जनशक्ति : नियुक्ति

काठमाडौं । पुँजी बजारको नियामक निकाय धितोपत्र बोर्ड (सेबोन) नेतृत्वविहिन छ । आचरण विपरित काम गरेको अभियोगमा सरकारले तत्कालिन अध्यक्ष भिष्मराज ढुंगानालाई पदबाट हटाएर नयाँ अध्यक्ष नियुक्तिको प्रक्रिया अघि बढाइसकेको छ । सरकारले अध्यक्ष छनोट गर्नको लागि उनै व्यक्तिहरु रहेको समिति २ पटक गठन गर्यो । राष्ट्रिय योजना आयोगका उपाध्यक्ष डा. विश्व पौडेलको संयोजकत्वमा गठित समितिप्रति सत्ता गठबन्धन माओवादी केन्द्र निकट कर्मचारीले विरोध जनाए । त्यसपछि सरकारले माओवादी कर्मचारीको माग बमोजिम डा. पौडेलकै संयोजकत्वमा अर्काे समिति गठन गरेको थियो । समितिले अध्यक्षको लागि पनि दुई पटक नै आवेदन मागेको थियो । पहिलो चरणमा १२ जनाले आवेदन दिएका थिए भने दोस्रो पटकमा थप ३ जना बढेर आवेदन दिनेको संख्या १५ पुगेको थियो । छनोट समितिको संयोजक डा. पौडेल छन् भने सदस्यहरुमा अर्थसचिव मधुकुमार मरासिनी र विज्ञका रुपमा नेप्सेका पूर्व अध्यक्ष जीवनाथ धिताल छन् । समितिले १५ आवेदकहरुमध्ये ‘शैक्षिक योग्यता, अनुभव, तालिम र व्यवसायिक कार्ययोजनाको परीक्षाको प्राप्ताङ्कको प्राथमिकताको आधारमा’ ५ जनाको संक्षिप्त सुची तयार पारेको थियो । पाँच जनाको सुचीमा पर्नेहरुमा कृष्णराज पोखरेल, खगेन्द्र कटुवाल, डा. गोपालप्रसाद भट्ट, निरज गिरी र रमेशकुमार हमाल थिए । अध्यक्ष छनोट समितिले यी ५ जना आवेदकहरुसँग फागुन १ गते व्यवसायिक कार्ययोजनाको प्रस्तुतीकरण तथा अन्तरवार्ता लिएको थियो । सो अन्तरवार्तामा संयोजक डा. पौडेलले अहिले बजारमा चलेका हल्लासँग सम्बन्धित प्रश्न नै सोधेका सहभागीहरुले जानकारी दिए । ‘बैंकलाई ब्रोकर लाइसेन्स दिनु हुन्छ कि दिनु हुन्न भन्ने प्रश्न एउटा थियो, नयाँ स्टक एक्स्चेञ्ज थप्नु पर्छ कि पर्दैन भन्ने प्रश्न पनि सोधिएको थियो, बोर्डमा धेरै भ्रष्टाचार छ भन्ने कुरा बाहिर आएको छ, त्यसको नियन्त्रण के कसरी गर्नुहुन्छ, नेपालको पुँजी बजारको लागि नयाँ प्रडक्ट के कस्ता हुन सक्छन् र कसरी ल्याउने सोच बनाउनु भएको छ भन्ने जस्ता प्रश्न सोधिएको थियो,’ सो प्रस्तुतीकरण तथा अन्तरवार्तामा सहभागीहरुले भने । डा. पौडेलले केही आवेदकहरुसँग भने राष्ट्र बैंकले मौद्रिक नीतिमार्फत ल्याएको मार्जिन प्रकृतिको सेयरधितो कर्जाको ४ करोड र १२ करोडको सीमा ठीक हो कि होइन भनेर पनि सोधका थिए । सम्बन्धित समाचार सेवोन अध्यक्षका ३ प्रत्यासीः घरजग्गा, सेयर बजारदेखि बैंकसम्मका विज्ञ, कसको सम्भावना बलियो ?

काठमाडौं । एक्सेल डेभलपमेन्ट बैंकको प्रमुख कार्यकारी अधिकृत (सीईओ) मा डा. ईन्द्रकुमार कट्टेल नियुक्त भएका छन् । फागुन ३ गते बसेको बैंक सञ्चालक समितिको बैठकले कट्टेललाई सीईओ पदमा नियुक्त गर्ने निर्णय गरेको हो । सञ्चालक समितिले चैत २९ गतेबाट लागू हुने गरी सीईओमा कट्टेललाई नियुक्त गरेको हो । यससँगै नवनियुक्त सीईओ कट्टेलले चैत २९ गतेदेखि आगामी ४ वर्षसम्म संस्थाको कार्यकारी प्रमुखको कार्यभार सम्हाल्ने छन् ।

काठमाडौं । हिमालयन जनरल इन्स्योरेन्सका नवनियुक्त प्रमुख कार्यकारी अधिकृत (सीईओ) विजयबहादुर शाहले आईतबारदेखि कार्यभार सम्हाल्ने भएका छन् । गत बुधबार कम्पनीको सीईओ पदमा नियुक्त भएका सीईओ शाहले आगामी आइतबार अर्थात फागुन १ गतेदेखि कार्यभार सम्हाल्न लागेका हुन् । गत माघ २६ गते बसेको इन्स्योरेन्सको सञ्चालक समितिको बैठकले सीईओ सुशील बज्राचार्यलाई बिदाइ गर्दै शाहलाई नयाँ सीईओमा नियुक्त गर्ने निर्णय गरेको हो । कम्पनीका अनुसार नवनियुक्त सीईओले फागुन १ गतेदेखि कार्यभार सम्हाल्ने बताएको छ । यता सीईओ शाहले पनि आइतबारदेखि कम्पनीमा हाजिर हुने विकासन्युजलाई जानकारी गराएका छन् । शाहको नियुक्ति स्वीकृतिको लागि कम्पनीले गत बुधबार नै बीमा समितिमा पत्र समेत पठाइसकेको छ । तर, बीमा समितिले भने हालसम्म स्वीकृति दिइसकेको छैन र स्वीकृति दिने प्रकृयामै रहेको समिति श्रोतले बतायो । कम्पनीका तत्कालिन सीईओ बज्राचार्यले डेढ वर्ष अघि नै कम्पनीबाट बाहिरिएका हुन् । २०७६ साउन १ गते ४ वर्षको लागि नियुक्त भएका बज्राचार्य डेढ वर्ष अघि नै इन्स्योरेन्सको उक्त पदबाट बाहिरिएका हुन् । कम्पनीले आपसी सहमतिमा करार संशोधन गरी उनको कार्यकाल यही माघ मसान्तसम्मको लागि कायम गर्ने निर्णय गरेसँगै उनी कम्पनीबाट बिदा भएका हुन् । सम्बन्धित सामाग्री: को हुन् सीईओ शाह ?