नेपाल धितोपत्र बोर्डको कार्यालयमा लगानीकर्ताले लगाए ताला, ३ जना थुनिए
काठमाडौँ । नेपाल धितोपत्र बोर्डको कार्यालयमा शेयर लगानीकर्ता दबाब समूहले आइतबार ताला लगाएका छन् । बिहान ९ बजेदेखि नै कार्यालयमा तालाबन्दी गरिएको छ । शेयर बजारको विकासमा बोर्ड बाधक बनेको लगानीकर्ता बताएका छन् । गत मंसिरमा पूँजी बजारसम्बन्धी माग राखेर लगानीकर्ताहरु अनसन बसेका थिए । त्यतिबेला सरकारले लगानीकर्ताका माग सम्बोधन गर्न कार्यदल गठन गरेको र कार्यदलले लगानीकर्ताका माग पूरा गर्न भन्दै ५८ बुँदे सुझाब दिएको थियो, तर सो ५८ बुँदा कार्यान्वयन नगरेको भन्दै लगानीकर्ता आन्दोलित भएका हुन् । आइतबार बिहानबाटै गरिएको तालाबन्दीका कारण ३ जना कार्यालय भित्र थुनिएका छन् भने बाँकी कर्मचारी कार्यालय प्रवेश गर्न पाएका छैनन् । शिक्षा तथा तालिम शाखामा कार्यरत राजुबहादुर जीसीसहित २ जना सफाई कर्मचारीहरु थुनिएको बुझिएको छ ।
‘आइएमई पे’ बाट इपीएस कोरियन भाषा परीक्षा शूल्क भुक्तानी गर्न सकिने
काठमाडौं । वैदेशिक रोजगारीका लागि कोरिया जान इच्छुक नेपाली नागरिकले भाषा परीक्षाको आवेदन शूल्क ‘ आइएमई पे’ मार्फत भुक्तान गर्न सकिने भएको छ । चैत ८ गतेदेखि १७ गते सम्म सेवाग्राहीहरूको पायक पर्ने स्थानमा रहेका ‘ आइएमई पे’ का सम्पूर्ण एजेन्ट पार्टनरका अतिरिक्त स्मार्ट फोनवाहक सेवाग्राहीहरू आफैंले ‘आइएमई पे’ डाउनलोड गरि सिधैं इ.पी.एस कोरिया टोपिक परीक्षा शूल्क भुक्तान गर्न सक्ने छन् । ‘आइएमई पे’ का सम्पूर्ण एजेण्ट पार्टनरहरूले सेवाग्राहीहरूको फारम भर्ने काममा सहजीकरण गर्ने छन् । परीक्षा शूल्क भुक्तानीका लागि परीक्षार्थीहरूको पुरा नाम, पासपोर्ट र मोबाइल नम्बर स्पष्टसँग उल्लेख गर्नुपर्नेछ । परीक्षा शूल्क चौबिस (२४) अमेरिकन डलर दस्तुर लाग्नेछ । उक्त सम्बन्धित दिनका लागि निर्धारण गरेको विनिमय दरमा हुनेछ । परीक्षा शूल्क भुक्तानी सफल भएपछि परीक्षार्थीहरूले टिपाएको मोबाइल नम्बरमा एसएमएस मार्फत भौचर नम्बर प्राप्त हुनेछ र उक्त भौचर नम्बर परीक्षा फारम भर्ने बेलामा प्रयोग गर्नु पर्नेछ ।
६.८३ अंकले घट्यो नेप्से, १४ करोडको कारोबार
काठमाडौ । साताको तेस्रो दिन मंगलवार नेपाल स्टक एक्सचेन्ज (नेप्से) परिसूचकमा गिरावट आएको छ । नेप्से परिसूचक ६.८३ अंकले घटेको हो । ०.५९ प्रतिशतले घट्दा नेप्से परिसूचक ११४७.१५ बिन्दुमा पुगेको हो । मंगलबार सेयर बजारमा १५८ कम्पनीले कारोबार गरेका छन् । ५ लाख ३४ हजार ९ सय ९५ कित्ता सेयर खरिद बिक्री हुँदा १४ करोड ८६ लाख ३३ हजार २ सय ४५ रुपैयाँको कारोबार भएको छ । नेप्सेका सबै सूचक आज राता देखिएका छन् । बैक समूह ६.७५, ट्रेडिङ २.८७, विकास बैक ९.९८, जलविद्युत ७.८५, वित्त कम्पनी ३.२७, निर्जीवन बीमा २२.३९, उत्पादनमूलक समूह ४.७४ , अन्य समूह ४.४३, माइक्रोफाइनान्स ७.४३, जीवन बीमा २०.२३ अंकले घट्न पुगेका छन् । आशा लघुवित्त वित्तीय संस्थाका लगानीकर्ताले ९.९५ प्रतिशतले सबैभन्दा धेरै नाफा कमाएका छन् । यस्तै, मितेरी डेभलपमेण्ट बैकका लगानीकर्ताले ४.८९ प्रतिशतले सबैभन्दा धेरै घाटा व्यहोरेका छन् ।
