुसार यसमा चेक जम्मा गर्न आउने मान्छेको विवरण अनलाइनबाट डिजिटल भेरिफाइ हुन्छ । चेक डिपोजिट गर्दा सबै गतिविधि डिजिटल रेकर्ड हुने भएकाले आगामी दिनमा तथ्याङ्क खोज्न वा रेकर्ड निकाल्न गाह्रो नहुने बैंकको दाबी छ । चेक डिपोजिट मेसिन पूर्णरुपमा पेपरलेस भएकाले वातावरणमैत्री रहेको बैंकले बताएको छ । कसरी डिपोजिट गर्ने ? बैंकका अनुसार एउटा चेक जम्मा गर्न एकदेखि डेढ मिनेट लाग्छ । पहिला काउन्टरमा जम्मा गर्दा चेकमा हस्ताक्षर गरिन्थ्यो भने अब हस्ताक्षर गर्नुपर्दैन । तर, त्यसको सट्टा मोबाइल नम्बर आवश्यक पर्छ । सुरुमा चेक डिपोजिट मेसिनमा दुईवटा भाषा देखिन्छ । दुइटा भाषामध्ये आफूलाई कुन भाषा अनुकुल हुन्छ सोमा छनोट गर्नुपर्ने हुन्छ । त्यसपछि जसको खातामा चेक जम्मा गर्नुपर्ने हो सो व्यक्तिको खाता नम्बर उल्लेख गर्नुपर्ने हुन्छ । त्यसपछि नाम र आफ्नो मोबाइल नम्बर लेख्नुपर्छ । त्यसपछि अमाउन्ट (रकम) लेखेको ठाउँमा चेकमा उल्लेखित रकम भर्नुपर्ने हुन्छ । त्यसपछि बैंक खाता नम्बर राख्नुपर्ने हुन्छ । मिति लेखिएको ठाउँमा चेकमा उल्लेख गरिएको मिति लेख्नुपर्ने हुन्छ । हालसम्मका विवरण सही छन् भने नेक्स्ट (अर्काे) मा क्लिक गर्नुपर्ने हुन्छ । त्यसपछि इन्टर्न योर चेक लेखिएको ठाउँमा चेकको पाना छिराउनुपर्ने हुन्छ । त्यसपछि चेक जम्मा भएको रिसिप्ट प्राप्त गर्न सकिने बैंकले जनाएको छ ।
सेयर बजार र घरजग्गाको कारण राजस्वमा वृद्धि, आईआरडीलाई सफलता
काठमाडौं । गत आर्थिक वर्षको तुलनामा चालु आवमा राजस्व सङ्कलनमा सामान्य वृद्धि भएको छ । चालु आवको ११ महिनामा ४१ अर्ब १९ करोड राजस्व सङ्कलन भएको छ । आन्तरिक राजस्व विभागका अनुसार गत वर्ष सोही अवधिमा ३७ अर्ब रुपैयाँ सङ्कलन भएको थियो । यो वृद्धि ११.३० प्रतिशतले बढी हो । चालु आवको जेठ मसान्तसम्म ४ खर्ब ४८ अर्ब रुपैयाँ राजस्व सङ्कलन भएको छ । यो गत वर्षको सोही अवधिको तुलनामा ९.६४ प्रतिशतले बढी हो । गत वर्ष जेठ मसान्तसम्मको राजस्व असुली ४ खर्ब ८अर्ब रुपैयाँ थियो । गत वर्षभन्दा चालु आवको यो अवधिसम्म ४० अर्ब रुपैयाँले राजस्व सङ्कलनमा वृद्धि भएको विभागका महानिर्देशक शिवलाल तिवारीले जानकारी दिए । आयकर (भाडा र ब्याजसमेत) बाट दुई खर्ब ३२ अर्ब रुपैयाँ, मूल्य अभिवृद्धिकर (आन्तरिक)बाट एक खर्ब १२ अर्ब रुपैयाँ र अन्तःशुल्कबाट ९५ अर्ब रुपैयाँ सङ्कलन भएको छ । महानिर्देशक तिवारीका अनुसार स्वास्थ्य सेवा, शिक्षा र अन्यबाट आठ अर्ब रुपैयाँ राजस्व उठेको छ । हालसम्म लक्ष्यको ७८.५ प्रतिशत रकम असुली भएको छ । गत वर्षको सोही अवधिको तुलनामा राजस्व सङ्कलनमा वृद्धि भए पनि सरकारले चालु आवमा निर्धारण गरेको लक्ष्यमा भने पुग्न सकेको छैन । राजस्व योगदानमा करदाता कार्यालयहरूमध्येको ठूला करदाता कार्यालयको हिस्सा करिब ४० प्रतिशत छ । यो कार्यालयले एक खर्ब ७५ अर्ब रुपैयाँ सङ्कलन गरेको छ । ठूला करदाता कार्यालयको राजस्व असुली लक्ष्य दुई खर्ब ३८ अर्ब रुपैयाँ थियो । वार्षिक एक अर्ब रुपैयाँभन्दा बढीको कारोबार गर्ने करदाताबाट ठूला करदाता कार्यालयले कर सङ्कलन गर्दै आएको छ । एक अर्बभन्दा बढीको कारोबार गर्ने करदाता सङ्ख्या पाँच सय ४५ छन् । कोरोना महामारीलगायत विविध कारणले केही वर्षयता अर्थतन्त्रमा आएको सुस्तताका कारण राजस्व सङ्कलनमा कमी आए पनि चालु आवको उत्तराद्र्धमा अर्थतन्त्रमा भएको सुधारले राजस्व सङ्कलनमा वृद्धि भएको महानिर्देशक तिवारी बताउँछन् । अन्तःशुल्कमा बढाइएको निगरानी, धितोपत्र बजार र घरजग्गा व्यवसाय कारोबारमा भएको वृद्धि तथा पुँजीगत खर्चमा भएको वृद्धिले पनि राजस्व सङ्कलनमा सकारात्मक प्रभाव परेको उनी बताउँछन् ।
गुहेश्वरी मर्चेन्ट बैंकिङले २६ करोडको ऋणपत्र जारी गर्ने, लगानीकर्तालाई ९ प्रतिशत ब्याज
काठमाडौं । गुहेश्वरी मर्चेन्ट बैंकिङ एण्ड फाइनान्सले २६ करोड रुपैयाँ बराबरको ऋणपत्र निष्कासन गर्ने भएको छ । असार ५ गते बसेको कम्पनीको सञ्चालक समिति बैठकले ‘९५ गुहेश्वरी डिबेन्चर-२०८९’ जारी गर्ने निर्णय गरेको कम्पनीका प्रमुख कार्यकारी अधिकृत तोयाराज अधिकारीले बताएका छन् । यो ऋणपत्र निष्कासन गर्न कम्पनीले धितोपत्र बोर्डसँग अनुमति माग्नेछ । धितोपत्र बोर्डले अनुमति दिएमा कम्पनीले १ हजार रुपैयाँ अंकित दरका कुल २ लाख ६० हजार इकाइ ऋणपत्र जारी गर्नेछ । उक्त ऋणपत्र ८ वर्ष अवधिको हुनेछ । यसमा लगानीकर्ताले वार्षिक ९ प्रतिशत ब्याज पाउने अधिकारीले बताएका छन् । ब्याजको भुक्तानी अर्धवार्षिकरूपमा हुने कम्पनीले जनाएको छ ।
