एकैदिनमा उदयपुरकाे ११ जनामा देखियो कोरोना, संक्रमित संख्या ४२ पुग्यो
काठमाडाैं । एकैदिनमा उदयपुरका ११ जनामा कोरोना भाइरस (कोभिड-१९) को संक्रमण पुष्टि भएको छ । धरानस्थित विपी कोइराला स्वास्थ्य विज्ञान प्रतिष्ठानमा ८ र टेकुस्थित राष्ट्रिय जनस्वास्थ्य प्रयोगशालामा गरिएको परीक्षणमा ३ जनामा संक्रमण देखिएको स्वास्थ्य मन्त्रालयले जनाएकाे छ। उदयपुरको भुल्केस्थित एक मस्जिदमा रहेका १३ जना कोरोना संक्रमितसँग सम्पर्कमा आएका ११ जनामा कोरोनाभाइरस संक्रमण पुष्टि भएको हाे। याे सँगै उदयपुरमा मात्र कोरोना संक्रमितको संख्या २४ पुगेको छ। विराटनगरको कोसी अस्पतालको प्रयोगशालामा परीक्षण गर्दा नतिजा शंकास्पद आएपछि मंगलबार धरानमा गरिएको पुनः परीक्षणमा ८ जनामा र टेकुस्थित राष्ट्रिय जनस्वास्थ्य प्रयोगशालामा गरिएको परीक्षणमा उदयपुरकै ३ जनामा कोरोना देखिएको हो। योसँगै कोरोना संक्रमितको संख्या ४२ पुगेको छ जसमा ५ जना निको भएर घर फर्किएका छन्।
नर्भिक हस्पिटलमा उपचारत एक बिरामीमा आरडिटी पोजिटिभ भन्ने समाचार गलत
काठमाडौं । नर्भिकमा उपचाररत एक बिरामीमा आरडिटी पोजिटिभ भन्ने समाचार गलत रहेको नर्भिक इन्टरनेशनल हस्पिटलले जनाएकाे छ । हस्पिटलले मंगलबार एक विज्ञप्ति जारी गरी २०७७ बैशाख ९ गते विभिन्न सामाजिक सञ्जाल तथा अनलाईन मिडियाहरुमा आएकाे उक्त समाचार गलत भएकाे जानकारी गराएकाे छ । सामान्य ज्वरो आई गत सोमबारदेखि नर्भिकमा उपचाररत एक ५० वर्षीया महिलामा कोरोनाको शंकाका कारण निजको पिसिआर परीक्षणका लागि स्वाव बीर अस्पतालको प्रयोगशालामा पठाइएको थियो । सो परीक्षणको नतिजा प्राप्त भइसकेको तथा नतिजा नकारात्मक (निगेटिभ) आएको नर्भिकले जानकारी गराएकाे छ ।
सुदूरपश्चिमका पहिलाे काेराेना संक्रमित युवकले पनि जिते काेराेना, अस्पतालबाट डिस्चार्ज
काठमाडाैं । सुदूरपश्चिमका पहिलो कोरोना संक्रमित युवक निकाे भएर घर फर्किएका छन् । उनी सेती प्रादेशिक अस्पतालबाट अहिले डिस्चार्ज भएका हुन्। धनगढी उप–महानगरपालिका वडा नम्वर ५ का ३४ बर्षीय युवकको लगातार दुई पटक सम्म कोरोना परीक्षण रिपोर्ट नेगेटिभ आएपछि उनलाई अस्पतालले डिस्चार्ज गरेको हो। दुबइबाट आएका उनमा चैत १४ गते कोरोना पुष्टि भएको थियो। उनको तीन पटक परीक्षण गर्दा सम्म कोरोना रिपोर्ट पोजेटिभ देखाएको थियो। उनी ३० दिन सम्म अस्पतालमा उपचार गराएपछि डिस्चार्ज भएका हुन्। यसअघि सेतीमै उपचाररत लम्कीका २१ बर्षीय संक्रमित युवक पनि डिस्चार्ज भएका थिए। अव सेतीमा तीन जना संक्रमितको उपचार भईरहेको छ। याे सँगै काेराेनाबाट निकाे हुनेकाे संख्या ५ पुगेकाे छ ।
