गण्डकीका १० जिल्ला अध्यक्षहरूले राखे एमालेमा माथिबाटै समीक्षा र पुनर्गठनको माग
काठमाडौं । नेकपा एमाले गण्डकी प्रदेशका १० वटा जिल्ला अध्यक्षहरूले पार्टीको पछिल्लो अवस्थाबारे गम्भीर चिन्ता व्यक्त गर्दै केन्द्रदेखि स्थानीय तहसम्म व्यापक समीक्षा र पुनर्गठन आवश्यक रहेको निष्कर्ष निकालेका छन्। फागुन २८ गते सम्पन्न भेलापछि सार्वजनिक गरिएको साझा धारणाअनुसार अध्यक्षहरूले पार्टीको वर्तमान राजनीतिक, संगठनात्मक तथा कार्यशैलीगत अवस्थाको वस्तुनिष्ठ समीक्षा अपरिहार्य भएको बताएका छन् । उनीहरूले यस्तो समीक्षा ढिलाइ नगरी केन्द्र तहबाटै सुरु गर्नुपर्नेमा जोड दिए । गण्डकीका अध्यक्षहरूको निष्कर्षमा पार्टी नेतृत्व र कार्यशैलीमा व्यापक रूपान्तरण आवश्यक देखिएको उल्लेख छ । ‘सबै तहको नेतृत्व र कार्यशैलीमा परिवर्तनसहित पुनर्गठन जरुरी छ, त्यसका लागि हामी तयार छौ,’ साझा धारणामा भनिएको छ । मनाङ अध्यक्षबाहेकका १० अध्यक्षहरूको भेलाले वामपन्थी, देशभक्त तथा राष्ट्रवादी शक्तिहरूबीच आत्मालोचनासहित संवाद र सहकार्यको वातावरण बनाउन पहल गर्नुपर्ने आवश्यकता समेत औंल्याएको छ । पछिल्लो राजनीतिक परिवेशमा समान विचारधाराका शक्तिहरूबीच सहकार्यको आधार कमजोर बन्दै गएको भन्दै त्यसलाई पुनः सुदृढ बनाउनुपर्ने अध्यक्षहरूको धारणा रहेको छ । उनीहरूले पार्टी, जनप्रतिनिधि र जनताबीचको सम्बन्धमा आएको दूरीप्रति पनि चिन्ता व्यक्त गरेका छन् । यस विषयमा गम्भीर समीक्षा गर्दै जनताको भावना र सामाजिक आवश्यकतामा केन्द्रित नयाँ कार्ययोजना निर्माण गर्नुपर्ने बताएका छन् । प्रतिनिधि सभा निर्वाचनमा पराजय भोगेपछि नेकपा एमालेभित्र पार्टी पुनर्गठनको माग जबरजस्त उठ्न थालेको छ । लुम्बिनी प्रदेशको तानसेन नगर कमिटीले नयाँ अधिवेशन जेठ ३ गते गर्नेगरी नगर कमिटी विघटन गरेको छ । तानसेन नगर कमिटी विघटन भएसँगै गण्डकी प्रदेशमा पनि पार्टी पुनर्गठनको बहस तीव्र हुन थालेको छ । मुस्ताङका जिल्ला अध्यक्ष दिपक लालचनका अनुसार केही दिन पहिले भएको भेला समग्र पार्टी पुनर्गठनको सुरुवात हो । भेलामा स्याङ्जा जिल्ला अध्यक्ष पारश गैरे सुरेश, पर्वत अध्यक्ष गोविन्द गिरी पहाडी, तनहुँ अध्यक्ष हरिराज कँडेल, मुस्ताङ अध्यक्ष दीपक लालचन, कास्की अध्यक्ष बैनबहादुर क्षेत्री र म्याग्दी अध्यक्ष बालकृष्ण सुवेदीलगायतको सहभागिता रहेको थियो ।
ललितपुरमा लापसे गर्ने राइड सेयरिङ चालकसहित ६ जना पक्राउ
काठमाडौं । लागूपदार्थ सेवन (लापसे) गरी सवारीसाधन चलाउने ६ जनालाई ट्राफिक प्रहरीले कारवाही गरेको छ। मंगलबार ललितपुर महानगरपालिका २७ सुनाकोठीमा गरिएको लापसे चेकिङका क्रममा ६ जना चालकलाई ट्राफिक प्रहरीले नियन्त्रणमा लिएको हो । जसमध्ये मिनी ट्रक चालक २ जना, मोटरसाइकल (राइड सेयिरिङ) चालक २ जना र स्कुटर चालक २ जना रहेका छन् । नेपाल प्रहरी अस्पतालको प्राविधिक टोली सहितको सहयोगमा काठमाडौं उपत्यका ट्राफिक प्रहरी कार्यालय, लागुऔषध नियन्त्रण ब्यूरो र ट्राफिक प्रहरी प्रभाग चापागाउँको संयुक्त टोलीले चेक गर्दा लागूपदार्थ सेवन गरी सवारी साधन चलाइरहेको अवस्थामा ६ जना चालक फेला परेका थिए । नियन्त्रणमा आएका उनीहरूलाई थप अनुसन्धानका लागि प्रहरी वृत्त चापागाउँ ललितपुर पठाइएको छ ।
पार्टी पुनर्गठनको माग गर्दै एमाले तानसेन नगर कमिटी विघटन, जेठ ३ मा अधिवेशन गरिने
काठमाडौं । पार्टीभित्र नेतृत्व पुनर्गठनको माग तीव्र बन्दै गइरहेका बेला नेकपा एमालेले पाल्पाको तानसेन नगर कमिटी विघटन गरेको छ । नयाँ संरचना निर्माण र संगठन सुदृढीकरणको उद्देश्यसहित नगर कमिटी भंग गरिएको अध्यक्ष गुराँस आत्रेयले जानकारी दिए। आत्रेयका अनुसार निर्वाचन परिणामलगत्तै आफूले मात्रै राजीनामा दिने तयारी गरे पनि सिँगै कमिटीले आफूलाई साथ दिएपछि कमिटी नै विघटन गरिएको हो । उनले नगर कमिटी विघटनसँगै नयाँ कमिटी गठनका लागि आगामी जेठ ३ गते अधिवेशन गर्ने निर्णय गरिएको जानकारी दिए । त्यस्तै, तीन महिनाभित्र सबै वडा कमिटीहरूले पनि अधिवेशन सम्पन्न गर्ने गरी कार्यतालिका तय गरिएको उनले बताए । ‘एमालेले समयमै आफूलाई पुनर्ताजगीमा लाग्नुपर्ने समय आएको छ । त्यसैले यसको सुरुवात मैले गरेको हुँ,’ आत्रेयले भने । वर्तमान केन्द्रीय नेतृत्व परिवर्तन नभएसम्म पार्टी प्रभावकारी रूपमा अघि बढ्न नसक्ने निष्कर्षसहित यो कदम चालिएको हो । आत्रेयले नेतृत्व पुनर्गठनका लागि जिल्ला र केन्द्रीय कमिटीलाई दबाब सिर्जना गर्ने उद्देश्यले पनि नगर तथा वडा कमिटीहरू विघटन गरिएको स्पष्ट पारे ।
फोहोर प्रशोधन केन्द्र बनाउन भरतपुरले छुट्यायो ३ करोड
चितवन । भरतपुर महानगरपालिकाको फोहोर प्रशोधन केन्द्र निर्माणका लागि वन मन्त्रालयसँग जग्गा लिने प्रक्रिया अन्तिम चरणमा पुगेको छ । जग्गाको भोगाधिकार र वृक्षरोपणका लागि मन्त्रालयलाई भुक्तान गर्नुपर्ने रकम महानगरले विनियोजन गरेको छ । महानगरपालिकाका कार्यवाहक प्रमुख चित्रसेन अधिकारीका अनुसार भरतपुर महानगरपालिका–११ मा रहेको राष्ट्रिय वन क्षेत्रमा करिब १६ बिगाह जग्गा भोगाधिकारका लागि आवश्यक ३ करोड बजेट कार्यपालिकाले सुनिश्चित गरेको छ । महानगरपालिकाले यसअघि नै ५ करोड १९ लाख ७५ हजार भुक्तान गरिसकेको छ । मन्त्रालयले वातावरणीय प्रभाव मूल्याङ्कन तयार भई स्वीकृत भएपछि रकम भुक्तान गर्न भनेको अधिकारीले जानकारी दिए । उनका अनुसार वातावरण प्रभाव मूल्याङ्कनका लागि आवश्यक तथ्याङ्क र कागजातहरू उपलब्ध गराइसकिएको छ । मन्त्रालयले वातावरण प्रभाव मूल्याङ्कन स्वीकृत भएपछि रूख कटान थाल्ने आश्वासन दिएको छ । जग्गा भोगाधिकार र एक बिरुवा कटान गरे बापत १० बिरुवा रोपेर पाँच वर्षसम्म संरक्षणका लागि महानगरले यसअघि नै ५ करोड १९ लाख ७५ हजार भुक्तान गरेको महानगरपालिकाको वातावरण महाशाखा प्रमुख विराट घिमिरेले बताए । अब रोपिने बिरुवा संरक्षणका लागि १ करोड ९० लाख विनियोजन गरिएको हो । हाल महानगरपालिकामा दैनिक ८० टन भन्दा बढी फोहोर सङ्कलन हुने गरेको छ जसलाई आँपटारीको नजिकै खोल्सामा व्यवस्थापन हुँदै आएको छ ।
चिनियाँ राष्ट्रपतिको किताब जलाउनेलाई कारबाही गरिने
काठमाडौं । सरकारले मनमोहन प्राविधिक कलेजमा चिनियाँ राष्ट्रपतिको किताब जलाउनेलाई कारबाही गर्ने भएको छ । जिल्ला प्रहरी कार्यालय, मोरङले जिल्ला प्रशासन कार्यालय, मोरङसँग समन्वय गरेर कारबाही प्रक्रिया अगाडि बढाउने भएको हो । मोरङ प्रहरीले पत्र अध्ययन गरी जिल्ला प्रशासन कार्यालय, मोरङको निर्देशनअनुसार कारबाही प्रक्रिया अगाडि बढ्ने जनाइएकाे छ । मोरङ जिल्ला प्रशासन कार्यालयका सहायक प्रमुख जिल्ला अधिकारी पवनराज कोइरालाले गृह मन्त्रालयको पत्र अनुसार कारबाही प्रक्रिया अगाडि बढाइने जानकारी दिए । ‘यस विषयमा क-कसलाई कारबाही प्रक्रिया अगाडि बढाइन्छ भन्ने कुरा साँझ थाहा हुन्छ । किताबको जलाएको विषयमा छानबिन समितिसमेत बनाइएको छ,’ उनले भने । समितिले बुझाएको प्रतिवेदनको आधारमा कारबाही अगाडि बढाइने उनले बताए । गृह मन्त्रालयले नेपाल–चीन सम्बन्धलाई असर पुर्याउने किसिमको घटनाका सम्बन्धमा छानबिन गरी दोषी उपर आवश्यक कारवाही गर्न नेपाल प्रहरीलाई निर्देशन दिइसकेको छ । मोरङको मनमोहन टेक्निकल इन्स्टिच्युटमा चिनियाँ राष्ट्रपति सि जिन पिङको ‘द गभर्नेन्स अफ चाइनाले’ भन्ने किताब जलाएको विषयमा चीनले परराष्ट्र मन्त्रालयमार्फत ध्यानाकर्षण गराएको थियो । गत शनिबार मनमोहन कलेजमा कलेजका ल्याबका लागि वर्क सप बनाउन कोठा खाली गरेर राष्ट्रपतिको किताब जलाइएको थियो । चिनियाँ राष्ट्रपतिको पुस्तक जलाएको घटना सम्बन्धमा छानविन गरी कारवाही गर्न गृह मन्त्रालयको निर्देशन सी जिनपिङको पुस्तक जलाइएकोबारे चिनियाँ दूतावासको चासो, घटना के हो ?
एभरेष्ट बैंकले ३ अर्बको ऋणपत्र ल्याउँदै, बिक्री प्रबन्धकमा लक्ष्मी सनराइज क्यापिटल
काठमाडौं । एभरेष्ट बैंकले ऋणपत्र जारी गर्ने भएको छ । बैंकले ३ अर्ब रुपैयाँ बराबरको ‘एभरेष्ट बैंक लिमिटेड ऋणपत्र २०८८’ जारी गर्न लागेको हो । ऋणपत्र जारी प्रक्रियाका लागि बैंकले बिक्री प्रबन्धकमा लक्ष्मी सनराइज क्यापिटललाई नियुक्त गरेको छ । उक्त सम्झौतामा एभरेष्ट बैंक लिमिटेडको तर्फबाट प्रमुख कार्यकारी अधिकृत (सीईओ) सुदेश खालिङ्ग र लक्ष्मी सनराइज क्यापिटलको तर्फबाट सीईओ विजयलाल श्रेष्ठले हस्ताक्षर गरे । बैंकको प्रतिकित्ता १ हजार रुपैयाँका दरले ३० लाख युनिट ऋणपत्र बिक्री गर्ने जनाएको छ । जसमध्ये ४० प्रतिशत अर्थात एक अर्ब २० करोड बराबरको १२ लाख युनिट सर्वसाधारणलाई र बाँकी ६० प्रतिशत एक अर्ब ८० करोड बराबरको १८ लाख युनिट व्यक्तिगत तबरबाट बिक्री गरिने बैंकले जनाएको छ । ६ वर्ष अवधिको उक्त ऋणपत्रमा वार्षिक ६.२५ प्रतिशत दरले ब्याज भुक्तानी अर्धवार्षिक रूपले ६/६ महिनाको अवधिमा हुनेछ ।
दोहोरो अंकले बढ्यो नेप्से, १२ अर्ब ३ करोडको कारोबार
काठमाडौं । साताको तेस्रो कारोबार दिन मंगलबार (आज) नेप्से दोहोरो अंकले बढेको छ । आज नेपाल स्टक एक्सचेन्ज (नेप्से) परिसूचक १३.५१ अंकले बढेर २८१२.३४ विन्दुमा कायम भएको छ । आज नेप्से बढेसँगै कारोबार रकमसमेत बढेको छ । ३४० स्टकको १ लाख ६ हजार १४० पटकमा ३ करोड ४८ लाख ५२ हजार ७६० कित्ता सेयर खरिदबिक्री हुँदा १२ अर्ब ३ करोड ४४ लाख ६ हजार रुपैयाँको कारोबार भएको छ । आज दुई कम्पनीको सेयरमा सकारात्मक सर्किट लागेको छ । रिलायन्स स्पिनिङ मिल्स र सोलु हाइड्रोपावरको सेयरमा सकारात्मक सर्किट लागेको नेप्सेले जनाएको छ । त्यस्तै, एनआईसी एशिया ग्रोथ फण्ड २ का लगानीकर्ताले सबैभन्दा धेरै गुमाएका छन् । आज कारोबार रकमको आधारमा रिदी पावर कम्पनीको सबैभन्दा धेरै कारोबार भएको छ । उक्त कम्पनीको ५६ करोड ३७ लाख ६१ हजार रुपैयाँको कारोबार भएको छ । दोस्रो धेरै कारोबार हुने कम्पनीमा आँखु खोला जलविद्युतमा ५१ करोड ७५ लाख ९३ हजार रुपैयाँको कारोबार भएको छ । त्यस्तै, नेशनल हाइड्रोपावर कम्पनी ४८ करोड ५ लाख रुपैयाँ, हिमाल दोलखा हाइड्रोपावरको ४६ करोड ३३ लाख रुपैयाँ र शि श्री हाइड्रोपावरको ४४ करोड ५९ लाख रुपैयाँको कारोबार भई शीर्ष पाँचमा प्रवेश गरेका छन् । आज ६ उपसमूह बढेको छ भने बाँकी घटेका छन् । बैंकिङ ०.८४, विकास बैंक ०.६४, जलविद्युत १.५९, लगानी ०.६१, उत्पादन ०.२९ र म्युचल फण्ड ०.२५ प्रतिशतले बढेको नेप्सेले जनाएकाे छ ।
‘ग्लोबल मनी विक’ अन्तर्गत सम्पदा लघुवित्तको वित्तीय साक्षरता तथा सचेतना कार्यक्रम सम्पन्न
नवलपरासी । विश्वव्यापी रूपमा मार्च १६ देखि २४ सम्म सञ्चालन हुँदै आएको ‘ग्लोबल मनी विक २०२६’ को अवसर पारेर सम्पदा लघुवित्त वित्तीय संस्था लिमिटेडले वित्तीय साक्षरता कार्यक्रमहरू सम्पन्न गरेको छ । संस्थाको शाखा कार्यालय अमरापुरी, नवलपरासीद्वारा गैंडाकोट–१५ स्थित लक्ष्मी माध्यमिक विद्यालयमा अध्ययनरत ५० जनाभन्दा बढी विद्यार्थीहरूको सहभागितामा वित्तीय सचेतना र्‍‍र्याली तथा साक्षरता तालिम आयोजना गरिएको हो । लक्ष्मी माध्यमिक विद्यालयका प्रधानाध्यापक सुरेन्द्रराज भट्टराईको अध्यक्षतामा सम्पन्न उक्त कार्यक्रममा प्रधानाध्यापक भट्टराईले वर्तमान अवस्थामा वित्तीय साक्षरताको महत्त्वमाथि प्रकाश पार्दै सिकेका कुरालाई व्यवहारमा उतार्न विद्यार्थीहरूलाई आग्रह गरे । सोही अवसरमा माध्यमिक शिक्षक टिकाराम सुवेदीले कार्यक्रमको सफलताको शुभकामना दिएका थिए भने स्थानीय प्रहरी चौकीका प्रमुख सानुकाजी विष्टको टोलीले कार्यक्रमको सुरक्षा व्यवस्था मिलाउन सहयोग गरेको थियो। यसैगरी, संस्थाको शाखा कार्यालय बेलौरीले पनि कञ्चनपुरको बेलौरी नगरपालिका वडा नं। १० मा संस्थाका सदस्य, अभिभावक र वडा प्रतिनिधिहरू गरी करिब ४० जनाको उपस्थितिमा वित्तीय साक्षरता कार्यक्रम सम्पन्न गरेको छ । कार्यक्रमको उद्देश्य र महत्त्वबारे संस्थाका नायव महाप्रबन्धक सीताराम पन्डितले स्पष्ट पारेका थिए । तालिमका क्रममा नायव महाप्रबन्धक पन्डित र असुली तथा अनुगमन अधिकृत कृष्ण रावलले ‘स्मार्ट मनी टक्स’ भन्ने मूल नाराका साथ बचत, कर्जा कारोबार, विप्रेषण, बीमा र सेयर सम्बन्धी जानकारी प्रदान गरेका थिए। सेसनमा सहभागीहरूलाई पारिवारिक बजेट निर्माण गर्ने तरिका र सम्भावित वित्तीय ठगीबाट बच्ने उपायहरूका बारेमा समेत सचेत गराइएको थियो । कार्यक्रमको अन्त्यमा लक्ष्मी माध्यमिक विद्यालयका विद्यार्थी र संस्थाका कर्मचारीहरूको सहभागितामा वित्तीय सचेतना जगाउने उद्देश्यले र्याली समेत निकालिएको थियो । सम्पदा लघुवित्तले यस साताभरि अर्थात् चैत २ देखि चैत ८ गतेसम्म देशका सातै प्रदेशमा युवा तथा विद्यार्थीहरूलाई लक्षित गरी ग्लोबल मनी विक र वित्तीय साक्षरताका विभिन्न कार्यक्रमहरू सञ्चालन गर्ने योजना बनाएको जानकारी दिएको छ ।
