कोरोनाको कारण विदेशमा ज्यान गुमाएका ७९ परिवारलाई आइएमई पेको साढे ३९ लाख सहयोग
काठमाडौं । विदेशमा कोरोना भाइरसको संक्रमणमा परेर मृत्यु भएका परिवारलाई आइएमईपेले ३९ लाख ५० हजार रुपैयाँ सहयोग गरेको छ । आइएमईपेले शुक्रबार एक कार्यक्रमको आयोजना गरी काेराेना भाइरसको कारण मृत्यु भएका परिवारलाई जनही ५० हजार रुपैयाँको चेक हस्तान्तरण गरेको हो । कोरोना भाइरसको कारण विदेशमा मृत्यु भएका श्रमिकहरुका आफन्तहरुलाई सहयोग गर्ने उद्धेश्यले आइएमई भरोशा कोषको रकम हस्तान्तरण गरेकाे बताएकाे हाे । आइएमईपेले ७९ जना पीडित परिवारलाई जनही ५० हजार रुपैयाँको चेक हस्तान्तरण गरेको हो । शुक्रबार राजधानीमा आयोजित कार्यक्रममा आइएमई ग्रुपका अध्यक्ष तथा नेपाल उद्योग वाणिज्य महासंघका वरिष्ठ उपाध्यक्ष चन्द्र ढकालले पीडितहरुलाई चेक हस्तान्तरण गरेका हुन् । उनले चेक हस्तान्तरण कार्यक्रममा बोल्दै पीडित परिवारको घाउमा मल्हम लगाउने उद्धेश्यले सानै भएपनि सो रकम सहयोग गरेको बताए । ‘म आफै पनि कोरोना संक्रमित भएँ, कोरोना भाइरस संक्रमित र संक्रमितका परिवारलाई हुने पीडा मैले आफैले महसुस गरेको छु, हामीले हाम्रो संस्थाको संस्थागत सामाजिक उत्तरदायित्व अन्तर्गत यो रकम सहयोग गरेका छौं, यसले थोरै भएपनि पीडितको घाउमा मल्हम लाग्छ,’ उनले भने । यस्तै, कार्यक्रममा आइएमईपेका प्रवन्ध निर्देशक हेमराज ढकालले निजी क्षेत्रबाट स्थापित यस कोषले प्रभावित परिवारलाई केही न केही सहयोग पुग्ने उल्लेख गर्दै देश र आफ्नो समाज छाडेर परिवारको लालनपालनका लागि विदेशमा गएका श्रमिकको निधन हुनु धेरै दुखद भएको भन्दै पीडित परिवारहरुलाई सहयोग गरेकाे बताए । ‘हामी सबैले एक अर्कालाई सहयोग गर्ने बानी बसालौं, यो एउटा हाम्राे सुरुवाती मात्र हो, भोलि हामी जस्तै धेरै संस्थाहरुले पनि यस्तो अभ्यास गरुन् भन्ने हाम्रो सोच हो, ’ उनले भने । यस्तै, आइएमई पेका प्रमुख कार्यकारी अधिकृत पोखरेरले पनि भरोशा कोष स्थापनाको उद्धेश्यमाथि प्रकाश पारे । उनले संस्थाको उद्धेश्य नाफा हेर्ने मात्र नभई संस्थागत सामाजिक उत्तरदायित्व पनि भएकोले तयसको उद्धेश्य र पीडित परिवारहरुको घाउमा मल्हम लगाउने प्रयास आफुहरुले गरेको बताए । कार्यक्रममा आईएमईपेका ब्राण्ड एम्बास्डर दिपकराज गिरी र दिपाश्री निरौला पनि उपस्थित थिए ।
अब एटीएमबाट पैसा झिक्न कार्ड नचाहिने, लक्ष्मी बैंकले भित्र्यायाे यस्ताे सुविधा (भिडियाे सहित)
काठमाडाैं । लक्ष्मी बैंकले एटीएम कार्डको विकल्पको रुपमा एक नौलो प्रविधि ‘कार्ड-रहित एटीएम’ सुविधा ल्याएकाे छ । जुन नेपालमै पहिलो पटक लक्ष्मी बैंकले भित्र्याएको हो । यससँगै अब लक्ष्मी बैंकको एटीएमबाट पैसा झिक्न बैंककाे एटीएम कार्ड नचाहिने भएको छ । यसकाे लागि बैंकको मोबाईल एपमा रहेको एक सुविधा प्रयोग गरेर सजिलै एटीएमबाट कार्ड बिना नै पैसा झिक्न सकिनेछ । बैंकको मोबाइल बैंकिंग एप- “मोबाइल मनि” र आफ्नो मोबाइलमा इन्टरनेट भएपछि एटीएमबाट पैसा झिक्दा कार्ड नचाहिने भएकाे हाे । साथै, ग्राहकले बैंकको सो सेवा सब्स्क्राइब गरेको हुनु पर्ने बैंकले जानकारी गराएकाे छ । कस्ताे छ प्रक्रिया ? बैंकका अनुसार यो सुविधा प्रयोग गर्न खासै गाह्रो छैन । ग्राहकले आफ्नो मोबाइल मनिमा लग-इन गर्ने बितिकै “कार्डलेस विथ-ड्र” भन्ने अप्सन देख्नेछन् र यसमा क्लिक गरेर चाहेजतिको रकम हाल्नु पर्नेछ । त्यसपछि “कन्फर्म” गर्नका लागि आफ्नो एम-पिन वा फिंगर-प्रिन्ट स्क्यान गर्नु पर्नेछ । त्यसपछि ग्राहकले आफ्नो फोनमा (मोबाईल मनिमा दर्ता भएको नम्बरमा) “ओटिपि कोड” एसएमएसको रुपमा प्राप्त गर्ने छन् । जसलाई कारोबार नसकेसम्म सुरक्षित राख्नुपर्ने हुन्छ तर प्राप्त भएको सो ओ.टि.पि. कोड केहि समयसम्मका लागि मात्र प्रयोग गर्न सकिने बैंकले जानकारी गराएकाे छ । यससँगै एटीएम बुथमा एटीएममा पनि कार्ड हाल्नु अगाडिनै ग्राहकले “कार्ड-रहित” भन्ने अप्सन देख्न सक्नेछन् । र, सो अप्सन छानिसके पछि आफ्नो मोबाइल मनिमा दर्ता भएको नम्बर हाल्नु पर्ने हुन्छ। त्यसपछी ग्राहकले प्राप्त गरेका ओटीपी कोड र मोबाईल मनिमा अनुरोध गरिएको रकम हालेपछि ग्राहकले एटीएमबाट नगद प्राप्त गर्न सक्नेछन् । तर एटीएममा र मोबाईल मनिमा हालिएको रकम कम वा बढी हुनुहुँदैन । यसकाे मतलब बराबर हुने पर्ने छ । यो नौलो प्रविधिकाे फाईदा भनेको आफुले एटीएम कार्ड बोकी राख्न पर्दैन । यदी कारणबस आफ्नो कार्ड बिर्सिए तापनि स्मार्ट कार्ड-रहित एटीएम सुविधाद्वारा एटीएमबाट पैसा झिक्न सकिनेछ । र, यति मात्र नभई नेपाल भरि लक्ष्मी बैंकको एटीएमको माध्यमबाट आफुले चाहको ठाउँमा सजिलै पैसा पठाउन पनि सक्ने बैंकले जनाएकाे छ । तर ओटीपी कोड पठाउँदा भने केही सावधानी अपनाउनु पर्ने हुन्छ । भिडियाे सहित
वायरबार्ले मार्फत इसेवाको रेमिट्यान्स सेवा थप ६ वटा देशबाट सुरू
काठमाडौं । इसेवामनि ट्रान्सफर र वायरबार्लेबीच रेमिट्यान्स भुक्तानी सम्झौता भएको छ । यो सम्झौतासँगै अमेरिका, क्यानाडा, अस्ट्रेलिया, न्युजिल्यान्ड, दक्षिण कोरिया, र हङकङमा रहेका नेपालीले वायरबार्लेबाट नगदमा तथा कुनै पनि बैंक खातामा र इसेवावालेटमा सहजै रकम पठाउन सकिन्छ । नगदमा पठाइएको रकम इसेवा मनि ट्रान्स्फरका नेपाल भर रहेका ८ हजार भन्दा धेरै एजेन्ट मार्फत रकम प्राप्त गर्न सकिन्छ । यस्तै रकम सिधै इसेवा वालेटमा प्राप्त गर्न सकिन्छ भने बैंक खातामा पठाएइको रकम तत्कालै सेवाग्राहीको बैंक खातामा जम्मा हुनेछ । वायरबार्ले एउटा फिनटेक स्टार्ट अप कम्पनी हो, जसले एशिया प्रशांत क्षेत्रमा मोबाइल/अनलाइन रेमिट्यान्स् सेवा प्रदान गर्दछ । वायरबार्ले अस्ट्रेलियाको पहिलो र अग्रणी कम्पनीहो र यसको सेवा अस्ट्रेलिया, दक्षिण कोरिया, अमेरिका, क्यानाडा, न्युजिल्यान्ड र हङकङमा रहेको छ । यस कम्पनीले छिट्टै नै जापान, फिलिपिन्स् लगायतका मुलुकमा सेवा विस्तार गर्दै छ । इसेवामनि ट्रान्सफरले डिजिटल रेमिट्यान्स्का साथै एजेन्ट बेस रेमिट्यान्स् सेवा मार्फत नेपालमा सेवा प्रदान गर्दै आइरहेको छ । हालको विषम परिस्थितिलाई मध्यनजर गर्दै डिजिटल माध्यमबाट रेमिट्यान्स् पठाउदा सुरक्षित, आर्थिक फाइदा र प्राविधिक ज्ञानको अवसर प्राप्त गर्नुका साथै समयको बचत गर्न सहयोग मिलेको छ । इसेवा मनि ट्रान्सफरलाई विप्रेषणको विश्व बजारमा छुट्टै नाम, सेवा र प्रविधिको पूर्ण कम्पनीको रुपमा स्थापना गर्नु आफुहरुको उद्देश्य रहेको इसेवामनि ट्रान्सफरका प्रबन्ध निर्देशक अजेश कोइरालाले बताए ।
