नेप्से सर्किट ब्रेकरमा नयाँ नियमः ५ प्रतिशतमा १५ मिनेट स्थगित, ८ प्रतिशतमा बन्द
काठमाडौं । नेपाल स्टक एक्सचेन्ज (नेप्से) ले मूल विनियमावलीको विनियम १७ मा संशोधन गर्दै नेप्से परिसूचकको उतारचढावमा आधारित सर्किट ब्रेकर प्रणाली परिवर्तन गरेको छ । संशोधित व्यवस्था अनुसार निरन्तर कारोबार सुरु हुँदा कायम रहेको नेप्से परिसूचक दुई घण्टाभित्र ५ प्रतिशतले घटे वा बढेमा १५ मिनेटका लागि कारोबार रोक्का गरिनेछ । त्यसैगरी, कारोबार सुरु भएको कुनै पनि समयमा नेप्से परिसूचक ८ प्रतिशतले घटे वा बढेमा सो दिनका लागि सम्पूर्ण कारोबार बन्द गरिने व्यवस्था गरिएको छ । यसैगरी, कुनै संगठित संस्थाको प्रारम्भिक कारोबार सत्रमा कायम भएको धितोपत्र मूल्यमा सोही दिन १५ प्रतिशतभन्दा बढी घटबढ हुने गरी कारोबार गर्न नपाइने प्रावधान पनि संशोधित विनियमावलीमा समावेश गरिएको छ ।
दिउँसै असुरक्षित काठमाडौं ? ५४ प्रतिशत अपराध दिउँसोको ६ घण्टाभित्रै
काठमाडौं । प्रहरीले काठमाडौंका विभिन्न ठाउँमा भएका आपराधिक क्रियाकलापको समयको विश्लेषण गरेको छ । चोरी तथा अन्य आपराधिक घटना मध्यान्ह १२ बजेदेखि ६ बजेसम्म ५४ दशमलव ८ प्रतिशत हुने गरेको प्रहरीको अनुसन्धानबाट खुलेको छ । सबैभन्दा बढी आपराधिक क्रियाकलाप मध्यान्ह १२ बजेदेखि ६ बजेसम्म हुने गरेको पाइएको हो । त्यसैगरी, ६ बजेदेखि रातको १२ बजेसम्म २१ प्रतिशत आपराधिक क्रियाकलाप हुने गरेको प्रहरीको विश्लेषणबाट खुलेको काठमाडौं जिल्ला प्रहरी परिसरका प्रवक्ता पवन कुमार भट्टराईले जानकारी दिए । उनका अनुसार बिहानको ६ बजेदेखि मध्यान्ह १२ बजेसम्म १८.८ प्रतिशत आपराधिक क्रियाकलाप हुने गरेको छ । सबैभन्दा कम आपराधिक क्रियाकलाप रातको १२ बजेदेखि बिहान ६ बजेसम्म ५ दशमलव ५ प्रतिशत आपराधिक क्रियाकलाप हुने गरेको प्रहरीको अनुसन्धानबाट खुलेको छ । त्यसैगरी, काठमाडौं प्रहरीले विभिन्न आपराधिक समूहमा सक्रिय युवाहरूको सूची तयार पारेको जानकारी दिएको छ । गुण्डागर्दी भए या आपराधिक पृष्ठभूमिका युवाहरूले त्रास देखाए सूचना उपलब्ध गराउन पनि प्रहरीले आग्रह गरेको छ । प्रहरीले पछिल्लो समय सामाजिक सञ्जालमार्फत आफ्नो समूह देखाउन भिडियो पोस्ट गर्ने, अनावश्यक तडकभडक गरेर नागरिकको मनोविज्ञान त्रास पार्नेहरूको सूची तयार पारेको छ । सूचीमा पर्नेहरूमा अधिकांश गुण्डागर्दी समूहका युवाहरू रहेको प्रहरीले जानकारी दिएको छ ।
सोमबारदेखि सूचीकृत कम्पनीको सेयर मूल्य १५ प्रतिशतसम्म घटबढ हुने
काठमाडौं । नेपाल स्टक एक्सचेन्ज लिमिटेड (नेप्से) ले धितोपत्र कारोबार सञ्चालन (चौथो संशोधन) विनियमावली, २०८२ आगामी सोमबार (वैशाख ७ गते) देखि लागू गर्ने निर्णय गरेको छ। नेप्सेका वरिष्ठ अधिकृत सन्तोष आचार्यले वैशाख ३ गते बसेको सञ्चालक समितिको बैठकले उक्त विनियमावली कार्यान्वयन गर्ने निर्णय गरेको बताए । संशोधित व्यवस्थाअनुसार अब सूचीकृत कम्पनीहरूको सेयर मूल्य उतारचढावको दैनिक सीमा (प्राइस लिमिट) १० प्रतिशतबाट बढाएर १५ प्रतिशत पुर्याइएको छ । यसको अर्थ अब कुनै पनि सूचीकृत कम्पनीको सेयर मूल्य एकै दिनमा अधिकतम १५ प्रतिशतसम्म बढ्न वा घट्न सक्नेछ । साथै, संशोधित विनियमावलीको विनियम ७ को उपविनियम ५ र ६ मा उल्लेखित व्यवस्थाहरूलाई यथाशीघ्र कार्यान्वयन गर्न कारोबार सदस्यहरूलाई आवश्यक निर्देशन दिइएको नेप्सेका ले जानकारी दिएका छन् ।
यस्तो छ सहिद दशरथ चन्द स्वास्थ्य विज्ञान विश्वविद्यालयको १०० दिनको प्रगति विवरण
काठमाडौं । कैलालीको धनगढी गेटास्थित सहिद दशरथ चन्द स्वास्थ्य विज्ञान विश्वविद्यालयले सय दिनको प्रगति विवरण सार्वजनिक गरेको छ । जसमा सबैभन्दा पहिलो प्रमुख उपलब्धी विश्वविद्यालयको उपकुलपति र रजिष्टार नियुक्तिलाई राखिएको छ । यस विश्वविद्यालयको उपकुलपति प्रा.डा. सुनिलकुमार जोशी र रजिष्ट्रार डा. खेमराज जोशीलाई नियुक्त गरी विश्वविद्यालयको प्रशासनिक संरचना व्यवस्थित बनाउने काम अघि बढाइएको जनाएको छ । यस्तै, पूर्वाधार तथा प्राविधिक विकासतर्फ विश्वविद्यालयको आधिकारिक वेबसाइट निर्माण गरिएको, परिसर सरसफाइ तथा व्यवस्थापन, केन्द्रीय प्रशासनिक भवन र आवास व्यवस्थापनमा सुधार गरिएको उल्लेख छ भने शैक्षिक कार्यक्रम सञ्चालन अन्तर्गत पाठ्यक्रम निर्माण कार्य तीव्र बनाइएको छ । एमबीबीएस, बीडीएस, बीएससी नर्सिङ, बीपीटी, बी फार्मेसी, बीपीएच र बी अप्टोमेट्री लगायत कार्यक्रम सञ्चालनको तयारी गरिएको छ । आगामी शैक्षिक सत्रदेखि एमबीबीएस ५० सिट, नर्सिङ ३०, बीएससी एमएलटी २० सिट र बी अप्टोमेट्री २० सिट सञ्चालन गर्ने लक्ष्य राखिएको छ । यसका लागि चिकित्सा शिक्षा आयोगमा सेल्फ–एप्रेजल फारम समेत पेश गरिएको छ । यस्तै, नीतिगत तथा संस्थागत विकासअन्तर्गत शिक्षक तथा कर्मचारी नियमावली, आर्थिक कार्यविधि तथा वित्तीय उत्तरदायित्व सम्बन्धी नियमावली लगायत विभिन्न मस्यौदा तयार पारिएको छ । खरिद, अनुसन्धान केन्द्र, विषय समिति तथा संगठन संरचनासम्बन्धी नियमावली निर्माण प्रक्रियामा रहेका छन् । मानव संसाधन व्यवस्थापनतर्फ ७७ जना प्राध्यापक, सहप्राध्यापक तथा उपप्राध्यापक पदका लागि विज्ञापन प्रकाशित गरिएको छ भने करार शिक्षक छनोट कार्यविधि पनि तयार गरिएको उल्लेख छ । वित्तीय व्यवस्थापनतर्फ चालु आर्थिक वर्षका लागि ४९ करोड १३ लाख बजेट विनियोजन भएको छ भने आगामी वर्षका लागि २ अर्ब ५३ करोडको प्रस्तावित बजेट तयार गरिएको छ । साथै विभिन्न स्रोतबाट आय सुनिश्चित गर्ने पहल भइरहेको विश्वविद्यालयले जनाएको छ ।
सात महिनामा काठमाडौंका विभिन्न ठाउँबाट ४ हजार बढी पक्राउ
काठमाडौं । सात महिनामा काठमाडौंका विभिन्न स्थानमा ४ हजार २७९ जना पक्राउ परेका छन् । शुक्रबार काठमाडौं प्रहरी परिसरमा आयोजित पत्रकार सम्मेलनमा प्रवक्ता पवनकुमार भट्टराईले काठमाडौंका विभिन्न ठाउँमा गरेर ४ हजार २७९ जना पक्राउ परेको जानकारी दिए । उनका अनुसार काठमाडौंका विभिन्न प्रहरी वृत्तमा ५ हजार ५६६ वटा मुद्दा भएको थियो । सबैभन्दा बढी १ हजार ९९९ मुद्दा जिल्ला प्रहरी परिसर, काठमाडौंमा दर्ता भएको भट्टराईले जानकारी दिए । महाराजगञ्जमा प्रहरी वृत्तमा ५ सय ६२ मुद्दा दर्ता, बौद्धमा ४ सय ४६, बालाजुमा ३ सय ८९, नयाँ बानेश्वरमा ३ सय ३३, गौशालाममा ३ सय ९ र कालीमाटीमा २८९ मुद्दा दर्ता भएका थिए । प्रहरी परिसरका अनुसार बैंकिङ कसुरमा २ हजार १९४, अभद्र व्यवहारमा ७ सय ७३, चोरीमा ५७१, लागुऔषध ३३८, ठगी २६८, आपराधिक उपद्रव १७३, आत्महत्या १ सय ६४, जबरजस्ती करणी १ सय १९, ज्यान मार्ने उद्योग १ सय र सवारी ज्यानमा ६८ मुद्दा दर्ता भएको थियो ।
महिला हिंसासँगै पुरुष पीडितका घटना पनि धेरै
काठमाडौं । काठमाडौंमा १ सय ११ जना पुरुष महिलाका कारण पीडित भएका छन् । शुक्रबार काठमाडौं जिल्ला प्रहरी परिसरमा भएको पत्रकार सम्मेलनमा एसपी तथा प्रवक्ता पवनकुमार भट्टराईले विभिन्न घटनामा परेर महिलाद्वारा १ सय ११ जना पुरुष पीडित भएको उजुरी परेको जानकारी दिए । ठाडो निवेदन दिएर १३ जना पुरुष र २९१ जना महिला पीडित भएको उजुरी परेको उनले बताए । भट्टराईले घरेलु हिंसामा ९८ जना पुरुष र ६२१ जना महिला परेको जानकारी दिए । लैंगिक हिंसा नियन्त्रणका लागि प्रहरीले सक्रियता देखाएको बताउँदै उनले मनोसामाजिक परामर्श ९२० जनालाई प्रदान गरिएको जानकारी दिए । महिला, बालबालिका तथा पुरुषलाई विभिन्न १ सय ७९ र मानसिक रुपमा विक्षिप्त भएका विभिन्न २ सय २ जनालाई उपचार गर्न अस्पतालसमेत पठाइएको उनले बताए । त्यसैगरी, जेनजी प्रदर्शन हुँदा प्रहरी कार्यालयबाट लुटिएको १८१ थान हतियार प्रहरी काठमाडौंबाट बरामद गरेको छ । हतियार लुटमा संलग्न ५१ जनालाई पक्राउ गरी अनुसन्धान गरिएको छ । भदौ २४ मा कारागारबाट भागेका १६२ जना कैदी र ९० जना थुनुवालाई जिल्ला प्रहरी परिसर काठमाडौंको टोलीले पक्राउ गरेको छ । उनीहरूलाई सम्बन्धित कारागारमा पठाइएको एसपी भट्टराईले जानकारी दिए ।
जेनजी आन्दोलनमा मृत्यु भएका ४२ जना आफन्तले दिए जाहेरी, ७ शवको डीएन परीक्षण जारी
काठमाडौं । गत वर्षको भदौमा जेनजी आन्दोलनका क्रममा मृत्यु भएका ७ जनाको अझै पहिचान नखुलेको पाइएको छ । शुक्रबार काठमाडौं जिल्ला प्रहरी परिसरमा आयोजित पत्रकार सम्मेलनमा प्रवक्ता पवनकुमार भट्टराईले सात जनाको मृत्यु भएको हालसम्म पहिचान खुल्न नसकेको बताए । ‘सात जनाको शव पहिचान हुन नसक्दा डीएनए परीक्षण भइरहेको छ,’ उनले भने । आन्दोलनमा ४९ जनाको मृत्यु भएको उनले जानकारी दिए । ४२ वटा शवको पहिचान भएर सनाखत भइ जाहेरी दरखास्त परेको उनले बताए । ४२ वटा शवको ज्यानसम्बन्धी मुद्दा दर्ता भएको उनले जानकारी दिए । २३ गतेको घटनाको सम्बन्धमा विभिन्न समयमा ९ वटा जाहेरी परेको प्रवक्ता भट्टराईले बताए । असोज २७ गतेको निर्णय अनुसार जिल्ला सरकारी वकिल कार्यालय, काठमाडौंको केही जाहेरीहरू तामेलीमा राखिएको उनले उल्लेख गरे । तामेलीमा रहेका जाहेरीमध्ये एउटा जाहेरीलाई जिल्ल सरकारी वकिल कार्यालय काठमाडौंको निर्णय अनुसार तामेली जगाइ अनुसन्धान गरिएको छ,’ प्रवक्ता भट्टराईले भने, पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकलाई पक्राउ अनुसन्धान गरिएको छ ।’ अदालतको आदेशबाट पूर्वप्रधानमन्त्री ओली र लेखक रिहा भए पनि अनुसन्धान भइरहेको भट्टराईले जानकारी दिए । शवको मुचुल्का तथा परीक्षण लगायत सम्बन्धित कागजातको अध्ययन भइरहेको उनले उल्लेख गरे । सीसीटीभी फुटेज संकलन, विश्लेषण, प्रत्यक्षदर्शी र घटना देख्ने एवं थाहा पाउने व्यक्तिको कागज समेतका अनुसन्धान भइरहेको उनको भनाइ छ ।
अब अस्पतालमा पनि आइतबार बिदा हुने
काठमाडौं । अब अस्पतालमा पनि आइतबार बिदा हुने भएको छ । सेवाग्राहीको असहजतालाई मध्यनजर गर्दै स्वास्थ्य मन्त्रालयले आइतबार पनि ओपीडी सञ्चालन गर्न निर्देशन दिँदा चिकित्सक, नर्स लगायतका स्वास्थ्यकर्मीहरूले विरोध जनाउँदा मन्त्रालय यो कदमबाट पछाडि हटेको हो । सरकारले सार्वजनिक संस्थाहरूमा आइतबार पनि बिदा दिन दिएको आग्रहलाई लत्याउँदै मन्त्रालयले अस्पताल आइतबार पनि सञ्चालन गर्न भनेको थियो । यो विषयमा नेपाल चिकित्सक संघ लगायत १४ वटा चिकित्सक संघ संगठनहरूले आपत्ति जनाउँदै आन्दोलन गर्ने चेतावनी दिएका थिए । त्यसको भोलिपल्ट मन्त्रालयले एक विज्ञप्ति निकाल्दै शनिबार र आइतबार बिदा दिने व्यवस्था लागू गर्ने निर्णय गरेको हो । विज्ञप्तिमा भनिएको छ, ‘नेपाल सरकार मन्त्रिपरिषद्को निर्णयानुसार मिति २०८२ चैत्र २२ गते राजपत्रमा प्रकाशित सूचना बमोजिम शनिबार र आइतबार दुई दिन सार्वजनिक बिदा दिने व्यवस्था लागु भएको सन्दर्भमा स्वास्थ्यकर्मीहरूको मनोबल र हितलाई ध्यानमा राख्दै बिरामीको निरन्तर हेरचाह सुनिश्चित गर्न, सरकारको ‘हप्तामा दुई दिन सार्वजनिक बिदा’ को नीति अनुरूप आइतबारका पूर्व–निर्धारित शल्यक्रिया लगायतलाई बिरामीको सहजता हेरी रिसेड्युल गरी अन्तरंग र आकस्मिक सेवाहरू सधैं झैं २४ सै घण्टा सुचारु रहने जानकारी गराइन्छ ।’ बिदाका दिनहरूमा बिरामीले कुनै सास्ती भोग्न नपरोस् भनी अस्पतालहरूले सम्भव भएसम्मका सेवा प्रदान गर्न, उपलब्ध नभएका सेवाका लागि नजिकैको उपयुक्त अस्पतालमा सहज रूपमा रेफर गर्न र एम्बुलेन्सहरू हरदम तयारी अवस्थामा राख्ने व्यवस्था मिलाउन मन्त्रालयले भनेको छ ।
