टीभीएस मोटरद्वारा राष्ट्रिय स्तरको स्किल फेस्टको आयोजना
काठमाडौं । टीभीएस मोटर कम्पनीद्वारा काठमाडौंमा आयोजित राष्ट्रिय स्तरको सिप प्रतियोगितामा, जेएमपीएल नेपालको प्रतिनिधित्व गर्दै ३० उत्कृष्ट टेक्नीसियनहरूले सहभागिता जनाएका छन् । प्रतियोगितामा सहभागी ३० जना प्रतिभाशाली टेक्निसियन नेपालभरबाट छानिएका उत्कृष्ट हुन् । तिनले प्रतियोगितामा टीभीएस मोटर्सले आफ्ना टेक्नीसियनहरूको क्षमता बृद्धि गर्दै अटोमोटिभ उद्योगमा आफ्नो नेतृत्वलाई थप बलियो बनाउने प्रतिबद्धताको प्रतिनीधित्व गर्दै मोटरसाइकल प्रविधिको क्षेत्रमा आफ्नो सीप र ज्ञानको बेजोड प्रदर्शनी गरेका छन् । यी शीर्ष ३० टेक्नीसियनहरू मध्य बाट पनि उत्कृष्ट ५को छनोट गरिने र तिनले भारतको बेंगलोरमा टीभीएस मोटर कम्पनीद्वारा आयोजित हुने एसिया स्तरको सीप प्रतियोगितामा नेपालको प्रतिनिधित्व गर्ने कम्पनीले जनाएको छ । विश्वव्यापी स्तरमै दुईपांग्रे सवारी साधनको क्षेत्रमा अग्रणी कम्पनीका रुपमा परिचित टीभीएस मोटर्सले यो टेक्नीसियन भेटघाट विभिन्न देशका उत्कृष्ट टेक्नीसियनहरूलाई एकै मञ्चमा उभ्याउने उद्देश्यका साथ आयोजना गरेको हो । यो कार्यक्रम ज्ञान आदानप्रदान गर्न, नवीनतम प्राविधिक नवप्रवर्तनहरू उजागर गर्न र मोटरसाइकल उद्योगमा सेवा स्तरलाई नयाँ उचाइमा पुर्याउन लक्षित रहेको छ । प्रतियोगितामा सहभागिताका लागि टीभीएस सवारी साधनहरूको मर्मत तथा सेवा प्रवाहमा अद्वितीय दक्षता देखाएका र उत्कृष्ट प्रदर्शन गर्ने टेक्नीसियनहरूको चयन गरिएको छ ।प्रतियोगितामा जटिल डायग्नोस्टिक र मर्मत चुनौतीहरूको श्रृंखलाले टेक्नीसियनहरूको समस्या समाधान गर्ने क्षमता, टीभीएस मोटरसाइकलको उन्नत प्रविधिहरूको ज्ञान, र ग्राहक सेवा सीपहरूको परीक्षा लिइएको कम्पनीले जनाएको छ ।
बसाइँसराइले रित्तिन लागेको गाउँमा डेढ करोड लगानीमा कागती खेती
बागलुङ । बसाइँसराइका कारण रित्तिँदै गएको गाउँमा बागलुङ नगरपालिका-१४ बलेवाका किसानले व्यावसायिक कागतीखेती गर्न थालेका छन् । किसानले समूह बनाएर साढे दुई सय रोपनी जग्गा भाडामा लिएर कागतीखेती सुरु गरेका हुन् । बलेवाका ५२ किसानले झाडीले ढाकिएको खेतीयोग्य जमिन सदुपयोग गरी कागती लगाएका छन् । विसं २०७७ देखि ‘चासो कृषक समूह’ले सुरु गरेको कागतीखेती फस्टाउन थालेको छ । कागतीखेती गर्न एक करोड ५० लाखभन्दा बढी लगानी भएको समूहका अध्यक्ष केशव सुवेदीले जानकारी दिए । गत वर्षदेखि नै कागती उत्पादन हुन थालेको उनको भनाइ छ । यस वर्ष झण्डै पाँच लाखको बिक्री गरेको अध्यक्ष सुवेदीले बताए । कागतीखेतीका लागि कृषि ज्ञान केन्द्रले ६ लाख र प्रधानमन्त्री कृषि आधुनिकीकरण परियोजनाले १५ लाख अनुदान दिएको थियो । किसानले झण्डै एक करोड ३० लाख लगानी गरेको अध्यक्ष सुवेदीले जानकारी दिए । गाउँका नागरिक सेवा र सुविधाको खोजीमा बजार झर्न थालेपछि खेतीयोग्य जमिनको सदुपयोगका लागि कागतीखेती सुरु गरेको उनको भनाइ छ ।अध्यक्ष सुवेदीका अनुसार हाल कागती बगानमा चार हजार बिरुवा हुर्किरहेका छन् । गाउँमा बाँदर आतङ्क बढ्दा अरु खेती गर्न छाडेर कागती खेती गरिएको हो । कागतीखेती गरेपछि बाँदर आतङ्क केही कम भएको छ । बर्सेनि उत्पादन बढ्दै जाने र आम्दानी पनि बढ्ने छ । यस वर्ष रु पाँच लाखको कागती बागलुङ, कुश्मालगायत बजारमा बिक्री भएको छ । प्रधानमन्त्री कृषि आधुनिकीकरण परियोजना बागलुङका प्रमुख नारायण पौडेलले दुई वर्षदेखि उक्त कृषक समूहलाई प्राविधिक सहयोग र आर्थिक अनुदान दिँदै आएको बताए । विसं २०७९ मा चक्लाबन्दीका लागि १० लाख र गत वर्ष कागती ग्रेडिङ तथा भण्डारणका लागि पाँच लाख सहयोग गरेको उनले जानकारी दिए । प्रमुख पौडेलले भने, ‘अन्य किसानका लागि पनि यो अध्ययन केन्द्र बन्न सक्छ, प्रधानमन्त्री कृषि आधुनिकीकरण परियोजनाले दुई वर्षदेखि निरन्तर सहयोग गर्दै आएको छ । विषादी र अन्य प्राविधिक सहयोग गरेका छौं, बोटले विस्तारै फल दिन थालेपछि किसान पनि उत्साहित छन् । रासस
कर्मचारीहरूले ३ महिनामा पासवर्ड परिवर्तन गर्नुपर्ने, यस्तो छ साइबर सुरक्षासम्बन्धी एडभाइजरी
काठमाडौँ । कर्मचारीहरूले ३/३ महिनामा पासवर्ड परिवर्तन गर्नुपर्ने भएको छ । सञ्चार मन्त्रालय मातहत रहेको राष्ट्रिय साइबर सुरक्षा केन्द्रले कर्मचारीहरूका लागि साइबर सुरक्षासम्बन्धी एडभाइजरी जारी गर्दै यस्तो बताएको हो । पासवर्ड राख्दा सहजै अनुमान गर्न नसकिने गरी सुरक्षित राख्ने र ३÷३ महिनामा परिवर्तन गर्ने गरी प्रणालीमा व्यवस्था गर्न सुझाव दिएको हो । वेबसाइटहरू ह्याक हुने तथा डाटा चोरी हुने जस्ता समस्याबाट बच्ने उद्देश्यका साथ केन्द्रले एडभाइजरी सरकारी सूचना प्रविधि प्रणालीको प्रयोगकर्ताका लागि जारी गरेको हो । पछिल्लो समय सरकारी वेवसाइटहरूमा अनाधिकृत रुपमा प्रवेश गर्ने गरेका घटना बाहिरिने गरेका छन् । जसले गर्दा सरकारको सुरक्षा प्रणाली कमजोर रहेको भनेर आलोचना समेत हुँदै आएको छ । सरकारी कार्यालयको वेबसाइट, एप्लिकेसन, सर्भर, स्टोरेज तथा नेटवर्ककको सुरक्षा, कार्यालयमा रहेका डेस्कटप तथा ल्यापटप र प्रिन्टर सुरक्षा, पासवर्ड व्यवस्थापन तथा सुरक्षा, इन्टरनेट ब्राउजिङ सुरक्षा, इमेल तथा फिजिङ अट्याक, रिमुबेल मिडिया, मोबाइल सुरक्षा र सामाजिक सञ्जाल सुरक्षा सम्बन्धी एडभाइजरी दिएको छ । [pdf id=536319]
गोर्खाज फाइनान्सका संस्थापकले किनेनन् दिपेन्द्र अग्रवालको सेयर
काठमाडौं । गोर्खाज फाइनान्सका संस्थापक सेयरधनी दिपेन्द्र अग्रवालको सेयर बिक्रीमा राखिएको छ । फाइनान्सका संस्थापक सेयरधनीहरूले खरिद नगरेपछि अग्रवालको स्वामित्वमा रहेको सेयर सर्वसाधारणका लागि बिक्री खुला गरिएको हो । संस्थापक सेयरधनी अग्रवालले गत मंसिर १७ गते सेयर बिक्रीको लागि सञ्चालक समितिमा आवेदन दिएका थिए । सोही बमोजिम फाइनान्सले मंसिर २७ गते ४८ हजार ७७३ कित्ता सेयर बिक्रीमा राखिएको थियो । उक्त सेयर खरिद गर्न इच्छुक विद्यमान संस्थाकलाई ३५ दिनभित्र आवेदन दिन आह्वान गरिएको थियो । त्यसअवधिमा कुनै पनि संस्थापकको आवेदन नपरेपछि कम्पनीले सर्वसाधारण लगानीकर्ताका लागि बिक्री खुला गरेको हो । खरिद गर्न इच्छुक लगानीकर्ताले कम्पनीको उक्त सेयरमा १५ दिनभित्र आवेदन दिनुपर्नेछ ।
एनएमबि, प्राइम र कामना सेवाको सेयर बिक्रीमा, कुन बैंकको कति ?
काठमाडौं । एनएमबि बैंक, प्राइम कमर्सियल बैंक र कामना सेवा विकास बैंकको संस्थापक सेयर बिक्रीमा राखिएको छ । संस्थापक सेयरधनीहरूले बैंकमा रहेको आफ्नो स्वामित्वको सेयर बिक्रीमा राखेका हुन् । एनएमबि बैंकका संस्थापक सेयरधनीहरूले ५ लाख ९८ हजार १४५ कित्ता, प्राइम बैंकका संस्थापकले ५ लाख ५ हजार १८६ कित्ता र कामना सेवा विकास बैंकका संस्थापकले १ लाख ७७ हजार ७६६ कित्ता सेयर बिक्रीमा राखेका हुन् । एनएमबि र कामना सेवा विकास बैंकको सेयरमा विद्यमान संस्थापक सेयरधनीले मात्रै आवेदन दिन पाउनेछन् । यदि ३५ दिनभित्र संस्थापकको आवेदन नपरेमा सर्वसाधारण लगानीकर्ताका लागि बिक्री खुला गरिने जनाएको छ । प्राइम बैंकको सेयरमा भने सर्वसाधारण लगानीकर्ताले समेत आवेदन दिन पाउनेछन् । बैंकको सेयरमा आज माघ १३ गतेदेखि माघ २० गतेसम्म आवेदन दिन सकिनेछ । बैंकको सेयर मूल्य प्रतिकित्ता १ सय रुपैयाँ तोकेको छ ।
अमेरिकी एक डलरको मूल्य १३८.२४ रुपैयाँ, झर्याे पाउण्डको भाउ
काठमाडौं । नेपाल राष्ट्र बैंकले आज अमेरिकी डलरको मूल्य एकको खरिदर १३७.६४ रुपैयाँ र बिक्रीदर १३८.२४ रुपैयाँ तोकेको छ । आज युरोपियन यूरोको एकको खरिदर १४४.३६ रुपैयाँ र बिक्रीदर १४४.९९ रुपैयाँ, युके पाउण्ड स्ट्रलिङ एकको खरिददर १७०.९४ रुपैयाँ र बिक्रीदर १७१.६८ रुपैयाँ, स्वीस फ्रयाङ्क एकको खरिददर १५२.०४ रुपैयाँ र बिक्रीदर १५२.७० रुपैयाँ, अष्ट्रेलियन डलर एकको खरिददर ८५.९५ रुपैयाँ र बिक्रीदर ८७.३३ रुपैयाँ तोकेको छ । यस्तै, क्यानेडियन डलर एकको खरिददर ९६.०४ रुपैयाँ र बिक्रीदर ९६.४६ रुपैयाँ, सिङ्गापुर डलर एकको खरिददर १०२.१७ रुपैयाँ र बिक्रीदर १०२.६१ रुपैयाँ, जापानी येन १० को खरिददर ८.८३ रुपैयाँ र बिक्रीदर ८.८६ रुपैयाँ र चिनियाँ युआन एकको खरिददर १९.०० रुपैयाँ र बिक्रीदर १९.०८ रुपैयाँ तोकेको छ । राष्ट्र बैंककाअनुसार साउदी अरेबियन रियाल एकको खरिददर ३६.६९ रुपैयाँ र बिक्रीदर ३६.८५ रुपैयाँ, कतारी रियाल एकको खरिददर ३७.७५ रुपैयाँ र बिक्रीदर ३७.९२ रुपैयाँ, थाई भाट एकको खरिददर ४.०९ रुपैयाँ र बिक्रीदर ४.११ रुपैयाँ, युएई दिराम एकको खरिददर ३७.४७ रुपैयाँ र बिक्रीदर ३७.६४ रुपैयाँ, मलेसियन रिङ्गेट एकको खरिददर ३१.४४ रुपैयाँ र बिक्रीदर ३१.५८ रुपैयाँ तोकेको छ । यस्तै, साउथ कोरियन वन एक सयको खरिदद ९.६१ रुपैयाँ र बिक्रीदर ९.६५ रुपैयाँ, स्वीडिस क्रोनर एकको खरिददर १२.६१ रुपैयाँ र बिक्रीदर १२.६६ रुपैयाँ, डेनिस क्रोनर एकको खरिददर १९.३५ रुपैयाँ र बिक्रीदर १९.४३ रुपैयाँ, हङ्कङ डलर एकको खरिददर १७.६७ रुपैयाँ र बिक्रीदर १७.७५ रुपैयाँ तोकेको छ । यस्तै, कुवेती दिनार एकको खरिददर ४४६.८० रुपैयाँ र बिक्रीदर ४४८.७५ रुपैयाँ, बहराइन दिनार एकको खरिददर ३६५.१३ रुपैयाँ र बिक्रीदर ३६६.७२ रुपैयाँ, ओमानी रियाल एकको खरिददर ३५७.५९ रुपैयाँ र बिक्रीदर ३५९.१५ रुपैयाँ कायम रहेको राष्ट्र बैंकले जनाएको छ ।
एनएलजी इन्स्योरेन्सले ३ लाख २० हजार कित्ता सेयर बेच्दै, मूल्य १ सय रुपैयाँ
काठमाडौं । एनएलजी इन्स्योरेन्स कम्पनीले अवितिरित हकप्रद सेयर बिक्री गर्ने भएको छ । कम्पनीले संस्थापक तथा सर्वसाधारण समूहको बिक्री नभएको ३ लाख २० हजार ५३३ कित्ता हकप्रद सेयर बिक्री गर्ने भएको हो । गत मंसिर ११ गतेदेखि पुस १६ गतेसम्म कम्पनीले चुक्ता पुँजी १ अर्ब ५३ करोड ९५ लाख ३५ हजार रुपैयाँको ६.२५ प्रतिशत अर्थात् १० कित्ता सेयर बराबर नयाँ ६.२५ कित्ता हकप्रद सेयर बिक्री खुला गरेको थियो । अर्थात् कम्पनीले प्रतिकित्ता १ सय रुपैयाँ अंकित मूल्य दरका ९६ लाख ३१ हजार २२०.२२ कित्ता हकप्रद सेयर जारी गरेको थियो । उक्त अवधिमा बिक्री नभएको संस्थापक समूहको २९ हजार ९७७ कित्ता र सर्वसाधारण समूहको २ लाख ९० हजार ५५५ कित्ता गरी कुल ३ लाख २० हजार कित्ता सेयर बिक्री खुला गर्ने भएको हो । कम्पनीको सेयर माघ २० गतेदेखि बिक्री खुला भई माघ २७ गतेसम्म बिक्री खुला रहनेछ । कम्पनीको सेयर बिक्री प्रबन्धकमा लक्ष्मी सनराइज क्यापिटल रहेको छ । कम्पनीको उक्त सेयरमा लगानीकर्ताले एनएलजी इन्स्योरेन्सको विराटनगर, वीरगंज, पोखरा, बुटवल, सुर्खेत र धनगढी शाखाबाट आवेदन दिन सक्नेछन् । कम्पनीको सेयर मूलय प्रतिकित्ता १ सय रुपैयाँ तोकिएको छ । लगानीकर्ताले कम्तिमा १ हजार कित्ता र अधिकतम सम्पूर्ण कित्ताका लागि आवेदन दिन सक्नेछन् ।
मौसमअनुसार मूर्ति तयार, सरस्वती पूजाका लागि भ्याइनभ्याई
काठमाडौं । सरस्वती पूजा नजिकिँदै जाँँदा महोत्तरीका विभिन्न स्थानमा मूर्तिकारहरू धमाधम मूर्ति बनाउन थालेका छन् । १० नगरपालिका र ५ गाउँपालिका रहेको महोत्तरीमा अवस्थित सबै सामुदायिक तथा निजी विद्यालय, कोचिङ सेन्टर, ट्युशन सेन्टर, क्लब, पुस्तकालयसहित गाउँ तथा नगरका विभिन्न चोकचोकमा सरस्वती पूजाका लागि मूर्तिकारलाई मूर्ति बनाउन भ्याइनभ्याई छ । आफ्नो चार पुस्तादेखि मूर्ति बनाउने पेसा चल्दै आएको एकडारा गाउँपालिका-५ का मूर्तिकार सुभाष पण्डितले सरस्वती पूजाका बेला अत्यधिक मूर्तिको माग हुने गरेको कारण अहिले सरस्वतीको मूर्ति बनाउन भ्याइनभ्याई भएको छ । त्यस्तै पूजाको अब १० दिन मात्र बाँकी हुँदा औरही नगरपालिका-२ का कैलाश रामलाई पनि मूर्ति बनाउन भ्याइनभ्याई भएको बताउँछन् । सरस्वतीको मूर्ति बनाउनमै व्यस्त जलेश्वर नगरपालिका-२ का विकाऊ पासवान पनि अहिले मूर्ति बनाउन भ्याइनभ्याइ भएको बताउँछन् । मूर्ति बनाउन चाहिने माटो, खर (पराल, भुस) रङ, जुटलगायत वस्तुको जोहो गर्नु, घामपानी र वातावरणअनुसार मूर्ति बनाउनु जस्ता क्रियाकलाप गर्नुपर्ने भएकाले मूर्तिकारलाई अहिले भ्याइनभ्याई भएको उनीहरू बताउँछन् । ‘घाम उदाएपछि मात्रै मूर्ति सुक्ने र मूर्ति सुकेपछि मात्रै राम्ररी रङ्ग रोगन गर्न मिल्ने भएकाले जति बढी घाम उदाउँछ, त्यति नै बढी मूर्ति तयार गर्नुपर्छ,’ मूर्तिकार पण्डितले भने । उनले आफू र आफ्ना बुवा शम्भु पण्डित मिलेर प्रत्येक वर्ष ५० हजार रुपैयाँभन्दा बढीका सरस्वती मूर्ति बनाउने गरेको बताए । साथै मौसमले साथ दिएमा ७०/७५ सम्म पनि मूर्ति बनाएर बेच्ने गरेको उनको भनाइ छ । त्यसैगरी मूर्तिकार कैलाश पनि आफू तथा आफ्ना परिवारका सदस्य मिलेर वर्षेनी ६०/७० वटा मूर्ति बनाउने गरेको बताउँछन् । उनले वर्षेनी २५ भन्दा बढी मूर्ति बनाउने गरेको बताए । आफ्नो क्षमता र साधन श्रोतले तयार गर्ने संख्याका अनुसार उनीहरुको आम्दानी पनि फरक फरक हुने गरेको छ । यसरी तयार गरेका मूर्तिहरु २ हजार रुपैयाँदेखि र ७ हजार रुपैयाँसम्ममा बेचेर वार्षिक २ लाख रुपैयाँ जति आम्दानी गर्ने गरेको पण्डितले बताए । मूर्तिकार कैलाशले आफूले प्रतिगोटा ३ हजार रुपैयाँदेखि १० हजार रुपैयाँसम्ममा मूर्ति बेचेरै वार्षिक ३ लाख ५० हजार रुपैयाँ आम्दानी गर्ने गरेको बताए । दिनानुदिन बढ्दै गएको मूर्तिको मागले यहाँका मूर्तिकारलाई सरस्वती पूजाको बेला दिनरात काम गर्नुपर्ने र मौसमअनुसार मूर्ति तयार गर्नुपर्ने चुनौती रहने गरेको छ । जिल्लाका मूर्तिकारले प्रत्येक वर्ष सरस्वतीको मूर्तिका साथै अन्य पूजा जस्तै गणेश, विश्वकर्मा, काली, दुर्गा पूजाका लागि पनि मूर्ति निर्माण गर्ने गरेका छन् । जिल्लामा पहिला पहिला पण्डित (कुमाले) जातिले मात्र मूर्ति बनाउने गरेकामा अहिले विभिन्न जातिका व्यक्तिले मूर्ति निर्माणलाई व्यावसायिक रुप दिएर विभिन्न जातजाति संलग्न रहेको पाइन्छ । यस वर्ष माघ २१ गते देशभरि श्रीपञ्चमी तथा सरस्वती पूजा मनाइँदै छ ।
