नेपालमा स्नातक तहमा ‘हस्पिटालिटी म्यानेजमेन्ट’ अध्ययन सुरु हुने
काठमाडाैं । नेपालमा ‘हस्पिटालिटी म्यानेजमेन्ट’ विषयमा अध्ययन अध्यापन हुने भएको छ । अन्तर्राष्ट्रिय हस्पिटालिटी म्यानेजमेन्ट इन्स्टिच्युट (होमिन)ले ललितपुरस्थित कुमारीपाटीमा स्नातक तहमा सो विषयको अध्ययन सुरुआत गर्न लागेको हो । होमिनका अध्यक्ष दुर्गादेवी खनालले स्वीट्जरल्याण्डको पाठ्यक्रममा नेपालमा पहिलोपटक स्नातक तहमा सो विषयमा अध्यापन गराउन तयारी सुरु गरिएकोे जानकारी दिए । होमिनद्वारा आज यहाँ आयोजित पत्रकार सम्मेलनमा उनले विशेष गरेर पर्यापर्यटन ‘इको टुरिजम’का विषय होमिनको नयाँ पाठ्यक्रम हुने बताए । तीनवर्षे स्नातक तहको अध्ययन सुरू गर्न शिक्षा मन्त्रालयसँग अनुमतिका लागि प्रक्रिया सुरु गरेको होमिनका उपाध्यक्ष गोकर्ण खनालले पत्रकार सम्मेलनमा जानकारी दिए । कक्षा १२ उत्तीर्ण गरेका विद्यार्थी सो तह अध्ययन गर्न योग्य हुने जनाइएको छ । उनले भने, “नेपाल, भारत र स्वीट्जरल्याण्डमा अध्यापनसँगै युरोपियन देशका होटलमा कामको अवसर विद्यार्थीले पाउनेछन् ।” भारतको चेन्नइमा रहेको अन्तर्राष्ट्रिय हस्पिटालिटी म्यानेजमेन्ट इन्स्टिच्युट र स्वीट्जरल्याण्डको हस्पिटालिटी जुरिजसँग होमिनको सहकार्य रहेको उपाध्यक्ष खनालले बताए । उनका अनुसार पहिलो वर्षको अध्ययन नेपालमा हुनेछ भने दोस्रो वर्ष भारतको चेन्नइमा हुनेछ । तेस्रो तथा अन्तिम वर्ष स्वीट्जरल्याण्डमा अध्ययन गर्नुपर्ने छ । नेपाल र भारतमा अध्ययन गर्दा विद्यार्थीले पूरै शुल्क तिर्नु पर्नेछ । स्वीट्जरल्याण्डको अध्ययनसँगै हुने ‘इन्टर्नसिप’मा भने रकम पाइने जनाइएको छ । नौ सय घण्टा इन्टर्नसिप गर्दा ३० हजार ‘स्वीस फ्रयाङ्क’ कमाउन सकिने पत्रकार सम्मेलनमा जानकारी दिइयो । ‘तीनवर्षे कोर्ष पूरा गरेपछि विदेशमा रोजगारीको अवसर विद्यार्थीले पाउनेछन्,’ खनालले भने । स्वदेशमा कामको अवसर नहुँदा लाखौँ नेपाली खाडी मुलुकमा पुग्नुपर्ने अवस्था विस्तारै अन्त्य गर्दै राम्रो आम्दानी हुने युरोपियन देशमा जाने वातावरण होमिनले बनाउन लागेको उनले दाबी गरे । रासस
बिहीबार प्रतितोला २०० ले घट्यो सुनको मूल्य
काठमाडाैं । नेपाली बजारमा आज सुनको मूल्य प्रतितोला २०० ले घटेको छ । छापावाल सुन बुधबार प्रतितोला ८८ हजार ९०० मा कारोबार भएको थियो । नेपाल सुन चाँदी व्यवसायी महासङ्घले सार्वजनिक गरेको तथ्याङ्कानुसार छापावाल सुनको मूल्य प्रतितोला ८८ हजार ७०० तोकिएको छ । तेजाबी सुनको मूल्य प्रतितोला ८८ हजार २५० कायम गरिएको छ जुन बुधबार प्रतितोला ८८ हजार ४५० मा कारोबार भएको थियो । महासङ्घका अनुसार चाँदीको मूल्य बुधबारको तुलनामा आज प्रतितोला ३५ ले घटेको छ । बुधबार प्रतितोला एक हजार १५५ मा कारोबार भएको चाँदीको मूल्य आज प्रतितोला एक हजार १२० तोकिएको छ । अन्तर्राष्ट्रिय बजारमा हुने सुन चाँदी कारोबार मूल्यका आधारमा नेपालमा महासङ्घले सुन तथा चाँदीको मूल्य तोक्ने गर्दछ । अन्तर्राष्ट्रिय बजारमा यतिखेर सुन प्रतिऔँस एक हजार ७३२ दशमलव ७२ अमेरिकी डलरमा कारोबार भइरहेको छ । रासस
चिकित्सकका छाेराछाेरीलाई चिकित्सा शिक्षा अध्ययनमा आरक्षण दिन निर्देशन
काठमाडाैं । प्रतिनिधिसभा अन्तर्गतको शिक्षा तथा स्वास्थ्य समितिले चिकित्सा शिक्षासँग सम्बन्धित कर्मचारीका छोराछोरी र स्थानीयबासीलाई चिकित्सा शिक्षा अध्ययनमा आरक्षण दिन निर्देशन दिएको छ । समितिको मंगलबार सिंहदरबारमा बसेको बैठकले चिकित्सा शिक्षासँग सम्बन्धित कर्मचारीका छोराछोरी र स्थानीयबासीलाई चिकित्सा शिक्षा अध्ययनका लागि विद्यमान ऐन, नियमालीहरु संशोधन गरेर भएपनि आरक्षण दिन सरकारलाई निर्देशन दिएको हो । समितिकी सभापति जयपुरी घर्तीले ऐनले व्यवस्था गरे अनुसार आरक्षणको व्यवस्था गर्न तथा आगामी दिनमा हुने चिकित्सा शिक्षासम्बन्धी परीक्षाहरुमा नियमावली संशोधन गरेर भएपनि आरक्षणको व्यवस्था गर्न निर्देशन दिएको जानकारी दिइन् । ‘ऐनमा टेकेर सम्भव हुन्छ भने चिकित्सा शिक्षासँग सम्बन्धित कर्मचारी र विश्वविद्यालय प्रतिष्ठानका कर्मचारीहरुको बच्चाबच्चीहरुलाई पनि पढ्नको लागि आरक्षणको व्यवस्था गर्ने भनेर सकिन्छ भने नियमावलीहरु चेन्ज गरौँ भनेर हामीले निर्देशन दिएका छौँ । ऐनमा टेकेर सम्भव भएसम्म आरक्षण दिनुपर्छ भन्ने गरेका छौँ । हामीले भनेका छौँ, ऐनले अधिकार दिएसम्म त्यो आरक्षणको व्यवस्था गराउनुपर्छ भनेर हामीले निर्देशन दिएका छौँ । यदी ऐनभन्दा बाहिर छ भने हामीले गर्नुहुन्न भन्नेपनि अप्सन राखेका छौँ । आगामी दिनमा हुने जो इकजामहरु छ, मेडिकल सम्बन्धी इक्जामहरु छ, त्यहाँ नियमावली संशोधन गरेर आरक्षणको व्यवस्था गर्न सकिन्छ भने गर्ने भनेका छौँ । तर ऐनमा टेकेर गर्ने भनेका छौँ हामीले,’ उनले भनिन् । बैठकमा सांसद योगेश भट्टराईले चिकित्सा शिक्षामा काम गर्ने कर्मचारीहरु आर्थिक हिसाबले सम्पन्न हुने भन्दै उनीहरुलाई आरक्षण दिदाँ सम्पन्न मानिसमा नै आरक्षण जाने भएकाले चिकित्सा शिक्षासँग सम्बन्धीत कर्मचारीका छोराछोरीलाई आरक्षण दिनु आवश्यक नरहेको बताए । उनले आरक्षण दिनेभए त्यसभित्र पनि वर्गिकरण गरेर दिनुपर्ने धारणा राखे । यस्तै सांसद नविना लामाले चिकित्सा शिक्षामा पाइने आरक्षणको सम्बन्धमा कर्मचारी र नेताले मात्रै जानकारी राख्ने र उनीहरुको छोराछोरीले मात्रै फाइदा लिइरहेको भन्दै आम मानिसमा यसबारे जानकारी नै नहुने गरेको बताइन् । उनले आरक्षण राख्नुनहुने धारणा राखिन् । सांसद लामाले चिकित्सा शिक्षामा खास जाति, समुदाय र वर्गको मात्रै पहुँच भएकाले तिनीहरुले मात्रै आरक्षणको सदुपयोग गर्ने र अन्य समुदाय पछि परिरहने तर्क समेत गरिन् ।
