यी हुन् मन्त्रिपरिषद् बैठकका ६ निर्णय
काठमाडाैं । शुक्रबार बसेकाे मन्त्रिपरिषद्को बैठकले महत्त्वपूर्ण ६ निर्णय गरेको छ । सूचना तथा सञ्चारमन्त्री डा. विक्रम तिमिल्सिनाले सरकारले सहकारी सम्बन्धी प्रचलित कानुनलाई संशोधन र एकीकरण गर्न विधेयक तर्जुमाको लागि सिद्धान्त स्वीकृत गर्ने निर्णय गरेको जानकारी दिए । यी हुन् बैठकको निर्णय : १. नेपाल विशेष सेवा ऐन, २०४२ को साविक व्यवस्था जगाउने सम्बन्धी विधेयक संघीय संसद समक्ष पेश गर्न स्वीकृति दिने। २. नेपाल धितोपत्र बोर्डको अध्यक्ष पदमा डाक्टर गोपाल प्रसाद भट्ट (कैलाली) लाई नियुक्त गर्ने। ३. सहकारी सम्बन्धी प्रचलित कानुनलाई संशोधन र एकीकरण गर्न विधेयक तर्जुमाको लागि सिद्धान्त स्वीकृत गर्ने ४. बचत तथा ऋण सहकारी नियमन तथा सुपरिवेक्षण सम्बन्धमा व्यवस्था गर्न बनेको विधेयक तर्जुमाको लागि सिद्धान्त स्वीकृत गर्ने ५. राष्ट्रिय सेवा दल सम्बन्धी कानुनलाई संशोधन र एकीकरण गर्न बनेको विधेयक संघीय संसदमा पेश गर्न स्वीकृति प्रदान गर्ने ६. संघीय संसद समक्ष देहायका प्रतिस्थापन विधेयकहरू पेश गर्न स्वीकृति प्रदान गर्ने क. सहकारी ऐन, २०७४ लाई संशोधन गर्न बनेको विधेयक ख. सार्वजनिक खरिद ऐन, २०६३ लाई संशोधन गर्न बनेको विधेयक ग. सम्पत्ति शुद्धीकरण (मनि लाउन्डरिङ्ग) निवारण ऐन, २०६४ लाई संशोधन गर्न बनेको विधेयक घ. स्वास्थ्य विज्ञान प्रतिष्ठान सम्बन्धी नेपाल ऐनलाई संशोधन गर्न बनेको विधेयक
बीमा क्षेत्रका विदेशी मुद्रा कारोबार सहज बनाउन प्राधिकरण र राष्ट्र बैंकबीच छलफल
काठमाडौं । बीमा क्षेत्रसँग सम्बन्धित विदेशी मुद्रा सटही तथा अन्तर्राष्ट्रिय कारोबारलाई सहज बनाउने उद्देश्यले नेपाल बीमा प्राधिकरण र नेपाल राष्ट्र बैंकबीच छलफल तथा अन्तरक्रिया कार्यक्रम सम्पन्न भएको छ । प्राधिकरणको आयोजनामा शुक्रबार कुपण्डोलस्थित केन्द्रीय कार्यालयमा आयोजित कार्यक्रममा बीमक तथा पुनर्बीमकका लागि विदेशी मुद्रा सटही सिफारिश प्रक्रियालाई थप व्यवस्थित, प्रभावकारी र सहज बनाउने विषयमा केन्द्रित छलफल भएको हो । कार्यक्रममा नेपाल बीमा प्राधिकरणका कार्यकारी निर्देशक सुशील देव सुवेदीले बीमा व्यवसायसँग सम्बन्धित विदेशी मुद्रा सटहीमा देखिएका प्राविधिक समस्याहरू समाधान गर्न राष्ट्र बैंकसँग घनिभूत समन्वय गर्दै अघि बढिने बताए । उनले केही समस्याहरू बीमा नियमावलीमार्फत सम्बोधन गर्न सकिने उल्लेख गर्दै बाँकी विषय निर्देशिका मार्फत समाधान गरिने जानकारी दिए । नेपाल राष्ट्र बैंक, विदेशी विनिमय व्यवस्था विभागका कार्यकारी निर्देशक डा. डिल्लिराम पोख्रेलले बीमा क्षेत्रका विदेशी मुद्रा कारोबारलाई पारदर्शी, सुरक्षित र अन्तर्राष्ट्रियस्तरमा स्वीकार्य बनाउनेतर्फ प्राधिकरणसँग सहकार्य गर्ने प्रतिबद्धता व्यक्त गरे । त्यस्तै, प्राधिकरणका निर्देशक कमल प्रसाद रेग्मीले व्यवहारिक समस्या पहिचान गरी समाधान खोज्ने उद्देश्यले कार्यक्रम आयोजना गरिएको बताए भने राष्ट्र बैंकका निर्देशक बुद्धराज शर्माले बीमा क्षेत्रको विस्तारसँगै देखिने जोखिम न्यूनीकरणमा दुई निकायबीचको सहकार्य महत्वपूर्ण हुने धारणा राखे । कार्यक्रममा प्राधिकरणका उपनिर्देशक राम कोजू र राष्ट्र बैंकका उपनिर्देशक यज्ञ श्रेष्ठले विदेशी मुद्रा सटही सम्बन्धी विद्यमान व्यवस्थाबारे प्रस्तुती दिएका थिए । अन्तरक्रियामा सहभागीहरूले बीमा क्षेत्रको विस्तारसँगै विदेशी मुद्रा सटही सम्बन्धी व्यवस्थालाई समयानुकूल परिमार्जन गर्नुपर्ने आवश्यकता औंल्याएका थिए । कार्यक्रममा राष्ट्र बैंक, बीमक संघ, निर्जीवन बीमक संघ, वाणिज्य बैंक, बीमा कम्पनी तथा पुनर्बीमा क्षेत्रका प्रतिनिधिहरुको सहभागिता रहेको थियो ।
गरिमा विकास बैंक ‘डेभलपमेन्ट बैंक अफ द इयर २०२६’ अवार्डबाट सम्मानित
काठमाडौं । गरिमा विकास बैंक लिमिटेड ‘कर्पोरेट बिजनेस अवार्ड एण्ड समिट २०२६’ मा ‘डेभलपमेन्ट बैंक अफ द इयर २०२६’ बाट सम्मानित भएको छ । कर्पोरेट बिजनेस म्यागजिनद्वारा असार ४ गते काठमाडौंस्थित होटल र्याडिसनमा आयोजित अवार्डको अठारौं संस्करणमा बैंकले उक्त सम्मान प्राप्त गरेको हो । अवार्ड वितरण कार्यक्रममा विशेष अतिथि तथा राज्य व्यवस्था तथा सुशासन समितिका सभापति हरी ढकालले बैंकका प्रमुख कार्यकारी अधिकृत माधव प्रसाद उपाध्याय र नायब प्रमुख कार्यकारी अधिकृत अनिल रेग्मीलाई अवार्ड हस्तान्तरण गरेका थिए । कार्यक्रममा नेपाल उद्योग वाणिज्य महासंघ, नेपाल उद्योग परिसंघ तथा विभिन्न व्यवसायिक संघसंस्थाका प्रतिनिधिहरुको उल्लेख्य उपस्थिति रहेको थियो । यस अवसरमा बैंकले आफ्नो सफलतामा योगदान पुर्याउने ग्राहक, सेयरधनी, नियामक निकाय तथा शुभेच्छुकप्रति आभार व्यक्त गरेको छ । यसअघि पनि बैंकले न्यू बिजनेस एज लिमिटेडद्वारा मे ८, २०२६ मा आयोजित ‘न्यूबिज कन्क्लेभ एण्ड बिजनेस एक्सिलेन्स अवार्ड’को दशौं संस्करणमा ‘बेस्ट म्यानेज्ड डेभलपमेन्ट बैंक २०२६’ अवार्ड प्राप्त गरेको थियो ।
मन्त्रिपरिषद बैठक सुरु
काठमाडौं । प्रधानमन्त्री बालेन्द्र शाहले आह्वान गरेको मन्त्रिपरिषद बैठक सुरु भएको छ । बैठक शुक्रबार (आज) साँझ सवा ५ बजेदेखि सिंहदरबारस्थित प्रधानमन्त्री तथा मन्त्रिपरिषद् कार्यालयमा बसिरहेको हो । बैठकले महत्त्वपूर्ण निर्णय गर्ने जनाइएको छ ।
ललितपुर महानगरको नीति तथा कार्यक्रम सार्वजनिक
काठमाडौं । ललितपुर महानगरपालिकाले आगामी आर्थिक वर्ष २०८३/८४ को नीति तथा कार्यक्रम सार्वजनिक गरेको छ । महानगरपालिकाका प्रमुख चिरीबाबु महर्जनले शुक्रबार आयोजित नवौं नगर सभामा आगामी आवको नीति तथा कार्यक्रम प्रस्तुत गरेका हुन् । महानगरको अपाङ्गता भएका व्यक्ति र ज्येष्ठ नागरिकसँग महानगरपालिका भन्ने कार्यक्रमबाट हालसम्म १६ हजार २२० ज्येष्ठ नागरिक र ६७१ जना अपाङ्गता भएका व्यक्ति गरी कूल १६ हजार ८९१ लाभान्वित भएका छन् । त्यस्तै, हालसम्म महानगरले सञ्चालन गरेको एकद्वार सेवा केन्द्रबाट ३३ हजार जनाले सेवा लिएका छन् । महानगरले नीति तथा कार्यक्रममा शिक्षा, स्वास्थ्य, सम्पदा लगायतलाई प्राथमिकतामा राखेको छ ।
सिन्धुली प्रहरी हिरासतमा निधन भएका विश्वकर्मालाई प्रहरीले कुटपिट गरेको छैन : गृहमन्त्री गुरुङ
काठमाडौं । गृहमन्त्री सुधन गुरुङले सिन्धुलीको प्रहरी हिरासतमा श्रीकृष्ण विश्वकर्माको निधन भएको विषयमा छानबिन समिति गठन भई प्रतिवेदन प्राप्त भएको बताउँदै यसमा प्रहरीले कुटपिट गरेको नदेखिएको बताएका छन् । राष्ट्रियसभाको शुक्रबारको बैठकमा सदस्य भुवनबहादुर सुनारले सोधेको प्रश्नको जवाफ दिँदै उनले हिरासतमा रहँदा प्रहरीले कुनै शारीरिक वा मानसिक पीडा नदिएको प्रतिवेदनमा उल्लेख भएको जानकारी दिए । नेपाल प्रहरीभित्र दलित सेल कार्यान्वयनमा ल्याइएको पनि उनले सुनाए । प्रतिवेदनका आधारमा विश्वकर्मामाथि कुटपिट भएको नदेखिएको गृहमन्त्री गुरुङले बताए । यस विषयमा मन्त्रालयको ध्यानाकर्षण भएको र नयाँ विषय आएपछि फेरि जानकारी गराइने उनको प्रतिबद्धता थियो । बैठकमा राष्ट्रियसभा सदस्य सुनारले जातका आधारमा विभेद भइरहेका विषयमा जिज्ञासा राखेका थिए । अन्तर जातीय विवाहकै कारण हत्या, कुटपिट भइरहेकोतर्फ उनले मन्त्री गुरुङको ध्यानाकर्षण गराए । टेबल, कुर्सी नभएको हिरासतमा सात फिटमाथि पुगेर कसरी आत्महत्या गरेको हुनसक्छ भनी सांसद सुनारले जिज्ञासा राखेका थिए । बैठकमा अध्यक्ष नारायणप्रसाद दाहालले प्रधानमन्त्री तथा मन्त्रिपरिषद्को कार्यालयबाट प्राप्त पत्र वाचन गरेर सुनाएका थिए ।
नेपाली चिया क्षेत्र संकटमा परेको भन्दै तत्काल कूटनीतिक पहल गर्न नेफाको माग
काठमाडौं । चिया निर्यातमा पछिल्लो समय भारतीय बजारमा देखिएको प्रक्रियागत र प्राविधिक अवरोधप्रति नेपाल फ्रेट फरवार्डर्स एशोसिएसन (नेफा) ले आफ्नो गम्भीर ध्यानाकर्षण भएको जनाएको छ । भारतीय पक्षको ढिलासुस्ती र अवरोधका कारण पूर्वी नेपालका चिया उद्योगहरू बन्द हुने अवस्थामा पुगेको भन्दै संघले चिन्ता व्यक्त गरेको हो । नेपालबाट भारततर्फ निर्यात गरिएको तयारी चियालाई भारतीय पक्षले प्रयोगशाला परीक्षण र विभिन्न प्राविधिक प्रक्रियाका नाममा लामो समयसम्म गोदाममै रोकिदिँदा नेपाली चिया उद्योगको उत्पादन, बिक्री वितरण र समग्र निर्यात श्रृंखला नै नराम्ररी प्रभावित भएको छ । भारतीय अवरोधका कारण विशेष गरी नेपालको पूर्वी क्षेत्रमा रहेका चिया उद्योगहरू बन्द हुन थालेका छन् भने सयौं चिया बगानहरू प्रत्यक्ष रूपमा प्रभावित भएका छन् । हाल नेपालभर करिब १२० वटा चिया उद्योग सञ्चालनमा छन्, जसमा हजारौं किसान र करिब ५० देखि ६० हजार श्रमिकहरू आश्रित छन्। नेपालको कुल चिया निर्यातको ठूलो हिस्सा भारतीय बजारमा निर्भर रहेको अवस्थामा सिर्जना भएको यो गतिरोधले सिंगो अर्थतन्त्रलाई नै धक्का दिएको नेफाले उल्लेख गरेको छ । धेरै संख्यामा श्रमिक र किसान जोडिएको यो संवेदनशील क्षेत्र ठप्प हुँदा नेपालको निर्यात व्यापार, विदेशी मुद्रा आर्जन र समग्र आर्थिक सूचकहरूमा नकारात्मक प्रभाव परेको विज्ञप्तिमा जनाइएको छ । ‘चिया क्षेत्रको गतिविधि ठप्प हुनु भनेको नेपालको निर्यात व्यापार, विदेशी मुद्रा आर्जन तथा समग्र अर्थतन्त्रमा नकारात्मक प्रभाव पर्नु हो । यस प्रकारको अवरोधले चिया उद्योगी तथा निर्यातकर्तालाई मात्र नभई समग्र राष्ट्रिय अर्थतन्त्रलाई प्रतिकूल असर पु‍र्याएको छ,’ नेफाले भनेको छ । नेपालको निर्यात प्रवर्द्धन तथा व्यापार सहजीकरणमा चिया क्षेत्रले पुर्याएको योगदानको उच्च मूल्यांकन गर्दै संघले नेपाल सरकार समक्ष यस विषयलाई उच्च प्राथमिकतामा राखी तत्काल कूटनीतिक पहल गर्न समेत आग्रह गरेको छ । संघले भारतीय सम्बन्धित निकायहरूसँग उच्चस्तरीय संवाद गरी नेपाली चिया निर्यातमा देखिएको प्रक्रियागत तथा प्राविधिक अवरोध यथाशीघ्र हटाउन तथा व्यापारलाई सहज, सरल र निर्वाध बनाउन सरकारसँग माग गरेको छ। साथै देशको निर्यात व्यापार र आपूर्ति श्रृंखलाको सुदृढीकरणका लागि आफू सदैव प्रतिबद्ध रहेको जानकारी दिँदै नेफाले यस जटिल परिस्थितिमा चिया उद्योगी, निर्यातकर्ता र सम्पूर्ण सरोकारवालाहरूप्रति ऐक्यबद्धता समेत व्यक्त गरेको छ ।
जेठ मसान्तसम्म ललितपुर महानगरको जम्मा ४० प्रतिशत मात्रै विकास बजेट खर्च
काठमाडौं । ललितपुर महानगरपालिकाको विकासलक्षित पुँजीगत खर्चको रफ्तार निकै सुस्त देखिएको छ । चालू आर्थिक वर्षको जेठ मसान्तसम्म आइपुग्दा महानगरले आफ्नो कुल पूँजीगत बजेटको जम्मा ४० प्रतिशत मात्र खर्च गर्न सकेको छ । महानगरपालिकाले आफ्नो ९ औं नगरसभामा आगामी आर्थिक वर्षका लागि वार्षिक नीति तथा कार्यक्रम सार्वजनिक गर्ने क्रममा चालु वर्षको यो वित्तीय प्रगति विवरण बाहिर ल्याएको हो । सार्वजनिक विवरण अनुसार जेठ मसान्तसम्ममा महानगरको चालू र पुँजीगत गरी कुल खर्च ५० प्रतिशत मात्र रहेको छ भने आन्तरिक आयतर्फको राजस्व संकलन ६५ प्रतिशत पुगेको छ ।
