बालुवाटारमा खुल्यो सवा अर्ब बढी लगानीमा लक्जरी बुटिक होटल ‘वर्णवास’
काठमाडौं । काठमाडौंको बालुवाटारमा निर्माण भएको ‘लक्जरियस’ बुटिक होटल ‘वर्णवास’ आज बिहीबारबाट सञ्चालनमा आएको छ । उक्त होटलका सञ्चालक तथा लगानीकर्ता पर्यटन व्यवसायी एवं नेपाली कांग्रेस सांसद राजेन्द्र बजगाईं हुन् । सञ्चालक बजगाईंले विभिन्न कार्यक्रम गर्दै यो महिनाभरिमा पूर्णसञ्चालमा ल्याउने जानकारी दिए । बजगाईंका अनुसार कुल १ अर्ब ३१ करोड रुपैयाँमा निर्माण भएको होटलमा ४८ कोठा छन् । करिब २ रोपनी क्षेत्रफलमा साढे ९ तले लक्जरी बुटिक होटल निर्माण गरिएको हो । होटलमा १८ प्राइभेट ज्याकुजी छ । होटलका कोठामध्ये सबैभन्दा ठूलो ६० वर्गमिटरको हुनेछ । यस्तो कोठा प्रत्येक तलामा एक÷एक वटा छ । तर, अन्य कोठा भने ४० देखि ३४ वर्गमिटरको रहेको उनले बताए । होटलको बुकिङ खुला भइसकेको छ । अहिले १ सय दिनका लागि एउटा कोठाको १ सय ५० देखि ३ सय अमेरिकी डलरसम्म पर्ने बजगाईंले जानकारी दिए । ‘अलि पछि भने यो महँगो हुन्छ, यसको मूल्य ६ सयदेखि ७ सय डलर पर्न जान्छ,’ उनले भने । सञ्चालक बजगाईंका अनुसार तीन तहमा विभाजन गरेर बनाइएको साढे ९ तलाकोे होटलभित्र नेपालका विभिन्न जातजातिको संस्कृति झल्किने वेशभूषा र ग्यालरी राखिएको छ । जहाँ हिमाल, पहाड र तराई गरी सिंगो नेपाल चित्रित गरिएको छ । ‘यो नेपाली संस्कृति र रहनसहनलाई झल्काउने होटल हो,’ उनले भने, ‘यसले नेपाली जात्रा, पर्व, वेशभूषाको प्रमोट गर्छ । यहाँ भएका सबै रुममा नेपाली र मेटरियल प्रयोग गरिएको छ । कार्पेट हात्तीले खाने घाँसबाट बनेको छ, लालीगुँरासको इम्प्रेसन गरिएको छ । बक्खुको मार्बल छ । होटलमा नेपालमै उत्पादन भएका खानेकुराको स्वाद चाख्न पाइने छ ।’ आफ्नो होटल प्रडक्ट नै फरक भएकाले अहिले काठमाडौंमा सञ्चालन भइरहेका तारे होटलहरूसँग सहजै प्रतिस्पर्धा गर्न सकिने उनको भनाइ छ । ‘हाम्रो होटल अरू रेगुलर होटलजस्तो छैन, आफूले सिकेको पनि यही छ र सीप पनि यही छ,’ उनले भने, ‘नेपालमा ठूला भनेर खुलेका होटल बन्द पनि भएका छन्, होटल सांग्रिला, अन्नपूर्णजस्ता होटल बन्दै छन्, हाम्रो प्रडक्ट नै फरक भएकाले चलिरहेकैसँग पनि सहजै प्रतिस्पर्धा गर्न सकिन्छ ।’ अहिले होटलमा कुल १ सय १२ जनाले रोजगारी पाएका छन् ।
राइड सेयरिङ सेवा पनि औद्योगिक व्यवसाय ऐनमा सूचिकृत
काठमाडौं । सरकारले राइड सेयरिङ सेवालाई पनि कानुनी रुपमा मान्यता दिँदै ऐनमा समेटेको छ । उद्योग, वाणिज्य तथा आपूर्ति मन्त्रालयले बिहीबार राजपत्रमा सूचना प्रकाशित गर्दै सेयर राइडिङ सेवालाई औद्योगिक व्यवसाय ऐन, २०७६ को दफा ६५ ले दिएको अधिकार प्रयोग गरी सो ऐनको अनुसूची ८ को क्रमसंख्या ६५ पछि क्रमसंख्या ६६ थपेर सो सेवालाई थपिएको जनाएको छ ।
नेपाल एसबिआईका ग्राहकलाई कालिञ्चोक दर्शनमा छुट हुने
काठमाडौं । नेपाल एसबिआईका ग्राहकलाई कालिञ्चोक दर्शनमा छुट हुने भएको छ । नेपाल एसबिआई मर्चेण्ट बैंकिङ्ग र कालिञ्चोक दर्शन बीच व्यवसायिक सहकार्य गर्ने सहमतिपत्रमा आज हस्ताक्षर भएको छ । सहमतिपत्रमा कालिञ्चोक दर्शनका अध्यक्ष बालकृष्ण शिवाकोटीको उपस्थितिमा नेपाल एसबिआई मर्चेण्ट बैंकिङ्गका प्रबन्ध सञ्चालक तथा प्रमुख कार्यकारी अधिकृत लेखनाथ पोख्रेल र कालिञ्चोक दर्शनका प्रमुख कार्यकारी अधिकृत अशोक शिवाकोटीले हस्ताक्षर गरेका हुन् । उक्त सहमतिपत्रमा उल्लेख भए बमोजिम नेपाल एसबिआई बैंकमा डिम्याट खाता खोली डिम्याट खाता सञ्चालन गर्दै आएका डिम्याट सेवा प्रयोगकर्ता ग्राहकहरु र आगामी दिनमा नयाँ डिम्याट खाता खोल्ने नयाँ ग्राहकहरुलाई कालिञ्चोक दर्शनले सञ्चालन गरेको केबुलबार चढ्दा १० प्रतिशत छुट प्रदान गर्ने सहमति भएको जनाइएको छ । समारोहमा नेपाल एसबिआई मर्चेण्ट बैंकिङ्गका प्रबन्ध सञ्चालक तथा प्रमुख कार्यकारी अधिकृतले यो सहकार्यमा जोडिन पाउँदा खुसी व्यक्त गरे । कालिञ्चोक दर्शनका प्रमुख कार्यकारी अधिकृतले आपसी सहकार्यबाट व्यवसायिक उचाइ हासिल हुने अपेक्षा राखे । समारोहमा दुईवटै संस्थाका वरिष्ठ कर्मचारीहरुको उपस्थिति रहेको थियो ।
बाँसबारी उद्योग जग्गा प्रकरण : कहाँ छन् विनोद चौधरी ?
काठमाडौं । बाँसबारी छाला जुत्ता कारखानाको जग्गामा भएको हिनामिनाको विषयलाई लिएर यतिबेला केन्द्रीय अनुसन्धान ब्यूरो (सीआईबी)ले अनुसन्धान गरिरहेको छ । बाँसबारी छाला जुत्ता कारखानाको जग्गा हिनामिना प्रकरणमा सीआईबीले बिहीबार व्यवसायी अरुण चौधरी र बाँसबारी छाला जुत्ता कारखानाका तत्कालीन प्रमुख अजितनारायण थापालाई पक्राउ गरेको छ । कारखानाको १० रोपनी जग्गा सिजी ग्रुप अन्तर्गतकाे एउटा कम्पनीकाे नाममा नामसारी भएको घटनालाई लिएर अनुसन्धानका लागि सीआईबीले चौधरी र थापालाई पक्राउ गरेको हाे । बाँसबारी छाला जुत्ता कारखानाको १० रोपनी जग्गा च्याम्पियन फुटवेयरको नाममा छ । साे कम्पनी सुरूमा विनाेद चाैधरीकाे परिवारकाे अधिकांश सदस्यहरूकाे नाममा रहेकाेमा अहिले अरूण चाैधरी र उनकाे श्रीमती शिला चाैधरीकाे नाममा छ । सीआईबीले अहिले चौधरीको पनि खोजी कार्य भइरहेको बताएको छ । पाँच दिन अगाडि नवलपरासीमा एक खेलकुद कार्यक्रममा देखिएका चौधरी त्यस यताका सार्वजनिक कार्यक्रममा भने देखिएका छैनन् । माघ १३ गते नवलपरासीको जगन्नाथपुरमा आयोजित कार्यक्रममा बिनोद चौधरी । संघीय संसदका प्रवक्ता एकराम गिरीले पनि सांसद चाैधरी सम्पर्कमा नरहेकाे बताएका छन् । संसदको नियमित अधिवेशन चलेको अवस्थामा बाहेक अन्य अवस्थामा सांसदहरू नियमित सम्पर्कमा रहने कानुनी व्यवस्था नभएको उनकाे भनाइ छ । ‘अधिवेशन चलिरहेको बेलामा संसदको १० वटा बैठकमा नियमित अनुपस्थित हुनुपर्ने भएमा लिखित जानकारी गराउनुपर्छ, कानूनले अधिवेशन नभएको बेलामा सांसदले कहाँ जाने हो भनेर जाने व्यवस्था छैन,’ उनले भने । नेपाली कांग्रेस संसदीय दलका प्रमुख सचेतक रमेश लेखकले पनि विनोद चौधरीसँग आवश्यक काम नभएकाले पनि यतिबेला सम्पर्कमा नभएको जानकारी दिए । चौधरी ग्रुपका महाप्रबन्धक मधुसुदन पौडेलसँग यस विषयमा बुझ्दा उनले बताउन अस्वीकार गरे ।
मेटलाइफ विश्वको सबैभन्दा प्रशंसित कम्पनीको सूचीमा पर्न सफल
काठमाडौं । मेटलाइफले आफु फच्र्युन म्यागजिन २०२४ को ‘विश्वको सबैभन्दा प्रशंसनीय कम्पनीहरू’ को सुची मा पर्न सफल भएको भन्ने घोषणा गरेको छ । उत्कृष्ट प्रतिष्ठित कम्पनीहरूको वार्षिक प्रतिवेदन कार्डमा आठ जीवन बीमा कम्पनीहरुलाई उल्लेखित गरिएको थियो । लगानी मूल्य, व्यवस्थापनको गुणस्तर, सामाजिक उत्तरदायित्व तथा प्रतिभालाई आकर्षित गर्ने क्षमताजस्ता नौ विभिन्न कारकहरुमा बीमा उद्योगका कार्यकारीहरु, निर्देशकहरुसँग सर्वेक्षण गरि बीमा उद्योगमा सबैभन्दा बलियो प्रतिष्ठा भएका कम्पनीहरुको पहिचानका लागि फच्र्युुनको कर्न फेरि नामक विश्वव्यापि संगठनात्मक परामर्शदाता कम्पनीसँग सहकार्य रहेको छ । मेटलाइफका अध्यक्ष र सीईओ मिशेल खलफले भने, ‘हामी हाम्रा सबै सरोकारवालाहरूका लागि साझा मूल्यको सद्भावपूर्ण सर्कल सिर्जना गरेर हाम्रो उद्देश्यलाई जीवनमा ल्याउँछौं । यो मान्यता हाम्रा कर्मचारीहरूको हो जसले हाम्रा ग्राहकहरू र विश्वभरका समुदायहरूका लागि थप विश्वस्त भविष्य निर्माण गर्न हरेक दिन काम गर्छन् ।’
निर्यात व्यवसायी महासंघको चौथो वार्षिकोत्सवमा उत्कृष्ट निर्यातकर्ता सम्मानित
काठमाडौंं । निर्यात व्यवसायी महासंघ नेपाल (फिन) ले आफनो स्थापना दिवस तथा चौथो वार्षिकोत्सव समारोह भव्यतापूर्वक सम्पन्न गरेको छ । उक्त चौथो वार्षिकोत्सव कार्यक्रम बुधबार राजधानीमा सम्पन्न भएको हो । फिनका अध्यक्ष शंकर प्रसाद पाण्डेको अध्यक्षता तथा अर्थ मन्त्री डा. प्रकाश शरण महतको प्रमुख आतिथ्यतामा सम्पन्न वार्षिकोत्सव कार्यक्रममा नेपाल सरकारका मुख्य सचिव बैकुण्ठ अर्याल, सांसद् गणेश पराजुली, नेपाल उद्योग वाणिज्य महासंघका अध्यक्ष चन्द्र प्रसाद ढकाल, नेपाल चेम्बर अफ कमर्सका अध्यक्ष राजेन्द्र मल्ल बिशिष्ठ अतिथि थिए । कार्यक्रममा वाणिज्य सचिव नारायण प्रसाद शर्मा दवाडी, राष्ट्रिय योजना आयोगका सचिव तोयानारायण ज्ञवाली, नेपाल उद्योग वाणिज्य महासंघका बरिष्ठ उपाध्यक्ष अन्जन श्रेष्ठ, उपाध्यक्ष हेमराज ढकाल, नेपाल सरकारका उच्च पदस्थ अधिकारीहरु, फीनका सल्लाहकार पूर्व अर्थमन्त्री डा. युवराज खतिवडा, पूर्व सचिव चन्द्र कुमार घिमिरे, युरोपियन युनियनका नेपाल प्रतिनिधि एवं राजदुतहरु अतिथिका रुपमा कार्यक्रममा सहभागी थिए । कार्यक्रममा अर्थमन्त्री डा. प्रकाश शरण महतले आर्थिक वृद्धि, रोजगारी सृजना, राजश्व बृद्धि, र दिगो विकासलाई प्रवर्द्धन गर्न निर्यातकर्ताहरूले खेल्दै आएको भूमिका महत्वपूर्ण रहेको उल्लेख गदै निर्यात व्यापारलाई देशको अर्थतन्त्रको मेरुदण्डका रुपमा विकास गर्न आवश्यक रहेको औंल्याए । अर्थमन्त्री डा. प्रकाश शरण महत महासंघको भूमिकाको प्रशंसा गर्दै भने, ‘तमाम निर्यात व्यवसायी साथीहरुको समर्पण र कडा परिश्रमले विश्व बजारमा नेपाली उत्पादनको बजार माग उकास्न र हाम्रो निर्यात क्षमता विस्तार गर्न महत्वपूर्ण योगदान रहदै आएको छ’ । मन्त्री महतले निर्यात व्यवसायी महासंघ नेपालका अध्यक्षले उठान गरेको सवालहरु सबै जायज मागहरु रहेको उल्लेख गर्दै सरकारले चाहदा चाहदै पनि देशमा आर्थिक स्रोतको कमीका कारण तत्काल संबोधन गर्न नसिएको र निकट भबिष्यमा निर्यातकलाई सहुलियत उपलब्ध गराईने प्रतिबद्धता व्यक्त गरे । त्यसैगरि उनले भारतसँगको व्यापार सम्झौताबाट फाईदा लिन छाडेर साफटाको बिषय उठाउन आवश्यक नरहेको प्रष्ट पारे । उनले निर्यात क्षेत्रको भविष्य निकै राम्रो रहेको बताउँदै निर्यातमुखी अर्थतन्त्रका लागि सरकारले वातावरण तयार पार्न सक्दो प्रयास जारी राख्ने समेत उल्लेख गरे । डा. महतले नेपाली उत्पादनहरु उच्च प्रविधियुक्त भन्दा पनि मौलिक हुनुपर्नेमा जोड दिए । सो अवसरमा निर्यात व्यवसायी महासंघ नेपालका अध्यक्ष शंकर प्रसाद पाण्डेयले पहिला के के भयो भएन भन्नेमा भन्दा अब कसरी अगाडी बढ्ने भन्ने चर्चा गर्नु बढी सान्दर्भिक र व्यावहारिक हुने उल्लेख गदै निर्यात वृद्धिका लागि लक्ष्य तोकी काम गर्न सक्ने विभाग तथा शाखा नहुँदा यो क्षेत्र सधै उपेक्षित रहेको औंल्याए । अध्यक्ष पाण्डेले निर्यात वृद्धिका लागी सहुलियतपूर्ण ऋणको व्यवस्था मिलाउन माग राख्नुहुँदै यस प्रकारको सुविधाले निर्यातमा उल्लेख्य वृद्धि हुने दाबी गर्दै भने, ‘निर्यात वृद्धिको लागी बढीमा साढे ६ व्याजदरमा सहुलियत पूर्ण ऋणको व्यवस्था गर्न जरुरी छ । ऋणको लागि चाहिनेरकमको श्रोत पहिचान गर्न एवं कार्यविधि बनाई पूर्ण सदुपयोग हुने गरी कार्यान्वयनमा लाने कुरामा हामी सहयोग गर्न सदैव तयार छौ । अर्को हामीले निर्यात वृद्धिका लागी एउटा छुट्टै निर्यातलाई सहयोग पुग्ने खालको निर्यात नीतिको तर्जुमा गरी कार्यान्वयनमा ल्याउन जरुरी देखेका छौं।’ त्यस्तै, उनले सरकारले दिने नगद अनुदान रकम कम हुँदा साना उद्यमीहरुले अनुदान पाउन नसकेकोले अनुदान रकम बढाउनु पर्ने, निर्यात क्षेत्रका निम्ति छुट्टै एफडिआई नीति ल्याउनुपर्ने, नेपालमै बिक्री केन्द्र र अन्तराष्ट्रिय स्तरको मेला आयोजना गर्न घर, लिजमा जग्गा उपलब्ध तथा एक्पोर्ट भिलेजको आवश्यक रहेको, निर्यातजन्य केहि वस्तुको कच्चा पद्धार्थ आयातमा भन्सार बृद्धि भएकाले सोको पुनरावलोकन हुनुपर्ने, ऊनी, कपास र तरकारीमा लगाईएको मुल्य अभिबृद्धि कर हटाउनुपर्ने, कर छुट कायम राख्नुपर्ने माग राख्नुहुँदै बजेटले निर्यात भएपछि स्वतः निर्यातक कम्पनीको खातामा निर्यात अनुदान जम्मा हुने स्वचालित प्रणाली, निर्यातलाई व्यवस्थित गर्ने स्थायी संयन्त्रको व्यवस्था लगायतका विषयलाई बजेटले सम्बोधन गर्न नसकेको र समग्र बजेट सकारात्मक रहने भए पनि कार्यान्वयनमा भने समस्या रहदै आएको उल्लेख गरे । अध्यक्ष पाण्डेले निजी क्षेत्रको प्रयासबाट दाँयारा बढाउदै निर्यात व्यवसायीहरुले १५५ देशसम्म नेपालका उत्पादन नियमित निकासी गर्दै आएको जनाउँदै १२८ देशसँग नेपालको व्यापार घाटा रहेको जानकारी समेत गराए । कार्यक्रम माझ नेपाल सरकारका मुख्य सचिव डा. बैकुण्ठ अर्यालले हुलाक मार्फत ई कमर्सलाई दुरदराजदेखी विश्वसम्म जोडन सकिने हुँदा यसको प्राविधिक पक्षको सबलीकरणमा सरकारले जोड दिएको उल्लेख गरे । साथै उनले नेपालको लोजिस्टिक सेवा कमजोर रहेकोले सोमा सुधार गर्न र विश्वबजारमा जाँदा आफनो कम्पनीको एकल उत्पादन भन्दा सामुहिक व्यवसायिक हितको निम्ती उदार बन्न पनि निर्यातकहरुलाई आग्रह गरे । सांसद गणेश पराजुलीले उत्पादनशिल क्षेत्रको ५ प्रतिशत मात्र योगदान रहेको जनाउँदै निर्यात माथि जोड नदिईदा रेमिटेन्समुखी भएकाले अर्थतन्त्र उकासिन नसकेको जिकिर गरे । कार्यक्रममा नेपाल उद्योग वाणिज्य महासंघका अध्यक्ष चन्द्र प्रसाद ढकालले उत्पादनशिल क्षेत्रमा आयात प्रतिस्थापन गर्ने गरि बजेट आउने हो भने विदेशी मुद्रा बढने र आयात निर्यात बीचको असन्तुलनमा कमी आउने उल्लेख गरे । नेपाल चेम्बर अफ कमर्सका अध्यक्ष राजेन्द्र मल्लले निर्यातक भनेका विदेशी मुद्रा आर्जन गर्ने राष्ट्र शक्ति भएकाके यस क्षेत्रका तमाम समस्या हल गर्न सरकार गम्भिर बन्न जरुरी रहेको औंल्याए । उत्कृष्ट निर्यातकर्ताहरू सम्मानित वार्षिकोत्सवको अवसरमा महासंघले उत्कृष्ट निर्यातकर्ताहरूलाई सम्मान गरेको छ । सम्मानित हुनेहरूमा नेपाल पस्मिना इन्ड्रष्टिज एसोसिएशनबाट कर्केन कुमार गुरुङ, नेपाल ऊल फेल्ट प्रड्युसर्स एण्ड एक्पोर्टस एसोसिएशनबाट महेश्वर श्रेष्ठ, गार्मेन्ट एसोसिएशन अफ नेपालबाट शक्ति कुमार गोल्यान र फेडेरेशन अफ लार्ज कार्डामोम इन्टरप्रेनर्स अफ नेपालबाट ईन्द्र कुमार अग्रवाल, त्यसैगरी नेपाल ह्याण्डमेड पेपर एसोसिएशनबाट पद्मरत्न धाख्वा, नेपाल हर्बस एण्ड हर्बल प्रोडक्ट्स एसोसिएशनबाट प्रसुन सत्याल, नेपाल कार्पेट प्रड्युसर एण्ड एक्सपोर्ट एसोसिएशनबाट छेवाङ्ग डाम्डुल लामा, नेपाल जिन्जर प्रोडुसर्स एशोसिएसनबाट श्याम लिम्बु, अर्गानिक एशोसियसन अफ नेपालबाट तारा बास्कोटा, फेयर टेड ग्रुपबाट मिलन भटराई, हिमालयन अर्थोडक्स टिबाट निरज राठी, फुटवेयर म्यानुफयाक्चरर एशोसियसन नेपालबाट विदुषी राणा, नेपाल कथ्था उत्पादक संघबाट कैलाश चन्द्र गोयल, ह्याण्डिक्राप्ट ग्लास उद्योग फ्रफोसन एशोसियसन अफ नेपालबाट गोपी प्रसाद कँडेल, नेपाल ब्रुम एशोसियसनबाट संजिव शाह, नेपाल प्लाई म्यानुफयाक्चरर एशोसियसनबाट बिष्णुमदोगदिया, नेपाल डेरी एशोसियसनबाट निराजन कोईराला, रुद्राक्ष व्यवसायी संघबाट शालिक राम थापा र नेपाल कफी प्रोड्युसर्स एशोसियसनबाट बोधराज अर्याल हुनुहुन्छ । सोही अवसर माझ निर्यात स्मारिका २०८० का अतिथि सम्पादक सरोज ओझा र कथा नेपाललाई कदर पत्र प्रदान गरियो । बार्षिकोत्सवमा उपस्थित प्रमुख अतिथि तथा सबै अतिथिहरूलाई मायाको चिनो प्रदान गरिएको थियो । यसैगरी सो पूर्व फिनले आफनो बन्द सत्र कार्यक्रम सम्पन्न गरेको थियो । उक्त सत्रमा महासचिव देवानन्द सरावगीले प्रतिवेदन सार्वजनिक गर्नुहुँदै निर्यात प्रबद्र्धनसंग जोडिएका विभिन्न सवालहरुमा निरन्तर सक्रिय रुपले सम्बन्धित सरोकारवालासंगको महासंघले औपचारिक तथा अनौपचारिक छलफल र अन्तरक्रिया कार्यक्रमहरुमा सहभागीता जनाउदै आएको जानकारी दिए । उनले आफ्ना सदस्य संघहरुले उठाएका सवालहरुलाई लिएर नेपाल सरकारका सम्बन्धित निकायहरुको ध्यानाकर्षण गराउने र नीतिगत सुधार तथा कार्यान्वयनमा देखिएका समस्याहरुको बिषयमा बहस तथा पैरवीका कार्यक्रमहरु गरिएको बारे प्रकाश पारेका थिए । महासचिव सरावगीद्वारा प्रस्तुत प्रतिवेदनमा निर्यातजन्य बस्तुगत संघहरु तथा निर्यातकर्ता व्यवसायीहरुको छाता संगठन भएकाले नेपालबाट निर्यात हुने बस्तुको उत्पत्तीको प्रमाणपत्र जारी गर्नका लागि निर्यात व्यवसायी महासंघलाई अधिकार दिईनु पर्ने, नेपालबाट निर्यात हुने वस्तुको लागि स्वदेशमा पर्याप्त मात्रमा कच्चा पदार्थ उत्पादन हुन नसकेको कारण निर्यात रकमको ठूलो हिस्सा विदेशिएकाले त्यसबाट अर्थतन्त्र प्रभावित बन्दै आएको, लागत मुल्य पनि बढ्ने हुदाँ च्याङग्रा तथा भेडा पालन, सिल्क धागो उत्पादन, कपास खेती तथा स्थापना भईसकेका कपडा मिलहरुलाई सुचारु रुपमा चलाउन समुचित व्यवस्था गरिनुपर्ने जस्ता सवालहरु उठान गरे ।
माघ २५ देखि क्यान इन्फोटेक २०२४ हुँदै
काठमाडौं । आउँदो माघ २५ गतेदेखि काठमाडौंमा क्यान इन्फोटेक २०२४ सञ्चालन हुने भएको छ । बिहीबार पत्रकार सम्मेलन गरेर यसबारेमा जानकारी गराइएको हो । मेलाको तयारी अन्तिम चरणमा पुगेको आयोजकले जनाएको छ । सूचना तथा सञ्चार प्रविधि क्षेत्रमा विकास भएका नयाँनयाँ प्रविधिको प्रदर्शनी तथा यस क्षेत्रको विकासका लागि आवश्यक रणनीति निर्माणका निम्ति सार्थक अन्तक्रिया गर्ने उद्देश्यले कम्प्युटर एसोसिएसन नेपाल महासंघ (क्यान महासंघ) को आयोजनामा मेला गर्न लागिएको बताइएको छ । पत्रकार सम्मेलनमा बोल्दै क्यान महासंघका महासचिव चिरञ्जीवि अधिकारीले माघ २५ गतेबाट भृकुटीमण्डपस्थित प्रदर्शनी हलमा २९ औं संस्करणको क्यान इन्फोटेक मेला हुन लागेको बताए । उनले यस पटक क्यान इन्फोटेकको टिकेटिङ पार्टनर ईसेवामार्फत इन्फोटेकको टिकेट खरिद गर्न सकिने व्यवस्था गरेको र यस अन्तर्गत सर्वसाधारणका लागि एक सय र विद्यार्थीका लागि ५० रुपैयाँ शुल्क तोकिएको बताए । उनले क्यान इन्फोटेक २०२४ मा नेपालमै विकास गरिएको जेनेरेटिभ एआई सिस्टम कान्छी रोबटको बेटा संस्करण सार्वजनिक हुने बताए ।
प्रभु महालक्ष्मीको सेयर विवरण गलत, हुनै सक्दैन प्रभु बैंकको २१ अर्ब ९६ करोड लगानी
काठमाडौं । प्रभु महालक्ष्मी लाइफ इन्स्योरेन्सले वार्षिक प्रतिवेदनमा गम्भीर त्रुटी गरेको भेटिएको छ । कम्पनीले सार्वजनिक गरेको वार्षिक प्रतिवेदनमा लगानीकर्ताहरू झुक्किन सक्ने गरी त्रुटीपूर्ण विवरण प्रकाशित गरिएको हो । कम्पनीले साविक प्रभु लाइफ र महालक्ष्मी लाइफको आर्थिक वर्ष २०७८/७९को वित्तीय विवरणहरूसहित एउटै वार्षिक प्रतिवेदनमा समावेश गरेर राखेको छ । तर, उक्त वार्षिक प्रतिवेदन अनुसार कम्पनीमा प्रभु बैंकले मात्र २१ अर्ब ९२ करोड रुपैयाँ सेयर लगानी गरेको देखिन्छ । जवकी प्रभु महालक्ष्मीको चुक्ता पुँजी २ अर्ब १९ करोड रुपैयाँ मात्र रहेको छ । आर्थिक वर्ष २०७८/७९को वार्षिक प्रतिवेदनको पृष्ठ नम्बर ५४ मा साविक प्रभु लाइफमा एक प्रतिशत वा एक प्रतिशतभन्दा बढी सेयर स्वामित्व रहेका सेयरधनीहरूको सूची छ । उक्त तथ्याङ्क अनुसार इन्स्योरेन्स कम्पनीमा प्रभु बैंकको सबैभन्दा धेरै १० प्रतिशत अर्थात् २१ करोड ९६ लाख कित्ता सेयर छ । अंकित मूल्य १ सय रुपैयाँका दरले बैंकको सेयर स्वामित्व २१ अर्ब ९६ करोड रुपैयाँ हुन आउँछ । जबकी सोही वार्षिक प्रतिवेदनमा कम्पनीको पुँजी २ अर्ब १९ कराेड ६० लाख रूपैयाँ रहेको उल्लेख छ । कम्पनीले प्रभु बैंकको सेयर स्वामित्व मात्रै होइन, अन्य सेयरधनीहरूको तथ्याङ्क पनि गलत राखेको हो । कम्पनीमा सांग्रिला डेभलपमेन्ट बैंकको १९ करोड ५१ लाख, नेपाल इन्भेष्टमेन्टको १३ करोड ३७ लाख, प्रभु ग्रुपको १० करोड ९८ लाख, प्रभु म्यानेजमेन्टको ७ करोड ६८ लाख, प्रभु क्यापिटलको ५ करोड ४९ लाख, बिरटा कुमार श्रेष्ठको ३ करोड ८४ लाख, देवी प्रकाश भट्टचनको ३ करोड ८३ लाख कित्ता सेयर स्वामित्व रहेको तथ्याङ्क छ । कम्पनीको तथ्याङ्क अनुसार १ प्रतिशतभन्दा बढी सेयर स्वामित्व भएका १५ सेयरधनीसँग १ अर्ब ६ करोड २५ लाख ३४ हजार कित्ता सेयर रहेको गलत तथ्याङ्क उल्लेख गरेको हो । जसको अंकित मूल्य १ खर्ब ६ अर्ब २५ कराेड ३४ लाख रूपैयाँ हुन्छ । कम्पनीले यसपटक मात्रै होइन, विगतमा पनि गलत तथ्याङ्क प्रयोग गरेको भेटिएको छ । साविक प्रभु लाइफको आर्थिक वर्ष २०७७/७८ र आर्थिक वर्ष २०७६/७७ मा पनि सेयरधनीहरूको सेयर स्वामित्व करोडौंमा राखेको उल्लेख छ । कम्पनीले त्रुटी गरेको उक्त विषय गम्भीर रहेको जानकारहरू बताउँछन् । अध्ययन तथा बिना सम्पादन उक्त तथ्याङ्क उल्लेख गरिएको बुझिन्छ । नेपाल बीमा प्राधिकरणले तोकेको ढाँचामा कम्पनीहरूले वार्षिक प्रतिवेदन तयार पार्नु पर्ने हुन्छ । कम्पनीले सोही ढाँचा अनुसार प्रतिवेदन तयार पारेको भएपनि त्रुटीपूर्ण तयार पारेको हो । कम्पनीले सार्वजनिक गरेको गत आर्थिक वर्ष २०७९/८०को वार्षिक प्रतिवेदनको पृष्ठ नम्बर ५४ मा १ प्रतिशतभन्दा बढी सेयरधनीहरूको सूची छ । उक्त सूची साविक प्रभु लाइफ इन्स्योरेन्स कम्पनीको हुबहु कपि पेस्ट गरेर राखेको छ । कम्पनीका लेखा तथा वित्त विभाग प्रमुख लेखनाथ गौतमले प्रिन्ट मिस्टेक भएर यस्तो भएको हुन सक्ने बताए । निमित्त प्रमुख कार्यकारी अधिकृत सन्तोष प्रसाईले रकम हुनु पर्नेमा कित्ता भएको हुन सक्ने बताए । ‘रकम हुनु पर्ने होला, यदि सेयर भएको छ भने कहिलेकाहीँ मिस्टक भएको हुन सक्छ, प्रुफ रिडिङ गर्दा सबै ठिकै हुन्छ तर, कहिलेकाहीँ छपाउँदा मिस्टेक भएर आउन सक्छ,’ उनले भने ।
