गरिमा क्यापिटलका कर्मचारीलाई एएमएल तालिम, धितोपत्र बजारमा अनुपालनमा जोड
काठमाडौं । एएमएल नेपालले गरिमा क्यापिटल लिमिटेडका कर्मचारीहरूका लागि धितोपत्र बजार केन्द्रित एकदिने एएमएल/सीएफटी तालिम कार्यक्रम सम्पन्न गरेको छ । एन्टी–मनी लन्डरिङ तथा काउन्टरिङ द फाइनान्सिङ अफ टेरोरिज्म सम्बन्धी परामर्श सेवामा विशेषीकृत संस्थाका रूपमा परिचित एएमएल नेपालले आयोजना गरेको उक्त तालिमको उद्देश्य मर्चेन्ट बैंकिङ व्यवसायमा अनुपालन क्षमता अभिवृद्धि गर्नु रहेको थियो । कार्यक्रममा अन्तर्राष्ट्रिय एएमएल/सीएफटी अवधारणा, नेपालको कानुनी तथा नियामकीय व्यवस्था, धितोपत्र बोर्ड नेपालका निर्देशनअनुसार बजार मध्यस्थकर्ताको भूमिका तथा जिम्मेवारी, साथै मर्चेन्ट बैंकरहरूको व्यावहारिक अनुपालन अपेक्षाबारे विस्तृत प्रस्तुति गरिएको थियो । तालिमको सहजीकरण विज्ञद्वय श्रीधर अधिकारी र लेखनाथ पोखरेलले गरेका थिए। कार्यक्रममा गरिमा क्यापिटलका कर्मचारीहरूको सक्रिय सहभागिता रहेको थियो । सहभागीहरूले नेपाली धितोपत्र बजारमा देखिएका अनुपालन चुनौती र उत्कृष्ट अभ्यासबारे छलफल गरेका थिए । कार्यक्रमका क्रममा एएमएल नेपालका प्रतिनिधिहरूले पूँजी बजारको पारदर्शिता, विश्वसनीयता तथा वित्तीय अपराध नियन्त्रणका लागि प्रभावकारी एएमएल/सीएफटी अनुपालन अपरिहार्य रहेको उल्लेख गरे । यसले वित्तीय प्रणालीको दीर्घकालीन स्थायित्व र सुदृढीकरणमा टेवा पुग्ने विश्वास व्यक्त गरिएको छ । एएमएल नेपालले बैंक तथा वित्तीय संस्था, धितोपत्र बजारका मध्यस्थकर्ता तथा अन्य रिपोर्टिङ इकाइहरूलाई एएमएल/सीएफटी सम्बन्धी परामर्श, तालिम, नीति निर्माण, जोखिम मूल्यांकन तथा निरन्तर अनुपालन सहयोग प्रदान गर्दै आएको जनाएको छ ।
भारतमा फेरि इन्धनको मूल्य बढ्यो, दैनिक करोडौं डलरको घाटा
काठमाडौं । मध्यपूर्वमा जारी युद्धका कारण आपूर्ति शृङ्खलामा परेको दबाबबीच भारतका सरकारी इन्धन कम्पनीहरूले पेट्रोल र डिजेलको मूल्य फेरि बढाएका छन् । पछिल्लो १० दिनमा चौथो पटक गरिएको यो मूल्यवृद्धिले देशको इन्धन बजारमा निरन्तर अस्थिरता देखिएको छ । फेब्रुअरीमा युद्ध सुरु भएयता भारतमा अटोमोबाइल इन्धनको मूल्य करिब पाँच प्रतिशतले बढिसकेको छ । इरान र हर्मुज जलघाँटी क्षेत्रमा उत्पन्न तनावले विश्व ऊर्जा आपूर्तिको एक महत्त्वपूर्ण मार्गमा अवरोध सिर्जना गरेपछि यसले प्रत्यक्ष प्रभाव पारेको हो । उक्त क्षेत्रलाई विश्वको प्रमुख ऊर्जा ढुवानी कोरिडोरमध्ये एक मानिन्छ । विश्वको तेस्रो ठूलो तेल खरिदकर्ता भारतले आफ्नो कच्चा तेलको करिब आधा हिस्सा यही संवेदनशील जलमार्गबाट आयात गर्छ । आपूर्ति जोखिम बढेसँगै देशभित्र मूल्य समायोजनको दबाब पनि बढ्दै गएको छ । पछिल्लो मूल्य समायोजनपछि देशभर इन्धनको दरमा औसत दुई रुपैयाँ (करिब ०.०२ अमेरिकी डलर) भन्दा बढी वृद्धि भएको छ । राजधानी नयाँदिल्लीमा पेट्रोलको मूल्य ९९.५ रुपैयाँबाट बढेर १०२.१२ रुपैयाँ पुगेको छ भने डिजेलको मूल्य ९५.२० रुपैयाँमा पुगेको छ । यो वृद्धि प्रधानमन्त्री नरेन्द्र मोदीले विदेशी मुद्रा सञ्चिति जोगाउन इन्धन खपतमा नियन्त्रण आवश्यक रहेको बताएको केही दिनपछि आएको हो । उनले आयातमा हुने उच्च खर्चलाई व्यवस्थापन गर्न उपभोगमा अनुशासन आवश्यक रहेको सङ्केत गरेका थिए । यसैबीच भारतले मध्यपूर्वबाट हुने आपूर्तिमा आएको कमी पूर्ति गर्न रूसबाट कच्चा तेल आयात बढाएको छ । जहाज ट्र्याकिङ तथा आयात तथ्याङ्कहरूले प्रतिबन्धमा प्राप्त अस्थायी अमेरिकी छुटपछि भारतले वैकल्पिक स्रोततर्फ झुकाव बढाएको देखाएका छन् । ऊर्जा आपूर्तिमा आएको दबाबबारे प्रतिक्रिया दिँदै पेट्रोलियम तथा प्राकृतिक ग्यासमन्त्री हरदीप सिंह पुरीले तेल बिक्री गर्ने कम्पनीहरू ठूलो आर्थिक दबाबमा रहेको बताए । उनका अनुसार कम्पनीहरूले दैनिक करिब १२ करोड अमेरिकी डलरसम्मको घाटा बेहोर्नुपरेको छ, तर त्यसका बाबजुद पनि देशमा ‘निर्बाध ऊर्जा आयात र आपूर्ति’ सुनिश्चित गरिएको उनले दाबी गरे । मध्यपूर्वीय युद्धले अन्तर्राष्ट्रिय बजारमा कच्चा तेलको आपूर्ति अस्थिर बनाइरहेको बेला भारतले आन्तरिक मूल्य समायोजन र वैकल्पिक आपूर्ति स्रोत विस्तार दुवैलाई सँगसँगै अघि बढाइरहेको देखिएको छ ।
नेपालमा दिपल एस०५ प्लसको बिक्री सुरु, ४०५ किमि रेन्ज
काठमाडौं । नेपालका लागि दिपलका फ्युचरिस्टिक तथा इन्टेलिजेन्ट इभीको आधिकारिक वितरक एमएडब्लु वृद्धिले ‘२०२६ दिपल एस०५ प्लस’को बिक्री सुरु गरेको छ । कम्पनीका अनुसार कम्प्लिट स्मार्ट लक्जरी इलेक्ट्रिक एसयुभीका रूपमा प्रस्तुत गरिएको एस०५ प्लस उन्नत प्रविधि, आकर्षक डिजाइन र फाइभ–स्टार सुरक्षा मापदण्डसहित बजारमा ल्याइएको हो । यसले विशेषगरी विवेकशील ग्राहकलाई लक्षित गरेको कम्पनीको दाबी छ । नयाँ एस०५ प्लसमा रियर ह्विल ड्राइभ प्रणाली रहेको छ, जसले यसलाई सेग्मेन्टमै पर्फर्मेन्स–केन्द्रित इभी बनाएको कम्पनीले जनाएको छ । यसमा ९९ किलोवाट क्षमताको मोटर जडान गरिएको छ, जसले ३२० एनएम टर्क उत्पादन गर्दै ४०५ किलोमिटर (डब्लुएलटिपी) रेन्ज प्रदान गर्छ । चार्जिङतर्फ यसमा १५१.५ किलोवाट डीसी फास्ट चार्जिङ सपोर्ट रहेको छ, जसले करिब १५ मिनेटमै ३० देखि ८० प्रतिशतसम्म चार्ज गर्न सक्ने बताइएको छ । साथै ६ किलोवाटको भेहिकल–टु–लोड (V2L) सुविधा रहेको यस गाडीबाट बाह्य उपकरणमा समेत विद्युत आपूर्ति गर्न सकिन्छ । डिजाइनतर्फ ‘आईएफ डिजाइन अवार्ड २०२५’ विजेता एस०५ प्लसमा सिग्नेचर फ्रेमलेस डोर, फ्लस ह्यान्डल र आकर्षक लाइनले यसको रोड प्रेजेन्सलाई थप मजबुत बनाएको छ। इन्टेरियरमा १५.४ इन्चको फुल एचडी टचस्क्रिन, ८ वटा सोनी स्पिकर, वायरलेस एप्पल कारप्ले र एन्ड्रोइड अटो तथा ६४ कलर एम्बायन्ट लाइटिङ जस्ता प्रिमियम सुविधा दिइएका छन् । यसमा १५९ लिटर क्षमताको फ्रंक (अगाडिको स्टोरेज) तथा रिमोट इन–एन्ड–आउट सिस्टमसमेत समावेश गरिएको छ, जसले स्मार्ट पार्किङलाई सहज बनाउँछ । साथै ४जी र ५जी कनेक्टिभिटीले सवारीलाई सधैं इन्टरनेटसँग जोडिराख्ने सुविधा दिन्छ । सुरक्षातर्फ ‘युरो एनक्याप’को ५–स्टार रेटिङ प्राप्त गरेको यो मोडेल उच्च सुरक्षा मापदण्ड पूरा गर्ने सवारीका रूपमा प्रस्तुत गरिएको छ । एमएडब्लु वृद्धिका अनुसार एस०५ प्लस पर्फर्मेन्स, डिजाइन, प्रविधि र सुरक्षामा कुनै सम्झौता नगर्ने ग्राहकलाई लक्षित गरिएको हो । नेपाली बजारमा यस गाडीको मूल्य ५३ लाख ९९ हजार रुपैयाँ तोकिएको छ र बुकिङ खुला गरिएको कम्पनीले जनाएको छ ।
यी ७ खानेकुरा जसले बालबालिकालाई चर्को गर्मीबाट बचाउँछ
काठमाडौं । गर्मीमा तापक्रम बढ्दै जाँदा आफ्नो स्वास्थ्यको धेरै ख्याल राख्नु पर्ने हुन्छ । विशेषगरी बालबालिका र वृद्धवृद्धालाई यसको धेरै असर हुन्छ । तीव्र घाम, आद्र्रता र तातो हावाका कारण बालबालिकाहरू चाँडै थाक्छन् । बाहिर खेल्दा उनीहरूको शरीर धेरै चाँडै डिहाइड्रेटेड हुन्छ, त्यसैले यो मौसममा उनीहरूको लागि उचित आहार लिनु धेरै महत्त्वपूर्ण छ । यस्तो अवस्थामा आमाबाबुको सबैभन्दा ठूलो तनाव भनेको बच्चाहरूलाई के खुवाउने भन्ने हुन्छ । आज हामी तपाईंलाई केही यस्ता खानेकुराहरूको बारेमा बताउन गइरहेका छौं, जुन गर्मीमा प्रत्येक अभिभावकले आफ्ना बच्चाहरूको आहारमा समावेश गर्नु महत्त्वपूर्ण छ । तरबुजाः तरबुजामा पानीको मात्रा धेरै हुन्छ । यसले शरीरलाई शीतल राख्न मद्दत गर्छ । यसलाई खाँदा बच्चाहरूलाई हाइड्रेटेड र ताजा राख्न मद्दत गर्छ । यसमा भिटामिन र एन्टिअक्सिडेन्ट पनि पाइन्छ । काँक्रोः काँक्रोलाई पनि गर्मीको राम्रो खाना मानिन्छ । यो वयस्कहरूको लागि मात्र नभई बच्चाहरूको लागि पनि स्वस्थकर हुन्छ । यसमा लगभग ९५ प्रतिशत पानी हुन्छ, जसले शरीरलाई हाइड्रेटेड राख्न मद्दत गर्छ । यसलाई खानामा सलादको रूपमा वा हल्का नुन हालेर खाजाको रूपमा समावेश गर्न सकिन्छ । दही भातः तपाईं बच्चाहरूको खानामा दही र भात पनि समावेश गर्न सक्नुहुन्छ । दही र भातको मिश्रणले चर्को गर्मीमा धेरै राहत दिन्छ । यसले पेटलाई शीतल बनाउँछ र पाचन सुधार गर्छ । नरिवल पानीः गर्मीमा खेल्दा बालबालिका धेरै पसिना बगाउँछन्, जसका कारण उनीहरू डिहाइड्रेटेड महसुस गर्छन् । नरिवल पानीले हाइड्रेड गराउन मद्दत गर्छ । यसमा प्राकृतिक इलेक्ट्रोलाइट्स हुन्छन् जसले बच्चाहरूलाई सक्रिय राख्छन् र पानीको मात्रा पुनःपूर्ति गर्छन् । महीः मही पिउनाले शरीरलाई शीतलता मिल्छ र खाना सजिलै पचाउन पनि मद्दत गर्छ । यसमा क्याल्सियम र धेरै आवश्यक पोषक तत्वहरू पाइन्छ जुन बालबालिकाको स्वास्थ्यको लागि राम्रो हुन्छ । कागती पानीः तपाईं आफ्ना बच्चाहरूलाई पनि कागती पानी दिन सक्नुहुन्छ । कागती पानी बनाउनुहोस् र आफ्नो बच्चा बाहिर खेलेर वा स्कूलबाट फर्किँदा खुवाउनुहोस् । यो गर्मी मौसममा बच्चाहरूको लागि एकदमै राम्रो पेय पदार्थ हो । यसमा भिटामिन सी हुन्छ, जसले शरीरलाई ताजा राख्न मद्दत गर्छ । गोलभेडाः यसमा भिटामिन र खनिज प्रचुर मात्रामा पाइन्छ । यसलाई बालबालिकाको खानामा सलादको रूपमा समावेश गर्न सकिन्छ । जसले शरीरलाई हाइड्रेटेड राख्न पनि मद्दत गर्छ ।
दिपेन्द्र सिंह ऐरी एशियन ब्याट्रीको ब्राण्ड एम्बेसडर, ‘भोल्टेक्स’ सिरिज सार्वजनिक
काठमाडौं । एशियन ब्याट्री लिमिटेडले राष्ट्रिय क्रिकेट टोलीका खेलाडी दिपेन्द्र सिंह ऐरीलाई आधिकारिक ब्राण्ड एम्बेसडरको रूपमा नियुक्त गरेको छ । कम्पनीले यससँगै ‘भोल्टेक्स’ सिरिज अन्तर्गतका नयाँ ब्याट्रिहरू पनि सार्वजनिक गरेको छ । काठमाडौंस्थित होटल याक एण्ड यतीमा आयोजित कार्यक्रममा देशभरका ४०० भन्दा बढी डिलर, रिटेलर तथा व्यावसायिक साझेदारहरूको सहभागिता रहेको थियो । कम्पनीले कार्यक्रमलाई ब्राण्ड विस्तार र नयाँ रणनीतिक यात्राको महत्वपूर्ण चरणका रूपमा प्रस्तुत गरेको छ । कम्पनीका अनुसार ‘भोल्टेक्स’ सिरिज उत्पादनमा एकरूपता कायम गर्ने, ब्राण्डिङ सुदृढ बनाउने तथा गुणस्तर अभिवृद्धि गर्ने उद्देश्यसहित बजारमा ल्याइएको हो । आधुनिक प्रविधि, टिकाउपन र उच्च प्रदर्शनलाई प्राथमिकतामा राखिएको यस सिरिजले नेपाली अटोमोबाइल बजारमा नयाँ मापदण्ड स्थापित गर्ने अपेक्षा गरिएको छ । कार्यक्रममा बोल्दै दिपेन्द्र सिंह ऐरीले गुणस्तरीय नेपाली ब्राण्डसँग सहकार्य गर्न पाउँदा आफू गौरवान्वित भएको बताए । उनले नेपाली उत्पादनप्रतिको उपभोक्ता विश्वास बढ्दै गएको उल्लेख गर्दै एशियन ब्याट्रीले उद्योग क्षेत्रमा बनाएको पहिचान प्रशंसनीय रहेको धारणा राखे । कार्यक्रमका क्रममा कम्पनीको ब्राण्ड विकास, बजार विस्तार तथा बिक्री प्रवर्द्धनमा योगदान पुर्याउने रिटेलर तथा डिष्ट्रिब्युटरलाई सम्मानसमेत गरिएको थियो । कम्पनीले आफ्ना व्यावसायिक साझेदारलाई सफलताको प्रमुख आधारका रूपमा व्याख्या गरेको छ । कम्पनीका अध्यक्ष सुरेश लोहनीले एशियन ब्याट्रीले नेपाली अटोमोबाइल क्षेत्रमा उल्लेखनीय योगदान पुर्याउँदै आएको बताए । गुणस्तर, विश्वसनीयता र बिक्रीपछिको सेवाप्रतिको प्रतिबद्धताका कारण बजारमा कम्पनीको उपस्थिति सुदृढ भएको उनको भनाइ छ । एशियन ब्याट्रीले बजाज, हिरो, सेभ्रोले, फोर्ड, होण्डा र इसुजुजस्ता अन्तर्राष्ट्रिय अटोमोबाइल ब्राण्डलाई आफ्ना उत्पादन उपलब्ध गराउँदै आएको जनाएको छ । विराटनगरस्थित उत्पादन केन्द्र र काठमाडौंस्थित कर्पोरेट कार्यालयमार्फत कम्पनीले अन्तर्राष्ट्रियस्तरको उत्पादन प्रणाली अपनाउँदै आएको छ । कम्पनीका अनुसार प्रत्येक ब्याट्री कडा परीक्षणपछि मात्र बजारमा ल्याइने भएकाले उत्पादन टिकाउ, भरपर्दो र उच्च प्रदर्शनयुक्त हुने गरेका छन् । देशभर फैलिएको सेवा सञ्जालमार्फत ग्राहकलाई बिक्रीपछिको सेवा र प्राविधिक सहयोग पनि प्रदान गर्दै आएको कम्पनीले जनाएको छ । स्वदेशी उद्योगका रूपमा सुरु भएको एशियन ब्याट्रीले हाल अन्तर्राष्ट्रिय बजारतर्फ पनि आफ्नो उपस्थिति विस्तार गर्दै ‘मेड इन नेपाल’ उत्पादनलाई विश्व बजारमा स्थापित गर्ने लक्ष्य लिएको जनाएको छ ।
सिन्धु विकास बैंकको सीईओमा गणेशकुमार केसी
काठमाडौं । सिन्धु विकास बैंक लिमिटेडको प्रमुख कार्यकारी अधिकृत (सीईओ) मा गणेशकुमार केसी नियुक्त भएका छन् । जेठ १० गते बसेको सञ्चालक समितिको बैठकले केसीलाई आगामी चार वर्षका लागि सीईओकाे पदमा नियुक्त गर्ने निर्णय गरेको कम्पनीका सचिव पुस्कर जिसीले जानकारी दिएका छन् । केसीले जेठ ११ गतेदेखि नै कार्यभार सम्हालिसकेका छन् ।
सार्वजनिक चासोका मुद्दामा बहस गर्ने दिन सामाजिक सञ्जाल नहेर्न सुझाव
काठमाडौं । सार्वजनिक चासोका मुद्दामा बहस वा फैसला गर्ने दिन सामाजिक सञ्जाल नहेर्न सर्वोच्च अदालतका न्यायाधीश सुनिलकुमार पोखरेलले न्यायाधीश र कानुन व्यवसायीलाई सुझाव दिएका छन् । विशेष अदालत बार एसोसिएसनले काठमाडौंमा आयोजना गरेको मानसिक सु–स्वास्थ्य र तनाव व्यवस्थापन विषयक अन्तरक्रिया कार्यक्रममा बोल्दै उनले संवेदनशील मुद्दामाथि आउने तत्कालीन सामाजिक प्रतिक्रियाले व्यक्तिको मनोविज्ञानमा असर पार्ने बताएका हुन् । उनका अनुसार सार्वजनिक सरोकारका मुद्दामा बहस वा फैसला भएपछि सामाजिक सञ्जालमा आउने प्रशंसा र आलोचनाले व्यक्तिमा अस्वाभाविक आत्मविश्वास वा अत्यधिक नकारात्मक सोच पैदा गर्न सक्छ । त्यसैले त्यस्ता मुद्दासँग सम्बन्धित व्यक्तिले कम्तीमा त्यस दिन सामाजिक सञ्जाल र अनलाइन सामग्रीबाट टाढा रहनुपर्ने उनको सुझाव छ । ‘कुनै एउटा मुद्दामा राम्रो बहस भयो वा फैसला आयो भने प्रशंसा आउँछ, त्यसले म त असाध्यै सक्षम रहेछु भन्ने भावना पैदा गराउँछ । नतिजा विवादित भयो भने उल्टै म गलत रहेछु भन्ने नकारात्मक असर पर्न सक्छ,’ उनले भने, ‘त्यसैले सार्वजनिक चासोको मुद्दा हेरेको दिन बेलुका सामाजिक सञ्जाल र अनलाइन मिडिया नहेर्नु राम्रो हुन्छ।’ न्यायाधीश पोखरेलले तत्काल आउने प्रतिक्रिया स्थायी नहुने उल्लेख गर्दै समयसँगै सार्वजनिक धारणा बदलिने बताए । उनका अनुसार संवेदनशील मुद्दामा संलग्न व्यक्तिले क्षणिक प्रतिक्रियाभन्दा आफ्नो मानसिक सन्तुलन र पेशागत निष्पक्षतालाई प्राथमिकता दिनुपर्छ । कार्यक्रम विशेष अदालत वार इकाइका अध्यक्ष टीकाबहादुर कुँवरको अध्यक्षतामा भएको थियो ।
काठमाडौंमा ‘हिमालयन लिटरेचर फेस्टिभल २०२६’ हुँदै, विश्व चर्चित लेखकको जमघट
काठमाडौं । ‘हिमालयन लिटरेचर फेस्टिभल एण्ड राइटर्स वर्कशप २०२६’को औपचारिक घोषणा गरिएको छ । दक्षिण एशियाका प्रमुख अन्तर्राष्ट्रिय साहित्यिक जमघटमध्ये एक मानिने यस महोत्सव आगामी मे २९ देखि जुन ५ सम्म काठमाडौंमा आयोजना हुनेछ । एनसेल फाउन्डेसनको सहकार्यमा हुने आठदिने कार्यक्रम यस वर्ष नेपाली साहित्यका अग्रज व्यक्तित्व गुरु प्रसाद मैनालीप्रति समर्पित गरिएको आयोजकले जनाएका छन् । महोत्सवमा नेपालसहित विश्वका प्रतिष्ठित कवि, उपन्यासकार, संस्मरण लेखक, अनुवादक, चलचित्रकर्मी, विद्वान्, पत्रकार तथा उदाउँदै गरेका लेखकहरूको उल्लेख्य सहभागिता रहनेछ । कार्यक्रम हिलिङ, चेतना, सिर्जनशीलता, स्मृति तथा तीव्र परिवर्तनशील विश्वमा सांस्कृतिक संवादजस्ता विषयमा केन्द्रित रहनेछ । सप्ताहव्यापी कार्यक्रमअन्तर्गत मास्टर क्लास, कार्यशाला, मुख्य वक्तव्य, कविता वाचन, साहित्यिक संवाद, चलचित्र प्रदर्शन, सांस्कृतिक भ्रमण तथा अन्तरविषयक छलफलहरू समावेश गरिएका छन् । यस वर्षको महोत्सवमा पुलित्जर पुरस्कार विजेता कवि ट्रेसी के. स्मिथ र पल मल्डुन, चर्चित उपन्यासकार जीन ह्यान्फ कोरेलिट्ज, कवि तथा अनुवादक टोनी बार्नस्टोन, हिमालयन कवि युयुत्सु शर्मा, साहित्यिक सम्पादक मार्टिन डोयल तथा ‘पोएट लौरिएट’ टिना चाङ लगायत विभिन्न देशका साहित्यिक व्यक्तित्वहरूको सहभागिता रहनेछ । महोत्सवको उद्घाटन विशेष समारोहमार्फत गरिनेछ भने कविता, संस्मरण, जादुई यथार्थवाद, कृत्रिम बुद्धिमत्ता र सिर्जनात्मक लेखन, महिला साहित्य, आदिवासी आख्यान, आघात र हिलिङ, अनुवाद तथा डिजिटल युगमा साहित्यको भविष्यजस्ता विषयमा सत्र सञ्चालन गरिनेछन् । आयोजक युयुत्सु शर्माले साहित्यलाई मानव सभ्यतासँग जोडिएको हिलिङको माध्यमका रूपमा व्याख्या गर्दै महोत्सवले नेपालको सांस्कृतिक पहिचानलाई विश्वमञ्चमा उजागर गर्ने बताए । महोत्सवले युवा साहित्यिक प्रतिभाको प्रवर्द्धनमा पनि जोड दिनेछ । कार्यशाला, मार्गदर्शन कार्यक्रम र अन्तर्राष्ट्रिय सहकार्यमार्फत नयाँ पुस्ताका लेखकहरूलाई अवसर प्रदान गरिनेछ । यसैगरी, महोत्सवअन्तर्गत कवितामा आधारित अन्तर्राष्ट्रिय चलचित्र प्रदर्शनसँगै काठमाडौं दरबार स्क्वायर, पाटन, बौद्धनाथ, बुढानीलकण्ठ र नगरकोटलगायतका सांस्कृतिक स्थलको भ्रमण कार्यक्रम पनि समावेश गरिएको छ । आयोजकका अनुसार यस महोत्सवले काठमाडौंलाई विश्व साहित्यिक गन्तव्यका रूपमा स्थापित गर्न थप टेवा पुर्याउने अपेक्षा गरिएको छ ।
