वाणिज्य बैंकमा ‘बिग मर्जर’ बहार, आठ बैंक गाभिए
काठमाडाैं । आर्थिक वर्ष २०७२/७३ को मौद्रिक नीति सार्वजनिक गर्दै नेपाल राष्ट्र बैंकका तत्कालीन गर्भनर डा चिरञ्जीवि नेपालले वाणिज्य बैंकहरुको चुक्ता पुँजी आठ अर्ब पुर्याउने पर्ने व्यवस्था गरे । यसका लागि २०७४ असार मसान्तसम्मको समय दिइएको थियो । चुक्ता पुँजी वृद्धिको उद्देश्य थियो वाणिज्य बैंकको सङ्ख्या घटाउनु । तत्कालीन समयमा लिइएको उक्त नीतिले अहिले आएर बल्ल सार्थकता पाएको छ । यसबीच केही वाणिज्य बैंकहरु मर्जर भए पनि पछिल्लो पटक भएको मर्जरको लहरले ‘बिग मर्जर’को तत्कालीन उद्देश्य पूरा भएको अनुभुत हुने गरी वाणिज्य बैंकको सङ्ख्या घटेको हो । पुस महिनामा मात्रै आठवटा वाणिज्य बैंक एकापसमा गाभिएका छन् भने थप दुई वाणिज्इ बैंक मर्जरको चरणमा छन् । नेपाल इन्भेष्टमेण्ट बैंक र मेगा बैंक नेपाल लिमिटेड एकापसमा गाभिनका लागि बुधबार आयोजित कार्यक्रममा अध्यक्ष पृथ्वीबहादुर पाँडेले व्यक्त गरेकाे धारणाले पनि सरकारको नीति कार्यान्वयनमा वाणिज्य बैंकहरू लागिपरेको स्पष्ट बुझ्न सकिन्छ । उनले बैंक तथा वित्तीय संस्था सबल बन्दा वित्तीय क्षेत्रमा थप ऊर्जा प्रदान गर्नुका साथै राष्ट्र बैंकको मर्जर नीतिलाई थप उत्साह प्रदान गरी अन्य बैंकलाई समेत मर्जरका लागि प्रेरित गरेको बताएका थिए । दुई बैंकबीच सेयर स्वाप अनुपात १००ः९० छ । एकापसमा गाभिएपछि बनेको नयाँ बैंकको अध्यक्षमा साविक इन्भेष्टमेन्ट बैंककै अध्यक्ष पाँडे र प्रमुख कार्यकारी अधिकृतमा ज्योतिप्रकाश पाण्डे रहेका छन् । नयाँ सञ्चालक समितिमा दुवै बैंकको सञ्चालकको प्रतिनिधित्व रहने गरी इन्भेष्टमेन्टको तर्फबाट प्रजन्य राजभण्डारी, कविकुमार टिबडेवाला र मेगाको तर्फबाट गोपाल खनाल, मदनकुमार आचार्य र मुक्तिराम पाण्डे रहेका छन् । साविक इन्भेष्टमेन्ट बैंकमा स्वतन्त्र सञ्चालकका रूपमा रहेका मञ्जु बस्नेत नै अब बन्ने सञ्चालक समितिमा पनि स्वतन्त्र सञ्चालक रहेका छन् । मर्जरपश्चात् बैंकको कुल चुक्ता पुँजी ३४ अर्ब १२ करोड, कुल पुँजी ५८ अर्बभन्दा बढी र कुल सम्पत्ति चार खर्ब ७१ अर्ब रहेको छ । त्यसैगरी कुल निक्षेप ३६० दशमलव दुई अर्ब तथा कर्जा लगानी ३२९ दशमलव ०६ अर्ब पुगेको छ । कुल ३० लाख ग्राहकलाई सेवा प्रदान गर्दै नेपाल इन्भेष्टमेन्ट मेगा देशकै ठूला वाणिज्य बैंकमध्येको अग्रणी बैंक बनेको छ । अध्यक्ष पाँडेका अनुसार बैंकले कुल जनसङ्ख्याको १० प्रतिशत नागरिकलाई सेवा प्रदान गर्दै आएको छ । पुस मसान्तभित्र मर्जरमा नजाँदा राष्ट्र बैंकले दिने सुविधाबाट बञ्चित हुने भएपछि बैंकहरू हतार–हतार मर्ज भएर एकीकृत कारोबार सुरु गरेका हुन् । आठ वाणिज्य बैंक मर्ज भएर एकीकृत कारोबारसमेत सुरु गरिसकेका छन् । पुस महिनामा कुमारी र एनसिसी, ग्लोबल आइएमई र बैंक अफ काठमाण्डू (बिओके), प्रभु र सेन्चुरी बैंक तथा नेपाल इन्भेष्टमेन्ट र मेगा बैंक एकापसमा गाभिएर एकीकृत कारोबार सुरु गरिसकेका छन् । कुमारी बैंक र नेपाल क्रेडिट एण्ड कमर्श (एनसिसी) बैंक मर्जरपश्चात गत पुस १६ देखि कुमारी बैंकको नामबाट एकीकृत कारोबार सुरु भइसकेको छ । दुई बैंक १ः१ शेयर अनुपातमा मर्जर भएका हुन् । एकीकृत कारोबारपश्चात् चुक्ता पुँजी २६ अर्ब २३ करोड, कुल निक्षेप तीन खर्ब २ अर्ब र कर्जा रु दुई खर्ब ८० अर्ब पुगेको छ । मर्जरपश्चात् शाखा सङ्ख्या तीन सय छ, एटिएम सङ्ख्या तीन सय ४४, एक्स्टेन्सन काउन्टर ४७ वटा र शाखारहित शाखा ६२ वटा पुगेका छन् । अमिरप्रताप राणाको अध्यक्षतामा चन्द्र बाँस्तोला, इमानसिङ लामा, कृष्णप्रसाद ज्ञवाली र महेश पोखरेल सञ्चालक समिति सदस्य रहेका छन् । नेपालमा ‘बिग मर्जर’मा बहार ल्याउने बैंकका रूपमा ग्लोबल आइएमई बैंक अग्रस्थानमा छ । बैंकले पछिल्लोपटक बैंक अफ काठमाण्डूलाई गाभेको छ । यही पुस २५ देखि ग्लोबल आइएमई बैंक लिमिटेडको नामबाट एकीकृृत कारोबार सुरु गरेको छ । ग्लोबल आइएमई बैंकका अध्यक्ष चन्द्रप्रसाद ढकालको अध्यक्षतामा कृष्णप्रसाद शर्मा, देवेन्द्रप्रताप शाह, क्याविनेट श्रेष्ठ, रामबहादुर भण्डारी, राधेश पन्त र मदनलाल जोशी सञ्चालक समिति सदस्य बनेका छन् । मर्जरपश्चात् बैंकको चुक्ता पुँजी ३५ अर्ब ७७ करोड पुगेको छ । यस आधारमा पनि यो बैंक सबैभन्दा ठूलो भएको छ । एकीकृत कारोबारपछि बैंकको कुल पुँजीकोष ५७ अर्ब पुगेको छ । निक्षेप सङ्कलन चार खर्ब १० अर्ब, कर्जा प्रवाह रु चार खर्ब र कुल सम्पत्ति पाँच खर्ब पुगेको छ । बैंकले सबै जिल्लामा शाखा सञ्जाल पु¥याएको छ । हाल ग्लोबल आइएमई बैंकका देशभर एक हजार एक सय शाखा तथा तीन वटा वैदेशिक सम्पर्क कार्यालय छन् । दक्षिण कोरियामा नेपाली बैंकको पहिलो वैदेशिक शाखा सञ्चालनको अन्तिम तयारीमा पनि ग्लोबल आइएमई बैंक छ । बैंकमा हाल ४० लाखभन्दा बढी ग्राहक छन् भने चार हजारभन्दा बढी कर्मचारी कार्यरत छन् । बैंकका अध्यक्ष ढकाल बैंक तथा वित्तीय क्षेत्रमा रचनात्मक र गुणात्मक परिवर्तन ल्याउन सकियोस् भन्ने उद्देश्य हालसम्म विभिन्न २१ वटा बैंक तथा वित्तीय संस्थालाई मर्जर र प्राप्ति गरेर ग्लोबल आइएमई देशको सबैभन्दा ठूलो बैंक बन्न सफल भएको बताउँछन् । उनले भने, ‘हालसम्म पाँच वाणिज्य, १० वटा विकास बैंक र छवटा फाइनान्स गरेर २१ संस्था गाभिएर यो संस्था बनेको हो । ग्लोबल बैंक अहिले पुँजी, निक्षेप, कर्जा र शाखा सञ्जालमा अधिकांश वित्तीय सूचकमा नेपालको पहिलो बैंक भएको छ ।’ त्यस्तै प्रभु र सेञ्चुरी बैंक मर्ज भएर यही पुस २६ गतेदेखि प्रभु बैंकको नामबाट एकीकृत कारोबार सुरु भएको छ । प्रभु बैंक र सेञ्चुरी बैंकबीच एक बराबर एक सेयर रहने गरी एकापसमा गाभिएका हुन् । मर्जरपश्चात् बैंकको चुक्ता पुँजी २३ अर्ब ५२ करोड पुगेको छ । एकीकृत कारोबारपछि प्रभु बैंकको कुल सम्पत्ति तीन खर्ब ४० अर्ब, चुक्ता पुँजी २२ अर्ब, कुल निक्षेप दुई खर्ब ८४ अर्ब र कुल कर्जा प्रवाह दुई खर्ब ५३ अर्ब पुगेको छ । त्यस्तै ग्राहक सङ्ख्या ३० लाखभन्दा बढी, शाखा सञ्जाल तीन सय ६५, एटिएम सञ्जाल तीन सय नौ र एक्सटेन्सन काउन्टर ७२ वटा पुगेको बैंकले जनाएको छ । एकीकृत कारोबार सुरु भएसँगै साविक सेञ्चुरी कमर्सियल बैंकमा खाता रहेका ग्राहकको १२ अङ्कको खाता नम्बर परिवर्तन भई १६ अङ्कको खाता नम्बर बनेको पनि प्रभु बैंकले जनाएको छ । प्रभु बैंकबाट चार जना र सेञ्चुरी बैंकबाट तीन जना गरी कुल सात सदस्यीय सञ्चालक समिति बनेको छ । प्रभु बैंकका अध्यक्ष लीलाप्रकाश सिटौलाको अध्यक्षतामा रमेशसिंह खड्का, शङ्करप्रसाद कालिकोटा, रामेश्वर सापकोटा, मनबहादुर राई, अभिषेक बज्राचार्य र गीता प्रधान सञ्चालक समिति सदस्य रहेका छन् । यसैगरी लक्ष्मी बैंक र सनराइज बैंकले पनि मर्जरका लागि सम्झौता गरेका छन् । मर्जरका लागि दुबै बैंकबाट दुई-दुई जनाको मर्जर समिति बनाइएको छ । मर्जरपछिको नाम लक्ष्मी सनराइज हुने सहमति भएको छ । दुबै बैंकले प्रकाशित गरेको वित्तीय विवरण अनुसार लक्ष्मइ बैंकको चुक्ता पुँजी ११ अर्ब ५५ छ भने सनराइज बैंकको १० अर्ब ११ करोड छ । रासस
लघु जलविद्युत बनाउन सरकारले ९० प्रतिशत अनुदान दिने, कसले पाउँछन् सुविधा ?
काठमाडौं । जलविद्युत नपुगेको र निकट भविष्यमा पुग्ने सम्भावना नभएको ठाउँमा पिको जलविद्युत (१० किलोवाट) र सुधारिएको पानीघट्ट विद्युतीकरण आयोजना बनाउँदा सरकारले ९० प्रतिशत सम्म अनुदान दिने भएको छ । वैकल्पिक उर्जा प्रवद्र्धन केन्द्रले ‘नविकरणीय उर्जा अनुदान कार्यविधि परिचालन कार्यविधि, २०७९’ मार्फत् सो व्यवस्था गरेको हो । कार्यविधिअनुसार राष्ट्रिय प्रसारण लाइन नपुगेको वा सौर्य घरेलु विद्युत प्रणाली बाहेक अन्य माध्यमबाट विद्युतीकरण नभएका त्यस्ता स्थानमा लघु तथा साना जलविद्युत आयोजना निर्माणको लागि सरकारले अनुदान उपलब्ध गराउने छ । ‘कुनैपनि स्रोतबाट विद्युतीकरण नभएको र निकट भविष्यमा पुग्ने सम्भावना ज्यादै न्यून रहेको, आयोजनाको माग भएको क्षेत्रको भौगोलिक अवस्था, पिछडिएको वर्ग, क्षेत्र र समूदायको बसोबास भएको र आयोजनाबाट उपलब्ध हुने उर्जा उत्पादनमुलक क्षेत्रमा समेत उपयोग हुनसक्ने सम्भावना भएको’ आधारहरुलाई लिएर अनुदानको लागि आयोजना छनौट गरिने कार्यविधिमा उल्लेख गरिएको छ । कार्यविधिमा आयोजना सम्पन्न गरेर शतप्रतिशत घरधुरीमा विद्युत जडानको सुनिश्चितता भएपछि मात्रै अनुदान भुक्तानीको लागि माग पेस गर्नुपर्ने उल्लेख गरिएको छ । स्थानीय तहका सामुदायिक संस्थामार्फत निर्माण गरिने लघु तथा साना जलविद्युत अयोजनामा कम्तिमा १० प्रतिशत लगानी जुटाउनुपर्ने र कार्यप्रगतिको आधारमा केन्द्रले अनुदान रकम उपलब्ध गराउने विषय कार्यविधिमा उल्लेख गरिएको छ । ‘कार्यविधिअनुसार विकासकर्ता, प्रवद्र्धक, सामुदायिक संस्था र सहकारी वा निजी वा सार्वजनिक निजी साझेदारी’ लगानी स्वरुपमा अनुदानमा सहभागी हुनेगरी लगानी गर्न पाइने छ । अनुदानमा विद्युतीकरण कार्यक्रमका लागि केन्द्रले माग संकलन गर्ने, छनौट समितिले छनौट गर्ने र प्राविधिक पुनरावलोकन समितिले प्राविधिक पुनरावलोकन गर्ने काम गर्नेछन् । कार्यविधिमा छुट्छुट्टै प्रकृतिका आयोजनाको लागि छुट्टाछुट्टै अनुसूचीको व्यवस्था गरिएको छ । कार्यविधिअनुसार उर्जा खपतको आधारमा मुगु, हुम्ला र डोल्पामा अनुदान रकम कम भएको आधारमा थप रकम उपलब्ध हुनेछ । साथै लक्षित लाभान्वित वर्गलाई थप अनुदान उपलब्ध गराउने विषय कार्यविधिमा उल्लेख गरिएको छ । [pdf id=380125]
सानिमा बैंकको भिसा कार्ड प्रयोगकर्तालाई ३३२ मर्चेन्टहरुमा ४० प्रतिशतसम्म छुट
काठमाडौं । सानिमा बैंकले सानिमा भिसा कार्ड प्रयोगकर्ताहरुलाई नेपालको विभिन्न मर्चेन्टहरुमा विशेष छुट उपलब्ध गराएको छ । ग्राहकहरूले सानिमा बैंकको भिसा कार्ड मार्फत भुक्तानी गर्दा ४० प्रतिशतसम्म छुटको लाभ लिन सक्नेछन् । काठमाडौं, ललितपुर, भैरहवा, वीरगन्ज, चितवन र पोखराको ३३२ मर्चेन्टहरुमा छुट पाउनेछन् । सानिमा बैंकको देशका सातै प्रदेशमा १३० वटा कार्यालय तथा १२३ वटा एटिएम। संचालनमा रहेका छन् । साथै, सानिमा बैंकको डेबिट तथा क्रेडिट कार्ड तथा मोबाइल बैंकिङ्ग एप प्रयोग गर्दा विभिन्न अस्पताल, सपिङ्ग आउटलेट, होटेल, रेष्टुरेन्ट आदिमा विशेष छुटको व्यवस्था रहेको छ ।
नेप्से परिसूचकमा उच्च अङ्कको गिरावट, साढे ५ अर्बको कारोबार
काठमाडाैं । धितोपत्र बजारमा शेयर कारोबार मापक नेप्से परिसूचक आज उच्च अङ्कले ओरालो लागेको छ । नेपाल स्टक एक्सचेञ्जका अनुसार सेयर कारोबार हुने साताको अन्तिम दिन आज नेप्से परिसूचक ४१ दशमलब शून्य दुई अङ्कले ओरालो लागेर दुई हजार एक सय ४९ दशमलब ४१ मा सीमित भएको छ । यस्तै, ठूला कम्पनीको शेयर कारोबारमापन गर्ने सेन्सेटिभ परिसूचक सात दशमलब ८९ अङ्कले ओरालो लागेर चार सय ११ दशमलब २५ मा सीमित भएको छ । कारोबार भएका कूल १३ उपसमूहमध्ये १२ उपसमूहको सेयर मूल्यमा गिरावट आएको छ भने एक उपसमूहको शेयर मूल्यमा वृद्धि भएको छ । कारोबार भएकामध्ये २१ कम्पनीको शेयर मूल्यमा वृद्धि भएको छ । यस्तै, एक सय ८४ कम्पनीको शेयर मूल्यमा गिरावट आउँदा एक कम्पनीको सेयर मूल्यमा कुनै परिवर्तन भएको छैन । कूल एक करोड ४४ लाख ८२ हजार नौ सय ५९ कित्ता से पाँच अर्ब ४७ करोड ७६ लाख २४ हजार सात सय २४ मूल्यमा खरिद बिक्री भए । आजको कारोबारपछि बजार पूँजीकरण ३१ खर्ब तीन अर्ब १५ करोड ६९ लाख ४७ हजार छ सय २५ बराबर रहेको छ । नेप्सेका अनुसार कारोबारका आधारमा शिवम् सिमेन्ट शीर्ष स्थानमा छ । सो कम्पनीको २२ करोड २० लाख १२ हजार एक सय ३१ बराबरको कारोबार भयो । रिडी पावर कम्पनी १७ करोड ८३ लाख १० हजार आठ सय २२, ङादी पावर कम्पनी १६ करोड ९४ लाख २० हजार छ सय ७०, अपि पावर कम्पनी रु १४ करोड चार लाख ४५ हजार आठ सय र माथिल्लो तामाकोसी जलविद्युत् कम्पनी रु १२ करोड ८४ लाख ९९ हजार नौ सय २३ बराबरको कारोबार भई शीर्ष पाँचभित्र पर्न सफल भए । नेप्सेका अनुसार कुमारी धनवृद्धि योजना, सिङ्गटी हाइड्रो इनर्जी र बाराही हाइड्रोपावरको शेयर मूल्यमा १० प्रतिशतले वृद्धि भई सकारात्मक सर्किट लागेको छ । त्यस्तै, एनआइबीएल समृद्धि फण्ड दोस्रो नौ दशमलब ३० र मध्य भोटेकोसी जलविद्युत् कम्पनीका लगानीकर्ताले सात दशमलब ६१ प्रतिशतले कमाउका छन् । त्यस्तै, गुराँस लघुवित्त नौ दशमलब १८, कालिका पावर कम्पनी आठ दशमलब ४८, बलेफी हाइड्रोपावर सात दशमलब ४४, स्वाभिमान लघुवित्त सात दशमलब ३१ र खप्तड लघुवित्तको शेयर मूल्य सात दशमलब ३० प्रतिशतले घटेको छ ।
अब उपभोक्ताले आफुले पिएको पानीको गुणस्तर थाहा पाउनसक्ने
काठमाडौं । अब उपभोक्ताले समेत आफुले पिएको पानीको गुणस्तरको मापन गर्न सक्ने भएका छन् । फिनटेक कम्पनी दियालो टेक्नोलोजिजले विकास गरेको पूर्ण अटोमेशनको स्मार्ट वाटर प्रविधिको सहायताले उपभोक्ताले पानीको गुणस्तरको मापन गर्न सक्ने भएका हुन् । स्मार्ट वाटर प्रविधि अन्तरगत रहेको एक सेन्सर मार्फत खानेपानी समिति मात्र नभएर उपभोक्ताले समेत आफ्नो घरमा आएको खानेपानीको गुणस्तर थाहा पाउन सक्ने छन् । राजधानीको टोखा खानेपानी समितिबाट पाइलट प्रोजेक्टका रूपमा सुरू गरिएको यस प्रणालीलाई लागु गर्न देशभरका खानेपानी समितिहरू उत्सुक देखिएको कम्पनीले जानकारी दिएको छ । कम्पनीको अनुसार हाल केही समितिहरूमा यस प्रणाली लागु हुने क्रममा छ । हालसम्म करिब ६ सयवटा खानेपानी समितिहरुलाई डिजिटलाईजेशन गरिसकेको दियालोले खानेपानी क्षेत्रका सम्पूर्ण प्रक्रियालाई अन्तराष्ट्रिय मापदण्डको बनाउने उदेश्यसहित यो प्रणालीको विकास गरेको जनाएको छ
दाङ्गको लमहीमा खुल्यो होटल ग्रीन लुम्बिनी
काठमाडौं । दाङ्गको लमहीमा होटल ग्रीन लुम्बिनी खुलेको छ । सिद्धार्थ विजनेश ग्रुप अफ हस्पिटालिटीसँग व्यवस्थापकीय साझेदारीमा खुलेकाे यस होटलले शुक्रबारदेखि सेवा दिने जनाएको छ । होटल ग्रीन लुम्बिनीमा २० वटा अत्याधुनिक सुविधा युक्त कोठा, तालिम र पार्टीका लागि ३ वटा फरक फरक क्षमता भएका हल, पारिवारीक वातावरण भएको रेष्टुरेन्ट, प्राइभेट डाइनिङ हल, बार, स्विमिङ पुल,स्पा लगायतका सुबिधाहरु उपलब्ध रहेका छन । होटलले निकट भविष्यमा ४२ वटा अत्याधुनिक सुविधा युक्त कोठा, जिम् , हेल्थ क्लब, साथै चार तारे स्तरीय सुविधा दिने योजना रहेको जनाएको छ । सिद्धार्थ ग्रुपले भैरहवामा पाँच तारे होटल सञ्चालनको तयारी गरिरहेको जानकारी दिएको छ ।
यी हुन् अटो एक्स्पोमा राखिएका ६०० किलोमिटरसम्म रेञ्ज दिने विद्युतीय कार, यस्तो छ मूल्य र विशेषता
नयाँ दिल्ली, भारत । बुधबारदेखि भारतको नयाँ दिल्लीमा अटो एक्स्पो २०२३ सुरु भएको छ । बुधबार भारतको ग्रेटर नोयडामा अटो एक्स्पो २०२३ सुरु भएको हो । प्रदर्शनीमा विभिन्न कम्पनीले विभिन्न मोडलका गाडीहरु प्रदर्शनीमा राखेका छन् । । एक्स्पोमा विशेष गरेर विद्युतीय सवारी साधनहरुको बाहुल्यता छ । बुधबार अर्थात् पहिलो दिन ५९ मोडलका सवारी साधनहरु सार्वजनिक गरिएको थियो । जसमा सबैभन्दा बढी विद्युतीय गाडीको नै वर्चश्व थियो । बुधबार आधा दर्जन बढी कम्पनीले विद्युतीय गाडीहरु प्रदर्शनीमा राखेका थिए । बुधबार मारुती, सुुजुकी, हुन्डाई, टाटा, किआ, एमजी र बीवाईडी कम्पनीहरूले करिब दुई दर्जन मोडलका विद्युतीय गाडी प्रदर्शन गरेका छन् । ती विभिन्न कारहरु २०२३ देखि २०२५ सम्म भारतीय बजारमा आउन आउने बताइएको छ । प्रदर्शनीमा मारुतीको इभीएक्स, हुण्डाई आइकोनिक–५, आइकोनिक–६, टाटा सियरा, टाटा हैरियर, टाटा कर्व, टाटा अविन्या, एमजी इएचएस, एमजी फोर, एमजी फाइभ, मिफा–८ र किया ईभी–९ लगायतका विद्युतीय गाडीहरु प्रदर्शनीमा राखिएका छन् । एक्स्पो सर्वसाधारणका लागि भने भोलि अर्थात् शुक्रबार मात्रै खुल्ला गरिने छ । दुई पाँग्रे सवारी साधनहरु पनि प्रदर्शनीमा उल्लेख्य मात्रामा छन् । टर्क मोटर, लाइजर, मेटर, कार्टस्, भिडा, बजाज, टीभीएस लगायतका ब्राण्डले ईभी प्रदर्शनीमा राखेका छन् । यस्ता छन् कारका विशेषता इभीएक्स भारतीय कार उत्पादक कम्पनी मारुती सुजुकी इन्डिया लिमिटेडले अटो एक्स्पो २०२३ मा ईभीएक्स विद्युतीय गाडी सार्वजनिक गरेको छ । यस ईभीको लम्बाइ ४ हजार ३०० एमएम, चौडाइ १ हजार ८०० एमएम र उचाइ १ हजार ६०० एमएम रहेको बताइएको छ । यस कारमा ६० किलोवाट आवरको ब्याट्री प्याक, ५५० किलोमिटरसम्म ड्राइभिङ रेन्ज र मूल्य अधिकतम् २० लाख रुपैयाँ भारु तोकेको छ । यो गाडी २०२५ सम्म बजारमा ल्याउने बताइएको छ । आइकोनिक–५ र ६ कोरियन अटोमोबाइल कम्पनी हुन्डाई मोटर्सले इलेक्ट्रीक कार आइकोनिक ५ र आइकोनिक –६को सार्वजनिक गरेको छ । यी दुवै कारण धेरैले रुचाइएका मध्येका कार हुन् । आइकोनिक–५ मा ६२१ किलोमिटर रेञ्ज, ७२.६ किलोवाट आवरको ब्याट्री छ भने ४४.९५ लाख रुपैयाँ भारु मुल्य निर्धारण गरिएको छ । हुण्डाई आइकोनिक–६ को भने ७७.४ किलोवाट ब्याट्री, ६१० किलोमिटरको रेञ्ज रहेको छ । यो कारको मूल्य भने निर्धारण गरिएको छैन । टाटा टाटा कम्पनीले पनि विभिन्न मोडलका विद्युतीय गाडी सार्वजनिक गरेको छ । यस कम्पनीले टाटा कर्व, टाटा अविन्या, टाटा हैरियर र टाटा सियरा कार प्रदर्शनीमा राखेको छ । यी सबै गाडीहरु २०२४ देखि २०२५ भित्र बजारमा पठाउने कम्पनीको दावी छ । यी गाडीहरुको रेञ्ज ४०० देखि ५०० किलामिटरसम्मको रेञ्ज छ । एमजी एमजीले पनि विभिन्न मोडलका विद्युतीय गाडी प्रदर्शनीमा राखेको छ । एमजी इएचएस, एमजी फोर, एमजी फाइभ मोडलका विद्युतीय गाडी प्रदर्शनीमा छन् । एमजी फोरले युरोपमा फक्सवागन आईडी थ्री तथा किया निरो ईभीसँग समेत प्रतिस्पर्धा गर्ने अनुमान गर्न थालिएको छ । एमजी फोरले एक पटकको फुल चार्जमा ४ सय ५० किलोमिटर रेन्ज दिने कम्पनीले दावी गरेको छ । एमजी फोरको ५१ देखि ६४ किलोवाट आवरको ब्याट्री अप्सनमा छ । एमजी फाइभको पनि ४०२ किलोमिटर रेञ्ज र ६१.१ किलोवाट ब्याट्री छ । एमजीको विद्युतीय कार एमजी जेडएस ईभी नेपाली बजारमा समेत उल्लेख्य संख्यामा बिक्री भएको थियो । किया ईभी–९ किया मोटर्सले प्रदर्शनीम किया ईभी–९ मोडलको विद्युतीय कार राखेको छ । यस कारले एक पटकको फुल चार्जमा ५४० किलोमिटरको रेन्ज दिने बताइएको छ । इभी ९ को लम्बाइ ४९३० एमएम, चौडाइ २०५५ एमएम र उचाइ १७९० एमएमको रहेको छ । यो एसयूभीको ह्वील वेसको लम्बाइ भने ३१०० एमएमको रहेको छ । यस कारलाई २० मिनेट चार्ज गर्दा ८० प्रतिशत हुने बताइएको छ । जसको ७७.४ किलोवाट आवर ब्याट्री प्याक रहेको छ ।
माथिल्लो चमेलिया जलविद्युत आयोजनाको निर्माण अन्तिम चरणमा
काठमाडाैं । अपि पावर कम्पनीले आफ्नो छैठौं आयोजनाको रुपमा निर्माण गरिरहेको माथिल्लो चमेलिया जलविद्युत आयोजनाको निर्माण कार्य अन्तिम चरणमा पुर्याएकाे छ । दार्चुला जिल्लामा कम्पनीले यस अघि ८.५ मे.वा क्षमताको नौगड गाढ जलविद्युत आयोजना र ८ मे.वा क्षमताको माथिल्लो नौगड गाढ जलविद्युत आयोजनाको निर्माण सम्पन्न गरी राष्ट्रिय प्रशारण लाईनमा प्रवाह गरिरहेको छ । कम्पनीले मिश्रित उर्जा नितिलाई आत्मसाथ गर्दे ४ मे.वा क्षमताको चन्द्रनिगापूर सौर्य आयोजना, १ मे.वा क्षमताको ढल्केवर सौर्य आयोजना र १ मे.वा क्षमताको सिमरा सौर्य आयोजनाको निमार्ण सम्पन्न गरि यि सौर्य आयोजनाहरु समेत राष्ट्रिय प्रशारण लाईनमा प्रवाह गरिरहेको छ । दुई वटा जलविद्युत आयोजनाहरु र तिन वटा सौर्य आयोजनाहरु संचालन गरिरहेको यो कम्पनीले आफ्नो संस्थापनकाल बाटनै शेयरधनिहरुलाई लाभांश वितरण गरिरहेको नेपालको यो एक ठूलो उर्जा कम्पनी रहेको छ । कम्पनीले आफ्नो छैठौं आयोजना स्वरुप ४० मे.वा क्षमतको माथिल्लो चमेलिया जलविद्युत आयोजनाको निर्माण कार्य अन्तिम चरणमा पूगेको कम्पनीका कार्यकारी संचालक संजिव न्यौपानेले बताए । दार्चुला जिल्लामा बहने चमेलिया नदिमा उक्त आयोजना निर्माण भईरहेको छ । आयोजनाबाट उत्पादित विद्युत शक्ति ने.वि.प्रा को चमेलिया जलविद्युत आयोजनाको बलाँच सवस्टेशनमा १३२ के.भिका टावरहरुबाट जडान गरिनेछ । आयोजनाको निर्माण कम्पनीले २४ महिना भित्रै सम्पन्न गर्न लागेको हो । कम्पनीको यो छैठौं आयोजनाको निर्माण पश्चात कम्पनीले शेयरधनिहरुलाई अमm आकर्षक लाभांश दिन सक्ने समेत जनाएको छ । यो आयोजना वि.स २०८० साल बैशाख भित्र संचालनमा आउने समेत कम्पनीले जनाएको छ । हाल आयोजनाको विद्युत गृह, सर्ज टंयाक, सवस्टेशनको निर्माण कार्य सतप्रतिशत सम्पन्न भईसकेको छ भने एलान्मेण्ट तर्फ ८०० मिटर पाइप जडानको अन्तिम कार्य तथा बाँधस्थलको अन्तिम सिभिल कार्य भईरहेको छ । आयोजनामा जेपर्ट, अष्ट्रियाबाट आयात गरिएका मेसिनहरु साईटमा जडानको कार्य समेत सुरु गरिएको छ । आयोजनामा हिमालयन बैंक लि को अगुवाईमा रहेका कन्सोर्टियम बैंकहरुको लगानी रहेको छ ।
