स्वास्थ्य मन्त्रालयका प्रवक्ता डा. विकास देवकोटालाई हटाईयो
काठमाडौं । स्वास्थ्य तथा जनसंख्या मन्त्रालयका प्रवक्ता डा. विकास देवकोटालाई हटाईएको छ । उक्त स्थानमा मन्त्रालयले परोपकार प्रसुति तथा स्त्रीरोग अस्पताल पुर्व निर्देशक डा. जागेश्वर गौतमलाई नियुक्त गरेको छ । देवकोटालाई मन्त्रालयको गुणस्तर मापन तथा नियमन महाशाखाको जिम्मेवारी दिइएको छ। उनले आईतबारसम्म गरेर ७६ दिन मन्त्रालयका काेभिड-१९ सम्बन्धि नियमित लाईभ कार्यक्रम संचालन गरेका छन् । गाैतमलाई बिहीबार मन्त्रालय तानिएकाे थियाे र उनकाे जिम्मेवारी कोशी अस्पताल विराटनगरकी मेडिकल सुपरीटेन्डेन्ट डा. संगीता मिश्रालाई दिइएको छ।
सुदूरपश्चिममा कोरोना परीक्षणमा ढिलाई
भीमदत्तनगर । प्रयोगशालाको कमी तथा आवश्यक जनशक्ति अभावका कारण सुदूरपश्चि प्रदेशमा कोरोना परीक्षणमा ढिलाई हुन थालेको छ । पिसीआर विधिबाट धनगढीमा प्रयोगशालाबाट कोरोना परीक्षण हुँदै आएको भए पनि स्वाब सङ्कलन धेरै भएकाले पाँच दिनका लागि नमूना सङ्कलन स्थगन गरिएको छ । सुदूरपश्चिम प्रदेश स्वास्थ्य निर्देशनालयका निर्देशक डा गुणराज अवस्थीले तीन दिनपछि स्वाब सङ्कलन पुनः शुरु गरिने जानकारी दिए । “हामीसित अझै एक १६० स्वाब परीक्षण गर्न बाँकी छ ।” निर्देशक डा अवस्थीले भने, “स्वाब स्टोर गर्ने क्षमता कम भएकाले केही समय नमूना सङ्कलन स्थगन गरेका हौँ ।” उनले सुर्खेत र काठमाडौँ प्रयोगशालामा स्वाब पठाएर परीक्षण गर्न पहल गरे पनि सबैतिर चाप रहकाले नसकिएको बताए । “सबैतिर ल्याबहरुमा परीक्षणका लागि चाप छ”, उनले भने, “यहाँ हामी दैनिक २५० भन्दा बढी परीक्षण गर्न सक्दैनौँ ।” प्रदेश सरकारले सेती प्रादेशिक अस्पताल धनगढी, डोटी र बैतडीमा पिसीआर विधिबाट कोरोना परीक्षणका लागि प्रयोगशालाको स्थापनाको प्रक्रिया अघि बढे पनि सुस्त गतिमा छ । “सेतीमा प्रयोगशाला स्थापना भए हामीसित जनशक्ति खटाउन सकिने अवस्था भए पनि पहाडका दुई प्रयोगशालाका लागि जनशक्ति एक जना पनि छैन ।” अवस्थीले भने, “आगामी असार १५ गतेभित्र पिसीआर मेसिन यहाँ आइपुग्छ ।” धनगढीमा केन्द्रबाट पठाएको प्रयोगशाला सञ्चालनमा आउनुअघि यहाँ सङ्कलन गरिएका स्वाब सुर्खेत र काठमाडौँ प्रयोगशालामा परीक्षणका लागि पठाउने गरिएको थियो । भारतका विभिन्न स्थानबाट स्वदेश फर्किने क्रम बढेसँगै कोरोनाको सङ्क्रमण फैलिने सम्भावना बढिरहेको छ । शनिबार साझँसम्म सुदूरपश्चिम प्रदेशका ८८ वटै स्थानीय तहका क्वारेन्टिनमा ६२ हजार ५२७ जना बसिरहेका छन् । एक सय सात कोरोना सङ्क्रमित रहेको सुदूरपश्चिम प्रदेशका आइसोलेसन वार्डहरु सङ्क्रमित बिरामीले भरिएका छन् । आइसोलेसन वार्ड बढी रहेका कैलाली र कञ्चनपुरमा पनि सङ्क्रमितको चाप बढेपछि स्थानीय प्रशासनले आइसोलेसन वार्ड थप्ने गृहकार्य गरिरहेका छन् । यहाँका एक हजार ६०० भन्दा बढी स्थानमा क्वारेन्टाइन सञ्चालनमा ल्याएको भएपनि व्यवस्थापन नहुँदा समस्या भइरहेको छ । कञ्चनपुरको भीमदत्तनगरस्थित महाकाली अस्पताल व्यवस्थापन समितिका अध्यक्ष कृष्णदत्त जोशीले अस्पतालमा १८ जना सङ्क्रमितको उपचार भइरहेको बताए । “यहाँ क्षमता हुँदासम्म बिरामी राखिने कुरा भएको छ”, उनले भने, “भरिए पनि यहाँको सेफर अस्पताल र सीएमए महिला छात्रावासलाई पनि आइसोलेसन वार्ड बनाउने तयारी छ ।” त्यसैगरी अस्पतालमा निर्माण भइरहेको ५० श्ययाको अस्पताल निर्माण अन्तिम चरणमा पुगेको जोशीको भनाइ छ । सुदूरपश्चिममा कोरोना सङ्क्रमणबाट हालसम्म दुई जनाको मृत्यु भएको छ भने छ जनाको क्वारेन्टिनमा मृत्यु भएछ । जसमध्ये तीन जनाको कोरोना नेगेटिभ आएको छ । प्रदेश स्वास्थ्य निर्देशनालयका अनुसार हालसम्म सात हजार ४९ पिसीआर विधि र ३२ हजार ७५६ आरडिटी विधिबाट कोरोना परीक्षण गरिएको छ । कोभिड–१९ कञ्चनपुरका सम्र्पक व्यक्ति सिद्धराज भट्टमा पिसीआर स्वाब सङ्कलन स्थगन भए पनि स्थानीय पालिकाले सम्बन्धित तहमा आरडिटी विधिबाट परीक्षण गरिरहेको बताए । “हामीबाट आरडिटीका लागि किट लगेर पालिकासित भएको जनशक्तिले नै परीक्षण गरिरहेको छ”, भट्टले भने, “त्यसको तथ्याङ्क हामीकहाँ पनि पठाउने गरेका छन् ।” धनगढीस्थित पशुपक्षी अन्वेशण प्रयोगशालामा पनि जनशक्ति कमी रहेको छ । “प्रयोगशालाको पूरै टिम दैनिक १२ देखि १३ घण्टा खटिरहेको छ ।” प्रयोगशाला स्रोत भन्यो, “कर्मचारी अभावले पनि परीक्षणमा केही ढिलाइ हुन गइरहेको छ ।” रासस
राजविराजमा पिसीआरद्वारा परीक्षण शुरु
सप्तरी । सप्तरीको राजविराजस्थित गजेन्द्रनारायण सिंह अस्पतालमा कोभिड–१९ को परीक्षण गर्न स्वाब सङ्कलन शुरु भएको छ । पिसीआर उपकरण आएको १७ दिनपछि आजबाट औपचारिक परीक्षण थालिएको अस्पतालले जनाएको छ । स्वास्थ्य तथा जनसङ्ख्या मन्त्रालय तथा प्रदेश नं २ को सामाजिक विकास मन्त्रालयबाट खटिएको टोलीद्वारा पिसीआर मेसिन जडानकार्य गरेपछि स्वाब परीक्षण शुरु गरिएको अस्पतालका प्रमुख मेडिकल सुपरिटेन्डेन्ट डा चुमनलाल दासले जानकारी दिए । पहिलोपटक राजविराज नगरपालिका–१ स्थित राजदेवी माविको क्वारेन्टिनमा रहेको २२ जनाको स्वाब परीक्षण गरिएको छ । सङ्कलित स्वाब परीक्षणको प्रक्रियामा राखिएकाले आजै रिपोर्ट आउने उहाँले जानकारी दिए । यसअघि बिपी कोइराला स्वास्थ्य विज्ञान प्रतिष्ठान धरानबाट परीक्षण हुने गरेको थियो । धरानबाट स्वाबको रिपोर्ट आउन पाँच दिनदेखि सात दिनसम्म लाग्ने गरेकामा राजविराजमै परीक्षण कार्य शुरु भएपछि सहज हुने भएको छ । अस्पतालका मेडिकल सुपरिन्टेन्डेन्ट डा दासका अनुसार प्रयोगशालामा माइक्रो बायोलोजिष्ट, मेडिकल टेक्नोलोजिष्ट, ल्याब टेक्नेसियन, ल्याब असिस्टेन्ट र सहयोगीसमेत गरी १० जनशक्ति परिचालित भएका छन् । अस्पताल परिसरमा रहेको प्रयोगशाला भवनमा जडान गरिएको मेसिनमा एकपटकमा ९६ क्यासेट लाग्ने छ । एकपटकमा ९६ जनाको स्वाब परीक्षण गर्न सक्ने क्षमता रहे पनि शुरुमा केही कम स्वाबको नमूना परीक्षण गर्दै क्रमशः बढाइँदै लगिने अस्पतालले जनाएको छ । बाहिरको प्रयोगशालाबाट स्वाब रिपोर्ट आउन एक सातासम्म लाग्ने गरेकामा अब राजविराजमै परीक्षण हुने भएपछि कोरोना पहिचान कार्यमा तीव्रता आउने कोभिड–१९ व्यवस्थापन संयोजक डा रणजितकुमार झाले बताउनुभयो । सप्तरी जिल्लामा भारतको दिल्ली, मुम्बई, हरियाणा, पञ्जाब, बिहारलगायतबाट आएका एक हजार ८०२ जनालाई हाल सप्तरीको विभिन्न स्थानीय तहको क्वारेन्टिनमा राखिएको स्वास्थ्य कार्यालय सप्तरीले जनाएको छ । यसअघि धरान र विराटनगर पठाइएको ३७२ जनाको स्वाब रिपोर्ट आउन बाँकी छ । सप्तरीका सङ्क्रमित ७७ मध्ये ७६ राजविराजस्थित साइकृष्णा मेडिकल कलेज एण्ड हस्पिटलको आइसोलेसनमा राखिएको छ । एक सङ्क्रमित डिस्चार्ज भएका छन् । रासस
