नेपालमा थप एकजनाकाे काेराेनाबाट मृत्यु, काे हुन् उनी ?
काठमाडौं । नेपालमा थप एकजनाकाे काेराेनाबाट मृत्यु भएकाे छ । स्वास्थ्य मन्त्रालयको नियमित पत्रकार सम्मेलनमा नेपालमा थप एकजनाकाे काेराेनाबाट मृत्यु भएकाे प्रवक्ता विकास देवकोटाले बताएका छन् । उनकाे बुधबार मृत्यु भएको र उनी त्रिवि शिक्षण अस्पताल महाराजगन्जमा उपचाररत दोलखाका पुरूष रहेकाे देवकोटाले बताएका छन् । दोलखा भिमेश्वर नगरपालिका-२ का ७६ वर्षीय वृद्धको महाराजगन्जस्थित टिचिङ अस्पतालको गणेशमान भवनको आइसियूमा उपचार भइरहेको थियो। हेमाेरेजिक स्ट्रोक भएकाे कारण उनलाई जेठ १३ गते सिनामंगलको केएमसी अस्पताल ल्याईएकाे थियाे । उनको न्यूरो सर्जरी गरिएको थियो। जेठ १४ गते उनकाे स्वाब संकलन गरेपछि उनमा काेराेना पाेजेटिभ देखिएपछि थप उपचारकाे लागि त्रिवि शिक्षण अस्पताल सारिएकाे थियाे । यससँगै नेपालमा कोरोनाबाट मृत्यु हुनेको संख्या ९ पुगेको छ ।
त्रिवि शिक्षण अस्पतालमा उपचाररत ६ वर्षीय बालिका सहित १२ जना काेराेना मुक्त
काठमाडौं । बुधबार त्रिवि शिक्षण अस्पतालमा उपचाररत ६ वर्षीय बालिका सहित १२ जनाले काेराेनालाई जितेका छन् । स्वास्थ्य मन्त्रालयको नियमित पत्रकार सम्मेलनमा ६ वर्षीय बालिका सहित १२ जनाले काेराेनालाई जितेकाे प्रवक्ता विकास देवकोटाले बताएका छन् । देवकाेटाकाे अनुसार त्रिवि शिक्षण अस्पतालबाट कपिलवस्तुकी ६ वर्षिय बालिका, टेकु अस्पतालबाट काठमाडौंका ६९ वर्षीय एक जना पुरुष, बलम्बुस्थित सशस्त्र प्रहरी अस्पतालबाट रौतहटका ३४ वर्षीय पुरुष, जनकपुर अस्पतालबाट पाँच जना, र बुटबलबाट चार जना डिस्चार्ज भएका हुन्। याेसँगै नेपालमा काेराेना जित्नेकाे संख्या २ सय ७८ पुगेकाे छ ।
थप २ सय १ जनामा संक्रमण पुष्टि, नेपालमा कोरोना संक्रमितकाे संख्या २३ सय नाघ्याे
काठमाडौं । बुधबार २ सय १ जनामा कोरोना संक्रमण पुष्टि भएकाे छ । स्वास्थ्य मन्त्रालयको नियमित पत्रकार सम्मेलनमा नेपालमा थप २ सय १ जनामा कोरोना देखिएको प्रवक्ता विकास देवकोटाले बताएका छन् । देवकोटाले बुधबार धनकुटाका १, सप्तरीका १, ताप्लेजुङका ३, झापाका २, पाँचथरका १, सुनसरीका ७, पर्साका ७, दैलेखका ७, सल्यानका ३, मोरङका २, तेह्रथुमका १, सुनसरीका १, कैलालीका ३, डोटीका २, कपिलवस्तुका ६९, पाल्पाका २, रूपन्देहीका २७, महोत्तरीका ९, कालीकोटका ७, दाङका ५, प्युठानका २, धनुषाका १, काठमाडौं मेडिकल कलेज र टोखाका ३, नवलपरासीका ८, रौतहटका ११, सर्लाहीका १५, सिन्धुपाल्चोकका १ जनामा काेराेना थपिएकाे जानकारी दिए। याेसँगै नेपालमा काेराेना संक्रमितकाे संख्या २३ सय पुगेकाे छ जसमा २ सय ७८ जना निकाे भएका छन् र ९ जनाकाे मृत्यु भईसकेकाे छ ।
