राष्ट्रिय परीक्षा बोर्ड कर्मचारी युनियन समिति खारेज
काठमाडौं । राष्ट्रिय परीक्षा बोर्ड कर्मचारी युनियन समिति खारेज भएको छ । राष्ट्रिय परीक्षा बोर्ड, कर्मचारी युनियन खारेज भए १५ गतेबाट भङ्ग गरिएको राष्ट्रिय परीक्षा बोर्ड कर्मचारी युनियन समितिका अध्यक्ष राजु ओलियाले जानकारी दिए । ‘१३ गतेको मन्त्रिपरिषद्को बैठकबाट स्वीकृत शासकीय सुधार सम्बन्धी एक सय कार्यसूचीहरूमध्ये (ख) को (उल्लेखित प्रशासनिक सुधार, पुनर्संरचना र मितव्ययिता) बुँदा नं. १२ मा उल्लेख भएबमोजिमको निर्णयलाई स्वागत गर्दै यस कार्यालयमा गठन भएको राष्ट्रिय परीक्षा बोर्ड, कर्मचारी यूनियन खारेज भए १५ गतेबाट भङ्ग गरिएको बेहोरा सम्बन्धित सबैमा जानकारीको लागि अनुरोध छ,’ सूचनामा बताइएको छ ।
प्रहरी हिरासतमा रहेका ओलीलाई आवश्यक उपचार गर्न आदेश
काठमाडौं । नेकपा एमालेका अध्यक्ष केपी शर्मा ओलीलाई आवश्यक उपचारको व्यवस्था गर्न आदेश दिएको छ । काठमाडौं जिल्ला अदालतका न्यायाधीश आनन्द श्रेष्ठले ओली अस्वस्थ भई उपचारार्थ अस्पतालमा रहेको भन्ने समेत देखिँदा निजको प्रभावकारी आवश्यक उपचारको व्यवस्था गर्न आदेश दिएका हुन् । ओली र पूर्वगृहमन्त्री रमेश लेखकलाई ५ दिन हिरासतमा राखेर अनुसन्धान गर्न अदालतले अनुमति दिएको छ । चैत १४ मा प्रहरीले ओली र लेखकलाई पक्राउ गरेर आइतबार अदालतमा उपस्थित गराएको थियो । उनीहरू विरुद्ध भदौ २३ र २४ मा भएको जेनजी प्रदर्शनमा दमन गरेर किशोरहरूमाथि घातक हतियारबाट गोली प्रहार गर्ने आदेश दिएको आरोप छ । ओली र लेखकलाई ५ दिन हिरासतमा राखेर अनुसन्धान गर्न अनुमति ओली र लेखकलाई हिरासतमुक्त गर्न माग गर्दै सर्वोच्चमा रिट, सोमबार पेसी
ओली र लेखकलाई ५ दिन हिरासतमा राखेर अनुसन्धान गर्न अनुमति
काठमाडौं । पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई ५ दिन हिरासतमा राखेर अनुसन्धान गर्न अदालतले अनुमति दिएको छ । काठमाडौं जिल्ला अदालतका न्यायाधीश आनन्द श्रेष्ठले दुवै जनालाई हिरासतमा राखेर अनुसन्धान गर्न प्रहरीलाई अनुमति दिएका हुन् । चैत १४ मा प्रहरीले ओली र लेखकलाई पक्राउ गरेर आइतबार अदालतमा उपस्थित गराएको थियो । शनिबार बिहान ओली र लेखक पक्राउ परेका हुन् । गौरीबहादुर कार्की नेतृत्वको आयोगले चैत २४ मा बुझाएको प्रतिवेदनको आधारमा शुक्रबार बसेको मन्त्रिपरिषद् बैठकले पूर्वप्रधानमन्त्री ओली र तत्कालीन गृहमन्त्री लेखकलाई फौजदारी मुद्दामा कारबाही गर्ने सिफारिस कार्यान्वयन गर्ने निर्णय गरेको थियो । सोही निर्णयअनुसार ओली र लेखक पक्राउ परेका हुन् । उनीहरूलाई दफा १८१ र १८२ बमोजिम कारबाही सिफारिस गरिएको थियो । मुलुकी फौजदारी संहिताको दफा १८१ मा ‘कसैले लापरबाहीपूर्ण काम गरेर कसैको ज्यान मार्न नहुने’ कसुर छ । त्यस्तो कसुर गर्ने व्यक्तिलाई ३ देखि १० वर्षसम्म कैद र ३० हजार रुपैयाँदेखि १ लाखसम्म जरिवाना हुन सक्ने व्यवस्था छ । दफा १८२ मा ‘हेलचक्र्याइँपूर्ण कुनै काम गरी कसैको ज्यान मार्न नहुने भनिएको छ । यसमा ३ वर्षसम्म कैद र ३० हजार रुपैयाँसम्म जरिवाना हुन सक्ने भनिएको छ । ओली र लेखकलाई हिरासतमुक्त गर्न माग गर्दै सर्वोच्चमा रिट, सोमबार पेसी
ठूलो संख्यामा भन्सार छलीको सामग्रीसहित जयसवाल पक्राउ
काठमाडौं । भन्सार छलेर काठमाडौं भित्र्याएका सामानसहित काठमाडौंबाट एक जना पक्राउ परेका छन् । शुक्रबार काठमाडौं उपत्यका अपराध अनुसन्धान कार्यालयले २३ वर्षीय अमितप्रसाद जयसवाललाई पक्राउ गरेको हो । भन्सार छली, चोरी पैठारी गरी विभिन्न किसिमका फेस क्रिम, चकलेट लगायतका सामानहरू काठमाण्डौंको विभिन्न स्थानहरूमा भण्डारण गरि राखेको भन्ने विशेष सूचनाको आधारमा यस कार्यालयबाट खटिएको प्रहरी टोलीले जयसवाललाई काठमाडौंको आलोकनगरबाट पक्राउ गरेको हो । उनलाई पक्राउ गरेर आवश्यक कारबाही गर्नका लागि त्रिभुवन विमानस्थल भन्सार कार्यालय गौचर, काठमाण्डौं पठाईएको अनुसन्धान कार्यालयले जनाएको छ । फिक्सड्रिमा स्याडो एसपीएफ ३० प्लस जेल लेखिएको क्रिम ७ हजार १ सय थान, सिजल्याण्ड फोरु कोजी चोखो ट्रुफल्स १४५ थान, लुसिरो चोखो ट्रुफिल्स लेखिएको ३ सय थान, अमुल चोक्लोट सिरप लेखिएको ५३ थान, स्मोकी पोप्पिङ क्यान्डी लेखिएको ९८ थान, अमित प्रसाद जयसवालको साथबाट फेला परेको आइएमआइ नम्बर ८६५८६५०६८५०८६७०र८६५६६५०६८५०८६६२, सीम कार्ड, ओप्पो मोबाइल १ थान, ७गोदामबाट बरामद भएको हाइटेक लेखिएको कम्प्युटर डेस्कटप १ थान र इनो लेमन फ्लेभर कार्टुन १४ थान लगायत अन्य सामग्री बरामद भएका छन् ।
नेपाल सेरामिकको आईपीओ व्यवस्थापन माछापुच्छ्रे क्यापिटलले गर्ने
काठमाडौं । माछापुच्छ्रे क्यापिटल लिमिटेड र नेपाल सेरामिक इण्डष्ट्री लिमिटेडबीच कम्पनीको प्राथमिक सार्वजनिक निष्काशन (आईपीओ) जारी गर्ने सम्बन्धमा निष्काशन तथा बिक्री प्रबन्ध सेवा प्रदान गर्न आइतबार सम्झौता भएको छ। सम्झौताअनुसार नेपाल सेरामिक इण्डष्ट्री लिमिटेडले सर्वसाधारणका लागि ३० लाख कित्ता साधारण शेयर (आईपीओ) निष्काशन गर्नेछ । उक्त आईपीओको निष्काशन तथा बिक्री प्रबन्धकका रूपमा माछापुच्छ्रे क्यापिटल लिमिटेड नियुक्त गरिएको हो । सम्झौता समारोहमा धितोपत्र निष्काशन तथा बिक्री प्रबन्धक माछापुच्छ्रे क्यापिटल लिमिटेडका तर्फबाट प्रमुख कार्यकारी अधिकृत उपेन्द्र मालाकार र निष्काशनकर्ता कम्पनी नेपाल सेरामिक इण्डष्ट्री लिमिटेडका अध्यक्ष शम्भुनाथ झाले सम्झौतापत्रमा हस्ताक्षर गरेका थिए ।
अवैध बेटिङ रोक्न सरकार आक्रामक, २४ घण्टाभित्रै एप र वेबसाइट बन्द हुने
काठमाडौं । सञ्चार तथा सूचना प्रविधि मन्त्रालयले अनलाइन सट्टेबाजी एप ‘बेटिङ एप’ २४ घण्टाभित्र बन्द गर्न नेपाल दूरसञ्चार प्राधिकरणलाई निर्देशन दिएको छ । सञ्चारमन्त्री डा. विक्रम तिमिल्सिनाको अध्यक्षतामा आइतबार मन्त्रालयका सचिवसहित महाशाखा प्रमुखहरुसँगको बैठकमा मन्त्री तिमिल्सिनाले बेटिङ एप र त्यससम्बन्धी वेबसाइट बन्द गर्न निर्देशन दिएका हुन् । यो निर्देशनसँगै प्राधिकरणले बेटिङ बन्द गर्ने प्रक्रिया सुरु भएको छ । बेटिङ बन्दका लागि ‘अपरेटर्स’हरूलाई निर्देशन दिएर बन्द कार्य सुरु भइसकेको प्राधिकरणका सहायक प्रवक्ता डा प्रदीप पौड्यालले जानकारी दिए । मन्त्रिपरिषद्को यही चैत १३ गतेको बैठकले अवैध रूपमा सञ्चालित अनलाइन बेटिङ बन्द गर्ने निर्णय गरेको थियो । त्यसलगत्तै सञ्चारमन्त्री डा तिमिल्सिनाले मन्त्रालय र सम्बद्ध निकायसँग छलफल गरी तत्कालै ‘एक्सन’ लिएका छन् । मन्त्रिपरिषद् बैठकले स्वीकृत गरेको शासकीय सुधारसम्बन्धी १०० बुँदे कार्यसूचीमार्फत सरकारले देशभित्र सञ्चालित सबै सट्टेबाजी एप र वेबसाइटलाई २४ घण्टाभित्रै पूर्ण रूपमा बन्द गर्ने निर्णय गरेको थियो । अवैध आर्थिक कारोबार र पुँजी पलायनलाई रोक्ने उद्देश्यले सरकारले यस्तो निर्णय गरेको जनाइएको छ । कार्यसूचीको ४२ नम्बर बुँदामा सञ्चार तथा सूचना प्रविधि मन्त्रालयलाई सट्टेबाजी एप (बेटिङ एप) र त्यससम्बन्धी वेबसाइट २४ घण्टाभित्र बन्द गर्न निर्देशन दिइएको छ । बैठकमा सञ्चारमन्त्री डा. तिमिल्सिनाले मन्त्रालयले जनतालाई तत्कालै प्रदान गर्न सकिने सेवाबारे कार्ययोजना पेस गर्न महाशाखा प्रमुखलाई निर्देशन दिए । उनले उपलब्ध स्रोतसाधनको अधिकतम प्रयोग गर्दै सेवा प्रवाहलाई चुस्त र प्रभावकारी बनाउन आग्रह गरे । सञ्चारमन्त्री डा. तिमिल्सिनाले ‘डिजिटल शासन र डेटा गभर्नेन्स’मा फोकस भएर समन्वयात्मक पद्दतिबाट जनताले प्रत्यक्ष लाभ पाउनेगरी काम गर्नुपर्नेमा जोड दिए । मन्त्रालयले गर्ने कामको दैनिक रिपोर्टिङ र समीक्षा गर्ने तथा मासिक रुपमा मन्त्रालयले प्रधानमन्त्री तथा मन्त्रिपरिषद् कार्यलयलाई रिपोर्टिङ गर्ने प्रणालीको विकास गरिने उनको भनाइ छ ।
यमाहा नेपालको ‘नाउ आई एम ७१.३३ केएमपीएल’ अभियान सार्वजनिक
काठमाडौं । इन्धनको मूल्य उच्च बिन्दुमा पुगिरहेको अवस्थामा यमाहा नेपालले 'नाउ आई एम ७१.३३ केएमपीएल' अभियान सार्वजनिक गरेको छ । नेपालमा हाइब्रिड प्रविधिको सफल प्रयोग र स्थापनाको उत्सवका रूपमा उक्त अभियान ल्याइएको कम्पनीले जनाएको छ । नेपालकै एकमात्र हाइब्रिड इन्जिनयुक्त स्कुटरका रूपमा परिचित यमाहा रेजेटआर १२५ एफआई हाइब्रिड अनिश्चित आर्थिक परिस्थितिमा दैनिक प्रयोगकर्ताका लागि भरपर्दो समाधान बनेको कम्पनीको दाबी छ । बढ्दो इन्धन लागतका कारण यात्रुहरू आर्थिक रूपमा सहज विकल्प खोजिरहेका बेला हाइब्रिड प्रविधिले इन्धन बचतमा महत्वपूर्ण सहयोग गर्ने विश्वास यमाहा नेपालको छ । कम्पनीका अनुसार सामान्य १२५ सीसी स्कुटरले औसत ४०–४५ किलोमिटर प्रतिलिटर माइलेज दिने भए पनि रेजेटआर हाइब्रिडले एआरएआई प्रमाणित ७१.३३ किलोमिटर प्रतिलिटर माइलेज प्रदान गर्छ, जसले करिब ४० प्रतिशत बढी इन्धन दक्षता दिन्छ । नियमित सहर यात्रामा यसले तीन वर्षको अवधिमा इन्धन खर्चबाट मात्र एक लाख रुपैयाँभन्दा बढी बचत सम्भव हुने कम्पनीले जनाएको छ । स्कुटरमा प्रयोग गरिएको स्मार्ट मोटर जेनेरेटर (एसएमजी) प्रणालीले सुरुवाती गति तथा उकालो बाटोमा ‘पावर असिस्ट’ प्रदान गर्ने भएकाले माइलेज र शक्तिबीच सम्झौता गर्न नपर्ने कम्पनीको भनाइ छ । ९९ केजी तौल रहेको हलुका डिजाइनले सहरका साँघुरा सडक र ट्राफिकमा सहज सञ्चालन सम्भव बनाउने उल्लेख गरिएको छ । त्यस्तै, फ्युल इन्जेक्सन प्रविधि र स्वचालित स्टप–स्टार्ट प्रणालीले ट्राफिकमा रोकिँदा इन्धन खेर जान नदिने कम्पनीले जनाएको छ । ग्राहकप्रति दीर्घकालीन प्रतिबद्धता जनाउँदै यमाहा नेपालले २०८२ चैत १ गतेदेखि रेजेटआर हाइब्रिड खरिद गर्ने ग्राहकलाई पाँच वर्षसम्म निःशुल्क सर्भिसिङ सुविधा दिने घोषणा गरेको छ । यमाहा नेपालका कार्यकारी निर्देशक तथा सीईओ दीपक कुमार अग्रवालले ७१.३३ किमि प्रतिलिटर माइलेज अनुभव गरिसकेका हजारौं ग्राहकको विश्वासलाई अभियानमार्फत थप सुदृढ बनाइएको बताए । उनका अनुसार उच्च माइलेज र दीर्घकालीन सेवा सुविधाले ग्राहकको स्वामित्व खर्च घटाउने लक्ष्य राखिएको छ । स्कुटरमा ब्लुटुथ कनेक्टिभिटी, साइड–स्ट्यान्ड इन्जिन कट–अफ सुरक्षा प्रणाली तथा २१ लिटर अन्डर–सिट स्टोरेज जस्ता आधुनिक सुविधाहरू पनि उपलब्ध छन् । कम्पनीले प्रदर्शन, शैली र इन्धन किफायती विकल्प खोज्ने चालकका लागि यो स्कुटर उत्कृष्ट रोजाइ हुने जनाएको छ ।
श्रीमतीको खुट्टा काट्ने श्रीमान पक्राउ
काठमाडौं । जिल्ला प्रहरी कार्यालय, पर्साले अमानवीय ढंगले हातखुट्टा बाँधेर पत्नीको खुट्टा काट्ने पतिलाई पक्राउ गरेको छ । कार्यालयका प्रवक्ता हरिबहादुर बस्नेतले पत्नीको खुट्टा काटेर फरार रहेका विश्वनाथ सहनीलाई शनिबार पक्राउ गरिएको जानकारी दिए । गत चैत १ गते पर्सागढी नगरपालिका–३ बिरुवा टोलका ३० वर्षीय सहनीले हातखुट्टा बाँधेर पत्नी हरिकलादेवीलाई धारिलो हतियार प्रयोग गरेर बाँया खुट्टामा पैतलाभन्दा माथिको भाग छिनिने गरी काटेर गम्भीर घाइते बनाएका थिए । श्रीमानले सहनीलाई घरायसी वादविवादका कारण योजना बनाई क्रुर अमानवीय तवरले धारिलो हतियार (दाउ) प्रहार गरी श्रीमतीको बाँया खुट्टा काटी गम्भीर घाइते बनाएका थिए । घाइते बनाइ छाडी भागी फरार भएको भन्ने सूचना प्राप्त हुनासाथ इलाका प्रहरी कार्यालय पटेर्वासुगौली तथा स्थानीयहरूको सहयोगमा तत्कालै घाइतेलाई उपचारको लागि एल. एस. न्यूरो एण्ड जेनेरल हस्पिटलमा परवानीपुर बारामा पठाइएको थियो ।
