मार्गप्रशस्त गर्न प्रधानमन्त्रीलाई कांग्रेसको आग्रह
काठमाडौं । राजीनामा दिएर नयाँ सरकार गठनका लागि मार्गप्रशस्त गर्न प्रधानमन्त्री पुष्पकमल दाहाललाई नेपाली कांग्रेसले आग्रह गरेको छ । बुधबार बिहान बसेको कांग्रेस मार्गप्रशस्त गर्दा उपयुक्त हुने निर्णय गरेको प्रवक्ता प्रकाशशरण महतले बताए । ‘ठूला दुई दलसँगै मिलेर जाने भनेपछि स्वभाविक रूपमा मार्गप्रशस्त गर्न उपयुक्त हुन्छ,’ उनले भने, ‘बैठकले मार्गप्रशस्त गर्न आग्रह गर्ने निर्णय गरेको छ ।’ बैठकले कार्य सम्पादन समितिको बैठकले नेकपा एमाले र कांग्रेसबीच सत्ता सहकार्य गर्ने समझदारीलाई अनुमोदन गरेको छ । पहिलो चरणमा सरकारको नेतृत्व नेकपा एमालेका अध्यक्ष केपी शर्मा ओलीले गर्ने जानकारी महतले दिए । त्यसपछि दोस्रो चरणमा निर्वाचन सम्पन्न नभएसम्म कांग्रेस सभापति शेरबहादुर देउवाले सरकारको नेतृत्व गर्ने उनले बताए । त्यसैगरी बैठकले पार्टी सभापति देउवाले पार्टीको भ्रातृ संगठन र निर्देशक समितिको म्याद थप गर्ने निर्णयलाई पनि अनुमोदन गरेको कांग्रेसले जनाएको छ ।
३ अर्बको लागतमा आयल निगमको नयाँ भण्डारणगृह निर्माण हुँदै
भैरहवा । नेपाल आयल निगमले रुपन्देहीको रोहिणी खोला किनारमा पेट्रोलियम भण्डारणगृह निर्माण प्रक्रिया तीव्रगतिमा अघि बढाएको छ । ओमसतिया र रोहिणी गाउँपालिकाको सीमा क्षेत्रस्थित रोहिणी खोला किनारमा धमाधम तटबन्ध निर्माणसँगै जमिन सम्याइँदै छ । हालसम्म ७० प्रतिशत सम्पन्न भएको निर्माणमा संलग्न इन्जिनियर हीरामणि खनालले जानकारी दिए । पछिल्लो ५० वर्षको बाढीको अवस्थालाई आकलन गरेर रोहिणी खोलामा तटबन्धको काम अघि बढाइएको उनले बताए । निगमले भण्डारण निर्माण गर्न लागेको जग्गाको उत्तर र पश्चिममा रोहिणी खोला बगेको छ । उत्तरतर्फ ‘रिटेनिङ वाल’ लगाइएको छ भने पश्चिमतर्फ ग्याबिन पर्खाल लगाइएको छ । प्रारम्भिक चरणमा सातवटा ‘प्याकेज’ बनाएर बोलपत्र आह्वान गरिएको छ । काठमाडौंस्थित शुभश्री सर्वश्री जेभीले पहिलो र दोस्रो, वीरगञ्जस्थित उज्यालो निर्माण सेवाले तेस्रो तथा प्रिजन कन्ट्रक्सनले बाँकी चारवटा प्याकेजको ठेक्का पाएको छ । करिब आठ करोडमा ती ठेक्का लगाइएको हो । भण्डारणगृह निर्माणस्थलमा पर्खाल लगाउने र जमिन पुर्ने कार्य यही असार मसान्तभित्र सम्पन्न गर्ने लक्ष्य राखिएको छ । खोला किनारमा ग्याबिन लगाउँदा वर्षात्को पानीले अप्ठयारो पारेको इन्जिनियर खनालले बताए । रोहिणी खोलाको समानान्तर सात मिटर उचाइको ग्याबिन पर्खाल र उत्तरतर्फ चार दशमलव पाँच मिटरको रिटेनिङ वाल लगाइनेछ । तटबन्ध निर्माण तथा जग्गा पुर्ने कामलाई निर्धारित समयभित्रै सम्पन्न गर्न दैनिक दुई सिफ्टमा काम भइरहेको छ । पहिलो सिफ्टमा बिहान ६ देखि ११ र दोस्रो सिफ्टमा साँझ ५ देखि ११ बजेसम्म निर्माणका काम चलिरहेको छ । ग्याबिन लगाउने तथा जग्गा पुर्ने काममा दैनिक दुई सय कामदार खटिइएका छन् । सातवटा प्याकेजमध्ये जमिन पुर्ने काम सुरुआती चरणमा रहेको छ । प्याकेज नं ४ र ५ अन्तर्गत ग्याबिन पर्खाल निर्माणको भौतिक प्रगति ७० प्रतिशत हाराहारी पुगेको उनले बताए । प्याकेज नं ३ को भौतिक प्रगति न्यून छ । प्याकेज १ र २ को एउटै ठेकेदार भएकाले काम सुस्त भइरहेको इन्जिनियर खनाल भन्छन् । रुपन्देहीको भलबारी डिपोको भण्डारण क्षमता कम भएको तथा बस्ती नजिक रहेकाले परासी–भैरहवा सडक खण्डमा खरिद गरिएको करिब १४ बिघा जग्गामा नयाँ भण्डारणगृह निर्माण गर्न लागिएको निगमले जनाएको छ । सो भण्डारणबाट लुम्बिनी प्रदेशको २० दिनको माग धान्नेछ । निगमले पेट्रोलियम पदार्थको भण्डारण क्षमता अभिवृद्धिका लागि देशका विभिन्न स्थानमा भण्डारणगृह निर्माण गर्दै आइएको छ । तीन अर्ब रुपैयाँ लागतमा भण्डारणगृह निर्माण गरिने भण्डारणगृह निर्माण परियोजनाका संयोजक इन्जिनियर प्रदीप यादवले जानकारी दिए । सो स्थानमा डिजेल भण्डारणका लागि दुई हजार एक सय किलोलिटर तीन, पेट्रोल भण्डारणका लागि एक हजार छ सय किलोलिटर दुई र मटितेल भण्डारणका लागि ७० किलोलिटरका तीनवटा ट्यांक निर्माण गरिनेछ । भण्डारणगृह निर्माण भएसँगै हालको भलबारी डिपो रोहिणी खोला किनारमा सर्नेछ । उनले असोजभित्र परियोजनाको ‘डिजाइन’ सम्पन्न गरिने जानकारी दिए । परियोजनाको डिजाइन काठमाडौं विश्वविद्यालयले गरिरहेको छ । आगामी मङ्सिरमा भण्डारणगृह निर्माणको शिलान्यास गर्ने र विसं २०८३ भित्र निर्माण सम्पन्न गर्ने लक्ष्य छ । रासस
सिंहदरबारमा कृषि प्राविधिकहरूको धर्ना
काठमाडौं । कृषि तथा पशुपंक्षी विकास मन्त्रालयमा कार्यरत राजपत्रांकित तेस्रो श्रेणीका कर्मचारीहरूले मन्त्रालयमा धर्ना दिएका छन् । बुधबार पनि अधिकृत स्तरका कर्मचारीहरूले मन्त्रालयको प्रवेशद्वारमा धर्ना दिएका हुन् । २०७५ सालमा सरकारले समायोजन अध्यायदेश ऐनमार्फत समायोजन गरेपछि संघमा समायोजित भएपनि विभिन्न बहानामा आफूहरुको वृत्ति विकासका लागि नियमित रुपमा लोकसेवा नखोलिएको र ओएनएम पनि नभएकाले सांकेतिक विरोध स्वरुप धर्नामा बसेको कर्मचारीहरुको भनाइ छ । कृषि मन्त्रालयमा समायोजन भएका राजपत्रांकित तेस्रो श्रेणीका प्राविधिक कर्मचारीहरूले आफ्नो वृत्ति विकास रोकिएकाले वृत्ति विकाससहितको दरबन्दी यकिन गर्न माग गर्दै धर्ना दिएको बाली संरक्षण अधिकृत तोयानाथ जोशीले बताए । उनले आन्दोलन असार १४ गतेदेखि शुरु गरेको भएपनि धर्ना कार्यक्रम १६ गतेदेखि सञ्चालन गरेको बताए । ६ वर्ष भइसक्दासमेत वृत्ति विकास नगरेको र नियमित रुपमा लोकसेवा नखोलिएको र ओएनएम नगरेकाले धर्ना दिनुपरेको जानकारी दिए । ‘हामीले यो आन्दोलन १४ गतेदेखि शुरु गरेका हौँ, यो हामीलाई २०७५ मा सामान्य प्रशासन मन्त्रालयले समायोजन गरेको थियो, संघमा संख्या १० र समायोजन २० गरेजसरी बढी संख्यामा समायोजन गरेको थियो, दरबन्दी मिलाउनका लागि हामीले यो धर्ना कार्यक्रम गरेका हाैँ, हामी सबै अधिकृतहरुले हाजिरी गरेका छैनौँ, सबै बिदामा बसेका छौँ’, उनले भने । उनले सबै अधिकृतहरुले हाजिरी नगरेको र सबै अधिकृतहरू बिदामा बसेको पनि बताए ।
हिमालयन एभरेष्टको सीईओ बन्न दर्जन व्यक्ति लाइनमा, असुरक्षा सबैको चिन्ता
काठमाडौं । हिमालयन एभरेष्ट इन्स्योरेन्सले यही असार १३ गतेदेखि लागु हुने गरी विजयबहादुर शाहलाई प्रमुख कार्यकारी अधिकृत (सीईओ) पदबाट बर्खास्त गर्यो । त्यसपछि कम्पनीका अध्यक्ष महेन्द्रकृष्ण श्रेष्ठले आफ्नै नातेदार अन्जु श्रेष्ठलाई निमित्त प्रमुख कार्यकारी अधिकृतको जिम्मेवारी दिएका छन् । श्रेष्ठ सोही कम्पनीमा डेपुटी सीईओको भूमिकामा थिइन् । तर, कम्पनीले उनलाई सीईओको जिम्मेवारी दिने छाटकाँट भने छैन । किनकि श्रेष्ठलाई कम्पनीको कामु सीईओको जिम्मेवारी दिएन, निमित्त सीईओको जिम्मेवारी मात्र दियो । स्रोतका अनुसार श्रेष्ठलाई सीईओ बन्ने चाहाना पनि छैन । तत्कालीन सीईओ विजयबहादुर शाहले कम्पनीका अध्यक्ष महेन्द्रकृष्ण श्रेष्ठलाई खुसी बनाउन नातेदार श्रेष्ठलाई डेपुटी सीईओमा नियुक्त गरेका थिए । नयाँ सीईओको खोजी कम्पनीको अध्यक्ष श्रेष्ठ आफै बीमा बुझेका व्यक्ति हुन् । लगानीकर्ता आफै कार्यकारी प्रमुख हुन रोक लगाउनुपूर्व उनी तत्कालीन हिमालयन जनरल इन्स्योरेन्समा कार्यकारी प्रमुख नै थिए । उनले कम्पनी व्यवस्थापन पनि जानेका छन् । त्यसैले उनका अगाडि जो कोहीलाई काम गर्न गाह्रो छ । त्यसको प्रमाण उनैले दिइसकेका छन् । तत्कालीन हिमालयन जनरल इन्स्योरेन्सको सीईओ सुशील बज्राचार्यलाई कार्यकाल पूरा नहुँदै छोड्न बाध्य पार्नु र विजयबहादुर शाहलाई कार्यकाल पूरा नहुँदै बर्खास्त गर्नु महेन्द्रको अण्डरमा जो कोहीलाई काम गर्न गाह्रो छ भन्ने उदाहरण हो । अचानक बर्खास्तमा परेका विजयबहादुर शाहले बीमा प्राधिकरणमा न्याय माग्दै निवेदन दिएका छन् । प्राधिकरणबाट नसल्टेमा उनी अदालत पनि जान सक्ने जानकारहरू बताउँछन् । यो प्रक्रिया किनारा नलाग्दै कम्पनीले नयाँ सीईओ नियुक्ति गर्न कठिन हुन्छ । यद्यपि, कम्पनीले नयाँ सीईओ कसलाई बनाउला भन्ने अड्कलबाजी सुरु भएको छ । ‘शाहको मुद्दामा किनारा लागेको छैन, त्यसैले अहिले नै को सीईओ बन्छ भनेर विश्लेषण गर्नु हतार हुन सक्छ,’ कम्पनीको सीईओ बन्ने लाइनमा रहेका एक पूर्वसीईओले भने, ‘प्राधिकरणले नै शाहलाई कम्पनीको सीईओमा कायम राख्न निर्देशन दिन सक्छ, तर उनी धेरै दिन बस्दैनन् होला, त्यसपछिको लबिङ गर्ने बाटो छँदैछ ।’ बर्खास्तमा परेका विजयबहादुर शाहका कति गल्ती, कमजोरी छन् ? भन्ने विषय सार्वजनिक भएका छैनन् । तर, हिमालयन एभरेष्टकाे सञ्चालक समितिले गरेको बलण्डर सबैको सामु छर्लङ्ग छ । सीईओ शाहलाई सफाइको मौका नदिई बर्खास्त गर्नु सञ्चालक समितिको बलण्डर थियो । त्यसैका आधारमा शाहले नियामक वा न्यायिक निकायबाट पुर्नबहाली प्राप्त गर्नसक्ने सम्भावना छ । शाह न्यायिक निकायको निर्णयका आधारमा फर्किए भने पनि उनी उक्त कम्पनीमा लामो समय रहने सम्भावना कम छ । त्यसैले कम्पनीमा नयाँ सीईओको खोजी हुनु स्वभाविक हो । को-को छन् लाइनमा ? कम्पनीको सीईओ बन्न बीमा प्राधिकरणका पूर्वकार्यकारी निर्देशकसहित पूर्वसीईओ समेत आकांक्षी देखिन्छन् । विभिन्न कम्पनीमा हाल कार्यरत नायब प्रमुख कार्यकारी अधिकृतहरू पनि सीईओको प्रस्ताव आएमा आफू तयार रहेको स्वीकार गर्छन् । तर, हालसम्म त्यस्तो प्रस्ताव नआएको उनीहरूको भनाइ छ । राजुरमण पौडेल बीमा प्राधिकरणको कार्यकारी निर्देशकबाट ७ वर्षे कार्यकाल पूरा गरी हालसालै अवकाश पाएका राजुरमण पौडेल हिमालयन एभरेष्टको सीईओ बन्ने प्रबल दाबेदार हुन् । र, यदि उनले चासो दिएमा सम्भावना पनि बलियो रहेको देखिन्छ । तीन दशक बीमा क्षेत्रको नियामक बीमा प्राधिकरणमा कार्यरत पौडेलले गत जेठ १२ गते अवकाश पाएका थिए । पौडेलले आफूलाई हालसम्म सीईओ बन्नका लागि कुनै प्रस्ताव नआएको बताए । तर, यदि प्रस्ताव आएमा छलफल गरेर अघि बढ्ने उनको भनाइ छ । सुशील बज्राचार्य साविक हिमालयन जनरल इन्स्योरेन्स (हाल हिमालयन एभरेष्ट) का पूर्वसीईओ सुशील बज्राचार्य पनि सीईओ बन्न लबिङ गरिरहेको बुझिएको छ । वि.सं २०७६ साउन १ गते साविक हिमालयन जनरलको सीईओमा दोस्रोपटक ४ वर्षका लागि नियुक्त भएका थिए । दोस्रो कार्यकालको डेढ वर्ष अगावै वि.सं २०७८ माघ मसान्तमा कम्पनीबाट विदा पाएका बज्राचार्य अहिलेसम्म खाली छन् । अध्यक्ष महेन्द्रकृष्ण श्रेष्ठले विजयबहादुर शाहलाई सीईओ बनाउनैका लागि बज्राचार्यलाई बिदा गरेका थिए । आफ्नो अगाडि एसम्यान बन्ने बज्राचार्यलाई अध्यक्ष महेन्द्रले पुनः फर्काउन सक्ने जानकारहरू बताउँछन् । ‘कम्पनीमा ठूलो समस्या दखिँदैन, अध्यक्षले जे भन्यो त्यही नमानेकोले सीईओबाट शाहलाई हटाएको जस्तो देखिन्छ, अब पहिलाको एसम्यानलाई ल्याउन सक्छन् श्रेष्ठले,’ अध्यक्षलाई नजिकबाट चिन्ने एक जना लगानीकर्ताले भने । कमल गौतम हिमालयन एभरेष्ट इन्स्योरेन्सको वरिष्ठ नायब प्रमुख कार्यकारी अधिकृत (सिनियर डीसीईओ) बाट राजीनामा दिएर बिदा भएका कमल गौतम सीईओमा फर्कन सक्ने अनुमान पनि धेरैको छ । मर्जरपूर्व एभरेष्ट इन्स्योरेन्सको लगानीकर्ता, मुलतः राजेन्द्र खेतान समूहले गौतमलाई फर्काउन चाहेका छन् । मर्जरपछि सीईओ छोडेर सिनियर डीसीईओ भई काम गर्न तयार भएका गौतमलाई पहिला राजीनामा दिन बाध्य पार्नु र गौतमलाई राजीनामा दिएको ४ महिना नबित्दै शाहलाई बर्खास्त गर्नुलाई अध्यक्ष श्रेष्ठको योजनाबद्ध र सिलसिलेबार निर्णय भएको पनि खेतान समूहको बुझाइ छ । ‘शाहलाई बिदा गरेपछि सीईओमा गौतमको दाबी नहोस् भन्नका लागि पहिले नै गौतमलाई राजीनामा गर्न बाध्य पारिएको जस्तो देखिन्छ, त्यसैले अध्यक्ष श्रेष्ठले गौतमलाई सीईओमा फर्काउने सम्भावना कम भयो,’ खेतान समूहका एक सदस्यले भने । गौतमले रुग्ण अवस्थामा पुगेको एभरेष्ट इन्स्योरेन्सलाई राम्रो अवस्थामा पुर्याएका थिए । त्यसैले खेतान समूह वा तत्कालीन एभरेष्टका सेयरधनी तथा कर्मचारीहरू गौतमलाई फर्काउन चाहन्छन् । रमेशकुमार भट्टराई रमेशकुमार भट्टराई पनि हिमालयन एभरेष्टको सीईओ बन्न लबिङमा रहको स्रोतले बतायो । भट्टराईले साविक यूनाइटेड इन्स्योरेन्समा कायमुकायम सीईओ भएर काम गरिसकेका छन् । पछि उनी लुम्बिनी जनरल इन्स्योरेन्समा डेपुटी सीईओ भएका थिए । तत्कालीन लुम्बिनी जनरल इन्स्योरेन्स सगरमाथा इन्स्योरेन्समा मर्ज हुने भएपछि उनी बाहिरिएका थिए । कुमारबहादुर खत्री साविक अजोड इन्स्योरेन्सका सीईओ कुमारबहादुर खत्री पनि यस कम्पनीको सीईओ बन्ने लाइनमा छन् । साविक अजोडमा दुई कार्यकाल सीईओ बनेका खत्री मर्जरपश्चात् यूनाइटेड अजोडमा वरिष्ठ डीसीईओ बनेका थिए । मर्जरपश्चात् विवाद सिर्जना भएपछि खत्रीले राजीनामा दिएका थिए । उनको राजीनामा स्वीकृत भएपनि हिसाब फरफारकको पत्र भने पाउन सकेका छैनन् । कम्पनी स्रोतका अनुसार खत्रीको लेनदेनको काम बाँकी छ । र, अरु पनि विभिन्न कम्पनीका डेपुटी सीईओहरूको पनि ध्यान हिमालयन एभरेष्टको रिक्त सीईओ पदमा पुगेको छ । सम्बन्धित कम्पनीमा भएको जागिर धरापमा पर्ने भएकाले उनीहरूको नाम उल्लेख गर्नु उपयुक्त भएन । तर, उनीहरूले विभिन्न विधिबाट लविङ सुरु गरिरहेका छन् । उनीहरूको लागि मुख्य चिन्ताको विषय भनेको सुशील बज्राचार्य र विजयबहादुर शाहलाई जस्तै आफूलाई पनि कार्यकाल पूरा नहुँदै कम्पनीले जागिरबाट हटाउने हो कि भन्ने रहेको छ ।
सोह्रखुट्टे-बालाजु सडक भासियो
काठमाडौं । काठमाडौंको सोह्रखुट्टे-बालाजु सडक भासिएको छ । बुधबार सोह्रखुट्टे-बालाजु सडक खण्डमा करिव ११ फिट गहिरो खाल्डो परेको हो । सडक भासिएसँगै यातायात आवागमनमा असर परेको छ । बुधबार बिहान काठमाडौं महानगरपालिका १६ नयाँबजारस्थित कुमारी टोलको गेट अगाडि परेको खाल्डोमा एउटा मोटरसाइकल समेत खसेको थियो । अहिले भासिएको ठाउँमा घेरा हालेर मर्मतको तयारी गरिएको छ ।
रास्वपा महामन्त्री ढकाल मुखमा कालो टेप लगाएर बैठकमा सहभागी
काठमाडौं । केन्द्रीय समितिको बैठकको प्रत्यक्ष प्रसारण नगरिएको भन्दै राष्ट्रिय स्वतन्त्र पार्टीका महामन्त्री डा. मुकुल ढकालले विरोध जनाएका छन् । बुधबार बिहान पार्टी केन्द्रीय कार्यालय बालाजुमा बसेको बैठकको प्रत्यक्ष प्रसारण गर्न माग गरेका महामन्त्री ढकालको प्रस्तावलाई पार्टी सभापति रवि लामिछानेले अस्वीकृत गरेपछि विरोध जनाएका हुन् । उनले मुखमा कालो टेप टाँसेर सांकेतिक विरोध जनाएका हुन् । उनले लोकतन्त्र मान्ने र बुझेको मानिसले प्रत्यक्ष प्रसारण गर्नबाट नरोक्ने भन्दै अभिव्यक्ति दिँदै आए पनि बैठकले उनको प्रस्ताव अस्वीकृत गरी बैठक सञ्चालन गरिरहेको छ । बैठकमा पछिल्ला राजनीतिक, समसामयिक घटनाक्रमबारे छलफल जारी छ । साथै, बैठकमा महामन्त्री ढकालले सभापति लामिछानेलाई बुझाएको प्रतिवेदनमाथि छलफल हुने बताइएको छ । प्रतिवेदनमा रास्वपाले अहिलेकै अवस्थालाई अंगालेर जाँदा पार्टीप्रतिको नागरिकको आकर्षण घट्दै जाने कुरालाई उठाइएको छ । पार्टीले नयाँ निर्णय गरेर जानुपर्ने सुझाव महामन्त्रीको प्रतिवेदनमा छ ।
हिमालयन लघुवित्तको सीईओमा विनोद आचार्य पुन: नियुक्त
काठमाडौं । हिमालयन लघुवित्त वित्तीय संस्था लिमिटेडको प्रमुख कार्यकारी अधिकृत (सीईओ)मा विनोद आचार्य नियुक्त भएका छन् । असार १८ गते बसेको संस्थाको सञ्चालक समितिको बैठकले सीईओको पदमा आचार्यलाई नियुक्त गर्ने निर्णय गरेको हो । उनलाई साउन १ गतेबाट लागू हुने गरी आगामी ४ वर्षको लागि सीईओ पदमा पुन: नियुक्त गरिएको कम्पनीका सचिव देवकर कार्कीले जानकारी दिए । विगत लामो समयदेखि लघुवित्त क्षेत्रमा क्रियाशिल रहेका आचार्यले व्यवस्थापन संकायमा एमपीए तथा एमबीए गरेका छन् ।
बेँसीसहर-चामे सडक खुल्यो
फाइल फाेटाे लमजुङ । अविरल वर्षाले विभिन्न ठाउँमा पहिरो जाँदा मंगलबार साँझदेखि अवरुद्ध बेँसीसहर-चामे सडकअन्तर्गत लमजुङ खण्ड सञ्चालन भएको छ । यस सडक खण्डअन्तर्गत लमजुङ बेँसीसहर नगरपालिका-६ खरखरे र मस्र्याङ्दी गाउँपालिका–९ गोपालडाँडामा आएको पहिरो आज बिहानदेखि हटाएसँगै लमजुङ सञ्चालन भएको जिल्ला प्रहरी कार्यालयले जनाएको छ । प्रहरी निरीक्षक थानेश्वर चपाईले उक्त स्थानको पहिरो हटाएर र अक्टोपस झरनामा पानी कम भएपछि सवारी साधन सञ्चालनमा आएको बताए । लमजुङ खण्डमा सडक सञ्चालन भए पनि मनाङ खण्ड भने अवरुद्ध भइरहेको छ । मंगलबार राति चामे गाउँपालिका–१ तिमाङ खोलाले काठेपुल बगाएपछि हालसम्म सवारी सञ्चालन हुन सकेको छैन ।
