आजको मौसम : वर्षा र हिमपातको सम्भावना
काठमाडौं । नेपालमा पश्चिमी न्यून चापीय प्रणालीको आंशिक प्रभाव रहेको छ । यसका कारण सुदूरपश्चिम प्रदेश, कर्णाली प्रदेश, लुम्बिनी प्रदेश र गण्डकी प्रदेशमा सामान्य बदली तथा बागमती र कोशी प्रदेशको पहाडी भूभागमा आंशिक बदली रही बाँकी भू–भागको मौसम मुख्यतया सफा रहेको जल तथा मौसम विज्ञान विभाग मौसम पूर्वानुमान महाशाखाले जनाएको छ । दिउँसो सुदूरपश्चिम प्रदेश, कर्णाली प्रदेश, लुम्बिनी प्रदेश र गण्डकी प्रदेशसहित देशका पहाडी भू–भागका एक–दुई स्थानमा हल्का वर्षाको सम्भावना रहेको छ । साथै कर्णाली प्रदेश र सुदूरपश्चिम प्रदेशको उच्च पहाडी तथा हिमाली भू–भागका थोरै स्थानमा र बाँकी उच्च पहाडी भेगका केही स्थानमा हल्का हिमपातको सम्भावना रहेको महाशाखाले पूर्वानुमान गरेको छ । रातिको समयमा देशका पहाडी भू–भागमा आंशिकदेखि साधरणतया बदली रही बाँकी भू–भागमा मौसम मुख्यतया सफा रहनेछ । देशका उच्च पहाडी तथा हिमाली भू–भागका एक–दुई स्थानमा हल्का वर्षाको सम्भावना रहेको छ ।
भारतमा बढे विदेशी लगानीकर्ता, विनिमय सञ्चिति साढे ६ खर्ब डलर पुग्ने
काठमाडौं । पछिल्लो समय भारतमा विदेशी लगानीकर्ताको आकर्षण आशातित रूपमा बढ्दै गएको छ । यसको पुष्टि विदेशी विनिमय सञ्चिति उल्लेख्य दरमा बढेको तथ्यांकबाट हुन्छ । पछिल्लो दुई सातामा मात्रै विदेशी मुद्रा सञ्चिति ९ अर्ब ५३ करोड अमेरिकी डलर बढेको हो । शुक्रबार, भारतको केन्द्रीय बैंक रिजर्भ बैंक अफ इन्डिया ९आरबीआई० ले भारतको विदेशी मुद्रा सञ्चिति मार्च १ मा समाप्त भएको सातामा ६ अर्ब ५५ करोड डलरले बढेर ६ खर्ब २५ अर्ब ६२ करोड ६० लाख डलर पुगेको जनएको छ । भारतको विदेशी मुद्रा सञ्चितिमा लगातार दुई सातादेखि वृद्धि भएको छ । अघिल्लो साता कुल विदेशी मुद्रा सञ्चिति २ अर्ब ७५ करोड डलरले बढेर ६ खर्ब १९ अर्ब ७२ करोड डलर पुगेको थियो । विदेशी मुद्रा सञ्चिति अझै पनि उच्च छ । भारतको विदेशी विनिमय दर अक्टोबर २०२१ मा उच्चस्तरमा पुग्यो । जुन ६ खर्ब ४५ अर्ब डलरको अहिलेसम्मकै उच्चस्तर थियो । त्यसयता विदेशी मुद्रा सञ्चिति अहिलेसम्म यो स्तरमा पुगेको छैन । तर, यो वर्ष भारतको विदेशी मुद्रा सञ्चिति ६ खर्ब ५० अर्ब डलर नजिक पुग्न सक्ने विज्ञहरूको विश्वास छ । तथ्यांकले मार्च १ मा समाप्त भएको सातामा विदेशी मुद्रा सम्पत्ति, सञ्चितिको महत्वपूर्ण अंश ६ खर्ब ४ करोड ३० लाख डलरबाट बढेर ५ खर्ब ५४ अर्ब २३ करोड १० लाख १ लाख डलर पुगेको पनि देखाएको छ । डलरको सन्दर्भमा हेर्दा विदेशी मुद्रा सम्पत्तिमा विदेशी मुद्रा भण्डारमा राखिएको यूरो, पाउन्ड र येनजस्ता गैरअमेरिकी एकाइहरूको मूल्यह्रास वा मूल्यह्रासको प्रभाव समावेश छ । आरबीआईका अनुसार साताको अवधिमा सुनको भण्डार ५६ करोड ९० लाख डलरले बढेर ४८ अर्ब ४१ करोड ७० लाख डलर पुगेको छ । योसँगै केन्द्रीय बैंकले विशेष रेखाचित्र अधिकार (एसडीआर) मा पनि कमी आएको बताएको छ । जुन १८ अर्ब १८ करोड डलरबाट १७ अर्ब डलरमा झरेको छ । एजेन्सी
गर्भावस्थामा सिँढी चढ्नु कति सुरक्षित ?
काठमाडों । जब महिलाहरू गर्भावस्थामा हुन्छन् तब चिकित्सकहरू शारीरिकरूपमा सक्रिय रहन सल्लाह दिन्छन् । अहिले धेरैजसो महिलाहरू स्वस्थ जीवनशैली पालना गर्दैनन् । यस्तो अवस्थामा उनीहरूको गर्भावस्थामा नराम्रो असर पर्छ । धेरैजसो महिला घरको भन्दा बजारको खानेकुरा खान मन पराउँछन् । यस्ता खानेकुराले महिलामात्र होइन बच्चाको विकासमा समेत नकारात्मक असर पार्छ । बच्चाले उचित पोषण नपाएमा उसको मानसिक तथा शारीरिक विकास रोकिने डर हुन्छ । उचित पोषणको अभावमा गर्भमा रहेको बच्चामा स्वास्थ्य समस्या देखिने सम्भावना हुन्छ । त्यसैले चिकित्सकहरू गर्भवती महिलालाई नियमितरूपमा शारीरिकरूपमा सक्रिय रहन सल्लाह दिन्छन् । यसले सामान्य डेलिभरीमा समेत मद्दत पुग्ने उनीहरूको भनाइ छ । कतिपय महिलाहरू सुत्केरी हुनुभन्दा केही समयअघि माथि र तल धेरै सिँढीहरू प्रयोग गर्छन् । यसो गर्दा नर्मल बच्चा जन्माउन सजिलो हुने उनीहरूको विश्वास छ । यस्तो अवस्थामा प्रश्न उठ्छ कि सिँढी चढ्दा साँच्चै सामान्य प्रसव हुन्छ वा यो मिथकमात्र हो ? यसबारे थप जानकारी पाउनुहोस् । के सिँढी चढ्दा सामान्य डेलिभरीमा सहयोग पुग्छ ? यदि महिला शारीरिकरूपमा फिट छिन् र गर्भावस्थाको कारणले कुनै शारीरिक समस्या छैन भने गर्भावस्थामा सिँढी चढ्दा कुनै समस्या हुँदैन । उनी बिना हिचकिचाहट तल र माथि गर्न सिँढी प्रयोग गर्न सक्छन् । वृन्दावन र नयाँ दिल्लीमा रहेको मदर्स ल्याप आइभिएफ सेन्टरका मेडिकल डाइरेक्टर, स्त्री रोग तथा आईभीएफ विशेषज्ञ डा. शोभा गुप्ताका अनुसार गर्भावस्थाको नवौं महिनामा सिँढी प्रयोग गर्न कुनै समस्या हुँदैन । उनी नवौं महिनाबाट गुज्रिरहेका महिलाहरूको लागि सिँढी चढ्नु धेरै राम्रो रहेको बताउँछिन् । तर, कुनै किसिमको शारीरिक समस्या नहोस् भन्ने कुरामा भने ख्याल राख्नुपर्छ । यस्तो अवस्थामा गर्भवती महिलाले सामान्य मानिसजस्तै सिँढीमा छिटो हिँड्नु हुँदैन । महिलाले यस्तो अवस्थामा रेलिङको सहारा लिएर बिस्तारै सिँढी चढ्नुपर्छ । यसो हुँदा जोखिम कम हुने गर्छ । डा. शोभा गर्भवती महिलालाई व्यायाम गर्न पनि सल्लाह दिन्छिन् । उनी भन्छन्, ‘नियमित व्यायाम गर्दा सामान्य प्रसवको सम्भावना बढ्छ ।’ हिँड्नेजस्ता हल्का व्यायाम गर्भवती महिलाका लागि धेरै फाइदाजनक हुन्छ । तर, कुनै पनि प्रकारको व्यायाम गर्दा हतार भने गर्न नहुनेमा उनको जोड छ । व्यायामले तनाव मुक्त गर्छ, शरीरलाई लचिलो बनाउँछ र रक्तसञ्चार सुधार गर्छ । यसरी हेर्दा व्यायामले सामान्य प्रसवको सम्भावना बढाउँछ । गर्भावस्थामा कस्ता गतिविधिहरू गर्नु हुँदैन ? गर्भावस्थाको समयमा महिलाहरूले धेरै प्रकारका शारीरिक गतिविधिबाट टाढा रहनुपर्छ । यस्तो बेला के गर्न हुन्छ के हुँदैन यसबारे थाहा पाइराखौँ । एकै पटक धेरै सिँढीहरू चढ्न हुँदैन । छिटो पाइलाहरू लिएर कहिल्यै सिँढीहरू चढ्नु हुँदैन । तीव्र कसरत र भारी लिफ्टिङ गर्न हुँदैन । व्यायाम गर्दा शरीर दुख्ने वा सास फेर्न समस्या हुने गरेर गर्नु हुँदैन । यदि गर्भावस्थामा रगत बगिरहेको छ भने यस्तो बेला व्यायाम गर्न हुँदैन । यस्तो बेला तुरुन्तै डाक्टरसँग परामर्श लिनपर्छ । यदि कुनै महिलाको रक्तचाप कम छ, पहिले गर्भपात भएको छ भने व्यायाम वा सिँढी चढ्ने विषयमा डाक्टरसँग परामर्श लिनुपर्छ । गर्भावस्थामा सिँढी चढ्न र ओर्लिनु एकदमै सुरक्षित हुन्छ । तर, यो अवधिमा महिला होसियार हुनुपर्छ । एजेन्सी
कर्णाली र सुदूरपश्चिमका केही ठाउँमा वर्षा र हिमपातको सम्भावना
काठमाडौं । नेपालमा पश्चिमी न्यून चापीय प्रणालीको आंशिक प्रभाव रहेको छ । यसका कारण सुदूरपश्चिम प्रदेश, कर्णाली प्रदेश, लुम्बिनी प्रदेश र गण्डकी प्रदेशमा सामान्य बदली तथा बागमती र कोशी प्रदेशको पहाडी भूभागमा आंशिक बदली रही बाँकी भू-भागको मौसम मुख्यतया सफा रहेको जल तथा मौसम विज्ञान विभाग मौसम पूर्वानुमान महाशाखाले जनाएको छ । दिउँसो सुदूरपश्चिम प्रदेश, कर्णाली प्रदेश, लुम्बिनी प्रदेश र गण्डकी प्रदेशसहित देशका पहाडी भू-भागका एक-दुई स्थानमा हल्का वर्षाको सम्भावना रहेको छ । साथै, कर्णाली प्रदेश र सुदूरपश्चिम प्रदेशको उच्च पहाडी तथा हिमाली भू-भागका थोरै स्थानमा र बाँकी उच्च पहाडी भेगका केही स्थानमा हल्का हिमपातको सम्भावना रहेको महाशाखाले पूर्वानुमान गरेको छ । रातिको समयमा देशका पहाडी भू-भागमा आंशिकदेखि साधरणतया बदली रही बाँकी भू-भागमा मौसम मुख्यतया सफा रहनेछ । देशका उच्च पहाडी तथा हिमाली भू-भागका एक/दुई स्थानमा हल्का वर्षाको सम्भावना रहेको छ ।
शेर्पा समुदायले ग्याल्पो ल्होसार मनाउँदै, राष्ट्रपति र उपराष्ट्रपतिले दिए शुभकामना
काठमाडौं । शेर्पा समुदायले आज आफ्नो साँस्कृतिक पर्व ग्याल्पो ल्होसार मनाउँदैछन् । हरेक वर्ष फागुन शुक्ल प्रतिपदाका दिन नयाँ वर्षका रूपमा शेर्पा समुदायले ग्याल्पो ल्होसार मनाउने गर्छन् । मुसा, गाई, बाघ, खरायो, ड्रागन, सर्प, घोडा, भेडा, बाँदर, चरा, कुकुर र बराह गरी १२ वर्गमा ग्याल्पो ल्होसारलाई विभाजन गरिएको छ । यो पर्व फागुन शुक्ल प्रतिपदादेखि पूर्णिमासम्म विभिन्न कार्यक्रम आयोजना गरी भव्यरुपमा मनाइन्छ । ग्याल्पो ल्होसार भोटका नवौँ राजा उदे गुङ्ग्यालका पालादेखि वसन्त पर्वका नामले मनाउन सुरु गरिएको हो । पहिले हिमाली क्षेत्रका १२ जिल्लामा मनाइने ग्याल्पो ल्होसार अहिले २२ जिल्लामा मनाइन्छ । शेर्पा जातिको बसाइँसराइसँगै यो पर्व मनाउने जिल्ला बढेको हो । ग्याल्पो ल्होछारको अवसरमा राष्ट्रपति रामचन्द्र पौडेल र उपराष्ट्रपति रामसहायप्रसाद यादवले शेर्पा समुदायलाई पर्व शुभकामना दिएका छन् । राष्ट्रपति पौडेलले शुभकामना दिंदै ग्याल्पो ल्होछारजस्ता पर्वहरूबाट सबै नेपालीबीच एकता, सामाजिक सांस्कृतिक ऐक्यबद्धता, सहिष्णुता, सद्भाव र बन्धुत्वको भावना अभिवृद्धि हुने र यसबाट बृहत् राष्ट्रिय एकतालाई थप सुदृढ गर्न सघाउ पुग्ने विश्वास व्यक्त गरेका छन् । यस्तै, उपराष्ट्रपति यादवले शुभकामना दिंदै ग्याल्पो ल्होछार–२१५१ले नेपालीबीच बन्धुत्व, मेलमिलाप, मैत्रीभाव र पारस्परिक सद्भावलाई अक्षुण्ण राख्न सहयोग पुग्ने विश्वास व्यक्त गरेका छन् । ल्होछार पर्वका अवसरमा शेर्पा समुदायले आफ्नो गाउँघर, टोलमा रहेका बाटोघाटो तथा पानीका मूलहरूको सरसरफाइ गर्ने, नौ प्रकारको अन्न मिसाइएको परिकार गुथुक र खाप्से सबैजना मिलीजुली खाने तथा आपसमा शुभकामना आदानप्रदान गर्दै नयाँ वर्षको स्वागत गर्ने परम्परा छ ।
द्वन्द्वका कारण इजरायलको बजेट घाटा २९.४ बिलियन अमेरिकी डलर पुग्यो
जेरुसेलम । इजरायली सरकारको १२ वर्षको बजेट घाटा सन् २०२३ को फेब्रुअरीको अन्त्यसम्म १०५.१ अर्ब शेकेल (२९.४ बिलियन अमेरिकी डलर) पुगेको छ । सन् २०२३ को फेब्रुअरी र यस वर्षको जनवरी बीचको अघिल्लो १२ महिनाको घाटाको तुलनामा यस समयावधिमा करिब १८ प्रतिशतले वृद्धि भएको छ । गत वर्ष यसै अवधिमा ८९.१ बिलियन शेकेल (२४.९३ अर्ब अमेरिकी डलर) रहेको सरकारी तथ्यांकले देखाएको छ । अर्थ मन्त्रालयले घाटा वृद्धिको मुख्य कारण हमाससँग जारी द्वन्द्वसँग सम्बन्धित उच्च खर्चले गर्दा भएको बताएको छ । एजेन्सी
सर्वोत्तम सिमेन्टको सेयर रजिष्ट्रारमा एनआइएमबी एस क्यापिटल
काठमाडौं । सर्वोत्तम सिमेन्टले सेयर रजिष्ट्रारमा एनआइएमबी एस क्यापिटल नियुक्त गरेको छ । अब यस कम्पनीको सेयरसम्बन्धी कारोबारको रेकर्ड राख्ने, दाखिला खारेज, नामसारी, सेयर अद्यावधिक राख्ने लगायतका सम्पूर्ण कार्यहरु अब एनआइएमबी एस क्यापिटलले गर्नेछ । सर्वोत्तम सिमेन्टले केही समयअघि मात्र आइपीओ जारी गरेको हो । आईपीओमा मागभन्दा १८.२३ गुणा बढी आवेदन परेको थियो । रितपूर्वक भरिएका कुल ९ लाख ५८ हजार ९५९ आवेदकमध्ये ५५ हजार ५२१ जनाले कम्पनीको आईपीओ पाएका छन् । उनीहरूमध्ये २६ जनाले ५१ कित्ताका दरले पाएका छन् भने बाँकीले ५० कित्ताका दरले पाएका छन् ।
पोखराको जानकारी दिन ‘पोखरा घर’, पर्यटकीयस्थल बन्ने विश्वास
कास्की । पोखरामा आर्ट ग्यालरी, सार्वजनिक पुस्तकालय, घण्टाघर र एकीकृत पर्यटन सूचना केन्द्रसहितको ‘पोखरा घर’ निर्माण सुरु भएको छ । पोखरा महानगरपालिकाले महानगरको सातौँ स्थापना दिवस अवसर पारेर आइतबार पोखरा घरको शिलान्यास गरिएको हो । पोखरा–९ पृथ्वीचोकमा निर्माण हुने घरको महानगर प्रमुख धनराज आचार्यले शिलान्यास गरे । पोखरा घुम्न आउने आन्तरिक तथा बाह्य पर्यटकको गन्तव्य बन्ने विश्वास लिइएको छ । घर पाँच तलाको निर्माण हुने भएको छ । यसको लागत रु पाँच करोड एक लाख ४६ हजार पाँच सय ५१ रहेको महानगरका पूर्वाधार विकास महाशाखाका प्रमुख इन्जिनियर सुरेन्द्र पाण्डेले जानकारी दिए । उनका अनुसार घरको निर्माण आगामी डेढ वर्षभित्रमा सम्पन्न गर्ने सम्झौता गरिएको छ । भवनको भुइँतलामा पार्किङ, पहिलो तलामा कोसेली घर र सूचना केन्द्र, दोस्रो तलामा पुस्तकालय र मिटिङ हल, तेस्रो तलामा आर्ट ग्यालरी तथा सोभन्दा माथि घण्टा घर रहने इन्जिनियर पाण्डेले बताए । कार्यक्रममा महानगर प्रमुख आचार्यले पोखरा घरले समग्र पोखराको विस्तृत जानकारी दिने केन्द्र बन्ने बताए । उनका अनुसार पोखराका आउनेका लागि यो घर एउटा महत्वपूर्णस्थल बन्नेछ । ‘पोखरा घर परम्परागत वास्तुकला र पछिल्लो प्रविधिको प्रयोग गरेर काठको बार्दलीसमेतको मौलिक बन्ने छ । यसको सञ्चालनका लागि विगतमा महेन्द्रपुलमा भत्काइएको जीर्ण भवनमा रहेका संस्थासँगनै सहकार्य गर्नेछौँ,’ महानगर प्रमुख आचार्यले भने । पोखराको महेन्द्रपुलमा यसअघि रहेको आर्ट ग्यालरी र सार्वजनिक पुस्तकालय रहेको भवन जीर्ण भएपछि महानगरले भत्काएको थियो । सो स्थानमा अहिले अन्तर्राष्ट्रिय झण्डा पार्क र सार्वजनिक शौचालय निर्माण गरिएको छ । महानगरका प्रमुख प्रशासकीय अधिकृत श्यामकृष्ण थापाले भवन निर्माणका लागि स्रोतको कमी हुन नदिइने प्रतिबद्धता जनाए । उनले पोखराको विकासको समग्र विकासको खाका तयार भइरहेको उल्लेख गरे । उनले भने, ‘महानगरका प्रमुखको नेतृत्वमा पोखरामा उल्लेख्य विकास निर्माणका काम भइरहेको र त्यसको रिजल्ट क्रमशः देख्न पाइन्छ । पोखरामा धेरै काम भएका छन् र समग्र विकासको खाका बनेको छ ।’ पोखरा–९ का वडाध्यक्ष दीपेन्द्र मर्सानीले लामो समयको प्रतीक्षापछि पोखरा घरको शिलान्यास गरिएको बताउँदै दीर्घकालीन विकासको सोचअनुरूप विकास निर्माणको काम अगाडि बढेको बताए । यसैगरी महानगरपालिकाको सातौँ स्थापना दिवसका अवसरमा आइतबार आयोजित रक्तदान कार्यक्रममा ५७ युनिट रगत संकलन भएको छ । स्वास्थ्य महाशाखाको संयोजनमा सम्पन्न कार्यक्रममा ५७ जनाले रक्तदान गरेका कार्यक्रमका संयोजक एवं जनस्वास्थ्य निरीक्षक दीपेन्द्र सुनारले जानकारी दिए । कार्यक्रममा जनप्रतिनिधि, कर्मचारी र नगर प्रहरीले रक्तदान गरे ।
