८० लाख १५ हजार ठगी गरेको आरोपमा बस्नेत पक्राउ
काठमाडौं । बैंकिङ कसुरमा फरार रहेकी एक महिला पक्राउ परेकी छन् । काठमाडौं उपत्यका अपराध अनुसन्धान कार्यालयको टोलीले दोलखाकी ३७ वर्षीय राधिका बस्नेतलाई काठमाडौंबाट पक्राउ गरेको हो । बस्नेत ८० लाख १५ हजार ५ सय रुपैयाँ ठगी गरेको आरोपमा पक्राउ परेकी हुन् । उनीविरुद्ध काठमाडौंका विभिन्न प्रहरी वृत्तमा उजुरी परेको थियो । बस्नेत विरुद्ध बैंकिङ कसुरमा ७ र वैदेशिक रोजगारीमा दुईवटा मुद्दा रहेको कार्यालयले जनाएको छ ।
तौल घटाउने औषधिमा भारतको चेतावनी
काठमाडौं । तौल घटाउने औषधिको सस्तो जेनेरिक संस्करण बजारमा तीव्र रूपमा फैलिन थालेपछि भारतले त्यसको दुरुपयोग र स्वास्थ्य जोखिमबारे कडा चेतावनी दिएको छ । स्वास्थ्य मन्त्रालयले औषधि प्रयोगमा अनियमितता बढ्न सक्ने भन्दै निगरानी र कार्यान्वयन कडा बनाएको जनाएको छ । ओजेम्पिक र वेगोवी जस्ता औषधिमा प्रयोग हुने सक्रिय तत्व सेमाग्लुटाइडको पेटेन्ट मार्च २० मा समाप्त भएसँगै भारतमा यसको जेनेरिक उत्पादन तीव्र रूपमा बजारमा आएको छ । विश्वकै सबैभन्दा ठूलो जेनेरिक औषधि आपूर्तिकर्ता मानिने भारतमा यसले मूल्य घटाउँदै पहुँच बढाएको छ । जीएलपी–१ वर्गका यी औषधिहरूले रगतमा ग्लुकोजको स्तर र भोक नियन्त्रण गर्ने हर्मोनलाई प्रभाव पार्ने भएकाले मोटोपनाविरुद्ध प्रभावकारी मानिन्छन् । तर स्वास्थ्य मन्त्रालयले यस्ता औषधि चिकित्सकको सिफारिसबिना प्रयोग गर्दा गम्भीर साइड इफेक्ट देखिन सक्ने चेतावनी दिएको छ । मन्त्रालयका अनुसार हाल बजारमा विभिन्न जेनेरिक भेरियन्टहरू उपलब्ध भएसँगै खुद्रा औषधि पसल, अनलाइन प्लेटफर्म, थोक विक्रेता र वेलनेस क्लिनिकमार्फत अनियन्त्रित रूपमा बिक्री हुने जोखिम बढेको छ । 'उचित चिकित्सकीय निगरानी बिना प्रयोग गर्दा गम्भीर स्वास्थ्य समस्या निम्तिन सक्छ', मन्त्रालयले स्पष्ट पारेको छ । यसैसँगै भारतको औषधि नियामक निकायले निरीक्षण कडा बनाउँदै उत्पादकहरूलाई भ्रामक प्रचार र औषधिको गलत प्रयोगलाई प्रोत्साहन गर्ने गतिविधिमा प्रतिबन्ध लगाएको जनाएको छ । विश्व मोटोपना महासङ्घका अध्यक्ष साइमन बार्केराले औषधिले मात्र मोटोपनाको समस्या समाधान नहुने बताउनुभयो । उहाँका अनुसार मोटोपना जटिल र दीर्घकालीन रोग भएकाले स्वस्थ जीवनशैली र रोकथामका उपाय उत्तिकै आवश्यक हुन्छन् । भारतमा तौल घटाउने औषधिको बजार पछिल्ला पाँच वर्षमा तीव्र रूपमा बढेको छ । सन् २०२६ सम्ममा यसको कारोबार १५ करोड ३० लाख डलर पुगेको छ भने सन् २०३० सम्ममा आधा अर्ब डलर नाघ्ने अनुमान गरिएको छ । विश्व स्वास्थ्य सङ्गठनका अनुसार विश्वको कुपोषणको एक तिहाइ हिस्सा अझै भारतमै रहेको भए पनि बढ्दो आय र सहरी जीवनशैलीका कारण मोटोपनाको दर तीव्र रूपमा बढिरहेको छ । सरकारी तथ्याङ्कअनुसार भारतमा २४ प्रतिशत महिला र २३ प्रतिशत पुरुष अधिक तौल वा मोटोपनाको समस्यामा छन् । यसअघि यस्ता औषधिको मासिक खर्च १५ हजारदेखि २२ हजार भारतीय रुपैयाँसम्म पर्ने भएकाले प्रयोग सीमित थियो । तर पेटेन्ट सकिएपछि जेनेरिक सेमाग्लुटाइड औषधिको मूल्य घटेर एक हजार ३०० देखि चार हजार २०० रुपैयाँसम्म पुगेको छ, जसले प्रयोगको दायरा विस्तार गरेको छ । यद्यपि सस्तो मूल्यसँगै अनियन्त्रित प्रयोगको जोखिम बढेकाले भारतले औषधिको सुरक्षित प्रयोगमा विशेष सतर्कता अपनाउनुपर्ने आवश्यकता औँल्याएको छ । रासस
‘तेल भिसा’का निर्माता कार्की ठगी गरेको आरोपमा पक्राउ
काठमाडौं । चलचित्र ‘तेल भिसा’का निर्माता पक्राउ परेका छन् । ठगीको आरोपमा निर्माता शिवराज कार्कीलाई स्वयम्भूबाट पक्राउ गरिएको काठमाडौं उपत्यका अपराध अनुसन्धान कार्यालयका प्रमुख सन्तोष खड्काले जानकारी दिए । वैदेशिक रोजगारीमा लैजाने भन्दै विभिन्न व्यक्तिसँग पैसा लिएर ठगी गरेको आरोपमा उनलाई प्रहरीले पक्राउ गरेको हो । खड्काका अनुसार वैदेशिक रोजगारबाट कार्कीविरुद्ध ६ वटा पक्राउ पुर्जी जारी भएको थियो । उनले कन्सल्टेन्सीबाट समेत विभिन्न व्यक्तिलाई ‍ठगी गरेका थिए । काठमाडौं उपत्यका अनुसन्धानको कार्यालयमा कार्कीविरुद्ध २ सयमा भन्दा बढी पीडितले उजुरी दिएका थिए । ‘२ करोड ५० लाख भन्दा बढी ठगी गरेको भनेर कार्यालयमा उजुरी परेको थियो,’ खड्काले भने । यसअघि अमेरिका लैजान्छु भनेर ठगी गरेको आरोपमा तेल भिसा निर्माता तथा निर्देशकविरूद्ध पनि प्रहरीमा उजुरी परेको थियो ।
बालबालिका र युवामा वित्तीय सचेतना फैलाउँदै माछापुच्छ्रे क्यापिटल
काठमाडौं । माछापुच्छ्रे क्यापिटल लिमिटेडले ग्लोबल मनी वीक–२०२६ को अवसरमा वित्तीय साक्षरता तथा सचेतनामूलक कार्यक्रमहरू सञ्चालन गरेको छ । संस्थागत सामाजिक उत्तरदायित्व अन्तर्गत बालबालिका तथा युवामा वित्तीय ज्ञान अभिवृद्धि गर्ने उद्देश्यले कार्यक्रमहरू आयोजना गरिएको क्यापिटलले जनाएको छ । कार्यक्रममार्फत सहभागीहरूमा वित्तीय ज्ञान, सीप तथा सकारात्मक आर्थिक व्यवहार विकास गर्ने लक्ष्य राखिएको थियो । ग्लोबल मनी वीक अर्गनाइजेसन फर इकोनोमिक कोअपरेसन एन्ड डेभलपमेन्ट (ओईसीडी) को संयोजनमा सन् २०१२ देखि हरेक वर्ष सञ्चालन हुँदै आएको विश्वव्यापी अभियान हो । यस वर्षको अभियान मार्च १६ देखि २२, २०२६ (चैत २–८, २०८२) सम्म ‘स्मार्ट मनी टक्स’ भन्ने नारासहित मनाइएको थियो । अभियान अन्तर्गत क्यापिटलले चैत ३ गते वितारा बालग्राम, कलंकी (काठमाडौं), चैत ६ गते जनता माध्यमिक विद्यालय, हरैचा (मोरङ) तथा चैत ८ गते बोडे माध्यमिक विद्यालय, भक्तपुरमा अध्ययनरत विद्यार्थी, शिक्षक तथा विद्यालय प्रशासनका कर्मचारीहरूको सहभागितामा वित्तीय सचेतना तथा अन्तरक्रिया कार्यक्रम सम्पन्न गरेको जनाएको छ । कार्यक्रममार्फत सानै उमेरदेखि युवालाई आर्थिक रूपमा सचेत बनाउने, जिम्मेवार वित्तीय निर्णय लिन सक्षम बनाउने तथा दीर्घकालीन वित्तीय स्थायित्व प्रवर्द्धन गर्ने उद्देश्य राखिएको क्यापिटलको भनाइ छ । यस्ता सचेतनामूलक कार्यक्रमहरू आगामी दिनमा पनि निरन्तर सञ्चालन गर्ने प्रतिबद्धता संस्थाले जनाएको छ ।
निर्जीवन बीमा कम्पनीहरूको व्यवसाय १३.११ प्रतिशतले बढ्यो
काठमाडौं । चालु आर्थिक वर्ष २०८२/८३ को फागुनसम्ममा निर्जीवन बीमकहरूले ३१ अर्ब ७० करोड रुपैयाँ बढीको व्यवसाय गर्न सफल भएका छन् । बीमा प्राधिकरणले सार्वजनिक गरेको तथ्यांकअनुसार सञ्चालनमा रहेका १४ वटा निर्जीवन बीमकले १८ लाख ६२ हजार ११४ वटा बीमालेख जारी गरेर ३१ अर्ब ७० करोड २३ लाख रुपैयाँ कुल बीमाशुल्क संकलन गरेका हुन् । अघिल्लो आवको तुलनामा बीमा कम्पनीहरूको व्यवसाय १३.११ प्रतिशतले वृद्धि भएको छ । अघिल्लो आवको फागुन मसान्तसम्ममा बीमा कम्पनीहरूले १८ लाख ४३ हजार ४५६ वटा बीमालेख जारी गरेर २८ अर्ब २ करोड ८८ लाख रुपैयाँ कुल बीमाशुल्क संकलन गरेका थिए । अघिल्लो आवको तुलनामा १३ वटा बीमा कम्पनीहरूको व्यवसाय बढेको छ भने एउटाको घटेको छ । सबैभन्दा धेरै व्यापार गर्नेमा शिखर अगाडि ८ महिनाको अवधिमा सबैभन्दा धेरै व्यापार भित्र्याउने कम्पनीमा शिखर इन्स्योरेन्स कम्पनी रहेको छ । उक्त कम्पनीले ४ अर्ब ३८ करोड ५४ लाख रुपैयाँ कुल बीमाशुल्क आर्जन गरेको छ । जुन अघिल्लो आवको सोही अवधिको तुलनामा ९.२५ प्रतिशतले बढेको छ । अघिल्लो आवको यही अवधिमा शिखरले ४ अर्ब १ करोड ३९ लाख रुपैयाँ कुल बीमाशुल्क आर्जन गरेको थियो । दोस्रो धेरै व्यापार भित्र्याउने कम्पनीका सगरमाथा लुम्बिनी इन्स्यारेन्स(सलिको) रहेको छ । उक्त कम्पनीले गत आवको माघसम्ममा ३ अर्ब ३२ करोड ४४ लाख रुपैयाँ कुल बीमाशुल्क संकलन गरेकोमा चालु आवको यही वअधिमा ३ अर्ब ३६ करोड ८४ लाख रुपैयाँ आर्जन गरेको छ । गत आवको तुलनामा कम्पनीको व्यापार १.३२ प्रतिशतले वृद्धि भएको छ । सलिकोपछि धेरै व्यवसाय भित्र्याउने कम्पनीमा हिमालयन एभरेष्ट इन्स्योरेन्स रहेको छ । कम्पनीले चालु आवको फागुनसम्ममा ३ अर्ब २० करोड ८५ लाख रुपैयाँ कुल बीमाशुल्क संकलन गरेको छ । अघिल्लो आवको यही अवधिमा बीमा कम्पनीले २ अर्ब २१ करोड ५ लाख रुपैयाँ कुल बीमाशुल्क आर्जन गरेको थियो । अघिल्लो आवको तुलनामा चालु आवको ८ महिनासम्ममा कम्पनीको व्यवसाय ४५.१५ प्रतिशतले वृद्धि भएको छ । हिमालयन एभरेष्टपछि सिद्धार्थ प्रिमियर इन्स्योरेन्सले २ अर्ब ७९ करोड २१ लाख रुपैयाँ कुल बीमा शुल्क संकलन गरेको छ । कम्पनीले अघिल्लो आवको यही अवधिमा २ अर्ब ७५ करोड ३९ लाख बीमा शुल्क संकलन गरेको थियो । अघिल्लो आवको तुलनामा कम्पनीको व्यापार १.३९ प्रतिशले बढेको छ । त्यसैगरी, आइजीआई प्रुडेन्सियलले २ अर्ब ६८ करोड ४७ लाख रुपैयाँ, एनएलजी इन्स्योरेन्सले २ अर्ब ५३ करोड २५ लाख रुपैयाँ, नेको इन्स्योरेन्सले २ अर्ब ३९ करोड ५४ लाख रुपैयाँ, युनाइटेड अजोड इन्स्योरेन्सले १ अर्ब ९६ करोड २९ लाख रुपैयाँ, दि ओरियन्टलले १ अर्ब ९४ करोड ३६ लाख रुपैयाँ कुल बीमा शुल्क संकलन गरेको छ । अघिल्लो आवको यही अवधिमा आइजीआई प्रुडेन्सियलले २ अर्ब ३७ करोड ६० लाख रुपैयाँ, एनएलजी इन्स्योरेन्सले १ अर्ब ८५ करोड ९१ लाख रुपैयाँ, नेको इन्स्योरेन्सले २ अर्ब १९ करोड ४८ लाख रुपैयाँ, युनाइटेड अजोडले १ अर्ब ५९ करोड ८६ लाख रुपैयाँ र ओरियन्टलले १ अर्ब ७० करोड रुपैयाँ कुल बीमा शुल्क संकलन गरेका छन् । अघिल्लो आवको तुलनामा चालु आवमा कम्पनीहरूले क्रमशः १२.९९ , ३६.२२, ९.१४, २२.७९ र १४.१० प्रतिशतले व्यापार बढेको छ । फागुन मसान्तसम्ममा सानिमा जीआईजी इन्स्योरेन्सले १ अर्ब ७८ करोड ५९ लाख रुपैयाँ, नेपाल इन्स्योरेन्सले १ अर्ब ४९ करोड ६१ लाख रुपैयाँ, प्रभु इन्स्योरेन्सले १ अर्ब २१ करोड ४२ लाख रुपैयाँ, राष्ट्रिय बीमा कम्पनीले १ अर्ब ६ करोड ३३ लाख रुपैयाँ र नेसनल इन्स्योरेन्सले ८६ करोड ८७ लाख रुपैयाँ कुल बीमाशुल्क संकलन गरेका छन् । अघिल्लो आवको यही अवधिमा सानिमा जीआईसी इन्स्योरेन्सले १ अर्ब ५७ करोड रुपैयाँ, नेपाल इन्स्योरेन्सले १ अर्ब ४० करोड, प्रभु इन्स्योरेन्सले १ अर्ब १६ करोड, राष्ट्रिय बीमा कम्पनीले १ अर्ब ९ करोड रुपैयाँ र नेशनल इन्स्योरेन्सले ७६ करोड रुपैयाँ कुल बीमा शुल्क संकलन गरेका थिए । अघिल्लो आवको तुलनामा चालु आवमा सानिमा जीआईसी इन्स्योरेन्सको १३.६८ प्रतिशत, नेपाल इन्स्योरेन्सको ६.६९ प्रतिशत, प्रभु इन्स्योरेन्सको ४.५४ प्रतिशत र नेसनल इन्स्योरेन्सको १३.६० प्रतिशत व्यवसाय वृद्धि भएको छ । राष्ट्रिय बीमा कम्पनीको भने २.७९ प्रतिशतले व्यापार घटेको छ ।
विद्यार्थीलाई सक्षम नागरिक बनाउन ज्योति विकास बैंक सक्रिय
काठमाडौं । ज्योति विकास बैंकले ग्लोबल मनी वीक २०२६ अभियान अन्तर्गत देशका विभिन्न स्थानमा वित्तीय साक्षरता सम्बन्धी कार्यक्रम सञ्चालन गरेको छ । बैंकले चैत २ गतेदेखि ८ गतेसम्म एक सातासम्म विविध सचेतनामूलक कार्यक्रम आयोजना गरी अभियान मनाएको हो । ‘स्मार्ट मनी टक्स’ भन्ने मुख्य नारासहित सञ्चालन गरिएको अभियानमार्फत युवा तथा लक्षित वर्गलाई वित्तीय ज्ञान र सीप अभिवृद्धि गर्ने उद्देश्यले बैंकका विभिन्न शाखामार्फत देशभर वित्तीय साक्षरता कार्यक्रम सञ्चालन गरिएको बैंकले जनाएको छ । डिजिटल माध्यम तथा सामाजिक सञ्जालमार्फत पनि विभिन्न सचेतनामूलक सामग्री सार्वजनिक गरिएको थियो । अभियानअन्तर्गत बैंकका प्रादेशिक तथा क्लस्टर कार्यालय अन्तर्गतका शाखाहरूले विद्यालय तथा कलेजहरूमा आधुनिक बैंकिङ, बैंक तथा वित्तीय संस्थाका कार्य, वित्तीय अनुशासन, आवश्यकता र चाहनाको व्यवस्थापन, वित्तीय लक्ष्य निर्धारण, बचत, लगानी, खर्च व्यवस्थापन, विद्युतीय वित्तीय सेवा, नगदरहित कारोबार, धितोपत्र बजार तथा विद्युतीय ठगी सम्बन्धी विषयमा ३० भन्दा बढी तालिम तथा अभिमुखीकरण कार्यक्रम सञ्चालन गरेका थिए । यसबाट करिब २ हजार २०० भन्दा बढी व्यक्ति प्रत्यक्ष रूपमा लाभान्वित भएको बैंकले जनाएको छ । यस अवधिभर बैंकले सामाजिक सञ्जालमार्फत अडियो–भिजुअल सामग्री प्रकाशन गर्नुका साथै प्रभातफेरी कार्यक्रममार्फत वित्तीय जानकारी प्रवाह गरेको थियो । यस्ता कार्यक्रमले बालबालिका, युवा तथा लक्षित वर्गमा वित्तीय साक्षरताको महत्वबारे जागरण ल्याउने विश्वास बैंकको रहेको छ । संस्थागत सुशासनलाई प्राथमिकतामा राख्दै सामाजिक उत्तरदायित्व अन्तर्गत बैंकले अन्य बैंक तथा वित्तीय संस्थाभन्दा ५० प्रतिशत बढी रकम सामाजिक कार्यमा विनियोजन गरेको जनाएको छ । नवजात शिशुको अकाल मृत्यु न्यूनीकरणका लागि ‘न्यानो नानी’ कार्यक्रममार्फत हरेक वर्ष २ हजार ५९० भन्दा बढी शिशुको जीवन रक्षा गर्न सहयोग पुगेको बैंकको दाबी छ । बैंकले गत आर्थिक वर्षमा ४१ करोड रुपैयाँ कर योगदान गरेको जनाएको छ । हाल ज्योति विकास बैंकले देशभर ११७ शाखा कार्यालय, ३ विस्तारित काउन्टर तथा ७५ एटीएममार्फत बैंकिङ सेवा प्रदान गर्दै आएको छ ।
युवा विद्यार्थीलाई वित्तीय ज्ञान दिँदै लुम्बिनी विकास बैंक
काठमाडौं । ग्लोबल मनी वीक २०२६ को अवसरमा लुम्बिनी विकास बैंक लिमिटेडले देशभर वित्तीय साक्षरता कार्यक्रम सम्पन्न गरेको छ । बैंकले सातै प्रदेशमा रहेका शाखा कार्यालयमार्फत विभिन्न विद्यालयमा अध्ययनरत करिब एक हजार विद्यार्थीलाई लक्षित गर्दै वित्तीय साक्षरता अभिवृद्धि, वित्तीय ज्ञान तथा सकारात्मक वित्तीय मनोवृत्ति विकास गर्ने उद्देश्यका साथ कार्यक्रम सञ्चालन गरेको जनाएको छ । कार्यक्रमअन्तर्गत युवा विद्यार्थीलाई बैंकिङ प्रणालीबारे जानकारी गराउँदै बचत निक्षेप, कर्जा लगानी, विप्रेषण सेवा, डिजिटल बैंकिङलगायत विषय समेटेर विद्यालयमै वित्तीय साक्षरता कक्षा सञ्चालन गरिएको थियो । साथै, बैंकका शाखा कार्यालयहरूले वित्तीय जानकारीमूलक प्लेकार्ड प्रदर्शन गर्दै प्रभातफेरी कार्यक्रमसमेत आयोजना गरेका थिए । 'स्मार्ट मनी टक्स' भन्ने नारासहित सन् २०२६ को ग्लोबल मनी वीक मार्च १६ देखि २२ सम्म सञ्चालन गरिएको थियो । सोही अवसरमा बैंकले युवा विद्यार्थीलाई लक्षित गरी विभिन्न सचेतनामूलक कार्यक्रम सम्पन्न गरेको जनाएको छ । बैंकका अनुसार यस अभियानले बैंकिङ प्रणालीप्रति विश्वास बढ्नुका साथै विद्यार्थीमा वित्तीय ज्ञानको विकास भएको अपेक्षा गरिएको छ । हाल देशका सातै प्रदेशमा सेवा विस्तार गर्दै आएको लुम्बिनी विकास बैंक लिमिटेडका विभिन्न स्थानमा ८९ वटा शाखा कार्यालय तथा एक विस्तारित शाखा (एक्सटेन्सन काउन्टर) सञ्चालनमा रहेका छन् । बैंकले 'निरन्तर सहयात्रा' भन्ने नाराका साथ आधुनिक प्रविधिमा आधारित सुरक्षित तथा गुणस्तरीय बैंकिङ सेवा प्रदान गर्दै आएको छ । ग्राहकलाई अधिकतम प्रतिफल उपलब्ध गराउने उद्देश्यले बैंकले बचत निक्षेप खातामा आकर्षक ब्याजदर सहितका विशेष योजनासमेत सञ्चालनमा ल्याएको जनाएको छ ।
जापानी स्किन केयर उत्पादन अब भाटभटेनी सुपरमार्केटमा पाइने
काठमाडौं । भाटभटेनी सुपरमार्केट तथा होमाबीच जापानी कस्मेटिक, स्किन केयर तथा हेल्थ केयर प्रोडक्टको बिक्री वितरणका लागि सहकार्यको थालनी भएको छ । अबदेखि जापानी स्किन केयर तथा कस्मेटिक आयातकर्ता होमाद्वारा नेपाली बजारमा आयात तथा बिक्री वितरण गरिने सम्पूर्ण उत्पादनहरू भाटभटेनी सुपरमार्केटमा उपलब्ध हुने भएका हुन् । होक्काइदो बिजनेस ग्रुप नेपालअन्तर्गतको होमाले सन् २०२३ देखि आधिकारिक रूपमा जापानी कस्मेटिक, स्किन केयर तथा हेल्थ केयर प्रोडक्टहरू नेपाली बजारमा भित्र्याएको हो । भाटभटेनी सुपरमार्केटका कलंकी, पाटन, सातदोबाटो, भक्तपुर, महाराजगञ्ज, कोटेश्वर तथा टोखा गरी सात स्थानबाट अफरसहित जापानी उत्पादनको गुणस्तर र यसले आम जनताको स्किन हेल्थमा पार्ने सकारात्मक प्रभावसम्बन्धी जनचेतनामूलक सन्देश प्रवाह गर्दै आधिकारिक बिक्री वितरणको सुरुवात गरिएको हो । चैत १० गतेबाट सुरु गरिएका विभिन्न सचेतनामूलक कार्यक्रमहरूमा सहभागी हुने होमा तथा भाटभटेनीका ग्राहकहरूले होमाबाट विभिन्न अफरहरू, छुट, क्यास कुपन तथा फ्रि गिफ्ट प्राप्त गर्न सक्नेछन् । यसका लागि भाटभटेनीमा रहेका होमा सेन्टर तथा भाटभटेनीका कस्टमर सर्भिस डेस्कमा ग्राहकहरूले सम्पर्क राख्नुपर्नेछ । चैत १० गतेदेखि २० दिनका लागि सञ्चालन हुने यस कार्यक्रममा सहभागी हुनेमध्ये १४ जना भाग्यशाली ग्राहकले जनही रु ५ हजार बराबरका होमाका उत्पादन जित्न सक्नेछन् भने सहभागी प्रत्येक ग्राहकले होमामा प्रयोग गर्न सकिने २० प्रतिशत छुटको गिफ्ट भौचरसमेत प्राप्त गर्नेछन् । साथै होमाले आयात गर्ने एस–सेलेक्ट, टी–थ्री र जेटोक्क किड्स ब्रान्डका उत्पादनहरू उपहारस्वरूप प्रदान गरिनेछ । यस अवधिमा भाटभटेनी सुपरमार्केटमा गएर होमाका उत्पादनहरू खरिद गर्ने ग्राहकहरूले हरेक ३ हजार रुपैयाँको खरिदमा १ हजार रुपैयाँ बराबरको गिफ्ट भौचर प्राप्त गर्नेछन्, जसको प्रयोग डेकाइदो बुढानीलकण्ठमा डाइनिङ गर्दा वा होमाका कुनै पनि सामग्री खरिद गर्दा गर्न सकिनेछ । 'नेपाली ग्राहकलाई जापानी उत्पादनको गुणस्तरीयताको अनुभूति दिलाउनु होमाको पहिलो लक्ष्य हो,' कम्पनीका अध्यक्ष अर्जुन अधिकारी भन्छन्, 'लामो समय जापान बसेर त्यहाँका उत्पादनको गुणस्तरीयताको मापदण्ड र त्यसले जापानीहरूको स्वास्थ्यमा पारेको सकारात्मक प्रभाव बुझेपछि मलाई नेपालमा त्यस्ता प्रिमियम उत्पादन ल्याउने इच्छा जाग्यो । अनि यो सम्भव भएको हो ।' उनी अगाडि भन्छन्, 'होमा नेपाली बजारमा जापानी उत्पादनको आयातकर्ता बन्ने मात्र होइन, भविष्यमा जापानी ब्रान्डका लागि नेपाली उत्पादकसमेत बनेर निर्यात गर्ने लक्ष्य राखेको छ । हामीले नेपालमा हजारौँ रोजगारी सिर्जनाको खाका कोरेका छौँ, जसको यो सुरुवात हो ।' बीस दिनसम्म चल्ने यो सचेतनामूलक कार्यक्रमले जापानी हेल्थ एण्ड ब्युटी केयर प्रोडक्टप्रति नेपाली उपभोक्ताको थप चासो विकास हुने अपेक्षा गरिएको छ ।
