काठमाडौं-२ मा रास्वपाका सुनील केसीको जित
काठमाडौं । काठमाडौं निर्वाचन क्षेत्र नं. २ मा सम्पन्न प्रतिनिधिसभा सदस्य निर्वाचनमा राष्ट्रिय स्वतन्त्र पार्टीका उम्मेदवार सुनील केसी प्रभावशाली मतसहित विजयी भएका छन्। निर्वाचन आयोग नेपालका अनुसार केसीले ३४ हजार २३८ मत प्राप्त गर्दै प्रतिनिधिसभा सदस्यमा निर्वाचित भएका हुन्। उनका निकटतम प्रतिस्पर्धी नेपाली कांग्रेस का उम्मेदवार कविर शर्मा ले ८ हजार ८७४ मत प्राप्त गरे। त्यस्तै राष्ट्रिय प्रजातन्त्र पार्टी की उम्मेदवार कुन्तीदेवी पोखरेलले ५ हजार २१० मत प्राप्त गरेकी छन्। यसअघि सोही क्षेत्रबाट राष्ट्रिय स्वतन्त्र पार्टी कै सोविता गौतम निर्वाचित भएकी थिइन् । यसपटक पनि उक्त क्षेत्रमा रास्वपाले आफ्नो पकड कायम राख्दै विजय दोहोर्‍याएको छ।
देशभरको मतगणनामा रास्वपाको लहर: २० सिट जित्यो, ९९ निर्वाचन क्षेत्रमा अग्रता
काठमाडौं । प्रतिनिधि सभा निर्वाचनको मतगणना जारी रहँदा राष्ट्रिय स्वतन्त्र पार्टी (रास्वपा) अप्रत्याशित रूपमा बलियो प्रदर्शन गर्दै दुई तिहाइ बहुमततर्फ अग्रसर देखिएको छ । शनिवार बिहान ८ बजेसम्म रास्वपाले प्रत्यक्षतर्फ २० सिट जितिसकेको छ भने ९९ निर्वाचन क्षेत्रमा अग्रता कायम राखेको छ। अधिकांश क्षेत्रमा फराकिलो अग्रता भएकाले तीमध्ये धेरै सिट रास्वपाले जित्ने सम्भावना देखिएको छ । अहिलेसम्मको रुझान हेर्दा रास्वपा प्रत्यक्षतर्फ मात्र करिब १३० सिट नाघ्ने अवस्थामा देखिन्छ । यही अनुपातमा समानुपातिक मत प्राप्त भएमा उसले संसदमा दुई तिहाइ बहुमत हासिल गर्न सक्ने आँकलन गरिएको छ । मतपरिणामअनुसार विभिन्न प्रदेशका धेरै महत्वपूर्ण क्षेत्रमा रास्वपाका उम्मेदवार विजयी भइसकेका छन् । विशेषगरी काठमाडौं उपत्यकाका अधिकांश क्षेत्रमा पार्टीले क्लिन स्विपजस्तै नतिजा निकाल्दै बलियो उपस्थिति देखाएको छ । यी हुन् रास्वपाबाट हालसम्म विजयी उम्मेदवारहरू कोशी प्रदेशबाट मोरङ-४ सन्तोष राजवंशी मोरङ ६ रुबिना आचार्य मधेस प्रदेश धनुषा-३ मनीष झा महोत्तरी-१ प्रमोदकुमार महतो बागमती प्रदेश काठमाडौं-१ रन्जु न्यौपाने काठमाडौं-३ राजु नाथ पाण्डे काठमाडौं-४ पुकार बम काठमाडौं-५ सस्मित पोखरेल काठमाडौं-६ शिशिर खनाल काठमाडौं-७ गणेश पराजुली काठमाडौं-८ विराज भक्त श्रेष्ठ काठमाडौं-९ डोल प्रसाद अर्याल काठमाडौं-१० प्रदिप विष्ट चितवन-२ रवि लामिछाने गण्डकी प्रदेश स्याङ्जा-१ धनन्जय रेग्मी कास्की-२ उत्तम प्रसाद पौडेल कास्की-३ बिना गुरुङ लुम्बिनी प्रदेश रुपन्देही-४ कन्हैया बनिया बाँके-१ सुरेश कुमार चौधरी बाँके-३ खगेन्द्र सुनार
कास्की २ मा रास्वपाका पौडेल निर्वाचित
गण्डकी । प्रतिनिधिसभा सदस्यका निर्वाचनमा कास्की क्षेत्र नम्बर २ मा राष्ट्रिय स्वतन्त्र पार्टी (रास्वपा) का उम्मेदवार उत्तमप्रसाद पौडेल ३१ हजार ९११ मतसहित विजयी भएका छन् । यस क्षेत्रमा नेकपा (एमाले)का रश्मी आचार्यले सात हजार ४९३ मतसहित दोस्रो बने भने नेपाली कांग्रेसका माधवप्रसाद बास्तोला छ हजार ५०० मतसहित तेस्रो बनेको निर्वाचन अधिकृतको कार्यालयले जनाएको छ । यसैगरी राष्ट्रिय प्रजातन्त्र पार्टीका हेमजङ गुरुङले एक हजार ६४३ मत, नेपाली कम्युनिष्ट पार्टीका हेमबहादुर थापा पराजुलीले एक हजार २७६ मत, उज्यालो नेपाल पार्टीका कुशल गुरुङले एक हजार २०१ मत प्राप्त गरेको कार्यालयले जनाएको छ ।
नतिजा स्वीकार्दै महेश बस्नेतले भने : अब रचनात्मक प्रतिपक्ष बन्छौं
काठमाडौं । नेपाल कम्युनिष्ट पार्टी (एमाले) का तर्फबाट भक्तपुर क्षेत्र नं. २ बाट निर्वाचनमा सहभागी भएका उम्मेदवारले यसपटकको परिणाम आफ्नो पक्षमा नआएको स्वीकार गरेका छन् । उनले लोकतन्त्रमा जनताको निर्णय नै सर्वोपरि हुने भन्दै परिणामलाई सम्मानपूर्वक स्वीकार गरेको बताएका छन् । उनले विजयी राष्ट्रिय स्वतन्त्र पार्टी का उम्मेदवार राजिब खत्रीलाई हार्दिक बधाई दिँदै सफल कार्यकालको शुभकामना व्यक्त गरे । साथै चुनावी अभियानमा दिनरात खटिएका पार्टीका नेता-कार्यकर्ता र समर्थकप्रति हार्दिक कृतज्ञता व्यक्त गरे । उनका अनुसार राजनीतिमा हार-जित स्वाभाविक प्रक्रिया भए पनि जनताको सेवा गर्ने प्रतिबद्धता कहिल्यै हार्दैन । अब आफ्नो भूमिका रचनात्मक प्रतिपक्षको रूपमा रहने उल्लेख गर्दै उनले जनताको शिक्षा, स्वास्थ्य, रोजगारी, भ्रष्टाचारमुक्त सुशासन र समृद्ध समाज निर्माणका लागि सदन बाहिरबाट पनि निरन्तर आवाज उठाइरहने बताए । उनले जनताको विश्वास, माया र साथ नै आफ्नो सबैभन्दा ठूलो शक्ति भएको उल्लेख गर्दै बाँकी जीवन पनि जनताको सेवा, हित र समृद्ध भक्तपुर निर्माणमा समर्पित रहने प्रतिबद्धता व्यक्त गरे ।
बाँके २ मा एमालेका राई प्रतिनिधिसभा सदस्यमा निर्वाचित
खजुरा । बाँके २ मा नेकपा (एमाले)का उम्मेदवार मोहम्मद इश्त्यिाक राई प्रतिनिधिसभा सदस्यमा विजयी भएका छन् । बिहीबार सम्पन्न प्रतिनिधिसभा सदस्य निर्वाचनको अन्तिम मतपरिणाम अनुसार उनले २४ हजार ६१६ मत प्राप्त गरी निर्वाचित भएका हुन् । उनका निकटतम प्रतिष्पर्धि राष्ट्रिय स्वतन्त्र पार्टी (रास्वपा)का विवेककुमार श्रेष्ठले १८ हजार ५८० मत प्राप्त गरेको मुख्य निर्वाचन अधिकृतको कार्यालयले जनाएको छ । अन्तिममत परिणाम अनुसार नेपाली कांग्रेसका सुधांशु कोइरालाले १७ हजार ५८५ मत प्राप्त गरेका छन् ।
महोत्तरी–१ मा रास्वपाका प्रमोदकुमार महतो विजयी
काठमाडौं । महोत्तरी निर्वाचन क्षेत्र नम्बर १ बाट राष्ट्रिय स्वतन्त्र पार्टी (रास्वपा) का उम्मेदवार प्रमोदकुमार महतो निर्वाचित भएका छन् । महतोले ३४ हजार ६२६ मत प्राप्त गर्दै प्रतिनिधिसभा सदस्यमा विजय हासिल गरेका हुन् । उनका निकटतम प्रतिद्वन्द्वी नेकपाका उम्मेदवार गिरिराजमणि पोखरेलले १२ हजार ६३२ मत प्राप्त गरे । त्यसैगरी नेकपा एमालेका उम्मेदवार लक्ष्मी महतो कोइरीले ६ हजार ५९० मत ल्याए भने नेपाली कांग्रेसका उम्मेदवार मुकेशराज काफ्लेले ४ हजार ३६१ मत प्राप्त गरेका छन् ।
स्याङ्जा–१ मा रास्वपाका रेग्मी विजयी
वालिङ । स्याङ्जा क्षेत्र नं १ को प्रतिनिधिसभा सदस्यमा राष्ट्रिय स्वतन्त्र पार्टीका डा. धनञ्जय रेग्मी विजयी भएका छन् । शनिबार बिहान सम्पन्न अन्तिम मतगणनाबाट रास्वपा उम्मेदवार रेग्मीले २९ हजार ७१ मत प्राप्त गरी विजयी भएको मुख्य निर्वाचन अधिकृत उपेन्द्रप्रसाद गौतमले जानकारी दिए । उनका प्रतिस्पर्धी नेपाली कांग्रेसका भरतराज ढकाल १० हजार २१४ मतान्तरले पराजित भए । उनले १८ हजार ८५७ मत प्राप्त गरे । नेकपा (एमाले) का मीनप्रसाद गुरुङ तेस्रो भएका छन् । उनले १६ हजार ८०४ मत प्राप्त गरेका हुन् । स्याङ्जा क्षेत्र नं १ मा ७० हजार ९४४ मत खसेको थियो । जसमध्ये ६८ हजार ३६ मत सदर हुँदा दुई हजार ९०८ मत बदर भएको थियो ।
बाँके–३ मा रास्वपाका सुनार निर्वाचित
राँझा । बाँके क्षेत्र नं ३ मा राष्ट्रिय स्वतन्त्र पार्टी (रास्वपा)का उम्मेदवार खगेन्द्र सुनार निर्वाचित भएका छन् । उनले २९ हजार ५५१ मत प्राप्त गरी निर्वाचित भएको क्षेत्र नम्बर ३ का निर्वाचन अधिकृत दशरथ गौतमले जानकारी दिए । सुनारका निकटतम प्रतिद्वन्द्वी नेकपा (एमाले)का उम्मेदवार सुमन मल्लले १९ हजार ६१५ मत प्राप्त गरेका छन् । त्यस्तै नेपाली कांग्रेसका उम्मेदवार अमरसिंह पुनले १३ हजार २१५ र नेपाली कम्युनिष्ट पार्टीका उम्मेदवार दीपक गौरीमगरले ४ हजार १५ मत प्राप्त गरेका छन् । बाँकेको क्षेत्र नं १ मा पनि रास्वपाका सुरेश चौधरी विजयी भएका छन् । क्षेत्र नं २ मा भने नेकपा ९एमाले०का उम्मेदवार मोहम्मद इश्तियाक राई विजयी भएका छन् ।
