उपचारमा १५ लाखभन्दा धेरै नदिने सरकारी प्रस्ताव, आफूखुसी विदेश जने विशिष्ट व्यक्तिले आफैं खर्च व्यहोर्नुपर्ने
काठमाडौं २१, कात्तिक । अति विशिष्ट तथा विशिष्ट व्यक्तिको उपचारका लागि सरकारी सहयोग सिलिङ तोक्ने तयारी भएको छ । मन्त्रिपरिषद्को निर्णयमा भिभिआइपीले उपचार खर्चको नाममा मनपरी रकम लिन थालेपछि बढीमा १५ लाख दिने गरी सिलिङ तोक्ने तयारी भएको हो। ०६८ मा ल्याएको नागरिक राहत, क्षतिपूर्ति तथा आर्थिक सहायतासम्बन्धी कार्यविधि संशोधनका लागि स्वास्थ्य मन्त्रालयले प्रस्ताव गरेको छ। अति विशिष्ट र विशिष्ट व्यक्तिलाई बढीमा १५ लाख तथा राष्ट्रिय जीवनमा महत्वपूर्ण योगदान पुयाएका व्यक्तिलाई बढीमा पाँच लाख उपलब्ध गराउने गरी कार्यविधि परिमार्जन गर्ने स्वास्थ्य मन्त्रालयको मन्त्रीस्तरीय निर्णय भएको छ। अहिलेको कार्यविधिमा सरकारले चाहेमा जोसुकै व्यक्तिलाई जति पनि खर्च उपलब्ध गराउन सक्ने प्रवधान छ । यसका कारण राज्यको ढुकुटीबाट जथाभावी रकम वितरण भएको भन्दै स्वास्थ्य मन्त्रालयले कार्यविधि परिमार्जनको निर्णय गरेको छ । प्रस्तावित कार्यविधिमा अन्य मन्त्रालयको पनि राय–सल्लाह लिन लागिएको स्वास्थ्यमन्त्री गगन थापाले जानकारी दिए । ‘विद्यमान अस्पष्ट नीतिका कारण जोसुकैले जतिसुकै खर्च पनि पाउने अवस्था छ, यसलाई नियमन गर्न र निश्चितताका लागि यो कार्यविधिलाई हामीले स्पष्ट बनाएका छौँ,’ मन्त्री थापाले भने, ‘कार्यविधि परिमार्जनपछि तोकिएको सीमाभन्दा बढीको औषधि उपचार सहायता कुनै पनि व्यक्तिले दोहो(याएर लिन पाउनेछैनन्।’ क–कसले पाउँछन् १५ लाख प्रस्तावित कार्यविधिअनुसार वर्तमान र पूर्वराष्ट्रपति, उपराष्ट्रपति, प्रधानमन्त्री, सर्वोच्च अदालतका प्रधानन्यायाधीश, वर्तमान तथा पूर्वसभामुख, उपप्रधानमन्त्री तथा मन्त्री, राज्यमन्त्री र सहायक मन्त्रीहरू, सांसदहरू, संवैधानिक निकायका प्रमुख एवं वर्तमान तथा पूर्वपदाधिकारीहरू । क–कसले दे पाउँछन पाँच लाखसम्म साहित्य, संगीत, कला, राजनीति, सार्वजनिक प्रशासनलगायत राष्ट्रिय जीवनमा उल्लेख्य योगदान पुर्याएका व्यक्ति । नयाँ पत्रिका दैनिकबाट ।
उपत्यका लोडसेडिङमुक्त हुने, पिक आवरमा उपत्यकामा ३०० मेगाबाट बिजुलीको माग
काठमाडौं २१, कात्तिक । सरकारले काठमाडौँ उपत्यकाका तीन जिल्लालाई लोडसेडिङमुक्त जिल्ला घोषणा गर्ने तयारी गरिरहेको छ । देशकै राजधानी अनि प्रमुख सहर भएकाले उपत्यकालाई लोडसेडिङमुक्त क्षेत्र घोषणा गर्ने तयारी भइरहेको सरकारी अधिकारीले बताएका छन् । ऊर्जा मन्त्रालयले लोडसेडिङ कम गर्न मन्त्रालयस्तरमा विशेष कार्ययोजना निर्माण गरी नेपाल विद्युत् प्राधिकरणलगायत अन्य सरोकारवाला निकायलाई सोहीअनुसार काम गर्न स्पष्ट निर्देशन दिएपछि प्राधिकरणले यस्तो तयारी गरेको हो । प्राधिकरणका कार्यकारी निर्देशक कुलमान घिसिङले शनिबार भने, ‘हामीले उपत्यकालाई लोडसेडिङमुक्त क्षेत्र बनाउने तयारी गरिरहेका छौँ, त्यसका लागि प्राधिकरणले एउटा अध्ययन समिति निर्माण गरेको छ, समितिले विभिन्न विकल्पमा अध्ययन गरिरहेको छ, अध्ययन प्रतिवेदनमा दिएको उपयुक्त विकल्पको तत्काल कार्यान्वायन गरिनेछ ।’ हाल उपत्यकामा रातिको पिक आवरमा ३०० मेगाबाट बिजुलीको माग छ भने आपूर्ति झन्डै २०० मेगावाट। साँझको दुई घन्टाको पिक आवरका लागि प्राधिकरणले १०० मेगावाटको व्यवस्थापन गर्नुपर्ने देखिन्छ। प्राधिकरणका कार्यकारी निर्देशक घिसिङले भने, ‘राजधानी सहरमा उज्यालो बनाउन साँझको दुई घन्टाका लागि १०० मेगावाटको व्यवस्थापन गर्न प्राधिकरण सक्षम छ, यसका लागि सबै किसिमका कोसिस भइरहेका छन्।’ उपत्यका अन्य स्थानमा लोडसेडिङको समय बढाएर उपत्यकामा घटाउन त थालिएको होइन भन्ने जिज्ञासामा कार्यकारी निर्देशक घिसिङले भने, ‘होइन, अन्य स्थानमा पनि लोडसेडिङको समय घटाउने प्रयास भइरहेको छ, घट्छ । उपत्यकालाई पूर्णरूपमा लोडसेडिङ मुक्त बनाउने योजना हो।’ उपत्यकाको मागलाई कसरी सम्बोधन गर्न सकिन्छ त रु कार्यकारी निर्देशक घिसिङले भने,‘पिक आवरमा कुलेखानीलाई मात्र चलायौँ भने पनि उपत्यकाको समस्या सम्बोधन गर्न सकिन्छ र अन्य विकल्पको प्रयोग गर्न सकिन्छ, त्यही विषयमा अध्ययन भइरहेको छ।’ ऊर्जा मन्त्री जनार्दन शर्माले निर्माणाधीन अवस्थामा रहेका कुलेखानी तेस्रो र चमेलिया जलविद्युत आयोजनाको काम यथाशिघ्र सम्पन्न गर्न मन्त्रालयले निर्देशन दिइसकेको बताए। उनका अनुसार, त्रिशुली ३ ए को बाटो निर्माण गर्न नेपाली सेनालाई दिने निर्णय भइसकेको छ । प्राधिकरणको पुनर्संरचनाका लागि प्रथम चरणको कार्य सुरु भएको छ । त्यसैगरी, प्रसारण लाइन निर्माणतर्फ पूर्व–पश्चिम ७६५ र ४०० के।भी।, मध्य पहाडी राजमार्ग ४०० के।भी।, क्रस बोर्डर, नदी कोरिडोर, ट्रान्समिसन निर्माणको काम अगाडि बढाउन बोर्डबाट निर्णय भइसकेको प्राधिकरणले जनाएको छ । उता उपत्यकाको विद्यमान वितरण प्रणालीमा सुधार आवश्यक भएको भन्दै मन्त्रालयले उपत्यकामा भूमिगत वितरण लाइनको विस्तारका लागि प्राविधिक तयारी गरिरहेको छ । विद्युत् चुहावटलाई नियन्त्रण गर्न प्रभावकारी रूपमा प्रयास भइरहेका र ट्रान्सफर्मर मागअनुसार वितरण गर्ने कार्य भइरहेको कार्यकारी निर्देशक घिसिङले बताए। उपत्यका बाहिर रहेका प्रमुख सहरको वितरण प्रणाली सुदृढीकरण गर्न दीर्घकालीन गुरुयोजना निर्माणको चरणमा छ । चुहावट नियन्त्रणका लागि प्राधिकरणले आफ्ना जनशक्ति परिचालन गरी अवरोध गर्ने र चुनौती देखिएका स्थानमा गृह मन्त्रालयसँग समन्वय र सहयोग मागेर भए पनि हुकिङमार्फत चोरी गर्नेलाई कानुनी दायरामा ल्याउने कार्य भइरहेको मन्त्रालयले जनाएको छ । उता ऊर्जा मन्त्रालयले ऊर्जा सङ्कट विधेयकलाई मस्यौदा सहमतिका लागि अर्थ र कानुन मन्त्रालयमा पठाएको जनाएको छ । निजी क्षेत्रका प्रवद्र्धकसँग विद्युत् खरिद सम्झौता छिटो छरितो होस् भन्ने उद्देश्यले एक सय मेगावाटसम्मका जलविद्युत् आयोजनाको खरिद सम्झौता गर्ने अधिकार प्राधिकरणका कार्यकारी निर्देशकलाई दिइएको मन्त्रालयले जनाएको छ । उत्पादन, इन्जिनियरिङ, विद्युत् व्यापार कम्पनी स्थापना गर्ने र काठमाडौँ उपत्यका वितरण कम्पनी, प्रदेशस्तरमा प्रादेशिकस्तर कार्यालय खोल्ने, उत्पादनका लागि सातवटा कम्पनी खोली प्राधिकरण, नागरिक र लगानीकर्ताको संयुक्त आयोजनाका रूपमा करिब २५०० मेगावाट विद्युत् उत्पादन गर्न कार्य अगाडि बढाउने निर्णय भएको समेत मन्त्रालयले जनाएको छ । गोरखापत्र दैनिकबाट ।
काउन्सिलले तोक्यो मेडिकल कलेजको सिट सङ्ख्या, कसकाे कति ?
काठमाडौँ, २० कात्तिक । नेपाल मेडिकल काउन्सिलले चालु शैक्षिकसत्रका लागि शुक्रबार मेडिकल कलेजको एमबिबिएस र बिडिएस (डेन्टलतर्फ)को सिट सङ्ख्या निर्धारण गरेको छ । काउन्सिलको बिहीबार र शुक्रबार बसेको बैठकले एमबिबिएसमा अधिकतम ११५ सिट र बिडिएसमा अधिकतम ५० सिट तोक्ने निर्णय गरेको छ । यसपटकको सिट सङ्ख्या निर्धारण माथेमा आयोगको प्रतिवेदनअनुसार सिटको अधिकतम सङ्ख्या निर्धारण गरिएको हो । गत वर्ष अधिकतम पाउनेले एमबिबिएसमा १३५ र बिडिएसमा ६० पाएका थिए । सिट निर्धारण गर्दै काउन्सिलले आज सूचना प्रकाशित गरी मेरिटका आधारमा भर्ना लिन कलेजलाई निर्देशन दिएको छ । काउन्सिलले जनकपुरस्थित जानकी मेडिकल कलेजलाई चार वर्षपछि एमबिबिएसमा विद्यार्थी भर्ना गर्न अनुमति दिने निर्णय पनि गरेको छ । विसं २०६९ मा सो कलेजलाई काउन्सिलले विद्यार्थी भर्ना गर्न रोक लगाएको थियो । यस शैक्षिकसत्रका लागि जानकीले एमबिबिएसमा ८० जना विद्यार्थी भर्ना गर्ने अनुमति पाएको छ । यसैगरी, त्रिभुवन विश्वविद्यालयअन्तर्गतको गण्डकी मेडिकल कलेजले एमबिएसमा ९०, चितवन मेडिकल कलेजले एमबिएसमा ११५ र बिडिएसमा ३५, नेशनल मेडिकल कलेज ११५, आर्मी मेडिकल कलेजले ११५ र किष्ट मेडिकल कलेजले एमबिबिएसमा ११० र बिडिएसमा ५० कोटा पाएको छ । काठमाडौँ विश्वविद्यालयअन्तर्गतको नोबेल मेडिकल कलेजले एमबिबिएसमा १०५ र बिडिएसमा १५, नेपाल मेडिकल कलेजले एमबिबिएसमा ११५ र बिडिएसमा ४०, काठमाडौँ मेडिकल कलेजले एमबिबिएसमा ११५ र बिडिएसमा ४०, नेपालगन्ज मेडिकल कलेजले एमबिबिएसमा ११५, मणिपाल मेडिकल कलेजले एमबिबिएसमा ११५ र लुम्बिनी मेडिकल कलेजले एमबिबिएसमा १००, विराट मेडिकल कलेजले एमबिबिएसमा ७५ र देवदह मेडिकल कलेजले एमबिबिएसमा भर्ना गर्न २४ कोटा पाएको छ । कलेज अफ मेडिकल साइन्सेज भरतपुरले एमबिबिएसमा ११५ र बिडिएसमा २५, युनिभर्सल मेडिकल कलेज भैरहवाले एमबिबिएसमा ११५ र बिडिएसमा ५०, कान्तिपुर डेन्टल कलेज काठमाडौँले बिडिएसमा ४५, केडिया डेन्टल कलेज वीरगन्जले बिडिएसमा ३५, पिपल्स डेन्टल कलेज काठमाडौँले बिडिएसमा ५० र काठमाडौँ युनिभर्सल स्कुल अफ मेडिसिन काभ्रेले बिडिएसमा ४५ सिट पाएको छ । रासस
बूढीगण्डकी प्रभावितलाई स्थानीयबासीलाई दिने मुआब्जा तीन गुणा वृद्धि गर्नुपर्छः डा भट्टराई
गोरखा, २० कात्तिक । नयाँ शक्ति पार्टी नेपालका संयोजक तथा पूर्वप्रधानमन्त्री डा बाबुराम भट्टराईले बूढीगण्डकी प्रभावित गोरखा र धादिङका स्थानीयवासीलाई उचित मुआब्जा दिएर आयोजनाको काम तीव्ररुपमा अघि बढाउनुपर्ने बताएका छन् । गोरखाको दर्बुङ गाविसस्थित दर्बुङफाँटमा शनिबार आयोजित कार्यक्रममा भट्टराईले मुआब्जा निर्धारण समितिले तोकेको मुआब्जामा केही बढाएर प्रभावित गाविसवासीलाई खुसी बनाउँदै आयोजनाको काम अघि बढाउनुपर्नेमा जोड दिए । बूढीगण्डकी आयोजना निर्माण हुँदा गोरखाका विभिन्न १४ र धादिङका १३ गाविस प्रत्यक्ष रुपमा प्रभावित हुनेछन् । प्रभावित क्षेत्रका जनतालाई दोब्बर, तेब्बर मुआब्जा दिनुपर्ने भन्दै उनले भने “जसरी पनि बूढीगण्डकी आयोजना समयमै बनाउनुपर्छ ।” बूढीगण्डकी जलविद्युत् आयोजना बनाउने नाउँमा गरिब, पीडित जनतालाई थोरै मुआब्जा वितरण गर्न नहुने बताउए । “आयोजना बनेपछि तीन करोड जनता खुसी हुन्छन्”– उनले भने, “तीन करोड जनता खुसी हुने नाउँमा ५० हजार प्रभावितलाई बेवास्ता नगरौँ ।” रासस
सामसङ ब्राण्डलाई अर्काे धक्का, २८ लाख वासिङ मेसिन बजारबाट फिर्ता
काठमाडौं, २० कात्तिक । ग्यालेक्सी नोट ७ पछि सामसङका वासिङ मेसिनमा गम्भिर समस्या देखिएको छ । वासिङ मेसिनमा प्रयोग गरिएको लिड नामक धातुले मानव स्वास्थ्यमा गम्भिर असर गर्ने देखिएपछि सामसङले २८ लाख वासिङ मेसिन फिर्ता गरेको छ । सामसङले अमेरिकाबाट मात्रै ३४ मोडलका २८ लाख धान वासिङ मेसिन फिर्ता गरेको हो । अमेरिकी कञ्जुमर प्रडक्ट सेफ्टी कमिसनले वासिङ मेसिनमा प्रयोग गरिएको लिडका कारण उपभोक्ताको स्वास्थ्यमा गम्भिर असर देखा परेको बताउँदै फिर्ता पठाएको हो । वासिङ मेसिनका कारण स्वास्थ्यमा समस्या आएको ७३३ वटा रिपोर्ट कम्पनीमै दर्ता भएको छ । यी वासिङ मेसिनहरु सन २०११ सालदेखि अमेरिकी बजारमा पठाइएका उत्पादन हुन् । ती समानको मूल्य औषतमा ४५० देखि १५०० डलरसम्म पर्छन् । गत सेप्टेम्बरमा मात्रै सामसङले २५ लाख ग्यालेक्सी नोट ७ स्मार्ट फोन बजारबाट फिर्ता लिएको थियो । तात्ने र पड्कने समस्या देखिएपछि कम्पनीले फोन पिर्ता लिएको थियो । नोट ७ पछि वासिङ मेसिनमा देखिएको समस्याले दक्षिण कोरियाली बहुराष्ट्रिय कम्पनी सामसङको बजार थप ओरालो लाग्ने अनुमान गरिएको छ ।
साहसिक पर्यटनप्रतिको आकर्षण बढ्यो, नेपाल भित्रने पर्यटक मध्ये ६० प्रतिशतको रोजाइ साहसिक पर्यटनमा
काठमाडौं २०, कात्तिक । नेपालमा आउने साहसिक पर्यटप्रतिको आकर्षण बढ्न थालेको छ । नेपालमा आउने विदेशी पर्यटको पहिलो रोजाइ नेपालका विभिन्न क्षेत्रमा गरिने साहसिक पर्यटकीय गन्तव्य हुन थालेका छन् । २०७२ बैशाखको भूकम्पअगाडिकै अवस्थामा नेपालमा साहसिक पर्यटन पुग्न थालेको संस्कृति, पर्यटन तथा नागरिक उड्डयन मन्त्रालय अन्तर्गत पर्यटन विभागका प्रवक्ता दुर्गादत्त ढकालको भनाइ छ । उनका अनुसार सन् २०१६ मा नेपालमा आउने विदेशी पर्यटकको संख्या ८ लाख पुग्ने अनुमान गरिएको छ । यो संख्या मध्ये अधिकांश पर्यटको रोजाइ नेपालमा साहसिक पर्यटकीय गतिविधि नै गर्ने रहेको उल्लेख छ । पर्यटन विभागको तथ्यांक अनुसार सन् नेपालमा अहिले साहिसक पर्यटनको लागि वेमौषम भएपनि पर्यटकीय आकर्षण देखिएको छ । पदायत्रा र सगरमाथा आरोहण जाने सिजन नभएपनि अन्नपूर्ण, मनास्लुलगायतका ८ हजार मिटर भन्दा साना हिमाल आरोहणको समय हो । यो समयमा देखिएको पर्यटनकीय आकर्षणले पनि नेपालमा साहसिक पर्यटकीय गतिविधि बढाएको छ । विभागका अनुसार सगरमाथा बाहेक अटम सिजानमा सन् २०१४ मा १३८९ जना, सन् २०१५ मा १०५५ जना पर्यटकले विगभागबाट साहसिक पर्यटकको अनुमति लिएका छन् । यस्तो अनुमति सन् २०१६ मा १४ सय जना पुग्ने भएका छन् । विभागबाट एक हजार जानेले साहसिक पर्यटनको अनुमति लिइसकेका र चार सय जना अनुमतिको चरणमा रहेको पनि विभागका प्रवक्ता ढाकालको भनाइ छ । नेपाल सुरक्षित रहेको सन्देश प्रवाह हुन थालेको, अन्तर्राष्ट्रिय संचार माध्यम तथा ट्राभल पोर्टलले गर्ने नेपालको प्रचारले पनि साहसिक पर्यटनको गतिविधि बढेको ढकालको दाबी छ । उनका अनुसार पर्यटकको तथ्यांक सेप्टेम्बरसम्ममा ५ लाख ८६ हजार रहेको र सन् २०१६ मा आठ लाख पुग्ने अनुमान गरिएको छ । नेपालको विगतको पर्यटकीय अवस्था हेर्दा साहसिक पर्यटकको रोजाइ ६० प्रतिशत रहेको पनि विभागले जानकारी दिएको छ । नेपालमा आउने विदेशी पर्यटकको पहिलो रोजाइ सगरमाथा, अन्नपूर्ण र लाङटाङको पदयात्रा, हिमाल आरोहण हुने गरेको छ । त्यसपछि नेपालमा रहेको विभिन्न पर्यटकीय गतिविधि बन्जि, प्याराग्लाइडिङ, हाइकिङ, राफ्टिङ, स्की, माउन्टेन फ्लाईट, जंगल सफारी, कायाकीङ, क्यानोनिङसहितका गतिविधि हुने गरेका छन् । यी गतिविधि गर्न पर्यटक नेपाल आउने गरेको उल्लेख्य छन । नेपालमा पछिल्लो समय साहसिक पर्यटनकीय सेवाका पर्यटकीय संस्था पनि बढिरहेका छन् । हाल नेपालमा २९ सय वटा ट्राभल एजेन्सी, २१ सय वटा ट्रेकिङ एजेन्सी, ११ हजार ट्रेकिङ गाइड, ३६ सय ट्राभल गाइड, ६५ वटा राफ्टिङ एजेन्सी, ४५ वटा टुरिष्ट भेइकल एजेन्सी, ७० वटा प्यराग्लाइडिङका एजेन्सी मन्त्रालयमा दर्ता भएका छन् । दर्ता विना संचालन भएका अन्य साहिसक पर्यटकीय गतिविधि पनि उल्लेख्य रहेको विभागको बुझाई छ । नेपालमा आउने विदेशी पर्यटक मध्ये सबैभन्दा खर्चालु नै साहसिक पर्यटक हुने गरेको नेपाल पर्वतारोहण संघ एनएमएका अध्यक्ष आङछिरिङ शेर्पाको भनाइ छ । उनका अनुसार अन्य सबै पर्यटकीय गतिविधिमा गर्ने खर्च एकै वर्षको पर्वतारोहण गतिविधिमा हुने खर्च भएको दाबी पनि शेर्पाको छ । पर्वतारोहण सबैभन्दा साहसिक पर्यटन हो भने यसैका लागि नेपाल आउने पर्यटको संख्या पनि हरेक वर्ष बढ्दै गएको पर्वतारोहण संघको बुझाई छ । साहसिक पर्यटमा नेपालीसमेत उत्साहित नेपालका साहसिक पर्यटकीय गन्तव्य विदेशी पर्यटकका लागि परिचित भएपनि पछिल्लो सयम आन्तरिक पर्यटक (नेपाली)को रूची बढ्न थालेको छ । ट्राभल, ट्रेकिङ तथा टूर एजेन्सीसँग साहसिक पर्यटकीय गन्तव्यमा जाने नेपाली पर्यटकले चासो देखाउँने गरेको ट्रेकिङ् एजेन्सीज एशोसिएशन अफ नेपाल (टान)को भनाइ छ । घुमघाममा रमाउने नेपालीको जमानत र छुट्टीको समयमा पदयात्रा जाने विद्यार्थीवर्गले साहसिक पर्यटनलाई रुचाउँन थालेका छन् । मनोरञ्जनात्मक गतिविधिकै लागि कर्पाेरेट हाउसमा काम गर्नेदेखि सामान्य व्यक्तिका लागि पनि साहसिक पर्यटकीय क्षेत्र तिनको रोजाई हुने गरेको पर्यटन व्यवसायी बताउँछन् । आन्तरिक पर्यटकले एक दिने हाइकिङदेखि दुई–तीन दिनसम्मको पदयात्रा, हवाई खेलकूदलगायतका गतिविधिका साथमा बञ्जी र राफ्टिङ रुचाउँने गरेको सोसाइटी अफ टुर एण्ड ट्राभल अपरेटर्स नेपालका अध्यक्ष यमबहादुर खड्काको भनाइ छ । बञ्जी, राफ्टिङलगयातका गतिविधिमा रमाइलो हुने र एक दिनको प्याकेज लिन सकिने भएकोले पनि यसतर्फ आन्तरिक नेपाली बढेको बताइएको छ । ‘नेपालमा एजेन्सीमार्फत पदयात्रामा जाने नेपाली कम भएपनि समूह बनाएर जाने क्रम भने बढ्न थालेको छ । एजेन्सीको प्रयोग नगरेपनि तिनले गाइड र सवारी साधन भने प्रयोग गर्ने गरेका छन् । नेपालीको समूह बढ्दै जादाँ तिनले एजेन्सीको प्रयोग गर्नेमा ढुक्क हुन सकिने पनि टानको भनाइ छ । हिमाली क्षेत्रमा पदयात्रामा जानु साहसिक कार्य भएकोले यसप्रति नेपालीको आकर्षण बढ्दै गएको बताइएको छ । नेपाल भ्रमण वर्ष, पर्यटन वर्ष र घुमफिर वर्षले नेपालीप्रतिको उत्साह बढाएको नेपाल पर्यटन बोर्डको भनाइ छ । बोर्डका संचार संयोजक सुधन सुवेदीका अनुसार आन्तरिक पर्यटकको बजार बढ्नुमा सूचनाको पहुँच बढ्नु नै हो । नेपाली पर्यटक भन्ने टे«न्डको विकास नै भर्खर हुन थालेकोले छ । त्यसमा पनि साहसिक पर्यटकीय गतिविधि गर्ने र माउने क्रम बढेपनि तथ्यांकमा भने भन्न नसकिने अवस्था नरहेको बोर्डको बुझाई छ ।
गरिमा विकास बैंकको नाफा साढे ४ करोड
काठमाडौं, २० कात्तिक । गरिमा विकास बैंकले चालु आर्थिक वर्षको पहिलो त्रैमासिकमा ४ करोड ६८ लाख नाफा कमाएको छ । बैंकले गत आवको सोही अवधीमा जम्मा २ करोड ९१ लाख नाफा कमाएको थियो । एक अर्ब चुक्ता पुँजी रहेको बैंकको जगेडा कोषमा ५० करोड रहेको छ । बैंकले सो तीन महिनामा १२ अर्ब निक्षेप संकलन गरेर १० अर्ब कर्जा प्रवाह गरेको छ । बैंकको प्रति सेयर आम्दानी १७ रुपैंयाँ ३३ पैसा छ भने प्रति सेयर नेटवर्थ १४६ दशमलब ८९ पैसा रहेको छ ।
उडान गर्नै लाग्दा श्रीको हेलिकोप्टर माटोको ठिक्कोमा ठोक्कियो, घटना सामान्य भएको विमानस्थल कार्यालयको भनाइ
काठमाडौं २०, कात्तिक । काठमाडौं विमानस्थलमा उडान गर्नै लाग्दाश्रीको हेलिकोप्टर माटोको ठिक्कोमा ठोक्किएको छ । एक फिट अग्लो माटोको ठिक्कोमा पछाडिको पंखाले छोएको श्री एयरको हेलिकोप्टर आवश्यक मर्मतपछि तुरुन्तै उडान पनि सुरु भएको छ । सामान्य घटना भएको मर्मत भएर उडेको त्रिभुवन अन्तर्राष्टिय विमानस्थलका प्रवक्ता प्रेमनाथ ठाकुरले बताए उनका अनुसार श्री को एसए ३५० बी३ ई नामक ६ सिट क्षमताको हेलिकोप्टर विना यात्रु उडान गर्नै लाग्दा प्रोटेक्टर (पंखालाई अड्याउनका लागि राखिएको) माटोको सामान्य ढिस्कोमा ठोकिएको थियो । घटना समान्य भएकोले पनि यो वायुसेवाले आवश्यक मर्मत गरेर उडान सुरु गरेको उनले बताए । काठमाडौंबाट जिरी उड्ने क्रममा श्री एयरको हेलिकोप्टको पछाडिएको प्रोटेक्टर सामान्य रुपमा ठोकिएको हो । सामान्य चेक अप पछि उक्त हेलिकोप्टर गन्तव्यतर्फ गएको पनि ठाकुरले बताए । यात्रु नै नभएको हेलिकोप्टर उडान गर्ने लाग्दा पंखाले माटोमा छोएको सामान्य घटना भएकोले सामान्य मर्मतबाटे उडान गर्न सकेको श्री एयरलाईन्सका कर्पोरेट म्यानेजर अनिल मानन्धरले बताए ।
