प्रतिनिधिसभा निर्वाचन २०८२

काठमाडौं । प्रतिनिधिसभातर्फ एक मात्र निर्वाचन क्षेत्र रहेको हुम्लामा नेपाली कांग्रेसका उम्मेदवार जयपति रोकाया निर्वाचित भएका छन् । मुख्य निर्वाचन अधिकृतको कार्यालयका अनुसार कांग्रेसका रोकाया ८ हजार ७९६ मत प्राप्त गरेर विजयी भएका हुन् । उनका निकटतम प्रतिद्वन्द्वी नेपाल कम्युनिष्ट पार्टीका डा. दिपेन्द्र रोकायाले ७ हजार २४३ मत प्राप्त गरे । यस्तै नेकपा (एमाले)का दल फडेराले ४ हजार ३३१, रास्वपाका टासी ल्हाजोमले १ हजार, प्रलोपाका जटिल कार्कीले २४८, नेपाल कम्युनिष्ट पार्टी (माओवादी) का कुम्भ बुढाले १२८ र राष्ट्रिय प्रजातन्त्र पार्टीका छक्क बुढाले १२४ मत प्राप्त गरे । हुम्लाका ६४ मतदान केन्द्रमा २२ हजार ४६७ मत खसेको थियो ।

काठमाडौं । नवनिर्वाचित प्रतिनिधिसभा सदस्य टेकबहादुर गुरुङ मनाङको समग्र उन्नयनमा आफूले पहिलो प्राथमिकता दिने बताएका छन् । प्रतिनिधिसभा सदस्य पदमा निर्वाचित भएपछि उनले आफूलाई अमूल्य मतदान गरि विजयी गराउने सबै मतदातालाई विशेष धन्यवाद समेत दिए ।  प्रतिनिधि सभा सदस्य निर्वाचनमा नेपाली काङ्ग्रेसका उम्मेदवार गुरुङ २ हजार ४१५ मत प्राप्त गरी विजयी भएका हुन् । उनको प्रतिस्पर्धी नेपाली कम्युनिष्ट पार्टी (नेकपा) का यशोदा सुवेदी गुरुङले ४५४ मत प्राप्त गरेको मुख्य निर्वाचन अधिकृत रामप्रसाद पौडेलले जानकारी दिए । उनका अनुसार मङ्गोल नेसनल अर्गनाइजेसनका रामबहादुर गुरुङ (नवीन)ले नौ मत पाए । कूल ७ हजार मतदातामध्ये २ हजार ९२३ मत खसेको र ४५ मत बदर भएको जिल्ला निर्वाचन अधिकारी जीवन कुँवरले जानकारी दिए । जिल्ला कूल मतदाता ७ हजार रहेका छन् । अस्थायीसहित २९ मतदान केन्द्रमार्फत मतदाताले मतदान गरेका थिए । जिल्लाको विकासमा सक्रिय रहँदै उनी पर्यटन र पूर्वाधार विकाससँगै राजनितिक प्रतिनिधित्व गर्छन् ।  विसं २०११ मङ्सिर ११ गते मनाङ ङिस्याङ गाउँपालिका-८ टङ्की मनाङमा उनको जन्म भएको थियो  । ७१ वर्षीय नेता गुरुङ पार्टीका पाका नेताको रुपमा परिचित छन् । मनाङको पूर्वाधार, पर्यटन, उर्जा क्षेत्रमा विकासमा उनको विशेष योगदान रहेको छ । विसं २०७० मा दोस्रो संविधानसभा निर्वाचनमा पनि गुरुङ निर्वाचित भएका उनी विसं २०७४ को प्रतिनिधि सभा सदस्य निर्वाचनमा नेकपा (एमाले)का पोल्देन छोपाङ गुरुङसँग २८९ मतले पराजित भएका थिए । त्यसपछि उनी पुनः विसं २०७९ को प्रतिनिधि सभा सदस्य निर्वाचनमा निर्वाचित भएका थिए ।  नेपाली कांग्रेसका तत्कालीन सभापति सुशील कोइराला प्रधानमन्त्री हुँदा विसं २०७० फागुन १३ गतेदेखि विसं २०७२ पुस ९ गतेसम्म श्रम तथा रोजगार राज्यमन्त्रीसमेत बनेका थिए । विसं २०३६ सालमा वीपी कोइरालाबाट कांग्रेसको सदस्यता लिएर राजनीतिमा प्रवेश गरेका उनी कांग्रेस मनाङको पूर्व जिल्ला सभापति पनि हुन् ।

काठमाडौं । गत बिहीबार भएको प्रतिनिधिसभा सदस्य निर्वाचनअन्तर्गत आज मतगणना सम्पन्न हुँदा महोत्तरी क्षेत्र नं २ बाट राष्ट्रिय स्वतन्त्र पार्टीका दीपककुमार साह निर्वाचित भएका छन् ।  रास्वपाका साह ३२ हजार ७३२ मत प्राप्त गरी निर्वाचित भएको मुख्य निर्वाचन अधिकारी माधवप्रसाद अधिकारीले जानकारी दिए । उनका निकटतम प्रतिद्वन्द्वी जनता समाजवादी पार्टीका शरतसिंह भण्डारीले १० हजार १९८ र नेपाली कांग्रेसका किरण यादवले ९ हजार ७४५ मत प्राप्त गरेको मुख्य निर्वाचन अधिकृतको कार्यालयले जनाएको छ ।  सो क्षेत्रमा विभिन्न दलका र स्वतन्त्र समेत गरी ३७ उम्मेदवार चुनावी मैदानमा थिए ।