बंगलादेशमा आन्दोलन निस्तेज पार्न मोबाइल इन्टरनेट बन्द
काठमाडौं । बंगलादेशमा सरकारी कोटा र आरक्षणको विरोधमा भएको प्रदर्शनले हिंसात्मक रूप लिँदै गएपछि त्यसलाई निस्तेज पार्न सरकारले इन्टरनेट सेवा बन्द गरेको छ । यो आन्दोलनलाई हिंसात्मक बनाउन भूमिका खेलेको भन्दै सरकारले मोबाइलमा इन्टरनेट सेवा बन्द गरेको हो । बंगलादेशको सरकारी निकायमा विभिन्न क्षेत्र, समुदाय तथा वर्गलाई करिब ५० प्रतिशत आरक्षण तथा कोटा राखिएको छ । देशको स्वतन्त्रताका लागि लडेकाका छोराछोरीका लागि सरकारी जागिरमा आरक्षण दिइएको छ । केही दिनदेखि भइरहेको आन्दोलनमा अहिलेसम्म ६ जनाको मृत्यु भएको छ भने एक सय बढी मानिस घाइते भएका छन् । प्रदर्शनमा रहेका विद्यार्थीको मृत्युपछि देशभरिका विद्यालय र विश्वविद्यालय बन्द भएका छन् । अर्को आदेश नभएसम्मका लागि बन्द गरिने जनाइएको छ। सामाजिक सञ्जालमार्फत भ्रम फैलाउन र आन्दोलनलाई उत्तेजित बनाउन भूमिका खेलेको भन्दै अस्थाइ रूपमा मोबाइल इन्टरनेट सेवा बन्द गरिएको बंगलादेशका सहायक सूचना प्रविधिमन्त्री जुनैद अहमद पालकले बताएका छन् । उनका अनुसार योअवस्था सामान्य भएपछि मोबाइल इन्टरनेट सेवा पुनः सुरु गरिने छ । एजेन्सी
मुक्तिनाथ विकास बैंकको अन्तर्राष्ट्रिय क्युआर भुक्तानी सेवा सुरु
काठमाडौं । मुक्तिनाथ विकास बैंकले अन्तर्राष्ट्रिय क्युआर भुक्तानी सेवा सुरु गरेको छ । बैंकले डिजिटल भुक्तानीलाई सहज तथा विस्तार गर्ने क्रममा अन्तर्राष्ट्रिय क्युआर भुक्तानी सेवा सुचारु गरेको हो । बैंकले फोन-पे सँगको सहकार्यमा यो सेवा सुरु गरेको हो । यो सेवा सुचारु पश्चात भारतीय ग्राहकहरुले भिम र फोन–पे लगाएतका भारतीय भुक्तानी सेवा प्रदायकको माध्यमबाट मुक्तिनाथ विकास बैंक अन्तर्गतका मर्चेन्टहरुमा राखिएको क्यूआर कोड स्क्यान गरी डिजिटल रुपमा रकम भुक्तानी गर्न सकिने व्यवस्था मिलाईएको छ । यस प्रकारको सेवाहरुले भारतीय पर्यटकहरुलाई नगद बोक्ने झनझट नभई नेपाल र भारत बिचको आर्थिक तथा पारस्परिक सम्बन्धलाई अझ सुदृढ बनाई नेपालको आर्थिक तथा पर्यटन क्षेत्रको विकासमा समेत महत्वर्पूण भुमिका निर्वाह गर्ने अपेक्षा रहेको बैंकले जनाएको छ ।
अर्थमन्त्री पौडेल भन्छन् : आशाको दियो बाल्ने प्रयास गर्नेछु
काठमाडौं । उपप्रधानमन्त्री एवं अर्थमन्त्री विष्णु पौडेल र नेपाल उद्योग परिसंघ (सीएनआई) बीच छलफल भएको छ । बिहीबार मन्त्री पौडेललाई बधाइ तथा शुभकामना व्यक्त गर्दै सीएनआईले आर्थिक अवस्था र सुधारका विषयमा आफ्ना सुझाव दिएको हो । परिसंघको तर्फबाट सफल कार्यकालको शुभकामना दिँदै सीएनआई अध्यक्ष राजेश कुमार अग्रवालले विगत तीन वर्षदेखि शिथिल अर्थतन्त्रलाई चलायमान बनाउन निजी क्षेत्रको बनोबल बढाउनुपर्नेमा जोड दिए । उत्पादनशील र निर्माण क्षेत्र बढी प्रभावित हुँदा बाह्य क्षेत्र उत्साहजनक भएपनि आन्तरिक अर्थतन्त्र अझै समस्यामा रहेको बताए । विगत तीन वर्षदेखि उद्योगहरु ३०/४० प्रतिशत क्षमतामा सञ्चालन भईरहेको र समग्र बजार मागमा संकुचन आउँदा अर्थतन्त्र चलायमान हुन नसकेको बताए । उनले विगतका संकुचनकारी मौद्रिक नीतिले अर्थतन्त्र विस्तार हुन नसकेको भन्दै चालुपूँजी कर्जा मार्गदर्शन र पूँजीको वर्गीकरण मार्गदर्शनका कारण उत्पादनशील क्षेत्र र निर्माण क्षेत्र बढी प्रभावित भएकाले यी दुई मार्गदर्शन खारेज हुनुपर्नेमा जोड दिए । परिसंघले अर्थतन्त्रलाई चलायमान बनाउन समग्र माग बढ्ने नीति लिनुपर्ने, पूँजीगत खर्च बढाउन सुनिश्चितता प्रदान गर्नुपर्नेमा जोड दिएको छ । सो अवसरमा उपप्रधान एवं अर्थमन्त्री पौडेलले मुलुकमा स्थायित्व कायम गर्नकै लागि ठूला दल मिलेर नयाँ सरकार बनेको भन्नुहुँदै राजनीतिक समीकरणलाई समेत हेरेर आशावादी भईदिन निजी क्षेत्रलाई आग्रह गरे । ‘प्रधानमन्त्री चौथो पटक भूतपूर्व प्रधानमन्त्रीको फोटो टास्न आउनुभएको होइन । समस्या देखेरै त्यो समाधानका लागि यो सरकार आएको हो’ उनले भने, ‘अर्थतन्त्रमा आशाको दियो बाल्ने प्रयास हुनेछ ।’ उनले नीतिको स्थीरता र कार्यान्वयनको स्थायित्व आवश्यक रहेकाले यसैमा केन्द्रित भई सरकारले काम गर्ने बताए । समस्या मात्र नभई समाधानका लागि निजी क्षेत्रसँग सँगै बसेर छलफललाई केन्द्रित गर्ने समेत जानकारी दिए । सो अवसरमा परिसंघका निर्वतमान अध्यक्ष विष्णुकुमार अग्रवाल, पूर्व अध्यक्ष हरिभक्त शर्मा, उपाध्यक्षहरु वीरेन्द्रराज पाण्डे, राजबहादुर शाह, रोहित गुप्ता, अमित मोर, भीम घिमिरे, गभर्निङ्ग काउन्सिल सदस्यहरु शिवरतन शारडा, योगेश्वरलाल श्रेष्ठ, बालकृष्ण श्रेष्ठ, राष्ट्रिय परिषद् सदस्य विदुषी राणा, महानिर्देशक डा. घनश्याम ओझालगायतले मन्त्री पौडेलको सफल कार्यकालका लागि शुभकामना दिए ।
५६ सय बढ्यो युनिलिभरको नेपालको सेयर, साढे ५२ हजार रुपैयाँ सेयर मूल्य
काठमाडौं । युनिलिभरको नेपालको सेयर मूल्य ५ हजार ६ सय रुपैयाँले बढेको छ । पछिल्लो समय निरन्तर उकालो लागेको बजारमा यस कम्पनीको सेयर मूल्य दुई दिनमा ५ हजार ६ सय रुपैयाँ बढेर ५२ हजार ५ सय रुपैयाँ पुगेको हो । यसअघि मंगलबार कम्पनीको सेयर मूल्य ४६ हजार ९ सय रुपैयाँ थियो । बुधबार र बिहीबार कम्पनीको सेयर मूल्य निरन्तर बढेर उचाईमा पुगेको हो । बिहीबार कम्पनीको ३११ कित्ता सेयर ३० पटक खरिदबिक्री हुँदा १ करोड ५५ लाख २ हजार ८९५ रुपैयाँ बराबरको सेयर कारोबार भएको छ ।
गरिब ठाउँका धनाढ्य मन्त्री, दर्जनौं घरघडेरी, सुनका मोही
काठमाडौं । कर्णाली सरकारका मुख्यमन्त्रीसहित मन्त्रीहरूले आफ्नो सम्पत्ति विवरण सार्वजनिक गरेका छन् । मुख्यमन्त्री तथा मन्त्रिपरिषद्को कार्यालयले प्रदेश सरकारका ६ मन्त्री र एक राज्यमन्त्रीको सम्पत्ति विववरण सार्वजनिक गरेका हुन् । गरिब तथा दुर्गम प्रदेशका रूपमा चिनिएको कर्णाली प्रदेशमा मुख्यमन्त्री यामलाल कँडेल, सामाजिक विकास मन्त्री वीरबहादुर शाही, भौतिक पूर्वाधार तथा सहरी विकास मन्त्री शेरबहादुर बुढा, भूमि, व्यवस्था, कृषि तथा सहकारी विकास मन्त्री विनोद कुमार शाहसँग धेरै धन सम्पत्ति रहेको देखिएको छ । उनीहरूको गरिब प्रदेशका धनाढ्य मन्त्रीको रूपमा चिनिएका छन् । मुख्यमन्त्री कँडेलसँग काठमाडौं र सुर्खेतको बीरेन्द्रनगरमा दुइटा घर छन् । कँडेलको नाममा वीरेन्द्रनगर र श्रीमती गीता अधिकारीको नाममा काठमाडौंको कागेश्वरी मनोहरामा घर छ । उक्त घर पुर्ख्याैली सम्पत्ति बेचेर २०५७ सालमा किनेको सम्पत्ति विवरणमा उल्लेख गरेका छन् । मुख्यमन्त्रीकी श्रीमती गीता अधिकारी कँडेलको नाममा विभिन्न ५ ठाउँमा जग्गा छन् । कँडेलको नाममा वीरेन्द्रनगर नगरपालिका-९ मा ०.८.१४ वर्गमिटर र गीताको नाममा वीरेन्द्रनगर-१० मा ०.१.८.२, वडा नम्बर ४ मा ०.०.१८ र ०.०.१३.१९ वर्गमिटर र काठमाडौंको गोठाटारमा ८ आना जग्गा रहेको विवरणमा उल्लेख छ । यामलाल कँडेल । कँडेलसँग १० तोला सुन रहेको छ भने कँडेल र श्रीमती गीताका नाममा विभिन्न ११ वटा बैंक तथा सहकारीमा गरी ३३ लाख १२ हजार ४८५ रुपैयाँ बचत छ । जसमध्ये एभरेष्ट बैंकमा १ लाख २४ हजार २३७.६४ रुपैयाँ, एनआईसी एशिया बैंकमा ३ लाख २४ हजार २५६ रुपैयाँ बचत र १२ लाख मुद्दती खातामा रहेको छ । कँडेलले ललितपुरको क्यारिना सहकारीमा १ लाख १५ हजार १५३ रुपैयाँ, पिपलबोट सहकारीमा ७५ हजार ३२२ रुपैयाँ, राष्ट्रिय वाणिज्य बैंकमा २५ हजार, जनहितकारी सहकारी संस्थामा ८० हजार ९० रुपैयाँ बचत रहेको छ । यस्तै, श्रीमती गीताको नाममा ग्लोबल आईएमई बैंकमा १ लाख ९० हजार ३०५, जनहितकारी सहकारीमा १ लाख ६३ हजार ७८३, क्यारिना सहकारी ललितपुरमा १ लाख ३० हजार ६३७, लक्ष्मी विकास बैंकमा ८ लाख ७ हजार र पिपलबोट सहकारी संस्थामा ७८ हजार ७०६ रुपैयाँ बचत रहेको सम्पत्ति उल्लेख छ । उक्त रकम पारिश्रमिक, घरभाडा, बोनस, सापटी फिर्ता लगायतबाट जोडेको मुख्यमन्त्री कँडेलले बताएका छन् । राष्ट्रिय वाणिज्य बैंकबाट ४५ लाख ऋण लिएका उनीसँग २ वटा मोबाइल, एक थान ल्यापटप, २ वटा घडी र एकथान ट्याब रहेको छ । वीरबहादुर शाही । कर्णाली प्रदेश सरकारका सामाजिक विकासमन्त्री वीरबहादुर शाहीसँग विभिन्न ठाउँमा ४ वटा घर छन् । डोल्पाको जगदुल्ला गाउँपालिका-५, बाँकेमा २ वटा घर र सुर्खेत वीरेन्द्रनगर नगरपालिका-१२ मा घर छन् । साथै उनको नाममा डोल्पा, सुर्खेत, बाँके, रुकुम पश्चिममा गरी ७ ठाउँमा जग्गाजमिन छ । शाहीसँग २९ तोला सुन, ५ तोला चाँदी, मुरा १० तोला रहेको उल्लेख गरेका छन् । मन्त्री शाही र उनकी श्रीमती शिलकुमारी शाहीको नामा ५ लाख रकम मौज्दात छ । डिविसी कन्स्ट्रक्सन नामको ठेक्का कम्पनी उनकै श्रीमतीको नाममा छ । उक्त रकम सबै ठेक्कापट्टाबाट कमाएको बताएका छन् । उनीसँग कम्पनी र आफ्नो नाममा ८ लाख मात्र ऋण छ । शाहीसँग २ वटा डोजर, एक ट्याक्टर र अन्य केही सवारी साधन पनि छन् । यस्तै एउटा स्याउ फार्म, ४० घोडा, ६० खच्चर, १०० बाख्रा रहेका छन् भने एउटा उद्योग पनि छ । उक्त उद्योग १ करोडमा खरिद गरिएको उल्लेख गरेका छन् । शेरबहादुर बुढा । भौतिक पूर्वाधार तथा सहरी विकासमन्त्री शेरबहादुर बुढासँग डोल्पाको काइके गाउँपालिकामा पुर्ख्यौली घर तथा जमिन छ । उनकी श्रीमती कुमारी बुढाको नाममा डोल्पाकै ठुलोभेरी नगरपालिका-३, को दुई वटा ठाउँमा जमिन छ । उक्त सम्पत्ति व्यापारबाट जोडेको उल्लेख गरेका छन् । बुढासँग २० तोला सुन, ६० तोला चाँदी, श्रीमतीको नाममा रहेको नेपाल बैँकमा २० लाख रकम मौज्दात छ । बुढासँग ७ लाख ५० हजार र ५ लाख ५० हजार मूल्य पर्ने दुईवटा बुलेट बाइक रहेका छन् । उनीसँग चार वटा घोडा, ५ गाई, १० भेडाबाख्रा छन् । अन्य सम्पत्तिमा १० केजी काँच र २०० केजी तामा रहेको बुढाले बताएका छन् । भूमि, व्यवस्था कृषि तथा सहकारीमन्त्री विनोद कुमार शाहसँग दैलेखको ठाटीकाँध गाउँपालिका-१ र काठमाडौंको बूढानीलकण्ठ नगरपालिका-५ मा ७५ लाख ऋणमा किनेको ४ आनामा दुई तलाको घर छ । उक्त घर उनकी श्रीमती लक्ष्मीदेवी शाहको नाममा छ । श्रीमतीकै नाममा ३ ठाउँमा जमिन छ । भक्तपुरको सूर्य विनायकमा ४८ लाख मूल्य बराबरको ५०८.७४ वर्ग मिटर, आठबीस नगरपालिका दैलेखको राकम कर्णालीमा १० लाख मूल्य बराबरको १८५ वर्ग मिटर र गाउँमा ५० रोपनी जमिन छ । भक्तपुर र ठाटीकाँधको जमिन पुर्ख्यौली र राकम कर्णालीको जमिन पारिश्रमिकबाट खरिद गरेका छन् । विनोद कुमार शाह । उनीसँग ६५ तोला सुन, १५ क्यारेट हिराको हार, रुवी सेट २ थान र १५ सय तोला चाँदीका भाँडा रहेको उल्लेख छ । छोरा र छोरी अस्ट्रेलियामा छन् । उक्त सम्पत्ति पुर्ख्यौली, छोरा र आफ्नो पारिश्रमिक, छोरीले उपहार दिएको बताएका छन् । मन्त्री शाहको नाममा दुई वटा बैंकमा गरी ६० हजार रकम नगद छ भने एउटा मोबाइल र एउटा ल्यापटप छ । रणसिंह परियार । जलस्रोत तथा ऊर्जा विकासमन्त्री रणसिंह परियारसँग हुम्ला अदानचुली-१ मा पुर्ख्यौली घर छ । सोही ठाउँमा ६० रोपनी पुर्ख्यौली पाखो बारी छ । उनीसँग ३ तोला सुन, २० तोला चाँदी र ७० हजार रुपैयाँ रकम मौज्दात छ । यस्तै उनीसँग ४ वटा गाई, ७ गोरु र ३० बाख्रा छन् । ३ लाख ६० हजार मूल्यको कर्णाली ट्रेडर्स नामको खुद्रा पसल रहेको सम्पत्ति विवरणमा खुलाएका छन् । दुर्गबहादुर रावत । उद्योग, पर्यटन, वन तथा वातावरणमन्त्री दुर्गबहादुर रावतसँग कालिकोटको तिलागुफा नगरपालिका-७ मा एउटा घर छ । यस्तै तिलागुफामै पुर्ख्यौली ७ वटा ठाउँमा जमिन छ । नगद, सुन, चाँदी केही पनि नरहेको बताएका उनीसँग दुई वटा बैंकमा १९ लाख ५० हजार रुपैयाँ नगद छ । अर्थमन्त्री महेन्द्र केसी कर्णाली प्रदेश सरकारका मन्त्रीहरूमा सबैभन्दा गरिब मन्त्री हुन् । उनले आफूसँग बस्ने घर पनि नरहेको बताएका छन् । रुकुम पश्चिमको बाँफिकोट गाउँपालिका-३, निवासी केसीको गाउँमा २७५२ र ८० वर्ग मिटरको २ ठाउँमा जमिन छ भने कपिलवस्तुको बाँणगंगाको ३ ठाउँमा गरी ३ कट्ठा ९ धुर जमिन रहेको उनले बताए । महेन्द्र केसी । बाँफिकोटको पुर्ख्यौली हो भने कपिलवस्तुको स्रोत खुलाएका छैनन् । उनीसँग पनि सुन चाँदी पनि छैन । उनको परिवारको नाममा दुईवटा बैंकमा ६ लाख १ हजार ३३५ रुपैयाँ मौज्दात छ । उक्त रकम केसीको पारिश्रमिक र श्रीमतीको द्वन्द्व पीडितलाई सरकारले दिने सुविधाबाट जम्मा भएको उल्लेख गरेका छन् । भौतिक पूर्वाधार राज्यमन्त्री गमता विकले पनि घर, जमिन केही नभएको विवरण पेस गरेकी छन् । उनीसँग ४ तोला सुन र १० तोला चाँदी छ । उक्त सम्पत्ति कृषि खेतीबाट जोडेको र केही पैतृक सम्पत्तिबाट आर्जन गरेको हो । उनको नाममा बैंकमा ५ लाख रुपैयाँ छ । उक्त रकम पनि सांसदको तलब भत्ताबाट जम्मा गरिएको उल्लेख छ । ३ लाख रुपैयाँ ऋण रहेको बताएकी उनले १ लाख तिरिसकिएको उल्लेख छ । उनीसँग २० हजारको मोबाइल, ५ हजारको घडी र ३० हजारको टिभी रहेको उल्लेख छ ।
ग्लोबल आइएमई बैंकको ग्राहक संख्या ५० लाख पुग्यो, निक्षेप ५ खर्ब
काठमाडौं । ग्लोबल आइएमई बैंक लिमिटेडको ग्राहक संख्या ५० लाख नाघेको छ । वि.सं. २०६३ सालमा स्थापना भएको यो बैंकले स्थापनाको १७ वर्षमै विभिन्न २१ वटा बैंक तथा वित्तीय संस्थाहरुसँग मर्जर तथा अक्विजिसन गर्दै अधिकांश वित्तीय सूचकहरुमा मुलुककै सबै भन्दा ठूलो वाणिज्य बैंक बन्न सफल भएको बैंकले जनाएको छ । साथै, हालैमात्र बैंकको निक्षेप ५ खर्ब रुपैयाँ भन्दा बढि पुगेको छ । पुँजी, शाखा सञ्जालका साथसाथै कुल निक्षेप र ग्राहक संख्यामा पनि ग्लोबल आइएमई बैंक नेपालका बैंक तथा वित्तीय संस्थाहरुमध्य पहिलो नम्बरमा रहेको बैंकले बताएको छ । ग्राहकमैत्री सेवाहरु, साना तथा मझौला ब्यवसायमा जोड, प्रविधीमैत्री सेवाहरुका साथै उत्तरदायी बैंकिङको अभ्यास गर्दै बैंकले आम नागरिकको विश्वास जित्दै आएको छ । ग्लोबल आइएमई बैंक मुलुकका ७७ जिल्लामा शाखा सञ्जाल भएको निजी क्षेत्रको पहिलो बैंक हो । बैंकका १,१०० भन्दा बढी सेवा केन्द्रहरू, जसमा ३५४ शाखा कार्यालय, ३८४ एटीएम, २७७ शाखारहित बैंकिङ सेवाहरू, ६८ एक्सटेन्सन तथा राजस्व संकलन काउन्टरहरू ३ वटा वैदेशिक प्रतिनिधि कार्यालयहरू रहेका छन् । बैंकले नेपाली नागरिकहरूलाई बैंकिङ सेवाहरू प्रदान गर्नुका अतिरिक्त विश्वका विभिन्न देशहरूबाट रेमिट्यान्स भित्र्याउने सुविधा पनि दिँदै आएको छ । बैंकले संयुक्त राज्य अमेरिका, संयुक्त अधिराज्य, क्यानडा, अस्ट्रेलिया, मलेशिया, दक्षिण कोरिया, जापान, साउदी अरब, कतार, यूएई, बहराइन, कुवेत, भारत, जोर्डन, हङकङ लगायत अन्य देशहरूबाट रेमिट्यान्स भित्र्याउने काम गर्दै आएको छ ।
खुकुलो मौद्रिक नीतिको खबरले साढे १५ अर्बको कारोबार, ५ कम्पनीको सेयरमा सर्किट
काठमाडौं । नेपाल राष्ट्र बैंकले शुक्रबार चालु आर्थिक वर्ष २०८१/८२ का लागि खुकुलो मौद्रिक नीति सार्वजनिक गर्ने खबरले लगानीकर्ता उत्साहित भएका छन् । राष्ट्र बैंकले मौद्रिक नीतिमार्फत सेयर बजारसँग सम्बन्धित नीतिहरूमा सहज गर्ने चाल पाएपछि लगानीकर्ताहरू उत्साहित भएर सेयर बजार बढेको सेयर जानकारहरू बताउँछन् । यसपटकको मौद्रिक नीतिमा पुँजी बजार सुधारका लागि सेयर कर्जामा तोकिएको व्यक्तिगतमा १५ र संस्थागतमा २० करोडको सीमामा केही परिवर्तन गर्न सक्ने आँकलन लगानीकर्ताहरूले गरेका छन् । साथै, सेयर कर्जाको १२५ प्रतिशतको जोखिम भारलाई १ सय प्रतिशतमा झार्ने, लोन टू भ्यालू रेसियोलाई सुधार गर्ने, बैक तथा वित्तीय संस्थाले खरिद गरेको सेयर बिक्री गर्न पाउने व्यवस्था गर्न सक्ने भएकाले पुँजी बजार बढेको एक लगानीकर्ताले बताए । उनका अनुसार अर्थमन्त्री विष्णु पौडेलले सेयर बजारलाई अर्थतन्त्रको ऐनाका रूपमा चित्रण गरेपछि पनि लगानीकर्तामा मनोबल बढेको छ । संसदका दुई ठूला दलको नै संयुक्त सरकार बनेपछि अर्थतन्त्र चलायमान हुने अपेक्षा गरेको ती लगानीकर्ताले बताए । साताको अन्तिम दिन बिहीबार नेपाल स्टक एक्सचेञ्ज (नेप्से) परिसूचक ५९.६८ अंक बढेर २ हजार ४२४.३२ अंकमा पुगेर बन्द भएको छ । बुधबार नेपाल स्टक एक्सचेञ्ज (नेप्से) परिसूचक ५४.०४ अंकले बढेर २ हजार ३६४.६३ अकंमा पुगेर बन्द भएको थियो भने मंगलबार नेप्से परिसूचक ७०.१८ अंकले बढेर २ हजार ३१०.५९ अंकमा बन्द भएको थियो । प्रधानमन्त्री केपी शर्मा ओलीको नेतृत्वमा नेपाली काँग्रेस र नेकपा एमालेको संयुक्त सरकार बनेदेखि पुँजी बजारमा रौनकता छाउन थालेको हो । बिहीबार ३१२ कम्पीको ३ करोड ९९ लाख ३८ हजार २३७ कित्ता सेयर १ लाख ८४ हजार ७१२ पटक खरिदबिक्री हुँदा १५ अर्ब ५४ करोड ८८ लाख रुपैयाँ बराबरको सेयर कारोबार भएको नेप्सेले जनाएको छ । बुधबारका दिन १२ अर्ब ५ करोड ९२ लाख रुपैयाँ र मंगलबार ९ अर्ब १३ करोड ८६ लाख २९ हजार रुपैयाँ बराबरको सेयर कारोबार भएको थियो । आज १४३ कम्पनीको सेयर मूल्य बढेको छ भने ९५ कम्पनीको सेयर मूल्य घटेको छ । आज नेप्सेमा लामो समयपछि बैंकको सेयर मूल्यमा सर्किट लागेको छ । नेपाल इन्भेष्टमेन्ट मेगा बैंक, नेपाल फाइनान्स, आँखुखोला जलविद्युत, उपकार लघुवित्त, र थ्रीस्टार हाइड्रोपावरको सेयर मूल्य १० प्रतिशत बढेको छ । यस्तै, कुमारी बैंकको ९.५३ प्रतिशत, प्रभु बैंकको ९.५१ प्रतिशत, रिभरफल्स पावरको ९.११ प्रतिशतले सेयर मूल्य बढेको छ ।
चुरोटमा प्रयोग हुने पदार्थको उत्पादन आयातमा रोक लगाउन सरकारलाई निर्देशन
काठमाडौं । चुरोटमा प्रयोग हुने पदार्थहरुको उत्पादन आयात तथा प्रयोगमा रोक लगाउन सरकारलाई उद्योग समितिले निर्देशन दिएको छ । बिहीबार बसेको प्रतिनिधि सभा अन्तर्गतको उद्योग तथा वाणिज्य र श्रम तथा उपभोक्ता हित समिति बैठकले सरकारलाई यस्तो निर्देशन दिएको हो । समिति बैठकमा बोल्दै सभापति अब्दुल खानले चुरोटमा प्रयोग हुने फ्लेभर, क्याप्सुल तथा ट्याप्लेटहरु जस्ता नशालु पदार्थहरुले मानव स्वास्थ्यमा गम्भिर असर पारेको र विभिन्न रोगबाट पीडित भएकाले नशालु पदार्थहरुको उत्पादन आयात तथा प्रयोगमा रोक लगाउन नेपाल सरकार उद्योग वाणिज्य तथा आपूर्ति मन्त्रालयलाई निर्देशन दिए । उनले नेपालमा सुर्तिजन्य पदार्थको प्रयोगबाट जनस्वास्थ्यमा पर्ने नकारात्मक प्रभावलाई न्युनिकरण गर्न नेपाल सरकार स्वास्थ्य मन्त्रालयलाई सुझाव दिने पनि बताए । ‘चुरोडमा प्रयोग हुने फलेभर, क्याप्सुल तथा ट्याप्लेटहरु जस्ता नशालु पदार्थहरुले मानव स्वास्थ्यमा गम्भिर रोगबाट पीडित भएकाले नशालु पदार्थहरुको उत्पादन आयात तथा प्रयोगमा रोक लगाउन नेपाल सरकार उद्योग वाणिज्य तथा आपूर्ति मन्त्रालयलाई निर्देशन दिन्छौं’, उनले भने । उनले नेपालमा सुर्ती गुड्का र सो सम्बन्धि कच्चा पदार्थहरुको आयात तथा निर्यातको विवरण समितिलाई उपलब्ध गराउन सरकारलाई निर्देशन दिए ।
