नेपालमा स्क्रब टाइफसले महामारी रुप लिँदै, ९९ जनामा सङ्क्रमण
चितवन । जिल्लाका अस्पतालमा साउनयता उपचार गराउन आएकामध्ये स्क्रब टाइफसका कारण दुई जनाको मृत्यु भएको छ भने ९९ जनामा सङ्क्रमण देखिएको छ । स्वास्थ्य कार्यालय चितवनका कीट नियन्त्रक राम केसीका अनुसार एक हजार २८ जनामा परीक्षण गरिएकोमा ९९ जनामा स्क्रब टाइफसको सङ्क्रमण देखिएको हो । स्क्रब टाइफसका कारण मृत्यु भएकामा एक जना गैंँडाकोटकी महिला र एकजना रौतहटका पुरुष रहेको केसीले जानकारी दिनुभयो । जिल्लाका अस्पतालमा उपचार गराउन आउनेमा चितवनसहित नवलपरासी, तनहुँ, गोर्खा, मकवानपुर, धादिङ्, रौतहट, बारालगायका जिल्लाका रहेका छन् । स्क्रब टाइफस ओरीएण्टा सुसुगामुसी नामक ब्याक्टेरियाबाट हुने सङ्क्रामक रोग हो । साधारणतया यो जीवाणुले मानिसलाई प्रत्यक्ष असर नपारी झाडीमा पाइने किर्ना (माइटस)लाई सङ्क्रमणमा पार्दछ । ती सङ्क्रमित किर्ना मुसालगायत अन्य जनावरका शरीरमा बस्न रुचाउने गर्दछन् । यी सङ्क्रमित किर्ना बोकेका मुसा, जनावर मानिसको सम्पर्कमा आएपछि मानव शरीमा टाँसिएर टोक्ने केसीले जानकारी दिनुभयो । यसबाहेक, ग्रामीण भेगमा झारपात र झाडीमा सङ्क्रमित किर्ना प्रशस्त हुन्छन् । ग्रामीण भेगका किसानलाई प्रत्यक्ष रुपले यी किर्नाले टोकेमा स्क्रब टाइफस रोग सर्ने गर्छ । यो रोग मानिसबाट मानिसमा सर्दैन । गर्भवतीले स्क्रब टाइफसबाट सङ्क्रमित भए उनकोे गर्भाशय रहेको शिशु अङ्गभङ्ग हुने सम्भावना रहेकाले यस सम्बन्धी परामर्श लिनुपर्ने चिकित्सकको सुझाव छ । आर्थिक वर्ष २०७४÷७५ मा दुई हजार २३७ जनाको नमूना परीक्षण गर्दा ४१० जनामा स्क्रब टाइफस भेटिएको थियो । यस्तै डेङ्गुबाट सङ्क्रमण हुनेको सङ्ख्या तीन हजार ६६९ जना पुगेको छ । केसीका अनुसार ११ हजार ९२७ जनामा परीक्षण गरिएको थियो । भदौको तेस्रो र चौथो साता निकै बढेको सङ्क्रमण विस्तारै घट्दै गएको छ । डेङ्गुबाट जिल्लामा दुई जनाको मृत्यु भएको छ ।
माछापुच्छ्रे बैंकले गर्यो रक्तदान कार्यक्रम
काठमाडौँ । माछापुच्छ्रे बैंक लि.ले १९औँ वार्षिकोत्सवको अवसरमा वृहत रक्तदान कार्यक्रमको आयोजना गरेको छ । सोमबार बैंकको प्रधान कार्यालयमा आयोजना गरिएको रक्तदान कार्यक्रममा बैंकका कर्मचारी तथा ग्राहकहरुको उत्साहजनक सहभागिता रहेको थियो । मुलुकमा हाल डेंगु रोगको प्रकोपका कारण देखिएको रगत अभावलाई ध्यानमा राखेर बैंकले रक्तदान कार्यक्रमको आयोजना गरेको हो ।
अल्पविकसित राष्ट्रहरुमा स्वास्थ्य सेवाको अवस्थाबारे नर्भिकको प्रस्तुति
काठमाडौं । कन्फडेरेसन अफ इन्डियन इण्डष्ट्रीद्वारा भारतको कोलकातामा आयोजित १ दिने विशेष गोष्ठीमा नर्भिक इन्टरनेशनल हस्पिटलले अल्पविकसित एवम् विकासोन्मुख राष्ट्रहरुमा स्वास्थ्यसेवाको अवस्थाबारे अवधारणा पत्र प्रस्तुत गरेको छ । असोज ९ गते आयोजित गोष्ठीमा भारत लगायत अन्य दक्षिण एशियाली राष्ट्रहरुका निजी क्षेत्रका कर्पाेरेट हस्पिटलहरुको सहभागिता रहेको थियो । उक्तगोष्ठीमा नर्भिकको प्रतिनिधित्वगर्दै यसको मातृ संस्थाका कार्यकारी निर्देशक मनिस खेम्काले अवधारणा पत्र पेश गर्दै नेपालमा हाल विद्यमान स्वास्थ्य सेवाको अवस्थाबारे प्रकाश पारे । उनले हाम्रो परिपे्रक्ष्यमा हाल विद्यमान स्वास्थ्य सेवाका प्राविधिक पक्षमा टिप्पणी गर्दै नेपाली स्वास्थ्य सेवाका फाँटलाई फराकिलो पार्न तथा आधारभूत स्वास्थ्य सेवा सर्वसुलभ र सबैको पहुँच भित्र कसरी पार्ने भन्ने कुरामा पनि जोड दिए । प्रत्येक वर्ष गुणस्तरीय स्वास्थ्य सेवाको खोजीमा नेपालीहरूले करिब १ अर्ब अमेरिकी डलर नेपाल बाहिर खर्च गर्ने अनुमान रहेको बताउँदै त्यसलाई नेपालभित्रै राख्न एवम् विश्वसनीय स्वास्थ्य सेवा पस्कन आफूहरु तयार भएको खेम्काले बताए ।
