रवि लामिछानेको स्वास्थ्य अवस्थाका कारण रास्वपाको सचिवालय बैठक सर्यो
काठमाडौं । राष्ट्रिय स्वतन्त्र पार्टी (रास्वपा) को सचिवालय बैठक आइतबार बस्ने भएको छ । पार्टी प्रवक्ता मनिष झाका अनुसार बैठकमा प्रतिनिधिसभा सदस्य निर्वाचनअन्तर्गत समानुपातिकतर्फका उम्मेदवार सिफारिस गर्ने विषयमा मुख्य रूपमा छलफल हुनेछ । सभापति रवि लामिछानेको स्वास्थ्य अवस्थाका कारण यसअघि आज बस्ने भनिएको सचिवालय बैठक भोलि बिहानका लागि सारिएको जनाइएको छ ।
विदेश पलायन रोक्न उद्यमीलाई बिनाधितो ऋण वितरण
काठमाडौं । म्याग्दीको सदरमुकाम बेनी बजारसँगै रहेको पर्वतको जलजला गाउँपालिकाले उद्यमीलाई बिनाधितो ऋण उपलब्ध गराएको छ । तीन वर्षअघि सुरु भएको यस कार्यक्रमबाट हालसम्म ५० जनालाई ४९ लाख ७५ हजार बिनाधितो ऋण लगानी गरेको हो । गाउँपालिकाका सूचना अधिकारी भेषनाथ आचार्यले ‘रुपान्तरणीय सामाजिक परिचालनद्वारा वडा विकास कार्यक्रम’ अन्तर्गत शुक्रबार थप ९ लाख रुपैयाँ अनुदान उपलब्ध गराएको जानकारी दिए । ‘विभिन्न प्रकृतिका उद्यमको वर्गीकरण गरी छनोट भएका उद्यमीलाई किस्ता बन्दीमा फिर्ता गर्ने गरी एक जनालाई एक लाखका दरले अनुदान उपलब्ध गराएको,’ उनले भने, ‘वडा विकास कार्यक्रमले टोल विकास संस्थाका सदस्यलाई आत्मनिर्भर बनाउन तथा आर्थिकस्तर वृद्धि गर्न पछिल्लो तीन वर्षदेखि घुम्ती कोष परिचालन गरी सहयोग गर्दै आएको छ ।’ यसअघि गत कात्तिकमा १२ जनालाई १२ लाख, २०८१ मा २० जनालाई, २०८० मा नौ जनालाई सहयोग गरेको थियो । हालसम्म ५० जनालाई ४९ लाख ७५ हजार बिनाधितो ऋण लगानी गरेको गाउँपालिकाले जनाएको छ । थप ऋण पाउनेमा वडा नम्बर १ का चक्रे दमाई, ३ का सोमबहादुर दमाई, दुर्गा रेग्मी, शन्तु भण्डारी, वडा नम्बर ४ का रिता मल्ल, बसन्तीकुमारी मल्ल, दुर्गबहादुर दर्जी, वडा नम्बर ६ का कौशिला नेपाली र वडा नम्बर ७ का रोहितप्रसाद आचार्य रहेका छन् । सहुलियत ब्याजदरमा बिनाधितो प्राप्त गरेको घुम्ती कोषको रकम अवधि पुगेपछि टोल विकास संस्थालाई फिर्ता गर्नुपर्नेछ । असल उद्यमी निर्माण तथा उद्यमशीलताको विकास गर्ने, भौतिक पूर्वाधारका काममा गुणस्तर कायम गर्ने, कृषि तथा पशुजन्य उत्पादनमा आत्मर्निभर बनाउने, युवाको विदेश पलायनमा न्यूनीकरण गरी रोजगारीका अवसर सिर्जना गर्नेलगायत उद्देश्यले यो कार्यक्रम सञ्चालन गरिएको छ । कृषि उद्यमलाई प्रभावकारी बनाउन र गरिबी न्यूनीकरण गर्ने उद्देश्यले घुम्ती कोष परिचालन गरिएको गाउँपालिकाका अध्यक्ष राजुप्रसाद आचार्यले बताए । उनका अनुसार हरेक वर्ष फरकफरक उद्यमीलाई विउँपुजी सहयोग गरिएको छ । पालिकाभित्रै व्यावसायिकरूपमा गरिने फलफूल, तरकारी उत्पादन, पशुपक्षीपालन, घरेलु औजार तथा उपकरण निर्माण गरी स्वरोजगारमूलक काम गरिरहेका उद्यमीको प्रोत्साहन हुनुका साथै यस क्षेत्रमा लाग्न चाहने युवालाई पनि प्रेरणा मिल्ने अपेक्षा गरिएको छ ।
धुलिखेल-खावा सडकखण्ड दुई साता राति बन्द हुने, वैकल्पिक मार्ग प्रयोग गर्न आग्रह
काठमाडौं । अरनिको राजमार्गअन्तर्गत पर्ने धुलिखेल-खावा सडकखण्डमा कालोपत्रे गर्ने कामका कारण दुई सातासम्म रातिको समयमा सवारी आवागमन बन्द गरिने भएको छ। सडक डिभिजन कार्यालय भक्तपुरले सूचना जारी गर्दै सडक सुधार तथा कालोपत्रे कार्यलाई तीव्र बनाउन चैत ७ गतेदेखि चैत २० गतेसम्म उक्त सडकखण्डमा सवारी आवागमनमा प्रतिबन्ध लगाइने जनाएको हो। कार्यालयका अनुसार यो अवधिमा ठूला चारपाङ्ग्रे सवारीसाधन (बससमेत) लाई साँझ ६ बजेदेखि बिहान ५ बजेसम्म सञ्चालन गर्न रोक लगाइनेछ। त्यस्तै, टिपर तथा ट्रकहरू (पास लिएका समेत) लाई भने २४ घण्टै सञ्चालन गर्न नदिइने सूचनामा उल्लेख गरिएको छ। सडक निर्माण कार्य निर्धारित समयमै सम्पन्न गर्न र सवारी आवागमनका कारण हुने अवरोध कम गर्न यस्तो व्यवस्था गरिएको कार्यालयले जनाएको छ। सडक डिभिजन कार्यालयले यात्रु तथा सवारी चालकलाई यस अवधिमा वैकल्पिक मार्ग प्रयोग गर्न र यात्रा अघि आवश्यक जानकारी लिन अनुरोध गरेको छ।
निर्वाचन समीक्षा गर्दै एमाले, समानुपातिक सांसदको नाम टुङ्गो लगाइने
काठमाडौं । हालै सम्पन्न निर्वाचनको समीक्षा एवं समानुपातिक सांसदको नाम टुङ्गो लगाउन आज (शनिबार) नेकपा (एमाले) को केन्द्रीय सचिवालय बैठक बस्दै छ । दिउँसो १ः०० बजे भक्तपुरस्थित पार्टी अध्यक्ष केपी शर्मा ओलीको निवास गुण्डुमा बैठक राख्ने तयारी गरिएको एमाले केन्द्रीय कार्यालयका सचिव डा. भीष्म अधिकारीले जानकारी दिए । उनका अनुसार बैठकमा समानुपातिकतर्फबाट निर्वाचित सांसदको नाम टुङ्गो लगाउने र निर्वाचनको समीक्षा गर्नेछ । निर्वाचन आयोगले आज प्रतिनिधिसभा सदस्य निर्वाचनअन्तर्गत समानुपातिकतर्फबाट निर्वाचन उम्मेदवारका नाम सिफारिस गर्न राजनीतिक दललाई समयसीमा तोकेको छ ।
सामुदायिक विद्यालय र अस्पताल क्यान्टिनमा काठमाडौं महानगरको कडाइ, खाद्य स्वच्छता सुधार अभियान तीव्र
काठमाडौं । काठमाडौं महानगरपालिकाले सामुदायिक विद्यालय तथा अस्पतालका क्यान्टिनमा खाद्य स्वच्छता सुनिश्चित गर्न अनुगमन र क्षमता विकास कार्यक्रमलाई सँगै अघि बढाएको छ । उपभोक्ताको स्वास्थ्य सुरक्षा सुनिश्चित गर्न महानगरले खाद्य व्यवसायीलाई तालिम दिने र नियमित अनुगमन गर्ने अभियान तीव्र बनाएको जनाएको छ । कामपाका खाद्य प्राविधिक भारती अधिकारीका अनुसार महानगरपालिका र खाद्य प्रविधि तथा गुण नियन्त्रण विभागको संयुक्त टोलीले सामुदायिक विद्यालय र अस्पतालका क्यान्टिनहरूमा निरन्तर अनुगमन गरिरहेको छ । अहिलेसम्म पशुपति मित्र माध्यमिक विद्यालय चाबहिलको जानकी किचेन क्यान्टिन तथा दिवा खाजा बनाउने भान्छा, श्रम राष्ट्रिय माध्यमिक विद्यालय कुमारीगाल, शिवपुरी माध्यमिक विद्यालय महाराजगञ्जको ‘नमो फुड कोड’ क्यान्टिन, रत्नराज्य स्कुल बानेश्वरको क्यान्टिन, केएमसी अस्पताल सिनामंगलस्थित ‘ग्रीन बड्स बेकरी क्याफे’ क्यान्टिन तथा भरोसा अस्पताल बानेश्वरको ‘सुदूरपश्चिम भोजनालय एण्ड खाजा घर’ लगायतका स्थानमा अनुगमन गरिएको महानगरले जनाएको छ। बालबालिकाको स्वास्थ्य र पोषण सुधारलाई प्राथमिकतामा राख्दै महानगरपालिकाले सामुदायिक विद्यालयका २३ जना मिल नर्ससहित ४५ जनालाई खाद्य स्वच्छता तथा पोषणसम्बन्धी तालिम पनि प्रदान गरिसकेको छ । तालिममा खाद्य स्वच्छता अभ्यास, खाद्यजन्य रोगको जोखिम, सुरक्षित खाना ह्यान्डलिङ, पोषणयुक्त दिवा खाजाको व्यवस्थापन तथा रोग रोकथाममा स्कुल नर्सको भूमिका जस्ता विषय समेटिएका थिए । नेपाल सरकारले आर्थिक वर्ष २०७७/७८ देखि प्रारम्भिक बाल विकासदेखि कक्षा ५ सम्म र २०७९/८० देखि कक्षा ६ सम्मका विद्यार्थीका लागि दिवा खाजा कार्यक्रम सञ्चालन गर्दै आएको छ। काठमाडौं महानगरपालिकाले भने कक्षा १० सम्मका विद्यार्थीलाई दिवा खाजा उपलब्ध गराउँदै आएको छ । अनुगमनका क्रममा अखाद्य वस्तुको प्रयोग भएको पाइएमा सम्बन्धित व्यक्तिको उपस्थितिमा त्यस्ता सामग्री नष्ट गरिएको महानगरले जनाएको छ । साथै सुधारका लागि आवश्यक सुझाव पनि दिइएको छ । महानगरका अनुसार धेरै विद्यालय क्यान्टिनमा सरसफाइमा लापरबाही देखिएको छ। कपडा र खाद्य सामग्री सँगै राख्ने, खाना नछोपी राख्ने, फोहोर फाल्ने डस्टबिनको उचित प्रयोग नगर्ने, किचेनको संरचनागत सुधार नगरेको जस्ता समस्या भेटिएका छन् । यस्तै, क्यान्टिनमा प्रयोग गरिएको फ्राइड तेलको टीपीएम भ्यालु मापदण्डविपरीत पाइएको, किचेनको भुइँ व्यवस्थापन र सरसफाइमा ध्यान नदिएको, खाना बनाउने र भाँडा माझ्ने काम एउटै ठाउँमा गरिएको तथा आगो सुरक्षासम्बन्धी उपकरणको व्यवस्था नदेखिएको समेत अनुगमन टोलीले जनाएको छ । महानगरले यस्ता कमजोरी सुधार गर्न क्यान्टिन सञ्चालकलाई सचेत गराउँदै आगामी दिनमा थप कडाइका साथ अनुगमन गर्ने जनाएको छ ।
समानुपातिक उम्मेदवार सिफारिस गर्न रास्वपाको सचिवालय बैठक शनिबार बस्दै
काठमाडौं । प्रतिनिधिसभा सदस्य निर्वाचनअन्तर्गत समानुपातिकतर्फका उम्मेदवार सिफारिस गर्न राष्ट्रिय स्वतन्त्र पार्टी (रास्वपा)को सचिवालय बैठक आज बस्दैछ । पार्टी सभापति रवि लामिछानेको निर्देशनअनुसार सचिवालयको बैठक आज बस्न लागेको प्रवक्ता मनिष झाले जानकारी दिए । ‘बैठकको समय र स्थान तय भएको छैन’, उनले भने । समानुपातिक उम्मेदवार सिफारिससम्बन्धी विषयमा केन्द्रित हुने बैठकले वरिष्ठ नेता बालेन्द्र शाहलाई प्रधानमन्त्री बनाउने बाटो खुलाउन पार्टी विधान संशोधन र विविध विषयमा पनि छलफल हुने बताइएको छ ।
औषधि उद्योगमा भित्रिँदैछन् सुविधा सम्पन्न प्रविधि : ‘स्मार्ट क्यामरा’ देखि आधुनिक ल्याबसम्म
काठमाडौं । भृकुटीमण्डपमा जारी ‘नेपाल फर्मा एक्स्पो २०२६’ मा स्वदेशी तथा विदेशी कम्पनीहरूले औषधि उत्पादनमा प्रयोग गरिने प्रविधि, कच्चा पदार्थ लगायतका सामग्री प्रदर्शन गरिरहेका छन् । भारत लगायतका बहुराष्ट्रिय कम्पनीहरू सहभागी भइ विभिन्न सामग्री प्रदर्शन गरिरहेका छन् भने नेपालमा रहेका सप्लायर्स कम्पनीले पनि विभिन्न देशबाट आयात गरेका उपकरणहरू प्रदर्शन गरिरहेका छन् । एक्स्पोमा सहभागी नेपाली औषधि उद्योग व्यवसायी, औषधि क्षेत्रमा रुचि राख्नेहरूले औषधि क्षेत्रमा विश्व बजारमा आएका परिवर्तनबारे चासो लिइरहेका छन् । एक्स्पो आयोजना गरिरहेको नेपाल औषधि उत्पादक संघ (एपोन)का महासचिव सन्तोष बरालका अनुसार एक्स्पोमा २ सय स्टल राखिएकोमा १ सय ५३ कम्पनीले सहभागिता जनाएका छन् । जसमा २४ जना नेपाली औषधि उत्पादक कम्पनीहरू छन् । सन्तोष बराल । यहाँ नेपाली औषधिले प्रयोग गरिरहेका चिजमात्र प्रदर्शनीमा रहेको नेपाल औषधि उत्पादक संघका महासचिव सन्तोष बरालले बताए । औषधि उद्योगमा प्रयोग हुने नयाँ प्रविधि भनेको मोवाइल जस्तै रहेको उनी बताउँछन् । उनी भन्छन्, ‘मोबाइल जसरी अपग्रेड हुँदै जान्छ, त्यस्तै प्रविधि पनि अपग्रेड हुँदै जाने हो । प्रविधिमा ल्याव, मेसिन सबै चिजको स्तर बढेर आउँछ । आज ए छ भने भोलि बी, सी भएर बढ्दै जान्छ । आजको प्रविधि भोलि विकसित भई अझ राम्रो स्तरमा पुग्ने हो ।’ हरेक वर्ष प्रविधिमा फेरबदल भइरहने हुनाले लगानीकर्ताले पनि प्रत्येक वर्ष लगानी गर्दै जानुपर्ने बरालले जानकारी दिए । ‘यहाँ आज जुन मेसिन देख्नुभएको छ, अबको चार पाँच वर्षपछि फेरि नयाँ ढाँचामा आउँछ, यसलाई व्यवसायीहरूले प्रयोगमा ल्याउन सक्नुपर्छ,’ उनले भने । कुन कम्पनीले के राखेको छ ? टेक्नोएलमर कम्पनी औषधि उत्पादन गर्दा प्रयोग हुने उपकरण तथा ल्याब इन्स्ट्रुमेन्ट सप्लायर्स गर्ने कम्पनी हो टेक्नोएलमर । यसले विशेषगरी औषधि उद्योग, विश्वविद्यालय र अनुसन्धान प्रयोगशालाका लागि उपकरण र मेसिन आपूर्ति गर्ने काम गर्छ । जारी प्रदर्शनीमा विभिन्न देशबाट आयात गरिएका नयाँ प्रविधि राखिएको छ । विगतका वर्षजस्तै एक्स्पोमा सहभागिता जनाउँदै आएको यो कम्पनीले विश्वका विभिन्न देशमा बनेका नयाँनयाँ उपकरण प्रदर्शनीमा राखेको टेक्नोएलमर कम्पनी प्राइभेट लिमिटेडका निर्देशक ईश्वर श्रेष्ठले जानकारी दिए । ‘हामीले औषधि उद्योगलाई आवश्यक पर्ने उपकरण प्रदर्शनी गरिरहेका छौं,’ उनी भन्छन्, हामीले विभिन्न देशबाट प्रविधि आयात गरी नेपाली औषधि उद्योगलाई विक्रीवितरण गर्दे आएका छौं । यो पटक पनि विभिन्न उपकरण प्रदर्शनीमा राखेका छौं, जुन बारेमा नेपाली औषधि उद्योगी व्यवसायीले चासोका साथ हेरिरहेका छन् ।’ ईश्वर श्रेष्ठ । टेक्नोएलमर कम्पनीले राखेका विभिन्न प्रविधिमध्ये एक हो, एचपीएलसी मेसिन । जसले गुणस्तर नियन्त्रण गर्ने काम गर्छ । कम्पनीले उत्पादन गरेका सबै औषधिहरूको जाँच यो मेसिनबाट गरिन्छ । यो कम्पनी नेपालका प्रायः सबैजसो उद्योगहरूले प्रयोग गरिरहेका छन् । ‘यो फर्माको मुख्य मेसिन हो, यो हुनैपर्छ, कुनै कच्चा पदार्थ थप्नुपर्यो, आरएण्डीका लागि छुट्टै मोलिक्युल प्रयोग गर्न चाहने हो भने पनि यही मेसिनको आवश्यकता पर्छ, ’ निर्देश श्रेष्ठले भने । ग्लोबल नेपाल एशोसिएट विभिन्न देशबाट औषधि उद्योगका लागि सामग्री आयात गर्ने अर्को कम्पनी हो, ग्लोबल नेपाल एसोसिएट । यो कम्पनीले पहिलो पटक स्मार्ट क्यामरा प्रदर्शनीमा राखेको छ । विश्वका औषधि उद्योगले यो क्यामेराको प्रयोग गरिसकेका छन् । तर नेपाली औषधि उद्योगमा त्यति प्रयोगमा आएको पाइँदैन । नेपालमा प्रयोगमा नआएको यो प्रविधिको आवश्यकता के हो ? कसरी यसको प्रयोग गर्ने भन्ने विषयमा ग्लोबल नेपाल एशोसियसनले एक्सपोमा जानकारी गराउने काम गरिरहेको ग्लोबल नेपाल एशोसिएटका निर्देशक कृष्ण शाहीले बताए । कृष्ण शाही । उनी भन्छन्, ‘औषधि उद्योगलाई आवश्यक पर्ने थुप्रै प्रविधि हामीले ल्याएका छौं, हामीसँग भएका अधिकांश प्रविधि नेपाली औषधि उद्योगमा प्रयोग भइरहेका छन् तर स्र्माट क्यामेराबारे व्यवसायीले पहिलो पटक जान्ने बुझने अवसर पाउनुभयो । आशा छ यो प्रविधि पनि अब नेपाली औषधि उद्योगले प्रयोगमा ल्याउनेछन् ।’ यो अमेरिकन प्रविधिलाई २०/२५ लाख मूल्य पर्ने शाहीले जानकारी दिए । यो क्यामेराले कुनै पनि औषधिको नमुना जाँच गरी गुणस्तर पुगे/नपुगेको छुट्याउने काम गर्छ । रेल्को फर्मा क्याम्प प्राइभेट कम्पनी, गुजरात भारतको गुजरातमा रहेको रेल्को फर्मा क्याम्प प्राइभेटले औषधि बनाउन प्रयोग हुने कच्चा पदार्थ प्रदर्शनीमा राखेको छ । एक्स्पोमा सहभागी औषधि उद्योगी, औषधि सम्बन्धी चासो राख्ने व्यक्तिलाई कम्पनीले कच्चा पदार्थ भारतमा कसरी बनाउँदै आएको छ भने कस्ता कस्ता कच्चा पदार्थ बाहिरबाट ल्याउनुपर्छ भन्ने बारेमा बुझाइरहेको छ । कम्पनीका निर्देशक शम्भु चौधरीले गुजरातमा रहेको यो कम्पनीले नेपालमा दर्ता प्रक्रिया सुरु गरिसकेकाले अब नेपाली औषधिको सहजताका लागि नेपालमै कच्चा पदार्थ बनाउने तयारी गरिरहेको बताए । शम्भु चौधरी । ‘नेपालका कुनै पनि औषधि उद्योगले कच्चा पदार्थ आयात गर्दा आजको भोलि आइपुग्दैन,’ उनी भन्छन्, ‘नेपाल आइपुग्न २२ देखि २५ दिन समय लाग्छ । यो समयमा कच्चा पदार्थ नष्ट भयो भने यसको क्षति उद्योग कम्पनीले नै बेहोर्नुपर्छ । अल्कोहलबाहेक सबै कच्चा पदार्थ आयातमा निर्भर रहेको औषधि उद्योगको सहजताका लागि नेपालमै उत्पादन गर्ने योजना गरेका छौं ।’ उनले नेपालमा कच्चा पदार्थ उत्पादन गर्दा नेपाली उद्योगीलाई सहज हुने र नयाँ प्रविधिको पहुँच पनि हुने दाबी गरे।
अब इरानी नागरिक नेपाल आउन नपाउने, सरकारले बन्द गर्यो ‘अन-अराइभल’ भिसा
काठमाडौं । नेपाल सरकारले इरानी नागरिकलाई ‘अन-अराइभल’ भिसा बन्द गर्ने निर्णय गरेको छ । अध्यागमन विभागले शुक्रबार दिँदै आएका यस्तो ‘अन–अराइभल’ भिसा बन्द गर्ने निर्णय गरेको हो । सरकारी र कूटनैतिक राहदानीबाहेकका इरानी नागरिकले अब विदेशस्थित नेपाली दूतावासबाट भिसा लिएर मात्र नेपाल प्रवेश गर्न पाउनेछन् । ‘नेपाल भ्रमण गर्न चाहने इरानका नागरिकलाई नेपाल सरकारले अन अराइभल भिसा उपलब्ध नगराउने भएको छ, अध्यागमन विभागले शुक्रबार जारी गरेको विज्ञप्तिमा भनिएको छ । योसँगै नेपालमा अन अराइभल भिसा प्राप्त नहुने मुलुकको संख्या १३ पुगेको विभागले उल्लेख गरेको छ । नेपालले यसअघि नाइजेरिया, घाना, जिम्बाब्बे, स्वाजील्याण्ड, क्यामरुन, सोमालिया, लाइबेरिया, इथियोपिया, इराक, प्यालेस्टीन, अफगानिस्तान र सिरियाका नागरिकलाई अन अराइभल भिसामा रोक लगाउँदै आएको थियो । आयोगका अनुसार शरणार्थी स्टाटसका ट्राभल डकुमेन्ट भएका व्यक्तिले पनि नेपाल प्रवेश गर्दा विदेशस्थित नेपाली दूताबासबाट भिसा लिएर मात्र नेपाल प्रवेश गर्न पाउने छन् ।
