ग्रिनल्याण्डलाई अमेरिकामा गाभ्ने, प्रधानमन्त्री जेन्सले भने- विलयको कुनै कल्पना छैन
काठमाडौं । अमेरिकी राष्ट्रपति डोनाल्ड ट्रम्पले ग्रिनल्याण्डलाई अमेरिकाको हिस्सा बनाउन गरेको आव्हानको सोमबार अन्तर्राष्ट्रिय स्तरमा निन्दा भएको छ । भेनेजुएलामा वासिङ्टनको सैन्य हस्तक्षेपले खनिजको धनी आर्कटिक क्षेत्र ग्रिनल्यान्डबारे चिन्ता उत्पन्न भएपछि अन्तर्राष्ट्रिय समुदायको भनाई आएका हुन् । आइतबार राति एयर फोर्स वानमा पत्रकारसँग कुरा गर्दै राष्ट्रपति ट्रम्पले भने, ‘हामीलाई राष्ट्रिय सुरक्षाको दृष्टिकोणले ग्रिनल्याण्ड चाहिएको छ । डेनमार्कले सक्दैन ।’ ग्रीनल्याण्ड टापुमा दुर्लभ खनिजहरू छन् र ध्रुवीय हिउँ पग्लने र नयाँ ढुवानी मार्गहरू देखा पर्दा यो एक महत्त्वपूर्ण आकर्षण हुन सक्छ । ग्रिनल्याण्ड रुस र अमेरिकाबीच क्षेप्यास्त्र प्रहार गर्न सबैभन्दा छोटो मार्गमा पर्छ र वासिङ्टनले त्यहाँ पहिले नै सैन्य आधार बनाइसकेको छ । ट्रम्पले भने, ‘ग्रीनल्याण्डको बारेमा २० दिनमा कुरा गरौँ । हामी दुई महिनाभित्र ग्रीनल्याण्डको बिषयमा हाम्रो चिन्तालाई सम्बोधन गर्न लागि पर्नेछौँ ।’ ग्रिनल्याण्डका प्रधानमन्त्री जेन्स फ्रेडरिक निल्सनले अमेरिकी नेतालाई सङ्केत गर्दै भने, ‘अब अति नै भयो । अब कुनै दबाब छैन । थप आक्षेपहरू छैनन् । अब विलयको कुनै कल्पना छैन।’ उनले भने, ‘हामी वार्ताका लागि खुला छौँ । छलफलको लागि खुला छौँ । तर यो उचित च्यानल मार्फत र अन्तर्राष्ट्रिय कानुनको सम्मानका साथ हुनुपर्दछ ।’ डेनमार्कका प्रधानमन्त्री मेटे फ्रेडरिक्सनले पनि संयुक्त राज्य अमेरिकालाई सप्ताहन्तमा आफ्नो परम्परागत सहयोगीलाई धम्की नदिन आग्रह गरे । सोमबार धेरै युरोपेली देशसहित इयूले कोपेनहेगनको समर्थन गरेका छन् । अमेरिकी राष्ट्रपति ट्रम्पले काराकासमाथि आक्रमण गरेर र न्यूयोर्कमा हिरासतमा रहेका भेनेजुएलाका राष्ट्रपति निकोलस मदुरोलाई कब्जा गरेर युरोपेली नेताहरूलाई चकित पारेका छन् । ट्रम्पले अब अमेरिकाले भेनेजुएलालाई अनिश्चितकालका लागि सञ्चालन गर्ने र तेलको विशाल भण्डार प्रयोग गर्ने बताए । द एटलान्टिकसँगको टेलिफोन अन्तर्वार्तामा ट्रम्पले ग्रीनल्याण्डमा भेनेजुयलाको सैन्य अभियानको प्रभावबारे सोधिएको प्रश्नमा यो निर्णय अरूले गर्ने बताए । ‘उनीहरूले यसलाई आफैंले हेर्नुपर्छ। मलाई थाहा छैन । अमेरिकालाई आफ्नो सुरक्षाका लागि ग्रीनल्याण्ड चाहिएको छ,’ उनले भने । ट्रम्पले गत महिना रुस र चिनियाँ पानीजहाज सबै क्षेत्रमा रहेको दाबी गरेका थिए । चीनको विदेश मन्त्रालयले सोमबार यसको जवाफ दिँदै अमेरिकालाई ‘तथाकथित चिनियाँ धम्कीलाई व्यक्तिगत फाइदाको बहानाको रूपमा प्रयोग नगर्न’ आग्रह गरेको छ। यस विवादले युरोपभरिबाट धेरै भनाइहरू चीनको समर्थनमा आएका छन् । युरोपेली सङ्घको विदेश नीतिमामिला प्रवक्ता अनिता हिप्परले पत्रकारहरूसँग भने, ‘इयू आफ्ना सदस्यहरूको क्षेत्रीय अखण्डताको रक्षा गर्न प्रतिबद्ध छ।’ फिनल्याण्ड, स्वीडेन र नर्वेका नेताहरूको भनाइमा बेलायती प्रधानमन्त्री केइर स्टार्मरले ‘केवल ग्रीनल्याण्ड र डेनमार्क अधिराज्य’ ले मात्र क्षेत्रको भविष्य निर्धारण गर्न सक्ने बताए ।
माटो मिसिएको गिट्टी प्रयोग गरेपछि...
काठमाडौं । म्याग्दीको धवलागिरि गाउँपालिका-७ झिनडाँडामा माटो मिसिएको गिट्टी प्रयोग गरेर गरिएको ढलान जनप्रतिनिधिहरूले भत्काइदिएका छन् । दरवाङ-मुना-ढोरपाटन सडक योजनाअन्तर्गत झिनडाँडामा ह्युम पाइप अडाउन पर्खाल निर्माणका लागि जगमा पिसिसी ढलान गर्दा माटो मिसिएको गिट्टी प्रयोग भएको पाइएको हो । योजना अनुगमनका लागि सोमबार झिनडाँडा पुगेका गण्डकी प्रदेशसभा सदस्य रेशमबहादुर जुग्जाली (सुविन), धवलागिरि गाउँपालिकाका अध्यक्ष प्रेमप्रसाद पुन, उपाध्यक्ष रेशम पुन मगरले ढलान भत्काएर पुनर्निर्माण गर्न लगाएका हुन् । स्थानीयवासीले गुनासो गरेपछि पूर्वाधार विकास कार्यालयका प्राविधिक टोलीसहित पुग्दा उक्त ठाउँमा पिसिसी ढलानका क्रममा माटो मिसिएको गिट्टी प्रयोग भएको भेटिएपछि तत्कालै भत्काएर पुनर्निर्माण गर्न लगाएको प्रदेशसभा सदस्य जुग्जालीले बताए । ‘निर्माणस्थलमा तयार पारिएको मसला (सिमेन्ट, गिट्टी र बालुवा) को मिश्रणमा सडक ग्राभेल गर्न कुटेको बेस हालेको भेटिएपछि थुपारेको मसला फाल्न र गरेको ढलान भत्काउन लगाइएको हो,’ उनले भने, ‘निर्माण कम्पनीका कर्मचारीले कमजोरी स्वीकार गरेर आगामी दिनमा गल्ती नदोहोर्याउने प्रतिबद्धता जनाएका छन् । निगरानी र अनुगमनमा कडाइका लागि पूर्वाधार विकास कार्यालयका प्राविधिकहरूलाई निर्देशन दिएका छौँ ।’ स्थानीयवासी विश्वास कुमाईले पिसिसी ढलानमा प्रयोग भएको निर्माण सामग्रीको गुणस्तरमा शङ्का लागेपछि व्यवसायीलाई सचेत बनाउँदा अटेर गरेपछि भिडियो खिचेर सामाजिक सञ्जालमार्फत सार्वजनिक र जनप्रतिनिधिहरूलाई जानकारी गराएको बताए । मध्यपहाडी लोकमार्गको बागलुङ खण्डको विकल्प मानिएको बेनी-दरवाङ-धारापानी-ताकम-मुना-जलजला-ढोरपाटन सडकअन्तर्गत धारापानीदेखि झिनडाँडा खण्डमा ढलान, कालोपत्र र ग्राभेल गर्न २०८१ साल जेठ २० गते रामसागर बिके एस केबीएस धवलागिरि जेभीले १४ करोड ६१ लाख रुपैयाँमा पूर्वाधार विकास कार्यालयसँग ठेक्का सम्झौता गरेको थियो । निर्माण कम्पनीका कर्मचारी मेक थापामगरले मजदुरहरूले लापरबाही गर्दा ग्राभेलका लागि तयार पारेको बेस पिसिसीमा प्रयोग भएको स्वीकार गर्दै कमजोरी सुधार गरिएको र गुणस्तर तथा मापदण्डमा संवेदनशील हुने प्रतिबद्धता जनाए । पूर्वाधार विकास कार्यालयका सबइन्जिनियर घनश्याम रोकाले ह्युम पाइप राख्ने ठाउँमा बनाउने संरचना र निर्माण सामग्रीको गुणस्तरको विषयमा लिखित रूपमा स्पष्ट निर्देशन दिए पनि कमजोरी देखिनु ठेकेदारको कमजोरी भएको बताए । गण्डकी प्रदेश सरकारमार्फत सञ्चालित यस आयोजना म्याग्दीको रणनीतिक महत्वको र प्राथमिकता प्राप्त हो । हालसम्म ७१ प्रतिशत भौतिक प्रगति भएको यस योजनाको ताकम खण्डमा करिब ६ सय मिटर प्रिमिक्स कालोपत्रको तयारी भएको छ । ठेकेदारले संरचना निर्माण सकेर बेस र सबबेस बिछ्याएको छ । ६ किलोमिटर दूरीमा सडकलाई फराकिलो बनाउने, नाली र पर्खाल निर्माणको अन्तिम चरणमा पुगेको छ । धारापानीमा २०६६ सालमा सडक पुगेको थियो । यो सडक धवलागिरि गाउँपालिकाका पाँचवटा वडाका बासिन्दाले प्रयोग गर्ने प्रमुख मार्ग हो । ८ मिटरका दरले सडक फराकिलो पार्ने, नाली र टेवा पर्खाल निर्माण अन्तिम चरणमा पुुगेको सडक चालु आर्थिक वर्षभित्रै सम्पन्न गरिने निर्माण कम्पनीले जनाएको छ । यो सडक यसअघि चारदेखि पाँच मिटर फराकिलो थियो । यो सडक आयोजनाअन्तर्गत दरवाङ-धारापानी (७ किलोमिटर) र मच्छिम-मुना (४ किलोमिटर) अक्सफाल्ट प्रविधिको कालोपत्र र ढलान गर्न ५२ करोड ८० लाख ५३ हजार रुपैयाँमा ठेक्का सम्झौता भएको अर्को योजना पनि निर्माण सुरु भएको छ । गत असारमा सम्झौता भएको यस योजनाको ठेक्का अवधि २७ महिनाको छ । म्याग्दीको मङ्गला मालिका, धवलागिरि गाउँपालिकाका साथै बागलुङको ढोरपाटन र पूर्वी रुकुमका बासिन्दालाई पोखरा-काठमाडौं आवतजावत गर्न ७० किलोमिटर छोटो पर्ने भएकाले यसलाई रणनीतिक महत्वको मानिएको छ । धवलागिरिको केन्द्र मुनादेखि खोरिया, मरेनी जलजला हुँदै ढोरपाटन हालै सडक सञ्जालमा जोडिएको छ ।
कोशीमा स्टार्टअप उद्यममा साढे २ अर्ब लगानी, ३८.७ प्रतिशत हिस्सा ऋण
काठमाडौं । स्टार्टअप उद्यममा न्यूनतम २१ वर्षदेखि अधिकतम ७० वर्षका उद्यमीहरूको संलग्नता रहेको नेपाल राष्ट्र बैंकले गरेको एक अध्ययनमा उल्लेख गरिएको छ । केन्द्रीय बैंकले कोशी प्रदेशमा गरेको स्टार्टअप उद्यमको प्रवृत्तिसम्बन्धी विशेष अध्ययन प्रतिवेदन अनुसार यस क्षेत्रमा कुल लगानी २ अर्ब ५६ करोड रुपैयाँ रहेको छ । त्यसमा ३८.७ प्रतिशत हिस्सा ऋण रहेको छ भने ६१.३ प्रतिशत हिस्सा स्वपुँजी रहेको छ । अध्ययन अनुसार २१ देखि ३५ वर्ष उमेर समूहका ३९.३ प्रतिशत, ३६ देखि ५० वर्ष उमेर समूहका ४४.४ प्रतिशत र ५० देखि ७० वर्ष उमेर समूहका १६.२ प्रतिशत उद्यमी रहेका छन् । त्यस्तै, २१ देखि ३५ वर्ष उमेर समूहका उद्यमीमध्ये सबैभन्दा बढी सूचना प्रविधि क्षेत्रमा ७३.३ प्रतिशत र सबैभन्दा कम कृषि क्षेत्रमा २१.२ प्रतिशत उद्यमी संलग्न रहेका अध्ययनमा उल्लेख छ । युवापुस्ताले डिजिटल र प्रविधिमा केन्द्रित उद्यममा बढी रुचि राखेका देखिन्छ भने ३६ देखि ५० वर्ष उमेर समूहका उद्यमी सबैभन्दा बढी कृषि क्षेत्रमा संलग्न रहेका देखिन्छ । सबैभन्दा कम सूचना प्रविधि क्षेत्रमा २६.७ प्रतिशत युवा आवद्ध रहेका छन् । साथै ५० देख ७० वर्ष उमेर समूहका सबैभन्दा बढी २७.३ प्रतिशत पर्यटन क्षेत्रमा रहेको देखिन्छ भने सूचना प्रविधि क्षेत्रमा यो उमेर समूहको कुनै पनि संलग्नता नरहेको अध्ययनमा उल्लेख छ । औैद्योगिक व्यावसाय विकास प्रतिष्ठानमा स्टार्टअप कर्जाका लागि आवेदन दर्ता गरेका र ‘सर्टलिष्ट’ भएका कोशी प्रदेशका उद्यमहरूको सङ्ख्यालाई आधार मानी १६० वटा स्टार्टअप उद्यमबाट तथ्याङ्क सङ्कलन गरिएको केन्द्रीय बैंकले जनाएको छ । अध्ययनमा सहभागी १६० उद्यममा कृषि तथा वनजन्य, उत्पादनमूलक, सेवामूलक, पर्यटन र सूचना प्रविधि गरी पाँच व्यावसायिक क्षेत्र समावेश छन् । त्यसमा कृषि तथा वनजन्य ४१.३ प्रतिशत, उत्पादनमूलक १८.१ प्रतिशत, सेवामूलक १७.५ प्रतिशत, पर्यटन १३.८ प्रतिशत र सूचना प्रविधि क्षेत्रमा ९.४ प्रतिशत उद्यम छन् ।
अमेरिकी एक डलरको मूल्य १४४.७५ रुपैयाँ, युरोको १६९.१० रुपैयाँ
काठमाडौं । नेपाल राष्ट्र बैंकले आजका लागि विदेशी मुद्राको विनिमयदर निर्धारण गरेको छ । निर्धारित दरअनुसार अमेरिकी डलर एकको खरिददर १४४ रुपैयाँ १५ पैसा र बिक्रीदर १४४ रुपैयाँ ७५ पैसा तोकिएको छ । युरोपियन युरो एकको खरिददर १६८ रुपैयाँ ४० पैसा र बिक्रीदर १६९ रुपैयाँ १० पैसा, युके पाउण्ड स्ट्रलिङ एकको खरिददर १९४ रुपैयाँ ७ पैसा र बिक्रीदर १९४ रुपैयाँ ८८ पैसा, स्वीस फ्रयाङ्क एकको खरिददर १८१ रुपैयाँ ३० पैसा र बिक्रीदर १८२ रुपैयाँ ५ पैसा कायम गरिएको छ । अष्ट्रेलियन डलर एकको खरिददर ९६ रुपैयाँ ३६ पैसा र बिक्रीदर ९६ रुपैयाँ ७७ पैसा, क्यानेडियन डलर एकको खरिददर १०४ रुपैयाँ ७० पैसा र बिक्रीदर १०५ रुपैयाँ १३ पैसा, सिङ्गापुर डलर एकको खरिददर १११ रुपैयाँ ९९ पैसा र बिक्रीदर ११२ रुपैयाँ ४६ पैसा तोकिएको छ । जापानी येन १० को खरिददर नौ रुपैयाँ २० पैसा र बिक्रीदर नौ रुपैयाँ २४ पैसा, चिनियाँ युआन एकको खरिददर २० रुपैयाँ ६४ पैसा र बिक्रीदर २० रुपैयाँ ७३ पैसा, साउदी अरेबियन रियाल एकको खरिददर ३८ रुपैयाँ ४३ पैसा र बिक्रीदर ३८ रुपैयाँ ५९ पैसा, कतारी रियाल एकको खरिददर ३९ रुपैयाँ ५५ पैसा र बिक्रीदर ३९ रुपैयाँ ७१ पैसा कायम भएको छ । केन्द्रीय बैंकका अनुसार थाई भाट एकको खरिददर ४ रुपैयाँ ६० पैसा र बिक्रीदर ४ रुपैयाँ ६२ पैसा, युएई दिराम एकको खरिददर ३९ रुपैयाँ २५ पैसा र बिक्रीदर ३९ रुपैयाँ ४१ पैसा, मलेसियन रिङ्गेट एकको खरिददर ३५ रुपैयाँ ४० पैसा र बिक्रीदर ३५ रुपैयाँ ५४ पैसा, साउथ कोरियन वन १०० को खरिददर ९ रुपैयाँ ९६ पैसा र बिक्रीदर १० रुपैयाँ, स्वीडिस क्रोनर एकको खरिददर १५ रुपैयाँ ६३ पैसा र बिक्रीदर १५ रुपैयाँ ६९ पैसा र डेनिस क्रोनर एकको खरिददर २२ रुपैयाँ ५४ पैसा र बिक्रीदर २२ रुपैयाँ ६४ पैसा तोकिएको छ । राष्ट्र बैंकले हङ्कङ डलर एकको खरिददर १८ रुपैयाँ ५१ पैसा र बिक्रीदर १८ रुपैयाँ ५९ पैसा, कुवेती दिनार एकको खरिददर ४६९ रुपैयाँ ६ पैसा र बिक्रीदर ४७१ रुपैयाँ १ पैसा, बहराइन दिनार एकको खरिददर ३८२ रुपैयाँ ३९ पैसा र बिक्रीदर ३८३ रुपैयाँ ९८ पैसा, ओमनी रियाल एकको खरिददर ३७४ रुपैयाँ ४३ पैसा र बिक्रीदर ३७५ रुपैयाँ ९८ पैसा रहेको छ ।
विकास नायक कार्यक्रमलाई निरन्तरता दिन माग, ‘सकारात्मक कामको कदरले राष्ट्र निर्माणमा ऊर्जा थप्छ’
काठमाडौं । देशको विकासमा विभिन्न क्षेत्रबाट महत्वपूर्ण योगदान पुर्याउने १० जना विकास नायकहरू सम्मानित भएका छन् । विकासन्युजद्वारा आयोजित कार्यक्रममा सहभागी विकास नायक एवं अन्य व्यक्तित्वले यस्ता पहलले राष्ट्र निर्माणमा थप ऊर्जा प्रदान गर्ने बताएका छन् । उनीहरूले विकास नायक कार्यक्रमलाई निरन्तरता दिइराख्नुपर्नेमा समेत जोड दिएका छन् । फर्स्ट च्वाइस फुड्स प्रालिका अध्यक्ष कृष्णप्रसाद पौडेलले कृषि क्षेत्रलाई अवार्डसँग जोड्ने प्रदर्शन असाध्यै राम्रो रहेको बताए । उनले भने, ‘हामी माटोमा रमाउने किसान हौं । कागजमा होइन, माटोमा रमाउने हो । हामी किसानसँगै रमाउँछौं । भविष्यमा पनि किसानलाई जोड्नुपर्छ र यस्ता कार्यक्रमहरूलाई निरन्तरता दिनुपर्छ ।’ कृषि क्षेत्रमा आधुनिकीकरण, यान्त्रिकीकरण, व्यवसायीकरण उत्पादनको बिक्री प्रबन्ध गरी कृषकको जीवनस्तर सुधारमा टेवा दिएबापत अध्यक्ष पौडेललाई विकास नायक, २०८२ बाट सम्मानित गरिएको थियो । यसैगरी, सानीमा ग्रुपका सञ्चालक जीवा लामिछानेले नेपालको विकासमा विभिन्न क्षेत्रबाट योगदान पुर्याउने अग्रज तथा दिग्गजहरूलाई सम्मान गरिएकोमा खुसी व्यक्त गरे । उनले यसलाई ठूलो सम्मान र थपिएको जिम्मेवारीका रूपमा लिएको बताए । लामिछाने भने, ‘विभिन्न क्षेत्रमा उहाँहरूले गर्नुभएको योगदान एकदमै सराहनीय छ । इमान्दारीपूर्वक र निष्ठापूर्वक आबद्ध भएर ठूलो योगदान गर्नुभएको छ ।’ लामिछानेलाई श्रृजनशील र निष्ठापूर्ण व्यापार व्यवसाय गरी आर्थिक सम्बृद्धिमा योगदान गरेबापत विकास नायक, २०८२ बाट सम्मानित गरिएको थियो । यस्तै, नेपाल राष्ट्र बैंकका डेपुटी गर्भनर बमबहादुर मिश्रले विकासन्युजले देशको विकासलाई उजागर गर्ने उल्लेखनीय र उदाहरणीय काम गरेको प्रशंसा गरे । उनले कार्यक्रममार्फत विकास प्रक्रियामा सक्रिय विभिन्न १० क्षेत्रका अब्बल व्यक्तित्वहरूलाई ‘विकास नायक’का रूपमा सम्मान गरिएको उल्लेख गर्दै यसले सम्मानित व्यक्तिहरूलाई थप हौसला र प्रेरणा प्रदान गर्ने बताए । डेपुटी गर्भनर मिश्रले पछिल्लो समय समाजमा नकारात्मक समाचारहरूको प्रभाव बढिरहेको सन्दर्भमा यस्तो सकारात्मक पहल अत्यन्तै महत्वपूर्ण भएको उल्लेख गरे । उनले भने, ‘नकारात्मकता बढी फैलिरहेको वर्तमान अवस्थामा यस किसिमका कार्यक्रमहरूले सकारात्मक ऊर्जा प्रवाह गर्छन् । सम्मानित नायकहरूलाई अझ सक्रिय र जिम्मेवार बन्न प्रेरित गर्ने मात्र होइन, समाजमा पनि आशा र प्रेरणाको सन्देश फैलाउँछन् ।’ यस्ता कार्यक्रमहरूले देश विकासमा योगदान पु¥याएका व्यक्तित्वहरूको भूमिकालाई उजागर गर्दै समग्र राष्ट्रिय विकास प्रक्रियामा महत्वपूर्ण टेवा पुग्ने उनको दाबी छ । यस्तै, नबिल बैंकका प्रमुख कार्यकारी अधिकृत (सीईओ) मनोज ज्ञवालीले देशमा सकारात्मक काम गर्ने राष्ट्रिय अर्थतन्त्रलाई सहयोग गर्ने, समृद्धिमा योगदान दिने र रोजगारी सिर्जना गर्ने व्यक्तिहरूलाई प्रशंसा र पुरस्कृत गर्ने चलनले मानिसहरूलाई थप उत्साहित गर्ने बताए । ज्ञवालीले भने, ‘अहिले हरेक कुरामा नकारात्मकता मात्र देखिरहेको बेला एउटा अग्रणी सञ्चारमाध्यमले असल काम गर्ने मानिसहरूलाई सराहना गर्नुपर्छ भनेर विकास नायक घोषणा गर्यो, यो अत्यन्त सराहनीय छ ।’ उनले विकास नायकको भूमिका आफ्नो हरेक क्षेत्रबाट विकासलाई नेतृत्व गर्न सक्ने अब्बल र अगाडि रहेर अरूलाई बाटो देखाउने हुनुपर्नेमा जोड दिए । नबिल बैंकका अध्यक्ष तथा सीबीएफएनका अध्यक्ष उपेन्द्र पौडेलले यो पहिलो कार्यक्रम भए पनि परिपूर्णताको स्तर राम्रो रहेको बताए । पौडेलले यसको निरन्तरताको अपेक्षा गर्दै यो सम्मानले थप जिम्मेवारी बढाएको र भोलि कसैले पनि किन यिनलाई मान्यता दिइयो त भन्ने वातावरण नहोस् भन्ने कामना गरे । वित्तीय सेवामार्फत आर्थिक विकासमा विशिष्ट योगदान गरेबापत नबिल बैंकलाई सम्मानित भएको थियो । नबिल बैंकले विगत चार दशकको अवधिमा वित्तीय समावेशीकरण, नवप्रवर्तन, डिजिटल बैंकिङका साथै प्राथमिक क्षेत्रमा दीर्घकालीन लगानीमार्फत देशको सामाजिक तथा आर्थिक विकासमा महत्वपूर्ण योगदान गरेको छ । यस्तै, नेपाली उद्योग परिसंघ (सीएनआइ) का पूर्वअध्यक्ष हरिभक्त शर्माले विकास टोलीले असाध्यै राम्रो र रचनात्मक कामको थालनी गरेको बताए । उनले भने, ‘असल काम गर्ने मान्छेहरूलाई यो निकै ठूलो प्रेरणा हो । यस्ता खालका गतिविधिहरू भइरहनुपर्छ ।’ उनले यस्ता कार्यक्रमको निरन्तरताले नेपालको विकासमा महत्वपूर्ण योगदान पुग्ने विश्वास व्यक्त गरे । अभिनेत्री सुरक्षा पन्तले कार्यक्रमलाई एकदम व्यवस्थित र राम्रो उद्देश्य लिएर बनेको बताइन् । उनले भनिन्, ‘आफ्नो क्षेत्रमा लगनशील, निष्ठावान, इमान्दार र पूर्ण रूपमा इमानदारीसाथ काम गर्नु नै सायद त्योभन्दा ठूलो योगदान अरू केही हुनै सक्दैन ।’ उनी कला तथा मनोरञ्जन क्षेत्रबाट देशको प्रतिष्ठा बढाए बापत विकास नायक, २०८२ बाट सम्मानित भएकी हुन् । यस्तै, पोल्ट्री व्यवसायी गुणचन्द्र विष्टले कार्यक्रमको उद्देश्य राम्रो भएको औंल्याए । उनले अवार्ड दिने चलन भए पनि त्यसको कदर र पछि कामको खोजी गर्ने चलन नरहेकोमा भने असन्तुष्टि जनाए । ‘अवार्ड दिनेले पनि सम्मानित व्यक्तिले के गरिरहेको छ भन्नेबारे बहस चलाइरहनुपर्थ्यो,’ उनले भने । विज्ञापन व्यवसायी शम्भु अधिकारीले विकासन्युजले आयोजना गरेको विकास नायकको प्रयास प्रशंसनीय र सराहनीय रहेको बताए । राज्यले नचिनेका विकास नायकहरू विकासन्युजले खोजेर चिनाएको दाबी गरे । विकासका नायकहरूलाई सत्तमार्गसँगै अगाडि बढ्ने हौसला र उत्सुकता दिएको बताए । यस्तै, गोल्डस्टार सुजकी कार्यकारी निर्देशक विदुषी राणाले यस कार्यक्रमले समाजमा केही गरौं भन्नेहरूका लागि प्रेरणा जगाएको बताइन् । विकासन्युजले साँच्चिकै विकास नायकहरू सम्मानित गरेको उनको भनाइ छ । उनले भनिन्,‘ विकासन्युजले जुन व्यक्तिहरूलाई सम्मानित गरेको छ, ती व्यक्तिहरूले समाजलाई धेरै योगदान दिएका छन् । आगामी दिनहरूमा पनि हामीले यस्तै विकास नायकहरू चिन्न पाइयोस् ।’ टेक्सास इन्टरनेसल कलेजका बिजनेस डाइरेक्टर नारायण पोखरेलले देशमा खडेरी परेका बेला यो कार्यक्रमले आशा जगाएको बताए । विकासका नायक तथा विकास बहस देख्दा नयाँ आयाम देखाएको महसुस भएको दाबी उनको छ । उनले विकास नायकहरुले विभिन्न क्षेत्रहरूमा के योगदान पुर्याएको भन्दै प्रशंसा गरे । विकास नायक छनोट समितिका संयोजक कृष्णहरि बास्कोटाले मुलुकमा राम्रो काम गर्ने मानिस र संस्थाको कमी नभएको र उनीहरूका राम्रा कुराहरू प्रचारप्रसार गर्दा अरूलाई पनि प्रेरणा मिल्ने बताए । उनले भने, ‘डाक्टरले बिरामीको मन जित्ने, कलाकारले परिवर्तनकारी भनाइ पस्किने र व्यवसायीले उपभोक्ताको पक्षमा काम गर्ने भावना राख्नुपर्छ, ’ उनले भने । विकास नायकहरूले मुलुकलाई विश्वमै परिचित गराउने गरी योगदान गर्नुपर्ने बताउँदै कार्यक्रमलाई विशिष्टीकृत कार्यक्रममध्ये उत्कृष्टमध्ये उत्कृष्ट कार्यक्रमको संज्ञा दिए । उनले विकासन्युजको यो पहलले देशमा असल काम गर्ने व्यक्तिहरूलाई प्रोत्साहन दिने र विकासको गतिलाई तीव्रता दिने अपेक्षा गरिएको बताउँदै पारदर्शिता र निरन्तरतामा भने ध्यान दिनुपर्ने बताए ।
महालक्ष्मी विकास बैंकको २४ औं वार्षिक साधारण सभा सम्पन्न
काठमाडौं । महालक्ष्मी विकास बैंकको २४ औं वार्षिक साधारण सभा बैंक सोमबार (आज) सम्पन्न भएको छ । सभामा २०८२ साल आषाढ मसान्तको वासलात तथा आर्थिक वर्ष २०८१/०८२ को नाफा नोक्सान हिसाव एवं सोही अवधिको नगद प्रवाह विवरण, नाफा/नोक्सान बाँँफाँड हिसाब, ईक्विटीमा भएको परिवर्तन लगायत वार्षिक आर्थिक विवरणसँग सम्बद्ध वित्तीय विवरणहरू छलफल गरी स्वीकृत भएका छन् । यसैगरी, सभामार्फत सञ्चालक समितिले प्रस्ताव गरे बमोजिम १०.३७ प्रतिशत लाभाशं वितरण गर्ने प्रस्तावसमेत अनुमोदन भएको छ । यस अन्तर्गत आव २०८१/०८२ को वितरणयोग्य मुनाफा रकमबाट हाल कायम रहेको चुक्ता पुँजीको ५.३७ प्रतिशत नगद लाभांश (लाभांशमा लाग्ने कर प्रयोजनार्थ समेत) तथा ५ प्रतिशत बोनस सेयर वितरण गर्ने प्रस्ताव पारित भएको हो । अघिल्लो आर्थिक वर्षमा बैंकले ७ प्रतिशत लाभांश वितरण गरेको थियो । आव २०८०/८१ को तुलनामा आर्थिक वर्ष २०८१/८२ को अन्त्यमा बैंकका समग्र वित्तीय परिसूचकहरूमा सकरात्मक परिवर्तन देखिएको छ । आर्थिक वर्ष २०८०/८१ को अन्त्यमा आधार दर ९.३९ प्रतिशत रहेकोमा आज २०८१/८२ को अन्त्यमा ६.९४ प्रतिशत रहेको छ । साथै पुँजीकोष पर्याप्यता अनुपातमा उल्लेख्य सुधार भई १४.९३ प्रतिशत बाट वृद्धि भई १७.०६ प्रतिशत पुगेको छ । आव २०८१/८२ को अन्त्यमा बैंकको निक्षेप रु. ५६.२२ अर्ब रहेको छ भने कर्जा तथा सापटी रु.४७.२१ अर्ब रहेको छ । साथै यस बैंकको नियमावली बमोजिम संस्थापक समूह (क) बाट ३ जना र सर्वसाधारण समूह (ख) बाट ३ जना गरी जम्मा ६ जना सञ्चालक निर्वाचन गर्ने साधारण सभामा प्रस्ताव भए बमोजिम संस्थापक सेयरधनी समुह (क) बाट ३ जना क्रमशः राजेश उपाध्याय, सञ्जय गिरि र ग्रोइङ्ग प्रालिको तर्फबाट सागर मल्ल निर्वाचित भएका छन् भने सर्वसाधारण सेयरधनी समूह (ख) बाट ३ जना क्रमशः श्यामसुन्दर रुंगटा, राहुल अग्रवाल र शालिकराम अर्याल निर्वाचित भएका छन् । नवनिर्वाचित सञ्चालक समितिको आजै बसेको पहिलो बैठकबाट राजेश उपाध्यायलाई सञ्चालक समितिको अध्यक्षको रूपमा चयन गरेको छ । सभाका अध्यक्ष उपाध्यायले सेयरधनीहरूबाट प्राप्त सल्लाह सुझावलाई आत्मसाथ गर्दै बैंकले ग्राहकहरूको सन्तुष्टि एवं लगानीको उचित प्रतिफल प्रदान गर्न बैंकका क्रियाकलापहरूलाई थप परिमार्जन तथा विशिष्टीकरण गर्दै अझ बढी सक्षमताका साथ गुणस्तरीय वित्तीय सेवा प्रदान गर्न प्रतिवद्धतासमेत व्यक्त गरे ।
जेएफएलले थैबमा सञ्चालनमा ल्यायो ‘माटो’ को आठौं स्टोर, किसान र महिला उद्यमीलाई प्राथमिकता
काठमाडौं । जनता एग्रो एन्ड फरेस्ट्री लिमिटेड (जेएफएल) ले आफ्नो उपभोक्ता ब्रान्ड ‘माटो’ को आठौं स्टोर तथा गोदाम ललितपुरको थैबमा स्थापना गरेको छ । जेएफएलले सोमबार प्रेस विज्ञप्ति जारी गर्दै किसानहरूका उत्पादनलाई प्लेटफर्म उपलब्ध गराउने प्रतिवद्धता व्यक्त गरेको छ । १५ हजार वर्गमिटर क्षेत्रमा फैलिएको स्टोर करिब ५० लाख रुपैयाँमा सञ्चालनमा आएको हो । यसले प्रशोधन केन्द्रको रूपमा समेत कार्य गर्ने र त्यहाँ आधुनिक मेसिनरी तथा प्रणालीहरू जडान गरिएका जेएफएलले जनाएको छ । ‘माटोले रासायनिक कीटनाशक, मल तथा संरक्षक पदार्थको प्रयोग नगरी उत्पादन गरिएका स्थानीय वस्तुहरूको प्रवर्द्धन गर्दै आएको छ, जसले उपभोक्तालाई शुद्धता र ताजापनले चिनिएका उत्पादनहरू प्रदान गर्दछ,’ जेएफएलका अध्यक्ष पवनकुमार गोल्याणद्वारा जारी विज्ञप्तिमा भनिएको छ, ‘महिला उद्यमीहरूलाई प्राथमिकता दिइने भएकाले समावेशी उद्यमशीलता र दीर्घकालीन दिगोपनलाई प्रोत्साहन गर्नेछ, यस प्लेटफर्ममार्फत महिला उद्यमीहरूलाई समेत खरिद प्रत्याभूति प्रदान गर्नेछ ।’ यस सुविधाले साना तथा मझौला उद्यमका लागि कार्यस्थल उपलब्ध गराउने भूमिकासमेत निर्वाह गर्ने जेएफलले जनाएको छ । जसको कारण सम्पूर्ण मूल्य श्रृंखलामा कार्यक्षमता, प्रभावकारिता, गुणस्तर र पहुँच अभिवृद्धि गने उसको भनाइ छ । जेएफएल नेपालको कृषि तथा वन क्षेत्रलाई रूपान्तरण र सशक्त बनाउने दीर्घकालीन प्रतिबद्धता बोकेको सार्वजनिक कम्पनी हो । राष्ट्रको हितलाई केन्द्रमा राखी दिगो विकास र समृद्धिका मूल्यहरूमा दृढ रूपमा आधारित रही कम्पनीले आफ्नो बलियो कृषि आधारमार्फत दीर्घकालीन सकारात्मक प्रभाव सिर्जना गर्दै आएको छ। कम्पनीले उच्च मूल्यका कृषि उत्पादनहरू तथा जैविक कृषि अभ्यासमा आधारित पूर्वाधार विकासमा विशेष ध्यान दिँदै आएको विज्ञप्तिमा उल्लेख छ । ‘जेएफएलको मूल सिद्धान्त तथा सबैभन्दा पुरानो प्रतिबद्धता किसानहरूको उत्थान गर्नु र उनीहरूको उत्पादनलाई खरिद प्रत्याभूति सहित बजारसम्म पु¥याउनु हो,’ विज्ञप्तिमा भनिएको छ, ‘सशक्त आपूर्ति श्रृंखला निर्माणमार्फत कम्पनीले अन्तर्राष्ट्रिय विकास संस्थाहरू, विभिन्न निजी क्षेत्रका सरोकारवालाहरू तथा अनुसन्धान संस्थाहरूसँग सहकार्य गर्दै देशभरका किसानहरूलाई सशक्त बनाउने लक्ष्य लिएको छ ।’ कम्पनीका सम्पूर्ण लगानीहरू दिगो विकास लक्ष्यहरूमा सकारात्मक प्रभाव पार्ने दिशामा केन्द्रित रहेका जेएफलले जनाएको छ ।
कांग्रेसका पाँच प्रदेश सभापतिहरू भन्छन्– अब नियमित महाधिवेशनमै केन्द्रित हौं
काठमाडौं । नेपाली कांग्रेसका पाँच प्रदेश सभापतिहरूले विशेष महाधिवेशनको औचित्य समाप्त भएको निष्कर्ष निकाल्दै पार्टीका सम्पूर्ण नेता कार्यकर्तालाई नियमित महाधिवेशनको तयारीमा केन्द्रित हुन आग्रह गरेका छन् । उनीहरूले कांग्रेस केन्द्रीय कार्यसमितिले मंसिर १५ गतेको बैठकबाट पार्टीको १५औं महाधिवेशन पुस १६ गतेदेखि सुरु गरी पुस २६, २७ र २८ गते सम्पन्न गर्ने तालिका तय गरे पनि तालिका अनुसार काम हुन नसकेको दाबी गरेका छन् । पाँच सभापतिहरूले एक विज्ञप्ति जारी गदै भनेका छन्, ‘महाधिवेशन पूर्व अनिवार्य रूपमा सम्पन्न गर्नुपर्ने क्रियाशील सदस्यता नवीकरण तथा नयाँ सदस्यता वितरणको कार्य तोकिएको समयभित्र पूरा हुन नसकेपछि निर्धारित कार्यतालिकाअनुसार महाधिवेशन सम्पन्न गर्न नसकिएको हो ।’ विशेष महाधिवेशनको औचित्य सकिएको दाबी गर्दै ती सभापतिहरूले तोकिएकै समयमा महाधिवेशन गर्न सक्रिय रहन पार्टी सदस्यहरूलाई आग्रह गरेका छन् । उनीहरूले भनेका छन्, ‘अब एकताबद्ध हुँदै फागुन २१ को निर्वाचनमा दलका नेताहरूलाई जिताउन लागौं ।’
